ប្រទេសកូស្តារីកា ៖ បើយើងធ្វើដំណើរទៅក្បែរតំបន់ទេសចរណ៍ឈ្មោះ «រីគ្រីអូ វឺដេ» ស្ថិតនៅតំបន់វែណាក់សៀ រដ្ឋសាខាឡូស ប្រទេសកូស្តារីកា (Costa Rica នៅតំបន់អាមេរិកកណ្តាល) យើងនឹងឃើញល្អាងតូចមួយឈ្មោះ «ល្អាងមរណៈ» ។ ការដាក់ឈ្មោះល្អាងបែបនេះ ដោយសារមនុស្ស ឬសត្វ ដែលចូលទៅផ្នែកខាងក្នុងហើយ នឹងគ្មានឱកាសបានចេញក្រៅវិញទេ ។

ឈ្មោះជាផ្លូវការរបស់ល្អាង គឺ «La Cueva de la Muerte» និងស្ថិតនៅក្បែរភ្នំភ្លើង ដែលជម្រៅល្អាងស្មើត្រឹមតែ២ម៉ែត្រ និងប្រវែង៣ម៉ែត្រប៉ុណ្ណោះ ។ ល្អាងនេះមានសភាពដូចរណ្តៅដីលាក់ខ្លួនតូចៗ និងស័ក្តិសមសម្រាប់សត្វល្អិត ឬសត្វស្លាបដែលស្វែងរកទីជម្រក ។ ប៉ុន្តែដោយសារលក្ខណៈខាងក្រៅរបស់ល្អាង ទើបអាចអូសទាញមនុស្ស និងសត្វឱ្យចូលទៅផ្នែកក្នុង រួចហើយនឹងស្លាប់ភ្លាម បើទោះមើលដោយភ្នែកទទេឃើញថា វាគ្មានគ្រោះថ្នាក់ក្តី ។

មនុស្សភាគច្រើនសួរថា តើផ្នែកខាងក្នុងល្អាងមរណៈមានសត្វពស់មានពិស ឬសត្វសាហាវផ្សេងៗ មែនទេ? ចម្លើយ គឺក្នុងល្អាងគ្មានសត្វសាហាវទេ ប៉ុន្តែវាពោរពេញទៅដោយឧស្ម័នកាបូនឌីអុកស៊ីត គ្មានពណ៌ គ្មានក្លិន ប៉ុន្តែមានជាតិពុលយ៉ាងខ្លាំង ។ ហេតុនេះ ក៏មានការសាកល្បងដើម្បីឱ្យដឹងថា តើល្អាងនេះគ្រោះថ្នាក់ខ្លាំងកម្រិតណា ។

មគ្គុទ្ទេសក៍ទេសចរម្នាក់បានយកដុំភ្លើងបោះចូលក្នុងល្អាង បន្ទាប់មក ដុំភ្លើងក៏រលត់ភ្លាមៗដោយសារគ្មានអុកស៊ីសែន និងមានតែឧស្ម័នកាបូនឌីអុកស៊ីតយ៉ាងច្រើនប៉ុណ្ណោះ ។ គ្មានអ្នកជំនាញណាម្នាក់អាចបកស្រាយបានថា តើឧស្ម័នកាបូនឌីអុកស៊ីតនៅក្នុងល្អាងមរណៈមានប្រភពពីណាទេ ប៉ុន្តែអ្នកជំនាញសន្និដ្ឋានថា វាកើតឡើងដោយសារការប្រមូលផ្តុំសារធាតុរ៉ែ ដែលស្ថិតក្រោមសីតុណ្ហភាព និងកម្លាំងសម្ពាធខ្ពស់របស់ថ្មលើពិភពលោក ។

ទីតាំងរបស់ល្អាងស្ថិតនៅក្បែរបរិវេណភ្នំភ្លើងដែលកំពុងតែឆេះ ហើយល្អាងនេះអាចពាក់ព័ន្ធជាមួយឧស្ម័នចេញពីភ្នំភ្លើង ។ អ្នកជំនាញរកឃើញថា ល្អាងអាចផលិតឧស្ម័នកាបូនឌីអុកស៊ីត ស្មើប្រមាណ៣០គីឡូក្រាមក្នុង១ម៉ោង ។ គេបានប្រទះឃើញល្អាងដោយចៃដន្យ ក្នុងពេលបង្កើតតំបន់ទេសចរណ៍ «រីគ្រីអូ វឺដេ» គឺកម្មករម្នាក់បានដើរមកក្បែរល្អាងនេះ ហើយមិនស្រួលខ្លួន ។ ក្រោយមក ក៏មានការត្រួតពិនិត្យល្អាងយ៉ាងលម្អិត ។

នៅផ្នែកខាងមុខល្អាង គឺមានស្លាកហាមភ្ញៀវទេសចរចូលទៅខាងក្នុង ហើយគ្មានភ្ញៀវទេសចរណាចង់ចូលទេ ដោយសារមាត់ល្អាងតូច និងចង្អៀតខ្លាំង ។ បរិមាណឧស្ម័នកាបូនឌីអុកស៊ីតពី៨០% ទៅ៩០% បានប្រមូលផ្តុំនៅផ្នែកខាងក្រោយល្អាង និងបង្កគ្រោះថ្នាក់ដោយសត្វស្លាបយ៉ាងច្រើន ដូចជា ៖ ពិបាកដកដង្ហើម ។ រីឯផ្នែកខាងលើរបស់ល្អាងមានអុកស៊ីសែនតិចតួច ប៉ុន្តែពុំគ្រប់គ្រាន់សម្រាប់ការដកដង្ហើមរបស់មនុស្ស ឬសត្វទេ ៕

សហរដ្ឋអាមេរិក៖ Elon Musk ដែលជាមហាសេដ្ឋីមានជាងគេលើពិភពលោក បច្ចុប្បន្នបានកំពុងប្រឡូកចូលក្នុងឆាកនយោបាយ ទំនងជាអាចទទួលបានការងារជាលេខា ឬទីប្រឹក្សានៅក្នុងរដ្ឋបាលរបស់ Trump នៅពេល Trump ចូលកាន់តំណែងនៅដើមឆ្នាំ២០២៥ នេះបើយោងតាមការចុះផ្សាយរបស់ Euro News។

ប្រសិនបើ Elon Musk ចូលកាន់តំណែងក្នុងរដ្ឋបាលរបស់ Trump ពិតមែនលោកនឹងទទួលខុសត្រូវនូវការងារនយោបាយមួយចំនួនដូចជា ដោះស្រាយជម្លោះនៃបណ្តាប្រទេសនានាជុំវិញពិភពលោក រួមទាំងការអភិវឌ្ឍសេដ្ឋកិច្ចអាមេរិកឱ្យរីកចម្រើនតទៅមុខ។ ទោះជាយ៉ាងណាមានសំនួរមួយចោតសួរថា ប្រសិនបើមហាសេដ្ឋីរូបនេះបានកាន់តំណែងជាទីប្រឹក្សា តើវាអាចប៉ះពាល់ការងារផ្ទាល់ខ្លួនរបស់លោកដែរឬទេ? ខណៈលោកក៏ជានាយកប្រតិបត្តិ Tesla, SpaceX និងបណ្តាញសង្គម X ផងដែរ។

យោងតាមនាយកប្រតិបត្តិសហភាពអឺរ៉ុប បាននិយាយថា ប្រសិនបើ Elon Musk ចូលកាន់តំណែងក្នុងរដ្ឋបាលរបស់ Trump ពិតមែននោះ វាមិនប៉ះពាល់ដល់ការងារឯកជនរបស់លោកទេ។ នេះមានន័យថា ការងារនយោបាយនឹងមិនប៉ះពាល់ដល់ការងារផ្ទាល់ខ្លួនរបស់ Elon Musk ឡើយ។ គួររំលឹកដែរថា កាលពីខែសីហា លោក Donald Trump បាននិយាយថា លោកនឹងដាក់ឈ្មោះ Elon Musk ជាគណៈរដ្ឋមន្ត្រី ឬតួនាទីប្រឹក្សា ប្រសិនបើលោកជាប់ឆ្នោត ដោយបន្ថែមថា Musk គឺជា “បុរសដ៏អស្ចារ្យ” ។

Musk គឺជាអ្នកគាំទ្រដ៏កំពូលម្នាក់របស់ Trump ទោះបីជាយ៉ាងនេះក្តីការតែងតាំង Elon Musk ជាទីប្រឹក្សាមិនទាន់ជាផ្លូវការនោះទេ ហើយមហាសេដ្ឋីបច្ចេកវិទ្យារូបនេះ ក៏មិនទាន់ដឹងថា លោកនឹងទទួលយកតំណែងនេះឬយ៉ាងណានោះទេ៕

បន្ទាប់ពី Donald Trump ឈ្នះការបោះឆ្នោតក្លាយជាប្រធានាធីបតីទី ៤៧ របស់សហរដ្ឋអាមេរិក កូនស្រីទីពីររបស់លោកគឺ Ivanka Trump ក៏ទទួលបានការចាប់អារម្មណ៍ខ្លាំងពីមហាជនផងដែរ ដោយសារតែនាងអាយុច្រើនហើយ ប៉ុន្តែមើលទៅនៅតែក្មេងជាងវ័យ រូបសម្រស់ស្រស់ស្អាត និងរាងស៊ិច.ស៊ី។ ថ្មីៗនេះ Ivanka Trump បានចែករំលែកព័ត៌មានលម្អិតអំពីសុខភាព និងរបៀបហាត់ប្រាណរបស់នាងនៅលើ Instagram ។

អ្នកជំនួញវ័យ ៤៣ ឆ្នាំរូបនេះបាននិយាយថា ដើម្បីទទួលបានសុខភាពល្អ រាងកាយមាំមួន ជាពិសេសសម្រស់ស្រស់ស្អាត និងក្មេងជាងវ័យនោះ នាងផ្តោតលើការហ្វឹកហាត់ទម្ងន់ដើម្បីរឹតបន្តឹងជាតិខ្លាញ់ និងរក្សារាងឱ្យតឹងណែន។ នាងបាននិយាយថា “ដូចស្ត្រីជាច្រើនដែរ នាងធ្លាប់ចូលចិត្ត cardio យូហ្គា និង pilates ប៉ុន្តែចាប់តាំងពីផ្លាស់ទៅទីក្រុង Miami មក នាងបានងាកទៅរកការលើកទម្ងន់ ដែលជួយឱ្យនាងកសាងសាច់ដុំ និងផ្លាស់ប្តូររាងកាយរបស់នាងតាមរបៀបដែលនាងមិននឹកស្មានដល់”។

ឥឡូវនេះ Ivanka ចំណាយពេល ៣-៤ ថ្ងៃក្នុងមួយសប្តាហ៍ដើម្បីធ្វើលំហាត់ប្រាណលើកទម្ងន់ម្នាក់ឯង ឬជាមួយគ្រូបង្វឹក។ ក្រៅពីហ្វឹកហាត់ទម្ងន់ អ្នកជំនួញរូបនេះ ក៏ហាត់យូហ្គាប្រចាំសប្តាហ៍ផងដែរ រួមទាំងការជិះទូកលេង ហែលទឹក ឡើងភ្នំ និងវាយកូនហ្គោលជាដើម។ ការហ្វឹកហាត់ទម្ងន់ ដែលត្រូវបានគេស្គាល់ថាជាលំហាត់ប្រាណស៊ូទ្រាំ ជារឿយៗប្រើឧបករណ៍ដូចជាខ្សែយឺត ទម្ងន់ ឬទម្ងន់ខ្លួនដើម្បីបង្កើនកម្លាំងសាច់ដុំ។ ជាពិសេស លំហាត់ប្រាណនេះជួយកែលម្អឥរិយាបថ និងតុល្យភាពរាងកាយ កាត់បន្ថយហានិភ័យនៃការរងរបួស សម្រកទម្ងន់លឿន និងពង្រឹងសុខភាពសរសៃឈាមបេះដូង ដែលជាអត្ថប្រយោជន៍សុខភាពដ៏សំខាន់សម្រាប់ស្ត្រីវ័យកណ្តាល។

ក្រៅពីការធ្វើលំហាត់ប្រាណទាំងអស់នេះ Ivanka ក៏ផ្ដោតលើរបបអាហារសម្បូរប្រូតេអ៊ីន ដោយមានអាហារសុខភាពល្អដូចជាត្រីសាលម៉ុន និងត្រីធូណាជាដើម។ គួរបញ្ជាក់ដែរថា Ivanka Trump កើតនៅឆ្នាំ ១៩៨១ ក្នុងទីក្រុងញូវយ៉ក គឺជាកូនស្រីបង្កើតរបស់ Trump ជាមួយប្រពន្ធដំបូងរបស់គាត់គឺ Ivana Zelníčková។ កាលពីឆ្នាំ ២០០៧ នាងស្ថិតក្នុងបញ្ជីស្ត្រីស៊ិ.ចស៊ីបំផុតលើពិភពលោកចំនួន ១០០ នាក់ដែលត្រូវបានបោះឆ្នោតដោយទស្សនាវដ្តី Maxim៕