ថ្មីនេះៗ អ្នកលេងបណ្តាញសង្គមជាច្រើនទាំងខ្មែរនិងថៃ ហាក់មានការចាប់អារម្មណ៍យ៉ាងខ្លាំងលើកុមារីជនជាតិថៃមួយរូប បានបកស្រាយបទចម្រៀង«រំលស់ប្រពន្ធ» របស់កញ្ញាតន់ ចន្ទសីម៉ា បានយ៉ាងពីរោះរណ្តំ បើទោះបីជាសំនៀងជាភាសារខ្មែរមិនសូវជាច្បាស់ក្តី។
គណនី Tik Tok ជនជាតិថៃដែលមានឈ្មោះថា Phakbung បានបង្ហាញឃ្លីបវីដេអូខ្លីមួយ ដែលកុមារីស្រស់ស្អាតមួយរូបក្នុងកាយវិការយ៉ាងរស់រវើក រាំផង ច្រៀងផង តាមចង្វាក់បទខ្មែរប្រកបដោយភាពទាក់ទាញ។ ចម្រៀងមួយនេះបទក្រោមចំណងជើងថា«រំលស់ប្រពន្ធ» របស់កំពូលតារាចម្រៀងខ្មែរ កញ្ញា តន់ ចន្ទសីម៉ា។ តាមរយៈការច្រៀងរបស់ក្មេងស្រីថៃរូបនេះ បានបណ្តាលអ្នកលេងបណ្តាញសង្គមគ្រប់ៗរូបចាប់អារម្មណ៍ខ្លាំង និងកោតសរសើរទៅលើទឹកដមសំឡេងរបស់នាង។
សូមជម្រាបថា បទ«រំលស់ប្រពន្ធ» របស់កំពូលតារាចម្រៀងតន់ ចន្ទសីម៉ា ប្រចាំផលិតកម្ម Galaxy Navatra ហាក់ទទួលបានសន្ទុះនូវការគាំទ្រយ៉ាងខ្លាំងក្លាទាំងក្នុងប្រទេសកម្ពុជានិងក្រៅប្រទេស។ នៅលើយូធូបផ្លូវការរបស់ផលិតកម្ម បទមួយនេះទទួលអ្នកទស្សនារហូតដល់ទៅ ៤១ លានដងឯណ្ណោះ។ 
យ៉ាងណា កាលពីចុងខែធ្នូ ឆ្នាំ២០២៤ កន្លងទៅ សារព័ត៌មានថៃ Khaosod ក៏បានចុះផ្សាយពីកំពូលតារាចម្រៀងស្រីរូបនេះ ដែលបទ«រំលស់ប្រពន្ធ»របស់នាង កំពុងទទួលបានប្រជាប្រិយភាពយ៉ាងខ្លាំងនៅលើ Tik Tok ថៃ ក៏ដូចជានៅតាមបណ្តាការប្រគុំតន្រ្តីនានា ក៏បានចាក់បទនាងជាហូរហែរ។ ហ្វេនៗថៃប្រាប់ថា ពេលស្តាប់បទនេះទៅគឺធ្វើឲ្យមានអារម្មណ៍សប្បាយរីករាយ ជាពិសេសនោះគឺខ្លឹមសារនៃបទចម្រៀងច្រៀងរៀបរាប់ពីការបង់រំលស់ថ្លៃបណ្តាការផងដែរ៕
