ថ្មីៗនេះ ក្បួនដង្ហែតុក្កតា Gogowa និងតួអង្គផ្សេងៗក្នុងរឿង Squid game បានលេចឡើងនៅលើដងទន្លេព្រះយ៉ា កណ្តាលទីក្រុងបាំងកក ប្រទេសថៃ បង្កឲ្យមានការចាប់អារម្មណ៍ជុំវិញពិភពលោក ជាពិសេសនោះ ប្រទេសថៃនឹងចំណេញលើផ្នែកវប្បធម៌ និង Soft power ជំរុញដល់វិស័យទេសចរណ៍និងសេដ្ឋកិច្ចជាតិ។

កាលពីថ្ងៃទី ២១ និង ២២ ខែធ្នូ ឆ្នាំ ២០២៤នេះ ក្បួនដង្ហែតុក្កតា Gogowa ក៏ដូចជាតួអង្គជាច្រើននៃរឿង Squid game បានបង្ហាញខ្លួនឡើងនៅលើដងទន្លេចៅព្រះយ៉ា បរិវេណវត្តអារុន ដែលជាតំបន់វប្បធម៌ប្រវត្តិសាស្រ្ត និងជាគោលដៅទេសចរណ៍ដ៏ទាក់ទាញប្រចាំទីក្រុងបាំងកក ប្រទេសថៃ។

ក្រុមហ៊ុន Netflix បានសហការជាមួយនឹងប្រទេសថៃក្នុងការផ្សព្វផ្សាយក៏ដូចជាប្រម៉ូតរឿង Squid game រដូវកាលទី ២ ឲ្យភាពល្បីល្បាញកាន់តែខ្លាំងឡើង , មុននឹងរឿងនេះចាក់បញ្ចាំងជាផ្លូវការនាថ្ងៃទី ២៦ ខែធ្នូ ឆ្នាំ ២០២៤។ ការសហការគ្នារវាងក្រុមហ៊ុន Netflix ជាមួយប្រទេសថៃ នឹងទទួលបានផលប្រយោជន៍ទាំងសងខាង ចំពោះក្រុមហ៊ុន Netflix នឹងធ្វើឲ្យរឿងនេះ កាន់តែទទួលបានការចាប់អារម្មណ៍និងល្បីរន្ទឺខ្លាំងឡើង។ ខណៈដែលខាងថៃវិញ នឹងចំណេញក្នុងការផ្សព្វផ្សាយពីតំបន់វប្បធម៌ ក៏ដូចជានឹង Soft Power របស់ប្រទេសខ្លួន ជំរុញដល់កំណើនទេសចរណ៍និងសេដ្ឋកិច្ច។

សូមជម្រាបថា Squid game ដែលជាខ្សែភាពយន្តកូរ៉េខាងត្បូងដ៏ល្បីរន្ធឺ ដែលកាលពីរដូវកាលទី១ រឿងនេះបានចាក់បញ្ចាំងជាផ្លូវការកាលពីថ្ងៃទី ១៧ ខែកញ្ញា ឆ្នាំ ២០២១ ហើយក៏ទទួលបានសន្ទុះនៃការគាំទ្រយ៉ាងខ្លាំងក្លាក្នុងចំណោមទស្សនិកជននៅជុំវិញពិលោកលោក ក៏ដូចជាទន្ទឹងរងចាំទស្សនារដូវកាលទី ២ ទៀត។ យ៉ាងណា Squid game រដូវកាលទី ២ នឹងមកដល់តាមសំណូមពរទស្សនិកជនហើយ ដែលគ្រោងចាក់បញ្ចាំងនាថ្ងៃទី ២៦ ខែធ្នូ ដ៏ឆាប់ខាងមុខនេះ៕

កីឡាកាស Rey Misterio Sr ដែលត្រូវជាពូរបស់កីឡាកាស Rey Misterio បានទទួលមរណភាពហើយក្នុងជន្មាយុ ៦៦ឆ្នាំ។ នេះបើតាមការប្រកាសពីគ្រួសាររបស់លោកកាលពីថ្ងៃទី២០ ខែធ្នូ ខណៈមូលហេតុហេតុនៃការស្លាប់របស់អតីតកីឡាកាសរូបនេះមិនត្រូវបានទម្លាយឡើយ។

ការប្រកាសដំណឹងមរណភាពនេះបានធ្វើឡើងតាមរយៈការបង្ហោះតាមហ្វេសប៊ុករបស់កូនប្រុសរបស់លោក។ ការស្លាប់របស់ Rey Misterio Sr ក៏ត្រូវបានទទួលស្គាល់ដោយ Lucha Libre AAA Worldwide ដែលបានបង្ហោះសេចក្តីថ្លែងការណ៍នៅលើ Instagram ។ ឈ្មោះកំណើតរបស់លោកគឺ Miguel Ángel López Días ដែលត្រូវបានគេស្គាល់ថា Rey Misterio Sr។ លោកគឺជាពូរបស់កីឡាកាស WWE គឺ Rey Mysterio ។ ក្រៅពីការបង្ហាត់កូនប្រុស និងក្មួយប្រុស Rey Misterio Sr ក៏បានបង្វឹកអ្នកចំបាប់អន្តរជាតិល្បីៗមួយចំនួនទៀតដូចជា Halloween និង Hayabusa។

Rey Misterio Sr គឺជាអ្នកចំបាប់អាជីពម៉ិកស៊ិកបានបង្ហាញខ្លួនជាលើកដំបូងក្នុងកីឡាចំបាប់ឬទស្សនិកជនស្គាល់ថាជាកីឡាកាស នៅខែមករា ឆ្នាំ១៩៧៦ នៅលើកម្មវិធីមួយដែលមានឈ្មោះថា «Day of the Kings» ។ ពីទីនោះលោកនឹងបន្តចំបាប់ជាមួយនឹងការផ្សព្វផ្សាយជាច្រើនរួមទាំងសមាគមកីឡាចំបាប់ពិភពលោក។ លោកក៏នឹងឈ្នះពានជាច្រើននៅទូទាំងការផ្សព្វផ្សាយផ្សេងគ្នារួមទាំង IWC World Middleweight Championship ជាពានដែលលោកបានកាន់ពីរដង។

ទោះបីជាចូលនិវត្តន៍ជាផ្លូវការក្នុងឆ្នាំ ២០០៩ ក៏ដោយក៏ការប្រកួតចុងក្រោយរបស់ Rey Misterio Sr បានធ្វើឡើងនៅខែមេសា ឆ្នាំ២០២៣ នៅរដ្ឋ California ជាការប្រកួតដែលមានមនុស្ស ៦នាក់។ មូលហេតុនៃការស្លាប់របស់កីឡាកាសរូបនេះមិនត្រូវបានប្រកាសឡើយ៕

ជាទូទៅសត្វភេនឃ្វីនគឺមាន ៣ ពណ៌លាយចូលគ្នាដូចជាស ខ្មៅ និងលឿង។ ទោះជាយ៉ាងណាថ្មីនេះៗគេប្រទះឃើញសត្វភេនឃ្វីនមួយក្បាលមានពណ៌ខ្មៅសុទ្ធតែម្តង ដែលមើលទៅលេចធ្លោជាងគេក្នុងចំណោមហ្វូងភេនឃ្វីនចំនួន ៥០០,០០០ ក្បាលផ្សេងទៀត។
សត្វភេនឃ្វីនពណ៌ខ្មៅសុទ្ធ ត្រូវបានគេប្រទះឃើញនៅលើកោះ South Georgia នៃមហាសមុទ្រអាត្លង់ទិក ដោយអ្នកថតរូបសត្វព្រៃបែលហ្ស៊ិក បានទៅ Saint Andrews Bay ក្នុងបេសកកម្មថ្មីមួយ។

សត្វនេះត្រូវបានគេចាត់ទុកថាជាសត្វកម្រ និងគួរឱ្យទាក់ទាញបំផុតដោយសារវាមានពណ៌ខ្មៅខុសប្លែកពីគេ ខណៈសត្វភេនឃ្វីនផ្សេងទៀតត្រូវបានគេសម្គាល់ឃើញថាមានត្រចៀកពណ៌លឿង ផ្នែកកណ្តាលនៃដងខ្លួនពណ៌ស និងខាងក្រោយខ្នងពណ៌ខ្មៅ។ យោងតាមការសិក្សាស្រាវជ្រាវ មូលហេតុដែលសត្វភេនឃ្វីនមួយក្បាលនេះស្រាប់តែមានពណ៌ខ្មៅទាំងអស់ពេញរាងកាយ គឺដោយសារតែការផលិតជាតិ melanin ច្រើនពេក ដែលជាសារធាតុផ្តល់ពណ៌ដល់ស្បែក សក់ និងភ្នែករបស់សត្វ ការពារពួកគេពីកាំរស្មីអ៊ុលត្រាវីយូឡេរបស់ព្រះអាទិត្យ។

ការផលិតលើសនេះត្រូវបានគេហៅថា melanism ដែលជាលក្ខណៈហ្សែនដ៏កម្រមួយបណ្តាលឱ្យរាងកាយទាំងមូលមានពណ៌ខ្មៅសុទ្ធ ដែលពណ៌ពិសេសនេះក៏បណ្តាលឱ្យមានគុណសម្បត្តិ និងគុណវិបត្តិមួយចំនួនផងដែរ។ ជាទូទៅសត្វភេនឃ្វីនពណ៌ខ្មៅ និងសធម្មតាជួយពួកគេលាក់បាំងពីសត្រូវ ដោយរោមខ្មៅជួយឱ្យពួកវាលាយឡំជាមួយសមុទ្រនៅពេលមើលពីខាងលើ ខណៈក្បាលពោះពណ៌សជួយឱ្យពួកវាលាក់ខ្លួនពីសត្រូវដែលហែលទឹកនៅក្រោមទឹក។

ហេតុនេះសត្វភេនឃ្វីនដែលមានពណ៌ខ្មៅទាំងអស់ គុណសម្បត្តិគឺការលាក់ខ្លួនពីសត្រូវបានល្អបំផុត ប៉ុន្តែគុណវិបត្តិវិញពណ៌ខុសធម្មតារបស់វាក៏ប៉ះពាល់ដល់អាយុជីវិត និងវិធីសាស្ត្រនៃការរស់រានរបស់វាផងដែរ ដោយជាទូទៅរោមខ្មៅសុទ្ធនឹងធ្វើឱ្យវាមានអាយុខ្លីដោយស្វ័យប្រវត្តិ មានន័យថា ពួកវាទំនងមានអាយុខ្លីជាងសត្វភេនឃ្វីនធម្មតា៕

សហរដ្ឋអាមេរិក ៖ កាលពីថ្ងៃទី២០ ខែធ្នូ ឆ្នាំ២០២៤ ប្រធានាធិបតីអាមេរិកថ្មី លោក Donald Trump បានអំពាវនាវឱ្យសហភាពអឺរ៉ុប (EU) ទិញប្រេងឥន្ធនៈ និងឧស្ម័នធម្មជាតិពីអាមេរិកបន្ថែមទៀត បើមិនដូច្នោះទេ រដ្ឋាភិបាលទីក្រុងវ៉ាស៊ីនតោននឹងដំឡើងពន្ធទំនិញនាំចូលពីសហភាពអឺរ៉ុប ដូចជា ៖ រថយន្ត និងគ្រឿងម៉ាស៊ីន ។

ទិន្នន័យរបស់រដ្ឋាភិបាលអាមេរិកបង្ហាញថា បច្ចុប្បន្ន សហភាពអឺរ៉ុបបានទិញប្រេងឥន្ធនៈ និងឧស្ម័នធម្មជាតិអាមេរិកក្នុងបរិមាណច្រើន ហើយពុំអាចបញ្ជាទិញថែទៀតទេ ។ ប៉ុន្តែលោក Trump ប្រកាសថា អាមេរិកនឹងផលិតប្រេងឥន្ធនៈ និងឧស្ម័នឱ្យច្រើនជាងមុន ហើយលោកសរសេរក្នុងបណ្តាញសង្គម Truth Social ថា ៖ «ខ្ញុំបានប្រាប់ទៅសហភាពអឺរ៉ុបឱ្យពួកគេទិញប្រេងឥន្ធនៈ និងឧស្ម័នពីយើងក្នុងបរិមាណច្រើនដើម្បីកាត់បន្ថយឱនភាពពាណិជ្ជកម្ម ។ បើមិនដូច្នោះទេ អាមេរិកនឹងដំឡើងពន្ធទំនិញនាំចូលពីសហភាពអឺរ៉ុប» ។

ចំណែកគណៈកម្មការសហភាពអឺរ៉ុបបញ្ជាក់ថា នឹងពិភាក្សាជាមួយលោក Trump ដើម្បីពង្រឹងទំនាក់ទំនងជាមួយអាមេរិកឱ្យកាន់តែរឹងមាំ រួមទាំងផ្នែកថាមពលផងដែរ ។ យើងនឹងកាត់បន្ថយការនាំចូលថាមពលពីរុស្ស៊ី និងនាំចូលថាមពលពីប្រទេសផ្សេងជំនួសវិញ ។ សហភាពអឺរ៉ុបបាននាំចូលឧស្ម័នធម្មជាតិរាវ និងប្រេងឥន្ធនៈពីអាមេរិក ស្មើនឹង៤៧% និង១៧% នៃបរិមាណនាំចូលសរុប នៅត្រីមាសទី១ ឆ្នាំ២០២៤ ។ នេះបើតាមការិយាល័យស្ថិតិ Eurostat ។

លោក Trump នឹងឡើងកាន់តំណែងជាប្រធានាធិបតីអាមេរិកថ្មី នៅថ្ងៃទី២០ ខែមករា ឆ្នាំ២០២៥ បានប្រកាសដំឡើងពន្ធទំនិញនាំចូលពីប្រទេសនានា យ៉ាងហោចណាស់១០% ហើយដំឡើងពន្ធទំនិញចិនរហូតដល់៦០% ។ អ្នកជំនាញដាស់តឿនថា វានឹងប៉ះពាល់ដល់ពាណិជ្ជកម្មធ្វើឱ្យអតិថិជនអាមេរិកចំណាយប្រាក់ច្រើនជាងមុន ហើយប្រទេសផ្សេងៗនឹងដំឡើងពន្ធទំនិញអាមេរិកដូចគ្នា ។

គួរបញ្ជាក់ថា អាមេរិកមានឱនភាពពាណិជ្ជកម្មទំនិញជាមួយសហភាពអឺរ៉ុប ស្មើជាង២០ម៉ឹនលានដុល្លារក្នុងឆ្នាំ២០២៣ ។ លោក Trump បានផ្តោតសំខាន់លើការធ្វើពាណិជ្ជកម្ម និងនិយាយជាញឹកញាប់ថា អាមេរិកបាននាំចូលរថយន្តពីសហភាពអឺរ៉ុបយ៉ាងច្រើន ប៉ុន្តែមានរថយន្តអាមេរិកតិចណាស់ដែលបានដឹកជញ្ជូនឆ្លងកាត់មហាសមុទ្រអាត្លង់ទិក ៕