មេដឹកនាំអ៊ុយក្រែន លោក Volodymyr Zelenskyy កាលពីថ្ងៃទី៨ ខែមេសា ឆ្នាំ២០២៦ បានបង្ហោះសារគាំទ្របទឈប់បា.ញ់រវាងអាមេរិក និងអ៊ីរ៉ង់ ហើយលោកចង់មានបទឈប់បា.ញ់ជាមួយរុស្ស៊ីដែរ ជាពិសេស ចង់ឱ្យអាមេរិកងាកមកចាប់អារម្មណ៍បញ្ចប់សង្គ្រា.មនៅអ៊ុយក្រែនឡើងវិញ បន្ទាប់ពីស្ថានការណ៍តានតឹងនៅមជ្ឈិមបូព៌ាធូរស្រាល ។ កន្លងមក មានការចរចាត្រីភាគីរវាងអ៊ុយក្រែន រុស្ស៊ី និងអាមេរិក ប៉ុន្តែការចរចារាំងស្ទះដោយសារផ្ទុះសង្គ្រា.មនៅអ៊ីរ៉ង់ ខណៈរុស្ស៊ីទាមទារកាន់កាប់ទឹកដីអ៊ុយក្រែននៅតំបន់ Donbas ។

លោក Zelenskyy បានគាំទ្របទឈប់បាញ់រយៈពេល២សប្តាហ៍រវាងអាមេរិក និងអ៊ីរ៉ង់ ហើយលោកចង់មានបទឈប់បាញ់ជាមួយរុស្ស៊ីដែរ ប្រសិនបើរុស្ស៊ីឈប់វាយប្រហារអ៊ុយក្រែន ពីព្រោះសង្គ្រាមរវាងប្រទេសទាំងពីរបានអូសបន្លាយរហូតដល់ជាង៤ឆ្នាំ ។ ប្រធានាធិបតីអ៊ុយក្រែនចង់ឱ្យអាមេរិក និងពិភពលោក ងាកមកចាប់អារម្មណ៍ការបញ្ចប់សង្គ្រាមនៅអ៊ុយក្រែន បន្ទាប់ពីស្ថានការណ៍តានតឹងក្នុងតំបន់មជ្ឈិមបូព៌ាធូរស្រាល ។

កាសែតសិង្ហបុរី The Straits Times បានរាយការណ៍ដោយដកស្រង់ការបង្ហោះសារក្នុងបណ្តាញសង្គម X របស់ប្រធានាធិបតីអ៊ុយក្រែន លោក Zelenskyy កាលពីថ្ងៃទី៨ ខែមេសា ថា អ៊ុយក្រែនគាំទ្របទឈប់បាញ់នៅមជ្ឈិមបូព៌ា រួមទាំងក្រុមប្រទេសនៅឈូងសមុទ្រអារ៉ាប់ ដើម្បីឈានទៅរកការចរចាសន្តិភាពតាមរយៈការទូត ។

លោក Zelenskyy ថា អ៊ុយក្រែនធ្លាប់កោតសរសើរការសម្រេចចិត្តរបស់អាមេរិកដែលបើកការវាយប្រហារអ៊ីរ៉ង់ជាសម្ព័ន្ធមិត្តជិតស្និទ្ធរបស់រុស្ស៊ី បន្ទាប់ពីអ៊ីរ៉ង់បញ្ជូនដ្រូនឱ្យរុស្ស៊ីវាយប្រហារអ៊ុយក្រែន ក្រោយមក អ៊ុយក្រែនក៏បញ្ជូនកងទ័ពជំនាញជាង២០០នាក់ទៅកាន់មជ្ឈិមបូព៌ាដើម្បីជួយអាមេរិកធ្វើសង្គ្រាមជាមួយអ៊ីរ៉ង់ ។ អ៊ុយក្រែនគាំទ្របទឈប់បាញ់រវាងអាមេរិក និងអ៊ីរ៉ង់ រយៈពេល២សប្តាហ៍ ។

កងទ័ពជំនាញរបស់អ៊ុយក្រែននឹងនៅតែបំពេញភារកិច្ចនៅមជ្ឈិមបូព៌ាបន្តទៀតដើម្បីជំរុញសន្តិសុខក្នុងតំបន់ ។ រីឯសង្គ្រាមរវាងរុស្ស៊ី និងអ៊ុយក្រែន គឺរុស្ស៊ីបានបើកការវាយប្រហារលើពលរដ្ឋអ៊ុយក្រែនតាំងពីខែកុម្ភៈ ឆ្នាំ២០២២ រីឯអ៊ុយក្រែនទាមទារឱ្យមានបទឈប់បាញ់រហូតមក ។

អ៊ុយក្រែនអំពាវនាវជាច្រើនលើកឱ្យរុស្ស៊ីធ្វើកិច្ចព្រមព្រៀងឈប់បាញ់ជារៀងរហូត ដើម្បីឈានទៅចរចាសន្តិភាព ប៉ុន្តែរុស្ស៊ីបានកំណត់លក្ខខណ្ឌការធ្វើបទឈប់បាញ់ លុះត្រាតែបញ្ចប់ផែនការសន្តិភាពគ្រប់ជ្រុងជ្រោយ ។ មេដឹកនាំអ៊ុយក្រែនបាននិយាយពីបទឈប់បាញ់រវាងអាមេរិក និងអ៊ីរ៉ង់ គឺអាចធ្វើឡើងបានមុនការចរចាសន្តិភាព ខុសពីអ៊ុយក្រែន និងរុស្ស៊ី ។

គួរបញ្ជាក់ថា នៅថ្ងៃដែលប្រធានាធិបតីអ៊ុយក្រែនបង្ហោះសារ (ថ្ងៃទី៨ ខែមេសា) ចង់ឱ្យមានបទឈប់បាញ់ជាមួយរុស្ស៊ីនោះ គឺកងទ័ពរុស្ស៊ី និងអ៊ុយក្រែន នៅតែវាយប្រហារគ្នាជាបន្តបន្ទាប់បណ្តាលឱ្យកងទ័ពទាំងសងខាងស្លាប់ និងរងរបួសបន្ថែមទៀត ។

ចំណែកលោក Dmitry Peskov អ្នកនាំពាក្យវិមានក្រឹមឡាំងនៅទីក្រុងមូស្គូ ប្រទេសរុស្ស៊ី ក៏បានបង្ហាញក្តីរីករាយចំពោះការកាត់បន្ថយភាពតានតឹងរវាងអាមេរិក និងអ៊ីរ៉ង់ដែរ ដោយលោកសង្ឃឹមថា ឆាប់ៗនេះ អាមេរិកនឹងមានពេលវេលាចូលរួមក្នុងជំនួបត្រីភាគី (រុស្ស៊ី អ៊ុយក្រែន និងអាមេរិក) ។ រុស្ស៊ីសង្ឃឹមអាមេរិកនឹងវិលមកជួយសម្របសម្រួលការចរចាសន្តិភាពរវាងរុស្ស៊ី -អ៊ុយក្រែន បន្ទាប់ពីជំនួបត្រីភាគីនេះផ្អាកដោយសារផ្ទុះសង្គ្រាមនៅអ៊ីរ៉ង់ ។

បើតាមអ្នកវិភាគ បទឈប់បាញ់រយៈពេល២សប្តាហ៍នឹងធ្វើឱ្យរដ្ឋាភិបាលអាមេរិកងាកមកដោះស្រាយបញ្ចប់សង្គ្រាមនៅអ៊ុយក្រែនឡើងវិញ ខណៈការចរចាមានឧបសគ្គដោយសាររុស្ស៊ីកំណត់លក្ខខណ្ឌឱ្យអ៊ុយក្រែនប្រគល់តំបន់ Donbas ប៉ុន្តែអ៊ុយក្រែនមិនព្រមប្រគល់ទឹកដីខ្លួនទៅឱ្យរុស្ស៊ី ។ ពិភពលោកនឹងរង់ចាំមើលថា តើអាមេរិកអាចបញ្ចប់សង្គ្រាមអូសបន្លាយនៅអ៊ុយក្រែនដែរឬទេ បន្ទាប់ពីផ្អាកសង្គ្រាមនៅមជ្ឈិមបូព៌ា ៕

រដ្ឋាភិបាលអាមេរិកកំពុងពិចារណាដកកងទ័ពដែលប្រចាំការនៅប្រទេសជាសមាជិកអង្គការសន្ធិសញ្ញាអាត្លង់ទិកខាងជើង (NATO) មួយចំនួនដោយសារមិនជួយអាមេរិក និងអ៊ីស្រាអែលធ្វើសង្គ្រា.មប្រឆាំងអ៊ីរ៉ង់ ហើយអាមេរិកគ្រោងបញ្ជូនកងទ័ពទៅប្រចាំការនៅប្រទេសផ្សេងវិញ ។ កន្លងមក លោកប្រធានាធិបតី Donald Trump ខឹងសម្បារសមាជិកអង្គការនេះមិនអនុញ្ញាតឱ្យប្រើប្រាស់មូលដ្ឋានកងទ័ព ទាំងដែលអាមេរិកផ្តល់ថវិកាការពារប្រទេសពួកគេ ។

បើតាមការអះអាងរបស់មន្ត្រីរដ្ឋាភិបាលអាមេរិកជាច្រើនរូប គឺអាមេរិកនឹងដកកងទ័ពដែលប្រចាំការនៅប្រទេសមួយចំនួនជាសមាជិកអង្គការ NATO ដោយសាររដ្ឋាភិបាលអាមេរិកមើលឃើញថា គ្មានប្រយោជន៍ក្នុងការធ្វើសង្គ្រាមប្រឆាំងអ៊ីរ៉ង់ ហើយអាមេរិកនឹងបញ្ជូនកងទ័ពរបស់ខ្លួនទៅប្រចាំការនៅប្រទេសផ្សេងវិញដែលគាំទ្រប្រតិបត្តិការកងទ័ពអាមេរិក ។ នេះបើតាមចុះផ្សាយរបស់កាសែត Wall Street Journal កាលពីថ្ងៃទី៨ ខែមេសា ឆ្នាំ២០២៦ ។

ទោះយ៉ាងណា គម្រោងដកទ័ពអាមេរិកចេញពីសមាជិកអង្គការ NATO មួយចំនួន គឺមិនធ្ងន់ធ្ងរដូចការគំរាមជាញឹកញាប់របស់លោកប្រធានាធិបតី Trump ពាក់ព័ន្ធនឹងការដកអាមេរិកចេញពីអង្គការ NATO នោះទេ ប៉ុន្តែលោកអាចដកអាមេរិកចេញបាន លុះត្រាតែមានការយល់ព្រមពីរដ្ឋសភា ។

អាមេរិកគ្រោងដកកងទ័ពចេញពីសមាជិកអង្គការ NATO ស្របពេលលោកប្រធានាធិបតី Trump ជួបជាមួយលោក Mark Rutte អគ្គលេខាធិការអង្គការ NATO នៅសេតវិមានកាលពីថ្ងៃទី៨ ខែមេសា ខណៈសង្គ្រាមនៅអ៊ីរ៉ង់ធ្វើឱ្យរង្គោះរង្គើដល់ទំនាក់ទំនងរវាងអាមេរិក និងសមាជិកអង្គការនេះ ។

លោក Trump ធ្លាប់ប្រកាសដកអាមេរិកចេញពីអង្គការ NATO ដែលមានសមាជិកចំនួន៣២ប្រទេស និងថ្កោលទោសសមាជិកអង្គការមិនគាំទ្រអាមេរិក និងអ៊ីស្រាអែល ក្នុងការវាយប្រហារអ៊ីរ៉ង់ ខណៈមន្ត្រីសេតវិមានថា គួរឱ្យសោកស្តាយណាស់ដែលអង្គការនេះបែរខ្នងដាក់ពលរដ្ឋអាមេរិកក្នុងរយៈពេល៦សប្តាហ៍កន្លងមក ទាំងដែលពលរដ្ឋអាមេរិកបានផ្តល់ថវិកាការពារប្រទេសពួកគេ ។

កន្លងមក លោក Trump បានហៅអង្គការ NATO គឺជាខ្លាក្រដាស ដោយសារមិនជួយសហការបើកច្រកសមុទ្រ Hormuz ព្រមទាំងខឹងសម្បារសមាជិកអង្គការនេះមិនអនុញ្ញាតឱ្យអាមេរិកប្រើប្រាស់មូលដ្ឋានកងទ័ពក្នុងទឹកដីពួកគេ ។

គួរបញ្ជាក់ថា អាមេរិក និងអ៊ីរ៉ង់ បានព្រមព្រៀងឈប់បាញ់រយៈពេល២សប្តាហ៍ ដោយមានលក្ខខណ្ឌឱ្យអ៊ីរ៉ង់បើកច្រកសមុទ្រ Hormuz ដើម្បីឱ្យនាវាដឹកប្រទេសឥន្ធនៈផ្សេងៗឆ្លងកាត់ដោយសុវត្ថិភាព ។ ប៉ុន្តែដោយសារអ៊ីស្រាអែលវាយប្រហារប្រទេសលីបង់យ៉ាងចាស់ដៃរហូតដល់ជាង១០០កន្លែង បណ្តាលឱ្យមនុស្សស្លាប់ជាង២០០នាក់ និងរងរបួសរាប់ពាន់នាក់ អ៊ីរ៉ង់ក៏ប្រកាសបិទច្រកសមុទ្រនេះជាថ្មីក្រោមហេតុផលអ៊ីស្រាអែលមិនគោរពបទឈប់បាញ់ ៕

ទីក្រុងប៉ារីស ប្រទេសបារាំង បានប្រែក្លាយជាទីក្រុងពណ៌បៃតង បន្ទាប់ពីជាច្រើនឆ្នាំមកនេះ អភិបាលក្រុងអនុវត្តគោលនយោបាយកាត់បន្ថយការប្រើប្រាស់រថយន្ត និងបង្កើនផ្លូវជិះកង់ និងថ្មើជើងសាធារណៈ ប៉ុន្តែក៏មានមតិប្រឆាំងពីក្រុមអ្នកនយោបាយ និងអ្នកប្រើប្រាស់រថយន្តផងដែរ ។ ការផ្លាស់ប្តូរមុខមាត់ទីក្រុងធ្វើឱ្យការរស់នៅរបស់ពលរដ្ឋល្អប្រសើរឡើង ដោយសារខ្យល់ពុលធ្លាក់ចុះ ប៉ុន្តែនៅជាយក្រុងវិញនៅតែធ្វើដំណើរតាមរថយន្ត ទើបអ្នកជំនាញបរិស្ថានសំណូមពរឱ្យកែលម្អផ្លូវនៅជាយក្រុងផង បើចង់ឱ្យប៉ារីសសម្រេចគោលដៅក្លាយជាទីក្រុងបៃតង ។

រយៈពេលជាង១០ឆ្នាំមកនេះ ទីក្រុងប៉ារីសបានផ្លាស់ប្តូរមុខមាត់យ៉ាងខ្លាំង គឺពីទីក្រុងដែលសម្បូរដោយរថយន្តចង្អៀតណែនពេញផ្លូវទៅជាទីក្រុងសម្បូរកង់ និងផ្លូវថ្មើជើង ដែលជាការអនុវត្តគោលនយោបាយកាត់បន្ថយចំនួនរថយន្ត និងបង្កើនចំនួនកង់ របស់អតីតអភិបាលក្រុងប៉ារីស អ្នកស្រី Anne Hidalgo ។

ពលរដ្ឋរស់នៅទីក្រុងប៉ារីសប្រាប់ថា កាលពីមុន ពួកគេមិនហ៊ានជិះកង់នៅទីក្រុងទេ ដោយសារស្ទះចរាចរណ៍ខ្លាំងពេក និងគ្មានសុវត្ថិភាព ប៉ុន្តែក្រោយពីទីក្រុងបង្កើតផ្លូវជាច្រើនសម្រាប់ឱ្យពលរដ្ឋជិះកង់ ពួកគេក៏និយមធ្វើដំណើរតាមកង់ឡើងវិញ ។

តាំងពីឆ្នាំ២០១៤ អភិបាលក្រុងប៉ារីសបានអនុវត្តគោលនយោបាយកែលម្អទីក្រុងរហូតមក រួមទាំងដាំដើមឈើរហូតដល់ជាង១សែន ៥ម៉ឺនដើម, បង្កើតផ្លូវជិះកង់រាប់រយគីឡូម៉ែត្រ, កែលម្អផ្លូវនៅមុខសាលារៀនចំនួន៣០០កន្លែងឱ្យក្លាយជាតំបន់គ្មានរថយន្តឆ្លងកាត់ រួមទាំងហាមរថយន្តបើកបរនៅមាត់ទន្លេសែន ។ ក្រៅពីនេះ ចំណតរថយន្តជាច្រើនកន្លែងបានប្រែក្លាយជាតំបន់បៃតង និងមានកន្លែងអង្គុយសម្រាប់ភោជនីយដ្ឋាន ឬហាងកាហ្វេ ដែលធ្វើឱ្យការរស់នៅរបស់ពលរដ្ឋល្អប្រសើរជាងមុន ជាពិសេស កុមារដើរទៅសាលារៀនមានសុវត្ថិភាព ។

បច្ចុប្បន្ន ប៉ារីសបានក្លាយជាទីក្រុងគំរូនៅតំបន់អឺរ៉ុប ដែលអនុវត្តគោលនយោបាយការពារបរិស្ថាន ស្របពេលប្រទេសផ្សេងៗចាប់ផ្តើមបោះបង់គោលនយោបាយនេះ ។ ប៉ុន្តែការអនុវត្តគោលនយោបាយកាត់បន្ថយចំនួនរថយន្តក្នុងទីក្រុងប៉ារីស ក៏មានមតិប្រឆាំងពីក្រុមអ្នកនយោបាយ និងអ្នកប្រើប្រាស់រថយន្តជាច្រើនផងដែរ ។

ការស្រាវជ្រាវបង្ហាញថា ប៉ារីសបានក្លាយជាទីក្រុង១ ក្នុងចំណោមទីក្រុងទាំង១៩ លើពិភពលោក ដែលអាចកាត់បន្ថយខ្យល់ពុលលើអាកាស ចាប់ពីឆ្នាំ២០១០ ដល់ឆ្នាំ២០២៤ ។ ប៉ុន្តែមានបញ្ហាមួយចំនួន គឺទោះជាពលរដ្ឋទីក្រុងប៉ារីសអាចទៅរកសេវាកម្មផ្សេងៗដោយថ្មើជើង ឬជិះកង់ ប៉ុន្តែនៅតំបន់ជាយក្រុងវិញនៅតែប្រើប្រាស់រថយន្តសម្រាប់ធ្វើដំណើរ ហេតុនេះ អ្នកជំនាញបរិស្ថានសំណូមពរឱ្យកែលម្អផ្លូវនៅជាយក្រុងផង បើចង់ឱ្យប៉ារីសសម្រេចគោលដៅក្លាយជាទីក្រុងបៃតង ៕

អាមេរិក និងអ៊ីរ៉ង់ បានព្រមព្រៀងឈប់បា.ញ់រយៈពេល២សប្តាហ៍ក្រោមលក្ខខណ្ឌបើកច្រកសមុទ្រ Hormuz ឱ្យនាវាដឹកប្រេងឥន្ធនៈឆ្លងកាត់ដោយសុវត្ថិភាព ប៉ុន្តែអ៊ីស្រាអែលនៅតែវាយប្រ.ហារទ្រង់ទ្រាយធំលើប្រទេសលីបង់ រហូតដល់ជាង១០០លើក ដែលបណ្តាលឱ្យខ្ទេចខ្ទីរអគារ មនុស្សស្លាប់ជាង២០០នាក់ និងរងរបួសរាប់ពាន់នាក់ ដោយមេដឹកនាំអ៊ីស្រាអែលថា បទឈប់បា.ញ់មិនពាក់ព័ន្ធនឹងការវាយប្រ.ហារ ។ ប៉ុន្តែអ៊ីរ៉ង់ចាត់ទុកការវាយប្រ.ហារនេះ គឺល្មើសនឹងបទឈប់បា.ញ់ និងបដិសេធការចរចាសន្តិភាពជាមួយអាមេរិក ។

អ៊ីរ៉ង់បដិសេធការចរចាសន្តិភាព បន្ទាប់ពីអ៊ីស្រាអែលវាយប្រហារយ៉ាងចាស់ដៃលើប្រទេសលីបង់រហូតដល់ជាង១០០លើកកាលពីថ្ងៃទី៨ ខែមេសា ឆ្នាំ២០២៦ បណ្តាលឱ្យមនុស្សស្លាប់ចំនួន២៥៤នាក់ និងរងរបួសរាប់ពាន់នាក់ ដែលចំណាយពេលវាយប្រហារត្រឹមតែ១០នាទី ។ ទង្វើរបស់អ៊ីស្រាអែលធ្វើឱ្យរង្គោះរង្គើដល់បទឈប់បាញ់រយៈពេល២សប្តាហ៍ ដែលប្រធានាធិបតីអាមេរិក លោក Donald Trump ទើបតែប្រកាសកាលពីថ្ងៃទី៧ ខែមេសា ។

បើតាមភ្នាក់ងារការពារជនស៊ីវិលលីបង់ គឺការវាយប្រហាររបស់អ៊ីស្រាអែលនៅទូទាំងប្រទេសលីបង់កាលពីថ្ងៃទី៨ ខែមេសា បណ្តាលឱ្យមនុស្សស្លាប់ច្រើនបំផុតក្នុងទីក្រុងបេរុត ហើយអ៊ីស្រាអែលពុំបានជូនដំណឹងជាមុនដើម្បីឱ្យពលរដ្ឋជម្លៀសចេញទេ ។ ក្រុមប្រដាប់អាវុធ Hezbollah នៅប្រទេសលីបង់ដែលគាំទ្រពីអ៊ីរ៉ង់ ថាពួកគេបានបាញ់គ្រាប់រ៉ុក្កែតទៅភាគខាងជើងប្រទេសអ៊ីស្រាអែល ដើម្បីសងសឹកអ៊ីស្រាអែលដែលល្មើសបទឈប់បាញ់ ។

ការវាយប្រហាររបស់អ៊ីស្រាអែលមកលើលីបង់ ធ្វើឱ្យអ៊ីរ៉ង់បដិសេធការចរចាសន្តិភាពជាមួយអាមេរិក ដែលអ៊ីរ៉ង់ចាត់ទុកការវាយប្រហារនេះមិនគួរកើតឡើង ។ លោក Mohammad-Bagher Ghalibaf ប្រធានរដ្ឋសភា និងជាប្រធានក្រុមចរចារបស់អ៊ីរ៉ង់ បាននិយាយពីភាពមិនច្បាស់លាស់ក្នុងតំបន់ បន្ទាប់ពីអាមេរិក និងអ៊ីរ៉ង់ កំណត់ការចរចាសន្តិភាពនៅថ្ងៃទី១១ ខែមេសា ដែលមានខ្លឹមសារខុសគ្នា ។

លោកថា អ៊ីស្រាអែលល្មើសបទឈប់បាញ់ជាច្រើនចំណុច ដោយបង្កើនការវាយប្រហារកាន់តែខ្លាំងលើក្រុមប្រដាប់អាវុធ Hezbollah ដែលមានទំនាក់ទំនងជិតស្និទ្ធជាមួយអ៊ីរ៉ង់ ។ រីឯអាមេរិកបានល្មើសបទឈប់បាញ់៣ចំណុច ក្នុងចំណោម១០ចំណុច ។ ស្ថានការណ៍បែបនេះ គឺការឈប់បាញ់ ឬចរចាទ្វេភាគីនឹងមិនកើតឡើងទេ ខណៈរដ្ឋមន្ត្រីក្រសួងការបរទេសអ៊ីរ៉ង់ លោក Abbas Araghchi ថា ការបញ្ចប់សង្គ្រាមនៅលីបង់ គឺជាផ្នែកមួយនៃបទឈប់បាញ់រយៈពេល២សប្តាហ៍ ។

គួរបញ្ជាក់ថា អាមេរិក និងអ៊ីស្រាអែល បានអះអាងពីបទឈប់បាញ់២សប្តាហ៍មិនគ្របដណ្តប់លើលីបង់ទេ ហើយមេដឹកនាំអ៊ីស្រាអែលថែមទាំងមានគម្រោងវាយប្រហារលីបង់គ្រប់ពេលវេលាបន្តទៀត ៕

ថ្មីៗនេះរុស្សុី បានបាញ់មីសុីលលឿនជាងសំលេងរបស់ខ្លួន ទៅលើប្រទេសអ៊ុយក្រែន ដោយចាត់ទុកជាការធ្វើតេស្តសាកល្បង។

កងទ័ពអាកាសអ៊ុយក្រែន បានបញ្ជាក់ថា៖” រុស្សុីបានប្រើមីសុីលនេះ លើកដំបូងក្នុងថ្ងៃទី២១ ខែសីហា ឆ្នាំ២០២៥ ដោយវាយប្រហារលើទីក្រុងគៀវ (Kyiv) ខណៈខែលការពារដែនអាកាសរបស់ខ្លួនមិនអាចស្ទាក់ចាប់មីស៊ីលនេះបាននោះទេ”។
មីសុីលថ្មីនេះ មានឈ្មោះថា”3M22 Zircon” ដែលផលិតឡើងក្នុងគោលបំណងចម្បងបាញ់កម្ទេចនាវាចម្បាំង និងកម្ទេចអគារធំៗនៅទីក្រុង។
វាមានល្បឿនលឿនជាងសំលេងដល់ទៅ៩ដង ឬស្មើនឹង១១០០០គីឡូម៉ែត្រក្នុងមួយម៉ោង និងអាចបាញ់បានក្នុងរយៈចម្ងាយ១០០០គីឡូម៉ែត្រទៅ២០០០គីឡូម៉ែត្រ។
3M22 Zircon មានសមត្ថភាពផ្ទុកក្បាលគ្រាប់នុយក្លេអ៊ែរបានប្រមាណ៣០០គីឡូក្រាម ដែលវាត្រូវបានបាញ់ចេញពីនាវាចម្បាំង នាវាមុជទឹក និងយន្តហោះចម្បាំង៕

Al Jazeera នៅថ្ងៃព្រហស្បត្តិ៍នេះបានរាយការណ៍ថា អ្នកឆ្លើយឆ្លងប្រចាំតំបន់របស់ខ្លួន គឺលោក Mohammed Wishah ត្រូវបានសម្លា.ប់នៅក្នុងការវា.យប្រហារតាមផ្លូវអាកាសរបស់អ៊ីស្រាអែលដែលកំណតគោលដៅលើទីក្រុងហ្គាហ្សា។ នេះជាលើកទី១១ហើយ ដែលទីភ្នាក់ងារ Al Jazeera ត្រូវបានសម្លា.ប់ដោយការវា.យប្រហាររបស់អ៊ីស្រាអែល។

យោងតាមរបាយការណ៍ពី Al Jazeera និងមន្ត្រីមូលដ្ឋាន លោក Wishah ដែលធ្វើការជាអ្នកឆ្លើយឆ្លងព័ត៌មានរបស់ Al Jazeera Mubasher ត្រូវបានសម្លាប់នៅពេលដែលការវាយប្រហារបានកំណត់គោលដៅលើរថយន្តដែលគាត់កំពុងធ្វើដំណើរតាមបណ្តោយផ្លូវឆ្នេរសមុទ្រក្នុងទីក្រុងហ្គាហ្សា។ ការវាយប្រហារនេះត្រូវបានគេរាយការណ៍ថាបានកើតឡើងនៅថ្ងៃពុធ ហើយក៏បានសម្លា.ប់មនុស្សយ៉ាងហោចណាស់ម្នាក់ទៀតនៅក្នុងរថយន្តនោះផងដែរ។

Al Jazeera បានថ្កោលទោ.សយ៉ាងខ្លាំងចំពោះការសម្លា.ប់នេះ ដោយហៅវាថាជា “ឧក្រិដ្ឋកម្មដ៏សាហាវយង់ឃ្នង” និងចោទប្រកាន់អ៊ីស្រាអែលថាបានកំណត់គោលដៅអ្នកកាសែតរបស់ខ្លួនដោយចេតនា ព្រោះកន្លងមកអ៊ីស្រាអែលធ្លាប់បានចោទប្រកាន់ថា លោក Wishah មានទំនាក់ទំនងជាមួយក្រុម Hamas ទាំងដែល Al Jazeera និង Hamas ផ្ទាល់ក៏ធ្លាប់បានបដិសេធ។

ឧប្បត្តិហេតុនេះបង្ហាញពីគ្រោះថ្នាក់កាន់តែខ្លាំងឡើងដែលអ្នកកាសែតប្រឈមមុខនៅក្នុងជម្លោះ។ យោងតាមគណៈកម្មាធិការការពារអ្នកសារព័ត៌មាន មានអ្នកកាសែត និងបុគ្គលិកប្រព័ន្ធផ្សព្វផ្សាយយ៉ាងហោចណាស់ ២៥៦ ទៅ ២៦០ នាក់ ត្រូវបានសម្លា.ប់ចាប់តាំងពីសង្គ្រាមបានផ្ទុះឡើងនៅថ្ងៃទី៧ ខែតុលា ឆ្នាំ២០២៣។ ទោះជាយ៉ាងណាក៏ដោយ តួលេខខ្លះពីប្រភពក្នុងតំបន់បានបង្ហាញថា ចំនួននេះអាចឈានដល់ជិត ៣០០ នាក់។ ទន្ទឹមគ្នានោះផងដែរ ចំនួនបុគ្គលិក Al Jazeera ដែលត្រូវបានសម្លា.ប់ក្នុងអំឡុងពេលបំពេញបេសកកម្មនៅតំបន់ហ្គាហ្សា មានយ៉ាងហោចណាស់ ១១ នាក់ រួមទាំងលោក Wishah ដែលទើបត្រូវបានសម្លា.ប់នាពេលថ្មីៗនេះ។

ជាមួយនឹងតួលេខដ៏គួឲ្យតក់ស្លុតនេះ អង្គការសិទ្ធិមនុស្ស និងស្ថាប័នសេរីភាពសារព័ត៌មានអន្តរជាតិបានសម្តែងការព្រួយបារម្ភយ៉ាងខ្លាំង និងបានចាត់ទុកថា សង្គ្រាមនៅហ្គាហ្សាគឺជា “សម័យកាលដែលបង្ហូរឈាមបំផុត” សម្រាប់អ្នកកាសែតនៅក្នុងប្រវត្តិសាស្ត្រពិភពលោក៕