ប្រទេសថៃ ៖ អាជ្ញាធរខេត្តសុងក្លាបានប្រកាសហាមឃាត់ភ្ញៀវទេសចរបរទស និងពលរដ្ឋចុះលេងទឹកសមុទ្រជាដាច់ខាត នៅចុងខែធ្នូ ឆ្នាំ២០២៤ ពីព្រោះបារម្ភពីហេតុការណ៍មនុស្សជាច្រើននាក់ស្លា.ប់ នាពេលកន្លងមក ដោយសារទឹករលកសមុទ្របោកបក់មកលើឆ្នេរអាចនឹងកើតឡើងម្តងទៀត ។

កាលពីថ្ងៃទី២០ ខែធ្នូ កន្លងមក សារព័ត៌មានថៃរាយការណ៍ថា អាជ្ញាធរខេត្តសុងក្លាបានដោតទង់ក្រហមនៅតាមឆ្នេរសមុទ្រ Chalathat និងឆ្នេរ Samila ហាមភ្ញៀវទេសចរលេងទឹកសមុទ្រក្នុងអំឡុងពេលនេះ ដោយសារទឹករលកសមុទ្របោកបក់មកលេងឆ្នេរមានកម្លាំងខ្លាំង ។ កន្លងមក មនុស្សជាច្រើននាក់បានស្លាប់ដោយសារទឹករលកខ្លាំង រីឯភ្នាក់ងារសង្គ្រោះដែលបានចុះទៅជួយក៏បានស្លាប់ដែរ ។

អាជ្ញាធរខេត្តសុងក្លាបានត្រៀមខ្លួនការពារសុវត្ថិភាពភ្ញៀវទេសចរ និងពលរដ្ឋ ក្នុងអំឡុងពេលបរិវេណឆ្នេរសមុទ្រទាំង២កន្លែងមានទឹករលកខ្លាំង និងដាស់តឿនភ្ញៀវទេសចរដែលមកលេងឆ្នេរសមុទ្រឱ្យប្រុងប្រយ័ត្នខ្លួន ។ ខ្យល់នៅឈូងសមុទ្រថៃមានកម្លាំងខ្លាំង និងរលកសមុទ្រមានកម្ពស់ចាប់ពី២ម៉ែត្រ ទៅ៣ម៉ែត្រ ដោយសារឥទ្ធិពលខ្យល់មូសុងឦសានបានបោកបក់លើឈូងសមុទ្រថៃ និងបណ្តាខេត្តភាគខាងត្បូង ។

ក្រៅពីនេះ នឹងមានអាកាសធាតុត្រជាក់នៅពេលព្រឹក និងភ្លៀងធ្លាក់ ផ្គររន្ទះក្នុងតំបន់មួយចំនួន ។ ដូច្នេះ សូមពលរដ្ឋខេត្តភាគខាងត្បូង ជាពិសេស ខេត្តសុងក្លា ប្រុងប្រយ័ត្នគ្រោះថ្នាក់ដោយសារខ្យល់កន្ត្រាក់ ដែលខ្យល់ពីល្បឿនពី២០គីឡូម៉ែត្រ ទៅ៣៥គីឡូម៉ែត្រក្នុង១ម៉ោង ។

គួរបញ្ជាក់ថា កាលពីថ្ងៃទី៣១ ខែធ្នូ ឆ្នាំ២០២២ កុមារម្នាក់អាយុ១០ឆ្នាំ បានមកលេងឆ្នេរសមុទ្រ Chalathat នៅខេត្តសុងក្លា ត្រូវបានរលកសមុទ្របោកបក់រហូតដល់ស្លាប់ ។ រីឯភ្នាក់ងារជួយសង្គ្រោះចំនួន២នាក់ក៏បានស្លាប់ដែរ ដោយសារខ្យល់បក់ខ្លាំង ៕

ពស់វែកត្រូវបានគេស្គាល់ថាជាសត្វដែលមានពិសខ្លាំងបំផុតក្នុងពិភពលោក។ វាអាចបញ្ចេញពិសក្នុងបរិមាណដ៏ច្រើនពី ២០០ ទៅ ៥០០ មីលីក្រាមក្នុងការចឹកម្តង។ ពិសប៉ះពាល់ដល់ប្រព័ន្ធប្រសាទកណ្តាល ធ្វើឱ្យភ្នែកស្រវាំងមើលមិនច្បាស់ វិលមុខ និងខ្វិន បន្ទាប់មកវាក៏រីករាលដាលដល់ប្រព័ន្ធសរសៃឈាមបេះដូង នៅទីបំផុតការបរាជ័យផ្លូវដង្ហើម អាចបណ្តាលឱ្យស្លា.ប់។ យោងតាមការសិក្សាមនុស្សដែលត្រូវបានពស់វៃកចឹក គឺមានភាគរយខ្ពស់បំផុតនៃការបាត់បង់.ជីវិត។

ជាការពិតណាស់ ពស់នៅលើភពផែនដីយើងនេះគឺមានច្រើនខ្លាំងណាស់ ទោះជាយ៉ាងណាក្នុងចំណោមពស់ទាំងអស់ ពស់វែក ៤ ប្រភេទនេះត្រូវបានអ្នកវិទ្យាសាស្ត្រដាក់ចូលក្នុងបញ្ជីក្រហមនៃសហភាពអន្តរជាតិសម្រាប់ការអភិរក្សធម្មជាតិ (IUCN) ថាជាពស់ដែលងាយរងគ្រោះជាងគេ មានន័យថា ពួកវាអាចប្រឈមហានិភ័យខ្ពស់បំផុតនៃការផុតពូជនៅក្នុងព្រៃនាពេលខាងមុខ។

១.ពស់វែកខាងជើង (Ophiophagus hannah) ដែលត្រូវបានរកឃើញនៅប្រទេសប៉ាគីស្ថាន ឥណ្ឌា និងប្រទេសថៃ។
២.ពស់វែក Sunda (Ophiophagus bungarus) រស់នៅក្នុងតំបន់ Sunda Shelf រួមទាំងឧបទ្វីបម៉ាឡេ កោះ Greater Sunda និងផ្នែកខ្លះនៃភាគខាងត្បូងហ្វីលីពីន។
៣.ពស់វែកខាងលិច Ghats (Ophiophagus kaalinga) គឺឆ្លងទៅជួរភ្នំ Ghats ខាងលិច ត្រូវបានគេស្គាល់ផងដែរថាជាភ្នំ Sahyadri នៅភាគនិរតីនៃប្រទេសឥណ្ឌា។
៤.ពស់វែក Luzon King (Ophiophagus salvatana) ត្រូវបានរកឃើញតែនៅលើកោះ Luzon ប្រទេសហ្វីលីពីនប៉ុណ្ណោះ។

ក្រុមអ្នកស្រាវជ្រាវសង្ឃឹមថាការរកឃើញរបស់ពួកគេនឹងរួមចំណែកដល់ការអភិរក្សក្រុមពស់វែកដែលត្រូវបានចុះបញ្ជីដោយសហភាពអន្តរជាតិសម្រាប់ការអភិរក្សធម្មជាតិ (IUCN) ថាងាយរងគ្រោះដោយសារតែជម្រករបស់ពួកវាត្រូវបានគំរាមកំហែងយ៉ាងទូលំទូលាយ។ ពស់វែកមានឈ្មោះវិទ្យាសាស្ត្រថា Ophiophagus ច្រើនរស់នៅដីគោក ក្នុងព្រៃខ្ពស់ក្រាស់ ព្រៃចំហរ និងវាលស្មៅក្បែរដងទឹក ដែលសត្វទាំង ៤ ប្រភេទនេះក៏ត្រូវបានគេចាត់ទុកថាជាពស់ពិសធំបំផុតក្នុងពិភពលោកផងដែរ ជាមួយប្រវែងជិត ៥ ម៉ែត្រ៕

តារាសម្តែង សាឡាត់ ស្រីឡាង បានចេញមុខទទួលស្គាល់ថាពិតជាមានបញ្ហាបំណុលមែននិងការរកស៊ីខាតដោយព្យាយាមដោះស្រាយបញ្ហាទាំងអស់មិនរត់គេចឡើយ។ តារាស្រីរូបនេះថាកុំឆាប់ទុកចិត្តលើមនុស្សខុសគឺពិបាកកែណាស់ខាតទាំងលុយបាត់ទាំងកិត្តិយសហើយបាក់ទាំងទឹកចិត្ត។

នៅយប់ថ្ងៃទី២០ ខែធ្នូ កញ្ញា សាឡាត់ ស្រីឡាង បានចេញមកបង្ហោះនៅលើបណ្តាញសង្គមរបស់ខ្លួនយ៉ាងដូច្នេះថា «ខ្ញុំសាឡាត់ ស្រីឡាង មួយរយ:នេះខ្ញុំពិតជាមានបញ្ហារឿងបំណុលមែន បញ្ហាខាតរឿងបើកហាងរកស៊ីហើយនឹងបញ្ហាផ្សេងច្រើនទៀត។ កន្លងមកនេះខ្ញុំពិតជាព្យាយាមក្នុងការរកដំណោះស្រាយក្នុងបញ្ហាទាំងអស់នឹង ខ្ញុំមិនគេចវេសទេតែខ្ញុំសូមពេលក្នុងការដោះស្រាយបញ្ហាទាំងអស់នឹងមែន(ម្ចាស់បំណុលខ្លះខ្ញុំបានដោះស្រាយជូនបានខ្លះនឹងខ្លះទៀតគឺនៅ)»។

តារាស្រីរូបនេះបានបន្តទៀតថា «ខ្ញុំពិតជាសូមទោសដែលយឺតយាវ ដោយសារបញ្ហាមកជាបន្តបន្ទាប់ ខ្ញុំពិតជាអរគុណដល់បងៗដែលគាត់យោគយល់និងទុកពេលឱ្យខ្ញុំដោះស្រាយអរគុណដល់បងៗដែលផ្តល់ការងារដល់ខ្ញុំ ដើម្បីឱ្យបានចំណូលយកមកដោះស្រាយ»។ ចុងក្រោយ សាឡាត់ ស្រីឡាង ថាសុំកុំឆាប់ទុកចិត្តលើមនុស្សខុសគឺពិបាកកែណាស់ ខាតទាំងលុយ បាត់ទាំងកិត្តិយសហើយបាក់ទាំងទឹកចិត្ត បំណុលគឺនាងទទួលហើយក៏មិនគេចវេសដែរ។

គួរបញ្ជាក់ផងដែរថា កាលពីខែកញ្ញា កន្លងមកនេះតារាសម្តែង សាឡាត់ ស្រីឡាង ត្រូវបានម្ចាស់បំណុលកញ្ញា Ly Chan Vatey ចេញមកបង្ហោពីរឿងខ្ចីលុយចំនួន២០០ដុល្លារសន្យាពីរថ្ងៃសង ប៉ុន្តែយកលេសគ្រប់សព្វឈានដល់ជិត២ខែដែលធ្វើឱ្យផ្ទុះកក្រើកយ៉ាងខ្លាំងពេញបណ្តាញសង្គម។ ជុំវិញការបង្ហោះនេះ សាឡាត់ ស្រីឡាង បានចេញមកទទួលស្គាល់កំហុសនិងសូមទោសទៅកាន់ម្ចាស់បំណុល ខណៈនាងបានបង្ហាញថារឿងអាស្រូវមួយនេះពិតជាប៉ះពាល់អារម្មណ៍នាងកម្រិតធ្ងន់៕

នៅឆ្នាំ ២០២៤ នេះ iPhone ឬ Samsung មិនមែនជាស្មាតហ្វូនល្អបំផុតប្រចាំឆ្នាំនោះទេ។ នេះបើយោងតាមការចុះផ្សាយរបស់ Techradar ដែលជាគេហទំព័របច្ចេកវិទ្យាល្បីល្បាញមួយបានឱ្យដឹងថា Google Pixel 9 Pro គឺជាស្មាតហ្វូនល្អបំផុតប្រចាំឆ្នាំ ២០២៤ ដោយបញ្ជាក់ពីជំហរឈានមុខគេដោយសារតុល្យភាពដ៏ល្អឥតខ្ចោះរវាងការរចនា ដំណើរការ និងបទពិសោធន៍អ្នកប្រើប្រាស់។ ចំនុចលេចធ្លោដំបូងនៃ Pixel 9 Pro គឺទំហំរបស់វា ជាមួយអេក្រង់ទំហំ ៦.៣ អ៊ីងតូចខ្លឹម ងាយស្រួលក្នុងការកាន់ដោយប្រើប្រាស់តែដៃម្ខាង។

លើសពីនេះឧបករណ៍ត្រូវបានបំពាក់ដោយបន្ទះឈីប Tensor G4 ចុងក្រោយបំផុត, RAM 16GB និងអង្គចងចាំខាងក្នុង 128GB ។ ដំណើរការជាក់ស្តែងនៃឧបករណ៍គឺរលូនខ្លាំងណាស់ ដោយដោះស្រាយរាល់កិច្ចការទាំងអស់ពីមូលដ្ឋានរហូតដល់កម្រិតខ្ពស់ អាចផ្តល់នូវបទពិសោធន៍ប្រើប្រាស់ដ៏អស្ចារ្យបំផុត។ បើនិយាយពីកាមេរ៉ាវិញ Pixel 9 Pro បំពាក់ដោយប្រព័ន្ធកាមេរ៉ាឈានមុខគេរបស់ Google រួមទាំងកាមេរ៉ា ultra-wide-angle 48MP, កាមេរ៉ាមេ 50MP និងកាមេរ៉ា telephoto 48MP ជាមួយនឹង 5x optical zoom ។

សមត្ថភាពពង្រីក 5x នេះគឺអស្ចារ្យជាងគូប្រជែងដែលមានទំហំដូចគ្នា ដែលជាធម្មតាឈប់ត្រឹម 3x ប៉ុណ្ណោះ។ គុណភាពនៃរូបថតដែលថតចេញពី Pixel 9 Pro គឺគួរឱ្យចាប់អារម្មណ៍ខ្លាំង ជាមួយនឹងព័ត៌មានលម្អិតច្បាស់គ្រប់ស្ថានភាព រួមទាំងពន្លឺតិច និងចលនាលឿនផងដែរ។ ចំណុចលេចធ្លោមួយទៀតរបស់ឧបករណ៍គឺមុខងារ AI កម្រិតខ្ពស់ ជាពិសេសជំនួយការនិម្មិត Gemini ។ Gemini Live ផ្តល់នូវបទពិសោធន៍សន្ទនាថ្មីទាំងស្រុង ដែលអនុញ្ញាតឱ្យអ្នកជជែកជាមួយជំនួយការ Gemini កម្រិតខ្ពស់បំផុតរបស់ Google ដោយសំឡេង និងទទួលបានមតិកែលម្អដូចគ្នា។

Gemini Live គឺឆ្លាតវៃគ្រប់គ្រាន់ក្នុងការចងចាំប្រធានបទ និងលំហូរនៃការសន្ទនា ផ្តល់ព័ត៌មានមានប្រយោជន៍ និងសួរសំណួរដើម្បីណែនាំការសន្ទនា។ គួរបញ្ជាក់ដែរថា ស្មាតហ្វូន Google Pixel 9 Pro មានតម្លៃ ៩៩៩ ដុល្លារអាមេរិក មានលក់តែក្នុងទ្វីបអឺរ៉ុប និងបណ្តាប្រទេសអាស៊ីមួយចំនួនប៉ុណ្ណោះ ដោយផ្តល់នូវការរួមបញ្ចូលគ្នាដ៏ល្អឥតខ្ចោះនៃទំហំ ដំណើរការដ៏មានឥទ្ធិពល កាមេរ៉ាកំពូល និងបទពិសោធន៍ AI កម្រិតខ្ពស់។ ដូច្នេះដោយសារលក្ខណៈពិសេសទាំងនេះហើយ ទើប Google Pixel 9 Pro ត្រូវបានគេចាត់ទុកថាជាស្មាតហ្វូនល្អបំផុតប្រចាំឆ្នាំ ២០២៤៕

ឆ្នាំ២០២៤ ករណីឆបោ.កក្នុងរូបភាពផ្សេងៗបាននឹងកំពុងរីករាលដាលជុំវិញពិភពលោក។ យ៉ាងណា បើក្រឡេកទៅកាន់ប្រទេសវៀតណាមវិញក៏ដូចគ្នាដែរ ដែលបានធ្វើឲ្យពលរដ្ឋខ្លួនទូទាំងប្រទេស ចា.ញ់បោ.កអស់ប្រាក់ចំនួន ៧៤៤ លានដុល្លារអាមេរិក។ នេះបើយោងតាមប្រភពសារព័ត៌មាន VN Express កាលពីថ្ងៃទី ១៨ ខែធ្នូ ឆ្នាំ ២០២៤។

យោងតាមសមាគមសន្តិសុខអ៊ីនធើណែតវៀតណាម NCN បានធ្វើស្ទង់មតិកាលពីពេលថ្មីៗនេះ និងបានរកឃើញថា ពលរដ្ឋវៀតណាម ៥៩,០០០នាក់ បានចាញ់បោកជនខិលខូច តាមទម្រង់ឆបោក ៣ សំខាន់ៗគឺរួមមាន៖

១. ការវិនិយោគបង្កើនប្រាក់ចំណេញ៖ ប្រជាជនវៀតណាម ៧១% បានអះអាងថា ពួកគេបានលង់ខ្លួន ជឿតាមក្រុមហ៊ុនវិនិយោគមួយចំនួន ឲ្យធ្វើការបណ្តាក់ទុនទៅលើអចលនទ្រព្យឬផលិតផល ដោយសន្យាថានឹងទទួលបានប្រាក់លាភមកវិញជាប្រចាំខែ។ ប៉ុន្តែនេះគ្រាន់តែជាសន្យាខ្យល់ ប្រាក់លាភបានតែរយៈពេលប៉ុន្មានខែដំបូងប៉ុណ្ណោះ ចុងក្រោយគឺត្រូវទឹកភ្នែកគ្រប់ៗគ្នា។

២. ឆបោកតាមប្រព័ន្ធអនឡាញ បន្លំជាបុគ្គលិកធនាគារឬមន្ត្រីរាជការ៖ ប្រជាជនវៀតណាម ៦២% បានរាយការណ៍ថា ជនឆបោកទាំងនោះបានក្លែងបន្លំជាមន្ត្រីមកពីនាយកដ្ឋានប៉ូលីស តុលាការ ភ្នាក់ងារពន្ធដារឬក៏បុគ្គលិកធនាគារជាដើម បោកបញ្ឆោតជនរងគ្រោះឲ្យផ្ទេរប្រាក់ទៅកាន់ពួកគេ។ ជនឆបោកបានធ្វើការហៅទូរស័ព្ទ ផ្ញើសារ និងឲ្យភ្ជាប់តំណរលីងផ្សេងៗ ហើយក៏ធ្វើការបញ្ចុះបញ្ចូលនិងបង្ខិតបង្ខំជនរងគ្រោះ ធ្វើទៅតាមពាក្យណែនាំរហូតផ្ទេរប្រាក់បានសម្រេច។

៣. ឆបោកថាបានឈ្នះរង្វាន់៖ ពលរដ្ឋវៀតណាម ៦០% បានអះអាងថា ពួកគេទទួលបានសារពីជនខិលខូចថា «បានឈ្នះរង្វាន់ពីក្រុមហ៊ុននិងស្ថាប័នធំៗ» តែក៏តម្រូវឲ្យបង់ថ្លៃសេវាមួយចំនួនជាមុនសិន មិននឹងទទួលបានរង្វាន់។

ជាមួយគ្នានោះ អ្នកជំនាញផ្នែកបច្ចេកវិទ្យាបានគូសបញ្ជាក់ថា ជនឆបោកគឺបានប្រើប្រាស់បច្ចេកវិជ្ជាទំនើបៗដូចជា AI ដើម្បីបង្កើតវីដេអូក្លែងក្លាយ ការផ្ញើសារជាសំឡេង ឬ Chatbots ដើម្បីធ្វើការសន្ទនាជាមួយជនរងគ្រោះ។ ប្រព័ន្ធកុំព្យូទ័រសម័យទំនើប ភ្ជាប់បណ្តាញទូរស័ព្ទដៃស្វ័យប្រវត្តិ ខលចេញទៅកាន់មនុស្សច្រើននាក់ក្នុងពេលដំណាលគ្នាបានផងដែរ ដែលកាន់តែបង្កើនភាពងាយស្រួលដល់ជនឆបោក។

ជុំវិញករណីឆបោកទាំងអស់នេះ គឺមិនមែនតែនៅក្នុងប្រទេសវៀតណាមមួយទេ នៅតាមបណ្តាប្រទេសផ្សេងៗ ជាពិសេសគឺនៅកម្ពុជាយើងក៏សម្បូរផងដែរ។ អ្នកជំនាញនៅតែមិនទាន់ដំណោះស្រាយចំពោះករណីនេះនៅឡើយទេ ហើយវានៅតែបន្តកើតមានរហូតដល់ឆ្នាំ២០២៥ ទៀត។ ដូច្នេះហើយសូមបងប្អូនប្រជាពលរដ្ឋ មានការប្រុងប្រយ័ត្នឲ្យបានខ្ពស់បំផុត កុំជឿតាមពាក្យបំផុសបំផុល និងការបំភ័យរបស់ជនមិនស្គាល់មុខឲ្យសោះ ជាពិសេសក្នុងពិភពអ៊ីនធើណែត៕