តារាកំប្លែង ពាក់មី លើកឡើងបែបនេះក្រោយ John Sey និយាយដាក់អ្នកសិល្បៈល្បីមួយ ចំនួនមិននិយាយពីសៀម

ភាពតានតឹងរវាងជម្លោះបន្ទាត់ព្រំដែនរវាងខ្មែរនិងថៃមិនទាន់មានសញ្ញាប្រសើរឡើងនៅឡើយទេខណៈដែលប្រជាជនខ្មែរភាគច្រើននិងជនជាតិថៃដែលមកធ្វើការនៅស្រុកខ្មែរសុទ្ធតែសម្រេចចិត្តវិលត្រឡប់ទៅប្រទេសរៀងៗខ្លួនវិញ។ បញ្ហាវិវាទប្រទេសក្បែរខាងទាំង ពីរបានបង្កទៅជាការវែកញែកសម្រាប់អ្នកសិល្បៈដែលចេញមកនិយាយនិងអ្នកសិល្បៈដែលមិនចេញមកនិយាយអំពីជម្លោះនេះ។

នៅយប់ថ្ងៃទី២៥ មិថុនា លោក John Sey បានបង្ហោះសំណេរមួយបង្កឱ្យមានការចាប់អារម្មណ៍យ៉ាងខ្លាំងពីសាធារណជនរួមទាំងអ្នកក្នុងចង្កោមសិល្បៈដោយហេតុអ្នក Reviews ល្បីឈ្មោះរូបនេះបានលើកឡើងអំពីអ្នកសិល្បៈខ្មែរល្បីមួយចំនួន។ លោកបានបង្ហោះថា «តារាស្រុកខ្មែរល្បីៗមួយចំនួន ស្ងាត់ច្រៀប រឿង Siam ! ប្រហែលជាប់ sponsor»។

ពាក្យសម្តីនេះបានជំរុញឱ្យមានការពិភាក្សាគ្នាយ៉ាងក្តៅគគុក។ អ្នកលេងបណ្តាញសង្គមមួយចំនួនក៏បានបញ្ចេញមតិយល់ស្របនិងគាំទ្រការលើកឡើងរបស់លោក John Sey ខណៈអ្នកមួយចំនួនបានប្រឆាំងចំពោះការបង្ហោះនេះដោយបានលើកឡើងហេតុផលថា អ្នកដែលមិនចេញមកនិយាយមិនមែនគេមិនស្នេហាជាតិនោះទេ។

មិនត្រឹមតែទស្សនិកជនប៉ុណ្ណោះទេដែលចេញមកជជែកវែកញែកគ្នាអំពីប្រយោគរបស់លោក John Sey ក្នុងនោះលោក ចែម ចាន់រ៉ា ដែលជាតារាកំប្លែងដ៏ល្បីឈ្មោះប្រចាំប្រទេសក៏បានបញ្ចេញមតិយោបល់ដូចគ្នាព្រោះលោកក៏ជាអ្នកសិល្បៈមួយរូប។

តារាកំប្លែងរូបនេះបាន Screenshot ការបង្ហោះរបស់ John Sey ហើយបានភ្ជាប់មក ជាមួយនឹងសម្តីថា «គ្រាន់តែសរសេរហើយផុស មិនពិបាកទេប្អូន ការសរសេរបស់ប្អូន អាចធ្វើឱ្យពុកម៉ែបងប្អូនមួយចំនួនតូច មានអារម្មណ៍មិនល្អជាមួយ សិល្បៈដែលបងជា សិល្បៈដែរ។ អាទិត្យក្រោយបងទៅទៀត បងចង់បានជំនួយ ជួយអំពូលសឡា និង ពិល ដើម្បីជូនទៅកងទ័ពយើង សង្ឃឹមថាប្អូននឹងជួយផ្សព្វផ្សាយឬក៏អាចរួមដំណើរទៅ ជាមួយបងក៏បាន ខ្មែរស្រលាញ់ខ្មែរ ខ្មែរជួយខ្មែរ»។ តារាកំប្លែង ពាក់មី បានបញ្ជាក់ចុង ក្រោយថា ប្រសិនជាមានអ្នកចង់ផ្តល់ជំនួយដូចជា អំពូលសឡា ឬ ពិលអាចឆាតទាក់ ទងមកលោកបាន៕