រដ្ឋាភិបាល បើកការសិក្សាលើគម្រោងផ្លូវរថភ្លើងធុនស្រាល ប្រវែង២០គីឡូម៉ែត្រ តភ្ជាប់ពីរាជធានីភ្នំពេញ ទៅព្រលានយន្តហោះអន្តរជាតិតេជោក្រុងតាខ្មៅ។

ដំណើរការសាងសង់ផ្លូវរថភ្លើងនេះ អាចនឹងចាប់ផ្តើម ក្រោយពេលដែលព្រលានយន្តហោះតេជោតាខ្មៅបានបញ្ចប់ និងដាក់ឱ្យដំណើរការពេញលេញ។

បើតាមលោក ឆារស៍ វ៉ាន់ អភិបាលក្រុមហ៊ុន Cambodia Airport Investment (CAIC) និងជាអភិបាលក្រុមហ៊ុនកាណាឌីយ៉ាគ្រុបបានឱ្យដឹងថា៖ “យើងបានត្រៀមបម្រុងទីតាំងដីសម្រាប់អភិវឌ្ឍជាផ្លូវរថភ្លើងនៅថ្ងៃអនាគត នៅតាមបណ្តោយផ្លូវ ៦០ ម៉ែត្រ ដែលក្រុមហ៊ុនកំពុងសាងសង់ចេញពីព្រលាន”។

ផ្លូវរថភ្លើងធុនស្រាលនេះ មានសារៈសំខាន់ខ្លាំងសម្រាប់សម្រួលការធ្វើដំណើរក្នុងតំបន់ភាគខាងត្បូងនៃរាជធានីភ្នំពេញ។

បន្ថែមពីនេះ រដ្ឋាភិបាល ក៏កំពុងពិចារណាសាងសង់ផ្លូវរថភ្លើងក្រោមដីក្នុងរាជធានីភ្នំពេញមួយទៀត ដែលនឹងជួយដល់សេដ្ឋកិច្ចកម្ពុជា និងផ្នែកបរិស្ថានថែមទៀតផងដែរ។

គួរបញ្ជាក់ថា អាកាសយានដ្ឋានអន្តរជាតិភ្នំពេញថ្មី ត្រូវបានសាងសង់នៅលើទំហំផ្ទៃដីជាង ២ ៦០០ហិកតា ក្នុងទឹកប្រាក់ជាង ១ ៥០០លានដុល្លារ ដោយនឹងដាក់សម្ពោធជាផ្លូវការនៅខែកក្កដា ខាងមុខនេះ៕

តើអ្នកធ្លាប់ឮគេនិយាយតៗគ្នាអត់ថា កុំសរសេរឈ្មោះរបស់អ្នកដោយប៊ិចក្រហម បើមិនដូច្នេះទេ អ្នកនឹងជួបសំណាងអាក្រក់ជាក់ជាមិនខាន។ តើរឿងនេះពិតដែរឬទេ ហើយអ្នកណាជាអ្នកបង្កើតពាក្យចចាមអារ៉ាមនេះ? តើពាក្យនេះមានប្រភពមកពីណា? យោងតាមគេហទំព័របរទេសមួយបានឱ្យដឹងថា៖

ជំនឿនេះមានឫសគល់មកពីប្រទេសចិន ដែលទាក់ទងនឹង “ទីបញ្ចុះសព” ខណៈជនជាតិចិនកាលពីអតីតកាលតែងតែរៀបចំថ្មដើម្បីចារឈ្មោះរបស់ពួកគេនៅពេលដែលពួកគេមានជីវិត ដោយប្រើទឹកថ្នាំពណ៌ស ដើម្បីសរសេរឈ្មោះ។ ប៉ុន្តែនៅពេលដែលពួកគេស្លាប់ សាច់ញាតិនឹងសរសេរឈ្មោះរបស់ពួកគេនៅលើថ្មនោះដោយ “ទឹកថ្នាំក្រហម” វិញដើម្បីបញ្ជាក់ថាមនុស្សនោះបានស្លាប់ហើយ។

បន្ទាប់មកជំនឿនេះក៏បានរីករាលដាលដល់ប្រទេសកូរ៉េ និងបណ្តាប្រទេសផ្សេងទៀត ធ្វើឱ្យមនុស្សជាច្រើនគិតថាការសរសេរឈ្មោះដោយប៊ិចក្រហមគឺជារឿងមិនល្អ។ យោងតាមជំនឿរបស់ប្រជាជនចិន “ពណ៌ស” តំណាងឱ្យភាពបរិសុទ្ធ និងសន្តិភាព ត្រូវបានប្រើសម្រាប់មនុស្សដែលនៅមានជីវិត។ រីឯពណ៌ក្រហម គឺជានិមិត្តសញ្ញានៃការស្លាប់ គ្រោះថ្នាក់ និងទីបញ្ចប់។

ទោះជាយ៉ាងណាបច្ចុប្បន្នគេឈប់ប្រើទឹកថ្នាំពណ៌សហើយ ដូច្នេះជំនួសឱ្យពណ៌ស គេប្រើពណ៌ខៀវ និងពណ៌ខ្មៅវិញ ដោយសារពណ៌ទាំពីរនេះ មើលទៅផ្លូវការជាង និងងាយស្រួលអាន។ ខណៈពណ៌ក្រហមត្រូវបានគេប្រើដើម្បីរំលេចអត្ថបទ កែកំហុសអក្ខរាវិរុទ្ធ ឬសម្គាល់សំណួរប្រឡងជាដើម។ ហេតុនេះសរុបមក ការសរសេរឈ្មោះរបស់អ្នកដោយប៊ិចក្រហមនឹងជួបសំណាងអាក្រក់ ពិតឬមិនពិត គឺអាស្រ័យទៅលើការគិត និងជំនឿរបស់មនុស្សម្នាក់ៗ៕

ការរាំស្ទាក់សុំលុយ ហាក់បានក្លាយជាទំលាបទំលាប់មួយ ដែលមនុស្សជាច្រើនតែងនាំគ្នារាំនៅតាមដងផ្លូវ ដោយចាំស្ទាក់សុំលុយអ្នកធ្វើដំណើរ។

ជាទូទៅ ការរាំស្ទាក់សុំលុយ ធ្វើឡើងតាមផ្លូវក្នុងភូមិ ដោយអ្នកភូមិស្ទាក់ម៉ូតូ ឬរថយន្ត ដើម្បីប៉ាតម្សៅ ឬស្រោចទឹក រួចហើយក៏សុំជាថវិកា ដើម្បីទុកទិញម្សៅ ឬបង់ថ្លៃទឹកជាដើម។

សកម្មភាពនេះ បានបង្កើតជាទម្លាប់អាក្រក់ និងបង្កភាពអណាធិបតេយ្យតាមផ្លូវ ដែលអាចបង្កគ្រោះថ្នាក់ចរាចរណ៍បានយ៉ាងងាយ។

ពាក់ព័ន្ធនឹងករណីនេះ ខេត្តកណ្ដាល បានក្លាយជាខេត្តដំបូងគេ ដោយចេញសេចក្តីប្រកាសហាមឃាត់សកម្មភាពរាំស្ទាក់សុំលុយ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ នាខែមេសា ខាងមុខនេះ។

ជាមួយគ្នានេះដែរ ឯកឧត្តមគួច ចំរើន អភិបាលខេត្តកណ្តាល ក៏បានសំណូមពរឱ្យកងកម្លាំងក្រុង និងស្រុក ខិតខំផ្សព្វផ្សាយ កុំឱ្យពលរដ្ឋលេងល្បែងនេះ ដែលអាចប៉ះពាល់ដល់សិទ្ធអ្នកធ្វើដំណើរ។

លើសពីនេះ រដ្ឋបាលខេត្តកណ្តាល ក៏បានអំពាវនាវឱ្យពលរដ្ឋក្នុងមូលដ្ឋាន ចូលរួមកម្សាន្តថ្ងៃចូលឆ្នាំខ្មែរ លេងដោយសេចក្តីថ្លៃថ្នូរ ទើបសមជាប្រជាជនគំរូ និងជាខេត្តដែលគេអោយតម្លៃ៕

រដ្ឋបាលរាជធានីភ្នំពេញ បានរៀបចំឡានក្រុងចំនួន ៥៩៧ គ្រឿង សម្រាប់បម្រើសេវាដឹកជញ្ជូនដល់សាធារណជនរយៈពេល៦ថ្ងៃ ដោយឥតគិតថ្លៃ ក្នុងឳកាសបុណ្យចូលឆ្នាំប្រពៃណីជាតិខ្មែរខាងមុខនេះ។

យោងតាមការបង្ហោះនៅក្នុងផេករបស់ រដ្ឋបាលរាជធានីភ្នំពេញ បានអោយដឹងថា ដោយអនុវត្តតាមប្រសាសន៍ដ៏ខ្ពង់ខ្ពស់ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា រដ្ឋបាលរាជធានីភ្នំពេញ នឹងបញ្ចេញរថយន្តក្រុងសាធារណៈ (City Bus) ចំនួន ៥៩៧គ្រឿង ដើម្បីជួយសម្រួលដល់ការចំណាយក្នុងការធ្វើដំណើររបស់បងប្អូនប្រជាពលរដ្ឋ ទៅកាន់ស្រុកកំណើតជួបជុំក្រុមគ្រួសារ រឺទៅកម្សាន្តសប្បាយសង្រ្កាន្តឆ្នាំថ្មី នាឳកាសពិធីបុណ្យចូលឆ្នាំខាងមុខ។

ក្នុងការការបម្រើសេវាដឹកជញ្ជូនដល់សាធារណៈជនដោយឥតគិតថ្លៃនេះ មានរយៈពេល៦ថ្ងៃ គឺចាប់ពីថ្ងៃទី ១២ ដល់ ១៧ ខែមេសា។ គួរជម្រាបថា រដ្ឋបាលរាជធានីភ្នំពេញ បានបែងចែករថយន្តក្រុងចំនួន ១០០គ្រឿង សម្រាប់ប្រតិបត្តិការដឹកជញ្ជូនទៅមកក្នុងរាជធានីភ្នំពេញដូចធម្មតា និងបែងចែករដយន្តចំនួន ៤៩៧គ្រឿងទៀត សម្រាប់បម្រើសេវាដឹងជញ្ជូនពលរដ្ឋចេញពីក្រុងភ្នំពេញ ទៅតាមបណ្ដារខេត្តនានា និងពីតាមបណ្ដារខេត្ត មកកាន់ក្រុងភ្នំពេញវិញ។ លើសពីនេះ នៅលើរថយន្តក្រុងដែលបម្រើសេវាដឹកជញ្ជូនទៅតាមបណ្ដារខេត្តនេះ ក៏មានរៀបចំជាទឹកសម្រាប់ពិសារតាមកៅអីអង្គុយនីមួយៗទៀតផង។

អាស្រ័យហេតុនេះ បងប្អូនកម្មករ-និយោជិក និងប្រជាពលរដ្ឋទាំងអស់ អាចចូលរួមធ្វើដំណើរ តាមរយៈរថយន្តក្រុងរបស់រដ្ឋាករស្វយ័តដឹកជញ្ជូនសាធារណៈ (City Bus) នេះបាន សម្រាប់ព័ត៌មានលម្អិត អំពីកាលវិភាគ រឺស្ថានីយចេញដំណើរ គឺមាននៅក្នុងផេករបស់ “រដ្ឋបាលរាជធានីភ្នំពេញ” ។

ឆ្លៀតក្នុងឳកាសនេះផងដែរ រដ្ឋបាលរាជធានីភ្នំពេញ បានអំពាវនាវដល់ម្ចាស់ក្រុមហ៊ុន ម្ចាស់អាជីវកម្ម និងម្ចាស់រថយន្តដឹកជញ្ជូនអ្នកដំណើរទាំងអស់ សូមកុំតម្លើងថ្លៃសេវា ក្នុងឳកាសពិធីបុណ្យចូលឆ្នាំថ្មីនេះអី ដើម្បីជាការចូលរួមជាមួយ រាជរដ្ឋាភិបាល ក្នុងការកាត់បន្ថយចំណាយរបស់ប្រជាជន៕

មន្ត្រីនគរបាលចរាចរ នឹងចាប់ផ្តើមបន្ថែមការត្រួតពិនិត្យជាតិស្រវឹងនៅពេលថ្ងៃ ចាប់ពីម៉ោង១២តទៅ ដើម្បីកាត់បន្ថយគ្រោះថ្នាក់ចរាចរណ៍។

យោងតាមលោកឧត្តមសេនីយ៍ទោ ឡុង ធូ អនុប្រធាននាយកដ្ឋាននគរបាលចរាចរណ៍បានលើកឡើងថា៖”ការចាប់ផ្ដើមត្រួតពិនិត្យជាតិស្រវឹងនៅពេលថ្ងៃនេះ ក៏ព្រោះតែគ្រោះថ្នាក់ចរាចរណ៍បានកើតឡើងច្រើននៅពេលថ្ងៃ ដោយសារតែកម្មវិធីជប់លៀងភាគច្រើនបង្វែរមកនៅពេលថ្ងៃ”។

លោកឧត្តមសេនីយ៍ទោ បានសង្កត់ធ្ងន់ទៀតថា៖” ជាទូទៅចំពោះបរិមាណនៃការពិសារគ្រឿងស្រវឹង សម្រាប់ស្រាបៀរទឹកសឬទឹកលឿង កម្រិតត្រឹម២កំប៉ុងឡើងទៅ អាចជាប់ក្នុងកម្រិតដែលត្រូវផាកពិន័យ សម្រាប់ទឹកខ្មៅ១កំប៉ុងអាចជាប់ហើយ”។

បន្ថែមពីការដាស់វាស់ជាតិអាកុលពេលថ្ងៃ រដ្ឋាភិបាលក៏នឹងកំពុងរៀបច្បាប់រឹតបន្តឹងគ្រឿងស្រវឹង ដោយកំពុងសិក្សាយ៉ាងយកចិត្តទុក្ខដាក់ ព្រោះច្បាប់នេះអាចប៉ះពាល់ពាល់ខ្លាំងដល់អាជីវករ។

គួរបញ្ជាក់ថា ក្នុងឆ្នាំ២០២៤កន្លងទៅ ពាក់ព័ន្ធនឹងបទល្មើសគ្រឿងស្រវឹង សមត្ថកិច្ចឃាត់ខ្លួនមនុស្សជាង១២០០០នាក់ ហើយបើសិនជាមិនបានឃាត់ខ្លួនពួកគេដើម្បីបន្សាបជាតិស្រវឹងដោយបណ្ដោយឱ្យបើកបរ បើសិនជាម្នាក់បុកមនុស្សស្លាប់ម្នាក់ យ៉ាងហោចណាស់ក៏មាន១២០០០នាក់ត្រូវបានស្លាប់ដោយសារតែការបើកបរក្នុងស្ថានភាពស្រវឹងដែរ៕