ប្រទេសចិន ៖ ប្រទេសចិននឹងរៀបចំការរត់ប្រណាំងពាក់កណ្តាលម៉ារ៉ាតុងមនុស្សជាមួយមនុស្សយន្ត ក្នុងតំបន់តាស៊ីង ទីក្រុងប៉េកាំង នៅខែមេសា ឆ្នាំ២០២៥ ខាងមុខ ហើយគេចាត់ទុកថា នេះជាការរត់ប្រណាំងមានលក្ខណៈខុសប្លែកជាលើកដំបូងលើពិភពលោក ។ ចិននឹងស្វាគមន៍មនុស្សយន្តមកពីជុំវិញពិភពលោក មកចូលរួមរត់ប្រណាំង ប៉ុន្តែត្រូវគោរពតាមលក្ខខណ្ឌមួយចំនួន ។

ការរត់ប្រណាំងនឹងមានអត្តពលិកចូលរួមប្រមាណ ១២,០០០នាក់ ដោយត្រូវរត់ក្នុងចម្ងាយជាង២១គីឡូម៉ែត្រ ហើយក៏មានមនុស្សយន្ត Humanoid មកពីជាង២០ក្រុមហ៊ុនមកចូលរួមរត់ប្រណាំងផងដែរ ។ កម្មវិធីនេះរៀបចំដោយភ្នាក់ងារអភិវឌ្ឍន៍សេដ្ឋកិច្ច និងបច្ចេកវិទ្យាទីក្រុងប៉េកាំង ឬហៅថា E-Town ។

ចិននឹងទទួលស្វាគមន៍វិទ្យាស្ថានស្រាវជ្រាវ ក្រុមហ៊ុនមនុស្សយន្ត និងសាកលវិទ្យាល័យនានានៅទូទាំងពិភពលោក អាចបញ្ជូនមនុស្សយន្តមកចូលរួមប្រកួត ប៉ុន្តែចិននឹងកំណត់លក្ខខណ្ឌតឹងរ៉ឹងមួយចំនួន ដូចជា ៖ មនុស្សយន្តត្រូវតែមានរូបរាងស្រដៀងមនុស្ស និងអាចដើរ ឬរត់ដោយប្រើជើង២ ហើយហាមប្រើប្រាស់កង់វិលដាច់ខាត ។

ក្រៅពីនេះ មនុស្សយន្តត្រូវមានកម្ពស់ចាប់ពី៥០សង់ទីម៉ែត្រ ទៅ២ម៉ែត្រ ហើយគម្លាតពីត្រគាតទៅបាតជើង គឺមិនក្រោម៤៥សង់ទីម៉ែត្រ ។ មនុស្សយន្តត្រូវតែបញ្ជាដោយឧបករណ៍បញ្ជាពីចម្ងាយ ឬជាមនុស្សយន្តធ្វើចលនាដោយស្វ័យប្រវត្តិ ហើយគណៈកម្មការប្រកួតនឹងអនុញ្ញាតឱ្យផ្លាស់ប្តូរថ្មមនុស្សយន្តពេលកំពុងរត់ប្រណាំង ។ រីឯអត្តពលិកដែលឈ្នះក្នុងការប្រកួត ចាប់ពីលេខ១ ទៅលេខ៣ នឹងទទួលបានពានរង្វាន់ ។

ចិនបានអភិវឌ្ឍន៍បច្ចេកវិទ្យាមនុស្សយន្តយ៉ាងឆាប់រហ័សដើម្បីប្រកួតជាមួយអាមេរិក ដូចគ្នានឹងការប្រកួតផ្នែកបច្ចេកវិទ្យា AI ដែរ ។ មនុស្សយន្ត Humanoid គឺជាបច្ចេកវិទ្យាមួយទៀតដែលចិនកំពុងប្រកួតជាមួយអាមេរិក ហើយទីក្រុងជាច្រើនរបស់ចិនបានចំណាយប្រាក់យ៉ាងច្រើនមហាសាលលើការស្រាវជ្រាវ អភិវឌ្ឍន៍បច្ចេកវិទ្យា និងលើកកម្ពស់សមត្ថភាពមនុស្សយន្ត ។

ចិនរំពឹងថា ឧស្សាហកម្មមនុស្សយន្ត Humanoid នឹងកើនឡើងស្មើទឹកប្រាក់ជាង៥៤ពាន់លានដុល្លារអាមេរិក នៅឆ្នាំ២០៣០ ។ ហេតុនេះ យើងនឹងរង់ចាំមើលថា តើមនុស្សយន្តប្រទេសណាមានបច្ចេកវិទ្យាខ្ពស់ជាង?

ប្រទេសឥណ្ឌា ៖ កន្លងមក រដ្ឋាភិបាលឥណ្ឌាបានដំឡើងបន្ទះសូឡាស្រូបពន្លឺព្រះអាទិត្យលើដំបូលផ្ទះពលរដ្ឋបានចំនួន៨សែន៥ម៉ឺនខ្នង ហើយធ្វើឱ្យឥណ្ឌាក្លាយជាប្រទេសផលិតថាមពលស្អាតច្រើនលំដាប់ទី៣ លើពិភពលោក ដែលមានកម្លាំងផលិតស្មើជាង២០៣ជីហ្គាវ៉ាត់ ឬស្មើ៤៦.៣% ។ នៅឆ្នាំ២០២៥ ឥណ្ឌាមានគោលដៅដំឡើងបន្ទះសូឡាលើដំបូលផ្ទះពលរដ្ឋមានចំណូលតិច ចំនួន១០លានខ្នង ។

កត្តាធ្វើឱ្យឥណ្ឌាផលិតថាមពលស្អាតបានច្រើនបែបនេះ ដោយសារនាយករដ្ឋមន្ត្រីឥណ្ឌា លោក Narendra Modi មានគោលនយោបាយពង្រីកការប្រើប្រាស់ថាមពលស្អាតទៅគ្រប់ទិសទី តាមរយៈការដំឡើងបន្ទះសូឡាលើដំបូលផ្ទះពលរដ្ឋនៅទូទាំងប្រទេស ។ រដ្ឋាភិបាលឥណ្ឌាមានគោលដៅផលិតថាមពលកកើតឡើងវិញ ចាប់ពី២០៣០ជីហ្គាវ៉ាត់ រហូតដល់២០៤៧ជីហ្គាវ៉ាត់ ។

មន្ត្រីក្រសួងថាមពលបញ្ជាក់ថា នៅឆ្នាំ២០២៥ ក្រសួងបានត្រៀមថវិកាជិត២៣ម៉ឺនដុល្លារអាមេរិក ដើម្បីដំឡើងបន្ទះសូឡាលើដំបូលផ្ទះពលរដ្ឋមានចំណូលតិច ចំនួន១០លានខ្នង ព្រមទាំងពលរដ្ឋរស់នៅតំបន់ជនបទផងដែរ ។ ក្រសួងសង្ឃឹមថា វានឹងជួយឱ្យពលរដ្ឋមានចំណូលតិចអាចប្រើប្រាស់ថាមពលស្អាត ។

នាយករដ្ឋមន្ត្រីឥណ្ឌា លោក Narendra Modi បានបង្កើតគម្រោងមួយឈ្មោះ «Muft Bijli Yojna» ហើយគម្រោងនេះនឹងប្រើប្រាស់ថវិកាឆ្នាំ២០២៦ ដែលមានចំនួនច្រើនជាងថវិកាឆ្នាំ២០២៥ រហូតដល់២ដង ។ វាជាគោលដៅយូរអង្វែងរបស់ឥណ្ឌា ខណៈកន្លងមក ឥណ្ឌាបានដំឡើងបន្ទះសូឡាពុំគិតថ្លៃលើដំបូលផ្ទះពលរដ្ឋបានចំនួន៨សែន៥ម៉ឺនខ្នង ។

ការចំណាយប្រាក់របស់រដ្ឋាភិបាលឥណ្ឌាទៅលើការផលិតថាមពលស្អាត មិនត្រឹមតែជួយកាត់បន្ថយការបំភាយកាបូនប៉ុណ្ណោះទេ ប៉ុន្តែក៏បានជួយដល់ពលរដ្ឋរាប់លាននាក់អាចប្រើប្រាស់ថាមពលតម្លៃថោក និងពុំប៉ះពាល់បរិស្ថាន ។ លើសពីនេះ វានឹងធ្វើឱ្យឥណ្ឌាក្លាយជាមហាអំណាចផ្នែកផលិតថាមពលលើពិភពលោក នាពេលឆាប់ៗ ៕

ស្ត្រីភាគច្រើនត្រូវបានចាត់ទុកថា ចូលចិត្តភាពរ៉ូមេនទិកខ្លាំងជាងបុរស ប៉ុន្តែការស្រាវជ្រាវមួយនៅអាមេរិកបញ្ជាក់ថា បុរសក៏ចូលចិត្តភាពរ៉ូមេនទិកដែរ ជាពិសេស បុរសចូលចិត្តអានប្រលោមលោកមនោសញ្ចេតនាច្រើនជាងស្ត្រី ។

បើនិយាយពីភាពរ៉ូមេនទិក យើងនឹងនឹកឃើញដល់រូបភាពស្ត្រីម្នាក់អង្គុយបរិភោគអាហារពេលល្ងាចក្រោមពន្លឺភ្លើងទៀន មានបាច់ផ្កាកុលាបធំៗនៅក្បែរខ្លួន ស្តាប់ចម្រៀងតិចៗ និងនៅក្បែរបុរសជាទីស្រឡាញ់ ពោលពាក្យផ្អែមល្ហែមមករកនាង ។

ប៉ុន្តែបុរសក៏ឈ្លក់វង្វេងនឹងភាពរ៉ូមេនទិក មិនខុសពីស្ត្រីទេ គ្រាន់តែពេលខ្លះ ពួកគេពុំបង្ហាញអាកប្បកិរិយាចេញមកក្រៅ ដោយសារសង្គមចាត់ទុកថា ភាពរ៉ូមេនទិក មិនស័ក្តិសមជាមួយបុរស ។ ការពិត បុរសក៏ត្រូវការសេចក្តីស្រឡាញ់ ការយកចិត្តទុកដាក់ ពាក្យសម្តីផ្អែមល្ហែម និងពេលវេលាពិសេសច្រើនជាងស្ត្រី ។

ការស្ទង់មតិ Talker Research បានសាកសួរពលរដ្ឋអាមេរិក ចំនួន២,០០០នាក់ ហើយលទ្ធផលបង្ហាញថា បុរសដែលបានចូលរួមការស្ទង់មតិ ស្មើ៦៣% ចូលចិត្តអានប្រលោមលោកមនោសញ្ចេតនា បើធៀបនឹងស្ត្រីស្មើត្រឹមតែ៦០% ប៉ុណ្ណោះ ។ លើសពីនេះ បុរសបានចំណាយពេលវេលាអានប្រលោមលោកមនោសញ្ចេតនាច្រើនជាងស្ត្រី គឺជាមធ្យម បុរសបានចំណាយពេលអានប្រលោមលោក រហូតដល់៣៦៤ម៉ោងក្នុង១ឆ្នាំ ខណៈស្ត្រីចំណាយពេលត្រឹមតែ៣១២ម៉ោងក្នុង១ឆ្នាំ ។

ចំណុចគួរឱ្យចាប់អារម្មណ៍មួយទៀត គឺបុរសរៀបការរួចហើយ ស្មើ១៧% បាននឹកដល់គូស្នេហ៍របស់ខ្លួនក្រោយអានប្រលោមលោករួច ខណៈបុរស២១% ទទួលស្គាល់ថា ពេលអានប្រលោមលោក ធ្វើឱ្យពួកគេនឹកឃើញដល់តារាល្បីៗដែលធ្លាប់លួចស្រឡាញ់ ដូចជា ៖ អ្នកនាង Angelina Jolie ។ រីឯបុរស៧% ទៀតប្រាប់ថា តែងតែនឹកដល់សង្សារចាស់ជានិច្ច ពេលអានប្រលោមលោកម្តងៗ ។

ក្រុមស្ទង់មតិ Talker Research យល់ឃើញថា វាគួរឱ្យរីករាយណាស់ ដែលបុរសៗចូលចិត្តអានប្រលោមលោកមនោសញ្ចេតនា ពីព្រោះសាច់រឿងបានបង្ហាញនូវខ្លឹមសារស៊ីជម្រៅលើសពីការគិត និងជួយឱ្យពួកគេយល់ពីសេចក្តីស្នេហាកាន់តែខ្លាំង ៕

ពេលខ្យល់ពុលកើនឡើងខ្លាំងក្នុងទីក្រុងនានាលើពិភពលោក ធ្វើឱ្យមានការបារម្ភពីជំងឺមហារីកសួតខ្លាំងឡើង ពីព្រោះកាលពីមុន អ្នកជំងឺមហារីកសួតភាគច្រើនជាអ្នកជក់បារី ប៉ុន្តែការស្រាវជ្រាវចុងក្រោយរបស់អង្គការសុខភាពពិភពលោក បង្ហាញថា បច្ចុប្បន្ន អ្នកពុំជក់បារីបានកើតជំងឺមហារីកសួតកាន់តែច្រើន ដោយសារពួកគេស្រូបយកខ្យល់ពុល ។

ទីភ្នាក់ងារស្រាវជ្រាវជំងឺមហារីកអន្តរជាតិ (IARC) របស់អង្គការសុខភាពពិភពលោក (WHO) បញ្ជាក់ថា អ្នកជំងឺមហារីកសួតភាគច្រើនពុំធ្លាប់ជក់បារីទេ ប៉ុន្តែពួកគេបានស្រូបខ្យល់ពុលនៅជុំវិញខ្លួន ។ ជំងឺមហារីកសួតដែលកើតឡើងលើអ្នកពុំជក់បារី គឺប្រភេទ Adenocarcinoma ហើយអ្នកជំងឺមហារីកសួតនឹងស្លាប់ច្រើនបំផុត ។

ការស្រាវជ្រាវមួយផ្សព្វផ្សាយក្នុងទស្សនាវដ្តី Lancet Respiratory Medicine បង្ហាញថា កាលពីឆ្នាំ២០២២ មានអ្នកជំងឺមហារីកសួតប្រភេទ Adenocarcinoma ស្មើ២សែននាក់ ដោយសារពួកគេស្រូបយកខ្យល់ពុល ក្នុងនោះអ្នកជំងឺភាគច្រើនរស់នៅតំបន់អាស៊ីបូព៌ា ជាពិសេស ប្រទេសចិន ។

លទ្ធផលការស្រាវជ្រាវនេះបញ្ជាក់ពីខ្យល់ពុលជាមូលហេតុធ្វើឱ្យពលរដ្ឋលើពិភពលោក កើតជំងឺមហារីកសួតកាន់តែខ្លាំង ហើយត្រូវមានការស្រាវជ្រាវបន្ថែមទៀត ។ នេះបើតាមការលើកឡើងរបស់លោកវេជ្ជបណ្ឌិត Freddie Bray អ្នកដឹកនាំការស្រាវជ្រាវ និងជាប្រធានផ្នែកតាមដានជំងឺមហារីករបស់ ទីភ្នាក់ងារស្រាវជ្រាវជំងឺមហារីកអន្តរជាតិ (IARC) ។

អ្នកជំងឺមហារីកសួតដែលពុំជក់បារីនៅប្រទេសអង់គ្លេស និងអាមេរិកបានកើនឡើងខ្ពស់ ហើយចំនួនអ្នកជំងឺនឹងធ្លាក់ចុះ លុះត្រាតែពិភពលោក ដោះស្រាយបញ្ហាខ្យល់ពុលលើបរិយាកាសបានជោគជ័យកម្រិតណា ។ មហារីកសួតបានសម្លាប់ជីវិតមនុស្សជាច្រើននាក់ ព្រោះបច្ចុប្បន្ន អ្នកកើតជំងឺមហារីកសួត ពុំមែនបណ្តាលមកពីការជក់បារីដូចមុនទេ ។

ការស្រាវជ្រាវបញ្ជាក់ថា ខ្យល់ពុល គឺជាមូលហេតុសំខាន់ធ្វើឱ្យកើតជំងឺមហារីកកូនកណ្តុរប្រភេទថ្មី ស្មើពី៥៣% ទៅ៧០% នៃអ្នកជំងឺមហារីកសួតដែលពុំជក់បារីលើពិភពលោក ។ បើប្រទេសនានាពុំយកចិត្តទុកដាក់ដោះស្រាយបញ្ហាខ្យល់ពុលទេ ទោះជាយើងព្យាយាមថែទាំសុខភាពខ្លាំងយ៉ាងណា ក៏ពុំអាចចៀសផុតពីជំងឺមហារីកសួតដែរ ៕