បច្ចុប្បន្នទីផ្សាររថយន្ត Hybrid និង EV គឺកំពុងទទួលបានប្រជាប្រិយភាពយ៉ាងខ្លាំង ដោយសារតែវាមានរូបរាងទាន់សម័យ បច្ចេកវិទ្យាទំនើប ធន់ ប្រើប្រាស់បានយូរ និងមិនចាំបាច់ប្រឈមមុខជាមួយតម្លៃប្រេងប្រែប្រួលឥតឈប់ឈរនោះទេ។ ទោះជាយ៉ាងណាមនុស្សជាច្រើនបានកំពុងវែងញែកគ្នាអំពីសមត្ថភាព និងគុណភាពរបស់រថយន្ត Hybrid និង EV ថាតើរថយន្តទាំងពីរនេះមួយណាល្អជាង?

សម្រាប់ចម្លើយនោះគឺល្អទាំងពីរ នេះបើយោងតាមគេហទំព័របរទេសមួយបានឱ្យដឹងថា ប្រសិនបើអ្នកចង់បានរថយន្តដែលសន្សំសំចៃប្រេង មានបច្ចេកវិទ្យាទំនើប ហើយមិនចង់ផ្លាស់ប្តូរឥរិយាបថប្រើប្រាស់រថយន្តរបស់ពួកគេច្រើនទេ រថយន្តកូនកាត់ ឬ Hybrid អាចជាជម្រើសដ៏ល្អបំផុតសម្រាប់លោកអ្នក។ ប៉ុន្តែប្រសិនបើអ្នកចង់បានរថយន្តដែលមិនប៉ះពាល់ដល់បរិស្ថាន ជួយសន្សំសំចៃប្រាក់លើការប្រើប្រាស់រថយន្តក្នុងរយៈពេលយូរ មិនបាច់ខ្វល់ពីចម្ងាយបើកបរ ឬមានកន្លែងសាកថ្មនៅជិតផ្ទះរបស់អ្នក រថយន្តអគ្គិសនី ឬ EV នឹងក្លាយជាជម្រើសដ៏ទាក់ទាញមួយ។

ជាការពិតណាស់ រថយន្តទាំងពីរនេះគឺសុទ្ធមានទាំងសមត្ថភាព និងគុណភាពខ្ពស់រៀងៗខ្លួន ដែលអាចបំពេញបំណងរបស់លោកអ្នកបាន។ រថយន្តអគ្គិសនីមានគុណសម្បត្តិនៃដំណើរការឆ្លើយតបល្អ ដោយសារតែម៉ូទ័រមានកម្លាំងបង្វិលជុំខ្ពស់ មិនចាំបាច់រង់ចាំវដ្តដូចជាម៉ាស៊ីនចំហេះទេ ហើយតម្លៃនៃការសាកថ្មក៏ថោកជាងសាំងដែរ។ លើសពីនេះទៀតវាមិនបញ្ចេញការបំពុលទេ អាចចតបានដោយបើកម៉ាស៊ីនត្រជាក់ដោយមិនបញ្ចេញឧស្ម័នផ្សែងដូចជាឡានសាំងឡើយ។

ហេតុនេះរថយន្តអគ្គិសនីពិតជាស័ក្តិសមបំផុតសម្រាប់ការបើកបរក្នុងទីក្រុង បើកបរទៅធ្វើការ ឬបើកបរលើផ្លូវធម្មតា។ ប៉ុន្តែប្រសិនបើធ្វើដំណើរផ្លូវឆ្ងាយ អ្នកប្រហែលជាត្រូវចំណាយពេលសាកថ្មយូរបន្តិច។ ផ្ទុយទៅវិញរថយន្តកូនកាត់ ទោះបីជាមានម៉ាស៊ីនដែលត្រូវចាក់ប្រេងក៏ដោយ ប៉ុន្តែវាត្រូវបានគេចាត់ទុកថាស៊ីសាំងតិចជាងរថយន្តម៉ាស៊ីនចំហេះ។ លើសពីនេះវាអាចធ្វើដំណើរទាំងផ្លូវឆ្ងាយ និងផ្លូវជិត ផ្លូវរលាក់ខ្លាំងប៉ុណ្ណាក៏វាធន់ និងរឹងមាំជាងដែរ មានន័យថា រថយន្ត Hybrid អាចប្រើប្រាស់បានទូទាំងប្រទេស ដោយមិនចាំបាច់រៀបចំផែនការ ឬរង់ចាំការសាកថ្មយូរនោះទេ៕

ប្រទេសចិន៖ នៅត្រីមាសទីបីនៃឆ្នាំ ២០២៤ ប្រាក់ចំណូលរបស់ BYD គឺបានកើនឡើង ២៤% ធៀបនឹងរយៈពេលដូចគ្នាកាលពីឆ្នាំមុន ដែលឈានដល់ ២៨.២៤ ពាន់លានដុល្លារអាមេរិក ដែលនេះលើសពីប្រាក់ចំណូលរបស់ក្រុមហ៊ុន Tesla ទៅទៀត ខណៈប្រាក់ចំណូល Tesla មានត្រឹមតែ ២៥.២ ពាន់លានដុល្លារប៉ុណ្ណោះ។

យោងតាម CNBC ក្រុមហ៊ុនរថយន្តអគ្គិសនីចិន BYD ទើបតែបានប្រកាសពីប្រាក់ចំណូល និងប្រាក់ចំណេញរបស់ខ្លួនកាលពីពេលថ្មីៗនេះទេ ដោយពួកគេបាននិយាយថា ប្រាក់ចំណូលនៅត្រីមាសទីបីរបស់ខ្លួន គឺបានកើនឡើងរហូតដល់ ២៤% ធៀបនឹងរយៈពេលដូចគ្នាកាលពីឆ្នាំមុន ដែលឈានដល់ ២៨.២៤ ពាន់លានដុល្លារអាមេរិក ដោយបានវ៉ាដាច់ក្រុមហ៊ុន Tesla ជាលើកដំបូងក្នុងរយៈពេលដូចគ្នាជាមួយនឹង ២៥.២ពាន់លានដុល្លារអាមេរិក។

ខណៈប្រាក់ចំណេញសុទ្ធនៅត្រីមាសទីបីរបស់ BYD វិញក៏បានកើនឡើងខ្លាំងផងដែររហូតដល់ ១១.៥% ឈានដល់ ១.៦៣ ពាន់លានដុល្លារ។ ដូច្នេះក្នុងរយៈពេល ៩ ខែដំបូងនៃឆ្នាំនេះ ប្រាក់ចំណេញសុទ្ធរបស់ BYD គឺបានកើនឡើង ១៨.១% ឈានដល់ ៣.៥៤ ពាន់លានដុល្លារអាមេរិក។

បច្ចុប្បន្ន BYD កំពុងនាំមុខគេក្នុងការលក់រថយន្តអគ្គិសនីទូទាំងពិភពលោក ដោយសារការបញ្ចុះតម្លៃយ៉ាងខ្លាំងលើម៉ូដែលដែលលក់ដាច់បំផុត។ នេះបើតាមប្រភពដដែលបានឱ្យដឹងទៀតថា BYD បច្ចុប្បន្នលក់បានជាង ៩០% នៃយានយន្តរបស់ខ្លួននៅក្នុងប្រទេសចិន ដោយបានកំណត់គោលដៅលក់ប្រចាំឆ្នាំខ្ពស់បំផុតសម្រាប់ឆ្នាំ ២០២៤។

នេះមានន័យថា BYD ដែលជាក្រុមហ៊ុនផលិតរថយន្តឈានមុខគេរបស់ប្រទេសចិនគឺកំពុងស្ថិតនៅជួរមុខក្នុងទីផ្សារអាស៊ី និងអឺរ៉ុបទោះបីជាប្រឈមនឹងពន្ធបន្ថែមក៏ដោយ។ នៅក្នុងត្រីមាសទី ៣ ក្រុមហ៊ុនបានលក់រថយន្តចំនួន ៩៤,៤៧៧ គ្រឿងនៅក្រៅប្រទេស កើនឡើង ៣២.៦% ធៀបនឹងរយៈពេលដូចគ្នាកាលពីឆ្នាំមុន។ ហេតុនេះក្នុងរយៈពេល ៩ ខែកន្លងមក ក្រុមហ៊ុនគឺបានលក់រថយន្តអស់ចំនួន ៥០០,០០០ គ្រឿងហើយ៕

ប្រទេសស្វីស ៖ ពលរដ្ឋរស់នៅទីក្រុង Wengen បានជ្រើសរើសការធ្វើដំណើរតាមមធ្យោបាយសាធារណៈ ឬដើរទៅធ្វើការ ហើយពួកគេពុំធ្វើដំណើរតាមរថយន្ត និងម៉ូតូទេ ។ Wengen បានក្លាយជាទីក្រុង «Car-Free Cities» និងជាតំបន់ទេសចរណ៍ធម្មជាតិដ៏ស្ងប់ស្ងាត់ ឬគ្មានសំឡេងរំខានដោយសារការធ្វើចរាចរ ។

Wengen គឺជាទីក្រុងតូចមួយដែលមានភ្នំព័ទ្ធជុំវិញ ហើយការធ្វើដំណើរមកដល់ទីក្រុងនេះមាន៣វិធី គឺការដើរចុះពីលើភ្នំ, ការជិះកន្ត្រកខ្សែរ៉ក និងការជិះរថភ្លើងមកចុះនៅស្ថានីយរថភ្លើង Wengen ។

វាជាទីក្រុងគួរឱ្យចង់រស់នៅ និងស្ងប់ស្ងាត់បំផុត ដោយសារគ្មានរំឡេងរថយន្តបើកបរនៅតាមផ្លូវគឺមានតែសំឡេងរថភ្លើងដឹកអ្នកដំណើរមកចុះនៅទីក្រុងប៉ុណ្ណោះ ។ រីឯរថយន្តដែលអាចបើកបរក្នុងទីក្រុងនេះ គឺលុះត្រាតែទទួលបានលិខិតអនុញ្ញាតបើកបរជាមុនសម្រាប់ការងារសណ្ឋាគារ ឬត្រូវការដឹកសម្ភារៈធំៗ ។

ហេតុអ្វីបានពលរដ្ឋរស់នៅក្នុងទីក្រុងនេះពុំនិយមប្រើប្រាស់រថយន្ត? ពលរដ្ឋម្នាក់ប្រាប់ថា ពលរដ្ឋរស់នៅទីនេះមានលំនៅឋានលើភ្នំ ទើបគ្មានផ្លូវសម្រាប់បើករថយន្ត ។ ហេតុនេះ យើងក៏សម្រេចចិត្តថា នឹងជំរុញទីក្រុងនេះឱ្យក្លាយជាតំបន់ទេសចរណ៍ និងគ្មានរថយន្ត ពីព្រោះចង់ឱ្យភ្ញៀវទេសចរអាចស្នាក់នៅជាមួយធម្មជាតិ ។

ម្យ៉ាងទៀត យើងក៏មានរថភ្លើងសម្រាប់ដឹកភ្ញៀវទេសចរ និងរថភ្លើងសាធារណៈសម្រាប់ពលរដ្ឋផងដែរ ។ ហេតុនេះ ទើបរដ្ឋាភិបាលស្វីសពុំសាងសង់ផ្លូវក្នុងទីក្រុងនេះបន្ថែមទេ ពីព្រោះពលរដ្ឋបានសម្រេចចិត្តហើយថា ពុំត្រូវការផ្លូវដែលស្ទះចរាចរណ៍ទេ ។ ទីក្រុងលើភ្នំមួយទៀតឈ្មោះ Murren ក៏គ្មានរថយន្តដែរ ដោយសារមូលហេតុដូចគ្នា ។

សរុបមក ទីក្រុង Wengen មានទីតាំងស្ថិតនៅលើភ្នំ ទើបការធ្វើដំណើររបស់ពលរដ្ឋពិបាក ។ ពលរដ្ឋភាគច្រើនបានជ្រើសរើសមធ្យោបាយធ្វើដំណើរសាធារណៈ ខណៈអ្នកខ្លះទៀតជិះកង់ និងដើរទៅធ្វើការ ។ គេចាត់ទុកថា វាជាការហាត់ប្រាណ ពីព្រោះចម្ងាយផ្លូវពីលំនៅឋានទៅកន្លែងធ្វើការមិនឆ្ងាយ ៕

សហរដ្ឋអាមេរិក៖ ការបោះឆ្នោតប្រធានាធិបតីអាមេរិកជាផ្លូវការនឹងប្រព្រឹត្តទៅនៅថ្ងៃទី៥ ខែវិច្ឆិកាខាងមុខនេះហើយ ដោយលទ្ធផលត្រូវបានចាត់ទុកថាជាការលំបាកក្នុងការទស្សន៍ទាយ ខណៈដែលបេក្ខជនមកពីគណបក្សសាធារណរដ្ឋ និងប្រជាធិបតេយ្យពីររូបគឺលោក Donald Trump និងលោកស្រី Kamala Harris កាលពីកន្លងទៅគឺទទួលបានការស្ទង់មតិប្រហាក់ប្រហែលគ្នា។

ទោះជាយ៉ាងណាអ្នកទាំងពីរសុទ្ធតែប្តេជ្ញាជំរុញសេដ្ឋកិច្ចអាមេរិក ប៉ុន្តែលោកស្រី Harris ប្រសិនបើជាប់ឆ្នោតគឺចង់ធ្វើបែបនេះតាមរយៈការផ្លាស់ប្តូរតូចៗ ដូចជាការបង្កើនការលើកទឹកចិត្តផ្នែកពន្ធសម្រាប់អ្នកដែលចិញ្ចឹមកូន ការបង្កើនប្រាក់ឈ្នួលអប្បបរមា ការកសាងលំនៅដ្ឋានដែលមានតម្លៃសមរម្យ និងការលើកកម្ពស់ការផ្តល់ប្រាក់កម្ចីអាជីវកម្មខ្នាតតូចជាដើម។

ទន្ទឹមនឹងនេះ សំណើគោលនយោបាយរបស់លោក Trump ត្រូវបានវាយតម្លៃថាខ្លាំង មានន័យថា ប្រសិនបើ Trump ជាប់ឆ្នោត លោកនឹងធ្វើការការផ្លាស់ប្តូរដូចជា និរទេសជនអន្តោប្រវេសន៍មួយចំនួនធំ ការដាក់ពន្ធនាំចូលខ្ពស់ ការកាត់បន្ថយពន្ធសម្រាប់អាជីវកម្មក្នុងស្រុក និងប្រជាជន។ ប្រសិនបើ Trump ជាប់ឆ្នោតឡើងវិញ គោលនយោបាយទាំងនេះត្រូវបានគេរំពឹងថានឹងមានផលប៉ះពាល់យ៉ាងសំខាន់ទៅលើផលិតផលក្នុងស្រុកសរុប ពាណិជ្ជកម្ម និងហិរញ្ញវត្ថុសកល។

យោងតាម Bloomberg ប្រសិនបើ Trump អនុវត្តគោលការណ៍ កាត់បន្ថយជនអន្តោប្រវេសន៍អាចជារឿងល្អ ប៉ុន្តែបើការដាក់ពន្ធនាំចូលខ្ពស់ អាចជារឿងមិនល្អនោះទេ។ ព្រោះដោយសារតែពន្ធនាំចូលខ្ពស់នឹងធ្វើឱ្យអតិផរណាបង្កើនល្បឿន ប៉ះពាល់ដល់អ្នកប្រើប្រាស់អាមេរិក ក៏ដូចជាអាជីវកម្មដែលពឹងផ្អែកលើវត្ថុធាតុដើមនាំចូល និងទំនិញកម្រិតមធ្យមដើម្បីបង្កើតផលិតផលសម្រេច។ នៅទូទាំងពិភពលោក ពន្ធអាចប៉ះពាល់ដល់កំណើនសេដ្ឋកិច្ចទាំងមូល ដែលបង្កឱ្យមានការសងសឹកពីដៃគូពាណិជ្ជកម្ម។

ហេតុនេះការការដាក់ពន្ធនាំចូលខ្ពស់ នឹងកាត់បន្ថយកំណើនពិភពលោកចំនួន ១% នៅឆ្នាំ ២០២៦។ ដោយផ្អែកលើនិន្នាការបច្ចុប្បន្ន ការកាត់បន្ថយនេះគឺស្មើនឹង ៣០% នៃកំណើន GDP ពិភពលោក។ ទោះជាយ៉ាងណាសំណើគោលនយោបាយរបស់អតីតប្រធានាធិបតីអាមេរិករូបនេះត្រូវបានគេព្យាករណ៍ថានឹងជួយឱ្យប្រាក់ដុល្លារមានភាពរឹងមាំឡើងវិញ ប៉ុន្តែនឹងអូសទាញកំណើន GDP និងពាណិជ្ជកម្មសកលទាបជាមុន ប្រសិនបើលោកជាប់ឆ្នោត៕

កោះតៃវ៉ាន់៖ Kong-rey ដែលជាព្យុះដ៏ធំបំផុតចាប់តាំងពីឆ្នាំ ១៩៩៦ មកស្រាប់តែបានវាយប្រហារកោះតៃវ៉ាន់ជាលើកទីពីរនៅឆ្នាំនេះ បណ្តាលឱ្យមានភ្លៀងធ្លាក់ខ្លាំងឥតឈប់ឈរ ដាច់ចរន្តអគ្គិសនី និងបង្ខំឱ្យមនុស្សរាប់ពាន់នាក់ត្រូវជម្លៀសចេញភ្លាមៗ។

យោងតាមទីភ្នាក់ងារឧតុនិយមតៃវ៉ាន់ (CWA) បាននិយាយថា ព្យុះទីហ្វុងដ៏កាចសាហាវនេះ បានបោកបក់មកលើស្រុក Taitung ភាគអាគ្នេយ៍នៃកោះតៃវ៉ាន់ កាលពីល្ងាចថ្ងៃទី៣១ ខែតុលា ជាមួយនឹងកម្លាំងខ្យល់អតិបរមាជិត ២៥១ គីឡូម៉ែត្រក្នុងមួយម៉ោង និងកាំនៃព្យុះជិត ៣២០ គីឡូម៉ែត្រ។

យោងតាមមជ្ឈមណ្ឌលវិទ្យាសាស្ត្រ បច្ចេកវិទ្យា និងការកាត់បន្ថយគ្រោះមហន្តរាយរបស់តៃវ៉ាន់ បានឱ្យដឹងទៀតថា Kong-rey គឺជាព្យុះដ៏ធំបំផុតដែលធ្លាប់វាយប្រហារមកលើកោះនេះក្នុងឆ្នាំ ១៩៩៦ ហើយមកដល់បច្ចុប្បន្នវាក៏បានមកវាយប្រហារជាលើកទីពីរ។ ថ្មីៗនេះទីភ្នាក់ងារឧតុនិយមតៃវ៉ាន់ បានចេញការព្រមានអំពីភ្លៀងធ្លាក់ខ្លាំងបំផុតសម្រាប់ស្រុកឆ្នេរសមុទ្រភាគខាងកើតដូចជា Yilan, Hualien, Taichung និង Taitung ។ ផ្នែកខាងកើតនៃកោះនេះ រួមទាំងក្រុងតៃប៉ិ ក៏បានចេញការព្រមានអំពីភ្លៀងធ្លាក់ខ្លាំងបំផុតផងដែរ។

យោងតាមរបាយការណ៍ អាជ្ញាធរបានជម្លៀសមនុស្សជាង ៩,០០០ នាក់នៅស្រុក និងទីក្រុងចំនួន ១៣ នៅតៃវ៉ាន់។ ហើយកម្លាំងការពាររបស់កោះនេះបានចល័តទាហានជិត ៣៥.០០០ នាក់ និងរថយន្ត ៣.៤០០ គ្រឿង រួមទាំងឧបករណ៍ផ្សេងៗទៀត ដើម្បីត្រៀមសម្រាប់ជួយសង្គ្រោះប្រជាជន។

ព្យុះទីហ្វុង គង់-រី បានបោកបក់ខ្លាំង បណ្តាលឱ្យរលំដើមឈើ ដោយសម្លាប់មនុស្សម្នាក់ និង ៧៣ នាក់ទៀតរងរបួស។ បច្ចុប្បន្នសាលារៀនត្រូវបានបិទនៅគ្រប់តំបន់ទាំងអស់នៅលើកោះ ហើយផ្លូវហាយវេ និងផ្លូវដែកជាច្រើនទៀតក៏ឈប់ដំណើរការ រួមទាំងជើងហោះហើរចំនួន ៥២៧ ក៏ត្រូវបានលុបចោល។ លើសពីនេះទីផ្សារភាគហ៊ុនរបស់តៃវ៉ាន់ក៏បានផ្អាកការជួញដូរជាបណ្តោះអាសន្នផងដែរ៕