ចាប់ពីពេលនេះតទៅ មន្រ្តីសមត្ថកិច្ចដែលមានក្បាលពោះធំ នឹងមិនត្រូវបានអនុញ្ញាតឱ្យទៅប្រតិបត្តិការនៅខាងក្រៅទៀតនោះទេ នេះបើយោងតាមអ្នកនាំពាក្យ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។.png)
ថ្លែងក្នុងកិច្ចប្រជុំកាលពីថ្ងៃទី១៤ ខែតុលា ឆ្នាំ២០២៤ ឯកឧត្តមអភិសន្តិបណ្ឌិត បានលើកឡើងថា៖”មន្ត្រីដែលមានក្បាលពោះធំជ្រុលមានតិចតួចប៉ុណ្ណោះ ធៀបនឹងកម្លាំងសរុប ហើយចាប់ពីពេលនេះទៅ ពួកគេនឹងមិនឱ្យចេញធ្វើការខាងក្រៅទៀតទេជាពិសេសការងារចរាចរណ៍ និងប្រតិបត្តិការនានា”។
រដ្ឋមន្ត្រីក្រសួងមហាផ្ទៃរូបនេះ ក៏បានសង្កត់ធ្ងន់ទៀតថា៖”ក្បាលពោះមិនគួរធំពេកនោះទេ យ៉ាងហោចណាស់ឱ្យបានសមរម្យ សមនឹងភ្នែកមហាជន ហើយការដែលមានក្បាលពោះធំ នឹងធ្វើឱ្យការបំពេញការងារមិនបានល្អ និងមិនរហ័សរហួននោះទេ”។
ជុំវិញករណីនេះ ឯកឧត្តមអភិសន្តិបណ្ឌិត ក៏បានផ្ដល់ជម្រើសឱ្យហាត់ប្រាណ និងកាត់បន្ថយរបបអាហារដែលងាយនឹងឡើងគីឡូជាដើម។
គួរបញ្ជាក់ផងដែរថា ចាប់ពីពេលនេះទៅ មន្រ្តីសមត្ថកិច្ចដែលមានក្បាលពោះធំ នឹងត្រូវឱ្យធ្វើការក្នុងការិយាល័យ ដោយអ្នកចង់ចេញប្រតិបត្តិការការងារខាងក្រៅ ត្រូវតែហាត់ប្រាណឱ្យមើលទៅសមរម្យ៕
