ហ្សេដេស បានបង្ហាញចំណាប់អារម្មណ៍របស់ខ្លួនលើកដំបូងនៅក្នុងបទសម្ភាសន៍នៅពេលបានសហការជាមួយនឹងរៀមច្បងជាតារាចម្រៀងរ៉េបល្បីឈ្មោះ ម៉ាន់ វណ្ណដា ។ ហ្សេដេស ថា អារម្មណ៍ពេលនោះរបស់លោកធ្វើអ្វីមិនត្រូវទាល់តែសោះ ខណៈក្តីស្រមៃធំមួយទៀតរបស់លោកគឺបានសម្តែងនៅលើឆាកអន្តរជាតិ។

ហ្សេដេស ជាអតីតបេក្ខជន TOP3 នៅក្នុងកម្មវិធី The Rapper Cambodia រដូវកាលទី១ និងបានសាងប្រជាប្រិយភាពតាមរយៈបទ «ក្រឡុក» ដែលមានការស្តាប់ជាង៤លានដងក្នុងរយៈពេលជាង៩ខែ។ ប្រជាប្រិយភាពក្នុងនាមជាបេក្ខជនលេចធ្លោនិងមានបទល្បីល្បាញ ហ្សេដេស គឺបានធ្វើឱ្យអ្នកគាំទ្រកាន់តែភ្ញាក់ផ្អើលបន្ទាប់ពីមានឱកាសសហការជាមួយនឹងតារាចម្រៀងល្បីឈ្មោះ វណ្ណដា ដែលមានចំណងជើងថា « SIDEQUEST» ដែលបានទម្លាក់កាលពីចុងខែកញ្ញា ឆ្នាំ២០២៤ ហើយពេលនេះមានការស្តាប់ជាង៣លានដង និងបានសម្តែងនៅលើឆាកប្រគំតន្រ្តីជាមួយគ្នាផងដែរ។

ក្នុងបទសម្ភាសន៍ spotlight ហ្សេដេស ថា វណ្ណដា គឺជាអាយដលរបស់ខ្លួនមួយរូបហើយ សម្រាប់ពេលវេលាដែលជួយជាមួយ វណ្ណដា និងរួមការងារជាមួយគ្នាអារម្មណ៍របស់លោកគឺរំភើបខុសពីមុនដោយសារតែកាលពីមុនជាក្តីស្រមៃរបស់លោកបាននិយាយជាមួយមិត្តភក្តិថាថ្ងៃណាមួយលោកនឹងមានបទ Feat ជាមួយ វណ្ណដា ហើយគ្រាន់តែជាការនិយាយលួងខ្លួនឯង។ នៅពេលមានឱកាស Feat ជាមួយគ្នាមែនលោកមានការសប្បាយចិត្តខ្លាំង ពេលធ្វើបទជាមួយនឹង វណ្ណដា លោកធ្វើអ្វីមិនចេញ សូម្បីតែធ្វើប៉ារ៉ូលក៏ធ្វើមិនចេញក្នុងចិត្តមិនស្ងប់រសាប់រសល់រហូត វណ្ណដា ជួយទើបលោកធ្វើបាន។

ហ្សេដេស បានទម្លាយទៀតថា វណ្ណដា ជាមនុស្សដែលបំផុសគំនិតលោកច្រើនធ្វើឱ្យលោករឹងមាំច្រើនស្តាប់បទរបស់តារាចម្រៀងរូបនេះហើយបានរៀនសូត្រពី វណ្ណដា ច្រើនណាស់ហើយជាហ្វេនម្នាក់តាំងពីដំបូងស្តាប់បទរៀមច្បងរូបនេះសឹងតែទាំងអស់គ្រប់អាល់ប៊ុម ហើយបទខ្លះចាក់ដោតលោកខ្លាំងរហូតដល់យំ។ នៅក្នុងបទសម្ភាសន៍ដដែល ហ្សេដេស បានបង្ហើបក្តីស្រមៃធំមួយទៀតរបស់ខ្លួនគឺចង់មានការសម្តែងនៅលើឆាកអន្តរជាតិឱ្យគេស្តាប់សំឡេងរបស់លោកអ្វីដែលលោកធ្វើ៕

ធ្លាប់បានបង្ហោះពីការជំពាក់លុយមិនព្រមសងនៅលើបណ្តាញសង្គមម្តងរួចមកហើយពេលនេះ ម៉ាណាដូ បានបង្ហោះសារយ៉ាងក្តៅគគុកទៅកាន់ ស្រីខ្ញុង និងបានបោះសម្តីថានាងជាអ្នកសិល្បៈថោកទាបបំផុតកំពូលកុហករកលេខដាក់គ្មាន។

នៅថ្ងៃទី៤ កុម្ភៈ ម៉ាដូណា បានបង្ហោះរូបភាព ស្រីខ្ញុង រួមជាមួយនឹងឆាតដែលមិនមានការឆ្លើយតបពីគណនីម្ខាងទៀតដែលមានឈ្មោះថា «សិរីមង្គល សិរីមង្គល» សុំឱ្យមានការទូទាត់ប្រាក់ឱ្យខ្លះ។ ជាមួយនឹងរូបភាព ស្រីខ្ញុង ម៉ាដូណា បានបោះសម្តីថា «ជាមនុស្សមិនដឹងគុណនិយាយយកល្អខ្លួនឯង ធានាលុយឱ្យវាផង បោកលុយខ្ញុំផង ខំរាប់អាននិងទុកចិត្ត ចុងក្រោយលេងខ្វល់ ជាអ្នកសិល្បៈដ៏ថោកទាបបំផុត កំពូលកុហករកលេខដាក់គ្មាន។ សំខាន់មើលងាយបងប្អូនខ្មែរនៅស្រុកក្រៅសុទ្ធតែថាចោលឆ្អឹង ហើយខ្មឺតនិយាយដោយមិនដឹងខុសទៀត។ ហើយឡើងតុបំភ្លឺ និយាយបំផ្លើសខុសពីការពិត ខ្ញុំស្តាប់ហើយឆ្អែត គ្មានដឹងគុណចំពោះមនុស្សគ្រប់គ្នាដែលជួយនិយាយយកខ្លួនឯងល្អ »។

ម៉ាដូណា បានបន្តទៀតថា «ពីមុនថាមិនចង់បង្ហោះរូបមុខវា នឹងសរសេរចំឈ្មោះវាទេ តែចង់ដឹងថាវាមានលុយប្តឹងយើងទេ បើវាមាន មានន័យថាសុខចិត្តអស់លុយឡើងតុលាការ តែមិនសងយើង។ ពុកម៉ែបងប្អូន រង់ចាំទស្សនា ការឡាយរបស់ខ្ញុំនឹងបង្ហាញព័ស្តុតាងទាំងអស់ ហើយពេលខ្ញុំឡាយ ខ្ញុំជឿជាក់មានជនរងគ្រោះជាច្រើនអ្នកដែលត្រូវវាកុហក នឹងមិនសងបោកប្រាស់លុយជាច្រើនអ្នកផងដែរ»។
តារាកំប្លែងរូបនេះបានបន្ថែមទៀតថាលោកនឹងបង្ហោះស្រីខ្ញុងរហូតដល់សងលុយឱ្យគ្រប់ចំនួន ហើយថាស្រីខ្ញុងមិនគិតពីកូនចៅខ្លួនឯងសោះថាគ្នាខ្មាសប៉ុណ្ណាដែលមានម្តាយបែបនេះ កុហកសាហាវ។

គេចាំបានថាកាលពីខែកញ្ញា ឆ្នាំ២០២៣ តារាកំប្លែង ម៉ាដូណា ចេញមកពន្លះស្បែកមុខតារាកំប្លែង ស្រីខ្ញុង ជំពាក់បំណុលខ្លួនជាង៤ម៉ឺនដុល្លារដោយសន្យាថាសងមួយ១ខែចំនួន៥០០ដុល្លារ ប៉ុន្តែមិនបានសងប្រាក់តាមការសន្យានោះទេ។ កាលនោះ ស្រីខ្ញុង បានបង្ហោះសំណេរនៅលើបណ្តាញសង្គមថាខ្លួនមិនដែលមានគំនិតអាក្រក់បោកប្រាស់អ្នកណាដែរ ហើយនាងក៏មិនតបតវែកញែកអ្វីច្រើននិងដាស់តឿនខ្លួនឯងថាជាកូនបំណុលគ្មានសិទ្ធិតបតបបកស្រាយអ្វីទាំងអស់៕

OG Golden កូនក្រុមរបស់អតីតគ្រូបង្វឹក Ruthko បានយកឈ្នះបេក្ខភាព៤រូបផ្សេងទៀតក្នុងការលើកពានកម្មវិធីប្រកួត Rapper Fighter ។ ក្នុងការឈ្នះនេះ OG ត្រូវរងនូវសម្តីវែកញែកពីអ្នកលេងបណ្តាញសង្គមមួយចំនួនដោយហេតុផលថាបានគុណគ្រូបង្វឹក។ តាររ៉េប King Chi ជាគ្រូបង្វឹកមួយរូបក្នុងកម្មវិធីបាននិយាយនៅក្នុងការ live ថាការជាប់របស់ OG Golden គឺតាមរយៈការបោះឆ្នោតពីមហាជនខណៈលោកអាចនិយាយបានថាបេក្ខជនទាំង៥នាក់(TOP5)គឺសុទ្ធតែមានសមត្ថភាពដូចគ្នា។

តាមរយៈវីដេអូមួយដែលមានការចែករំលែកនៅលើបណ្តាញសង្គមទិកតុក តារារ៉េប King Chi បានឆ្លើយតបនឹងសំណួរថាហេតុអ្វី OG លើកពាន។ ម្ចាស់បទ «អាមិចទេស» បាននិយាយថា នេះជាការបោះឆ្នោតរបស់មហាជនឱ្យធ្វើយ៉ាងមិចបើមហាជនបោះឆ្នោតឱ្យច្រើនបាន OG ជាប់ហើយមួយទៀតប្រសិនជាអ្នកដែលបានទៅទស្សនាផ្ទាល់កាលពីយប់ផ្តាច់ព័្រត្រគ្រាន់តែស្រែកឈ្មោះ OG សន្ធឹកនៃការហ៊ោរគឺដាច់គេបាត់ហើយ។

King Chi រហ្ស័សនាមស្តេចជួន បានបន្តទៀតថា បើនិយាយពីសមត្ថភាពថាអ្នកទាំងប្រាំ TOP5 គឺសមត្ថភាពល្អដូចគ្នាប៉ុន្តែមានប្រភេទផ្សេងគ្នា ដូច្នេះការចូលចិត្តរបស់មនុស្សក៏ទៅតាមហ្នឹងដូចគ្នា។ តារារ៉េបរូបនេះបន្ថែមទៀតថាអ្នកមួយចំនួនមានការវែកញែកថាដោយសារតែគេអាណិតនោះគឺជារឿងរបស់អ្នកយល់ឃើញបែបនេះ អាណិត OG បោះឆ្នោតឱ្យជាប់ មិនមែនជាមនុស្សគ្មានសមត្ថភាពសោះនោះទេ ច្រៀងមិនកើតឱ្យជាប់នោះទេ ហើយអ្នក៤នាក់ផ្សេងទៀតមិនបានលើកពាន មិនមែនមិនកើតជាការ ចប់ឆាកជីវិតអស់អនាគតនោះទេ។

គួរបញ្ជាក់ផងដែរថាកាលពីរាត្រីផ្តាច់ព្រ័ត្រថ្ងៃទី២ កុម្ភៈ OG Golden បានយកឈ្នះបេក្ខជន៤រូបផ្សេងទៀត មានដូចជា Ranngo, EMI, TORO និង STEEZY ដោយ ម្ចាស់ជ័យលាភីទទួលបានខ្សែក Rapper Fighter ជាមួយនឹងទឹកប្រាក់ ៦០លានរៀល៕