ពិតជាមិនធម្មតា សមនឹងពាក្យថា«ឪខ្លាកូនខ្លា»មែន! ក្នុងវ័យត្រឹមតែ ១៣ឆ្នាំ កុមារី គីម ជូអេ ដែលជាកូនស្រីកណ្ដាលរបស់មេដឹកនាំកូរ៉េខាងជើងលោក គីម ជុងអ៊ុន ត្រូវបានទីភ្នាក់ងារចារកម្មកូរ៉េខាងត្បូងរាយការណ៍មកថា នាងត្រូវបានប្ដូរឈ្មោះ និងផ្ដល់ឲ្យនូវតំណែងដ៏សំខាន់មួយនៅក្នុងវិស័យការពារជាតិ ក្នុងនាមជា «អគ្គនាយកមីស៊ីល»។

យោងតាមការចុះផ្សាយរបស់សារព័ត៌មាន The Chosun Daily របស់កូរ៉េខាងត្បូងបានឲ្យដឹងថា រដ្ឋាភិបាលបានទទួលរបាយការណ៍ពីទីភ្នាក់ងារចារកម្មនៅថ្ងៃទី២២ កុម្ភៈនេះថា ឈ្មោះកូនស្រីរបស់មេដឹកនាំកូរ៉េខាងជើង គីមជុងអ៊ុន ដែលពីមុនត្រូវបានគេស្គាល់ថា “គីម ជូអេ” ឥឡូវនេះត្រូវបានផ្លាស់ប្ដូរទៅជា “គីមជូហេ”។ ដោយឡែក បើតាមប្រភពមន្រ្តីជាន់ខ្ពស់ដែលដឹងពីច្បាស់ពីស្ថានភាពនេះក៏បានរាយការណ៍ផងដែរថា គីម ជូហេ កំពុងគ្រងតំណែងជា “អគ្គនាយកមីស៊ីល” នៅក្នុងប្រទេសកូរ៉េខាងជើង ហើយកំពុងតាមដានយ៉ាងដិតដល់នូវការវិវត្តនៅក្នុងសមាជគណបក្សកម្មករលើកទី 9 ដែលកំពុងដំណើរការនៅទីក្រុងព្យុងយ៉ាង។

ជុំវិញព័ត៌មានដែលទទួលបាននេះ ចារកម្មកូរ៉េខាងត្បូងបានបង្ហាញថា ការចាត់តាំងតួនាទីជា “អគ្គនាយកមីស៊ីល” ដល់ក្មេងស្រីវ័យជំទង់រូបនេះ គឺដើម្បីបន្ស៉ាំនាងក្នុងការគ្រប់គ្រងយោធាឲ្យបានមុន បើទោះជាលោក ចាង ឆាងហា ជាអគ្គនាយកមីស៊ីលជាផ្លូវការក៏ដោយ។ ការណ៍នេះ ត្រូវបានគេកត់សម្គាល់ថា គឺជា “ដំណាក់កាលនៃការកំណត់អ្នកស្នងតំណែង” ដែលមេដឹកនាំបច្ចុប្បន្នកំពុងព្យាយាមបណ្ដុះបញ្ដាលសមត្ថភាពទាយាទរបស់ខ្លួន។

គួរជម្រាបថា គីម ជូអេ គឺជាកូនស្រីតែមួយគត់ដែលគេស្គាល់របស់ គីម ជុងអ៊ុន និង ភរិយារបស់លោក គឺលោកស្រី រី សុលជូ ។ បើទោះជាមានរបាយការណ៍តិចតួចបំផុតអំពីជីវិតឯកជនរបស់គ្រួសារ គីម ប៉ុន្តែទីភ្នាក់ងារស៊ើបការណ៍សម្ងាត់ជឿជាក់ថា លោក គីម ជុងអ៊ុន នៅមានកូនប្រុសច្បងម្នាក់ទៀត ប៉ុន្តែកូនប្រុសនេះមិនដែលត្រូវបានទទួលស្គាល់ ឬបង្ហាញនៅលើប្រព័ន្ធផ្សព្វផ្សាយកូរ៉េខាងជើងឡើយ។

បើទោះជាគេមិនទាន់ដឹងថាក្មេងជំទង់រូបនេះមានផែនការអ្វីសម្រាប់ដឹកនាំប្រទេសរបស់នាងក៏ដោយ ប៉ុន្តែនាងទំនងជាមានអំណាចខ្លាំងក្លាក្នុងការបង្កើតប្រព័ន្ធដឹកនាំថ្មីតាមរបៀបណាដែលនាងចូលចិត្ត។ ជាមួយគ្នានេះដែរ គេមិនច្បាស់ទេថាការស្នងតំណែងពីឪពុករបស់ គីម ជូអេ នឹងអាចនាំមកនូវការផ្លាស់ប្តូរអ្វីខ្លះដល់កូរ៉េខាងជើង៕

យ៉ាងម៉េចយ៉ាងម៉ាកុំតែចោ.ទថាមកពីកម្ពុជាទៅបានហើយ! ករណីអគ្គីភ័យឆាបឆេះទៅលើឃ្លាំងផ្ទុកគ្រាប់រំសេវរបស់កងកម្លាំងប៉ូលិសល្បាតព្រំដែនលេខ២១ ក្នុងស្រុកមឿង ខេត្តសុរិន្ទ ត្រូវបានមនុស្សមួយចំនួនសង្ស័យថា អាចជាអំពើបំផ្លិ.ចបំផ្លា.ញដោយចេតនា ខណៈមូលហេតុពិតប្រាកដយ៉ាងណាកងទ័ពភូមិន្ទថៃកំពុងបើកការស៊ើបអង្កេតលម្អិត។

យោងតាមការចុះផ្សាយរបស់សារព័ត៌មានក្នុងស្រុករបស់ថៃ កាលពីល្ងាចថ្ងៃអង្គារ ទី២៤ ខែកុម្ភៈ ឆ្នាំ២០២៦ កងទ័ពភូមិន្ទថៃបានផ្ដល់សេចក្ដីរាយការណ៍មកថា មានករណីផ្ទុះ និងឆេះឃ្លាំងផ្ទុកគ្រាប់រំសេវរបស់អង្គភាពនគរបាលព្រំដែនថៃលេខ២១ (BPP21) ស្ថិតនៅលើផ្លូវវាងក្រុង ក្នុងស្រុកមឿង ខេត្តសុរិន្ទ ។

ឧប្បត្តិហេតុដ៏រន្ធត់នេះ បានកើតឡើងនៅចន្លោះម៉ោងប្រមាណ ៧:៣០ នាទីល្ងាច ដោយបន្ទាប់ពីទទួលបានសេចក្ដីរាយការណ៍នេះភ្លាម អាជ្ញាធរក្នុងតំបន់បានដាក់ពង្រាយកម្លាំងជួយសង្រ្គោះ និងរថយន្តពន្លត់អគ្គីភ័យជាច្រើនគ្រឿង ប៉ុន្តែហាក់មិនអាចគ្រប់គ្រងលើស្ថានការណ៍បានដោយងាយឡើយ ដោយការឆាបឆេះមានសភាពខ្លាំងក្លា ហើយបាននាំមកនូវការបំផ្លិ.ចបំផ្លា.ញយ៉ាងធ្ងន់ធ្ងរដល់ទីតាំងនោះ។

ដោយឡែក ជុំវិញពាក្យចចាមអារ៉ាមដែលមនុស្សមួយចំនួនសង្ស័យថា ហេតុការណ៍នេះអាចជាអំពើបំផ្លិ.ចបំផ្លា.ញដោយចេតនា ឬមានអ្នកលួ.ចដុតនោះ លោក វីនថៃ ស៊ូវ៉ារី អ្នកនាំពាក្យកងទ័ពថៃបានសង្កត់ធ្ងន់ថា ពេលនេះលោកនៅពុំទាន់អាចផ្ដល់ការសន្និដ្ឋានណាមួយទេ ព្រោះមូលហេតុពិតប្រាកដកំពុងស្ថិតក្រោមការស៊ើបអង្កេតនៅឡើយ ។

ទន្ទឹមគ្នានេះ លោកបានអំពាវនាវដល់សាធារណជនកុំឱ្យមានការស្លន់ស្លោ ត្រូវតាមដានព័ត៌មានពីភ្នាក់ងាររដ្ឋាភិបាលផ្លូវការ និងមិនត្រូវចែករំលែកព័ត៌មានដែលផ្សព្វផ្សាយមកពីប្រភពមិនច្បាស់លាស់ជាដាច់ខាត ជៀសវាងមានការយល់ច្រឡំនិងនាំឲ្យមានផលប៉ះពាល់ដល់ការងាររបស់ប៉ូលីស៕

ជម្រើសទីមួយ និងមានតែមួយគត់! ថ្មីៗនេះលោក គីម ជុងអ៊ុន ត្រូវបានជ្រើសតាំងសារជាថ្មីជាអគ្គលេខាធិការនៃគណបក្សពលករដែលជាបក្សកាន់អំណាច ដើម្បីបន្តការគ្រប់គ្រងរយៈពេល 15 ឆ្នាំតទៅមុខទៀតលើគណបក្សគ្រប់គ្រងតែមួយគត់របស់ប្រទេស។ ការសម្រេចចិត្តនេះត្រូវបានធ្វើឡើងតាមរយៈការបោះឆ្នោតរបស់មន្រ្តីជាន់ខ្ពស់កូរ៉េខាងជើងជាច្រើនរូប និងមានសម្លេងឆ្នោតគាំទ្រ ១០០%។

យោងតាមទីភ្នាក់ងារសារព័ត៌មានរដ្ឋ KCNA ការបោះឆ្នោតបានធ្វើឡើងនៅថ្ងៃអាទិត្យ ដែលជាថ្ងៃទីបួននៃព្រឹត្តិការសមាជគណបក្សដ៏សំខាន់ និងប្រារព្ធឡើងរៀងរាល់ប្រាំឆ្នាំម្តង។ ក្នុងអំឡុងពេលនៃព្រឹត្តិការណ៍នេះ សមាជិកគណៈកម្មាធិការកណ្តាលក៏ត្រូវបានជ្រើសតាំងផងដែរ ហើយច្បាប់គណបក្សមួយចំនួនត្រូវបានកែប្រែ នេះបើយោងតាមការចុះផ្សាយដោយមិនបានផ្តល់ព័ត៌មានលម្អិត។

នៅក្នុងការថ្លែងសុន្ទរកថារបស់លោកដើម្បីបើកសមាជនៅថ្ងៃទី១៨ ខែកុម្ភៈ លោក គីម បានសន្យាលើកកម្ពស់ស្តង់ដារជីវភាពរស់នៅ ដោយចាត់ទុកជាភារកិច្ចប្រវត្តិសាស្ត្រដ៏ធ្ងន់ និងបន្ទាន់ក្នុងការជំរុញសេដ្ឋកិច្ច និងជីវភាពរបស់ប្រជាជន។ នៅចុងបញ្ចប់នៃសមាជនេះ បក្សកាន់អំណាច នឹងអនុម័តការសម្រេចចិត្តកំណត់ទិសដៅគោលនយោបាយថ្មីសម្រាប់រយៈពេលប្រាំឆ្នាំខាងមុខលើសេដ្ឋកិច្ច ការពារជាតិ និងការទូតជាដើម។

គួរជម្រាបថា លោក គីម ជុងអ៊ុន បានក្លាយជាមេដឹកនាំកំពូលរបស់កូរ៉េខាងជើងចាប់តាំងពីមរណភាពរបស់ឪពុករបស់លោក គឺលោក គីម ជុងអ៊ីល ក្នុងឆ្នាំ 2011។ នៅឆ្នាំ 2019 ស្ថាប័ននីតិបញ្ញត្តិរបស់កូរ៉េខាងជើងបានអនុម័តការផ្លាស់ប្តូររដ្ឋធម្មនុញ្ញ ដើម្បីធ្វើឱ្យអំណាចរបស់លោក គីម ក្លាយជា “អំណាចឯកតោភាគី” លើកិច្ចការរដ្ឋទាំងអស់ ដោយបានជំរុញឲ្យលោកក្លាយជាប្រមុខរដ្ឋផ្លូវការ និងតែមួយគត់។

ប្រព័ន្ធផ្សព្វផ្សាយរដ្ឋបាននិយាយថា ការបោះឆ្នោតឡើងវិញនេះបង្ហាញពីសាមគ្គីភាពនៅក្នុងគណបក្សកាន់អំណាច ខណៈដែលពួកគេកំពុងបន្តគោលដៅការពារជាតិ និងយុទ្ធសាស្ត្រសេដ្ឋកិច្ចក្រោមការណែនាំរបស់លោក គីម ហើយនឹងផ្ដល់ឲ្យលោក គីម នូវការពង្រឹងការក្តាប់អំណាចយ៉ាងរឹងមាំនៅក្នុងប្រទេស៕

ថៃធ្លាប់តែភូតភរ កុហ.កប្រទេសនានាលើពិភពលោកថាខ្លួនឯងល្អត្រឹមត្រូវ ពេលនេះ ថៃបែរជាខ្លាចបារាំងមិនគាំទ្រទង្វើឈ្លានពា.នរបស់ខ្លួន ទើបហ៊ានស្នើឱ្យបារាំងប្រកាន់ជំហរកណ្តាលក្នុងរឿងវិវាទព្រំដែនកម្ពុជា-ថៃ បន្ទាបពី សម្តេចធិបតីនាយករដ្ឋមន្ត្រីកម្ពុជាបានទម្លាយយការពិតប្រាប់ពិភពលោកតាមបណ្តាញសារព័ត៌មានធំៗលើអន្តរជាតិ និងក្រោយការស្នើសុំឱ្យភាគីបារាំងមកជួយដោះស្រាយរឿងព្រំដែន ស្រាប់តែថៃស្រែកឡាំប៉ា គ្មានដឹងខុសត្រូវ រកលេសចោទកម្ពុជាសព្វបែបយ៉ាង សូម្បីតែផ្សែងពុល ភ្លើងឆេះព្រៃ ។ល។ តែពេលនេះ បែរជាស្នើឱ្យបារំងប្រកាន់ជំហរកណ្តាល នេះបានចំជាដូចពាក្យខ្មែរថា “ក្របីដំបៅខ្នង ក្អែកហើររំលង រំសាយកន្ទុយ” មិនខុសមែន ។

បន្ទាប់ពីសារព័ត៌មានអន្តរជាតិធំៗ និងសារព័ត៌មានបារាំងផ្សព្វផ្សាយការពិតពីទង្វើឈ្លា.នពានរបស់ថៃដណ្តើមកាន់កាប់ទឹកដីកម្ពុជាខុសច្បាប់ ដោយកងទ័ពថៃបន្តធ្វើសកម្មភាពពង្រាយកុងទឺន័រ និងបន្លាលួសនៅតាមបណ្តោយព្រំដែនប្រទេសទាំងពីរ ធ្វើឱ្យរដ្ឋមន្ត្រីក្រសួងការបរទេសថៃដេកមិនលក់ បក់មិនល្ហើយ ក៏ធ្វើដំណើរទៅទីក្រុងប៉ារីស ប្រទេសបារាំងភ្លាមៗ ដើម្បីឱ្យបារាំងប្រកាន់គោលជំហរកណ្តាលក្នុងវិវាទព្រំដែនរវាងកម្ពុជា-ថៃ និងព្យាយាមនិយាយលាក់បាំងទង្វើអាក្រក់របស់ខ្លួន ។

កាលពីថ្ងៃទី២៣ ខែកុម្ភៈ ឆ្នាំ២០២៦ រដ្ឋមន្ត្រីក្រសួងការបរទេសថៃ លោក Sihasak Phuangketkeow បានពិភាក្សាទ្វេភាគីជាមួយរដ្ឋមន្ត្រីក្រសួងកិច្ចការអឺរ៉ុប និងការបរទេសរបស់បារាំង លោក Jean-Noël Barrot ក្នុងឱកាសធ្វើដំណើរទៅទីក្រុងប៉ារីស ដើម្បីស្នើឱ្យបារាំងប្រកាន់គោលជំហរកណ្តាលក្នុងវិវាទព្រំដែនជាមួយកម្ពុជា ព្រមទាំងលើកឡើងពីការពង្រឹងទំនាក់ទំនងរវាងបារាំង-ថៃ រយៈពេល១៧០ឆ្នាំ ។

ក្នុងជំនួបនេះ ភាគីទាំងពីរបានលើកឡើងពីការពង្រឹងទំនាក់ទំនងទ្វេភាគីឱ្យកាន់តែជិតស្និទ្ធ និងយូរអង្វែង ជាពិសេស ការធ្វើដំណើរទស្សនកិច្ចទៅវិញទៅមករបស់មន្ត្រីជាន់ខ្ពស់ប្រទេសទាំងពីរ ក៏ដូចជាការពង្រឹងកិច្ចសហការលើកកម្ពស់ទំនាក់ទំនងទៅជាភាពដៃគូយុទ្ធសាស្ត្រ, ពង្រឹងទំនាក់ទំនងការទូត និងផ្លាស់ប្តូរវប្បធម៌រវាងគ្នា ។

ភាគីទាំងពីរក៏បានពិភាក្សាពីសន្តិសុខក្នុងតំបន់អាស៊ីអាគ្នេយ៍ដែលជាប្រធានបទសំខាន់ ដោយលោក Sihasak ស្នើឱ្យបារាំងប្រកាន់គោលជំហរកណ្តាលក្នុងវិវាទព្រំដែនរវាងកម្ពុជា-ថៃ និងសរសើរបារាំងក្នុងការជំរុញសន្តិភាព និងស្ថិរភាពនៅព្រំដែនកម្ពុជា-ថៃ ។ លោក Sihasak ក៏បានលើកឡើងពីការបង្ក្រាបការឆបោកអនឡាញក្នុងតំបន់ផងដែរ ជាពិសេស បង្ក្រាបបទល្មើសអនឡាញនៅប្រទេសថៃ ។

ក្រៅពីនេះ លោក Sihasak បានផ្តល់សម្ភាសន៍ជាមួយសារព័ត៌មានបារាំង France 24 ដោយលោកព្យាយាមនិយាយបិទបាំងពីទង្វើឈ្លានពានរបស់ថៃមកលើកម្ពុជា ថាថៃមិនបានកាន់កាប់ទឹកដីកម្ពុជាដោយខុសច្បាប់ទេ ហើយលោកថែមទាំងចោទប្រកាន់ថា កម្ពុជាពង្រីកជម្លោះជាមួយថៃមកកាន់អន្តរជាតិ ។

ជាការឆ្លើយតបទៅនឹងសារព័ត៌មានបារាំង France 24 ដែលរាយការណ៍ថា កម្ពុជា និងថៃ បានចុះហត្ថលេខាលើកិច្ចព្រមព្រៀងឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ បន្ទាប់ពីកងថៃបើកការធ្វើសង្គ្រាមឈ្លានពានកម្ពុជាលើកទី២ ដែលសង្គ្រាមនេះធ្វើឱ្យពលរដ្ឋកម្ពុជាជាច្រើនគ្រួសារត្រូវជម្លៀសចេញពីផ្ទះសម្បែង គឺលោក Sihasak ថា កិច្ចព្រមព្រៀងឈប់បាញ់នេះផុយស្រួយនៅឡើយ ។

គួរបញ្ជាក់ថា ថៃកំពុងតែបារម្ភខ្លាចបារាំងប្រគល់ឯកសារដែលមានអាយុកាលរាប់រយឆ្នាំឱ្យកម្ពុជាទាក់ទងនឹងខ្សែបន្ទាត់ព្រំដនរវាងកម្ពុជា-ថៃដើម្បីដោះស្រាយវិវាទព្រំដែន ពីព្រោះថៃមិនចង់ប្រគល់ទឹកដីដែលខ្លួនកាន់កាប់ខុសច្បាប់ឱ្យកម្ពុជាវិញទេ ។ ថៃប្រញាប់ហោះទៅបារាំងភ្លាមៗដើម្បីព្យាយាមនិយាយលុបលាងទោសកំហុសរបស់ខ្លួន បន្ទាប់ពីសារព័ត៌មានអន្តរជាតិធំៗបកអាក្រាតមុខមាត់អាក្រក់របស់ថៃ ៕