សហរដ្ឋអាមេរិក ៖ អនុប្រធានាធិបតី និងរដ្ឋមន្ត្រីការបរទេសអាមេរិក លោក JD Vance បានដាស់តឿនរដ្ឋាភិបាលឥណ្ឌា កុំធ្វើឱ្យការសងសឹកប៉ាគីស្ថានក្លាយជាសង្គ្រា.មក្នុងតំបន់ ដោយសារឥណ្ឌាគិតថា ប៉ាគីស្ថាននៅក្រោយខ្នងការបា.ញ់ ប្រហា.រភ្ញៀវទេសចរស្លា.ប់ជាច្រើននាក់នៅតំបន់កាស្មៀ ។ អាមេរិកជំរុញឱ្យឥណ្ឌា និងប៉ាគីស្ថានរក្សាសន្តិភាព និងកាត់បន្ថយភាពតានតឹងក្នុងតំបន់ ។

តាមបទសម្ភាសន៍របស់លោក JD Vance ជាមួយសារព័ត៌មាន Fox News កាលពីថ្ងៃទី១ ខែឧសភា ឆ្នាំ២០២៥ គឺអាមេរិកសង្ឃឹមថា ប៉ាគីស្ថាននឹងសហការជាមួយឥណ្ឌាស្វែងរកក្រុមប្រដាប់អាវុធមូស្លីមនៅប៉ាគីស្ថានមកដាក់ទោស ក្រោយពីពួកគេបានបា.ញ់ភ្ញៀវទេសចរស្លា.ប់ ២៦នាក់ នៅតំបន់កាស្មៀ របស់ឥណ្ឌា កាលពីថ្ងៃទី២២ ខែមេសា ។ អាមេរិកចង់ឱ្យការចាត់វិធានការរបស់ឥណ្ឌាទៅលើក្រុមប្រដាប់អាវុធមូស្លីម នឹងពុំរាលដាលក្លាយជាជម្លោះកាន់តែខ្លាំងក្នុងតំបន់ ។

លោក Marco Rubio ដែលទើបឡើងកាន់តំណែងជាទីប្រឹក្សាសន្តិសុខជាតិអាមេរិក បានពិភាក្សាដាច់ដោយឡែកជាមួយរដ្ឋមន្ត្រីការបរទេសឥណ្ឌា និងនាយករដ្ឋមន្ត្រីប៉ាគីស្ថាន កាលពីថ្ងៃទី៣០ ខែមេសា ដើម្បីអំពាវនាវឱ្យប្រទេសទាំងពីររក្សាសន្តិភាព និងសន្តិសុខនៅអាស៊ីខាងត្បូង ។

ការពិភាក្សាតាមទូរស័ព្ទជាមួយនាយករដ្ឋមន្ត្រីប៉ាគីស្ថាន លោក Shehbaz Sharif គឺលោក Rubio បានសំណូមពរឱ្យប៉ាគីស្ថានថ្កោលទោសក្រុមប្រដាប់អាវុធបាញ់សម្លាប់ភ្ញៀវទេសចរនៅតំបន់កាស្មៀ និងស្នើឱ្យប៉ាគីស្ថានសហការជាមួយឥណ្ឌាស៊ើបអង្កេតរកជនល្មើស ។ ប៉ុន្តែការិយាល័យនាយករដ្ឋមន្ត្រីប៉ាគីស្ថានបានចេញសេចក្តីថ្លែងការណ៍ក្រោយមេដឹកនាំប៉ាគីស្ថានជួបអាមេរិក ដោយចោទប្រកាន់ឥណ្ឌាព្យាយាមទម្លាក់កំហុសលើប៉ាគីស្ថាន និងស្នើឱ្យអាមេរិកដាក់សម្ពាធឥណ្ឌាឱ្យកាត់បន្ថយអំពើហិង្សា និងប្រព្រឹត្តដោយការទទួលខុសត្រូវ ។

ឥណ្ឌាបានបិទដែនអាកាសពុំទទួលយន្តហោះប៉ាគីស្ថានទាំងអស់ ខណៈរដ្ឋមន្ត្រីក្រសួងមហាផ្ទៃឥណ្ឌា លោក Amit Shah បានប្រកាសចាត់ការក្រុមប្រដាប់អាវុធបាញ់ភ្ញៀវទេសចរនៅតំបន់កាស្មៀ ។ ឥណ្ឌានឹងដាក់ទោសអ្នកនៅពីក្រោយខ្នង និងអ្នករៀបផែនការ ហើយកងទ័ពជើងទឹកឥណ្ឌាគ្រោងធ្វើសមយុទ្ធនៅសមុទ្រអារ៉ាប់ នៅឆ្នេរសមុទ្ររដ្ឋ Maharashtra និងរដ្ឋ Gujarat ខណៈរដ្ឋ Gujarat មានព្រំដែនជាប់ប៉ាគីស្ថាន ក្រោយកងទ័ពជើងទឹកឥណ្ឌាទើបធ្វើសមយុទ្ធបាញ់មីស៊ីល កាលពីថ្ងៃទី២៧ ខែមេសា ។

ចំណែកកងទ័ពជើងគោកប៉ាគីស្ថានបានបង្ហាញរូបភាពធ្វើសមយុទ្ធនៅទីវាលបាញ់កាំភ្លើង កាលពីថ្ងៃទី១ ខែឧសភា ដោយមានលោក Syed Asim Munir មេបញ្ជាការកំពូលកងទ័ពប៉ាគីស្ថាន ចូលរួមទស្សនាការធ្វើសមយុទ្ធ ។ កាលពីថ្ងៃទី៣០ ខែមេសា រដ្ឋាភិបាលប៉ាគីស្ថានទទួលបានព័ត៌មានសម្ងាត់ថា ឥណ្ឌានឹងវាយប្រហារប៉ាគីស្ថាន រយៈពេល២៤ម៉ោង និង៣៦ម៉ោង ប៉ុន្តែរយៈពេលនេះបានកន្លងផុតហើយ ខណៈវិភាគបារម្ភពីសង្គ្រាមកើតឡើងរវាងឥណ្ឌា និងប៉ាគីស្ថាន ៕

ប្រទេសលុចហ្សំបួរ ៖ មនុស្សម្នាតែងតែយល់ច្រឡំថា លោក Hugo One អាយុ២៨ឆ្នាំ មានអាជីពជាអ្នកចម្រៀង និងតន្ត្រីករនៅប្រទេសលុចហ្សំបួរ គឺជាលោក Elon Musk មហាសេដ្ឋីលំដាប់ពិភពលោក និងជាម្ចាស់ក្រុមហ៊ុនផលិតរថយន្ត Tesla និងម្ចាស់បណ្តាញសង្គម X ។ ពេលដើរទៅទីកន្លែងផ្សេងៗ ដូចជា ៖ ផ្សារទំនើប បារ និងតម្រង់ជួរចូលក្លិបរាត្រី មនុស្សភាគច្រើនហៅលោកថា Elon Musk ប៉ុន្តែរលោកពុំសូវរីករាយនឹងមុខមាត់ដូចគ្នានេះទេ ។

នាពេលថ្មីៗនេះ ពេលលោក Hugo អ្នកចម្រៀងនៅប្រទេសលុចហ្សំបួរ ស្ថិតក្នុងតំបន់អឺរ៉ុបខាងលិច ជួបជុំមិត្តភក្តិនៅទីក្រុងអាប័ឌីន ប្រទេសស្កុកឡេន ស្រាប់តែយុវជនមួយក្រុមស្រែកថា «លោកជា Elon Musk» បន្ទាប់មក ពួកគេក៏សុំថតវីដេអូជាមួយលោក ។ ទោះជាលោកប្រាប់ទៅមនុស្សប្លែកមុខទាំងនេះថា លោកពុំមែនជា Elon Musk ប៉ុន្តែពួកគេនៅតែពុំជឿ ។ លោកត្រូវបានមនុស្សប្លែកមុខសួរនាំ ចំនួន២ដងក្នុង១ខែ ហើយពួកគេនិយាយថា លោកមានមុខមាត់ដូចម្ចាស់ក្រុមហ៊ុន Tesla ហើយក៏សុំថតរូបសែលហ្វីជាបន្តបន្ទាប់ ។

ទោះជាលោក Hugo ទទួលបានការចាប់អារម្មណ៍យ៉ាងច្រើនក្តី ប៉ុន្តែលោកប្រាប់ថា ចូលចិត្តមុខមាត់របស់ខ្លួន ហើយលោកពុំសូវរីករាយនឹងការមានមុខដូចមហាសេដ្ឋីទេ ពីព្រោះមនុស្សទាំងនេះពុំបានសរសើរលោកឡើយ ។ លោកថា ៖ «វាគួរឱ្យកំប្លែង ពីព្រោះក្រុមមនុស្សដែលមកសួរខ្ញុំមានមុខដូច Elon Musk គឺពួកគេរួសរាយរាក់ទាក់ និងចង់រាប់អាន ។ វាជួយឱ្យចំនួនមនុស្សចូលមើលផេករបស់ខ្ញុំច្រើន និងមានអ្នកដោនឡូតបទចម្រៀងខ្ញុំច្រើន» ។

ក្រៅពីការងារសិល្បៈ លោក Hugo បានធ្វើជាគ្រូបង្រៀនភាសាអង់គ្លេស និងបារាំង នៅទីក្រុងប៊ែកឡាំង ប្រទេសអាល្លឺម៉ង់ ។ កូនសិស្សម្នាក់និយាយថា លោកមុខដូច Elon Musk ជាលើកដំបូងកាលពីឆ្នាំ២០១៨ បន្ទាប់មក ក៏មានអ្នកផ្សេងទៀតនិយាយដូចគ្នានេះមកកាន់លោក ចាប់ពី២លើក ទៅ៣លើកក្នុង១ខែ ប៉ុន្តែសំណាងល្អ គ្មានអ្នកណាម្នាក់ស្អប់ខ្ពើមលោក ។

ក្នុងដំណើរកម្សាន្តជុំវិញប្រទេសស្កុតឡែន និងអង់គ្លេស កាលពីខែមេសា ឆ្នាំ២០២៥ លោក និងមិត្តភក្តិរៀននៅសាកលវិទ្យាល័យបាននាំគ្នាមកដើរលេងនៅទីក្រុងអាប័ឌីន ហើយលោកល្បីល្បាញយ៉ាងខ្លាំងនៅទីនេះ ។ បន្ទាប់ពីដើរលេងពេលយប់ជាមួយមិត្តភក្តិ ស្រាប់តែមានមនុស្សនិយាយថា លោកមុខដូច Elon Musk រហូតដល់៤លើក រួចហើយក៏មានយុវជន៣នាក់ និយាយបែបនេះជាមួយលោក ពួកគេកុំសុំលោកថតវីដេអូ ។

ក្រោយពេលវីដេអូនេះបង្ហោះក្នុងបណ្តាញសង្គមកាលពីថ្ងៃទី២៥ ខែមេសា ឃើញថា មានចំនួនទស្សនារហូតដល់ជាង១លាន៥សែនលើក ក្នុងនោះមនុស្សភាគច្រើនយល់ស្របនឹងលោកមានមុខដូច Elon Musk ។ លោកថា ៖ «មិននឹកស្មានថា មានអ្នកចូលទស្សនាវីដេអូច្រើនបែបនេះទេ ព្រោះពីដំបូង មានចំនួនទស្សនាត្រឹមតែ៧ម៉ឺនលើក ប៉ុន្តែវាកើនឡើងដល់ជាង១លាន៥សែនលើក ។ នេះមិនមែនជាលើកចុងក្រោយទេ ដែលមានមនុស្សនិយាយថា ខ្ញុំមុខដូច Elon Musk ។ ប៉ុន្តែខ្ញុំពុំយល់ស្របជាមួយ Elon Musk និងការគិតរបស់មហាសេដ្ឋីរូបនេះទេ» ៕

ចក្រភពអង់គ្លេស ៖ រស់នៅក្នុងមណ្ឌលចាស់ជរាអផ្សុកពេក លោកយាយម្នាក់បានសាកល្បងថតវីដេអូខ្លួនMakeupបង្ហោះក្នុងTikTokលេងៗ ស្រាប់តែទទួលបានការចាប់អារម្មណ៍ខ្លាំង ពេលនេះប្រែក្លាយជាជនគម្រូ (Influencer) ក្នុងវ័យ១០៣ឆ្នាំ។

លោកយាយ Joan Partridge វ័យ១០៣ឆ្នាំ ដែលកំពុងស្នាក់នៅក្នុងផ្ទះថែទាំមនុស្សចាស់ជរា Millcroft Care Home នៅតំបន់ Redditch ទីក្រុង Worcestershire ប្រទេសអង់គ្លេស។ មនុស្សជុំវិញខ្លួន រួមទាំងលោកយាយផ្ទាល់មានការភ្ញាក់ផ្អើលជាខ្លាំងបន្ទាប់ពីវីដេអូរបស់គាត់ដែលបានចែករំលែកអំពីទម្លាប់តុបតែងមុខនៅលើបណ្ដាញសង្គមTikTok មានការទស្សនាពីមនុស្សជាង20សែននាក់ និងមានក្រុមហ៊ុនគ្រឿងសម្អាងបានទាក់ទងមកសុំឲ្យគាត់ជួយផ្សព្វផ្សាយផលិតផលរបស់គេថែមទៀតផង។

អ្នកស្រី Lyndsay Sard ជាអ្នកគ្រប់គ្រងទូទៅនៅផ្ទះថែទាំចាស់ជរានោះបានផ្ដល់បទសម្ភាសន៍ជាមួយសារព័ត៌មានថា ៖ បន្ទាប់ពីវីដេអូផាត់មុខរបស់លោកយាយJoan ត្រូវបានបង្ហោះនៅលើTiktok មានមនុស្សជាច្រើនបានផ្ញើវីដេអូនោះទៅកាន់ក្រុមហ៊ុនគ្រឿងសម្អាង ដែលជាម៉ាកផលិតផលរបស់លោកយាយបានយកមកប្រើប្រាស់ ហើយក្រោយមកក្រុមហ៊ុនក៏បានទាក់ទងមកលោកយាយផ្ទាល់ដោយសរសើថា “អ្វីដែលលោកយាយបានធ្វើពិតជាគួរឲ្យស្រលាញ់ណាស់។

ក្រៅពីនោះ ក្រុមហ៊ុនផលិតគ្រឿងសម្អាងល្បីមួយឈ្មោះ Collection Cosmetic បានផ្ញើផលិតផលគ្រឿងសម្អាងជាច្រើនមកកាន់គាត់ក្នុងការលើកទឹកចិត្តដើម្បីឲ្យគាត់បន្តធ្វើអ្វីដែលគាត់ស្រលាញ់តទៅទៀត។ ក្នុងនោះផងដែរ កាសែតBBCដ៏ល្បី បានចុះមកយកព័ត៌មានដោយផ្ទាល់ពីលោកយាយផងដែរ។ លោកយាយ Joan បាននិយាយថា “គាត់ពិតជាភ្ញាក់ផ្អើល និង ហួសចិត្តខ្លាំងណាស់។ សម្រស់សម្រាប់ខ្ញុំមានន័យថាធម្មជាតិទាំងអស់។ វាជាការល្អណាស់ ក្នុងការពេញចិត្តចំពោះខ្លួនឯង មិនថាអ្នកមានអាយុប៉ុន្មានទេ”។

ទោះជាយ៉ាងណា លោកយាយបានបដិសេដមិនធ្វើការReview ផលិតផល ឬធ្វើការឲ្យក្រុមហ៊ុនណាឡើយ។ គាត់បានលើឡើងបន្ថែមថា ៖ គាត់ចាស់ពេកហើយ សម្រាប់យកទៅធ្វើការ។លើសពីនេះ គាត់គ្រាន់តែចង់ថតវីដេអូចែករំលែកពីសកម្មភាព និងអ្វីដែលគាត់ស្រលាញ់ដើម្បីជាការកម្សាន្តប៉ុណ្ណោះ មិនមែនដើម្បីភាពល្បីល្បាញឡើយ។

មនុស្សជាច្រើនដែលបានឃើញវីដេអូរបស់គាត់ បានចូលទៅខមិន និងយកគាត់ធ្វើជាគម្រូដោយហៅគាត់ថាជា Influencer ព្រោះបើទោះជាមានវ័យដល់ទៅ១០៣ឆ្នាំក៏ពិតមែន ប៉ុន្តែគាត់មើលទៅរឹងមាំ មានសុខភាពល្អ អាចផាត់មុខ អាចថតវីដេអូបានគួរឲ្យសរសើ។ លើសពីនេះសកម្មភាពរបស់គាត់បានបង្ហាញថា “វានឹងមិនយឺតពេលឡើយ ក្នុងការធ្វើអ្វីដែលខ្លួនស្រលាញ់”៕

បរទេស ៖ ក្រុមហ៊ុន Apple បានប្រកាសប្ដូរទីតាំងផលិតឧបករណ៍របស់ខ្លួន ដោយបញ្ជាក់ថា ៖ រាល់ទូរស័ព្ទដៃ និងផលិតផលផ្សេងៗទៀតរបស់Appleលែងមានផលិតនៅក្នុងប្រទេសចិនទៀតហើយ។ ការប្រកាសបែបនេះ ត្រូវបានធ្វើឡើងបន្ទាប់ពីមានវិវាទពាណិជ្ជកម្មដ៏ធំសម្បើមរវាងសហរដ្ឋអាមេរិក និងចិន។

នាយកប្រតិបត្តិលោក Tim Cook បាននិយាយថា ៖ ទូរស័ព្ទដៃIphoneនឹងត្រូវដាក់លក់ក្នុងទីផ្សារអាមេរិកចាប់ពីខែក្រោយតទៅគឺជាផលិតផលដែលផលិតក្នុងប្រទេសឥណ្ឌា ខណៈដែលប្រទេសវៀតណាមនឹងក្លាយជាមជ្ឈមណ្ឌលផលិតកម្មដ៏សំខាន់មួយទៀតសម្រាប់ទំនិញដូចជា iPads និង Apple Watches ។ នេះបើយោងតាមសារព័ត៌មានបរទេស Reuters។

គួរបញ្ជាក់ថា ប្រមាណជាង៩០% នៃផលិតផលAppleគ្រប់ប្រភេទ គឺត្រូវបានផលិត និងតម្លើងនៅចិន ប៉ុន្តែបន្ទាប់ពីមានការត្លើងពន្ធយ៉ាងខ្ពស់ទៅវិញទៅមករវាងចិន និងអាមេរិក វាបានជះផលប៉ះពាល់យ៉ាងធ្ងន់ធ្ងរ ដែលអាចនាំឲ្យAppleឈានដល់ការខាតបង់ប្រាក់ជាង ៩០០លានដុល្លារ ក្នុងត្រីមាសទី១។ ដូច្នេះក្រុមហ៊ុនយល់ថា យុទ្ធសាស្រ្តក្នុងការផ្លាស់ប្ដូរទីតាំងផលិតគឺជាជម្រើសល្អបំផុតមួយ។

ដោយឡែក សម្រាប់ប្រទេសប្រទេសឥណ្ឌាដែលជាប់ពន្ធបដិការអាមេរិកត្រឹមតែ១០%នោះ បានក្លាយជាគោលដៅបន្ទាប់ក្នុងការឲ្យAppleទៅតាំងទីរោងចក្រ និងផលិតឧបករណ៍ខ្លួននៅទីនោះ។ ក្នុងនោះផងដែរគេបានកំណត់ថា នៅត្រឹមចុងឆ្នាំ២០២៦ Iphone សម្រាប់ទីផ្សារអាមេរិកនឹងផ្លាស់ប្ដូរមកផលិតក្នុងប្រទេសឥណ្ឌាទាំងស្រុង។

ទន្ទឹមនឹងនេះ វៀតណាមក៏នឹងក្លាយជាមជ្ឈមណ្ឌលផលិតដ៏សំខាន់មួយទៀត “សម្រាប់ផលិតផលដូចជា iPad, Mac, Apple Watch និង AirPods ដែលដាក់លក់នៅសហរដ្ឋអាមេរិក”។ អ្វីដែលគួរឲ្យកត់សម្គាល់គឺ ការផ្ទេរខ្សែសង្វាក់ផលិតកម្មទៅកាន់ប្រទេសផ្សេងនេះ នឹងត្រូវការពេលវេលា និងត្រូវគិតគូរឲ្យបានហ្មត់ចត់បំផុតព្រោះត្រូវចំណាយប្រាក់រាប់ពាន់លានដុល្លារ។

ទោះជាមានការប្រែប្រួលយ៉ាងនេះក្ដី ប៉ុន្តែApple ក៏នៅតែនិយាយផងដែរថា ៖ ប្រទេសចិននៅតែជាមជ្ឈមណ្ឌលផលិតសំខាន់សម្រាប់ផលិតផលApple ដែលតែងជំរុញដល់ការនាំចេញទៅទីផ្សារអន្តរជាតិ។ ហើយខ្សែចង្វាក់ផ្គត់ផ្គង់ជាសកលរបស់ក្រុមហ៊ុននេះនៅតែមានភាពស្មុគស្មាញ ព្រោះកន្លងមកAppleក៏អាស្រ័យលើបច្ចេកវិទ្យាដែលមានក្នុងប្រទេសចិនផងដែរ៕

អ្នកប្រើប្រាស់ជំនួយការAI ChatGPT ជាច្រើនចាប់ផ្ដើមមានអារម្មណ៍មិនស្រួល និងព្រួយបារម្ភពីសុវត្ថិភាពទិន្នន័យឯកជនភាពរបស់ពួកគេ បន្ទាប់ពីគេបានប្រើប្រាស់ChatGPTដើម្បីស្វែងរកព័ត៌មានមួយចំនួន ហើយវាបានឆ្លើយតបមកវិញជាមួយការហៅឈ្មោះរបស់អ្នកប្រើប្រាស់ទាំងនោះ ទាំងដែលគេមិនទាន់បានប្រាប់ឈ្មោះទៅកាន់វាឡើយ។

ក្រោយពីមានការវិវឌ្ឍន៍ជាបន្តបន្ទាប់នៃបច្ចេកវិទ្យាបញ្ញាសិប្បនិមិត (AI) វាបានក្លាយជាផ្នែកមួយក្នុងជីវិតប្រចាំថ្ងៃរបស់មនុស្សទាំងការសិក្សា និងការងារ។ ប៉ុន្តែការរីកចម្រើនកាន់តែទូលំទូលាយរបស់វាក៏បានធ្វើឲ្យប៉ះពាល់ដល់អារម្មណ៍របស់មនុស្សមួយចំនួនផងដែរ។ ពួកគេបារម្ភថាAI អាចទាញយកព័ត៌មានផ្ទាល់ខ្លួនរបស់ពួកគេទៅប្រើប្រាស់ ហើយនិងគ្រប់គ្រង់លើជីវិតរបស់មនុស្សនៅថ្ងៃណាមួយមិនខាន។

បុរសម្នាក់បានចែករំលែកនៅលើបណ្ដាញសង្គមXថា ៖ តើមានអ្នកណាជួបរឿងដូចគ្នាទេ? ChatGPT Version o3 បានហៅឈ្មោះរបស់យើង, វាគួរឲ្យខ្លាច និងហាក់ដូចជាមិនចាំបាច់ទាល់តែសោះ។ ហើយក៏មានអ្នកប្រើប្រាស់ផ្សេងទៀតបានចូលទៅបញ្ចេញមតិថា ៖ “មែនហើយ! ខ្ញុំមិនចូលចិត្តសោះ ខ្ញុំព្យាយាមរកវិធីបិទដំណើរការនេះយូរហើយ។ ក្រៅពីនេះ មានអ្នកប្រើប្រាស់មួយចំនួនទៀតក៏បានកត់សម្គាល់ផងដែរថា ChatGPT បានប្រើប្រាស់ឈ្មោះរបស់ពួកគេ បើទោះជាពួកគេមិនធ្លាប់ណែនាំខ្លួនប្រាប់វាក៏ដោយ។

ដោយឡែក បន្ទាប់ពីរឿងនេះបានចែករំលែកធ្វើឲ្យមានការភ្ញាក់ផ្អើល ក្រុមហ៊ុនOpenAIក៏បានចេញមកបកស្រាយថា ChatGPT អាចដឹងពីព័ត៌មានរបស់អ្នកបានលុះត្រាតែអ្នកប្រាប់វាប៉ុណ្ណោះ។ វាគ្មានសមត្ថភាពស្កេនឧបករណ៍របស់អ្នកដើម្បីលួច ឬទាញយកទិន្នន័យពីខាងក្រៅបានឡើយ។ មនុស្សមួយចំនួនប្រហែលជាភ្លេចហើយថា វាមានមុខងារចងចាំ ដូច្នេះប្រសិនបើពួកគេធ្លាប់បង្ហាញអ្វីទៅកាន់វា នោះវានឹងចង់ចាំទុក ប៉ុន្តែអ្នកមានសិទ្ធិពិនិត្យ និងលុបទិន្នន័យទាំងអស់នោះវិញគ្រប់ពេល។

យ៉ាងណាមិញបើទោះជាមានការបកស្រាយបែបនេះក្ដី ប៉ុន្តែមនុស្សជាច្រើននៅតែមានការប្រុងប្រយ័ត្នជាមួយការប្រើប្រាស់AI ដើម្បីស្វែងរកព័ត៌មានណាមួយ ដោយមិនបង្ហាញពីអត្តសញ្ញាណរបស់ពួកគេឡើយ ព្រោះពួកគេមិនទុកចិត្តខ្លាចបច្ចេកវិទ្យាដ៏ទំនើបទាំងនេះ នឹងអាចមានឥទ្ធិពលលើពួកគេបាននៅថ្ងៃណាមួយ៕