វៀតណាម ៖ មជ្ឈមណ្ឌលត្រួតពិនិត្យគុណភាពផ្លែឈើនៅក្នុងប្រទេសវៀតណាម Hoan Vu បានត្រួតពិនិត្យឃើញសារធាតុគីមីCadmium នៅក្នុងផ្លែទុរេនភាគច្រើន។ សារធាតុនេះ ត្រូវបានគេដឹងថាជាសារធាតុលោហៈធ្ងន់មួយប្រភេទដែលអាចបង្ករឲ្យខូចអវយៈសំខាន់ៗក្នុងរាងកាយដូចជា សួត ថ្លើម និង ក្រលៀនជាដើម។

យោងតាមសារព័ត៌មាន VNExpress កាលពីថ្ងៃទី២១ ខែឧសភា នេះបានឲ្យដឹងថា ក្រៅពីរកឃើញសារធាតុ Basic Yellow 2 (BY2) ដែលជាសារធាតុបង្កមហារីក ថ្មីៗនេះគេក៏បានពិនិត្យឃើញនូវសារធាតុដ៏កាចសាហាវមួយប្រភេទទៀតហៅថា កាដម្យូម (Cadmium) ។ លោក Henry Bui អគ្គនាយកនៃមជ្ឈមណ្ឌលត្រួតពិនិត្យ Hoan Vu បានអះអាងថា៖ សារធាតុគីមីពុលដែលមាននៅក្នុងផ្លែទុរេននេះ ភាគច្រើនគឺមានប្រភពមកពីជីដែលកសិករប្រើប្រាស់ក្នុងការដាំដុះដំណាំទុរេនដើម្បីឲ្យវាឆាប់លូតលាស់ល្អ។

ជុំវិញការឃើញនេះ គេបានពិនិត្យឃើញសារធាតុ កាដម្យូម (Cadmium) នៅក្នុងជីដែលមានតម្លៃថោក គ្មានស្តុង់ដាផលិតត្រឹមត្រូវ និងគ្មានសុវត្ថិភាពក្នុងការប្រើប្រាស់។ ដូច្នេះពេលនេះអាជ្ញាធរវៀតណាមកំពុងចាត់វិធានការទប់ស្កាត់ ការចែកចាយផលិតផលជីដែលគ្មានគុណភាពទាំងនេះទៅឲ្យកសិករតទៅទៀត ព្រោះកសិករតែងតែចង់បានជីកសិកម្មដែលអាចផ្ដល់ទិន្នផលខ្ពស់ និងមានតម្លៃថោកប៉ុណ្ណោះ ហើយកសិករទាំងនោះមិនបានដឹងទេថានៅក្នុងជីតម្លៃថោកទាំងនោះមានផ្ទុកនូវសារធាតុគិមីពុល និងកា.ចសាហា.វដូចនេះ។

ពេលនេះ អាធ្ញាធរវៀតណាមកំពុងចាត់វិធានការរយៈពេលខ្លី ដើម្បីការកែលម្អដី កាត់បន្ថយការស្រូបយកសារធាតុ cadmium ការបង្កើន pH ដីជាមួយនឹងកំបោរ ឬសារធាតុផ្សេងទៀត ការប្រើប្រាស់ទឹកភ្លៀង ឬសារធាតុស្រូបយកលោហធាតុធ្ងន់ និងការដាំដំណាំដែលស្រូបយកសារធាតុ cadmium ជាដំណោះស្រាយជីវសាស្រ្តបណ្តោះអាសន្ន។

គួរជម្រាបថា សារធាតុ កាដម្យូម នេះបានជ្រាបចូលទៅក្នុងដីនៅពេលដែលកសិករប្រើប្រាស់ជីគុណភាពអន់ទាំងនោះយូរឆ្នាំទៅ។ អាជ្ញាធរវៀតណាមព្រមានថា នេះមិនមែនជាផលល្អឡើយសម្រាប់កេរ្តិ៍ឈ្មោះដំណាំកសិកម្មនៅវៀតណាម ព្រោះកន្លងទៅមុននេះបន្តិចប្រទេសចិនបានរឹតបន្តឹងការនាំចូលផលិតផលផ្លែឈើពីប្រទេសវៀតណាម ក្រោយគយចិនបានរកឃើញសារធាតុ BY2 ដែលជ្រលក់ផ្លែទុរេនឲ្យឆាប់ទុំ និងនៅស្រស់បានយូរ។

គួររំលឹកថា កាលពីឆ្នាំ2024 វៀតណាមលក់ទុរេនបានក្នុងចំនួនទឹកប្រាក់ប្រមាណ 3,300 លានដុល្លារអាមេរិក។ ប៉ុន្តែនៅក្នុងរយៈពេលដូចគ្នានៅក្នុងឆ្នាំ2025នេះ ការនាំចេញទុរេនរបស់វៀតណាមបានធ្លាក់ចុះត្រឹម 130 លានដុល្លារ ធ្លាក់ចុះ 74% ដែលធ្វើឲ្យទុរេនវៀតណាមក្នុងពេលនេះនៅសល់កកកុញ ហើយលក់ចេញក្នុងតម្លៃត្រឹមតែ ~$1.18 ប៉ុណ្ណោះក្នុង1 គីឡូក្រាម៕

ប្រទេសចិន ៖ ស្របពេលប្រទេសនានាលើពិភពលោក ប្រឈមនឹងចំនួនពលរដ្ឋធ្លាក់ចុះ ប៉ុន្តែចិនមិនត្រឹមតែប្រឈមនឹងបញ្ហាពលរដ្ឋធ្លាក់ចុះប៉ុណ្ណោះទេ គឺចិនមានបញ្ហាបុរសរាប់លាននាក់ពុំអាចស្វែងរកស្ត្រីមករៀបអាពាហ៍ពិពាហ៍បាន ។ បច្ចុប្បន្ន បុរសចិនអាយុចាប់ពី៣០ឆ្នាំ ទៅ៤០ឆ្នាំ ស្មើជិត៣៥លាននាក់ ខ្វះគូស្នេហ៍ ដោយសាររដ្ឋាភិបាលចិនអនុវត្តគោលនយោបាយកំណត់ឱ្យពលរដ្ឋមានកូនតែម្នាក់អស់រយៈពេលជាច្រើនឆ្នាំ ហើយពលរដ្ឋចិនស្រឡាញ់ និងផ្តល់តម្លៃឱ្យកូនប្រុសខ្លាំងជាងកូនស្រី ។

តាមទិន្នន័យជំរឿនពលរដ្ឋចិនក្នុងឆ្នាំ២០២០ បង្ហាញថា ប្រទេសចិនមានបុរសច្រើនជាងស្ត្រី ប្រមាណ៣៤លាន៩សែននាក់ ហើយភាពខុសគ្នានេះ គឺជាមូលហេតុធ្វើឱ្យបុរសចិនពិបាកស្វែងរកគូស្នេហ៍ ។ លើសពីនេះ ការរៀបអាពាហ៍ពិពាហ៍តាមប្រពៃណីធ្លាក់ចុះ ដោយសារថ្លៃបណ្ណាការដែលបុរសចិនត្រូវប្រគល់ជូនក្រុមគ្រួសារខាងកូនក្រមុំក្នុងថ្ងៃរៀបអាពាហ៍ពិពាហ៍ បានកើនឡើងខ្ពស់រហូតដល់ជិត១សែន៤ម៉ឺនយាន់ (ឬជិត២ម៉ឺនដុល្លារ) ដែលធ្វើឱ្យបុរសចិនពុំអាចរៀបអាពាហ៍ពិពាហ៍ជាមួយស្ត្រីចិនបាន ហើយពួកគេត្រូវទទួលបន្ទុកផ្គត់ផ្គង់គ្រួសារ ។

អ្នកជំនាញនៅប្រទេសចិនព្យាយាមដោះស្រាយបញ្ហានេះ ដោយឱ្យបុរសចិនរៀបអាពាហ៍ពិពាហ៍ជាមួយស្ត្រីបរទេស ជាពិសេស ស្ត្រីរុស្ស៊ី ដែលមានចំនួនច្រើនជាងបុរស រហូតដល់១០លាននាក់ ហើយអ្នកជំនាញក៏បានណែនាំឱ្យបុរសចិនរៀបអាពាហ៍ពិពាហ៍ជាមួយស្ត្រីរស់នៅបណ្តាប្រទេសអាស៊ីអាគ្នេយ៍ផងដែរ ។ ប៉ុន្តែមានមតិជាច្រើនបារម្ភពីការលើកឡើងរបស់អ្នកជំនាញ ដែលឱ្យបុរសចិនរៀបការជាមួយស្ត្រីបរទេស ដោយសារអាចមានបញ្ហាជួញដូរមនុស្សឆ្លងប្រទេស រួមទាំងឧបសគ្គផ្នែកភាសា និងវប្បធម៌ធ្វើឱ្យគ្រួសារបែកបាក់ ។

ក្រៅពីចិនប្រឈមនឹងបញ្ហាបុរសរាប់លាននាក់ខ្វះគូស្នេហ៍ ចិនក៏មានបញ្ហាចំនួនពលរដ្ឋធ្លាក់ចុះផងដែរ ដោយសារពលរដ្ឋចិនពុំចង់រៀបអាពាហ៍ពិពាហ៍ និងពុំចង់មានកូន ។ រដ្ឋាភិបាលចិនបានជំរុញឱ្យពលរដ្ឋរៀបការ ដោយផ្តល់ប្រាក់ឧបត្ថម្ភ និងកំណត់វិធានការលើកទឹកចិត្តផ្សេងៗ ប៉ុន្តែនៅតែពុំទទួលបានលទ្ធផល ហើយពលរដ្ឋចិនបានធ្លាក់ចុះខ្លាំងបំផុត នារយៈពេល៣៩ឆ្នាំមកនេះ ។

កាលពីឆ្នាំ២០២៤ ពលរដ្ឋចិនដែលបានរៀបអាពាហ៍ពិពាហ៍បានដាក់ពាក្យប្តឹងលែងលះកាន់តែច្រើន គឺស្មើ២លាន៦សែនគូ ឬដាក់ពាក្យលែងលះលើសឆ្នាំ២០២៣ រហូតដល់២៨,០០០គូ ។ មូលហេតុចម្បងធ្វើឱ្យពលរដ្ឋចិនពុំចង់បង្កើតក្រុមគ្រួសារ ដោយសារពួកគេខ្វះខាតថវិកាសម្រាប់ចិញ្ចឹមថែទាំកូន បង់ថ្លៃសាលា រួមទាំងយុវជនភាគច្រើនគ្មានការងារធ្វើ ។ ទោះជាបច្ចុប្បន្ន ចិនមានពលរដ្ឋ ស្មើជាង១ពាន់៤រយលាននាក់ ស្ថិតក្នុងលំដាប់ទី២ លើពិភពលោក បន្ទាប់ពីឥណ្ឌា ប៉ុន្តែក្នុងចំនួននេះ គឺចិនសម្បូរពលរដ្ឋអាយុច្រើន ៕

ប្រទេសថៃ ៖ នាពេលថ្មីៗនេះ ពលរដ្ឋថៃដែលដើររកផ្សិតនៅតំបន់ព្រៃភ្នំភ្លើងក្រាដូង ខេត្តបុរីរាំ បានឮសំឡេងទឹកហូរយ៉ាងអាថ៌កំបាំងក្នុងព្រៃ ហើយក៏ថតវីដេអូបង្ហោះក្នុងបណ្តាញសង្គម រហូតធ្វើឱ្យអ្នកលេងបណ្តាញសង្គមភិតភ័យ ។ ពួកគេសន្និដ្ឋានថា វាអាចជាសញ្ញាបន្ទុះភ្នំភ្លើងនៅខេត្តភាគឦសានដូចការទស្សន៍ទាយរបស់អ្នកស្រី ប្រាយ ក្រាស៊ិប ជាគ្រូទាញដ៏ល្បីល្បាញនៅប្រទេសថៃ គឺបានទាយថា ភ្នំភ្លើងដែលស្ងប់ស្ងាត់យូរមកហើយនឹងផ្ទុះឡើងនៅខេត្តភាគឦសាន ។

កាលពីថ្ងៃទី២៦ ខែឧសភា ឆ្នាំ២០២៥ លោក វុទ្ធិឆៃ ភិរុណស៊ុនថន ប្រធានការិយាល័យធនធានធម្មជាតិ និងបរិស្ថានខេត្តបុរីរាំ ព្រមទាំងមន្ត្រីពាក់ព័ន្ធបានចុះពិនិត្យមើលតំបន់ឮសំឡេងទឹកហូរខ្លាំងដើម្បីរកមូលហេតុឱ្យច្បាស់លាស់ ក្រោយពីពលរដ្ឋមករកផ្សិត និងអាហារព្រៃនៅតំបន់ព្រៃភ្នំភ្លើងក្រាដូង ដែលជាតំបន់ហាមបរបាញ់សត្វ ក្នុងស្រុកមឿង ខេត្តបុរីរាំ និយាយថា បានឮសំឡេងទឹកហូរពីទីខ្ពស់មកទាប ស្រដៀងនឹងសំឡេងទឹកពុះ ឬសំឡេងទឹកចេញពីក្នុងដីនៅកណ្តាលព្រៃ និងថតវីដេអូបង្ហោះក្នុងបណ្តាញសង្គម ។

ក្រោយពីបង្ហោះវីដេអូក្នុងបណ្តាញសង្គមធ្វើឱ្យអ្នកភូមិមួយចំនួនបារម្ភពីសំឡេងទឹកហូរក្នុងតំបន់ព្រៃ ហើយខ្លាចដូចការទស្សន៍ទាយរបស់អ្នកស្រី ប្រាយ ក្រាស៊ិប ជាគ្រូទាញដ៏ល្បីល្បាញ ដែលទាយថា នឹងមានភ្នំភ្លើងផ្ទុះនៅខេត្តភាគឦសាន ។ ប៉ុន្តែតាមការពិនិត្យមើលរបស់អាជ្ញាធរឃើញថា វាគ្រាន់តែជាសំឡេងទឹកហូរកាត់ថ្មនៅក្រោមដីប៉ុណ្ណោះ ហើយទឹកតែងតែហូរជាញឹកញាប់ក្រោយភ្លៀងធ្លាក់ខ្លាំង ។

លោក វុទ្ធិឆៃ ភិរុណស៊ុនថន ប្រធានការិយាល័យធនធានធម្មជាតិ និងបរិស្ថានខេត្តបុរីរាំ និយាយថា ភ្នំភ្លើងក្រាដូង នៅខេត្តបុរីរាំ បានរលត់ហើយ ។ កាលពីថ្ងៃទី២១ ខែឧសភា កន្លងមក នៅខេត្តបុរីរាំ ជាពិសេស នៅតំបន់ភ្នំក្រាដូង មានភ្លៀងធ្លាក់យ៉ាងខ្លាំងតាំងពីពេលរសៀល រហូតដល់កណ្តាលយប់ ។ នាថ្ងៃបន្ទាប់ គឺថ្ងៃទី២២ ខែឧសភា ក្រោយភ្លៀងធ្លាក់រួច អ្នកភូមិក៏នាំគ្នាទៅរកផ្សិតក្នុងព្រៃ ហើយឮសំឡេងទឹកហូរក្រោមដី ។

ពេលភ្លៀងខ្លាំងធ្វើឱ្យទឹកជ្រាបចូលក្នុងដី ហើយទឹកមួយចំនួនក៏ហូរទៅតំបន់ទាបៗ ឬហូរតាមថ្មក្រោមដី ទើបធ្វើឱ្យឮសំឡេងទឹកហូរក្រោមដីបែបនេះ ។ វាមិនមែនកើតឡើងតែនៅតំបន់ដែលអ្នកភូមិថតវីដេអូបង្ហោះក្នុងបណ្តាញសង្គមប៉ុណ្ណោះទេ គឺតំបន់ជាច្រើនទៀត ក៏មានទឹកហូរក្រោមដីដែរ ។ រីឯការលើកឡើងថា វាជាទឹកក្តៅនោះ គឺនៅក្រោមដីមានកំដៅ និងមានចំហាយទឹកក្តៅ ។ ដូច្នេះ សូមពលរដ្ឋកុំភិតភ័យ ពីព្រោះនៅតំបន់ភ្នំក្រាដូង ពុំធ្លាប់កើតរញ្ជួយដី ឬបន្ទុះភ្នំភ្លើងទេ ។

លោក វុទ្ធិឆៃ បន្តថា តំបន់ភ្នំក្រាដូង គឺជាកន្លែងរកអាហារព្រៃរបស់ពលរដ្ឋខេត្តបុរីរាំ និងពលរដ្ឋនៅខេត្តក្បែរនេះ ហើយលោកសូមសំណូមពរពេលពលរដ្ឋមករកផ្សិតក្នុងព្រៃ គឺសូមយកសំរាមត្រឡប់ទៅវិញផង ជួយគ្នាសម្អាតបរិស្ថាន កុំយកសំរាមមកបោះចោលក្នុងព្រៃ ។ ហេតុនេះ ព្រៃនឹងផ្តល់នូវអាហារព្រៃសម្បូរបែបយូរអង្វែងសម្រាប់កូនចៅជំនាន់ក្រោយបន្តទៀត ។

តាមការសាកសួរអ្នកភូមិផ្សេងទៀតដែលមករកផ្សិតនៅព្រៃភ្នំក្រាដូង ប្រាប់ថា ពួកគេបានឃើញព័ត៌មានក្នុងបណ្តាញសង្គមជជែកគ្នាពីសំឡេងទឹកហូរក្នុងព្រៃនេះ ប៉ុន្តែវាជាជំនឿរបស់បុគ្គលម្នាក់ៗប៉ុណ្ណោះ ពីព្រោះតាំងពីខ្លួនមករកផ្សិតនៅទីនេះ ពុំធ្លាប់ឮសំឡេងទឹកហូរទេ ៕

ប្រទេសថៃ ៖ សារព័ត៌មានថៃ Top News Online រាយការណ៍ថា កាលពីថ្ងៃទី២៤ ខែឧសភា ឆ្នាំ២០២៥ អតីតទាហានឈុតខ្មៅថៃ និងទាហានចូលនិវត្តន៍ ស្មើជាង៥០០នាក់ បានមកផ្តល់កម្លាំងចិត្តដល់ទាហានថៃនៅប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ ។ អតីតទាហានឈុតខ្មៅ និងទាហានចូលនិវត្តន៍និយាយថា បើទោះជាចូលនិវត្តន៍ក្តី ប៉ុន្តែពួកគេនៅតែស្រឡាញ់ និងបារម្ភពីទឹកដី មិនឱ្យប្រទេសណាមកឈ្លានពានដាច់ខាត ។

តាមការចុះផ្សាយរបស់សារព័ត៌មានថៃ គឺបច្ចុប្បន្ន នៅប្រាសាទតាមាន់ធំ មានសភាពអ៊ូអរយ៉ាងខ្លាំង ដោយសារពលរដ្ឋថៃនាំគ្នាទៅផ្តល់កម្លាំងចិត្តដល់ទាហានថៃនៅប្រាសាទតាមាន់ធំ ។ កាលពីថ្ងៃទី២៤ ខែឧសភា កន្លងមក លោក កុលរ៉ាគត់ កេតកែវ អតីតទាហានថៃ បានបង្ហោះវីដេអូក្រុមទាហានឈុតខ្មៅថៃ និងទាហានចូលនិវត្តន៍ ជាង៥០០នាក់ ធ្វើដំណើរមកផ្តល់កម្លាំងចិត្តដល់ទាហានថៃនៅប្រាសាទតាមាន់ធំ ដែលថៃចាត់ទុកថា នេះជាថ្ងៃពិសេសយ៉ាងខ្លាំង ពីព្រោះជាការរួមគ្នាដើម្បីជាតិ ។

លោក កុលរ៉ាគត់ កេតកែវ អតីតទាហានថៃនិយាយថា យើងមកជួបជុំមិត្តភក្តិអតីតទាហានរបស់យើង ពីព្រោះធ្លាប់សន្យាថា យើងនឹងជួបគ្នាពេលប្រទេសជាតិត្រូវការ ។ យើងគ្រប់គ្នានឹងបង្ហាញឱ្យពលរដ្ឋថៃឃើញថា ទោះជាចូលនិវត្តន៍ក្តី ប៉ុន្តែយើងនៅតែស្រឡាញ់ជាតិ និងមកផ្តល់កម្លាំងចិត្តដល់ប្អូនៗទាហានឈរជើងនៅប្រាសាទតាមាន់ធំ ។

ចំណែកលោក កាំម៉ាណាត ណយភុប អតីតមេបញ្ជាការទាហានឈុតខ្មៅថៃនៅខេត្តប៉ាធុមថានី និយាយថា ការមកប្រមូលផ្តុំគ្នានៅប្រាសាទតាមាន់ធំ គឺមកផ្តល់កម្លាំងចិត្តដល់ទាហានថៃនៅព្រំដែន ។ យើងចង់បង្ហាញថា យើងជាអតីតទាហានឈុតខ្មៅនៅតែស្រឡាញ់ និងបារម្ភពីទឹកដីដែលយើងធ្លាប់ការពារសម្រាប់កូនចៅ ។ យើងនឹងពុំឱ្យអ្នកណាម្នាក់ ឬប្រទេសណាបំផ្លាញប្រទេសយើងទេ យើងនឹងបង្ហាញពីភក្តីភាពដល់ជាតិ សាសនា និងព្រះមហាក្សត្រ ។

គួរបញ្ជាក់ថា ក្រុមទាហានឈុតខ្មៅថៃមកពីជំរំប៉ាកថុងឆ័យ ខេត្តឧប៊ុនរ៉ាជថានី ដឹកនាំដោយវរសេនីយ៍ឯក ចរិយា ស៊ីរ៉ាក់ស៊ី, នាយកសមាគមទាហានល្បាតខេត្តឧប៊ុនរ៉ាជថានី ព្រមទាំងអតីតទាហានឈុតខ្មៅថៃមកពីតំបន់ជាច្រើន ដូចជា ៖ ឧប៊ុនរ៉ាជថានី ប៉ាកថុងឆ័យ កូរ៉ាជ និងសុរិន្ទ បានធ្វើដំណើរមកផ្តល់កម្លាំងចិត្តដល់ទាហានថៃ ដែលថៃចាត់ទុកថា បំពេញភារកិច្ចការពារអធិបតេយ្យនៅប្រាសាទតាមាន់ធំ ដោយមានអតីតទាហានឈុតខ្មៅ និងទាហានចូលនិវត្តន៍មកពីទូទាំងប្រទេស ជាង៥០០នាក់ ចូលរួម ។

នេះជាការតាំងចិត្តរបស់អតីតទាហានឈុតខ្មៅ និងទាហានចូលនិវត្តន៍ ដែលនៅតែស្រឡាញ់ជាតិ ទោះជាចូលនិវត្តន៍ពីការងារ ដើម្បីបង្ហាញកម្លាំង និងផ្តល់កម្លាំងចិត្តដល់ទាហានប្អូនៗនៅការពារទឹកដីថៃ ។ អតីតទាហានឈុតខ្មៅបានបង្ហាញពីភាពរឹងមាំ មិនថាពេលវេលាកន្លងផុតទៅជាច្រើនឆ្នាំ ប៉ុន្តែគ្រប់គ្នានៅតែស្រឡាញ់ជាតិ និងគាំទ្រប្អូនៗទាហានយ៉ាងពេញទំហឹង ។ វាធ្វើឱ្យបរិយាកាសនៅប្រាសាទតាមាន់ធំ ពោរពេញដោយស្នាមញញឹម និងកក់ក្តៅ ទោះជាមេឃធ្លាក់ភ្លៀង ប៉ុន្តែគ្មានអ្នកណាម្នាក់រាថយ ។ បន្ទាប់មក អតីតទាហានឈុតខ្មៅថៃក៏បានប្រគល់សម្ភារៈមួយចំនួនឱ្យទាហានថៃនៅប្រាសាទតាមាន់ធំ ព្រមទាំងបញ្ជាក់ថា នឹងពុំឱ្យអ្នកណាម្នាក់មកឈ្លានពានដាច់ខាត ។ នេះបើតាមការចុះផ្សាយរបស់សារព័ត៌មានថៃ ។

ដោយឡែក គេហទំព័រព័ត៌មាន Dongrak News បានបង្ហោះរូបភាព និងវីដេអូការជួបជុំគ្នារបស់អតីតទាហានឈុតខ្មៅ និងទាហានចូលនិវត្តន៍ ដោយសរសេរថា ៖ «អតីតទាហាននៅទូទាំងប្រទេស ស្មើជាង៥០០នាក់ បានមកផ្តល់កម្លាំងចិត្តដល់ប្អូនៗទាហាននៅប្រាសាទតាមាន់ធំ ទោះជាមានភ្លៀងធ្លាក់ ប៉ុន្តែបរិយាកាសពោរពេញទៅដោយស្នាមញញឹម និងកក់ក្តៅ» ៕

ហុងកុង ៖ កាលពីថ្ងៃទី២៦ ខែឧសភា ឆ្នាំ២០២៥ សារព័ត៌មាន Reuters រាយការណ៍ថា នាយកដ្ឋានអប់រំទីក្រុងហុងកុង បានអំពាវនាវឱ្យសាកលវិទ្យាល័យនានាទទួលស្វាគមន៍និស្សិត និងអ្នកជំនាញបរទេស ក្រោយពីរដ្ឋាភិបាលអាមេរិករបស់លោកប្រធានាធិបតី Donald Trump ហាមឃាត់សាកលវិទ្យាល័យ Harvard កុំឱ្យទទួលនិស្សិតបរទេសមកសិក្សា និងចោទប្រកាន់សាកលវិទ្យាល័យនេះថា បានសហការជាមួយគណបក្សកុម្មុយនិស្តចិន ។

រដ្ឋាភិបាលអាមេរិកបានដកហូតសិទ្ធិរបស់សាកលវិទ្យាល័យ Harvard កុំឱ្យទទួលនិស្សិតបរទេស និងបង្ខំឱ្យនិស្សិតបរទេសដែលកំពុងសិក្សាត្រូវផ្លាស់ប្តូរសាកលវិទ្យាល័យ បើមិនដូច្នោះទេ ពួកគេប្រឈមនឹងការលុបចោលទិដ្ឋាការសិក្សា ។ ការហាមឃាត់សាកលវិទ្យាល័យ Harvard គឺអនុវត្តក្នុងឆ្នាំសិក្សា២០២៥ ដល់ឆ្នាំ២០២៦ ហើយរដ្ឋាភិបាលអាមេរិកចោទប្រកាន់សាកលវិទ្យាល័យនេះថា ជំរុញឱ្យនិស្សិតប្រឆាំងនឹងជនជាតិ Semitism និងសហការជាមួយគណបក្សកុម្មុយនិស្តចិន ក្រោយពីសាកលវិទ្យាល័យ Harvard ទទួលនិស្សិតចិនម្នាក់ ក្នុងចំណោមនិស្សិតបរទេស៥នាក់ មកសិក្សានៅឆ្នាំ២០២៤ ។

ក្នុងអ៊ីម៉ែលរបស់នាយកដ្ឋានអប់រំទីក្រុងហុងកុងបញ្ជាក់ថា នាយកដ្ឋានសូមអំពាវនាវឱ្យសាកលវិទ្យាល័យទាំងអស់នៅទីក្រុងហុងកុង កំណត់វិធានការផ្តល់ភាពងាយស្រួលឱ្យបេក្ខជនមានគុណសម្បត្តិមកពីក្រៅប្រទេស ដើម្បីឱ្យនិស្សិត និងអ្នកជំនាញបរទេសទទួលបានសិទ្ធិ និងផលប្រយោជន៍ស្របច្បាប់ ។ ក្រៅពីនេះ នាយកដ្ឋានក៏បានទាក់ទងទៅកាន់ Harvard Club of Hong Kong ផងដែរ ដើម្បីគាំទ្រនិស្សិតបរទេស ដែលអនុញ្ញាតឱ្យចូលសិក្សានៅសាកលវិទ្យាល័យ Harvard ។

ខ្លឹមសារក្នុងអ៊ីម៉ែលរបស់នាយកដ្ឋានអប់រំទីក្រុងហុងកុង បញ្ជាក់ទៀតថា យើងនឹងតាមដាននិស្សិតបរទេសដែលមានផលប៉ះពាល់ក្នុងការសិក្សា ហើយយើងនឹងគាំទ្រពួកគេមកសិក្សានៅសាកលវិទ្យាល័យនានានៅហុងកុង ដើម្បីឱ្យហុងកុងក្លាយជាមជ្ឈមណ្ឌលអប់រំអន្តរជាតិ ។

គួរបញ្ជាក់ថា ទីក្រុងហុងកុង មានពលរដ្ឋរស់នៅប្រមាណ ៧លាន៥សែននាក់ ហើយមានសាកលវិទ្យាល័យចំនួន៥ បានជាប់ចំណាត់ថ្នាក់ជាសាកលវិទ្យាល័យល្អបំផុតលើពិភពលោក ក្នុងចំណោមសាកលវិទ្យាល័យចំនួន១០០ ដែលចាត់ចំណាត់ថ្នាក់ដោយ Times Higher Education World University Rankings ។ បច្ចុប្បន្ន ហុងកុង គឺជាកន្លែងដែលនិស្សិតមានសេរីភាពក្នុងការសិក្សានៅតំបន់អាស៊ី ៕