ប្រទេសថៃ ៖ គោលនយោបាយគណបក្សភូមិចៃថៃរបស់លោក Anutin Charnvirakul គឺបិទព្រំដែនជាមួយកម្ពុជារៀងរហូត និងតម្រៀបទូរកុងទឺន័រយកទឹកដីកម្ពុជាតាមព្រំដែន ធ្វើឱ្យពលរដ្ឋថៃបោះឆ្នោតគាំទ្រគណបក្សនេះយ៉ាងច្រើនលើសលប់ ។ តាមលទ្ធផលបោះឆ្នោតបឋម គណបក្សនេះទទួលបានសំឡេងគាំទ្រច្រើនជាងគណបក្សផ្សេងៗ ដែលបង្ហាញថា ពលរដ្ឋថៃភាគច្រើនគាំទ្រឱ្យមេដឹកនាំ និងកងទ័ពធ្វើសង្គ្រា.មវាតទីដណ្តើមទឹកដីកម្ពុជា ។

ប្រធានគណបក្សភូមិចៃថៃ លោក Anutin បានយកបញ្ហាជម្លោះព្រំដែនមកកេងចំណេញនយោបាយ ដោយឃោសនាថា បើគណបក្សលោកឈ្នះឆ្នោតនៅថ្ងៃទី៨ ខែកុម្ភៈ ឆ្នាំ២០២៦ នឹងបិទព្រំដែនជាមួយកម្ពុជារៀងរហូត, គាំទ្រកងទ័ពតម្រៀបទូរកុងទឺន័រយកទឹកដីកម្ពុជា និងលុបចោលអនុស្សរណៈនៃការយោគយល់គ្នា (MOU) ស្តីពីការបែងចែកផលប្រយោជន៍ដែនសមុទ្រជាមួយកម្ពុជា ។ គោលនយោបាយទាំងនេះទាក់ទាញចំណាប់អារម្មណ៍ពីពលរដ្ឋជាតិនិយមជ្រុលយ៉ាងខ្លាំង ដោយងាកមកបោះឆ្នោតគាំទ្រគណបក្សនេះទទួលបានអាសនៈច្រើនក្នុងរដ្ឋសភា ។

លទ្ធផលបឋមរបស់គណៈកម្មាធិការរៀបចំការបោះឆ្នោតថៃ គិតត្រឹមព្រឹកថ្ងៃទី៩ ខែកុម្ភៈ ឆ្នាំ២០២៦ បង្ហាញថា ការិយាល័យបោះឆ្នោតជិត៩៥% បានរាយការណ៍ពីគណបក្សភូមិចៃថៃរបស់លោក Anutin ឈ្នះប្រហែល១៩២អាសនៈ ខណៈគណបក្សប្រជាជន ទទួលបាន១១៧អាសនៈ និងគណបក្សភឿថៃ ៧៤អាសនៈ ។

ក្រៅពីប្រកាសបិទព្រំដែនជាមួយកម្ពុជារៀងរហូត និងជំរុញគំនិតជាតិនិយមជ្រុល គណបក្សភូមិចៃថៃបានកំណត់គោលនយោបាយ៨ចំណុច រួមមាន ៖ ១-ជ្រើសរើសរដ្ឋមន្ត្រីមានបទពិសោធន៍, ២-ចែកប្រាក់ឱ្យពលរដ្ឋ (លើកទី២), ៣-បញ្ចុះតម្លៃអគ្គិសនីត្រឹម៣បាតក្នុង១គីឡូវ៉ាត់, ៤-ជ្រើសរើសកងទ័ពព្រំដែន ចំនួន១សែននាក់ ដោយផ្តល់ប្រាក់ខែខ្ពស់ ចំនួន១ម៉ឺន ២ពាន់បាតក្នុង១ខែ (ស្មើ ៣៨៧ដុល្លារ), ៥-ជ្រើសរើសគ្រូពេទ្យស្ម័គ្រចិត្តថែទាំមនុស្សចាស់, ៦-ពង្រឹងគុណភាពអប់រំសិស្ស, ៧-បង់រំលោះម៉ូតូអគ្គិសនី និង៨-ធ្វើរបងព្រំដែនកម្ពុជា-ថៃ ។

ជុំវិញជម្លោះជាមួយកម្ពុជា លោក Anutin ប្រកាន់គោលជំហរមិនបើកព្រំដែនឡើងវិញដាច់ខាត និងធ្វើរបងព្រំដែនផ្តាច់ទំនាក់ទំនងជាមួយកម្ពុជា ដើម្បីឱ្យពលរដ្ឋបោះឆ្នោតគាំទ្រ ។ រីឯគណបក្សផ្សេងៗ ដូចជា គណបក្សប្រជាជន (អតីតគណបក្សកាវក្លៃ) មិនបានប្រកាសបិទព្រំដែនជាមួយកម្ពុជា គឺទទួលបានអាសនៈតិចជាងគណបក្សភូមិចៃថៃ ដែលនេះបញ្ជាក់ថា ពលរដ្ឋថៃភាគច្រើនគាំទ្រ និងស្រឡាញ់សង្គ្រាមវាតទីទឹកដីកម្ពុជា ជាងស្រឡាញ់សន្តិភាព ដោយពួកគេជំរុញឱ្យកងទ័ពវាយប្រហារកម្ពុជា ជាលើកទី៣ ដើម្បីដណ្តើមយកខេត្តបាត់ដំបង កោះកុង និងសៀមរាប ។

គួរបញ្ជាក់ថា គ្រាន់តែការបោះឆ្នោតបញ្ចប់ភ្លាម គណៈកម្មាធិការប្រឆាំងអំពើពុករលួយថៃបានចោទប្រកាន់អតីតសមាជិកសភាគណបក្សកាវក្លៃជាច្រើនរូប (បច្ចុប្បន្នជាគណបក្សប្រជាជន) មានកំហុសក្រមសីលធម៌ធ្ងន់ធ្ងរករណីកែប្រែច្បាប់មាត្រា១១២ និងទំនងជាត្រូវបញ្ចូនទៅតុលាការកំពូល (ច្បាប់ប្រមាថព្រះមហាក្សត្រថៃ) កាលពីឆ្នាំ២០២១ ដែលតុលាការធម្មនុញ្ញធ្លាប់សម្រេចថា ជាការរំលាយរបបគ្រប់គ្រង ។

មាត្រា១១២ នៃក្រមព្រហ្មទណ្ឌថៃ ដែលជាច្បាប់ប្រមាថព្រះមហាក្សត្រ គឺស្ថិតក្នុងចំណោមច្បាប់តឹងរ៉ឹងបំផុតនៅប្រទេសថៃ ។ ច្បាប់នេះចែងថា បុគ្គលណាប្រមាថមើលងាយ ឬគំរាមកំហែងព្រះមហាក្សត្រ ព្រះមហេសី និងរាជវង្ស នឹងត្រូវផ្តន្ទោទោសដាក់ពន្ធនាគារចាប់ពី៣ឆ្នាំ ទៅ១៥ឆ្នាំ ៕

ការអភិវឌ្ឍបច្ចេកវិទ្យា AI ជិតឈានដល់ទីបញ្ចប់នាពេលឆាប់ៗ យ៉ាងយូរបំផុតរយៈពេល៣ឆ្នាំទៀត យើងនឹងមិនអាចប្រើប្រាស់បច្ចេកវិទ្យាផ្សេងៗនៅលើផែនដីទេ ប៉ុន្តែមានវិធីតែមួយគត់ដើម្បីដោះស្រាយបញ្ហាបាន ។

គួរឱ្យភ្ញាក់ផ្អើលណាស់ ពេលលោក Elon Musk នាយកក្រុមហ៊ុន SpaceX និងបណ្តាញសង្គម X បាននិយាយពីការអភិវឌ្ឍបច្ចេកវិទ្យ AI លើផែនដី នឹងឈានដល់ទីបញ្ចប់នាពេលឆាប់ៗ ដោយលោកថា មានវិធីតែមួយគត់ទើបអាចបន្តអភិវឌ្ឍន៍បច្ចេកវិទ្យា AI គឺផ្លាស់ប្តូរទីតាំងទិន្នន័យ និងប្រព័ន្ធដំណើរការបច្ចេកវិទ្យាពីផែនដីទៅកាន់លំហរអាកាសក្នុងរយៈពេល៣ឆ្នាំទៀត ពីព្រោះថាមពលលើផែនដីមិនគ្រប់គ្រាន់ដល់តម្រូវការរបស់បច្ចេកវិទ្យាកើនឡើងយ៉ាងឆាប់រហ័សទេ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី៨ ខែកុម្ភៈ ឆ្នាំ២០២៦ មហាសេដ្ឋីដ៏ល្បី លោក Elon Musk ប្រកាសថា ការអភិវឌ្ឍបច្ចេកវិទ្យា AI នៅលើផែនដីជិតឈានដល់ទីបញ្ចប់ឆាប់ៗ ដោយសារថាមពលមានដែនកំណត់ ហើយវិធីតែមួយគត់ដើម្បីឱ្យបច្ចេកវិទ្យានេះអភិវឌ្ឍន៍បន្តបាន គឺផ្លាស់ប្តូរទីតាំងទិន្នន័យ និងប្រព័ន្ធដំណើរការបច្ចេកវិទ្យាពីផែនដីទៅកាន់លំហរអាកាសក្នុងរយៈពេល៣ឆ្នាំទៀត ។

ពេលចូលរួមក្នុងកម្មវិធីឈ្មោះ «Dwarkesh Podcast» លោក Elon Musk និយាយយ៉ាងមានទំនុកចិត្តថា ៖ «ចងចាំពាក្យសម្តីរបស់ខ្ញុំទុកទៅ រយៈពេលចាប់ពី៣០ខែ ទៅ៣៦ខែខាងមុខ (ឬប្រមាណពី២ឆ្នាំកន្លះ ទៅ៣ឆ្នាំទៀត) ទីតាំងដំឡើងប្រព័ន្ធបច្ចេកវិទ្យា AI ដ៏សំខាន់បំផុតនឹងលែងមានលើផែនដីទៀតហើយ គឺវានឹងត្រូវផ្លាស់ប្តូរទៅកាន់លំហរអាកាស» ។

លោកមើលឃើញថា ទីតាំងដំឡើងប្រព័ន្ធបច្ចេកវិទ្យា AI ចាំបាច់ត្រូវតែប្រើប្រាស់ទិន្នន័យ និងបណ្តាញ Server យ៉ាងច្រើន ព្រមទាំងប្រើប្រាស់ថាមពលមហាសាល ហើយថាមពលនៅលើផែនដីនឹងមិនគ្រប់គ្រាន់ដល់តម្រូវការរបស់បច្ចេកវិទ្យា AI ដែលកើនឡើងយ៉ាងឆាប់រហ័សនោះទេ ។

បច្ចុប្បន្ន សហរដ្ឋអាមេរិកត្រូវការប្រើប្រាស់ថាមពលជាមធ្យមប្រមាណកន្លះ Terawatt ប្រសិនបើចង់ពង្រីកទីតាំងដំឡើងប្រព័ន្ធបច្ចេកវិទ្យា AI ឱ្យរីកចម្រើន ដោយការសាងសង់រោងចក្រថាមពលលើសមុនទ្វេដង ។ ប៉ុន្តែវាពិបាកយ៉ាងខ្លាំងទាំងការប្រើប្រាស់ថាមពល និងទឹកក្នុងបរិមាណយ៉ាងច្រើនមហាសាល ដើម្បីបញ្ចេញកំដៅពីបណ្តាញ Server ។

លោក Elon Musk បាននិយាយពីគុណសម្បត្តិនៃការផ្លាស់ប្តូរទីតាំងទិន្នន័យ និងប្រព័ន្ធដំណើរការបច្ចេកវិទ្យាពីផែនដីទៅកាន់លំហរអាកាស គឺដោយសារថាមពលពន្លឺព្រះអាទិត្យ ។ បន្ទះសូឡាស្រូបពន្លឺព្រះអាទិត្យលើផែនដីមានតម្លៃថោក ហើយពេលយកបន្ទះសូឡាទៅដំឡើងលើលំហរ វានឹងដំណើរការយ៉ាងមានប្រសិទ្ធភាពរយៈពេល២៤ម៉ោងដោយគ្មានពេលយប់ មិនចាំបាច់ប្រើប្រាស់ថាមពលបម្រុង ។ នេះជាការកាត់បន្ថយការចំណាយដើមទុន ដែលថោកជាងនៅលើផែនដីរហូតដល់១០ដង ។

គោលដៅរបស់មហាសេដ្ឋីបច្ចេកវិទ្យារូបនេះហាក់ដូចជាការប្រឌិតបែបវិទ្យាសាស្ត្រ ប៉ុន្តែដោយសារក្រុមហ៊ុនបច្ចេកវិទ្យាធំៗបានចំណាយដើមទុនយ៉ាងច្រើនក្នុងការអភិវឌ្ឍបច្ចេកវិទ្យា AI យើងនឹងរង់ចាំតាមដានថា តើការលើកឡើងនេះនឹងក្លាយជាការពិតក្នុងរយៈពេល៣ឆ្នាំខាងមុខដែរឬទេ ៕

សូមបងប្អូនបង្កើនការប្រុងប្រយ័ត្នឲ្យបានខ្ពស់បំផុត! នៅខណៈនេះអង្គការសុខភាពពិភពលោកបានរាយការណ៍ថា យ៉ាងហោចណាស់មានមនុស្សម្នាក់ទៀតហើយបានស្លា.ប់នៅប្រទេសបង់ក្លាដេសដោយសារវីរុសនីប៉ាហន៍ បន្ទាប់ពីគេបានទទួលទានទឹកត្នោតស្រស់ផ្ទុកវីរុសនេះដែលចម្លងតាមរយៈសត្វប្រចៀវ។

យោងតាមអង្គការសុខភាពពិភពលោក (WHO) នៅថ្ងៃទី៦ ខែកុម្ភៈ ស្រ្តីអ្នកជំងឺអាយុចន្លោះពី៤០ ទៅ ៥០ ឆ្នាំម្នាក់ បានវិវត្តរោគសញ្ញាដែលមានលក្ខណៈស្របនឹងវីរុសនីបាស៍ កាលពីថ្ងៃទី ២១ ខែមករា។ រោគសញ្ញាទាំងនោះរួមមានទាំងគ្រុនក្តៅ និងឈឺក្បាល ហៀរទឹកមាត់ច្រើន មានអាការៈវង្វេងវង្វាន់ស្មារតី ហើយប្រកាច់។ មួយសប្តាហ៍ក្រោយមានអាការៈធ្ងន់ធ្ងរ អ្នកជំងឺបានស្លាប់ ហើយត្រូវបានបញ្ជាក់ថាបានឆ្លងមេរោគវីរុសនីបាស៍នៅមួយថ្ងៃក្រោយមក។ នេះបើតាមការបញ្ជាក់របស់អង្គការសុខភាពពិភពលោក (WHO)។

គួរឱ្យដឹងថានៅប្រទេសបង់ក្លាដែស ជាកន្លែងដែលមានករណីមេរោគនីបាស៍ ត្រូវបានរាយការណ៍ស្ទើរតែរៀងរាល់ឆ្នាំ។ ករណីស្លាប់ខាងលើ បានកើតឡើងបន្ទាប់ពីករណីវីរុស នីបាស៍ ចំនួនពីរករណីដែលត្រូវបានរកឃើញនៅក្នុងប្រទេសឥណ្ឌា ដែលបានជំរុញឱ្យមានការត្រួតពិនិត្យយ៉ាងតឹងរឹងនៅអាកាសយានដ្ឋានកាន់តែខ្លាំងឡើងនៅទូទាំងអាស៊ី។ ពោលប្រទេសនានា រួមមាន សិង្ហបុរី ម៉ាឡេស៊ី ថៃ ឥណ្ឌូនេស៊ី និងប៉ាគីស្ថាន បានអនុវត្តការត្រួតពិនិត្យនៅតាមអាកាសយានដ្ឋាន បន្ទាប់ពីឥណ្ឌាបានរាយការណ៍ថា ករណីនៃមេរោគនេះត្រូវបានរកឃើញកើតលើគ្រូពេទ្យ២នាក់នៅក្នុងរដ្ឋ West Bengal។

យោងតាមអង្គការសុខភាពពិភពលោក វីរុសនីប៉ាហ៍ កើតចេញពីមេរោគផ្ទុកលើសត្វប្រចៀវ សត្វច្រឹង និងអាចឆ្លងទៅមនុស្ស និងជ្រូក ដែលអាចបណ្តាលឱ្យមានអាការៈគ្រុនក្តៅ និងរលាកខួរក្បាល ជាពិសេសមានអត្រាស្លាប់ចន្លោះពី ៤០ភាគរយ ទៅ ៧៥ភាគរយ ។ អត្រាស្លាប់ខ្ពស់ ព្រោះវ៉ាក់សាំងជាច្រើនកំពុងស្ថិតក្នុងការអភិវឌ្ឍ និងនៅក្នុងដំណាក់កាលសាកល្បងនៅឡើយ ពោលគ្មានវិធីសាស្រ្តជាក់លាក់សម្រាប់ការព្យាបាលនិងការពារឡើយ។

ទោះជាអត្រាស្លា.ប់ខ្ពស់ ប៉ុន្តែអង្គការសុខភាពពិភពលោក បានបញ្ជាក់បន្ថែមថា ហានិភ័យនៃការរីករាលដាលនៃជំងឺសាកលនៅមិនទាន់ស្ថិតក្នុងហានិភ័យខ្លាំងណាស់ណាឡើយ ដូច្នេះអង្គការសុខភាពពិភពលោកមិនណែនាំឱ្យមានការរឹតបន្តឹងការធ្វើដំណើរ ឬរឹងបណ្តឹងការធ្វើពាណិជ្ជកម្មណាមួយដោយផ្អែកលើព័ត៌មានបច្ចុប្បន្ននោះទេ៕

ប្រទេសថៃ ៖ គណបក្សភូមិចៃថៃរបស់លោក Anutin Charnvirakul មិនគួរឈ្នះឆ្នោតទទួលបានសំឡេងគាំទ្រច្រើនទេ ប៉ុន្តែដោយសារគណបក្សប្រកាសគោលនយោបាយពេលឃោសនាបោះឆ្នោត រួមមាន ៖ ជំរុញឱ្យពលរដ្ឋមានគំនិតជាតិនិយមជ្រុលក្នុងជម្លោះព្រំដែនជាមួយកម្ពុជា, បិទព្រំដែនកម្ពុជា-ថៃជារៀងរហូត, លុបចោលអនុស្សរណៈនៃការយោគយល់គ្នា (MOU) ស្តីពីការបែងចែកផលប្រយោជន៍ដែនសមុទ្រជាមួយកម្ពុជា និងចែកប្រាក់ឱ្យពលរដ្ឋ ទើបពលរដ្ឋថៃងាកមកគាំទ្រគោលនយោបាយទាំងនេះ ដែលបង្ហាញថា ពួកគេស្រឡាញ់សង្គ្រា.ម ជាងសន្តិភាព ។ នេះបើតាមការលើកឡើងរបស់អ្នកវិភាគថៃ ។

គណបក្សភូមិចៃថៃរបស់លោក Anutin ដែលជាគណបក្សអភិរក្សនិយមបានប្រកាសជ័យជម្នះក្នុងការបោះឆ្នោតសភាកាលពីថ្ងៃទី៨ ខែកុម្ភៈ ឆ្នាំ២០២៦ បន្ទាប់ពីលទ្ធផលបោះឆ្នោតបណ្តោះអាសន្នបង្ហាញថា គណបក្សនេះទទួលបានសំឡេងគាំទ្រច្រើនជាងគេរហូតដល់ជិត២០០អាសនៈក្នុងរដ្ឋសភា ដោយសារកំណត់គោលនយោបាយជាតិនិយមជ្រុល និងប្រកាសជំហររឹងមាំចំពោះជម្លោះព្រំដែនជាមួយកម្ពុជា ដោយបិទព្រំដែនកម្ពុជា-ថៃជារៀងរហូត ទើបធ្វើឱ្យពលរដ្ឋថៃភាគច្រើនមានគំនិតជាតិនិយមជ្រុល គាំទ្រការឈ្លានពាន និងស្រឡាញ់សង្គ្រាម ជាងសន្តិភាព ។

ជ័យជម្នះរបស់គណបក្សភូមិចៃថៃ មិនមែនជារឿងគួរឱ្យភ្ញាក់ផ្អើលឡើយ ដោយសារគណបក្សនេះអូសទាញសំឡេងគាំទ្រដោយស្មារតីជាតិនិយមជ្រុលលើបញ្ហាជម្លោះព្រំដែនជាមួយកម្ពុជា គាំទ្រកងទ័ពយ៉ាងពេញទំហឹងឱ្យធ្វើសកម្មភាពឈ្លានពានតាមអំពើចិត្ត និងមានព្រះមហាក្សត្រនៅពីក្រោយ ។ ប្រជាប្រិយភាពរបស់គណបក្សបានធ្លាក់ចុះខ្លាំងកន្លងមក ព្រោះតែ លោក Anutin អសមត្ថភាពដោះស្រាយបញ្ហាទឹកជំនន់បណ្តោយឱ្យពលរដ្ឋភាគខាងត្បូងស្លាប់ជាង១,០០០នាក់ ទើបព្យាយាមឈ្លានពានដណ្តើមទឹកដីកម្ពុជាដើម្បីស្តារប្រជាប្រិយភាពឡើងវិញ ។

លោក Anutin បានប្រកាសរំលាយសភាដើម្បីបោះឆ្នោតជាថ្មីកាលពីខែធ្នូ ឆ្នាំ២០២៥ ក្នុងពេលប្រទេសថៃកំពុងមានជម្លោះព្រំដែនជាមួយកម្ពុជា ដែលអ្នកវិភាគចាត់ទុកថា ការរំលាយសភារបស់មេដឹកនាំគណបក្សអភិរក្សនិយមរូបនេះ ក្នុងគោលដៅទទួលបានផលប្រយោជន៍នយោបាយពីការគាំទ្រឱ្យពលរដ្ឋមានគំនិតជាតិនិយមជ្រុល ។

ឆ្លើយតបនឹងសំណួររបស់អ្នកសារព័ត៌មានដែលសួរថា តើជម្លោះព្រំដែនជាមួយកម្ពុជា គឺជាកត្តាធ្វើឱ្យគណបក្សភូមិចៃថៃទទួលបានជ័យជមុ្នះក្នុងការបោះឆ្នោត មែនទេ? លោក Anutin ថា ជម្នះជម្នះនេះដោយសារពលរដ្ឋជាអ្នកជ្រើសរើសដោយខ្លួនឯង វាជាជ័យជម្នះរបស់ពលរដ្ឋថៃគ្រប់រូប ។ គណបក្សភូមិចៃថៃនឹងផ្តល់ទំនុកចិត្តដល់ពលរដ្ឋដែលបានបោះឆ្នោតគាំទ្រគណបក្សយើងឱ្យដឹកនាំប្រទេស និងដោះស្រាយបញ្ហាផ្សេងៗ ក្រោមការដឹកនាំរបស់ព្រះមហាក្សត្រ ។

យោងតាមលទ្ធផលបោះឆ្នោតបណ្តោះអាសន្នរបស់គណៈកម្មាធិការរៀបចំការបោះឆ្នោតថៃ គឺគណបក្សភូមិចៃថៃទទួលបានអាសនៈច្រើនជាងគេរហូតដល់១៩២អាសនៈ បន្ទាប់មក គណបក្សប្រជាជន ទទួលបាន១១៧អាសនៈ ខណៈគណបក្សភឿថៃ ទទួលបាន៧៤អាសនៈ ។ រីឯគណបក្សផ្សេងៗទទួលបានអាសនៈសរុបចំនួន១១៧អាសនៈក្នុងរដ្ឋសភា ដែលមានអាសនៈទាំងអស់ចំនួន៥០០អាសនៈ ។

បើតាមលោក Napon Jatusripitak អ្នកវិទ្យាសាស្ត្រនយោបាយមកពីវិទ្យាស្ថានស្រាវជ្រាវនៅទីក្រុងបាងកក គឺគណបក្សភូមិចៃថៃ មិនគួរឈ្នះឆ្នោតទទួលបានសំឡេងគាំទ្រច្រើនបែបនេះទេ ប៉ុន្តែលទ្ធផលការបោះឆ្នោតបង្ហាញថា គណបក្សនេះបានបង្ហាញគោលនយោបាយផ្សេងៗរបស់ខ្លួនក្នុងពេលរកសំឡេងឆ្នោត ក្នុងនោះមានគោលនយោបាយលុបចោលអនុស្សរណៈនៃការយោគយល់គ្នា (MOU) ស្តីពីការបែងចែកផលប្រយោជន៍ដែនសមុទ្រជាមួយកម្ពុជា និងគោលនយោបាយចែកប្រាក់ឱ្យពលរដ្ឋ ។

គោលនយោបាយសំខាន់ជាងនេះទៀតដែលធ្វើឱ្យគណបក្សភូមិចៃថៃឈ្នះឆ្នោត ដោយសារជំរុញឱ្យពលរដ្ឋថៃមានគំនិតជាតិនិយមជ្រុលក្នុងជម្លោះព្រំដែនជាមួយកម្ពុជា ដែលអ្នកវិភាគនយោបាយនានាមិននឹកស្មានថា គណបក្សនេះទទួលបានជ័យជម្នះក្នុងការបោះឆ្នោតលើកនេះទេ ៕