បណ្តាប្រទេសអាស៊ីអាគ្នេយ៍នឹងឃើញមានការកើនឡើងទឹកភ្លៀងខ្ពស់ជាងធម្មតានៅខែចុងក្រោយនៃឆ្នាំ ២០២៤ ដែលនឹងគំរាមកំហែងដល់ផលិតកម្មកសិកម្ម ទេសចរណ៍ និងឧស្សាហកម្ម។
យោងតាមសេចក្តីប្រកាសរបស់ទីភ្នាក់ងារជាតិគ្រប់គ្រងទឹក PUB បច្ចុប្បន្នព្យុះផ្គររន្ទះបានកំពុងគ្របដណ្តប់ប្រទេសសិង្ហបុរី ដោយបង្កឱ្យមានភ្លៀងធ្លាក់ខ្លាំងប្រហែល ១៣៤.៨ មីលីម៉ែត្រកាលពីថ្ងៃទី១៤ ខែតុលាកន្លងទៅ ដែលទឹកភ្លៀងនេះគឺស្មើនឹង ៨០% នៃទឹកភ្លៀងជាមធ្យមក្នុងខែតុលារបស់ប្រទេសសិង្ហបុរី ហើយក៏ជាទឹកភ្លៀងប្រចាំថ្ងៃខ្ពស់បំផុតចាប់តាំងពីឆ្នាំ ១៩៧៨ មកផងដែរ។

មិនត្រឹមតែប្រទេសសិង្ហបុរីប៉ុណ្ណោះទេ បណ្តាប្រទេសអាស៊ីអាគ្នេយ៍ផ្សេងទៀតក៏នឹងឃើញមានការកើនឡើងខ្ពស់ជាងទឹកភ្លៀងធម្មតានៅខែចុងក្រោយនៃឆ្នាំ ២០២៤ ផងដែរ ដែលនេះនឹងបង្កឱ្យមានការគំរាមកំហែងយ៉ាងខ្លាំងដល់ផលិតកម្មកសិកម្ម ទេសចរណ៍ ក៏ដូចជាឧស្សាហកម្មដែលត្រូវបានរំខានដោយព្យុះជាបន្តបន្ទាប់ក្នុងឆ្នាំនេះ។ ដូច្នេះសម្រាប់មូលហេតុដែលបង្កឱ្យមានភ្លៀងធ្លាក់ខ្លាំងខុសធម្មតានៅអាស៊ីអាគ្នេយ៍ គឺដោយសារបាតុភូត La Nina ដែលជាបាតុភូត​ផ្ទៃសមុទ្រ​នៅ​ចំ​កណ្ដាល និង​ភាគ​ខាងកើត​ខ្សែ​អេក្វាទ័រ នៅ​តំបន់​ប៉ាស៊ីហ្វិក ចុះ​ត្រជាក់​ជាង​ធម្មតា។ នេះបើយោងតាមទីភ្នាក់ងារព័ត៌មាន Bloomberg ដែលបានដកស្រង់ការព្យាករណ៍របស់មជ្ឈមណ្ឌលឧតុនិយមឯកទេសអាស៊ាន។

លោក Takahisa Nishikawa អ្នកដឹកនាំសកម្មភាពព្យាករណ៍នៅក្រុមហ៊ុន The Weather របស់សហរដ្ឋអាមេរិកបានព្យាករណ៍ថា ប្រទេសវៀតណាមនឹងទទួលរងនូវព្យុះត្រូពិចច្រើនជាងធម្មតាចាប់ពីពេលនេះរហូតដល់ខែមេសាឆ្នាំក្រោយ ជាមួយនឹងហានិភ័យនៃទឹកជំនន់ និងការបាក់ដី…ហើយតំបន់ដែលរងផលប៉ះពាល់ខ្លាំងជាងគេគឺ តំបន់ភាគខាងជើងនិងកណ្តាល។ ទន្ទឹមនឹងនេះទឹកជំនន់ក៏បានអូសបន្លាយនៅក្នុងខេត្តឈៀងម៉ៃ និងឈៀងរ៉ៃនៃប្រទេសថៃផងដែរ ដែលធ្វើឱ្យប្រទេសនេះខាតបង់ប្រាក់ប្រហែល ៣០ ពាន់លានបាត (ជិត ៩០០ លានដុល្លារអាមេរិក) ។

នៅប្រទេសហ្វីលីពីនបច្ចុប្បន្នក៏កំពុងជួបការលំបាកក្នុងការងើបឡើងវិញបន្ទាប់ពីរងការវាយប្រហារដោយព្យុះខ្លាំងជាបន្តបន្ទាប់ផងដែរ។ ប្រទេសនេះអាចនឹងទទួលបានភ្លៀងធ្លាក់ច្រើនជាងមធ្យមចាប់ពីពេលនេះរហូតដល់ចុងឆ្នាំ ២០២៤ នេះបើយោងតាមទីភ្នាក់ងារអាកាសធាតុរបស់ប្រទេស។ ដូច្នេះហើយតាមការព្យាករប្រទេសទាំងបីនេះ គឺអាចនឹងរងផលប៉ះពាល់ដោយព្យុះភ្លៀងផ្គររន្ទះខ្លាំងជាងគេក្នុងតំបន់អាស៊ីអាគ្នេយ៍៕

បន្ទាប់ពីប្រទេសថៃដែលជាប្រទេសកំពូលមានភ្ញៀវទេសចរទស្សនាច្រើនជាងគេក្នុងតំបន់ក្នុងអាស៊ីអាគ្នេយ៍ ប្រទេសវៀតណាមបច្ចុប្បន្នក៏កំពុងក្លាយជាគោលដៅទេសចរណ៍នាំមុខគេនៅអាស៊ីអាគ្នេយ៍ផងដែរ ដោយសារកត្តាចម្បងធំៗទាំងនេះ។ ក្នុងរយៈពេល ៧ ខែដំបូងនៃឆ្នាំ ២០២៤ ប្រទេសវៀតណាមបានស្វាគម៍ភ្ញៀវអន្តរជាតិជិត ១០ លាននាក់ ក្នុងនោះ ៧០% គឺជាភ្ញៀវដែលមកពីប្រទេសកូរ៉េខាងត្បូង ចិនដីគោក និងតៃវ៉ាន់។ ដោយអត្រាស្ទុះងើបឡើងវិញនៃវិស័យទេសចរណ៍ត្រូវបានប៉ាន់ប្រមាណថាមានការកើនឡើងខ្ពស់រហូតដល់ ៩៤.១%។ ដូច្នេះហេតុផលដែលភ្ញៀវបរទេសនិយមមកទស្សនាប្រទេសវៀតណាមច្រើនជាងគេគឺដោយសារកត្តាដូចខាងក្រោម៖

១.ការចំណាយទាប៖ យោងតាមក្រុមហ៊ុន Outbox ដែលជាអង្គភាពស្រាវជ្រាវទីផ្សារទេសចរណ៍បានស្ទង់មតិអ្នកទេសចរអន្តរជាតិចំនួន ២,៧០០ នាក់ដើម្បីស្វែងរកមូលហេតុដែលភ្ញៀវបរទេសភាគច្រើនចូលចិត្តទៅលេងប្រទេសវៀតណាម។ ដូច្នេះមូលហេតុដែលភ្ញៀវច្រើនចូលចិត្តទៅកម្សាន្តនៅប្រទេសនេះគឺដោយសារការចំណាយទាប។

ជាការពិតណាស់ការចំណាយដ៏សមរម្យរបស់វៀតណាមបានធ្វើឱ្យវាក្លាយជាកន្លែងទាក់ទាញបំផុតសម្រាប់អ្នកធ្វើដំណើរដែលគិតដល់ថវិកា។ ការចំណាយទាបក្នុងប្រទេសវៀតណាមអនុញ្ញាតឱ្យអ្នកធ្វើដំណើររីករាយនឹងបទពិសោធន៍ដែលមានតម្លៃខ្ពស់ក្នុងតម្លៃទាប ក៏ដូចជាកត្តាសន្សំសំចៃការចំណាយ ដែលនេះនឹងជួយវៀតណាមក្លាយជាជម្រើសដ៏ល្អបំផុតសម្រាប់ភ្ញៀវបរទេស ដែលចង់ស្វែងយល់ពីគោលដៅថ្មីៗដោយមិនមានតម្លៃថ្លៃ។

២.សុវត្ថិភាព៖ ៤០.៧% នៃអ្នកឆ្លើយសំណួរជឿថាវៀតណាមគឺជាគោលដៅសុវត្ថិភាពសម្រាប់ការធ្វើដំណើរនាពេលខាងមុខរបស់ពួកគេ។ វៀតណាមបានធ្វើឱ្យអ្នកទេសចរមានអារម្មណ៍ថាមានសុវត្ថិភាព ដោយសារអត្រាឧក្រិដ្ឋកម្មទាបជាងប្រទេសអាស៊ីអាគ្នេយ៍ផ្សេងទៀត។ នៅក្នុងរបាយការណ៍សន្ទស្សន៍សន្តិភាពសកលឆ្នាំ ២០២៣ វៀតណាមបានចាត់ចំណាត់ថ្នាក់ថាជាប្រទេស និងដែនដីមានសុវត្ថិភាពបំផុតដោយជាប់លេខ ៤១ ក្នុងចំណោម ១៦៣ ប្រទេស។

៣.វប្បធម៌ដ៏សម្បូរបែប៖ ប្រទេសវៀតណាមគឺជាគោលដៅដ៏ល្អមួយដែលមានប្រវត្តិសាស្ត្ររាប់ពាន់ឆ្នាំ ស្លាកស្នាមវប្បធម៌ដែលមានវត្តមាននៅក្នុងប្រាសាទបុរាណនីមួយៗ ទីក្រុងប្រវត្តិសាស្ត្រ ពិធីបុណ្យប្រពៃណី និងម្ហូបក្នុងស្រុក ដែលទាំងនេះសុទ្ធសឹងតែជាកត្តាទាក់ទាញភ្ញៀវទេសចរ ៤៥.២% ទៅកាន់ប្រទេសវៀតណាម។

៤.ធម្មជាតិដ៏អស្ចារ្យ៖ ៥២.១% នៃភ្ញៀវអន្តរជាតិបានចាប់អារម្មណ៍នឹងប្រទេសវៀតណាម គឺដោយសារតែធម្មជាតិដ៏អស្ចារ្យរបស់វា ដែលជាកម្លាំងចិត្តចម្បងសម្រាប់ពួកគេមកទីនេះ។ ទេសភាពនៃប្រទេសវៀតណាមមានភាពចម្រុះ ដែលលាតសន្ធឹងពីជើងទៅត្បូង ជាពិសេសគឺតំបន់ Ha Long ភ្ញៀវទេសចរអាចមើលឃើញភ្នំថ្មកំបោរនៅលើឈូងសមុទ្រ ដែលជាកន្លែងទាក់ទាញភ្ញៀវអន្តរជាតិរហូតដល់មួយលាននាក់ក្នុងឆមាសទីមួយនៃឆ្នាំ ២០២៤ នេះ។

មិនត្រឹមតែទាក់ទាញភ្នែកប៉ុណ្ណោះទេ អត្ថប្រយោជន៍ទេសភាពក៏ជួយឱ្យប្រទេសវៀតណាមផ្តល់នូវសកម្មភាពទេសចរណ៍ដែលទាក់ទងនឹងធម្មជាតិដូចជាការឡើងភ្នំ ការជិះទូក ឬសម្រាកលំហែនៅមាត់សមុទ្រ សម្រាប់ភ្ញៀវទេសចរ ខណៈអ្នកទេសចរខ្លះក៏ចូលចិត្តទៅទីជនបទពណ៌បៃតង ឬតំបន់ឆ្នេរស្អាត ដើម្បីជៀសវាងសម្លេងរំខានពីទីក្រុងផងដែរ៕

ប្រទេសឥណ្ឌា ៖ កាលពីថ្ងៃទី១៦ ខែតុលា ឆ្នាំ២០២៤ សារព័ត៌មានបរទេសរាយការណ៍ថា រយៈពេល២ថ្ងៃមកនេះ ក្រុមហ៊ុនអាកាសចរណ៍ឥណ្ឌាស្ថិតក្នុងភាពចលាចល ដោយសារមានការគំរា.ម ដាក់គ្រាប់បែ.ក ក្នុងយន្តហោះជាច្រើនគ្រឿង ។ យន្តហោះដឹកអ្នកដំណើរឥណ្ឌា១គ្រឿង ដែលហោះមកកាន់ប្រទេសសិង្ហបុរី ក៏បានរងការគំរា.ម ដាក់គ្រាប់បែ.ក ដែរ ប៉ុន្តែត្រូវបានយន្តហោះចម្បាំងសិង្ហបុរីជួយអន្តរាគមន៍ភ្លាមៗ និងនាំយកយន្តហោះនេះមកចុះចតនៅអាកាសយានដ្ឋានសិង្ហបុរីដោយសុវត្ថិភាព ។

សារព័ត៌មានបរទេសរាយការណ៍ថា កងទ័ពអាកាសសិង្ហបុរីបានបញ្ជូនយន្តហោះចម្បាំង F15-SG ចេញប្រតិបត្តិការ នៅថ្ងៃទី១៥ ខែតុលា កន្លងមក ក្រោយពីយន្តហោះដឹកអ្នកដំណើររបស់ឥណ្ឌា ជើងហោះហើរ AXB684 របស់ក្រុមហ៊ុនអាកាសចរណ៍ Air India Express រងការគំរាមដាក់គ្រាប់បែកផ្ទុះ ។ ប៉ុន្តែក្រោយពីសិង្ហបុរីជួយអន្តរាគមន៍ យន្តហោះនេះក៏អាចចុះចតដោយសុវត្ថិភាព នៅអាកាសយានដ្ឋានសិង្ហបុរីឈ្មោះ Changi ។

រដ្ឋមន្ត្រីក្រសួងការពារជាតិសិង្ហបុរីបានបញ្ជាក់ក្នុងហ្វេសប៊ុកថា ក្រុមហ៊ុនអាកាសចរណ៍ Air India Express បានទទួលអ៊ីម៉ែលគំរាមថា នឹងមានគ្រាប់បែកផ្ទុះក្នុងយន្តហោះ ជើងហោះហើរ AXB684 ដែលកំពុងហោះហើរមកកាន់សិង្ហបុរី ។ កងទ័ពអាកាសសិង្ហបុរីបានបញ្ជូនយន្តហោះចម្បាំង F15-SG 2 ធ្វើប្រតិបត្តិការនាំយន្តហោះដឹកអ្នកដំណើរនេះឱ្យហោះឆ្ងាយពីតំបន់ទីក្រុង ហើយនាំយន្តហោះនេះចុះចតនៅអាកាសយានដ្ឋានសិង្ហបុរី Changi ដោយសុវត្ថិភាព ។ ប៉ុន្តែការចុះចតយឺតយ៉ាវអស់ជាង១ម៉ោងខុសពីកាលវិភាគ ។

រដ្ឋមន្ត្រីក្រសួងការពារជាតិសិង្ហបុរីបញ្ជាក់ថា ៖ «ប្រព័ន្ធការពារដែនអាកាសរបស់យើង និងក្រុមកម្ចាត់អាវុធជាតិផ្ទុះបានទទួលបញ្ជាឱ្យត្រៀមខ្លួនចាត់ការករណីនេះ ។ ពេលយន្តហោះឥណ្ឌាចុះចតនៅអាកាសយានដ្ឋានសិង្ហបុរី គឺភ្នាក់ងារសន្តិសុខអាកាសយដ្ឋាននឹងស៊ើបអង្កេតបន្តទៀត» ។

Air India Express គឺជាក្រុមហ៊ុនអាកាសចរណ៍តម្លៃទាបនៅប្រទេសឥណ្ឌា ហើយវាជាផ្នែកមួយរបស់ក្រុមហ៊ុន Tata Group ។ នៅពាក់កណ្តាលខែតុលា ឆ្នាំ២០២៤ យន្តហោះជាច្រើនគ្រឿងដែលធ្វើដំណើរចាកចេញពីឥណ្ឌា បានទទួលអ៊ីម៉ែលគំរាមដាក់គ្រាប់បែកក្នុងយន្តហោះដូចៗគ្នា ។

ជាក់ស្តែង យន្តហោះរបស់ក្រុមហ៊ុន Air India ក៏រងការគំរាមដែរ ខណៈយន្តហោះនេះកំពុងចាកចេញពីទីក្រុងញូវដែលី ទៅកាន់ទីក្រុងឈីកាហ្គោ សហរដ្ឋអាមេរិក ហើយត្រូវចុះចតបន្ទាន់នៅអាកាសយានដ្ឋាន Iqaluit ប្រទេសកាណាដា ។ បន្ទាប់មក អាជ្ញាធរបានត្រួតពិនិត្យយន្តហោះ និងឆែកឆេរអ្នកដំណើរ ព្រមទាំងបុគ្គលិកអាកាសចរណ៍ ប៉ុន្តែរកពុំឃើញគ្រាប់បែកផ្ទុះទេ ។

ការគំរាមដូចគ្នានេះ ក៏បានកើតឡើងចំពោះយន្តហោះ២គ្រឿងរបស់ក្រុមហ៊ុនអាកាសចរណ៍ឥណ្ឌាឈ្មោះ IndiGo ផងដែរ ដែលធ្វើដំណើរចេញពីទីក្រុងបុមបៃ កាលពីថ្ងៃទី១៤ ខែតុលា ។ យន្តហោះ១គ្រឿងហោះទៅកាន់ទីក្រុង Jeddah របស់អារ៉ាប៊ីសាអូឌីត និងយន្តហោះ១គ្រឿងទៀត ហោះទៅទីក្រុង Muscat ប្រទេសអូម៉ង់ ។

ក្រៅពីនេះ យន្តហោះជើងហោះហើរ SG116 របស់ក្រុមហ៊ុនអាកាសចរណ៍ SpiceJet ដែលធ្វើដំណើរពីទីក្រុង Darbhanga ទៅទីក្រុងបុមបៃ និងយន្តហោះជើងហោះហើរ QP1373 របស់ក្រុមហ៊ុនអាកាសចរណ៍ Akasa Air របស់ឥណ្ឌា ដែលហោះពីទីក្រុង Bandogra ទៅទីក្រុង Bengaluru ក៏រងការគំរាមដាក់គ្រាប់បែកដែរ កាលពីថ្ងៃទី១៥ ខែតុលា ៕

កម្មវិធីប្រកួតសម្រស់ Miss Planet International 2024 ដែលកម្ពុជាធ្វើជាម្ចាស់ផ្ទះជាលើកទី៤ កាន់តែកៀកមែនទែនហើយ។ អ្វីដែលកាន់តែធ្វើឱ្យទស្សនិកជនចាប់អារម្មណ៍ Daniella ជា Miss Planet Sweden 2024 បាននិយាយជាភាសាខ្មែរបានយ៉ាងល្អជាពិសេសគឺបានបង្ហាញអារម្មណ៍រំភើបរីករាយដែលជិតបានមកឃើញប្រាសាទអង្គរវត្តផ្ទាល់ភ្នែក។

Daniella Lundqvist Miss Planet Sweden 2024 បាននិយាយជាភាសាខ្មែរថា «សួស្តីប្រទេសកម្ពុជា ប្រទេសមានបេះដូងធំ ខ្ញុំឈ្មោះ Daniella មកពីប្រទេស Sweden ខ្ញុំរីករាយណាស់ដែលបានក្លាយជាបេក្ខនារី Miss Planet International ខ្ញុំនឹងទៅប្រទេសកម្ពុជាក្នុងខែ November នេះ កុំភ្លេចគាំទ្រអូនផងណា យេ អូនជិតបានទៅអង្គរវត្តហើយ Bye ……» ។

ការនិយាយជាភាសាខ្មែររបស់បវរកញ្ញាភពផែនដីប្រទេសស៊ុយអែតប្រចាំឆ្នាំ២០២៤ នេះបានធ្វើឱ្យមានការចាប់អារម្មណ៍យ៉ាងខ្លាំងជាមួយនឹងពាក្យរីករាយស្វាគមន៍ចំពោះបវរកញ្ញារូបនេះពីប្រជាជនខ្មែរដែលនឹងមានវត្តមានប្រកួតនៅលើទឹកដីកម្ពុជា។

តាមការបញ្ជាក់របស់ស្ថាប័ន MPI Daniella Lundqvist មានអាយុ ២៥ ឆ្នាំ ហើយនាងមានបរិញ្ញាបត្រផ្នែករចនាអន្តរកម្ម ហើយបច្ចុប្បន្នកំពុងសិក្សាថ្នាក់អនុបណ្ឌិតផ្នែកនវានុវត្តន៍តាមរយៈអាជីវកម្ម វិស្វកម្ម និងការរចនា។ នាងធ្លាប់បានធ្វើការប្រកួតអន្តរជាតិចំនួន ៥ ដងហើយវាជាចំណង់ចំណូលចិត្តរបស់នាង។ Daniella ចូលចិត្តកម្មវិធីប្រកួត ព្រោះវាផ្តល់ឱកាសឱ្យនាងក្នុងការធ្វើដំណើរ បទពិសោធន៍វប្បធម៌ថ្មីៗ និងជួបមនុស្សអស្ចារ្យជាច្រើន។ នាងក៏ស្រលាញ់សុខភាពផ្លូវចិត្តដែរ ហើយនាងបានធ្វើជាអ្នកស្ម័គ្រចិត្តសម្រាប់អង្គការ ដែលផ្សព្វផ្សាយការយល់ដឹងអំពីជំងឺធ្លាក់ទឹកចិត្ត និងការងារដើម្បីកាត់បន្ថយអត្រាធ្វើអត្តឃាត។លើសពីនេះ នាងចង់ក្លាយជាអ្នកលើកទឹកចិត្តដល់អ្នកដទៃ ហើយនាងប្រាថ្នាចង់ក្លាយជាមនុស្សដែលនាងត្រូវការនៅពេលនោះ។ ជាមួយនឹងតំណែង Miss Planet Sweden 2024 នាងសង្ឃឹមថានឹងជំរុញទឹកចិត្តអ្នកដទៃឱ្យក្លាហាន និងរឹងមាំ។

បវរកញ្ញាភពផែនដីអន្តរជាតិ ឆ្នាំ២០២៤ ឬជាភាសាអង់គ្លេសហៅថា Miss Planet International 2024 ដែលកម្ពុជាទទួលធ្វើជាម្ចាស់ផ្ទះជាលើកទី៤ នឹងត្រូវប្រព្រឹត្តិទៅពីថ្ងៃទី១៩ ដល់ថ្ងៃទី២៧ ខែវិច្ឆិកា ឆ្នាំ២០២៤ ខណៈមានបេក្ខនារីចូលរួមប្រកួតជាង៧០នាក់ផងដែរ៕

Elon Musk បច្ចុប្បន្នមានកូនសរុបទាំងអស់ ១២ នាក់ហើយគឺប្រុសចំនួន ៩ និងស្រីចំនួន ៣ ។ នៅក្នុងបទសម្ភាសន៍មួយលោក Elon Musk ដែលជាមហាសេដ្ឋីលំដាប់ទីមួយរបស់ពិភពលោក បានចែករំលែកបទពិសោធន៍ចិញ្ចឹមកូនៗរបស់លោកថា លោកតែងតែព្យាយាមដាក់សម្ពាធលើពួកគេជានិច្ច ដើម្បីឱ្យពួកគេក្លាយជាមនុស្សរឹងមាំ និងចាស់ទុំតាំងពីក្មេង ដែលនេះគឺជាវិធីសាស្រ្តអប់រំត្រូវបានចាត់ទុកថាមានប្រសិទ្ធភាពបំផុតក្នុងការចិញ្ចឹមកូនៗរបស់លោក។

មហាសេដ្ឋីវ័យ ៥២ ឆ្នាំរូបនេះបានបន្តថា ដើម្បីអភិវឌ្ឍកូនៗឱ្យមានសមត្ថភាពពេញលេញគ្រប់ជ្រុងជ្រោយ និងឆ្លាតវៃ កុមារត្រូវតែជួបប្រទះនឹងបញ្ហាប្រឈមជាច្រើនក្នុងជីវិត មានន័យថា លោកមិនដែលបំពេញបំណង ឬឱ្យវត្ថុអ្វីមួយទៅពួកគេឡើយ បើទោះបីជាក្មេងៗសុំអ្វី ឬចង់បានអ្វីមួយ គឺគាត់មិនដែលទិញ ឬប្រគល់ឱ្យនោះទេ។ លោកបាននិយាយថា លោកធំឡើងក្នុងស្ថានភាពលំបាក ដូច្នេះលោកក៏បង្រៀនកូនៗឱ្យស្គាល់ភាពលំបាកដូចលោកដែរ។ មហាសេដ្ឋីរូបនេះបានបន្តទៀតថា លោកមិនចង់ឱ្យក្មេងៗមានភាពស្រណុកសុខស្រួលនោះទេ បើកាលណាពួកគេធ្វើបែបនេះ ក្មេងៗនឹងក្លាយជាមនុស្សទន់ខ្សោយហើយ។

ហេតុនេះហើយបានជាលោកជ្រើសរើសឱ្យកូនរបស់លោកទទួលបានការអប់រំតឹងរ៉ឹងបំផុត ដូចជាត្រូវទៅរៀនជារៀងរាល់ថ្ងៃ ក្រោកពីគេងឱ្យបានលឿនបំផុត ទៅរៀនឱ្យទាន់ពេលវេលា ចេញពីរៀនត្រូវធ្វើកិច្ចការផ្ទះ និងជួយការងារផ្ទះ ត្រូវរៀនសិក្សាស្វែងយល់ពីបច្ចេកវិទ្យាថ្មីៗជានិច្ច ទោះបីក្មេងៗមិនចង់ក៏ដោយ ដែលវិធីសាស្រ្តអប់រំនេះគឺដើម្បីឱ្យកុមារក្លាយជាមនុស្សឯករាជ្យ និងចាស់ទុំជាងមុន។ ទោះជាយ៉ាងណានៅសល់ពេលវេលាជាច្រើនទៀត លោក Musk បានលើកទឹកចិត្តកូនរបស់លោកឱ្យទាញយកអត្ថប្រយោជន៍ពីអ៊ីនធឺណិតដើម្បីសិក្សាដោយខ្លួនឯង និងស្វែងយល់ពីពិភពលោកខាងក្រៅ។

លោកសង្កេតឃើញថា សព្វថ្ងៃនេះ ក្មេងៗបានរៀនអ្វីៗជាច្រើនតាមរយៈ YouTube និងប្រព័ន្ធផ្សព្វផ្សាយសង្គម ដូច្នេះអ៊ីនធឺណិតគឺកំពុងក្លាយជាឧបករណ៍អប់រំដ៏សំខាន់បំផុតមួយសម្រាប់ក្មេងជំនាន់ក្រោយ។ ហេតុនេះត្រូវឱ្យកុមារមើល និងស្វែងយល់ពីពួកវាឱ្យច្រើនទើបជាការល្អ។ កាលណាកុមារមិនដែលដឹងពីពិភពលោកខាងក្រៅ ឬបិទសិទ្ធមិនឱ្យមើលទូរស័ព្ទ ឬបច្ចេកវិទ្យាអ្វីទេនោះ ពួកគេគឺមិនឆ្លាតនោះទេ នេះបើយោងតាមសម្តីរបស់លោក Elon Musk ៕

យុវវ័យ គឺជាវ័យមួយដែលរាងកាយនឹងផ្លាស់ប្តូរខ្លាំងបំផុត ក្នុងនោះយុវតីចាប់ផ្តើមមានចង្កេះសមនឹងរូបរាង, លូតកម្ពស់, ឡើងទម្ងន់ ហើយមានដៃ-ជើងវែង ។ រីឯយុវជនវិញ ចាប់ផ្តើមមានពុកមាត់, ឆ្អឹងរឹងមាំ, ឃើញសាច់ដុំកាន់តែច្បាស់ ហើយទំហំជើងក៏កើនឡើងដែរ ។ ហេតុនេះ ការប្រើប្រាស់សម្ភារៈរបស់យុវវ័យបានផ្លាស់ប្តូរទៅតាមរូបរាងរបស់ពួកគេ ។

នៅឆ្នាំ២០២៤ មានស្បែកជើងប្រភេទថ្មីឈ្មោះ «UNOS by Sz» ដែលត្រូវបានផលិតឡើងប្រកបដោយភាពច្នៃប្រឌិត ។ ស្បែកជើងនេះអាចពង្រីកឱ្យធំបានតាមទំហំបាតជើងរបស់អ្នកប្រើប្រាស់ ហើយធ្វើឱ្យស្បែកជើងនេះមានលក្ខណៈខុសប្លែកយ៉ាងខ្លាំងពីស្បែកជើងចាស់ៗដែលពុំអាចពង្រីកទំហំ ។ អ្នកប្រើប្រាស់នឹងអាចពាក់វារយៈពេលយូរ និងមិនខ្ជះខ្ជាយប្រាក់ទិញស្បែកជើងថ្មី ។

UNOS គឺជាស្បែកជើងឃ្លុបផលិតពីសាច់ក្រណាត់ ដែលរចនាម៉ូដដោយ D’wayne Edwards គឺជាអ្នករចនាម៉ូដស្បែកជើងដ៏ល្បីល្បាញលំដាប់ពិភពលោក ។ អ្នករចនាម៉ូដស្បែកជើងរូបនេះ ធ្លាប់បានរចនាម៉ូដស្បែកជើងជាច្រើនប្រភេទ ដូចជា ៖ ម៉ូដ Tupac, Notorious B.I.G. និង Snoop Dogg ។

ចំណែកពាក្យថា «UNOS» គឺជាពាក្យកាត់របស់ពាក្យ «U Need One Size» ដែលបញ្ជាក់ថា បើអតិថិជនទិញស្បែកជើងនេះពាក់ គឺពួកគេនឹងអាចពាក់វាជារៀងរហូត ជាពិសេស យុវវ័យ មិនថាពួកគេមានបាតជើងតូច ឬបាតជើងធំ ។

នៅផ្នែកខាងក្រោមស្បែកជើង គឺមានអក្សរ Z ដែលវាមានមុខងារពង្រីកស្បែកជើងឱ្យធំតាមទំហំបាតជើងរបស់អ្នកប្រើប្រាស់ ។ ស្បែកជើងនេះមានទម្ងន់ស្រាល ស្រួលពាក់, មានប្រហោងសម្រាប់ខ្យល់ចេញ-ចូល និងអាចពាក់បានទាំងយុវវ័យ និងមនុស្សចាស់ ។

ក្រៅពីនេះ ស្បែកជើង UNOS នឹងពុំប៉ះពាល់បរិស្ថានទេ ពីព្រោះយើងអាចពាក់វាបានយូរឆ្នាំ និងពុំបាំបាច់បោះចោលឱ្យក្លាយជាសំរាម ។ រីឯស្បែកជើងធម្មតា គឺក្រុមហ៊ុនត្រូវផលិតឱ្យបាន៤០ទំហំសម្រាប់ស្បែកជើង១ប្រភេទ ដើម្បីឱ្យពាក់បានចាប់ពីក្មេងរហូតដល់មនុស្សចាស់ ។ ប៉ុន្តែសម្រាប់ស្បែកជើងអាចពង្រីកទំហំបាន គឺក្រុមហ៊ុនផលិតត្រឹមតែ៨ទំហំប៉ុណ្ណោះ ហើយការពាក់ស្បែកជើងនេះអាចជួយកាត់បន្ថយការប្រើប្រាស់កម្លាំងពលកម្ម, កាត់បន្ថយការប្រើម៉ាស៊ីន និងវត្ថុធាតុដើមយ៉ាងច្រើន ។

ស្បែកជើងឃ្លុប UNOS ត្រូវបានគេដាក់លក់ហើយនៅឆ្នាំ២០២៤ គឺស្បែកជើងឃ្លុបសម្រាប់មនុស្សចាស់មានតម្លៃ៥០ដុល្លារអាមេរិក និងស្បែកជើងក្មេងមានតម្លៃត្រឹមតែ៣៥ដុល្លារអាមេរិកប៉ុណ្ណោះ ។

គួរបញ្ជាក់ថា ក្នុង១ឆ្នាំៗ ក្រុមហ៊ុននានានៅលើពិភពលោក បានផលិតស្បែកជើងឃ្លុបប្រមាណ២ម៉ឺន៣ពាន់លានគូ ឬស្មើនឹងទម្ងន់២៨០តោនក្នុង១ឆ្នាំ ហើយស្បែកជើងជាង៩០% ក្នុងចំណោមនេះ ត្រូវបានគេបោះចោលឱ្យក្លាយជាសំរាមកប់ក្នុងដី ។

ហេតុនេះ ក្រុមហ៊ុននានាបានព្យាយាមផលិតស្បែកជើងឱ្យប៉ះពាល់បរិស្ថានតិចបំផុត ដូចជា ៖ ប្រើប្រាស់វត្ថុធាតុដើមធម្មជាតិ ឬបង្កើតកម្មវិធីទិញ-លក់ស្បែកជើងជជុះ ។ ដូចគ្នានេះ ក្រុមហ៊ុនផលិតស្បែកជើងធំៗបានគណនាពីការបំភាយឧស្ម័នផ្ទះកញ្ចក់ទៅលើបរិយាកាស ដើម្បីធានាថា ស្បែកជើងរបស់ពួកគេពុំប៉ះពាល់បរិស្ថាន ៕