ហ្វីលីពីនជាប្រទេសប្រជុំកោះ ដែលសម្បូរទៅដោយតំបន់ទេសចរណ៍ធម្មជាតិប្លែកៗ និងគួរឱ្យចាប់អារម្មណ៍ជាច្រើនដូចជាឆ្នេរសមុទ្រ កោះ កន្លែងប្រវត្តិសាស្ត្រ ព្រៃឈើ ទិដ្ឋភាពបាតសមុទ្រ ភ្នំភ្លើង និងដីទួលជាដើម។

ប្រទេសហ្វីលីពីនមានទីតាំងនៅចុងភាគខាងកើតនៃទ្វីបអាស៊ី ដែលមានកោះជាង ៧០០០ ភាគច្រើនមានប្រជាជន និងជនជាតិភាគតិចកុលសម្ព័ន្ធរស់នៅ។

នេះបើយោងតាម Lonely Planet ដែលគេហទំព័រទេសចរណ៍បរទេស មានទីស្នាក់ការនៅប្រទេសអូស្ត្រាលី បានណែនាំគោលល្បីៗជាច្រើនជុំវិញពិភពលោក ក្នុងនោះតំបន់ទេសចរណ៍ ៥ កន្លែងខាងក្រោមនេះគឺកំពុងពេញនិយម និងទាក់ទាញខ្លាំងបផុតនៅប្រទេសហ្វីលីពីន៖

១.កោះ Palawan៖ គឺជាកោះមួយដែលមានលក្ខណៈពិសេសជាងកោះនានា ដោយសារឆ្នេរសមុទ្រនៅក្បែរផ្ទាំងថ្មធំៗ និងមានផ្ទះប្រជាជនជាច្រើនរស់នៅទីនោះ។ នៅពេលលោកអ្នកមកដល់កោះ Palawan នឹងបានឃើញវាលខ្សាច់សក្បុស ទឹកសមុទ្រថ្លាឈ្វង់ឆ្លុះដល់បាត ខ្យល់អាកាសត្រជាក់បរិសុទ្ធ ទីធ្លាធំល្វឹងល្វើយ អមដោយបរិយាកាសអ៊ូអរ មានសុខសុវត្ថិភាព បង្កើតបានជាទិដ្ឋភាពដ៏ល្អឥតខ្ចោះមួយដែលមិនអាចបំភ្លេចបាន។

២.ភ្នំភ្លើង Mayon៖ ភ្នំភ្លើងនេះមានកម្ពស់ ២,៤០០ ម៉ែត្រដែលមានរាងកោនស្អាតល្អ ខណៈភ្ញៀវទេសចរទៅលេងទីនោះអាចបោះជុំរុំ ដើរឡើងភ្នំ មើលសត្វបក្សី និងថតរូបទេសភាពខៀវស្រងាត់ អមជាមួយផ្សែងពពកតាមជើងភ្នំយ៉ាងមានក្តីសុខ។ Mayon ជាភ្នំភ្លើងសកម្មជាងគេបំផុតនៅប្រទេសហ្វីលីពីន ដែលបានផ្ទុះ ៤៩ ដងក្នុងរយៈពេលជាង ៤០០ ឆ្នាំកន្លងទៅ។

៣.កោះ Malapascua៖ គឺជាកូនកោះដ៏តូចមួយ និងជាភូមិអ្នកនេសាទដ៏ស្ងប់ស្ងាត់ ហើយក៏ជាកន្លែងមុជទឹកដ៏ពេញនិយមបំផុតសម្រាប់ភ្ញៀវទេសចរដើម្បីមើលត្រីចម្រុះគ្នាផងដែរ។ នៅទីនេះមានឆ្នេរខ្សាច់សស្អាត ទឹកថ្លាដូចកញ្ចក់ចាំងផ្លេកៗ ដើមដូងដុះតម្រៀបគ្នា និងមានសួនផ្កាថ្មចម្រុះពណ៌គ្នាយ៉ាងច្រើន បង្កើតបានទិដ្ឋភាពដ៏គួរឱ្យចាប់អារម្មណ៍ និងទាក់ទាញបំផុត។

៤.ទីក្រុង Tagaytay៖ ទីក្រុងនេះមានភ្នំភ្លើង Taal ដែលបានបន្សល់ទុករណ្ដៅដ៏ធំមួយ និងក្លាយជាទន្លេកណ្ដាលកោះយ៉ាងស្រស់ស្អាត។ ភ្នំភ្លើងកណ្ដាលទន្លេ ត្រូវគេមើលឃើញមានផ្សែងហុយៗ តាមថ្ងៃខ្លះ ដែលបង្កើតភាពទាក់ទាញមួយទៀតសម្រាប់ភ្ញៀវទេសចរ។

៥.វាលស្រែថ្នាក់ៗ Banaue៖ ជាការពិតណាស់ ភ្ញៀវទេសចរដែលចូលទស្សនាប្រទេសហ្វីលីពីន គឺមិនដែលមើលរំលងវាលស្រែនេះនោះទេ ព្រោះវាត្រូវបានគេកាប់គាស់តាមជើងភ្នំអស់រយៈពេលជាង ២០០០ ឆ្នាំមកហើយ គឺជាវាលស្រែបុរាណដែលបន្សល់ទុកមកដល់បច្ចុប្បន្ន៕

ទោះបីជារូបសម្បត្តិរបស់អ្នកមើលទៅស្រស់ស្អាត ឬស្រស់សង្ហាយ៉ាងណាក៏ដោយ ប្រសិនបើអ្នកមានទម្លាប់មួយចំនួននេះ នឹងធ្វើឱ្យអ្នកបាត់បង់ភាពទាក់ទាញយ៉ាងងាយ ក៏ដូចជាមិនសូវមាននរណាម្នាក់ចូលចិត្តអ្នកឡើយ ដោយទម្លាប់អាក្រក់ទាំងនោះរួមមាន៖

១.មិនចេះលេងសើច៖ យោងតាមការសិក្សាឆ្នាំ ២០២១ ដែលបានបោះពុម្ភផ្សាយក្នុងទស្សនាវដ្តី Journal of Positive Psychology បានបង្ហាញថា មនុស្សដែលអសមត្ថភាពក្នុងការលេងសើច គឺអាចបង្កើតភាពតានតឹង និងរំខានដល់អន្តរកម្មសង្គមធម្មជាតិ។ ទម្លាប់នេះក៏អាចបង្ហាញពីភាពរឹងមាំជ្រុលពេក និងកង្វះការកោតសរសើរចំពោះភាពប៉ិនប្រសប់ ជាហេតុបណ្តាលឱ្យអ្នកគ្មានភាពទាក់ទាញ។

២.ប្រកាន់ច្រើន៖ ការប្រកាន់ច្រើនពេកពីកំហុសរបស់នរណាម្នាក់ ធ្វើឱ្យមនុស្សជុំវិញខ្លួនអ្នកមិនសប្បាយចិត្ត ឬមានអារម្មណ៍ថាតានតឹងនៅពេលដែលពួកគេនៅជិតអ្នក។ ដូច្នេះអ្នកនឹងបាត់បង់ភាពទាក់ទាញយ៉ាងងាយ ឬក៏មិនសូវមាននរណាម្នាក់ចូលចិត្តអ្នកជាដើម ដោយសារអាកប្បកិរិយាដ៏តឹងរ៉ឹងហួសហេតុរបស់អ្នក។ ដូច្នេះដើម្បីដោះស្រាយទំនោរនេះ អ្នកគួរបើកចិត្តឱ្យទូលាយ ក៏ដូចជាផ្តល់ការគាំទ្រជាវិជ្ជមាន និងការឆ្លើយតបយ៉ាងក្លៀវក្លាចំពោះព័ត៌មានវិជ្ជមានរបស់ដៃគូ រួមទាំងបង្កើនការពេញចិត្តនៃទំនាក់ទំនងជារួម។

៣.ចូលចិត្តសន្យា៖ មនុស្សដែលចូលចិត្តសន្យាតែមិនធ្វើ ឬធ្វើមិនបាន គឺអាចបំផ្លាញទំនុកចិត្តរបស់មនុស្សជុំវិញខ្លួន បង្កើតបរិយាកាសដ៏អាក្រក់មួយ ធ្វើឱ្យគេខកចិត្ត ក៏ដូចជាបំផ្លាញទំនាក់ទំនងផ្ទាល់ខ្លួន រួមទាំងខ្វះវិជ្ជាជីវៈ។ ដូច្នេះដើម្បីដោះស្រាយទម្លាប់នេះ ជម្រើសដ៏ល្អគឺអ្នកត្រូវនិយាយបដិសេធចំពោះការសន្យាដែលមិនអាចរក្សាបាន ឬមិនអាចធ្វើបាន។ ហេតុនេះហើយ ការធ្វើតាមការប្តេជ្ញាចិត្តរបស់អ្នកជាប្រចាំ នឹងបង្កើនភាពជឿជាក់ ក៏ដូចជាបង្កើនភាពទាក់ទាញរបស់អ្នកផងដែរ៕

នៅលើភពផែនដីយើងនេះ អាងមហាសមុទ្រត្រូវបានបែងចែកចេញជា៥ ខណៈពួកវាមានសីតុណ្ហភាពខុសៗគ្នា ដោយមានខ្លះត្រជាក់ និងខ្លះទៀតក្តៅ។ ដូច្នេះហើយ តើលោកអ្នកដឹងទេថា មហាសមុទ្រណាខ្លះដែលក្តៅជាងគេ និងត្រជាក់ជាងគេនៅលើពិភពលោក? យោងតាមគេហទំព័របរទេស Live Science មហាសមុទ្រដែលក្តៅជាងគេនោះគឺមហាសមុទ្រឥណ្ឌា។

មហាសមុទ្រឥណ្ឌា (Indian Ocean) គឺជាមហាសមុទ្រដែលត្រូវបានគេចាត់ទុកថា ក្តៅបំផុតនៅលើភពផែនដី ដោយសារតែមួយផ្នែកធំរបស់វាស្ថិតនៅក្នុងតំបន់ត្រូពិច ដែលមានសីតុណ្ហភាពជាមធ្យមចន្លោះ ២០ ទៅ ៣០ អង្សាសេ។ ក្រៅពីមហាសមុទ្រឥណ្ឌា មហាសមុទ្រប៉ាស៊ីហ្វិក (Pacific Ocean) ក៏ជាមហាសមុទ្រដែលត្រូវបានគេចាត់ទុកថាក្តៅបំផុតទីពីរនៅលើភពផែនដីផងដែរ។

ដោយសារតែវាស្ថិតនៅតំបន់ក្បែរខ្សែអេក្វាទ័រ ដែលមានកម្រិតសីតុណ្ហភាពឡើងដល់ជាង ៣០ អង្សាសេ។ រីឯមហាសមុទ្រអាត្លង់ទិច (Atlantic Ocean) ដែលគ្របដណ្តប់លើផ្ទៃផែនដីជិត ២០ ភាគរយវិញ ត្រូវបានគេចាត់ទុកថា ជាមហាសមុទ្រក្តៅត្រជាក់ ដោយសារកន្លែងខ្លះស្ថិតក្រោមអាកាសធាតុត្រជាក់ខ្លាំង ដូចជានៅក្បែរតំបន់ប៉ូលជាដើម ខណៈខ្លះទៀតនៅក្បែរខ្សែអេក្វាទ័រ គឺវាមានអាកាសធាតុក្តៅបែបត្រូពិច។

ដូច្នេះសីតុណ្ហភាពជាមធ្យម របស់មហាសមុទ្រអាត្លង់ទិច គឺចន្លោះ ២ ក្រោមសូន្យអង្សាសេ ទៅដល់ ៣០ អង្សាសេ។ ចំណែកមហាសមុទ្រខាងត្បូង (Southern Ocean) ស្ថិតនៅចំណាត់ថ្នាក់ទី៤ នៃមហាសមុទ្រដែលត្រជាក់ជាងគេលើពិភពលោក។ មហាសមុទ្រនេះព័ទ្ធជុំវិញដោយទ្វីបទឹកកកអង់តាក់ទិច នៃប៉ូលខាងត្បូង ដែលមានសីតុណ្ហភាពជាមធ្យមចន្លោះ ២ក្រោមសូន្យអង្សាសេ ទៅដល់ ១០ អង្សាសេ។

ចុងក្រោយមហាសមុទ្រដែលត្រជាក់ជាងគេនៅលើភពផែនដីនោះគឺមហាសមុទ្រអាក់ទិច (Arctic Ocean) ដែលស្ថិតនៅតំបន់ប៉ូលខាងជើង គឺជាមហាសមុទ្រត្រជាក់ជាងគេបង្អស់នៅលើពិភពលោក ហើយក៏ជាមហាសមុទ្រតូចបំផុតផងដែរ ជាមួយទំហំ ១៥,៥៥៨,០០០ គីឡូម៉ែត្រក្រឡា។ មហាសមុទ្រអាក់ទិច មានសីតុណ្ហភាពជាមធ្យមចន្លោះ ១ ទៅ ២ ក្រោមសូន្យអង្សាសេ ដែលនាំឱ្យវាទទួលបានរហស្សនាមថា មហាសមុទ្រទឹកកក៕

Conophytum Pageae គឺជាដើមឈើមួយប្រភេទចេញផ្លែស្រដៀងនឹងបបូរមាត់មនុស្ស និងមានឈ្មោះល្បីល្បាញថា ដើមរបស់វាអាចដុះលូតលាស់នៅលើដីស្ងួតហួតហែង ឬធន់ជាមួយអាកាសធាតុក្តៅបានល្អ ។ វាមានស្លឹកក្រាស់ៗ ហើយផ្លែរបស់វាមានសាច់ច្រើនសម្រាប់ផ្ទុកទឹកពេលបរិស្ថានពុំអំណោយផល ។ វាចេញផ្លែជាចង្កោមយ៉ាងស្រស់ស្អាត និងខុសប្លែកពីផ្លែឈើផ្សេងៗ ទើបធ្វើឱ្យមនុស្សជាច្រើនចាប់អារម្មណ៍យ៉ាងខ្លាំង ។

ដើម Conophytum Pageae នឹងចេញផ្កាមានក្លិនក្រអូបគ្រប់ពេលវេលានារដូវស្លឹកឈើជ្រុះ ហើយផ្ការបស់វានឹងរីកពេលយប់ ។ កាលពីឆ្នាំ២០១៥ ដើមឈើនេះត្រូវ បានគេវាយតម្លៃថា ជារុក្ខជាតិដែលមនុស្សបារម្ភតិចបំផុតពីការផុតពូជ ហើយនៅ២០២១ វាត្រូវបានគេវាយតម្លៃម្តងទៀតថា ជារុក្ខជាតិជិតផុតពូជ ដោយសារមានការជួញដូរដើមឈើនេះខុសច្បាប់ច្រើនបំផុត ។ ក្រៅពីនេះ ក៏មានជនខិលខូចដើរលួចដើម Conophytum Pageae ធំល្មមប្រមាណ១សែនដើម យកទៅលក់ចាប់ពីឆ្នាំ២០១៩ ដល់ឆ្នាំ២០២១ ។

ដើមឈើនេះនឹងដុះលូតលាស់នៅតាមច្រាំងថ្មភ្នំ, វាលទំនាប, វាលខ្សាច់ និងតំបន់ភ្នំនៅប្រទេសអាហ្វ្រិកខាងត្បូង ហើយដោយសារមានការលួចដើមឈើនេះយកទៅលក់ខុសច្បាប់ច្រើន បានធ្វើឱ្យប៉ះពាល់ដល់សត្វតូចៗដែលរស់នៅក្នុងតំបន់ ។ ហេតុនេះ អាហ្វ្រិកខាងត្បូងបានចាត់វិធានការបន្ទាន់ដើម្បីទប់ស្កាត់ការលួចដើមឈើព្រៃ ខណៈវាជិតផុតពូជ ។

អ្នកជំនាញនិយាយថា ដោយសារដើមរបស់វាមានគុណសម្បត្តិច្រើន គឺជាមូលហេតុធ្វើឱ្យមានការលួចលក់ខុសច្បាប់ច្រើន ខណៈចំនួនដើមឈើបានធ្លាក់ចុះយ៉ាងឆាប់រហ័ស បច្ចុប្បន្ន អ្នកស្រឡាញ់ដើមឈើនេះអាចរកទិញវានៅកន្លែងបណ្តុះកូនឈើល្បីៗ ។ អ្នកជំនាញបានប្រាប់ពីការពង្រីកពូជដើម Conophytum Pageae ថា វិធីងាយបំផុតសម្រាប់ពង្រីកពូជរបស់វា គឺបំបៅមែកពីដើមមេនៅចុងរដូវក្តៅ និងយកមកដាំក្នុងផើងមានប្រវែងពី១០ ទៅ២០សង់ទីម៉ែត្រ ដែលក្នុងផើងពោរពេញដោយសារធាតុរ៉ែស័ក្តិសមជាមួយរុក្ខជាតិមានផ្លែផ្ទុកទឹកច្រើន ។

ពេលរសៀល ហាមដាក់វាត្រូវពន្លឺថ្ងៃរយៈពេលយូរ ប៉ុន្តែវាអាចត្រូវពន្លឺថ្ងៃពេលព្រឹក ។ មុនពេលដាំ យើងត្រូវដឹងថា វាចូលចិត្តកន្លែងណាមានខ្យល់អាកាសល្អ, មានសំណើមតិច, ដាក់ជី១ឆ្នាំម្តង ក្នុងរដូវស្លឹកឈើជ្រុះ និងស្រោចទឹកជាប្រចាំពេលដាំវារួច ។ ប៉ុន្តែកុំឱ្យទឺកដក់ក្នុងផើងច្រើនពេក ហើយទុកឱ្យដីស្ងួតផងដែរ ដើម្បីកុំឱ្យឫសវាស្អុយ និងចៀសវាងដាក់ជីញឹកញាប់បង្ខំឱ្យវាចេញផ្លែ ៕

ប្រទេសអ៊ុយក្រែន ៖ កាលពីថ្ងៃទី១៣ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ប្រធានាធិបតីអ៊ុយក្រែន លោក Volodymyr Zelenskyy នឹងពុំទទួលយកកិច្ចព្រមព្រៀងសន្តិភាពណាមួយដែលអ៊ុយក្រែនពុំបានចូលរួមចរចាទេ ។ រីឯមន្ត្រីសហភាពអឺរ៉ុបឱ្យដឹងថា មេដឹកនាំអាមេរិក និងរុស្ស៊ី ពុំគួរធ្វើកិច្ចព្រមព្រៀងនៅពីក្រោយខ្នងអ៊ុយក្រែន និងសហភាពអឺរ៉ុប ។

ប្រធានាធិបតីអ៊ុយក្រែន លោក Zelenskyy បាននិយាយកាលពីថ្ងៃទី១៣ ខែកុម្ភៈ ក្នុងពេលលោកធ្វើដំណើរទៅពិនិត្យមើលរោងចក្រថាមពលនុយក្លេអ៊ែរនៅភាគខាងលិចប្រទេសថា អ៊ុយក្រែននឹងពុំទទួលស្គាល់កិច្ចព្រមព្រៀងសន្តិភាពធ្វើឡើងរវាងអាមេរិក និងរុស្ស៊ី ដែលទីក្រុងកៀវ ពុំបានចូលរួម ។ លោកថា ៖ «ក្នុងនាមជាប្រទេសឯករាជ្យ យើងពុំអាចទទួលស្គាល់កិច្ចព្រមព្រៀងណាមួយដែលយើងពុំបានចូលរួមឡើយ ។ ខ្ញុំសូមនិយាយយ៉ាងច្បាស់លាស់ចំពោះរឿងនេះ គឺខ្ញុំពុំទទួលស្គាល់ការចរចាទ្វេភាគីដែលពាក់ព័ន្ធនឹងបញ្ហាអ៊ុយក្រែន» ។

លោក Zelenskyy បាននិយាយបែបនេះរយៈពេល១ថ្ងៃ ក្រោយពីប្រធានាធិបតីអាមេរិក លោក Donald Trump បានជជែកតាមទូរស័ព្ទជាមួយមេដឹកនាំរុស្ស៊ី លោក Vladimir Putin ។ បន្ទាប់មក លោក Trump ក៏សរសេរក្នុងបណ្តាញសង្គម Truth Social ថា ការចរចាបញ្ចប់សង្គ្រាមនៅប្រទេសអ៊ុយក្រែន នឹងធ្វើឡើងនាពេលឆាប់ៗ ។

ដោយឡែក លោកស្រី Kaja Kallas ប្រធាននាយកដ្ឋានគោលនយោបាយការបរទេសរបស់សហភាពអឺរ៉ុបបានប្រកាសថា សហភាពអឺរ៉ុបនឹងគាំទ្រអ៊ុយក្រែន បើអ៊ុយក្រែនបដិសេធកិច្ចព្រមព្រៀងសន្តិភាពដែលខ្លួនពុំបានចូលរួម ។ ការធ្វើកិច្ចព្រមព្រៀងណាមួយដើម្បីបញ្ចប់សង្គ្រាមនៅអ៊ុយក្រែនយ៉ាងឆាប់រហ័សនោះ គឺជាកិច្ចព្រមព្រៀងកខ្វក់ ។

លោកស្រីបន្តថា សហភាពអឺរ៉ុប និងអ៊ុយក្រែន ត្រូវតែចូលរួមក្នុងការចរចាកិច្ចព្រមព្រៀងសន្តិភាព បើចង់ឱ្យកិច្ចព្រមព្រៀងនេះទទួលបានលទ្ធផលល្អ ។ មេដឹកនាំអាមេរិក និងរុស្ស៊ី ពុំគួរចរចាបញ្ចប់សង្គ្រាមនៅពីក្រោយខ្នងអ៊ុយក្រែន និងសហភាពអឺរ៉ុបទេ ។

បច្ចុប្បន្ន រុស្ស៊ីបានកាន់កាប់ទឹកដីអ៊ុយក្រែន ប្រមាណ១ផ្នែក ក្នុងចំណោម៥ផ្នែក ហើយរុស្ស៊ីអំពាវនាវឱ្យរដ្ឋាភិបាលទីក្រុងកៀវ យល់ព្រមប្រគល់ទឹកដីបន្ថែមទៀតឱ្យខ្លួនច ។ រីឯអ៊ុយក្រែនស្នើឱ្យរុស្ស៊ីដកកម្លាំងទ័ពចេញពីទឹកដីអ៊ុយក្រែនដែលរុស្ស៊ីកាន់កាប់ ហើយអ៊ុយក្រែនត្រូវតែក្លាយជាសមាជិកអង្គការណាតូ ដើម្បីការពារកុំឱ្យរដ្ឋាភិបាលទីក្រុងមូស្គូ វាយលុកអ៊ុយក្រែន ៕

បុណ្យនៃក្ដីស្រឡាញ់ ត្រូវបានប្រារព្ធឡើងនៅថ្ងៃទី១៤ ខែកុម្ភៈ ជារៀងរាល់ឆ្នាំ ហើយវាបានក្លាយជាថ្ងៃសំខាន់ ដែលគូស្នេហ៍នៅទូទាំងពិភពលោកនិយមបង្ហាញក្តីស្រឡាញ់ និងបំណងល្អដល់គ្នាទៅវិញទៅមក ។ តើលោកអ្នកជ្រាបទេថា បុណ្យនៃក្ដីស្រឡាញ់មានដើមកំណើតមកពីប្រទេសណា និងមានប្រវត្តិបែបណាខ្លះ?

បុណ្យនៃក្ដីស្រឡាញ់ (Valentine’s Day) ត្រូវបានប្រារព្ធឡើងអស់រយៈពេលជាង១,៥០០ឆ្នាំមកហើយ និងប្រារព្ធឡើងលើកដំបូងនៅឆ្នាំ៤៩៦ ។ គេចាត់ទុកថា វាជាថ្ងៃបុណ្យរបស់គ្រិស្តបរិស័ទ ប៉ុន្តែក្រោយមក វាក៏បានក្លាយជាបុណ្យនៃក្តីស្រឡាញ់ និងពាក់ព័ន្ធនឹងរឿងរ៉ាវរ៉ូមេនទិកផងដែរ ។

ប្រវត្តិបុណ្យនៃក្តីស្រឡាញ់បានកើតឡើងនៅសម័យអធិរាជ Claudius II (Emperor Claudius II) ក្នុងទីក្រុងរ៉ូម ប្រទេសអ៊ីតាលី ។ សម័យនោះ ទីក្រុងរ៉ូមកើតសង្គ្រាមជាញឹកញាប់ ដោយសារអធិរាជ Claudius II គ្រប់គ្រងទីក្រុងរ៉ូម ចូលចិត្តធ្វើសង្គ្រាម ហើយទ្រង់បានបញ្ជាឱ្យប្រមូលបុរសៗទៅប្រយុទ្ធនៅសមរភូមិ ។ ប៉ុន្តែបុរសភាគច្រើនសុទ្ធតែមានក្រុមគ្រួសារ និងគូស្នេហ៍ដែលត្រូវថែទាំ ហើយពួកគេពុំចង់ឃ្លាតឆ្ងាយពីប្រពន្ធ-កូន ដើម្បីទៅស្លាប់ក្នុងសមរភូមិទេ ។

អធិរាជ Claudius II បានបញ្ជាឱ្យលុបចោលពិធីភ្ជាប់ពាក្យ និងរៀបអាពាហ៍ពិពាហ៍ទាំងអស់នៅទីក្រុងរ៉ូម ដើម្បីឱ្យពលរដ្ឋចេញទៅច្បាំងនៅសមរភូមិ ប៉ុន្តែបុរសមានចិត្តបរិសុទ្ធម្នាក់ឈ្មោះថា «Valentinus» ឬត្រូវបានគេស្គាល់ថាឈ្មោះ «បុរសបរិសុទ្ធ Valentine» ពុំយល់ស្របនឹងការលុបចោលពិធីទាំងនេះទេ ទើបប្រាប់ឱ្យគូស្នេហ៍ទាំងអស់នៅទីក្រុងរ៉ូម រៀបចំពិធីអាពាហ៍ពិពាហ៍ ។ ហេតុនេះ ធ្វើឱ្យអធិរាជ Claudius II ពុំសព្វព្រះរាជហឫទ័យយ៉ាងខ្លាំង និងបញ្ជាឱ្យចាប់ខ្លួនបុរសបរិសុទ្ធ Valentine មកឃុំឃាំងរង់ចាំការប្រហារជីវិត ។

នៅក្នុងពន្ធនាគារ បុរសបរិសុទ្ធ Valentine ក៏បានលង់ស្នេហ៍កូនស្រីរបស់ឆ្មាំពន្ធនាគារ ដែលជាស្រីពិការភ្នែកទាំងសងខាង ។ មុនថ្ងៃប្រហារជីវិត បុរសបរិសុទ្ធ Valentine បានផ្ញើលិខិត១ច្បាប់ទៅឱ្យស្រីពិការភ្នែក ដោយការសរសេរបញ្ចប់ឃ្លាក្នុងលិខិតនេះថា «From Your Valentine» ។ រឿងរ៉ាវដ៏សោកសៅនេះបានល្បីល្បាញពេញទីក្រុងរ៉ូម រីឯបុរសបរិសុទ្ធ Valentine ត្រូវបានគេប្រហារជីវិតនៅថ្ងៃទី១៤ ខែកុម្ភៈ ។

ចាប់ពីពេលនោះមក ១៤ កុម្ភៈ ក៏បានក្លាយជាបុណ្យនៃក្តីស្រឡាញ់ ដើម្បីរំលឹក និងសរសើរពីសេចក្តីស្នេហាដ៏សែនបរិសុទ្ធរបស់បុរសបរិសុទ្ធ Valentine ដែលបានលាចាកលោក ។ ពលរដ្ឋនៅប្រទេសនានាក្នុងតំបន់អឺរ៉ុបបាននិយាយរឿងរ៉ាវរបស់លោកយ៉ាងច្រើន ហើយថ្ងៃឱ្យថ្ងៃ១៤ កុម្ភៈ ក្លាយជាថ្ងៃសំខាន់សម្រាប់អបអរការស្រឡាញ់គ្នារបស់គូស្នេហ៍ រហូតមកដល់បច្ចុប្បន្ន ។

ក្រៅពីនេះ ក៏ការប្រគល់វត្ថុអនុស្សាវរីយ៍ជូនគ្នាទៅវិញទៅមក ដូចជា ៖ លិខិតជូនពរ សូកូឡា និងផ្កាកុលាបមានពណ៌ឆើតឆាយ ជាពិសេស ពណ៌ក្រហម និងពណ៌ឈូក ៕