ប្រទេសម៉ាឡេស៊ី ៖ មនុស្សភាគច្រើនប្រហែលជាភ្ញាក់ផ្អើល ដែលពលរដ្ឋជប៉ុនចូលនិវត្តន៍ពីការងារចាប់អារម្មណ៍ទៅរស់នៅម៉ាឡេស៊ីជាងប្រទេសផ្សេងក្នុងតំបន់អាស៊ីអាគ្នេយ៍ ខណៈម៉ាឡេស៊ីមានអាកាសធាតុល្អ មិនខុសគ្នាពីប្រទេសផ្សេង ។ ប៉ុន្តែក្រៅពីកត្តាអាកាសធាតុ គឺការចំណាយលើការទិញទំនិញនៅម៉ាឡេស៊ីមានតម្លៃសមរម្យសម្រាប់ជនបរទេស ។

អង្គការ Long Stay Foundation ដែលធ្វើឯកសាររស់នៅបរទេសសម្រាប់អ្នកចូលនិវត្តន៍ បញ្ជាក់ថា កាលពីឆ្នាំ២០១៩ ពលរដ្ឋជប៉ុនចូលនិវត្តន៍ពីការងារបានទៅរស់ម៉ាឡេស៊ីច្រើនបំផុត បន្ទាប់មក ថៃ ។ ប្រទេសថៃមានប្រៀបជាងម៉ាឡេស៊ី ផ្នែកទេសចរណ៍ផ្លូវភេទ និងសេវាកម្មពេលរាត្រីលំដាប់ពិភពលោក ប៉ុន្តែជនបរទេសអាយុច្រើនចង់រស់នៅកន្លែងស្ងប់ស្ងាត់ ពួកគេពុំត្រូវការសេវាកម្មទាំងនេះទេ ។ រីឯពលរដ្ឋជប៉ុនមករស់នៅថៃក្រោយចូលនិវត្តន៍ គឺខេត្តឈៀងម៉ៃ ។

ក្រៅពីម៉ាឡេស៊ីមានអាកាសធាតុល្អ និងការចំណាយផ្សេងៗសមរម្យ នៅមានកត្តាមួយទៀតធ្វើឱ្យពលរដ្ឋជប៉ុនចាស់ៗសម្រេចចិត្តមករស់នៅ គឺរដ្ឋាភិបាលម៉ាឡេស៊ីជួយសម្រួលដល់ការធ្វើទិដ្ឋាការរស់នៅរយៈពេលយូរ «Malaysia My Second Home (MM2H)» សម្រាប់ជនបរទេស ។ ទិដ្ឋាការនេះអនុញ្ញាតឱ្យជនបរទេសរស់នៅម៉ាឡេស៊ី ចាប់ពី៥ឆ្នាំ ទៅ១០ឆ្នាំ ហើយពលរដ្ឋជប៉ុនជាច្រើនបានធ្វើទិដ្ឋាការរស់នៅរយៈពេលយូរ ។

ម្យ៉ាងទៀត ពលរដ្ឋជប៉ុនយ៉ាងច្រើនបានមករស់នៅម៉ាឡេស៊ី តាំងពីជប៉ុនគ្រប់គ្រងម៉ាឡេស៊ីក្នុងសង្គ្រាមលោកលើកទី២ ហើយពេលជប៉ុនចាញ់សង្គ្រាម ពលរដ្ឋជប៉ុនជាច្រើនពុំត្រឡប់ទៅប្រទេសវិញទេ ពួកគេតាំងទីលំនៅអចិន្ត្រៃយ៍នៅទីនេះ ។ បច្ចុប្បន្ន មានសាលារៀនជប៉ុនជាច្រើននៅម៉ាឡេស៊ី ទើបពលរដ្ឋជប៉ុនអាយុច្រើនសម្រេចចិត្តមករស់នៅទីនេះ ។

ប្រាក់សន្សំរបស់ពលរដ្ឋជប៉ុនចូលនិវត្តន៍ គឺពុំគ្រប់គ្រាន់សម្រាប់ទិញខុនដូក្នុងតំបន់ទេសចរណ៍នៅប្រទេសថៃទេ ប៉ុន្តែប្រាក់របស់ពួកគេអាចទិញខុនដូនៅទីក្រុងឆ្នេរសមុទ្ររបស់ម៉ាឡេស៊ី ។ រីឯតម្លៃអាហារ និងកន្លែងស្នាក់នៅវិញ គឺសមរម្យសម្រាប់ជនបរទេសដែលមានប្រាក់មិនច្រើនអាចរស់នៅទីក្រុងកូឡាឡាំពួរ ដោយពុំចាំបាច់សន្សំសំចៃប្រាក់ ៕

ប្រទេសថៃ ៖ សារព័ត៌មានថៃបានរាយការណ៍កាលពីថ្ងៃទី១៦ ខែមករា ឆ្នាំ២០២៥ ថា ប៉ូលិសអន្តោប្រវេសន៍ខេត្តស្រះកែវ ចាប់ផ្តើមរឹតបន្តឹង និងត្រួតពិនិត្យអត្តសញ្ញាណពលរដ្ឋគ្រប់រូប ដែលធ្វើដំណើរចេញ-ចូលក្រុងប៉ោយប៉ែត ប្រទេសកម្ពុជាញឹកញាប់ ហើយស្នើឱ្យកម្ពុជាជួយត្រួតពិនិត្យការចេញ-ចូលរបស់ពលរដ្ឋថៃផងដែរ ។

ការត្រួតពិនិត្យយ៉ាងតឹងរ៉ឹង និងកំណត់អត្តសញ្ញាណពលរដ្ឋថៃគ្រប់រូប ដែលធ្វើដំណើរចេញ-ចូលក្រុងប៉ោយប៉ែតញឹកញាប់របស់ប៉ូលិសអន្តោប្រវេសន៍ខេត្តស្រះកែវ គឺក្នុងគោលបំណងទប់ស្កាត់ជនខិលខូលដែលតែងតែបោកប្រាស់ពលរដ្ឋ ព្រមទាំងលុបបំបាត់គណនីធនាគារក្លែងក្លាយ ស្របតាមគោលនយោបាយរបស់មជ្ឈមណ្ឌលបង្ក្រាបបទល្មើសបច្ចេកវិទ្យា ។

សារព័ត៌មានថៃរាយការណ៍ថា ពលរដ្ឋថៃដែលត្រូវអាជ្ញាធរសង្ស័យថា បានរួមគំនិតជាមួយក្រុមបោកប្រាស់នៅក្រុងប៉ោយប៉ែត គឺប៉ូលិសអន្តោប្រវេសន៍ខេត្តស្រះកែវ នឹងត្រួតពិនិត្យប្រវត្តិរូបយ៉ាងលម្អិត ព្រមទាំងសាកសួរពួកគេពេលធ្វើដំណើរឆ្លងដែន ។ ជាមួយគ្នានេះ ប៉ូលិសអន្តោប្រវេសន៍ក៏ឱ្យបានស្នើឱ្យកម្ពុជាជួយតាមដានសកម្មភាពពលរដ្ឋថៃនៅក្រុងប៉ោយប៉ែត ។

ក្រៅពីការត្រួតពិនិត្យនៅច្រកព្រំដែនអន្តរជាតិ ក៏មានការត្រួតពិនិត្យយ៉ាងតឹងរ៉ឹងនៅតាមច្រកឆ្លងដែនធម្មជាតិផងដែរ ដោយសារនៅពាក់កណ្តាលខែមករា ឆ្នាំ២០២៥ ទឹកក្នុងប្រឡាយរីងស្ងួតធ្វើឱ្យពលរដ្ឋថៃងាយស្រួលឆ្លងទៅក្រុងប៉ោយប៉ែត ដែលនៅឆ្ងាយពីគ្នាមិនដល់៥ម៉ែត្រ ។

កន្លងមក ប៉ូលិសអន្តោប្រវេសន៍ខេត្តស្រះកែវ បានប្រជុំជាមួយមន្ត្រីមកពីស្ថាប័នពាក់ព័ន្ធ ដើម្បីទប់ស្កាត់ពលរដ្ឋថៃកុំឱ្យលួចទៅធ្វើការជាក្រុមបោកប្រាស់នៅប្រទេសជិតខាង ។ រីឯពលរដ្ឋថៃដែលធ្វើការនៅប្រទេសជិតខាង គឺត្រូវមានឯកសារ ដូចជា ៖ ឯកសារនិយោជកនៅក្រៅប្រទេស, លិខិតអនុញ្ញាតការងារពីស្ថានកុងស៊ុលថៃនៅក្រៅប្រទេស, លិខិតឆ្លងដែន និងប័ណ្ណការងារមានសុពលភាព ៕

ប្រទេសថៃ ៖ កាលពីថ្ងៃទី១៦ ខែមករា ឆ្នាំ២០២៥ សារព័ត៌មានថៃរាយការណ៍ថា កសិករដាំអំពៅជួបទុ.ក្ខយ៉ាងខ្លាំង ក្រោយពីរថយន្តដឹកអំពៅរបស់ពួកគេ ស្មើជាង២ពាន់គ្រឿងចតស្ងៀមមួយកន្លែង ដោយសារការបញ្ជាឱ្យបិទរោងចក្រផលិតស្ករដ៏ល្បី ។ អ្នកបើករថយន្តដឹកអំពៅគ្រោងតវ៉ាបិទផ្លូវដើម្បីស្នើឱ្យរដ្ឋាភិបាល និងក្រសួងឧស្សាហកម្មជួយដោះស្រាយ ។

រោងចក្រផលិតស្ករ និងរោងចក្រថាមពលនៅខេត្តឧត្តរថានី ប្រទេសថៃ បានបិទដំណើរការម៉ាស៊ីនផលិតទាំងអស់ ដោយសាររោងចក្រទាំងនេះទិញអំពៅដែលត្រូវភ្លើងឆេះប្រមាណ២៥% ពុំមែនជាអំពៅស្រស់ មកផលិតស្ករ ។ ហេតុនេះ ដោយសារបារម្ភពីការដំណើរការក្នុងរោងចក្រអាចបង្កគ្រោះថ្នាក់ ឬប៉ះពាល់សុខភាពអ្នកបរិភោគ នាយកដ្ឋានឧស្សាហកម្មនៃក្រសួងឧស្សាហកម្មក៏បញ្ជាឱ្យបិទរោងចក្រ តាំងពីថ្ងៃទី១៥ ខែមករា កន្លងមក រហូតដល់រោងចក្រដោះស្រាយបញ្ហា ។

ច្បាប់របស់ថៃកំណត់ថា អំពៅសម្រាប់ផលិតស្ករក្នុងរោងចក្រ គឺត្រូវតែជាអំពៅស្រស់ៗទាំងអស់ ប៉ុន្តែរោងចក្រទាំងនេះបានទិញអំពៅត្រូវភ្លើងឆេះ២៥% និងពុំមែនជាអំពៅស្រស់ ហើយអំពៅខ្លះដុះផ្សិត និងស្អុយ ។ ក្រៅពីនេះ កម្រិតផ្អែមរបស់អំពៅបានធ្លាក់ចុះក្រោម១០ CCS ទើបក្រសួងឧស្សាហកម្មស្នើឱ្យយកអំពៅទាំងនេះទៅបោះចោល ហាមបញ្ជូនចូលរោងចក្រ ។

រោងចក្រផលិតស្ករ និងរោងចក្រថាមពលបានជូនដំណឹងទៅសមាគមកសិករដាំអំពៅនៅភូមិភាគឦសាន កាលពីថ្ងៃទី១៥ ខែមករា ថា ក្រសួងឧស្សាហកម្មបញ្ជាឱ្យបិទរោងចក្រ ប៉ុន្តែចាប់ពីថ្ងៃនោះមក រោងចក្រពុំបាននិយាយអ្វីទៀតទេ ។ មានសេចក្តីរាយការណ៍ថា រោងចក្រកំពុងប្រមូលឯកសារបញ្ជូនទៅក្រសួងឧស្សាហកម្ម ដើម្បីសុំយកអំពៅត្រូវភ្លើងឆេះបញ្ចូលក្នុងរោងចក្រ ហើយរោងចក្រសន្យាថា ចាប់ពីពេលនេះទៅ នឹងទិញតែអំពៅស្រស់ប៉ុណ្ណោះ ។

កសិករម្នាក់ដែលបានដាំអំពៅលើផ្ទៃដីជាច្រើនហិកតានិយាយថា រថយន្តដឹកអំពៅរបស់ខ្លួនបានចតស្ងៀមអស់៥ថ្ងៃ ហើយបើគិតជាតម្លៃអំពៅ គឺស្មើពី៥សែន ទៅ៦សែនបាត ។ កសិកររូបនេះបានសំណូមពរឱ្យរដ្ឋាភិបាល និងក្រសួងឧស្សាហកម្មជួយដោះស្រាយបញ្ហា ហើយសូមសន្យាថា កសិករនឹងអនុវត្តតាមគោលនយោបាយរបស់រដ្ឋាភិបាល ។

មន្ត្រីសមាគមកសិករដាំអំពៅភូមិភាគឦសានឱ្យដឹងថា ក្រោយពីមានការបញ្ជាឱ្យបិទរោងចក្រធ្វើឱ្យកសិករដាំអំពៅបារម្ភយ៉ាងខ្លាំង ហើយបើរង់ចាំពី១ថ្ងៃ ទៅ២ថ្ងៃទៀត អំពៅនឹងខូចគុណភាព ទម្ងន់ធ្លាក់ចុះរាល់ថ្ងៃ នៅសល់តែកាកអំពៅ ពុំអាចផលិតស្ករបានទេ ។ បើរោងចក្រឈប់ទិញ តើឱ្យកសិករយកអំពៅយ៉ាងច្រើនទៅចោលកន្លែងណា និងលក់ឱ្យអ្នកណា?

ថ្មីៗនេះ មហាជនជាច្រើននៅជុំវិញពិភពលោកហាក់មានការចាប់អារម្មណ៍យ៉ាងខ្លាំងលើការដាក់ពិន្ទុ (Rating) របស់នារីជនជាតិស្បែកសរមួយរូប ដែលបានធ្វើដំណើរកម្សាន្តទៅកាន់ប្រទេសចំនួន ៧ កាលពីឆ្នាំ ២០២៤ ខណៈនាងបានចាប់ចិត្តខ្លាំងលើប្រទេសកម្ពុជា។

យោងតាមការដាក់បង្ហោះនៅលើបណ្តាញសង្គម Tik Tok ដោយគណនីមួយដែលមានឈ្មោះថា Embla Andersson បានបង្ហាញវីដេអូមួយ ដែលសរសេររៀបរាប់ពីចំណាប់អារម្មណ៍នាង ក្រោយបានទៅទស្សនាប្រទេសចំនួន ៧ កាលពីឆ្នាំ ២០២៤។ ប្រទេសទាំងនោះគឺរួមមាន កម្ពុជា វៀតណាម ថៃ ឡាវ សិង្ហបុរី តង់ហ្សានី និងហុងគ្រី។

កាន់តែពិសេស ក្នុងចំណោមប្រទេសទាំង ៧ នេះ នាងហាក់ចាប់ចិត្តខ្លាំងជាមួយនឹងប្រទេសកម្ពុជា និងហ៊ានដាក់ពិន្ទុឲ្យ ១០/១០ តែម្តង។ មូលហេតុទី ១ ដែលនាងចូលចិត្តទឹកដីអច្ឆរិយនេះមួយ ក៏ព្រោះតែប្រជាជនខ្មែរមានសន្តានចិត្តល្អគ្រប់ៗគ្នា។ នាងមានអារម្មណ៍ថា កម្ពុជាប្រៀបដូចជាផ្ទះទី ២ របស់នាង ខណៈដែលទឹកដីមួយនេះបានផ្សារភ្ជាប់យ៉ាងស៊ីជម្រៅជាមួយនឹងរឿងរ៉ាវប្រវត្តិសាស្រ្ត ហើយថែមទាំងសម្បូរដែនកោះដ៏ស្រស់ស្អាតជាច្រើន។ បន្ថែមពីនេះ បុរសខ្មែរក៏សង្ហាៗទៀតផង។

ដោយឡែក បើក្រឡេកទៅកាន់ប្រទេសវៀតណាមវិញ នារីដ៏ស្រស់ស្អាតរូបនេះ ក៏បាន Rate ឲ្យពិន្ទុខ្ពស់ផងដែរគឺ ៩/១០ ព្រោះតែអាហារឆ្ងាញ់ សម្បូរកន្លែងស្អាតៗ និងមានអ្វីអស្ចារ្យ ប្លែកៗ ជាច្រើនសម្រាប់ឲ្យនាងរុករក។ ប្រទេសថៃ នាង Rate ឲ្យ ៧/១០ ជាទីតំាងដែលសម្បូរភ្ញៀវទេសចរ ក៏ដូចជាអាចចំណាយពេលវេលាដ៏មានតម្លៃនូវទីនោះបាន។

សម្រាប់ប្រទេសឡាវ នាង Rate ឲ្យ ៦/១០ មានសម្រស់ធម្មជាតិដ៏ស្រស់ត្រកាល តែពេលនៅទីនោះនាងហាក់មិនសូវមានអារម្មណ៍សុវត្ថិភាពសោះឡើយ។ ប្រទេសសិង្ហបុរីវិញ Rate ឲ្យ ៥/១០ ជាទីក្រុងទំនើប តែមិនមានជាចំណូលចិត្តនាងឡើយ។ ខណៈ២ ប្រទេសទៀតដែលនៅសល់ គឺប្រទេសតង់ហ្សានី នាង Rate ឲ្យ ៨/១០ ហើយប្រទេសហុងគ្រី នាង Rate ឲ្យ ៦/១០ ផងដែរ៕

មនុស្សម្នានៅជុំវិញពិភពលោកហាក់មានការភ្ញាក់ផ្អើលខ្លាំងមែនទែន បន្ទាប់ពីបានទស្សនាវគ្គមួយនៃគំនូរជីវចលតុក្កតា The Simpsons កាលពីឆ្នាំ ២០០៧ បានលេងអំពីហេតុការណ៍ភ្លើងឆេះព្រៃក៏ដូចជាបង្កភាពចលាចលដល់មនុស្សម្នាក្នុងតំបន់ ខណៈថ្មីៗនេះ ក៏កើតមានហេតុការណ៍ឆេះទីក្រុង Hollywood នៅ Los Angeles សហរដ្ឋអាមេរិក។

ជឿជាក់ថា ប្រិយមិត្តភាគច្រើនប្រាកដជាបានជ្រាបហើយអំពី ខ្សែភាពយន្តគំនូរជីវចល The Simpsons ដែលត្រូវបានស្គាល់ថាជាតុក្កតាប្រមើលមើលអំពីអនាគតកាល។ ខ្សែភាពយន្ត The Simpsons ត្រូវបានផលិតឡើងដំបូងតាំងពីឆ្នាំ ១៩៨៩ និងមានជាច្រើនវគ្គ។ តុក្កតានេះហាក់ទទួលបានភាពល្បីល្បាញជុំវិញពិភពលោក ព្រោះតែវគ្គនីមួយៗដែលធ្លាប់បានលេងកន្លងមក បានឆ្លុះបញ្ចាំងពីបាតុភូតធម្មជាតិក៏ដូចជាហេតុការណ៍ផ្សេងៗ។

ទាក់ទងជាមួយនឹងហេតុការណ៍ភ្លើងឆេះព្រៃនៅឯក្រុង Los Angeles រដ្ឋកាលីហ្វញ៉ា សហរដ្ឋអាមេរិកនាពេលថ្មីនេះវិញ បានធ្វើឲ្យសាធារជននៅទូទាំងពិភពលោករម្លឹកទៅដល់វគ្គមួយរបស់តុក្កតា The Simpsons ដែលបានចាក់បញ្ចាំងកាលពីឆ្នាំ ២០០៧។ នៅវគ្គទី ១២ នៃរដូវកាលពី ៨ ក្រោមចំណងជើងថា Little Big Girl ដែលឆ្លុះបញ្ចាំងអំពីហេតុការណ៍ភ្លើងឆេះព្រៃដ៏ខ្លាំងក្លាមួយ គំរាមកំហែងដល់ទីក្រុងនិងអ្នកស្រុក។ ការឆេះនេះក៏ព្រោះភាពធ្វេសប្រហែសរបស់តួអង្គ Bart គ្មានទំនួលខុសត្រូវក្នុងការគ្រប់គ្រងភ្លើងដែលបង្កឡើងដោយខ្លួនឯងបាន ទើបបណ្តាលឲ្យសហគមន៍ទាំងមូលប្រឈមនឹងគ្រោះមហន្តរាយធម្មជាតិ។

តាមរយៈឈុតឆាកនេះគឺបានធ្វើឲ្យមហាជនជាច្រើនគិតថា វាស្រដៀងទៅនឹងហេតុការណ៍ដែលកើតឡើងនាពេលថ្មីៗនេះខ្លំាងមែនទែន ខណៈដែលអណ្តាតភ្លើងនូវតែបន្តឆាបឆេះព្រៃ ក៏ដូចជារីករាលដាលដល់តំបន់ផ្សេងៗ បំផ្លាញទ្រព្យសម្បត្តិប្រជាពលរដ្ឋ និងក្រុមពន្លត់អគ្គីភ័យឥតស្រាក់ស្រាន្ត។

ទោះជាយ៉ាងណា មិនមែនសុទ្ធតែមនុស្សគ្រប់គ្នាជឿលើហេតុការណ៍នេះទេ ដោយអ្នកខ្លះក៏បានលើកថា ភាពយន្ត The Simpsons មិនបានបញ្ជាក់ថាហេតុការណ៍នេះកើតឡើងនៅទី ណាឲ្យពិតប្រាកដទេ ខណៈដែលភ្លើងឆេះបែបនេះគឺតែងកើតឡើងជាច្រើនកន្លែងជារៀងរាល់ឆ្នាំ និងគ្រប់ប្រទេសទាំងអស់។ ដូច្នេះ ការទស្សន៍ទាយនេះគឺមានភាពមិនច្បាស់លាស់ (ដោយប្រយោលប៉ុណ្ណោះ)៕

ទីក្រុងមួយនេះគឺមានការកកស្ទះចរាចរណ៍ខ្លាំងណាស់ មានន័យថា ជារៀងរាល់ថ្ងៃមនុស្សម្នាក់ៗបានខាតពេលរាប់ម៉ោង ទម្រាំបានទៅដល់គោលដៅនីមួយៗ។ ដូច្នេះយោងតាម TomTom ដែលជាក្រុមហ៊ុនគ្រប់គ្រងទីតាំងភូមិសាស្ត្រ និងទិន្នន័យដែលមានទីស្នាក់ការកណ្តាលនៅក្នុងប្រទេសហូឡង់ បានឱ្យដឹងថា ទីក្រុងម៉ិស៊ិកគឺជាទីក្រុងមួយដែលមានការកកស្ទះចរាចរណ៍ខ្លាំងបំផុតនៅលើពិភពលោកក្នុងឆ្នាំ ២០២៤។

ការស្ទះចរាចរណ៍គឺពិតជារំខានខ្លាំងណាស់ ព្រោះវាបានធ្វើឱ្យយើងខាតពេលវេលាច្រើន ក៏ដូចជាធ្វើឱ្យយើងមានការធុញទ្រាន់ និងហត់នឿយផងដែរ។ ជាទូទៅមនុស្សម្នាក់ៗនៅទីក្រុងម៉ិកស៊ិក បានចំណាយពេលជាមធ្យម ១៥២ ម៉ោងក្នុងមួយឆ្នាំ ស្មើនឹង ៦ ថ្ងៃ ឬ ១៩ ថ្ងៃក្នុងមួយឆ្នាំនៃការស្ទះចរាចរណ៍។ មានន័យថា មនុស្សម្នាក់នៅក្នុងរដ្ឋធានីម៉ិកស៊ិកត្រូវការពេលជាមធ្យមកន្លះម៉ោង ដើម្បីធ្វើដំណើរចម្ងាយ ១០ គីឡូម៉ែត្រ ខណៈជាធម្មតាក្នុងលក្ខខណ្ឌល្អ ចម្ងាយនេះចំណាយពេលត្រឹមតែ ៨ នាទីប៉ុណ្ណោះ។

របាយការណ៍ TomTom ក៏បង្ហាញដែរថាស្ថានភាពចរាចរណ៍នៅទីក្រុងម៉ិកស៊ិកគឺស្រដៀងគ្នាទៅនឹងការកកស្ទះចរាចរណ៍នៅទីក្រុង Kolkata ប្រទេសឥណ្ឌា និងទីក្រុងឡុងដ៍ ប្រទេសអង់គ្លេស រួមទាំងទីក្រុងក្យូតូ ប្រទេសជប៉ុនផងដែរ។ ទីក្រុងទាំងនេះមានប្រជាជនរស់នៅច្រើន ដោយពួកគេចំណាយពេលលើសពី ១០០ ម៉ោង/ឆ្នាំ ដោយសារការកកស្ទះចរាចរណ៍។ មូលហេតុនៃការកកស្ទះចរាចរណ៍នៅទីក្រុងម៉ិកស៊ិកគឺដោយសារ ការតវ៉ាជាញឹកញាប់ ការដង្ហែរក្បួន ឬព្រឹត្តិការណ៍វប្បធម៌ និងកីឡា ជាពិសេសនៅតំបន់កណ្តាល។

យោងតាមទិន្នន័យពីលេខាធិការដ្ឋានរដ្ឋាភិបាលទីក្រុងម៉ិកស៊ិក ជារៀងរាល់ឆ្នាំមានការតវ៉ាយ៉ាងហោចណាស់ ៣,០០០ ដងនៅក្នុងទីក្រុងនេះ។ យោងតាមលោក Ralf-Peter Schäfer អនុប្រធានផ្នែកដឹកជញ្ជូននៅ TomTom ការរួមបញ្ចូលគ្នានៃចំនួនប្រជាជន និងកំណើនសេដ្ឋកិច្ចកំពុងដាក់សម្ពាធយ៉ាងខ្លាំងលើប្រព័ន្ធដឹកជញ្ជូននៅទីក្រុងម៉ិកស៊ិក។ ក្រៅពីនេះ ការកើនឡើងនៃក្រុមដឹកជញ្ជូនរហ័ស ក៏ធ្វើឱ្យស្ថានការណ៍ស្មុគស្មាញផងដែរ។

យោងតាមរបាយការណ៍របស់ TomTom ទីក្រុងជាច្រើនផ្សេងទៀតរបស់ម៉ិកស៊ិកក៏បានឃើញពីការកកស្ទះចរាចរណ៍ធ្ងន់ធ្ងរផងដែរ រួមទាំងទីក្រុង Guadalajara ដែលមនុស្សចំណាយពេលជាមធ្យម ៣០ នាទីក្នុងការធ្វើដំណើរ ១០ គីឡូម៉ែត្រ។ បើនិយាយពីពេលវេលាខ្ជះខ្ជាយប្រចាំឆ្នាំ Guadalajara ស្ថិតនៅលំដាប់ទីពីរបន្ទាប់ពីទីក្រុងម៉ិកស៊ិកដែលមាន ១០៣ ម៉ោងក្នុងមួយឆ្នាំ៕