សហរដ្ឋអាមេរិក ៖ ក្រុមអ្នកជំនាញមកពីសាកលវិទ្យាល័យ Stanford សហរដ្ឋអាមេរិក បានផលិតវ៉ាក់សាំងដោយពុំចាំបាច់ចាក់ចូលក្នុងសាច់ គឺគ្រាន់តែយកមកលាបពីលើស្បែកប៉ុណ្ណោះ វានឹងមានប្រសិទ្ធភាពជាងការចាក់ប្រើប្រាស់ម្ជុល ក្រោយពីក្រុមអ្នកជំនាញសាកល្បងវ៉ាក់សាំងជាមួយសត្វកណ្តុរ ។ ជំហ៊ានបន្ទាប់ នឹងសាកល្បងវ៉ាក់សាំងជាមួយស្វា មុនពេលសាកល្បងជាមួយមនុស្ស ។

វ៉ាក់សាំង គឺជាអាវុធដ៏សំខាន់របស់មនុស្សសម្រាប់ប្រឆាំងនឹងជំងឺផ្សេងៗ ប៉ុន្តែត្រូវប្រើប្រាស់ម្ជុលចាក់វ៉ាក់សាំងចូលរាងកាយ ហើយវានឹងមានផលប៉ះពាល់សុខភាពយ៉ាងច្រើន ។ ហេតុនេះ ធ្វើឱ្យមនុស្សភាគច្រើនបដិសេធពុំចាក់វ៉ាក់សាំង ជាពិសេស អ្នកខ្លាចម្ជុល ។

កាលពីថ្ងៃទី២៥ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា ក្រុមអ្នកជំនាញមកពីសាកលវិទ្យាល័យ Stanford សហរដ្ឋអាមេរិក បានរកឃើញបាក់តេរីម្យ៉ាងនៅលើស្បែក ដែលអាចជួយការពារប្រព័ន្ធរាងកាយ ។ ដូច្នេះ ក្រុមអ្នកជំនាញក៏បានកែប្រែហ្សែនទៅជាវ៉ាក់សាំងសម្រាប់លាបលើស្បែក (ស្រដៀងនឹងឡេ) ហើយពេលលាបលើស្បែករួច វានឹងមានប្រសិទ្ធភាពជាងការចាក់ដោយម្ជុល ។

បាក់តេរី Staphylococcus Epidermidis អាចរស់នៅលើរន្ធស្បែករបស់មនុស្ស ព្រមទាំងប្រឆាំងការឆ្លងជំងឺគ្រុនផ្តាសាយ ។ ក្រុមអ្នកជំនាញបានយកបាក់តេរីនេះលាបពីលើក្បាលកណ្តុរ រយៈពេល៦សប្តាហ៍ក្រោយមក គឺអង់ទីគ័ររបស់កណ្តុរកើនឡើងខ្ពស់ជាងការចាក់វ៉ាក់សាំង ខណៈការសាកល្បងដោយប្រើឈាមមនុស្ស ក៏បង្ហាញលទ្ធផលស្រដៀងគ្នាដែរ ។

បាក់តេរីនេះមានប្រូតេអ៊ីនហៅថា Aap ដែលទទួលបំណែកប្រូតេអ៊ីនពីក្រៅរាងកាយផ្តល់មកឱ្យប្រព័ន្ធការពាររាងកាយ និងជំរុញឱ្យអង់ទីករ IgG និ JgA កើនឡើង ។ ក្រុមអ្នកស្រាវជ្រាវបានយកវាមកផលិតជាវ៉ាក់សាំងសម្រាប់លាបកណ្តុរ ដោយកណ្ដុរអាចផលិតអង់ទីគ័រការពារតេតាណូសកម្រិតខ្ពស់ និងរួចផុតពីសេចក្តីស្លាប់ ក្រោយការចាក់ថ្នាំពុលតេតាណូសកម្រិតខ្លាំង ។ បន្ទាប់មក ក្រុមអ្នកជំនាញបានសាកល្បងលើជំងឺខាន់ស្លាក់ឃើញថា ក្រោយពីលាបវ៉ាក់សាំងនេះរួច គឺកណ្តុរអាចផលិតអង់ទីគ័រការពារជំងឺខាន់ស្លាក់យ៉ាងច្រើន ។

ជំហ៊ានបន្ទាប់ ក្រុមអ្នកជំនាញនឹងសាកល្បងវ៉ាក់សាំងជាមួយស្វា បើជោគជ័យ ពួកគេនឹងសាកល្បងជាមួយមនុស្សបន្តទៀត ។ ក្រុមអ្នកជំនាញរំពឹងថា វ៉ាក់សាំងនេះនឹងមានប្រសិទ្ធភាពខ្ពស់អាចការពារជំងឺផ្សេងៗ និងគ្មានផលប៉ះពាល់សុខភាព ដូចការចាក់វ៉ាក់សាំងប្រើប្រាស់ម្ជុល ៕

ប្រទេសថៃ ៖ ក្នុងឱកាសអញ្ជើញជាប្រធានបើកគម្រោង «Thailand Summer Festivals» នៅវិមានរដ្ឋាភិបាល កាលពីថ្ងៃទី២៦ ខែកុម្ភៈ ឆ្នាំ២០២៥ លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃថ្លែងថា រដ្ឋាភិបាលថៃនឹងរៀបចំពិធីបុណ្យសង្ក្រាន្តយ៉ាងអធិកអធមជាងបណ្តាឆ្នាំមុនៗ ដើម្បីទាក់ទាញភ្ញៀវទេសចរមកពីជុំវិញពិភពលោក ឱ្យបានចំនួន៣៨លាននាក់ ។ លោកស្រីបានសំណូមពរឱ្យពលរដ្ឋគ្រប់រូបស្វាគមន៍ និងធ្វើជាម្ចាស់ផ្ទះដ៏ល្អដើម្បីទាក់ទាញចំណាប់អារម្មណ៍ភ្ញៀវទេសចរ និងបង្កើនចំណូលចូលជាតិ ។

នៅឆ្នាំ២០២៥ រដ្ឋាភិបាលថៃនឹងរៀបចំពិធីបុណ្យសង្ក្រាន្តយ៉ាងអធិកអធម ដោយបង្កើនវិធានការការពារសុវត្ថិភាពដើម្បីឱ្យភ្ញៀវទេសចរជាតិ និងអន្តរជាតិឱ្យទទួលបានបទពិសោធន៍ល្អក្នុងដំណើរកម្សាន្ត ហើយសូមពលរដ្ឋចូលរួមចំណែកជំរុញសេដ្ឋកិច្ចជាតិ ។ រដ្ឋាភិបាលមានបំណងឱ្យវិស័យទេសចរណ៍ជំរុញសេដ្ឋកិច្ច ដែលស្មើជាង១៤% នៃផលិតផលក្នុងស្រុកសរុប (GDP) ដោយកំណត់ឱ្យថៃក្លាយជាគោលដៅទេសចរណ៍គ្រប់រដូវកាល តាមរយៈការរៀបចំពិធីបុណ្យផ្សេងៗឱ្យភ្ញៀវទេសចរមកកម្សាន្តនៅទីក្រុងតូច-ធំ ហើយពលរដ្ឋក៏ទទួលបានចំណូលពីភ្ញៀវទេសចរដែរ ។ នេះបើតាមការលើកឡើងរបស់លោកស្រី ផេថងថាន ។

ថៃនឹងរៀបចំពិធីបុណ្យ «Maha Songkran World Water Festival 2025» នៅទីធ្លាខាងមុខព្រះបរមរាជវាំង ទីក្រុងបាងកក ចាប់ពីថ្ងៃទី១១ ដល់ថ្ងៃទី១៥ ខែមេសា ឆ្នាំ២០២៥ ហើយពិធីបុណ្យនេះនឹងបង្ហាញពីប្រពៃណីសង្ក្រាន្តនៅថៃ ដែលចុះបញ្ជីជាបេតិកភណ្ឌពិភពលោករបស់អង្គការយូណេស្កូ ឈានទៅពិធីបុណ្យលំដាប់ពិភពលោក ។ កាលពីឆ្នាំ២០២៤ ភ្ញៀវទេសចរជាង១លាន៥សែននាក់ បានមកដើរលេងក្នុងពិធីបុណ្យសង្ក្រាន្ត កើនឡើងលើសឆ្នាំ២០២៣ ប្រមាណ៤០% ។

ក្រៅពីនេះ ថៃនឹងរៀបចំពិធីបុណ្យប្រពៃណី ចំនួន៧ នៅក្រោមគំនិត «7 Months 7 Wonders Summer Festivals» រួមមាន ៖ ពិធីបុណ្យសង្ក្រាន្ត, ពិធីបុណ្យ Pride, ពិធីបុណ្យវប្បធម៌, តន្ត្រី, កីឡា, ម្ហូបអាហារ ព្រមទាំងពិធីបុណ្យសិល្បៈ និងការច្នៃប្រឌិត ។ ថៃសង្ឃឹមថា ពិធីបុណ្យទាំងនេះនឹងទាក់ទាញឱ្យភ្ញៀវទេសចរបរទេសមកកម្សាន្តនៅថៃកាន់តែច្រើនក្នុងរយៈពេល៧ខែ គឺចាប់ពីខែមីនា ដល់ខែកញ្ញា ឆ្នាំ២០២៥ ដែលរៀបចំពិធីបុណ្យដោយរដ្ឋមន្ត្រីក្រសួងទេសចរណ៍ និងកីឡា, រដ្ឋមន្ត្រីក្រសួងពាណិជ្ជកម្ម, រដ្ឋមន្ត្រីក្រសួងមហាផ្ទៃ, រដ្ឋមន្ត្រីក្រសួងវប្បធម៌ និងមន្ត្រីស្ថាប័នពាក់ព័ន្ធ ។

ថៃនឹងបង្កើនចំនួនភ្ញៀវទេសចរឱ្យច្រើនដូចអំឡុងពេលមុនជំងឺកូវីដ-១៩ ឆ្លងរាតត្បាត ដើម្បីបង្កើនចំណូលពីវិស័យទេសចរណ៍ ខណៈខេត្តនានាត្រូវបង្ហាញពីភាពលេចធ្លោពិសេស និងរៀបចំពិធីបុណ្យឱ្យកាន់តែធំជារៀងរាល់ឆ្នាំ ទើបអាចជំរុញសេដ្ឋកិច្ចតំបន់ និងជាតិ ។ ពលរដ្ឋគ្រប់រូបជា Soft Power ដ៏សំខាន់បំផុតរបស់ប្រទេស ដោយការស្វាគមន៍ រាក់ទាក់ និងបំពេញតួនាទីជាម្ចាស់ផ្ទះដ៏ល្អជាមួយភ្ញៀវទេសចរ ៕

ប្រទេសថៃ ៖ សារព័ត៌មានថៃរាយការណ៍ថា មានហេតុការណ៍កើតឡើងនៅកណ្តាលសមុទ្រប្រទេសថៃ គឺទូកវៀតណាម ចំនួន១០គ្រឿង បានលួ.ចចូលនេសាទក្នុងសមុទ្រថៃ ហើយទូកឆ្មាំសមុទ្រថៃក៏តាមចាប់ទូកទាំងនេះ ប៉ុន្តែចាប់បានតែ១គ្រឿងប៉ុណ្ណោះ ខណៈទូកផ្សេងទៀតបើករត់ ។ ទូកវៀតណាម១គ្រឿងនេះ ក៏បើកគេចដែរ ប៉ុន្តែគេចមិនទាន់ ក៏ជ្រុលទៅបុកទូកឆ្មាំសមុទ្រថៃ ធ្វើឱ្យឆ្មាំសមុទ្រថៃចាប់ទូកវៀតណាម១គ្រឿងនេះបាន ព្រមទាំងជនជាតិវៀតណាម ៤នាក់ នាំមកកាន់កំពង់ផែ ។

ហេតុការណ៍នេះបានកើតឡើងកាលពីថ្ងៃទី២៥ ខែកុម្ភៈ ឆ្នាំ២០២៥ នៅបរិវេណកំពង់ផែអានេកប្រាស៊ុងឃ្លងយ៉ៃ ស្ថិតនៅស្រុកឃ្លងយ៉ៃ ខេត្តត្រាត ។ ទូកឆ្មាំសមុទ្រថៃបានអូសទូកនេសាទវៀតណាម ១គ្រឿង ព្រមទាំងនាំខ្លួនជនជាតិវៀតណាម៤នាក់ មកកាន់កំពង់ផែអានេកប្រាស៊ុងឃ្លងយ៉ៃ ក្រោយពីឆ្មាំសមុទ្រថៃចាប់បាននៅសមុទ្រថៃ ។

លោក អាផា ឆាផាណុន នាយកមជ្ឈមណ្ឌលការពារផលប្រយោជន៍ជាតិសមុទ្រ និយាយថា មជ្ឈមណ្ឌលការពារផលប្រយោជន៍ជាតិសមុទ្របានសហការជាមួយបញ្ជាការដ្ឋានការពារព្រំដែនទឹកខេត្តចាន់បុរី និងត្រាត ព្រមទាំងមន្ត្រីពាក់ព័ន្ធ ចាប់ទូកនេសាទវៀតណាមដែលឈ្លានពានចូលមកនេសាទក្នុងដែនទឹកថៃ ។

កាលពីថ្ងៃទី២៤ ខែកុម្ភៈ ឆ្នាំ២០២៤ មជ្ឈមណ្ឌលការពារផលប្រយោជន៍ជាតិសមុទ្រ បានទទួលដំណឹងថា មានទូកនេសាទបរទេសចំនួន១០គ្រឿង លួចចូលនេសាទក្នុងដែនទឹកថៃ តាំងពីថ្ងៃទី២២ ខែកុម្ភៈ មកម៉្លេះ ។ ពួកគេធ្វើសកម្មភាពរៀងរាល់យប់ ហើយពេលថ្ងៃឡើងសម្រាក ដើម្បីកុំឱ្យឆ្មាំសមុទ្រថៃចាប់បាន ។

ហេតុនេះ មជ្ឈមណ្ឌលការពារផលប្រយោជន៍ជាតិសមុទ្រ ក៏បានសុំការសហការពីមន្ត្រីពាក់ព័ន្ធបញ្ជូនទូកមកកាន់កំពង់ផែអានេកប្រាស៊ុងឃ្លងយ៉ៃ ដើម្បីចាប់ទូកនេសាទវៀតណាម ។ ប៉ុន្តែថៃចាប់បានទូកវៀតណាមតែ១គ្រឿង រីឯទូកផ្សេងៗបានបើកគេចយ៉ាងឆាប់រហ័ស ។ ទូកនេសាទវៀតណាម១គ្រឿងដែលថៃចាប់បាន គឺបើកគេចពុំទាន់ ក៏ជ្រុលទៅបុកទូកឆ្មាំសមុទ្រថៃផ្នែកខាងស្តាំ ធ្វើឱ្យថៃចាប់បានជនជាតិវៀតណាម ៤នាក់ ដែលជិះលើទូកនេះ ។

មុនការចាប់ទូកនេសាទវៀតណាម ឆ្មាំសមុទ្រថៃបានបាញ់កាំភ្លើងគំរាមពួកគេ ចាប់ពីពេលនេះទៅ ឆ្មាំសមុទ្រថៃនឹងយាមល្បាត និងចាត់វិធានការកាន់តែតឹងរ៉ឹងជាងមុន ។ កន្លងមក ទូកនេសាទវៀតណាមបានលួចចូលនេសាទក្នុងសមុទ្រថៃជាញឹកញាប់ ហើយឆ្មាំសមុទ្រថៃចាប់បានជាបន្តបន្ទាប់ ប៉ុន្តែពួកគេនៅតែលួចចូលមកទៀត ។ ជំហ៊ានបន្ទាប់ ឆ្មាំសមុទ្រថៃនឹងជូនដំណឹងទៅរដ្ឋាភិបាល និងក្រសួងការបរទេសថៃ ឱ្យទាក់ទងទៅរដ្ឋាភិបាលវៀតណាម ដើម្បីកុំឱ្យពលរដ្ឋខ្លួនធ្វើបែបនេះ ៕

ប្រទេសកាណាដា ៖ យើងអាចគិតថាវាមិនសំខាន់ តែវាជាការអាម៉ា.ស់ សម្រាប់ជីវិត និងកិត្តិយសរបស់លោក Elon Musk ប្រឈមនឹងការដកសញ្ជាតិកាណាដាមិនធ្លាប់មានកន្លងមក ។ តើមានមូលហេតុអ្វីបានជាពលរដ្ឋកាណាដា ជាង២សែននាក់ តវ៉ាដកលោកចេញពីសញ្ជាតិកាណាដា?

សារព័ត៌មានបរទេសរាយការណ៍ថា ពលរដ្ឋកាណាដា ជាង២សែននាក់ បានចុះហត្ថលេខានៅលើញត្តិផ្ញើទៅកាន់រដ្ឋសភា ដើម្បីដកសញ្ជាតិកាណាដាពីលោក Elon Musk មហាសេដ្ឋីបច្ចេកវិទ្យាលំដាប់ពិភពលោក ក្រោយពីលោកគាំទ្រប្រធានាធិបតីអាមេរិក លោក Donald Trump ក្នុងការដាក់បញ្ចូលប្រទេសកាណាដា ជារដ្ឋទី៥១ របស់សហរដ្ឋអាមរិក ។ លោក Elon Musk ធ្វើឱ្យពលរដ្ឋកាណាដាស្អ.ប់ និងលែងត្រូវការឱ្យលោកធ្វើជាពលរដ្ឋកាណាដាបន្តទៀត ។

វាបានក្លាយជារឿងធំ ក្រោយពី Qualia Reed អ្នកនិពន្ធមកពីខេត្ត British Columbia របស់កាណាដា បានដាក់ញត្តិផ្លូវការមួយទៅរដ្ឋសភាកាណាដា កាលពីថ្ងៃទី២០ ខែកុម្ភៈ ឆ្នាំ២០២៥ ដើម្បីស្នើឱ្យលោក Justin Trudeau នាយករដ្ឋមន្ត្រីកាណាដា ដកសញ្ជាតិកាណាដា និងលិខិតឆ្លងដែនរបស់លោក Elon Musk ។ ការដកសញ្ជាតិនេះ ដោយសារលោកនិយាយគំរាមអធិបតេយ្យភាពកាណាដា និងប្រព្រឹត្តទង្វើប៉ះពាល់ផលប្រយោជន៍ជាតិ ។

ញត្តិស្នើដកសញ្ជាតិកាណាដាពីលោក Elon Musk គឺទទួលបានការគាំទ្រពីសមាជិកសភាគណបក្ស New Democratic ផងដែរ ។ ពីដំបូង ញត្តិនេះមានអ្នកគាំទ្រតែ៥០០នាក់ប៉ុណ្ណោះ ប៉ុន្តែក្រោយមក អ្នកគាំទ្របានកើនឡើងរហូតដល់ជាង២សែននាក់ ។

ខ្លឹមសាររបស់ញត្តិបញ្ជាក់ថា លោក Elon Musk បានចូលរួមសកម្មភាពផ្ទុយនឹងផលប្រយោជន៍ជាតិរបស់កាណាដា ដោយសារលោកបំពេញតួនាទីជាទីប្រឹក្សាលោក Trump ដែលជាបុគ្គលមើលងាយពលរដ្ឋកាណាដា ចំនួន៤០លាននាក់ ។ លោក Elon Musk ថែមទាំងគំរាមដំឡើងពន្ធទំនិញកាណាដាដែលនាំចូលអាមេរិក ក្នុងអត្រាខ្ពស់ទៀតផង ។

ខ្លឹមសារញត្តិបញ្ជាក់ទៀតថា លោក Elon Musk គាំទ្រលោក Trump ដែលធ្វើឱ្យលោកក្លាយជាសមាជិករដ្ឋាភិបាលអាមេរិក ដែលព្យាយាមល្មើសអធិបតេយ្យភាពកាណាដា ខណៈលោក Trump និយាយជាច្រើនលើកថា នឹងរួមបញ្ចូលកាណាដា ជារដ្ឋទី៥១ របស់សហរដ្ឋអាមេរិក ។ ហេតុនេះ ធ្វើឱ្យពលរដ្ឋកាណាដា ជាង២សែននាក់ ស្នើទៅនាយករដ្ឋមន្ត្រីកាណាដា លោក Trudeau ឱ្យដកហូតលិខិតឆ្លងដែន និងសញ្ជាតិកាណាដារបស់លោក Elon Musk ។

គួរបញ្ជាក់ថា លោក Elon Musk បានកើតនៅទីក្រុង Pretoria ប្រទេសអាហ្វ្រិកខាងត្បូង ហើយលោកទទួលបានសញ្ជាតិអាហ្វ្រិកខាងត្បូងតាមឪពុក
និងទទួលសញ្ជាតិកាណាដាតាមម្តាយ គឺម្តាយរបស់លោក កើតនៅខេត្ត Saskatchewan ប្រទេសកាណាដា ។ នៅឆ្នាំ២០០២ លោកក៏ទទួលបានសញ្ជាតិអាមេរិក ។ យើងនឹងរង់ចាំតាមដានបន្តថា តើនឹងមានអ្វីកើតឡើងលើមហាសេដ្ឋីរូបនេះ ព្រមទាំងទំនាក់ទំនងរវាងសហរដ្ឋអាមេរិក និងកាណាដា ទៅជាយ៉ាងណា?

ប្រទេសចិន ៖ ស្ត្រីចិនម្នាក់ហ៊ានដាច់ចិត្តយកខោលីអូសង្សាររបស់ខ្លួន មកត្រាំក្នុងថ្នាំកម្ចាត់ស្មៅ (Paraquat) ដែលមានផលប៉ះពាល់សុខភាពខ្លាំងសម្រាប់មនុស្ស និងសត្វ ។ ប៉ុន្តែដោយសារឃើញសង្សារគ្មានគ្រោះថ្នា.ក់ នាងក៏ដាក់ថ្នាំពុ.ល ក្នុងទឹកសេរ៉ូផ្តាសាយឱ្យសង្សារផឹករហូតដល់ស្លា.ប់ ដោយសារសេពគប់គ្នាយូរហើយ សង្សារពុំព្រមសុំនាងរៀបការ ។

កាលពីថ្ងៃទី២៥ ខែកុម្ភៈ ឆ្នាំ២០២៥ សារព័ត៌មានបរទេសរាយការណ៍ថា នារីចិនម្នាក់បានសងសឹកសង្សារពោះម៉ាយរបស់ខ្លួន ដោយសារនាង និងសង្សារបានសេពគប់គ្នាយូរមកហើយ ប៉ុន្តែសង្សារពុំព្រមសុំនាងរៀបការសោះ ។ អ្នកទាំងពីរបានស្រឡាញ់គ្នាតាំងពីឆ្នាំ២០១១ មកម៉្លេះ គឺពេលម្តាយនាងទៅរកសង្សារនាង ដែលជាគ្រូទាយ ឱ្យជួយទាយពាក់ព័ន្ធនឹងសុខភាពរបស់គាត់ ។

ចាប់ពីពេលនោះមក នាង និងសង្សារ ក៏បានទាក់ទងគ្នា យល់ចិត្តយល់ថ្លើម រហូតដល់មានទំនាក់ទំនងស៊ីជម្រៅ ។ នាងមានផ្ទៃពោះជាមួយសង្សារ ប៉ុន្តែទារកបានរលូតពីក្នុងផ្ទៃ ។ ពេលនាងនិយាយពីរឿងរៀបការ បុរសជាសង្សារចេះតែនៅស្ងៀមរហូត និងពុំព្រមសុំនាងរៀបការទេ បើទោះជានាងបានរស់នៅជាមួយគ្នារហូតមានផ្ទៃពោះក្តី ។

ហេតុនេះ នាងក៏បានយកខោលីអូរបស់សង្សារ ចំនួន៤ មកត្រាំក្នុងថ្នាំកម្ចាត់ស្មៅ (Paraquat) ដែលមានផលប៉ះពាល់សុខភាពខ្លាំងសម្រាប់មនុស្ស និងសត្វ រួចហើយ នាងក៏យកលីអូទាំង៤ ទៅឱ្យសង្សារស្លៀក នៅឆ្នាំ២០១៧ ហើយសង្សាររបស់នាង ក៏ចេញដំបៅដោយសារស្លៀកលីអូប្រឡាក់ថ្នាំពុល ។ ប៉ុន្តែដោយសារឃើញសង្សារគ្មានគ្រោះថ្នាក់ដល់ជីវិត នាងក៏ដាក់ថ្នាំពុលក្នុងទឹកសេរ៉ូផ្តាសាយឱ្យផឹកទៀត ។

សង្សារនាង បានស្លាប់នៅមន្ទីរពេទ្យ ពេលបញ្ជូនមកបន្ទប់សង្គ្រោះបន្ទាន់មិនយូរប៉ុន្មាន ។ រីឯកូនស្រីសង្សាររបស់នាង ពុំដឹងថាឪពុកស្លាប់ដោយសារមូលហេតុអ្វីទេ ហើយកើតការសង្ស័យ ទើបដាក់ពាក្យបណ្តឹងទៅសមត្ថកិច្ចឱ្យជួយស្រាវជ្រាវរកមូលហេតុនៃការស្លាប់នេះ ។ ក្រោយការស្រាវជ្រាវរបស់សមត្ថកិច្ច ទើបដឹងថា សង្សាររបស់ឪពុក គឺជាអ្នកប្រព្រឹត្តផ្ទាល់ដៃ ។

តុលាការក្នុងតំបន់បានកាត់ក្តីឱ្យស្ត្រីខាងលើជាប់ពន្ធនាគាររយៈពេល១៤ឆ្នាំ ពីបទសម្លាប់មនុស្សដោយចេតនា ប៉ុន្តែរយៈពេលប៉ុន្មានខែចុងក្រោយនេះ នាងបានដាក់ពាក្យបណ្តឹងទៅតុលាការឧទ្ធរណ៍ ចំនួន២លើក ។ ទោះយ៉ាងណា តុលាការក្នុងតំបន់បានច្រានចោលសាលក្រមរបស់តុលាការឧទ្ធរណ៍ ហើយសម្រេចអនុវត្តតាមសាលក្រមចាស់ ៕