ប្រទេសម៉ាឡេស៊ី ៖ តាមការស្រាវជ្រាវរបស់ក្រុមហ៊ុន Standard Chartered នៅត្រីមាសទី១ ឆ្នាំ២០២៤ និងការស្ទង់មតិធនាគារ, នាយកគ្រប់គ្រងការវិនិយោគ រួមទាំងម្ចាស់អចលនទ្រព្យនៅអឺរ៉ុប និងអាមេរិក ចំនួនជាង៤០០កន្លែងបង្ហាញថា អ្នកឆ្លើយតបសំណួរ២៥% មានគម្រោងវិនិយោគ និងពង្រីកអាជីវកម្មនៅម៉ាឡេស៊ី នារយៈពេល១ឆ្នាំខាងមុខ ។

កាលពីឆ្នាំ២០២៣ ការវិនិយោគពីក្រៅប្រទេសរបស់ម៉ាឡេស៊ី គឺស្មើទឹកប្រាក់រហូតដល់៦៩.៥០០លានដុល្លារអាមេរិក ដែលជាទឹកប្រាក់ច្រើនបំផុតបើធៀបនឹងការវិនិយោគពីក្រៅប្រទេសកន្លងមក ។ លើសពីនេះ វាកើនឡើងដល់២៣% បើធៀបពីមួយឆ្នាំទៅមួយឆ្នាំ ។

លោក Chris Clube នាយកគ្រប់គ្រង Global Emerging Markets Equity Fund និយាយថា ម៉ាឡេស៊ីនឹងទទួលបានផលប្រយោជន៍ច្រើនពីការផ្លាស់ប្តូរទីតាំងអាជីវកម្មចេញពីតៃវ៉ាន់ និងតំបន់ខាងត្បូងប្រទេសចិន ។ ក្រៅពីនេះ ម៉ាឡេស៊ីមានបទពិសោធន៍ផ្នែកផលិតឧបករណ៍បច្ចេកវិទ្យាខ្ពស់យូរមកហើយ គឺម៉ាឡេស៊ីមានប្រព័ន្ធអេឡិចត្រូនិកគ្រប់គ្រាន់ ហើយម៉ាឡេស៊ីក៏មានប្រៀបផ្នែកភាសាអង់គ្លេស និងចិន ។

កត្តាទាំងអស់នេះធ្វើឱ្យក្រុមហ៊ុនបរទេសជាច្រើនមកដំណើរការនៅម៉ាឡេស៊ី និងពង្រីកអាជីវកម្មដែលមានស្រាប់ ។ រីឯឧស្សាហកម្ម Semiconductor នៅម៉ាឡេស៊ី ក៏បានទាក់ទាញក្រុមហ៊ុនធំៗឱ្យចូលមកវិនិយោគផងដែរ ដូចជា ៖ ក្រុមហ៊ុន Micron, Intel, OSRAM និង Infineon ជាដើម ។

ទីក្រុង Penang ស្ថិតនៅភាគខាងជើងប្រទេសម៉ាឡេស៊ី ក៏មានតំបន់ពាណិជ្ជកម្មសេរី និងកំពង់ផែដឹកជញ្ជូនទំនិញដ៏មមាញឹក ។ លើសពីនេះ ម៉ាឡេស៊ីមានវិធានការលើកទឹកចិត្តផ្នែកពន្ធ ដែលធ្វើឱ្យវិនិយោគិនបរទេសចាប់អារម្មណ៍ខ្លាំង ។ រីឯការវិនិយោគពីក្រៅប្រទេសមកកាន់ភាគខាងត្បូងម៉ាឡេស៊ីវិញ ក៏កើនឡើងដែរ ខណៈឧស្សាហកម្ម Semiconductor របស់ម៉ាឡេស៊ីបានផ្លាស់ប្តូរជាឧស្សាហកម្មមានបច្ចេកវិទ្យាខ្ពស់ជាងមុន ។

ការស្រាវជ្រាវរបស់ក្រុមហ៊ុន Standard Chartered បង្ហាញទៀតថា វិនិយោគិនបរទេស៥៣% ដែលបានតាំងចិត្តមកវិនិយោគនៅប្រទេសម៉ាឡេស៊ី គឺពួកគេចាប់អារម្មណ៍ផ្នែកផលិតទំនិញ ៕

បច្ចុប្បន្ន iPhone នៅតែជាស្មាតហ្វូនទំនើបជាងគេបំផុតរបស់ពិភពលោក ទោះបីមានម៉ាកយីហោផ្សេងៗប្រកួតប្រជែងក៏ដោយ ក៏ iPhone នៅតែជាស្មាតហ្វូនពេញនិយមបំផុតរបស់មនុស្សភាគច្រើន។ ប្រិយមិត្តធ្លាប់ឮគេនិយាយតៗគ្នាអត់ថា បើមិនចង់ខាតលុយច្រើនលើទូរស័ព្ទគួរទិញ iPhone ប្រើទៅ ព្រោះពេលលក់ចេញក៏មិនសូវខាត ហើយពេលលក់ក៏មានអ្នកទទួលទិញច្រើនដែរ។ ជាក់ស្តែងបើយើងពិនិត្យទៅមើលតម្លៃទីផ្សារទៅ វាជារឿងពិតមែនពោលប្រសិនបើយើងទិញ iPhone ប្រើបានពីរ ឬបីខែអី ហើយចង់លក់ចេញនោះ យើងនឹងខាតខ្ទង់ ២០% ទៅ ២៥% ប៉ុណ្ណោះ ខណៈទូរស័ព្ទម៉ាកដទៃទៀតវិញអាចខាតលើសពីនេះ។

ដូច្នេះហើយតើមូលហេតុអ្វីបានជា iPhone មិនងាយធ្លាក់ថ្លៃដូចទូរស័ព្ទម៉ាកដទៃទៀតអ៊ីចឹង? សម្រាប់មូលហេតុគឺដោយសារមួយឆ្នាំក្រុមហ៊ុន Apple ចេញលក់ទូរស័ព្ទស៊េរីថ្មីរបស់ខ្លួនតែម្តងប៉ុណ្ណោះ នេះក៏ដោយសារតែកាលណាយើងបញ្ចេញស្មាតហ្វូនច្រើនដងក្នុងមួយឆ្នាំ វាអាចប៉ះពាល់ដល់តម្លៃរបស់យើង ធ្វើឱ្យឧបករណ៍ទំនើបរបស់យើងងាយចុះថោក។ លើសពីនេះ iPhone ក៏ជាស្មាតហ្វូនស្តង់ដារ និងល្អបំផុតផងដែរដោយសារតែវានៅតែដំណើរការបានល្អ ទោះបីជាយើងប្រើក្នុងរយៈពេលយូរប៉ុណ្ណាក៏ដោយ។

ជាការពិតណាស់ ទោះបីជាសព្វថ្ងៃនេះមាន iPhone 15 ឬ 16 ក៏ដោយ ក៏នៅតែមានមនុស្សមួយចំនួនប្រើ iPhone 6 ឬ 7 ដែរ នេះក៏ដោយសារតែម៉ូដែល iPhone គឺមិនងាយហួសសម័យនោះទេ ហើយនៅតែដំណើរការបានល្អ ក៏ដូចជាអាចថតរូប ប្រើប្រាស់អ៊ីនធឺណែត លេងហ្គេមបានយ៉ាងល្អឥតខ្ចោះ ដែលចំណុចដ៏ពិសេសនេះហើយ បានជាធ្វើឱ្យតម្លៃវា មិនងាយធ្លាក់ចុះនោះទេ។

ទន្ទឹមនឹងនេះតម្លៃត្រូវបានកំណត់ដោយ Apple ហើយក្រុមហ៊ុនកម្រធ្វើកម្មវិធីបញ្ចុះតម្លៃ ជាហេតុធ្វើឱ្យតម្លៃវានៅនឹងធឹងល្អ មិនងាយធ្លាក់ថ្លៃឡើយ ទោះបីជាប្រើបានរយៈពេល បានកន្លះឆ្នាំ រឺយូរជាងនេះក៏ដោយ។ សរុបមកវិញ នេះគ្រាន់តែជាចំណុចពិសេសមួយចំនួនរបស់ទូរស័ព្ទ iPhone ប៉ុណ្ណោះដែលមនុស្សភាគច្រើនមានទំនោរទៅប្រើប្រាស់ពួកវា។ ទោះជាយ៉ាងណា អ្នកគួរទិញទូរស័ព្ទយកប្រើ មិនមែនដើម្បីយកទៅលក់ចេញដូចមាស ឬរបស់អលនទ្រព្យនោះទេ៕

សហរដ្ឋអាមេរិក ៖ កាលពីថ្ងៃទី៧ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ជនភៀសខ្លួនរាប់ពាន់នាក់នាំគ្នាដើរចូលទឹកដីអាមេរិក មុនពេលលោក Donald Trump ឡើងកាន់តំណែងជាប្រធានាធិបតីផ្លូវការនៅឆ្នាំ២០២៥ ។ ប៉ុន្តែពលរដ្ឋអាមេរិកបែរជាមានគម្រោងចាកចេញទៅរស់នៅប្រទេសផ្សេងវិញ ។

ជនភៀសខ្លួនប្រមាណ ៣.០០០នាក់បានធ្វើដំណើរពីប្រទេសម៉ិកស៊ិកទៅកាន់តំបន់ព្រំដែនដើម្បីចូលទឹកដីអាមេរិក ក្រោយលោក Donald Trump ឈ្នះឆ្នោត ។ ជនភៀសខ្លួនជាច្រើននាក់បារម្ភថា ការចូលមកទឹកដីអាមេរិកអាចត្រូវរឹតបន្តឹងជាងមុន នៅពេលលោក Trump កាន់តំណែងជាប្រធានាធិបតីអាមេរិក ទី៤៧ ជាផ្លូវការ ឬអាមេរិកកំណត់វិធានការតឹងតែងជាថ្មី ។

មន្ត្រីរដ្ឋាភិបាលអាមេរិក២រូបឱ្យដឹងថា រដ្ឋាភិបាលនៅក្រោមការគ្រប់គ្រងរបស់លោកប្រធានាធិបតី ចូ បៃឌិន កំពុងកំណត់វិធានការគ្រប់គ្រងជនភៀសខ្លួនចូលទឹកដីអាមេរិក មុនពេលលោក Trump កាន់តំណែងជាប្រធានាធិបតីផ្លូវការ ខណៈជនភៀសខ្លួនទាំងនេះបារម្ភខ្លាចលោក Trump បញ្ជាឱ្យបិទព្រំដែន ។ នេះបើតាមការចុះផ្សាយរបស់សារព័ត៌មាន NBC ។

ដោយឡែក ក្រោយពីលទ្ធផលការរាប់សន្លឹកឆ្នោតបង្ហាញយ៉ាងច្បាស់ថា លោក Trump នឹងក្លាយជាប្រធានាធិបតីអាមេរិក ពលរដ្ឋអាមេរិកមួយចំនួនធំមានគម្រោងចាកចេញពីប្រទេសរបស់ខ្លួន តាមរយៈការស្វែងរកទីលំនៅថ្មីក្នុង Google ។

Google បង្ហាញថា ចំនួនការស្វែងរកពាក្យ «ផ្លាស់ទៅរស់នៅប្រទេសកាណាដា» បានកើនឡើងរហូតដល់១.២៧០% ក្នុងរយៈពេលត្រឹមតែ២៤ម៉ោងប៉ុណ្ណោះ ។ រីឯការស្វែងរកពាក្យ «ផ្លាស់ទៅរស់នៅនូវែលសេឡង់» បានកើនឡើងជិត២.០០០% ខណៈការស្វែងរកពាក្យ «ផ្លាស់ទៅរស់នៅអូស្ត្រាលី» កើនឡើង៨២០% ។

រីឯទិន្នន័យរបស់ប៉ូលិសអន្តោប្រវេសន៍នូវែលសេឡង់បញ្ជាក់ថា មានពលរដ្ឋអាមេរិកចូលមើលគេហទំព័រអន្តោប្រវេសន៍ រហូតដល់២៥.០០០នាក់ កាលពីថ្ងៃទី៧ ខែវិច្ឆិកា កន្លងមក បើធៀបនឹងឆ្នាំ២០២៣ មានពលរដ្ឋអាមេរិកចូលមើលគេហទំព័រ ត្រឹមតែ១.៥០០នាក់ ។

Green and Spiegel ជាការិយាល័យច្បាប់ធ្វើការផ្នែកផ្លាស់ប្តូរទីលំនៅរបស់កាណាដាបញ្ជាក់ថា មានមនុស្សជាច្រើនមកពិភាក្សាជាមួយបុគ្គលិកការិយាល័យពីរឿងផ្លាស់ប្តូរទីលំនៅ ហើយការិយាល័យទទួលបានអ៊ីម៉ែលសាកសួរព័ត៌មានផ្លាស់ទីលំនៅ រៀងរាល់កន្លះម៉ោងម្តង ៕

ប្រទេសវៀតណាម ៖ នៅឆ្នាំ២០២៤ ពលករវៀតណាមបានដាក់ពាក្យទៅធ្វើការនៅក្រៅប្រទេសកាន់តែច្រើន ហើយមូលហេតុដែលពួកគេសម្រេចចិត្តចាកចេញពីស្រុកកំណើត គឺដោយសារទទួលបានប្រាក់ខែខ្ពស់ និងមានបទពិសោធន៍ការងារល្អជាងនៅវៀតណាម ។ ប្រាក់ខែទាបបំផុតនៅប្រទេសអូស្ត្រាលី និងនូវែលសេឡង់ គឺខ្ពស់ជាងវៀតណាមរហូតដល់១៥ដង រីឯប្រាក់ខែនៅជប៉ុន និងកូរ៉េខាងត្បូង ខ្ពស់ជាងពី៧ដង ទៅ៩ដង ។

តាមរបាយការណ៍របស់ Migration Profile ដែលផ្សព្វផ្សាយដោយក្រសួងការបរទេសវៀតណាមបញ្ជាក់ថា កាលពីឆ្នាំ២០២៣ ពលករវៀតណាមទៅធ្វើការនៅកូរ៉េខាងត្បូង គឺទទួលបានប្រាក់ខែខ្ពស់បំផុត ចាប់ពី១.៦០០ដុល្លារ ទៅ២.០០០ដុល្លារអាមេរិក ។ រីឯពលករវៀតណាមធ្វើការនៅជប៉ុន ទទួលបានប្រាក់ខែ ពី១.២០០ដុល្លារ ទៅ១.៥០០ដុល្លារអាមេរិក ។

បើពលករវៀតណាមទៅធ្វើការនៅតៃវ៉ាន់ និងបណ្តាប្រទេសនៅអឺរ៉ុប ពួកគេនឹងទទួលបានប្រាក់ខែ ពី៨០០ដុល្លារ ទៅ១.២០០ដុល្លារអាមេរិក ។ រីឯនៅប្រទេសម៉ាឡេស៊ី និងបណ្តាប្រទេសមជ្ឈិមបូព៌ា នឹងទទួលបានប្រាក់ខែពី៤០០ដុល្លារ ទៅ១.០០០ដុល្លារអាមេរិកក្នុង១ខែ ។

នៅឆ្នាំ២០២៤ មានពលករវៀតណាមជាង៦៥ម៉ឺននាក់ ចេញធ្វើការនៅប្រទេសចំនួន៤០ ហើយ៨០% នៃពលករទាំងនេះបានធ្វើការផ្នែកកាត់ដេរសម្លៀកបំពាក់, ស្បែកជើង, សំណង់, កសិកម្ម, នេសាទ ព្រមទាំងថែទាំមនុស្សចាស់ និងអ្នកជំងឺ ។ ពួកគេបានផ្ញើប្រាក់មកប្រទេសវៀតណាម ចាប់ពី៣ពាន់៥រយលានដុល្លារ ទៅ៤ពាន់លានដុល្លារអាមេរិកក្នុង១ឆ្នាំ ។

កាលពីឆ្នាំ២០២៣ ប្រទេសជប៉ុនបានទទួលយកពលករវៀតណាមច្រើនបំផុតអស់រយៈពេល៥ឆ្នាំជាប់ៗគ្នា ខណៈប្រទេសផ្សងៗ ដូចជា ៖ កូរ៉េខាងត្បូង និងតៃវ៉ាន់ ក៏បានទទួលពលករវៀតណាមមកធ្វើការច្រើនដែរ ។ ដូចគ្នានេះ ចំនួនពលករវៀតណាមទៅធ្វើការនៅអូស្ត្រាលី, នូវែលសេឡង់, អាល្លឺម៉ង់ និងហុងគ្រី មានអត្រាកំណើនគួរឱ្យកត់សម្គាល់ ។

បើទោះជាពលករវៀតណាមមានភាពអត់ធ្មត់ក្នុងការងារ និងអាចសម្របខ្លួនក្តី ប៉ុន្តែពលករវៀតណាមជាច្រើនបានទៅធ្វើការនៅក្រៅប្រទេសដោយខុសច្បាប់ និងរស់នៅផុតសុពលភាពទិដ្ឋាការ ។ បញ្ហានេះបានក្លាយជាឧបសគ្គយ៉ាងខ្លាំងសម្រាប់ពលករវៀតណាមផ្សេងទៀតដែលចង់ទៅធ្វើការនៅក្រៅប្រទេស ។

លោក Le Hoang Ha មន្ត្រីក្រសួងការងារវៀតណាមថ្លែងថា ពលរដ្ឋវៀតណាមមានជំនាញទាបកំពុងត្រូវបានជំនួសដោយមនុស្សយន្ត និងបច្ចេកវិទ្យា ។ ដូច្នេះ ដើម្បីអាចប្រកួតប្រជែងបាន ពួកគេគួរតែទទួលបានការបណ្តុះបណ្តាលពីជំនាញការងារ និងភាសាបរទេស ៕

សណ្ឋាគារមាន់ ឬ Chicken Hotel ស្ថិតនៅក្នុងរមណីយដ្ឋាន Campuestohan Highlands Resort ខេត្ត Negros Occidental ប្រទេសហ្វីលីពីន ថ្មីៗនេះបានទទួលពានរង្វាន់ Guinness World Record សម្រាប់សណ្ឋាគាររាងដូចសត្វមាន់ធំជាងគេ និងខ្ពស់ជាងគេលើពិភពលោក។

Campuestohan Highland Resort គឺជារមណីយដ្ឋានដ៏ល្បីល្បាញមួយនៅលើខ្ពង់រាបក្នុងខេត្ត Negros Occidental ប្រទេសហ្វីលីពីន ទើបតែបានជាប់ក្នុងសៀវភៅកំណត់ត្រាហ្គីណេស ជាមួយនឹងគម្រោងសណ្ឋាគាររាងដូចសត្វមាន់ធំបំផុតលើពិភពលោក ជាមួយកម្ពស់ ១១៤ ហ្វីត និង ៧ អ៊ីញ (ប្រហែល ៣៥ ម៉ែត្រ)។

សណ្ឋាគារនេះមិនត្រឹមតែទាក់ទាញភ្ញៀវទេសចរដោយសារការរចនាប្លែកពីគេប៉ុណ្ណោះទេ ប៉ុន្តែក៏បង្ហាញពីការកោតសរសើរចំពោះវប្បធម៌ក្នុងតំបន់ផងដែរ។ អគារនេះត្រូវបានគេស្គាល់ថាជា “សណ្ឋាគារមាន់” ព្រោះវាមានរាងដូចសត្វមាន់យក្ស ជាមួយនឹងឥរិយាបថដ៏គួរឱ្យចាប់អារម្មណ៍ និងគួរឱ្យទាក់ទាញ ហាក់ដូចជាវាកំពុងឃ្លាំមើលតំបន់ជុំវិញនោះអ៊ីចឹង។ វត្តមានរបស់សណ្ឋាគារមាន់នាំមកនូវភាពពិសេសដល់រមណីយដ្ឋាន Campuestohan Highland Resort មិនត្រឹមតែដោយសារតែស្ថាបត្យកម្មរបស់វាប៉ុណ្ណោះទេ ប៉ុន្តែវាក៏ដោយសារតែអត្ថន័យវប្បធម៌ដ៏ជ្រាលជ្រៅនៅពីក្រោយវាផងដែរ។

លោក Ricardo Cano Gwapo Tan នាយកប្រតិបត្តិនៃរមណីយដ្ឋានបានចែករំលែកថា សត្វមាន់តំណាងឱ្យភាពស្ងប់ស្ងាត់ ភាពរុងរឿង និងភាពរឹងមាំពិតចំពោះស្មារតីរបស់ប្រជាជន Negros Occidental។ ដូច្នេះការបង្កើតគម្រោងសណ្ឋាគារមាន់នៅទីនេះគឺដើម្បីឱ្យសាធារណៈជនស្គាល់នូវនិមិត្តសញ្ញាតំបន់របស់ខ្លួនដែលមានសញ្ញាសម្គាល់ពិសេសនិងរួមចំណែកក្នុងការលើកកម្ពស់គុណភាពនៃជីវិត។ យោងតាមលោក Gwapo Tan រូបភាពរបស់សត្វមាន់មិនត្រឹមតែជានិមិត្តរូបប៉ុណ្ណោះទេ ថែមទាំងមានទំនាក់ទំនងជាមួយវប្បធម៌ជល់មាន់បែបប្រពៃណីនៅ Negros Occidental ផងដែរ។

នេះគឺជាឧស្សាហកម្មដ៏សំខាន់បំផុតមួយនៅក្នុងតំបន់ ដែលបង្កើតការងារសម្រាប់ប្រជាជនហ្វីលីពីនរាប់លាននាក់។ Chicken Hotel មានបន្ទប់ចំនួន ១៥ បំពាក់ដោយម៉ាស៊ីនត្រជាក់ និងបរិក្ខារទំនើបៗ ដែលផ្តល់ឱ្យអ្នកទស្សនានូវបទពិសោធន៍ដ៏ពិសេសមួយ។ គម្រោងដ៏អស្ចារ្យនេះបានចាប់ផ្តើមសាងសង់នៅថ្ងៃទី ១០ ខែមិថុនា ឆ្នាំ ២០២៣ ហើយត្រូវបានបញ្ចប់ក្នុងខែកញ្ញា ឆ្នាំដដែល មិនយូរប៉ុន្មានវាក៏ត្រូវបានទទួលស្គាល់ដោយ Guinness World Records ថាជាសណ្ឋាគារមាន់ដ៏ល្បីល្បាញបំផុតលើលោក។

សណ្ឋាគារមាន់នៅរមណីយដ្ឋាន Campuestohan Highland Resort មិនត្រឹមតែជាអច្ឆរិយវត្ថុស្ថាបត្យកម្មប៉ុណ្ណោះទេ ថែមទាំងជានិមិត្តសញ្ញាវប្បធម៌ ដែលឆ្លុះបញ្ចាំងពីការអភិវឌ្ឍន៍ប្រកបដោយនិរន្តរភាព និងការច្នៃប្រឌិតរបស់មនុស្សនៃ Negros Occidental។ ជាមួយនឹងមោទនភាពក្នុងស្រុក សណ្ឋាគារនេះសន្យាថានឹងក្លាយជាគោលដៅដែលមិនអាចបំភ្លេចបានសម្រាប់ភ្ញៀវទេសចរមកពីជុំវិញពិភពលោក៕

ប្រទេសថៃ ៖ សារព័ត៌មានថៃរាយការណ៍ថា បច្ចុប្បន្ន អាជីវករថៃរស់នៅក្បែរព្រំដែនឆងចម ខេត្តសុរិន្ទ (ឬព្រំដែនអូរស្មាច់ ខេត្តឧត្តរមានជ័យ) បានសម្រុកទិញស្វាយកែវរមៀតពីចម្ការប្រទេសកម្ពុជា យកមកលក់ឱ្យពលរដ្ឋថៃ និងបោះដុំឱ្យអាជីវករផ្សេងទៀតបញ្ជូនទៅលក់តាមផ្សារទូទាំងប្រទេសថៃ ក្នុងតម្លៃថោកៗ គឺចាប់ពីស្វាយ៥គីឡូក្រាម មានតម្លៃ១០០បាត (ឬ១ម៉ឺនរៀល) រហូតដល់ស្វាយ៧គីឡូក្រាម តម្លៃ១០០បាត ។

កាលពីថ្ងៃទី១០ ខែវិច្ឆិកា ឆ្នាំ២០២៤ ពលរដ្ឋថៃជាច្រើនដែលបានធ្វើដំណើរត្រឡប់មកពីចូលរួមបុណ្យកឋិននៅតាមវត្តនានា បានមកទិញស្វាយកែវរមៀតខ្មែរតម្លៃថោក ដែលដាក់លក់នៅផ្សារជិតព្រំដែនឆងចម ស្ថិតនៅឃុំដាន ស្រុកកាបឈើង ខេត្តសុរិន្ទ ។ ស្វាយលក់ក្នុងផ្សារជិតព្រំដែននេះសម្បូរបែប គឺមានទាំងស្វាយខ្ចី និងស្វាយទុំ សម្រាប់ឱ្យអតិថិជនជ្រើសរើស ។

អាជីវករនៅផ្សារនេះបានយកស្វាយកែវរមៀតខ្មែរមកលក់យ៉ាងច្រើន ដោយពួកគេអះអាងថា បច្ចុប្បន្ន គឺជារដូវកាលស្វាយកែវរមៀតសម្បូរ ទើបពួកគេកុម្ម៉ង់ទិញស្វាយពីចម្ការនៅកម្ពុជា យកមកលក់រាយ និងលក់ដុំ ។ ពលរដ្ឋថៃបានមកទិញស្វាយកែវរមៀតយ៉ាងច្រើន ដោយសារមានតម្លៃថោក គឺស្វាយ១គីឡូក្រាម ចាប់ពី៨បាត រហូតដល់២០បាត និងអាស្រ័យលើទំហំតូច-ធំ ។ បើស្វាយល្អៗ គឺលក់១គីឡូក្រាម ២០បាត ឬ៣គីឡូក្រាម ៥០បាត ឬ៧គីឡូក្រាម ១០០បាត ។

អ្នកស្រី ឌួងរ៉ាត់ ស៊ុបូនផល អាជីវករលក់ស្វាយកែវរមៀត និយាយថា តូបរបស់ខ្លួនលក់បោះដុំស្វាយកែវរមៀតតាមរដូវកាលដែលកុម្ម៉ង់ពីប្រទេសកម្ពុជា ហើយមានក្រុមអាជីវករមកទិញយកទៅលក់បន្តក្នុងផ្សារតាមបណ្តាខេត្តនានាទូទាំងប្រទេសថៃ ។ ក្រៅពីនេះ អ្នកស្រីក៏បានលក់ស្វាយនៅមុខតូបផងដែរ ហើយតម្លៃអាស្រ័យលើទំហំស្វាយ ។

ស្វាយកែវរមៀតដែលអ្នកស្រីយកលក់នេះ គឺមានទំហំតូច, កណ្តាល និងធំ ហើយស្វាយធំៗ អ្នកស្រីលក់១គីឡូក្រាម ២០បាត ឬ៣គីឡូក្រាម ៥០បាត ឬ៧គីឡូក្រាម ១០០បាត រីឯស្វាយមានទំហំតូចជាងនេះ តម្លៃក៏ធ្លាក់ចុះតាមហ្នឹងដែរ ។ ដោយឡែក ស្វាយច្រកថង់ គឺ១ថង់ ស្មើ១០គីឡូក្រាម លក់តម្លៃត្រឹមតែ៨០បាតប៉ុណ្ណោះ ដែលនេះជាតម្លៃបោះដុំ ។

អ្នកស្រីនឹងលក់ស្វាយកែវរមៀតខ្មែរ រហូតដល់ផុតរដូវកាលស្វាយ គឺលក់ចាប់ពីខែវិច្ឆិកា ឆ្នាំ២០២៤នេះ រហូតដល់ខែមេសា ឆ្នាំ២០២៥ ។ អ្នកស្រី និងអាជីវករផ្សេងទៀតនឹងលក់ស្វាយកែវរមៀតម្តងទៀត នៅចុងឆ្នាំ២០២៥ ៕

ក្នុងប៉ុន្មានឆ្នាំថ្មីៗនេះ ប៉ាគីស្ថានគឺជាគោលដៅដ៏ទាក់ទាញមួយ ជាពិសេសនៅរដូវស្លឹកឈើជ្រុះ និងរដូវរងារតែម្តង ដោយសារនៅទីនេះមានភាពស្រស់ស្អាតខ្លាំង មិនចាញ់នៅអឺរ៉ុបនោះទេ។ ប្រទេសប៉ាគីស្ថានត្រូវបានសមាជិកនៃវេទិកាទេសចរណ៍អន្តរជាតិចាត់ទុកថាជាប្រទេសមួយក្នុងចំណោមប្រទេសដែលមានរដូវស្លឹកឈើជ្រុះអស្ចារ្យបំផុតនៅអាស៊ី ហើយគោលដៅដែលល្បីបំផុតនោះគឺតំបន់ Skardu ឬ Gilgit ដែលនៅទីនោះមានទេសភាពស្អាតជាងគេ។

លើសពីនេះអ្នកទេសចរក៏អាចរីករាយនឹងទិដ្ឋភាពភ្នំព្រិលនៃភ្នំហិម៉ាឡៃចំនួនបីគឺ Karakoram, hindu kush និងកំពូលភ្នំ Nanga Parbat ផងដែរ ជាមួយកម្ពស់ ៨,១២៦ ម៉ែត្រនៅលើផ្លូវ Islamabad និង Skardu។ ក្រៅពីតំបន់សំខាន់ៗខាងលើបឹង Shausar មានទឹកពណ៌បៃតងដូចត្បូងមរកត ដែលមានទីតាំងនៅតំបន់ខ្ពង់រាប Deosai ក៏ជាកន្លែងមិនធម្មតាដែរ ដោយសារនៅទីនោះមានខ្យល់អាកាសបរិសុទ្ធ និងភ្នំព្រិលដ៏អស្ចារ្យ បូករួមនឹងធម្មជាតិស្រស់បំព្រង ដែលមានកម្ពស់ជាមធ្យម ៤,១១៤ ម៉ែត្របានកំពុងទាក់ទាញភ្ញៀវទេសចរឱ្យមកទស្សនារាប់ពាន់នាក់ទូទាំងពិភពលោក។

អ្នកទេសចរមួយក្រុមបាននិយាយថា រដូវស្លឹកឈើជ្រុះដ៏ល្អឥតខ្ចោះនៃប្រទេសអាស៊ីខាងត្បូងមួយនេះគឺមានភាពខុសគ្នាខ្លាំងក្នុងអាកាសធាតុរវាងខាងត្បូង និងខាងជើង ខណៈខាងត្បូងនៅតែក្តៅ ប៉ុន្តែខាងជើងត្រជាក់ ហើយនៅកន្លែងខ្លះ សីតុណ្ហភាពពេលយប់អាចធ្លាក់ចុះដល់ដក ៨ អង្សារសេក៏មាន។ ទន្ទឹមនឹងនេះតំបន់ Hunza – Nagar Valley ក៏ត្រូវបានគេស្គាល់ថាជាឋានសួគ៌របស់ប្រទេសប៉ាគីស្ថាននៅលើផែនដីជាមួយនឹងភូមិដ៏ស្រស់ស្អាតផងដែរ។ នៅរដូវស្លឹកឈើជ្រុះ កន្លែងនេះគឺមានពណ៌លឿង-ទឹកក្រូច និងពណ៌ផ្កាឈូក ដែលមានអាយុកាលរាប់រយពាន់ឆ្នាំនៃដើម cherry, apricot, Walnut, strawberry និងដើមម៉េផល។

កន្លែងនេះក៏មានចម្ការផ្លែប៉ោមដែលមានពណ៌ក្រហមស្រស់ និងបៃតងទៀតផង។ រដូវស្លឹកឈើជ្រុះក៏ជារដូវប្រមូលផលផ្លែប៉ោមផងដែរ អ្នកទស្សនាអាចទៅកសិដ្ឋានផ្លែប៉ោម ឬទិញផ្លែធម្មជាតិនេះនៅនឹងកន្លែងដើម្បីរីករាយនឹងទេសភាពទីនោះ។ យោងតាមសម្តីភ្ញៀវទេសចរ បាននិយាយថា ប៉ាគីស្ថានមិនត្រឹមតែជាប្រទេសមានរដូវស្លឹកឈើជ្រុះអស្ចារ្យបំផុតនៅអាស៊ីនោះទេ ប្រជាជននៅទីនោះក៏មានភាពរួសរាយរាក់ទាក់ខ្លាំងផងដែរ៕

ប្រទេសចិន ៖ នារីជា Influencer ដ៏ល្បីល្បាញម្នាក់នៅប្រទេសចិនបានបរិភោគចំណីជ្រូកបង្ហោះក្នុងបណ្តាញសង្គម និងអះអាងថា វាផ្តល់នូវប្រូតេអ៊ីនខ្ពស់ ថែមទាំងអាចសន្សំសំចៃប្រាក់ទៀតផង ប៉ុន្តែត្រូវបានមហាជនមិនយល់ស្រប និងនិយាយបែបនេះទៅវិញ ។

វាបានក្លាយជាប្រធានបទមួយដែលមានការជជែកគ្នាយ៉ាងច្រើនក្នុងបណ្តាញសង្គមចិន ពេលនារីម្នាក់ឈ្មោះ Kong Yufeng ឬមានឈ្មោះក្នុងបណ្តាញសង្គមថា King Kong Like ដែលល្បីល្បាញខាងច្នៃប្រឌិត និងមានអ្នកតាមដានក្នុង Douyin រហូតដល់២លាន៨សែននាក់ បានបង្ហោះវីដេអូបរិភោគចំណីជ្រូកមានតម្លៃថោកជារៀងរាល់ថ្ងៃ ដើម្បីសន្សំសំចៃប្រាក់ ។ នាងអះអាងថា វាផ្តល់នូវប្រូតេអ៊ីនច្រើនណាស់ បរិភោគហើយល្អសម្រាប់សុខភាព ។

កាលពីថ្ងៃទី៣០ ខែតុលា ឆ្នាំ២០២៤ នារីឈ្មោះ Kong បានបង្ហោះវីដេអូពីការសន្សំសំចៃប្រាក់ ឬចំណាយប្រាក់ឱ្យអស់តិចបំផុត ដោយការបរិភោគចំណីជ្រូក ។ នាងបានទិញចំណីជ្រូក១ថង់ ដោយចំណាយប្រាក់ត្រឹមតែ១៤ដុល្លារអាមេរិកប៉ុណ្ណោះ ព្រមទាំងនិយាយថា បើនាងបរិភោគវា គឺនាងនឹងចំណាយប្រាក់មិនដល់១ដុល្លារទេ ។

ពេលបើកថង់ចំណីជ្រូក នាងនិយាយថា ក្លិនវាឈ្ងុយណាស់ ដោយសារមានគ្រឿងផ្សំជាច្រើនមុខ ដូចជា ៖ សណ្តែក, ល្ង, ពោត និងវីតាមីនផ្សេងៗ ។ ដូច្នេះ វាផ្តល់នូវប្រូតេអ៊ីនខ្ពស់, ខ្លាញ់តិច និងសុទ្ធតែជាគ្រឿងផ្សំពីធម្មជាតិទាំងអស់ ហើយផ្តល់ផលល្អសម្រាប់សុខភាពជាងអាហារដែលនាងទិញមកបរិភោគ ។

នាងក៏បានយកចំណីជ្រូកមកផ្សំជាមួយទឹកក្តៅបរិភោគ ហើយនិយាយថា ៖ «រសជាតិប្រៃខ្លាំងណាស់ និងជូរបន្តិច ។ ខ្ញុំទ្រាំពុំបានទេ ត្រូវតែផឹកទឹកបន្ថែម» ។ ប៉ុន្តែទោះយ៉ាងណា នាងនៅតែបន្តបរិភោគចំណីជ្រូករហូតដល់អស់ពីចាន ថែមទាំងមានគម្រោងបរិភោគចំណីជ្រូកឱ្យបាន១សប្តាហ៍ ព្រោះចង់ដឹងថា តើសុខភាពនាងនឹងដូចម្តេច បើនាងបរិភោគតែចំណីជ្រូកមួយមុខ ។

នាងបានប្រាប់អ្នកមើលវីដេអូកុំឱ្យធ្វើតាមនាង បើទោះជាគ្មានប្រាក់ទិញអាហារក្តី ។ ក្រោយពីវីដេអូនេះផ្សព្វផ្សាយក្នុងបណ្តាញសង្គម គឺមានចំនួនចូលមើលយ៉ាងច្រើន ហើយអ្នកលេងបណ្តាញជាច្រើនរិះគន់ថា វាគ្មានប្រយោជន៍ ពីព្រោះជាចំណីជ្រូក តើឱ្យមនុស្សបរិភោគយ៉ាងម៉េចកើត?

មតិខ្លះទៀតបារម្ភខ្លាចមានអ្នកធ្វើតាមនាង ដោយសារនាងជា Influencer ដ៏ល្បីល្បាញម្នាក់ ហើយទង្វើរបស់នាងនឹងមានឥទ្ធិពលដល់អ្នកដទៃ ជាពិសេស យុវជនអាចនឹងបរិភោគចំណីជ្រូកតាមនាង ។

ដោយឡែក បុគ្គលិកក្រុមហ៊ុនផលិតចំណីជ្រូក និយាយថា បើទោះជាចំណីជ្រូកគ្មានគ្រោះថ្នាក់ក្តី ប៉ុន្តែបើមនុស្សបរិភោគ គឺក្រពះពុំអាចរំលាយបានទេ ចូរកុំបរិភោគដាច់ខាត ។ ក្រៅពីនេះ អ្នកជំនាញផ្នែកសុខភាពក៏បាននិយាយដែរថា ការបរិភោគចំណីជ្រូកអាចធ្វើឱ្យខ្វះកាល់ស្យូម, ធាតុដែក និងអៃអូទីន ហើយបណ្តាលឱ្យខូចឆ្អឹង និងឆាប់ហត់ ។

ក្រោយពីមានមហាជនរិះគន់ច្រើនពេក នារីរូបនេះក៏បានលុបវីដេអូរបស់ខ្លួនចេញពីបណ្តាញសង្គម ហើយគេពុំអាចស្វែងរកគណនីរបស់នាងឃើញទេ ៕

ប្រទេសអាល្លឺម៉ង់ ៖ អាកាសយានដ្ឋាន Frankfurt ដ៏ធំបំផុតនៅប្រទេសអាល្លឺម៉ង់ បានសាកល្បងធ្វើផ្លូវ Runway ថ្មីពីវត្ថុធាតុដើមធម្មជាតិផ្សំពីសំបកគ្រាប់ស្វាយចន្ទី និងអះអាងថា វាមានភាពរឹងមាំល្អជាងកៅស៊ូធ្វើផ្លូវធម្មតា រហូតដល់១០ដង ។ បើការសាកល្បងនេះទទួលបានជោគជ័យ អាកាសយានដ្ឋាននឹងធ្វើផ្លូវ Runway ថ្មីពីសំបកគ្រាប់ស្វាយចន្ទីទាំងអស់ ។

ជាទូទៅ កៅស៊ូសម្រាប់ធ្វើផ្លូវត្រូវបានផលិតឡើងពីកំទេចថ្ម, គ្រួស និងខ្សាច់ ផ្សំជាមួយសារធាតុ Bitumen ពណ៌ខ្មៅ ដែលបានមកពីការកែច្នៃប្រេងឆៅ ។ នៅក្នុងសារធាតុ Bitumen មានភាគល្អិតរឹងដូចម្សៅ Asphaltenes និង Maltenes មានសភាពរាវ ដែលជួយឱ្យសារធាតុ Bitumen អាចបត់បែនបាន និងជាប់ជាមួយសារធាតុផ្សេងៗ ។

ក្រុមហ៊ុនអាល្លឺម៉ង់ឈ្មោះ B2 SQUARE បានបង្កើតការច្នៃប្រឌិតមួយហៅថា BioBitumen តាមរយៈវិធីថ្មី ដែលអាចបំបែកសារធាតុ Asphaltenes និង Maltenes ឱ្យចេញពីគ្នា ។ បន្ទាប់មក ក្រុមហ៊ុនក៏យកសារធាតុផ្សេងមកផ្សំជំនួសវិញ ដូចជា ៖ សំបកគ្រាប់ស្វាយចន្ទី ។

ការជ្រើសយកសំបកគ្រាប់ស្វាយចន្ទីសម្រាប់ធ្វើផ្លូវ Runway នេះ ដោយសារវាមានភាពធន់ និងអាចកាត់បន្ថយបរិមាណកាបូនឌីអុកស៊ីត ។ ពេលដើមស្វាយចន្ទីលូតលាស់ វានឹងស្រូបយកកាបូនឌីអុកស៊ីត ហើយសំបកគ្រាប់ស្វាយចន្ទីបានរក្សាទុកកាបូនឌីអុកស៊ីត ប៉ុន្តែកាបូនឌីអុកស៊ីតនឹងត្រូវបន្សាបដោយបច្ចេកទេសពិសេសរបស់ក្រុមហ៊ុន មុនពេលយកវាទៅធ្វើគ្រឿងផ្សំ ។

នាយកគម្រោងសេវាកម្មអាកាសយានដ្ឋាន Frankfurt និយាយថា ផ្លូវ Runway ថ្មីក្នុងអាកាសយានដ្ឋាន នឹងរឹងមាំជាងផ្លូវ Runway ទូទៅ រហូតដល់១០ដង ។ បច្ចុប្បន្ន អាកាសយានដ្ឋានបានសាកល្បងធ្វើផ្លូវ Runway ប្រវែង២០០ម៉ែត្រ គឺផ្នែកម្ខាងនៃផ្លូវក្រាលដោយកៅស៊ូផ្សំពីសំបកគ្រាប់ស្វាយចន្ទី និងផ្នែកម្ខាងទៀតក្រាលដោយកៅស៊ូធម្មតា ដើម្បីប្រៀបធៀបគុណភាពកៅស៊ូទាំង២ប្រភេទ ។

បើការសាកល្បងនេះទទួលបានជោគជ័យ អាកាសយានដ្ឋាន Frankfurt នឹងធ្វើផ្លូវ Runway ពីកៅស៊ូផ្សំពីសំបកគ្រាប់ស្វាយចន្ទីទាំងអស់ ។ អាកាសយានដ្ឋានបានកំណត់គោលដៅបំភាយកាបូនឌីអុកស៊ីតស្មើសូន្យ នៅឆ្នាំ២០៤៥ ៕