សហរដ្ឋអាមេរិក ៖ ប្រធានាធិបតីអាមេរិក លោក Donald Trump គ្រោងចេញបទបញ្ជាឱ្យលុបចោលវិធានការគាំទ្រការប្រើប្រាស់បំពង់បឺតភេសជ្ជៈផលិតពីក្រដាសរបស់លោក Joe Biden អតីតប្រធានាធិបតីអាមេរិក ដើម្បីឱ្យពលរដ្ឋប្រើប្រាស់បំពង់បឺតផ្លាស្ទិកឡើងវិញ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៨ ខែកុម្ភៈ ឆ្នាំ២០២៥ ។

លោក Trump បានសរសេរក្នុងបណ្តាញសង្គមថា នៅសប្តាហ៍ទី២ ខែកុម្ភៈ ឆ្នាំ២០២៥ លោកនឹងចុះហត្ថលេខាលើបទបញ្ជាប្រតិបត្តិបញ្ឈប់ការជំរុញពលរដ្ឋប្រើប្រាស់បំពង់បឺតក្រដាសឥតប្រយោជន៍របស់លោក Biden ពីព្រោះវាពុំទទួលបានលទ្ធផលទេ ហើយគ្រប់គ្នានឹងអាចប្រើប្រាស់បំពង់ផ្លាស្ទិកដូចមុន ។

រដ្ឋាភិបាលអាមេរិកស្ថិតក្រោមការដឹកនាំរបស់អតីតប្រធានាធិបតី លោក Biden ប្រកាសនាពេលកន្លងមកថា អាមេរិកដែលទិញទំនិញច្រើនបំផុតលើពិភពលោក នឹងឈប់ប្រើប្រាស់ផ្លាស្ទិកក្នុងអគារ និងស្ថាប័នផ្សេងៗដើម្បីកាត់បន្ថយឧស្ម័នផ្ទះកញ្ចក់ ហើយសង្ឃឹមថា រដ្ឋទាំងអស់ និងផ្នែកឯកជនឈប់ប្រើប្រាស់ផ្លាស្ទិក ។ អាមេរិកចាប់ផ្តើមអនុវត្តវិធានការនានាសម្រាប់ជួយការពារបរិស្ថាន ដូចជា ៖ ការប្រើបំពង់ក្រដាសក្នុងភោជនីយដ្ឋាន ។

ប៉ុន្តែគណបក្សសាធារណរដ្ឋបានជំទាស់នឹងវិធានការរបស់លោក Biden ដោយពួកគេអះអាងថា ការប្រើបំពង់ក្រដាសឆាប់រលាយពេក ហើយអ្នកផឹកភេសជ្ជៈពុំចូលចិត្តបំពង់ក្រដាសទេ ជាពិសេស លោក Trump ។ លោកប្រាប់ថា វាជាបំពង់ក្រដាសបែបសេរីនិយម ដែលប្រើប្រាស់ពុំកើត ។

ពេលលោក Trump ចុះហត្ថលេខាលើបទបញ្ជាប្រតិបត្តិបញ្ឈប់ការប្រើប្រាស់បំពង់ក្រដាស វានឹងប៉ះពាល់ដល់រដ្ឋជាច្រើនរបស់អាមេរិក ខណៈបច្ចុប្បន្ន រដ្ឋទាំងនេះបានហាម និងរឹតបន្តឹងការប្រើប្រាស់បំពង់ផ្លាស្ទិក ដូចជា ៖ រដ្ឋកាលីហ្វ័រញ៉ា, ខូឡូរ៉ាដូ, ញូវយ៉ក, ម៉េន, អូរីហ្គិន, វឺម៉ន, រ៉ូដអ៊ីសឡែន និងក្រុងវ៉ាស៊ីនតោន ជាពិសេស រដ្ឋដែលគណបក្សប្រជាធិបតេយ្យនាំមុខ គឺកាលីហ្វ័រញ៉ា និងញូវយ៉ក ។ រដ្ឋទាំងពីរអនុវត្តច្បាប់ហាមប្រើប្រាស់បំពង់ផ្លាស្ទិកនៅភោជនីយដ្ឋាន លើកលែងតែអតិថិជនស្នើសុំ ។

ការលុបចោលវិធានការប្រើប្រាស់បំពង់ក្រដាសទំនងជាផ្តល់អត្ថប្រយោជន៍ដល់ឧស្សាហកម្មប្រេង ដោយសារផលិតផលផ្លាស្ទិកស្ទើរទាំងអស់ផលិតពី Petroleum ហើយលោក Trump ផ្តោតគោលដៅលើឧស្សាហកម្មនេះសម្រាប់ផ្តល់ថវិកាក្នុងការបោះឆ្នោតថ្មី ។ លោកសន្យាថា នឹងលុបចោលបទប្បញ្ញត្តិបរិស្ថាន ដោយលោកស្នើឱ្យឧស្សាហកម្មប្រេងផ្តល់ប្រាក់ចំនួន១ពាន់លានដុល្លារអាមេរិក សម្រាប់ការឃោសនារកសំឡេងឆ្នោត ៕

សហរដ្ឋអាមេរិក ៖ លោក Elon Musk មហាសេដ្ឋីលំដាប់ពិភពលោក បញ្ជាក់ថា ពុំចាប់អារម្មណ៍ទិញកម្មវិធី TikTok ដ៏ពេញនិយមទេ ខណៈបណ្តាញសង្គមនេះរងនូវការដាក់សម្ពាធហាមឃាត់ការប្រើប្រាស់ពីរដ្ឋាភិបាលអាមេរិក ដោយសារបារម្ភពីអសន្តិសុខ និងការបញ្ជូនទិន្នន័យអ្នកប្រើប្រាស់ទៅឱ្យរដ្ឋាភិបាលចិន ពីព្រោះ TikTok មានក្រុមហ៊ុនមេ ByteDance នៅចិន ។

បទសម្ភាសន៍របស់លោក Elon Musk កាលពីចុងខែមករា ឆ្នាំ២០២៥ និងផ្សព្វផ្សាយតាមអនឡាញនៅថ្ងៃទី៨ ខែកុម្ភៈ ដោយ The WELT Group ជាផ្នែកមួយរបស់ក្រុមហ៊ុន Axel Springer SE នៅប្រទេសអាល្លឺម៉ង់ បានរៀបចំកិច្ចប្រជុំកំពូល ហើយអញ្ជើញលោក Elon Musk ចូលរួមប្រជុំតាមវីដេអូខល ។ លោកថា ៖ «ខ្ញុំពុំទិញ TikTok ទេ និងពុំទាន់មានផែនការថា គួរធ្វើដូចម្តេច បើក្លាយជាម្ចាស់ TikTok ។ ខ្ញុំពុំប្រើប្រាស់កម្មវិធីនេះ ខ្ញុំពុំដឹងថា App មានរូបរាងបែបណា ។ គ្មានអ្វីរំភើបនឹងការទិញ TikTok ពីព្រោះខ្ញុំពុំធ្លាប់ទិញកម្មវិធីក្រុមហ៊ុនផ្សេង» ។

រីឯការចំណាយប្រាក់រាប់លានដុល្លារអាមេរិកទិញកម្មវិធី Twitter ដែលបច្ចុប្បន្ន ប្តូរឈ្មោះជាកម្មវិធី X គឺពុំកើតឡើងញឹកញាប់ទេ ហើយលោក Elon Musk តែងបង្កើតក្រុមហ៊ុនដោយខ្លួនឯងតាំងពីដំបូង ។ កន្លងមក ប្រធានាធិបតីអាមេរិក លោក Donald Trump និយាយថា នឹងបើកផ្លូវឱ្យលោក Elon Musk ទិញ App របស់ក្រុមហ៊ុន ByteDance បើត្រូវការ ។ ប៉ុន្តែ ByteDance បដិសេធពុំលក់កម្មវិធីនេះ ។

លោក Trump បានចុះហត្ថលេខាលើបទបញ្ជាប្រតិបត្តិពន្យារពេលការបិទ TikTok ខណៈអាមេរិកកំណត់ពេលបិទ TikTok នៅថ្ងៃទី១៩ ខែមករា ឆ្នាំ២០២៥ ។ អាមេរិកកំណត់ឱ្យ ByteDance លក់ TikTok នៅខែមករា បើពុំដូច្នោះទេ នឹងបិទកម្មវិធីនេះ ដោយសារសមាជិកសភាបារម្ភថា វានឹងប៉ះពាល់សន្តិសុខជាតិ ព្រោះរដ្ឋាភិបាលចិនអាចបង្ខំឱ្យក្រុមហ៊ុនបង្ហាញទិន្នន័យអ្នកប្រើប្រាស់នៅអាមេរិក ។ ប៉ុន្តែ TikTok ថា គ្មានករណីនេះកើតឡើង ហើយគ្មានថ្ងៃបង្ហាញទិន្នន័យអ្នកប្រើប្រាស់ ។

Apple និង Google ពុំទាន់ដាក់កម្មវិធី TikTok លើ App Store ទេ តាំងពីការអនុវត្តច្បាប់អាមេរិក ។ កាលពីថ្ងៃទី៧ ខែកុម្ភៈ អ្នកគ្រប់គ្រង TikTok ថា ក្រុមហ៊ុនអនុញ្ញាតឱ្យអ្នកប្រើប្រាស់ដោនឡូតវាលើឧបករណ៍ Android នៅអាមេរិក ដោយតភ្ជាប់ជាមួយឧបករណ៍ដំឡើងលើគេហទំព័រក្រុមហ៊ុន ដើម្បីចៀសវាងដែនកំណត់អាចកើតឡើងលើ TikTok នៅអាមេរិក ។

លោក Trump បានចរចាជាមួយភាគីជាច្រើនរឿងការទិញ TikTok ហើយលោកនឹងសម្រេចចិត្តពីអនាគតកម្មវិធីនេះនៅខែកុម្ភៈ ។ បច្ចុប្បន្ន ពលរដ្ឋអាមេរិកបានប្រើប្រាស់ TikTok ប្រមាណ ១៧០លាននាក់ ហើយការជួយ TikTok គឺជាការផ្លាស់ប្តូរគោលជំហររបស់លោក ខុសពីពេលលោកកាន់តំណែងប្រធានាធិបតីអាណត្តិទី១ ។ ពេលនោះ លោកព្យាយាមហាមឃាត់កម្មវិធីនេះ ប៉ុន្តែនាពេលថ្មីៗ លោកថាចូលចិត្ត TikTok ព្រោះវាជួយឱ្យលោកទទួលបានសំឡេងគាំទ្រពីអ្នកមានសិទ្ធិបោះឆ្នោត នៅឆ្នាំ២០២៤ ៕

សហរដ្ឋអាមេរិក ៖ ការស្វែងរកគូស្នេហ៍តាមគេហទំព័រនានាលែងទទួលបានការចាប់អារម្មណ៍ហើយសម្រាប់ក្រុមយុវវ័យ ឬអ្នកនៅលីវនៅអាមេរិក ប៉ុន្តែពួកគេកំពុងពេញនិយមស្វែងរកគូស្នេហ៍តាមរយៈការចូលរួមក្នុងក្លិបអ្នករត់ប្រណាំង ។ អ្នករត់ហាត់ប្រាណជាច្រើនបានបង្ហោះរឿងរ៉ាវរបស់ខ្លួនក្នុងបណ្តាញសង្គមថា សុខភាពពួកគេល្អប្រសើរច្រើនក្រោយពីចូលរួមក្លិបអ្នករត់ប្រណាំង ហើយពួកគេក៏បានជួបមនុស្សក្នុងក្តីសុបិនផងដែរ ។

ក្លិបអ្នករត់ប្រណាំង Chicago Run Collective នៅទីក្រុងទីក្រុងស៊ីកាហ្គោ រដ្ឋអ៊ីលីណយ សហរដ្ឋអាមេរិក មានអ្នករត់ហាត់ប្រាណជាច្រើននាក់បានមកប្រមូលផ្តុំគ្នាតាំងពីម៉ោង៨ព្រឹក ហើយពួកគេបានចំណាយពេលជជែក ធ្វើការស្គាល់គ្នា និងភ្ជាប់ទំនាក់ទំនងជិតស្និទ្ធ ។

នាយកក្លិបអ្នករត់ប្រណាំង Chicago Run Collective និយាយថា ក្លិបអ្នករត់ប្រណាំងភាគច្រើនផ្តោតលើការរត់ប្រណាំងម៉ារ៉ាតុងតែម្យ៉ាង ហើយវាពុំមែនជាតម្រូវការ ទើបសម្រេចចិត្តបង្កើតក្លិបនេះ នៅខែឧសភា ឆ្នាំ២០២៤ សម្រាប់ឱ្យមនុស្សគ្រប់រូបជួបជុំហាត់ប្រាណ និងរាប់អានគ្នាក្នុងសង្គម ។ ក្រោយពីបង្កើតក្លិបរួចឃើញថា ទទួលបានការគាំទ្រយ៉ាងខ្លាំងពីក្រុមអ្នករត់ហាត់ប្រាណដែលចង់ស្គាល់មិត្តភក្តិថ្មី ។

លើសពីនេះ ពេលក្រុមអ្នករត់ហាត់ប្រាណជួបជុំគ្នាហើយ ក្លិប Chicago Run Collective បានសរសេរស្លាកសញ្ញាផ្សេងៗឱ្យពួកគេ ដើម្បីឱ្យការរត់ប្រកបដោយបរិយាកាសរីករាយ ដូចជា ៖ «ខ្ញុំនៅលីវ មករត់ជាមួយខ្ញុំ» ។ វាជាការស្វែងរកគូស្នេហ៍តាមវិធីថ្មី ដែលយុវវ័យ និងអ្នកនៅលីវសរសើរមិនដាច់ពីមាត់ ។

ដូចគ្នានេះ ក្លិបអ្នករត់ប្រណាំង Lunge Run Club នៅទីក្រុងញូវយ៉ក ត្រូវបានបង្កើតឡើងដើម្បីឱ្យអ្នកនៅលីវទាំងឡាយបានជួបគ្នា ។ កាលពីមុន ក្លិបនេះមានសមាជិកចាប់ពី២០នាក់ ទៅ៣០នាក់ប៉ុណ្ណោះ ប៉ុន្តែបច្ចុប្បន្ន ក្លិបមានសមាជិក ចាប់ពី៤០០នាក់ ទៅ៥០០នាក់ ។ នាយកក្លិបប្រាប់ថា ៖ «ពេលខ្លះ យើងទៅរត់នៅតាមផ្លូវ ព្រោះចង់ជួបមនុស្សពេញចិត្តណាម្នាក់ ហើយរត់ឡើងហត់ ទម្រាំបានជួប ។ ហេតុនេះ ក្លិប Lunge Run Club ត្រូវបានបង្កើតឡើងសម្រាប់ជាកន្លែងប្រមូលផ្តុំអ្នកស្រឡាញ់សុខភាព និងស្វែងរកគូអនាគត» ។

គួរបញ្ជាក់ថា ការដោនឡូត App ស្វែងរកគូស្នេហ៍របស់ពលរដ្ឋអាមេរិកបានធ្លាក់ចុះរហូតដល់១៦% កាលពីឆ្នាំ២០២៣ ។ អ្នកជំនាញផ្នែកណាត់ជួប បញ្ជាក់ថា ការជជែកគ្នាតាមអនឡាញពុំបានបង្កើតទំនាក់ទំនងទេ ហើយវាធ្វើឱ្យអស់សង្ឃឹមក្នុងការណាត់ជួប ពីព្រោះមនុស្សស្គាល់គ្នាតាមអនឡាញ ពុំដូចនឹងការចង់បានរបស់យើង ៕

កាលពីថ្ងៃទី៦ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ប្រទេស៣ រួមមាន ៖ កូរ៉េខាងត្បូង អូស្ត្រាលី និងអ៊ីតាលី បានបិទកម្មវិធី AI របស់ចិន DeepSeek នៅលើឧបករណ៍អេឡិចត្រូនិក និងប្រព័ន្ធកុំព្យូទ័រ ដោយសារបារម្ភពីការបែកធ្លាយទិន្នន័យអ្នកប្រើប្រាស់ ខណៈអ្នកគ្រប់គ្រងកម្មវិធីនេះពុំអាចបកស្រាយឱ្យច្បាស់លាស់ពាក់ព័ន្ធនឹងការគ្រប់គ្រងកម្មវិធី និងសុវត្ថិភាពទិន្នន័យផ្ទាល់ខ្លួន ។

ក្រសួងការពារជាតិកូរ៉េខាងត្បូងបានកំណត់ឱ្យបិទការប្រើប្រាស់កម្មវិធី AI ចិន DeepSeek នៅលើឧបករណ៍អេឡិចត្រូនិក និងប្រព័ន្ធកុំព្យូទ័រទាំងអស់ ដែលតភ្ជាប់ជាមួយអ៊ីនធើរណេត ។ រីឯក្រសួងពាណិជ្ជកម្មកូរ៉េខាងត្បូងបានប្រកាសនាពេលដំណាលគ្នាថា បានបិទការប្រើប្រាស់កម្មវិធី DeepSeek របស់ចិននៅលើកុំព្យូទ័រទាំងអស់របស់មន្ត្រីក្រសួងពាណិជ្ជកម្មដោយគ្មានការកំណត់ ដោយសារកម្មវិធីនេះពុំអាចការពារទិន្នន័យផ្ទាល់ខ្លួនអ្នកប្រើប្រាស់ ។

ដោយឡែក នាពេលថ្មីៗនេះ ក្រសួងមហាផ្ទៃអូស្ត្រាលីបានប្រកាសហាមដោនឡូតកម្មវិធី DeepSeek នៅលើឧបករណ៍អេឡិចត្រូនិក និងឧបករណ៍ទំនាក់ទំនងគ្រប់ប្រភេទរបស់រដ្ឋាភិបាល ។ បើបានដោនឡូតរួចហើយនៅលើឧបករណ៍ណាមួយ ក្រសួងសូមឱ្យលុបចោលជាបន្ទាន់ ដោយសារការវាយតម្លៃរបស់ភ្នាក់ងារជំនាញបង្ហាញថា DeepSeek មានផលប៉ះពាល់ខ្លាំងដល់អ្នកប្រើប្រាស់ និងពុំអាចទទួលយកបាន ។

ចំណែករដ្ឋាភិបាលអ៊ីតាលី ក៏បានបិទការប្រើប្រាស់កម្មវិធី DeepSeek ដូចគ្នាដែរ កាលពីខែមករា ឆ្នាំ២០២៥ ដោយលើកហេតុផលថា អ្នកគ្រប់គ្រងកម្មវិធីនេះពុំអាចបកស្រាយឱ្យច្បាស់លាស់ពាក់ព័ន្ធនឹងការគ្រប់គ្រងកម្មវិធី និងពុំអាចលាក់បាំងទិន្នន័យផ្ទាល់ខ្លួន ។

DeepSeek បានក្លាយជាកម្មវិធីដ៏ពេញនិយមយ៉ាងឆាប់រហ័សនៅបណ្តាប្រទេសរីកចម្រើន ប៉ុន្តែអ្នកជំនាញសន្តិសុខអ៊ីនធើរណេតអះអាងថា កម្មវិធីនេះលាក់លេខកូដដើម្បីបញ្ជូនទិន្នន័យអ្នកប្រើប្រាស់ទៅឱ្យ China Mobile ជាក្រុមហ៊ុនទូរគមនាគមន៍របស់រដ្ឋាភិបាលចិន ។ ហេតុនេះ ចិនអាចចូលមើលទិន្នន័យលម្អិតតាម App ផ្សេងៗរបស់ក្រុមហ៊ុនចិន ។

ប្រទេសនានាបានបិទ DeepSeek ដោយសារបារម្ភពីការបែកធ្លាយទិន្នន័យអ្នកប្រើប្រាស់ ដូចគ្នានឹងការបិទ TikTok ព្រោះមូលហេតុដូចគ្នា ។ ប៉ុន្តែក្រសួងការបរទេសចិនបានបដិសេធនឹងការលើកឡើងនេះ និងបញ្ជាក់ថា រដ្ឋាភិបាលចិនពុំបានបង្ខំឱ្យក្រុមហ៊ុន ឬបុគ្គលណាម្នាក់ប្រមូលទិន្នន័យអ្នកប្រើប្រាស់ដោយខុសច្បាប់ទេ ៕