ស្ពាន Huajiang Gorge ក្នុងខេត្ត Guizhou ប្រទេសចិន ត្រូវបានគេរំពឹងថានឹងវ៉ាដាច់ស្ពាន Beipanjiang ដែលជាស្ពានជាប់កំណត់ត្រាខ្ពស់ជាងគេបំផុតក្នុងពិភពលោកនាពេលបច្ចុប្បន្ននេះ។ ស្ពានថ្មី Huajiang Gorge មានកម្ពស់ ៦២៥ ម៉ែត្រពីលើទន្លេ Beipan និងមានប្រវែងសំខាន់ ១,៤២០ ម៉ែត្រ ខណៈស្ពាន Beipanjiang មានកម្ពស់ត្រឹមតែ ៥៦៥ ម៉ែត្រ ជាមួយនឹងប្រវែង ១,៣៤០ ម៉ែត្រប៉ុណ្ណោះ។ ដូច្នេះស្ពានថ្មី Huajiang Gorge ទំនងនឹងក្លាយជាស្ពានខ្ពស់ជាងគេលំដាប់ទីមួយរបស់ពិភពលោកនៅពេលសាងសង់រួច។

យោងតាមសារព័ត៌មានបរទេស China Daily ស្ពាន Huajiang Gorge បានឈានដល់ដំណាក់កាលដ៏សំខាន់មួយ នៅពេលដែលផ្នែកចុងក្រោយនៃដែកកេះដែលមានទម្ងន់ ២១៥ តោន ត្រូវបានលើក និងដំឡើងរួចរាល់ ដែលនេះគឺជាការបញ្ចប់រចនាសម្ព័ន្ធសំខាន់ ដោយបានដាក់គ្រឹះដ៏រឹងមាំបំផុត។ ដូច្នេះបច្ចុប្បន្នស្ពានថ្មីនេះ បានបញ្ចប់ការសាងសង់ ៨០% ហើយ ខណៈនាពេលខាងមុខក្រុមការងារនឹងផ្តោតតែលើការដំឡើងបន្ទះក្តារនៅចន្លោះធ្នឹមប៉ុណ្ណោះ ហើយវាត្រូវបានគេរំពឹងថានឹងបើកដំណើរការនៅឆមាសទីពីរនៃឆ្នាំ ២០២៥។

ស្ពានថ្មី Huajiang Gorge បានចាប់ផ្តើមសាងសង់ក្នុងឆ្នាំ ២០២២ នៅពេលសាងសង់រួចរាល់ ស្ពានថ្មីនេះត្រូវបានគេរំពឹងថានឹងវ៉ាដាច់ស្ពាន Beipanjiang របស់ខេត្តជាស្ពានដែលខ្ពស់ជាងគេលើពិភពលោក និងបង្កើតកំណត់ត្រាពិភពលោកសម្រាប់ស្ពានវែងបំផុតមួយនៅក្នុងតំបន់ភ្នំ។ លោក Chen Jianlei អនុប្រធាននាយកដ្ឋានដឹកជញ្ជូន Guizhou បាននិយាយថា “ការបញ្ចប់ស្ពាន Huajiang Gorge នឹងពង្រឹងទំនាក់ទំនងសេដ្ឋកិច្ចរវាង Guiyang, Anshun និងភាគនិរតី Qian ដោយលើកកម្ពស់សមាហរណកម្មសេដ្ឋកិច្ចក្នុងតំបន់”។

យោងតាមសារព័ត៌មានបរទេសចុះផ្សាយថា ស្ពាន Huajiang Gorge បានប្រើប្រាស់ ប្រព័ន្ធខ្សែកាបស្ទូចឆ្លាតវៃដែលត្រូវបានអភិវឌ្ឍក្នុងស្រុកដើម្បីបញ្ចប់ការលើកធ្នឹម។ ប្រព័ន្ធនេះត្រូវបានគ្រប់គ្រងដោយប្រទេសចិន និងរួមបញ្ចូលបច្ចេកវិទ្យាកំណត់ទីតាំងផ្កាយរណប Bac Dau ដែលអនុញ្ញាតឱ្យលើកយ៉ាងជាក់លាក់ដោយគ្រាន់តែចុចប៊ូតុងមួយ។ លើសពីនេះ ដំណើរការផលិតទាំងមូលបានរួមបញ្ចូលឧបករណ៍គ្រប់គ្រងឌីជីថល ដូចជាការត្រួតពិនិត្យវត្ថុធាតុដើមតាមពេលវេលាជាក់ស្តែង និងការក្លែងធ្វើនិម្មិត ដើម្បីតម្រឹមសមាសធាតុ។

អ្នកគ្រប់គ្រងគម្រោងនៃក្រុមហ៊ុន China Railway Baoji Bridge នៅតំបន់ភាគនិរតី ក៏បាននិយាយដែរថា ក្រុមការងារបានប្រើប្រាស់បច្ចេកវិទ្យាស្កែន 3D និងការក្លែងធ្វើនិម្មិត ដើម្បីរកមើលការប៉ះទង្គិចដែលអាចកើតមានរវាងសមាសធាតុនានា ដោយធានានូវភាពត្រឹមត្រូវអំឡុងពេលសាងសង់។ ដូច្នេះដោយសារបច្ចេកវិទ្យាទំនើប ស្ពាន Huajiang Gorge នឹងក្លាយជាស្ពានសុវត្តិភាពបំផុតរបស់ពិភពលោកនៅពេលសាងសង់រួច៕

ប្រទេសចិន ៖ BYD គឺជាក្រុមហ៊ុនផលិតរថយន្តអគ្គិសនីដ៏ល្បីល្បាញនៅប្រទេសចិន បានបង្ហាញកប៉ាល់មានទំហំធំបំផុតលើពិភពលោក ដែលអាចផ្ទុករថយន្តរហូតដល់៩,២០០គ្រឿង ។ កប៉ាល់ផ្ទុករថយន្តនេះមានឈ្មោះថា «BYD Shenzhen» ដែលដាក់ឈ្មោះតាមទីស្នាក់ការធំរបស់ក្រុមហ៊ុន BYD ។

កប៉ាល់នេះមានប្រវែងសរុប២១៩ម៉ែត្រ និងអាចបើកបរក្នុងល្បឿនលឿនបំផុតស្មើជាង៣៤គីឡូម៉ែត្រក្នុង១ម៉ោង ។ BYD Shenzhen គឺជាកប៉ាល់ផ្ទុករថយន្តដ៏ធំលំដាប់ទី៤ របស់ក្រុមហ៊ុន BYD ហើយនៅដើមឆ្នាំ២០២៦ ក្រុមហ៊ុនបានកំណត់គោលដៅមានកប៉ាល់ផ្ទុករថយន្ត សរុប៨គ្រឿង ដើម្បីវាយលុកទីផ្សារពិភពលោក ។

ការមានកប៉ាល់ផ្ទុករថយន្តជារបស់ខ្លួនអាចប្លែកសម្រាប់ក្រុមហ៊ុនផលិតរថយន្តផ្សេងៗ ប៉ុន្តែវាមិនប្លែកសម្រាប់ក្រុមហ៊ុន BYD ដែលល្បីល្បាញនាពេលបច្ចុប្បន្ន ។ BYD បានផលិតថ្មរថយន្តអគ្គិសនីដោយខ្លួនឯង និងមានក្រុមហ៊ុនធានារ៉ាប់រងរថយន្តអគ្គិសនីនៅប្រទេសចិន អះអាងថា កប៉ាល់ផ្ទុករថយន្តនេះពុំប៉ះពាល់បរិស្ថានទេ ព្រមទាំងបានបំពាក់ឧបករណ៍សន្សំសំចៃថាមពល ។

BYD Shenzhen គឺជាកប៉ាល់ផ្ទុករថយន្តដំបូងគេ ដែលបំពាក់ថ្មផលិតដោយ BYD ហើយក្រុមហ៊ុនពុំបានបញ្ជាក់លម្អិតពីថ្មទេ ប៉ុន្តែគេរំពឹងថា ក្រុមហ៊ុនអាចនឹងប្រើប្រាស់ថាជាថាមពលសម្រាប់ឱ្យកប៉ាល់បញ្ចេញខ្យល់ពុលតិច ។ BYD បានបង្ហាញកប៉ាល់ផ្ទុករថយន្ត ទី១ កាលពីខែមករា ឆ្នាំ២០២៤ បន្ទាប់មក ក៏បង្ហាញកប៉ាល់ផ្ទុករថយន្ត ទី២ ដែលបានបញ្ជូនរថយន្តអគ្គិសនី ចំនួន៥,០០០គ្រឿង ទៅតំបន់អឺរ៉ុប កាលពីចុងឆ្នាំ២០២៤ ។

លើសពីនេះ នៅខែមករា ឆ្នាំ២០២៥ BYD បានដំណើរការកប៉ាល់ផ្ទុករថយន្ត ទី៣ ដែលអាចផ្ទុករថយន្តបាន៧,០០០គ្រឿង ។ កាលពីឆ្នាំ២០២៤ BYD បានលក់រថយន្តចំនួន៤១៧,២០៤គ្រឿង (ស្មើជាង៤១គ្រឿង) កើនឡើង៧១.៩% បើធៀបនឹងឆ្នាំ២០២៣ ខណៈការលក់រថយន្តទូទាំងពិភពលោក កាលពីឆ្នាំ២០២៤ ស្មើនឹង៤លាន២សែន៥ម៉ឺនគ្រឿង ៕

ប្រទេសថៃ ៖ និស្សិតចិនបានមកសិក្សានៅប្រទេសថៃជាច្រើន ក្រោយពីរដ្ឋាភិបាលចិនមានគោលនយោបាយកាត់បន្ថយម៉ោងសិក្សាភាសាអង់គ្លេស ហើយនិស្សិតចិនត្រូវចំណាយប្រាក់ច្រើនក្នុងការសិក្សានៅប្រទេសរបស់ខ្លួន ជាហេតុធ្វើឱ្យអាណាព្យាបាលបញ្ជូនកូនទៅសិក្សានៅក្រៅប្រទេស ជាពិសេស នៅថៃ ។ ហេតុនេះ ថៃបានក្លាយជាគោលដៅសំខាន់ក្នុងការសិក្សាបន្តរបស់និស្សិតចិន ខណៈសាលារៀនអន្តរជាតិនៅថៃមានស្តង់ដារដូចប្រទេសមួយចំនួនក្នុងតំបន់អាស៊ាន ។

លោក គេតផុន ប្រៃផៃសានកិច្ច នាយករងក្រុមហ៊ុន UOB Kay Hian និយាយថា ការមកសិក្សាបន្តរបស់និស្សិតចិននៅកម្រិតបឋមសិក្សា, មធ្យមសិក្សា និងឧត្តមសិក្សា គឺផ្តល់ផលវិជ្ជមានសម្រាប់សេដ្ឋកិច្ចថៃរយៈពេលខ្លី តាមរយៈការចំណាយប្រាក់ក្នុងការសិក្សា និងស្នាក់នៅរបស់និស្សិតចិន ខណៈថៃ និងចិនបានចុះកិច្ចព្រមព្រៀងពាណិជ្ជកម្មជាមួយគ្នាជាច្រើនច្បាប់ ។

ប៉ុន្តែពេលនិស្សិតចិនមានចំណេះដឹងផ្នែកវប្បធម៌ និងចេះភាសាថៃ គឺថៃនឹងមានបញ្ហាប្រឈមរយៈពេលវែង ហើយធ្វើឱ្យថៃចាញ់ប្រៀបពាណិជ្ជកម្មជាមួយចិន ។ និស្សិតចិនមានប្រៀបក្នុងការប្រកបអាជីវកម្មនៅថៃ បើធៀបនឹងនិស្សិតថៃប្រឈមនឹងឧបសគ្គក្នុងការទៅសិក្សាបន្ត និងប្រកបអាជីវកម្មនៅចិន ។

ច្បាប់ថៃទាក់ទងនឹងពាណិជ្ជកម្មជាមួយចិននៅមានចំណុចខ្សោយ វាដល់ពេលរដ្ឋាភិបាលថៃត្រួតពិនិត្យ និងកែលម្អបទប្បញ្ញត្តិពាណិជ្ជកម្មជាមួយចិន ដើម្បីបិទចន្លោះប្រហាងដែលធ្វើឱ្យថៃចាញ់ប្រៀបចិននាថ្ងៃអនាគត ។ រយៈពេលពី២ឆ្នាំ ទៅ៣ឆ្នាំកន្លងមក និស្សិតចិនបានមកសិក្សានៅសាលារៀនអន្តរជាតិក្នុងប្រទេសថៃយ៉ាងច្រើន ជាពិសេស នៅតាមបណ្តាខេត្តធំៗ និងខេត្តទេសចរណ៍ ។

ម្យ៉ាងទៀត អាណាព្យាបាលនិស្សិតចិនដែលបញ្ជូនកូនមកសិក្សានៅថៃ ពួកគេមានលទ្ធភាពចំណាយប្រាក់ក្នុងការសិក្សារបស់កូន ហើយក្នុងរយៈពេលខ្លី គឺថៃទទួលបានផលប្រយោជន៍ពីការចំណាយរបស់និស្សិតចិន និងការកម្សាន្តរបស់ពួកគេ ប៉ុន្តែសម្រាប់រយៈពេលវែង ថៃនឹងចាញ់ប្រៀបពាណិជ្ជកម្មចិន ដោយសារនិស្សិតចិនយល់ពីសេដ្ឋកិច្ច និងពាណិជ្ជកម្មថៃ ៕