តូក្យូ៖ សត្វចិញ្ចឹមរ៉ូបូតមានរោមទន់ល្មើយដែលបំពាក់ដោយបញ្ញាសិប្បនិមិត្ត បានកំពុងវាយលុកនៅក្នុងទីផ្សារអ្នកស្រឡាញ់សត្វចិញ្ចឹមនៅជប៉ុន ដោយសារវាអាចអភិវឌ្ឍបុគ្គលិកលក្ខណៈ និងទម្លាប់ប្លែកៗ អាស្រ័យលើរបៀបដែលពួកវាត្រូវបាន “ចិញ្ចឹម” ។

Moflin សត្វចិញ្ចឹមរ៉ូបូត ដែលផលិតដោយក្រុមហ៊ុន Casio Computer Co. វាមានរោមទន់ៗ ដូចសត្វពិតប្រាកដ ប៉ុន្តែមានបុគ្គលិកលក្ខណៈប្លែកៗជាង ៤ លានប្រភេទ ពិសេសវាអាចចង់ចាំ និងស្គាល់អ្នកដែលនិយាយជាមួយវាញឹកញាប់ថាជាម្ចាស់បានទៀតផង។ បន្ថែមពីនេះ វាស្វែងយល់បន្តិចម្តងៗនូវអ្វីដែលម្ចាស់របស់វាចូលចិត្ត ដោយផ្អែកលើសកម្មភាពដូចជាការថើប និងការឱបជាដើម។

លោកស្រី Erina Ichikawa អាយុ ៤២ ឆ្នាំ ជាអ្នកដឹកនាំក្រុមដែលអភិវឌ្ឍ Moflin បាននិយាយថា “គោលដៅនៃការអភិវឌ្ឍន៍ Moflin គឺសម្រាប់ស្រ្តីជាចម្បង។ យើងបានស្រមៃមើលថា Moflin ជាជំនួយការដែលអាចផ្តល់ការគាំទ្រផ្លូវចិត្ត ដល់ម្ចាស់របស់វា បើទោះបីជាម្ចាស់របស់វាកំពុងប្រឈមមុខនឹងបញ្ហាអ្វីមួយក៏ដោយ”។

ជាលទ្ធផល គម្រោងនេះទទួលបានសន្ទុះនៃការគាំទ្រយ៉ាងខ្លាំង បន្ទាប់ពីវិស្វករម្នាក់ពីក្រុមហ៊ុន Casio បាននាំយកមនុស្សយន្តគំរូនេះ ក្នុងគោលបំណងបង្ហាញពីភាពគួរឱ្យស្រលាញ់របស់សត្វតូចៗ ហើយវាទទួលបានការចាប់អារម្មណ៍ច្រើន និងអភិវឌ្ឍបានលឿនជាងមុនផងដែរ។

បន្ថែមពីនេះ Casio ដែលបានចេញលក់ Moflin កាលពីខែវិច្ឆិកា ឆ្នាំមុន ដោយបានលក់លើសពីគោលដៅរបស់ខ្លួន ហើយលក់បានជាង ៧,០០០ គ្រឿងត្រឹមខែមីនា ឆ្នាំ ២០២៥ នេះ។ យោងតាមក្រុមហ៊ុនបានឱ្យដឹងថា ពួកគេមានប្រជាប្រិយភាពជាពិសេសក្នុងចំណោមស្ត្រីក្នុងវ័យ ៣០ ទៅ ៤០ ឆ្នាំ។ អ្នកស្រី Ichikawa បានកត់សម្គាល់ឃើញថា មានមនុស្សមួយចំនួនថែមទាំងនាំសត្វចិញ្ចឹម AI នេះ ទៅដំណើរកម្សាន្តនៅថ្ងៃសម្រាកទៀតផង។

អ្នកស្រីបន្តថា “មនុស្សអាចមានអារម្មណ៍ថា Moflins របស់ពួកគេខុសពី Moflins ផ្សេងទៀត នេះក៏ដោយសារពួកវាដូចជាសត្វពិតៗ និងអារម្មណ៍រៀងៗខ្លួន ព្រមទាំងការលូតលាស់ និងមានវដ្តនៃការគេងក៏ខុសៗគ្នាផងដែរ” ។

សូមបញ្ជាក់ថា បច្ចុប្បន្នមនុស្សយន្តនេះមានតម្លៃ ៥៩,៤០០ យ៉េន (ឬប្រហែល៤០០ ដុល្លារ)។ យ៉ាងងណាមិញក្រុមហ៊ុនផលិតក៏ផ្តល់សេវាកម្មបន្ថែមផងដែរ រួមទាំងកន្លែងថែទាំ ដែលលាង និងសម្អាតរោមរបស់មនុស្សយន្តទាំងនេះផងដែរ៕

ប្រទេសថៃ ៖ កាលពីថ្ងៃទី៧ ខែសីហា ឆ្នាំ២០២៥ សារព័ត៌មានថៃ Khaosod រាយការណ៍ថា អ្នកនាំពាក្យគណបក្សផ្លាំងប្រាឆារ៉ាត់បានស្នើឱ្យរដ្ឋាភិបាលខ្លួនលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ ដោយសារបារម្ភខ្លាចថៃបាត់បង់ទឹកដី និងដែនទឹកនៅកោះគុត ពីព្រោះមានអតីតអ្នកនយោបាយថៃចុះហត្ថលេខាទទួលស្គាល់ផែនទីដែលខុសគ្នាពីផែនទីរបស់ថៃ ។

អ្នកនាំពាក្យគណបក្សផ្លាំងប្រាឆារ៉ាត់ លោក ពិយៈ តាវិឆៃ បាននិយាយកាលពីថ្ងៃទី៧ ខែសីហា អំពីគោលជំហររបស់គណបក្សចំពោះស្ថានការណ៍ព្រំដែនកម្ពុជា-ថៃថា ស្ថានការណ៍ពេលនេះ ប្រទេសថៃចាំបាច់ត្រូវមានកម្លាំងសាមគ្គី និងរក្សាទឹកដី ។ គណបក្សផ្លាំងប្រាឆារ៉ាត់មើលឃើញថា ថៃត្រូវតែលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ ពីព្រោះកិច្ចព្រមព្រៀងនេះអាចធ្វើឱ្យថៃបាត់បង់ទឹកដីបន្ថែមទៀត ។

លោកនិយាយថា មានអតីតអ្នកនយោបាយថៃបានចុះហត្ថលេខាលើឯកសារទទួលស្គាល់ផែនទី ដែលខុសគ្នាពីផែនទីរបស់ថៃដែលប្រើប្រាស់នាពេលបច្ចុប្បន្ន ។ បើថៃនៅតែទទួលស្គាល់កិច្ចព្រមព្រៀងទាំង២ ថៃនឹងបាត់បង់ទឹកដីលើកទី១៦ ។ ក្រៅពីនេះ កិច្ចព្រមព្រៀងឆ្នាំ២០០១ នឹងធ្វើឱ្យថៃប្រឈមការបាត់បង់ដែនទឹកនៅកោះគុត និងបាត់បង់ដែនទឹកមួយផ្នែកក្នុងឈូងសមុទ្រថៃ ។

បញ្ហាសំខាន់ គឺកិច្ចព្រមព្រៀងឆ្នាំ២០០១ ផ្ទុយនឹងការប្រកាសក្នុងរាជកិច្ចឆ្នាំ១៩៧៣ សម័យព្រះមហាក្សត្រថៃរជ្ជកាលទី៩ ។ ព្រះមហាក្សត្រថៃសម័យនោះបានប្រកាសកំណត់ព្រំដែនឈូងសមុទ្រថៃដោយយោងតាមច្បាប់សមុទ្រអន្តរជាតិ និងអនុសញ្ញានៅទីក្រុងហ្សឺណែវ ស្តីពីដែនសមុទ្រ និងតំបន់ជាប់គ្នា ។

នេះជាការកំណត់ច្បាស់លាស់នៃព្រំដែនសមុទ្ររបស់ថៃ ហើយកិច្ចព្រមព្រៀងទាំង២ ជាពិសេស កិច្ចព្រមព្រៀងឆ្នាំ២០០១ បានប៉ះពាល់ដល់ទឹកដីថៃ ។ ការលុបចោលកិច្ចព្រមព្រៀងនេះត្រូវឆ្លងកាត់ការអនុម័តពីរដ្ឋសភា ប៉ុន្តែបច្ចុប្បន្ន រដ្ឋសភាពុំទាន់អនុម័ត ។ គណបក្សផ្លាំងប្រាឆារ៉ាត់មានគោលជំហរច្បាស់លាស់សូមស្នើរដ្ឋាភិបាលថៃលុបចោលកិច្ចព្រមព្រៀងទាំង២ គឺកិច្ចព្រមព្រៀងឆ្នាំ២០០០ និងឆ្នាំ២០០១ ។

ផ្ទុយទៅវិញ លោក រ៉ាត់ ឆាលីចាន់ អតីតឯកអគ្គរាជទូត និងជាជំនួយការរដ្ឋមន្ត្រីក្រសួងការបរទេសថៃបានផ្តល់បទសម្ភាសន៍ពិសេសថា ស្ថានការណ៍ព្រំដែនកម្ពុជា-ថៃបច្ចុប្បន្នផុយស្រួយ ហើយគណបក្សនយោបាយមួយស្នើរដ្ឋាភិបាលលុបចោលកិច្ចព្រមព្រៀងឆ្នាំ២០០០ និងឆ្នាំ២០០១ លោកថា ការលុបចោលកិច្ចព្រមព្រៀងនឹងធ្វើឱ្យថៃចាញ់ប្រៀប ហើយកម្ពុជាទទួលបានប្រយោជន៍ ។

វាគួរឱ្យភ្ញាក់ផ្អើលដែលគណបក្សនយោបាយមួយស្នើឱ្យលុបចោលកិច្ចព្រមព្រៀងទាំង២ ខណៈគណបក្សនេះធ្លាប់ចូលរួមជាមួយរដ្ឋាភិបាលអាណត្តិមុនអស់រយៈពេលជាច្រើនឆ្នាំ ហើយពុំធ្លាប់ជំទាស់នឹងកិច្ចព្រមព្រៀង ប៉ុន្តែពេលនេះ បែរជាផ្លាស់ប្តូរគោលជំហរធ្វើឱ្យមានការសង្ស័យពីចេតនា និងភាពស្មោះត្រង់ ។ នេះបើតាមលោក រ៉ាត់ ឆាលីចាន់ ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon ឱ្យដឹងថា កាលពីថ្ងៃទី៨ ខែសីហា ឆ្នាំ២០២៥ បុរសលក់ផ្លែឈើជនជាតិថៃម្នាក់នៅឃុំប៉ាតង ស្រុកកាធូ ខេត្តភូកេត បានឈ្លោះប្រកែកជាមួយភ្ញៀវទេសចរបរទេស និងចោទប្រកាន់ភ្ញៀវទេសចរទិញផ្លែឈើខ្លួនហើយពុំឱ្យប្រាក់ចំនួន៦០បាត (ឬស្មើ៦ពាន់រៀល) ក៏យកកាំបិតចា.ក់ពោះភ្ញៀវទេសចរបណ្តាលឱ្យរងរបួសធ្ងន់ធ្លាយពោះវៀន ។

សមត្ថកិច្ចខេត្តភូកេត បានទទួលសេចក្តីរាយការណ៍ថា នាវេលាម៉ោង២និង២០នាទី ថ្ងៃទី៨ ខែសីហា បុរសលក់ផ្លែឈើជនជាតិថៃបានឈ្លោះប្រកែកជាមួយភ្ញៀវទេសចរបរទេស ហើយបុរសថៃក៏យកកាំបិទចាក់ពោះភ្ញៀវទេសចរបណ្តាលឱ្យរងរបួសធ្ងន់ធ្លាយពោះវៀន នៅមុខគ្លីនិកមួយកន្លែងតាមផ្លូវរ៉ាជអ៊ុថីត ២០០ ឃុំប៉ាតង ស្រុកកាធូ ខេត្តភូកេត ។ បន្ទាប់មក សមត្ថកិច្ចក៏បានប្រមូលកម្លាំងពាក់ព័ន្ធចុះទៅត្រួតពិនិត្យនៅកន្លែងកើតហេតុ ។

ជនបរទេសដែលត្រូវបុរសថៃលក់ផ្លែឈើយកកាំបិតចាក់នេះ ឈ្មោះ Orsan Hidayet Oglu Orkan អាយុ៣៤ឆ្នាំ សញ្ជាតិអាស៊ែបៃហ្សង់ (Azerbaijani) រងរបួសនៅបរិវេណពោះ និងធ្លាយពោះវៀន ។ សមត្ថកិច្ចក៏បានបញ្ជូនជនរងគ្រោះទៅសង្គ្រោះបន្ទាន់មន្ទីរពេទ្យប៉ាតង ។

ក្រោយពីធ្វើសកម្មភាព ជនល្មើសឈ្មោះ ប៉ាន់ អាយុ២៥ឆ្នាំ បានអង្គុយនៅខាងមុខគ្លីនិក និងសារភាពប្រាប់សមត្ថកិច្ចថា ខ្លួន និងសង្សារជាអ្នកលក់ផ្លែឈើតាមម៉ូតូកង់៣ ។ រីឯភ្ញៀវទេសចរបានដើរមកទិញផ្លែឈើខ្លួន បរិភោគរួចហើយពុំព្រមឱ្យលុយចំនួន៦០បាត (ឬស្មើ៦ពាន់រៀល) ទើបមានការប្រកែកគ្នាខ្លាំងៗ ហើយខ្លួនក៏យកកាំបិតចាក់ពោះរបស់ភ្ញៀវទេសចរតែម្តង ។

បន្ទាប់ពីសួរនាំជនល្មើសរួច សមត្ថកិច្ចក៏បានចាប់ខ្លួនជនល្មើសបញ្ជូនទៅសួរចម្លើយនៅស្ថានីយប៉ូលិសប៉ាតង ដើម្បីចាត់វិធានការតាមផ្លូវច្បាប់បន្តទៀតដើម្បីកុំឱ្យខូចកេរ្តិ៍ឈ្មោះប្រទេសថៃ ថាជាប្រទេសគ្មានសុវត្ថិភាពសម្រាប់ភ្ញៀវទេសចរ ។

យើងសង្កេតឃើញថា តាំងពីកងទ័ពថៃបើកការឈ្លានពានទឹកដីកម្ពុជា គឺភ្ញៀវទេសចរមកលេងថៃធ្លាក់ចុះយ៉ាងខ្លាំង ដោយសារគ្មានទំនុកចិត្ត បញ្ហាអសន្តិសុខកើនឡើង និងពលរដ្ឋថៃពុំគោរពច្បាប់ ។

ហេតុការណ៍ជនជាតិថៃយកកាំបិតចាក់ភ្ញៀវទេសចរសញ្ជាតិអាស៊ែបៃហ្សង់នៅខេត្តភូកេត គឺកើតឡើងក្រោយហេតុការណ៍ជនជាតិថៃដុតភ្លើងភ្ញៀវទេសចរម៉ាឡេស៊ីនៅទីក្រុងបាងកក កាលពីថ្ងៃទី៧ ខែសីហា ។ តាមការផ្សព្វផ្សាយរបស់សារព័ត៌មាន Khaosod ឱ្យដឹងថា ជនជាតិថៃម្នាក់ជាអតីតកីឡាករប្រដាល់បានយកធាតុរាវម្យ៉ាងដែលគេប្រើសម្រាប់រំលាយទឹកថ្នាំ និងងាយឆាបឆេះ ទៅចាក់ស្រោចលើភ្ញៀវទេសចរម៉ាឡេស៊ី២នាក់ រួចយកដែកកេះមកដុតបណ្ដាលឲ្យរងរបួសធ្ងន់ធ្ងរក្នុងចំណោមហ្វូងមនុស្សនៅទីក្រុងបាងកក ៕

តាមការផ្សព្វផ្សាយរបស់សារព័ត៌មានថៃ Daily News និង Khaosod កាលពីថ្ងៃទី១០ ខែសីហា ឆ្នាំ២០២៥ ឱ្យដឹងថា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានប្រកាសដណ្តើមកាន់កាប់ប្រាសាទតាក្របី និងបិទប្រាសាទតាមាន់ធំ ដែលស្ថិតក្នុងដែនអធិបតេយ្យ និងបូរណភាពទឹកដីកម្ពុជា ព្រមទាំងនិយាយបំភ្លៃការពិតថា ប្រាសាទតាក្របីជារបស់ថៃ ថៃត្រូវតែយកមកវិញឱ្យបាន ។

កាលពីថ្ងៃទី១០ ខែសីហា នៅជំរំសុណារី ខេត្តនគរាជសីម៉ា មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានធ្វើដំណើរមកទទួលស្បៀងអាហាររបស់ពលរដ្ឋថៃដែលបរិច្ចាគឱ្យកងទ័ពនៅព្រំដែន ហើយលោកក៏បានប្រគល់ដ្រូនឱ្យកងទ័ពដើម្បីបង្កើនសមត្ថភាពការពារសន្តិសុខជាតិ ។ ការផ្តល់ស្បៀងអាហារនេះរួមដំណើរដោយលោក វ៉ាន់មូហាម៉ាត់ ណរម៉ាថា ប្រធានរដ្ឋសភា ព្រមទាំងមន្ត្រីជាច្រើននាក់ ។

មេបញ្ជាការយោធភូមិភាគ២ លោក ប៊ុនស៊ីន ផាកក្លាង បានអរគុណដល់ពលរដ្ឋថៃដែលបានបរិច្ចាគស្បៀងឱ្យកងទ័ពនៅព្រំដែនកម្ពុជា-ថៃ ហើយលោកចោទប្រកាន់ថា កងទ័ពកម្ពុជាបានបង្កប់មីនថ្មីចូលដីថៃ ចាប់ពី១០០ម៉ែត្រ ទៅ១៥០ម៉ែត្រ រហូតធ្វើឱ្យកងទ័ពថៃជាន់មីនរងរបួស ។ លោកថែមទាំងចោទប្រកាន់កម្ពុជាពុំគោរពអនុសញ្ញាអូតាវ៉ា និងបង្កភាពរញ៉េរញ៉ៃនៅប្រាសាទតាមាន់ធំ ។

លោកនិយាយបំភ្លៃការពិតថា ៖ «ប្រាសាទតាក្របីជារបស់ថៃ ថៃត្រូវតែយកប្រាសាទនេះមកវិញឱ្យបាន ខ្ញុំនៅសល់ពេលតែ៥១ថ្ងៃនឹងចូលនិវត្តន៍ពីការងារ ដូច្នេះ ខ្ញុំនឹងបំពេញតួនាទីជាមេទ័ពឱ្យល្អបំផុត ។ ខ្ញុំពុំទាន់គិតអ្វីទេក្រោយចូលនិវត្តន៍ ខ្ញុំទុកចិត្តមេទ័ពថ្មី និងកងទ័ពទាំងអស់ ខ្ញុំត្រៀមខ្លួនសម្រាប់អ្វីដែលកើតឡើង ទោះជាមានសង្គ្រាម ឬគ្មាន ។ ខ្ញុំជឿថា អ្នកមកធ្វើជាមេទ័ពថ្មីនឹងមានបទពិសោធន៍ ហើយខ្ញ។នឹងធ្វើជាពលរដ្ឋល្អបន្ទាប់ពីចូលនិវត្តន៍» ។

ដោយឡែក ប្រាសាទតាមាន់ធំ ថៃអនុញ្ញាតឱ្យពលរដ្ឋខ្មែរ-ថៃឡើងមកប្រាសាទតាមាន់ធំ ទើបថៃពុំអាចបិទប្រាសាទតាមាន់ធំបាននាពេលកន្លងមក ហើយលោកត្រូវបានពលរដ្ឋថៃទូទាំងប្រទេសជេរស្តីរឿងពុំព្រមបិទប្រាសាទតាមាន់ធំរបស់កម្ពុជា ។ ប៉ុន្តែពេលនេះ ថៃនឹងបិទប្រាសាទតាមាន់ធំ ដោយសារមានការប៉ះទង្គិចគ្នាលើប្រាសាទរវាងពលរដ្ឋខ្មែរ-ថៃ ខណៈការធ្វើសង្គ្រាមកន្លងមក ថៃដណ្តើមកាន់កាប់បាន១១តំបន់ ក្នុងនោះថៃបានកាន់កាប់ភ្នំទ្រព្យផងដែរ ។ នេះបើតាមការលើកឡើងរបស់លោក ប៊ុនស៊ីន ផាកក្លាង ។

នៅថ្ងៃទី១០ ខែសីហា ក្រសួងការពារជាតិកម្ពុជាបានចេញសេចក្តីប្រកាសព័ត៌មានដល់សាធារណជន និងសហគមន៍អន្តរជាតិឱ្យបានជ្រាបថា នៅថ្ងៃទី១០ ខែសីហា មេបញ្ជាការយោធភូមិភាគ២ ប៊ុនស៊ីន ផាកក្លាង បានប្រកាសផែនការមុនចូលនិវត្តន៍របស់ខ្លួនដែលនៅសល់តែ៥១ថ្ងៃទៀត គឺ ៖ ១- ដណ្តើមកាន់កាប់ប្រាសាទតាក្របីពីការគ្រប់គ្រងស្របច្បាប់របស់កម្ពុជា និង២-ប្រកាសបិទប្រាសាទតាមាន់ធំដែលស្ថិតក្នុងដែនអធិបតេយ្យ និងបូរណភាពទឹកដីកម្ពុជា ។ ការប្រកាសនេះជាភស្តុតាង មិនអាចប្រកែកបានបញ្ជាក់ពីការបង្កហេតុ និងប៉ុនប៉ងឈ្លានពានទឹកដីកម្ពុជាដោយចេតនា និងគិតទុកជាមុន ។

ទង្វើរបស់មេបញ្ជាការភូមិភាគ២ ថៃខាងលើ ក៏ជាការរំលោភបំពានលើកិច្ចព្រមព្រៀងបទឈប់បាញ់ សម្រេចនៅក្នុងកិច្ចប្រជុំពិសេស នាថ្ងៃទី២៨ ខែកក្កដា ឆ្នាំ២០២៥ និងស្មារតីនៃកិច្ចប្រជុំវិសាមញ្ញរបស់គណៈកម្មាធិការព្រំដែនទូទៅ GBC កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី ។ ក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ GBC, ភាគីកម្ពុជា-ថៃបានឯកភាពគ្នា ជាពិសេស ចំណុចទី២ ដែលបានចែងថា ភាគីទាំងពីរមិនត្រូវចល័តកងទ័ពរបស់ខ្លួន រាប់បញ្ចូលទាំងការមិនដើរល្បាតហួសពីទីតាំងរបស់ខ្លួនដែលឈរជើងឡើយ ។

កម្ពុជាសូមគូសបញ្ជាក់ពីគោលជំហរដ៏ម៉ឺងម៉ាត់របស់ខ្លួនក្នុងការរកដំណោះស្រាយដោយសន្តិវិធី និងប្រកាន់គោលការណ៍សន្តិភាពជាធំ និងអនុវត្តយ៉ាងខ្ជាប់ខ្ជួននូវបទឈប់បាញ់ ហើយកម្ពុជាសង្ឃឹមថា ភាគីថៃនឹងប្រកាន់គោលជំហរដូចគ្នាប្រកបដោយភាពស្មោះត្រង់ដើម្បីឈានទៅបញ្ចប់ការប្រឈមមុខដាក់គ្នាទាំងស្រុងដើម្បីស្តារមកវិញនូវសន្តិភាព ប្រក្រតីភាព និងប្រជាពលរដ្ឋនៃប្រទេសទាំងពីររស់នៅក្នុងសុខសន្តិភាព ៕