ខ្ចិលខ្វល់នឹងបញ្ហារបស់លោកខាងលិចនិងមជ្ឈិមបូព៌ា ប្រទេសចិនកំពុងផ្ដោតលើការអភិវឌ្ឍសមត្ថភាពផលិតប្រេងតាមរយៈការដាក់ចេញនូវនាវាបំបែ.កស្រទាប់ដីក្រោមបាតសមុទ្រខ្នាតយក្សដំបូងគេបង្អស់ដែលខ្លួនបានរចនាឡើង ដើម្បីចាប់ផ្ដើមដំណើរប្រើប្រាស់ជាផ្លូវការក្នុងការទាញយកប្រេង និងឧស្ម័នពីបាតសមុទ្រដោយខ្លួនឯង។

យោងតាមការចុះផ្សាយរបស់សារព័ត៌មាន CGTN របស់ចិនកាលពីថ្ងៃអង្គារ ទី១០ ខែមីនា បានឲ្យដឹងថា នាវាឈ្មោះ Haiyang Shiyou 696 នឹងត្រូវបានដាក់ពង្រាយទៅកាន់តំបន់ប្រេងនៅឯនាយសមុទ្រក្នុងដែនទឹកដាច់ស្រយាលរបស់ប្រទេសចិន រួមទាំងសមុទ្រ Bohai ដើម្បីអនុវត្តប្រតិបត្តិការបំបែកដីយកប្រេង ដែលមានគោលបំណងជំរុញផលិតភាពពីអាងស្តុកប្រេង និងឧស្ម័នបាតសមុទ្រដែលមានភាពជ្រាបចូលទាប និងការចល័តទាប។

នាវាខ្នាតយក្សនេះ ត្រូវបានចាត់ទុកថាជាឧបករណ៍វិស្វកម្មដ៏សំខាន់សម្រាប់ការអភិវឌ្ឍធនធាននៅឯនាយសមុទ្របែបនេះប្រកបដោយប្រសិទ្ធភាព។ ជាមួយគ្នានេះ ការដាក់ចេញឲ្យប្រើប្រាស់នូវនាវា Haiyang Shiyou 696 នឹងបំពេញចន្លោះប្រហោងនៃបច្ចេកវិទ្យាបំបែកប្រេង និងឧស្ម័ននៅឯនាយសមុទ្រ ហើយត្រូវបានគេរំពឹងថានឹងបង្កើនសមត្ថភាពអភិវឌ្ឍន៍ថាមពលនៅឯនាយសមុទ្រ និងសន្តិសុខថាមពលរបស់ប្រទេសចិនបន្ថែមទៀតផងដែរ។

លោក Zhang Ming ប្រធានវិស្វករផ្នែកខួង ដែលបញ្ចប់នៅវិទ្យាស្ថានស្រាវជ្រាវវាលប្រេង Bohai នៅតំបន់ Tianjin នៃសាជីវកម្មប្រេងជាតិនៅឯនាយសមុទ្រចិនបាននិយាយថា «យើងបានបំពាក់នាវានេះជាមួយនឹងមជ្ឈមណ្ឌលបញ្ជាការសម្រេចចិត្តឆ្លាតវៃដែលប្រើប្រាស់ប្រព័ន្ធទិន្នន័យជាក់ស្តែង (Real-time data) និងបច្ចេកវិទ្យាបញ្ញាសិប្បនិម្មិត (AI) មកជួយក្នុងការវិភាគ និងសម្រេចចិត្តលើរាល់ប្រតិបត្តិការបច្ចេកទេស ជំនួសឱ្យការប្រើប្រាស់បទពិសោធន៍ផ្ទាល់ខ្លួនដូចមុន ដែលធ្វើឱ្យការងារកាន់តែមានលក្ខណៈវិទ្យាសាស្ត្រ និងមានសុក្រឹតភាពខ្ពស់។

គួរជម្រាបថា នាវា ‘Haiyang Shiyou 696’ គឺជានាវាដំបូងគេដែលត្រូវបានសាងសង់សម្រាប់ប្រតិបត្តិការបំបែកស្រទាប់ដីយកប្រេងដោយក្រុមហ៊ុន CNOOC ដោយមានប្រវែង 99.8 ម៉ែត្រ ជាមួយនឹងផ្ទៃនាវាមានទំហំប្រហាក់ប្រហែលនឹងទីលានបាល់បោះស្តង់ដារមួយ។ នាវានេះជាប់ចំណាត់ថ្នាក់ជានាវាធំជាងគេបំផុតរបស់ពិភពលោកនៃប្រភេទរបស់វា និងមានតម្លៃប្រមាណ 514.42 លានដុល្លារអាមេរិក៕

តាំងពីផ្ទុះសង្គ្រា.មនៅតំបន់មជ្ឈិមបូព៌ារវាងអ៊ីរ៉ង់ជាមួយអាមេរិក និងអ៊ីស្រាអែល ធ្វើឱ្យប្រទេសថៃប្រឈមវិបត្តិប្រេងឥន្ធនៈយ៉ាងធ្ងន់ធ្ងរ ពលរដ្ឋថៃតាមបណ្តាខេត្តសម្រុកយកធុងធំៗទៅចាក់ប្រេងតាមស្ថានីយបន្តកន្ទុយគ្នា រហូតដល់ស្ថានីយអស់ប្រេងលក់ ។ លើសពីនេះ មេដឹកនាំថៃថែមទាំងសំណូមពរឱ្យពលរដ្ឋសហការសន្សំសំចៃប្រេង កុំប្រើប្រាស់អគ្គិសនីខ្ជះខ្ជាយ ពីព្រោះស្ថានការណ៍តានតឹងនៅមជ្ឈិមបូព៌ានៅតែបន្ត ប៉ុន្តែសារព័ត៌មានថៃបែរជាផ្សព្វផ្សាយព័ត៌មានបំភ្លៃថា កម្ពុជាខ្វះខាតប្រេងទៅវិញ ។

សារព័ត៌មានថៃ Amarin News បានព្យាយាមផ្សព្វផ្សាយព័ត៌មានបំភ្លៃថា កម្ពុជាកំពុងតែជួបវិបត្តិប្រេងឥន្ធនៈយ៉ាងធ្ងន់ធ្ងរនៅតាមតំបន់ជនបទ ហើយតម្លៃប្រេងនៅកម្ពុជាអាចនឹងកើនឡើងខ្ពស់រហូតដល់៣០០បាតក្នុង១លីត្រ (ឬ ជិត៩ដុល្លារក្នុង១លីត្រ) នាថ្ងៃអនាគត ដោយសារប្រទេសនានាឈប់លក់ប្រេងឱ្យ ។ បច្ចុប្បន្ន ពលរដ្ឋកម្ពុជានៅជនបទជ្រួលច្របល់ខ្លាំងរឿងតម្លៃប្រេងកើនឡើង និងសម្រុកចាក់ប្រេងនៅតាមស្ថានីយ ។

សារព័ត៌មាន Amarin News ផ្សព្វផ្សាយថា តម្លៃប្រេងម៉ាស៊ូតនៅខេត្តបន្ទាយមានជ័យ កំពង់ធំ និងកំពង់ចាម បានកើនឡើងពីតម្លៃចាស់៣,០០០រៀលក្នុង១លីត្រ រហូតដល់៤,៤០០រៀលក្នុង១លីត្រ ខណៈតម្លៃប្រេងសាំងកើនឡើងរហូតដល់៥,១៥០រៀលក្នុង១លីត្រ ។ សារព័ត៌មាននេះថែមទាំងផ្សាយបំភ្លៃទៀតថា កម្ពុជាមិនអាចគ្រប់គ្រងតម្លៃប្រេងឥន្ធនៈនៅប្រទេសខ្លួន ហើយវិបត្តិប្រេងឥន្ធនៈទើបតែចាប់ផ្តើម នៅថ្ងៃមុខ កម្ពុជានឹងជួបវិបត្តិកាន់តែខ្លាំង ដោយសារថៃ ចិន សិង្ហបុរី និងវៀតណាម ឈប់លក់ប្រេងឱ្យ ។

សារព័ត៌មាននេះបានដកស្រង់ការវិភាគរបស់លោក ថៃកន ផុនសុវណ្ណ មន្ត្រីគណៈកម្មការការពារការបោកប្រាស់ពលរដ្ឋនៅប្រទេសថៃថា តម្លៃប្រេងនៅកម្ពុជាអាចនឹងកើនឡើងខ្ពស់រហូតដល់៣០០បាតក្នុង១លីត្រនៅថ្ងៃអនាគត ។

លោក ថៃកន និយាយថា ប្រទេសនានាបញ្ឈប់ការនាំចេញប្រេងទៅកាន់ប្រទេសទី៣ ដូចជា ៖ រដ្ឋាភិបាលចិនបានបញ្ជាឱ្យក្រុមហ៊ុនប្រេងចិនដ៏ធំផ្អាកការនាំចេញ រីឯសិង្ហបុរីគ្មានស្ថានីយបូមប្រេងដោយខ្លួនឯង ប៉ុន្តែអាចនាំចេញប្រេងដោយសារសិង្ហបុរីមានកន្លែងស្តុកប្រេង ហើយអតិថិជនសំខាន់របស់សិង្ហបុរីក្នុងតំបន់អាស៊ីអាគ្នេយ៍ គឺកម្ពុជា បន្ទាប់ពីកម្ពុជាឈប់ទិញប្រេងថៃ ។ បច្ចុប្បន្ន សិង្ហបុរីគ្មានប្រេងលក់ឱ្យកម្ពុជាទេ ធ្វើឱ្យកម្ពុជាជ្រួលច្របល់ដោយសារគ្មានប្រេង ទើបតម្លៃប្រេងនៅកម្ពុជាអាចកើនឡើងដល់៣០០បាតក្នុង១លីត្រនាថ្ងៃអនាគត បណ្តាលឱ្យប៉ះពាល់ការដឹកជញ្ជូន និងប៉ះពាល់គ្រប់ផ្នែក ។

សារព័ត៌មាន Amarin News បានលើកជាចម្ងល់ ប្រសិនបើកម្ពុជាមានប្រេងប្រើប្រាស់គ្រប់គ្រាន់ ហេតុអ្វីនៅតាមតំបន់ជនបទផ្សេងៗបង្ហោះរូបភាពលរដ្ឋសម្រុកទៅចាក់ប្រេងតាមស្ថានីយ ។ បើតាមរូបភាពនេះអាចឱ្យប្រទេសថៃសន្និដ្ឋានថា កម្ពុជាកំពុងខ្វះខាតប្រេងប្រើប្រាស់ ប៉ុន្តែលាក់បាំង ។

គួរបញ្ជាក់ថា ប្រទេសដែលកំពុងតែមានវិបត្តិប្រេងឥន្ធនៈយ៉ាងធ្ងន់ធ្ងរ គឺជាប្រទេសថៃខ្លួនឯង សង្គ្រាមនៅមជ្ឈិមបូព៌ាបានប៉ះពាល់សេដ្ឋកិច្ចថៃដោយផ្ទាល់ រហូតដល់នាយករដ្ឋមន្ត្រីថៃ លោក Anutin Charnvirakul សំណូមពរឱ្យពលរដ្ឋជួយសន្សំសំចៃប្រេង ពីព្រោះថៃមានប្រេងក្នុងស្តុកត្រឹមតែ៨,០៥៥លានលីត្រប៉ុណ្ណោះ ។ ពលរដ្ឋថៃនៅតាមបណ្តាខេត្តបានសម្រុកយកធុងធំៗទៅចាក់ប្រេងតាមស្ថានីយមកស្តុកទុក ពីព្រោះតម្លៃប្រេងកើនឡើងខ្ពស់ ដែលធ្វើឱ្យស្ថានីយប្រេងតាមខេត្តរបស់ថៃបិទទ្វារជាបន្តបន្ទាប់ ដោយសារគ្មានប្រេងលក់ ។

ប៉ុន្តែលោក Anutin បានច្រានចោលព័ត៌មានពលរដ្ឋរបស់ខ្លួនសម្រុកស្តុកប្រេងយ៉ាងច្រើនសន្ធឹកសន្ទាប់ ដោយលោកថា គ្មានពលរដ្ឋថៃណាស្តុកប្រេងនោះទេ ។ ទោះយ៉ាងណា ការពិតនៅតែជាការពិត ប្រទេសថៃខ្វះខាតប្រេងពិតមែន បើមិនខ្វះខាត មិនមែនពលរដ្ឋថៃបន្តកន្ទុយគ្នាយកធុងធំៗទៅចាក់ប្រេងនោះទេ ។

ចំណែកកម្ពុជានៅមិនទាន់ជួបស្ថានភាពខ្វះខាតប្រេងផ្គត់ផ្គង់នៅឡើយ ប្រេងបម្រុងរបស់កម្ពុជានៅតែរក្សាបានរយៈពេល២១ថ្ងៃ ។ បច្ចុប្បន្ន កម្ពុជានាំចូលប្រេងរាល់ថ្ងៃធម្មតាដើម្បីបំពេញប្រេងក្នុងស្តុក គ្រាន់តែប្រេងដែលនាំចូលកម្ពុជានាពេលថ្មីៗនេះ មានតម្លៃខ្ពស់ជាងមុន ៕

សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែល បានបង្កផលប៉ះពាល់ដល់ប្រទេសនានាលើពិភពលោក រួមទាំងប្រទេសនៅតំបន់អាស៊ីត្រូវប្រឈមនឹងការខ្វះខាតប្រេងឥន្ធនៈ និងឧស្ម័នប្រើប្រាស់ ។ គិតត្រឹមថ្ងៃទី៩ ខែមីនា ឆ្នាំ២០២៦ តម្លៃប្រេងឆៅកើនឡើងរហូតដល់១០០ដុល្លារក្នុង១បារ៉ែល ដែលធ្វើឱ្យប្រទេសអាស៊ីជាច្រើនចាប់ផ្តើមចាត់វិធានការសន្សំសំចៃប្រេង និងឧស្ម័នរៀងៗខ្លួន ដើម្បីកុំឱ្យប៉ះពាល់សេដ្ឋកិច្ច ដូចជា ថៃ ៖ កំណត់ឱ្យមន្ត្រីរាជការធ្វើការពីផ្ទះ ចាប់ពីថ្ងៃទី១០ ខែមីនា តទៅ ។

តាមការចុះផ្សាយរបស់សារព័ត៌មាន Thairath លោកនាយករដ្ឋមន្ត្រី Anutin Charnvirakul បានកំណត់ឱ្យមន្ត្រីរាជការទាំងអស់ធ្វើការពីផ្ទះ (Work From Home) និងផ្អាកការធ្វើដំណើរទៅក្រៅប្រទេស លើកលែងតែការចូលរួមកិច្ចប្រជុំសំខាន់ៗ ចាប់ពីថ្ងៃទី១០ ខែមីនា រហូតដល់ស្ថានការណ៍នៅតំបន់មជ្ឈិមបូព៌ាល្អប្រសើរឡើងវិញ ដើម្បីសន្សំសំចៃការចំណាយលើប្រេងឥន្ធនៈដែលថៃរងផលប៉ះពាល់យ៉ាងខ្លាំងដោយសារតម្លៃប្រេងកើនឡើងខ្ពស់ ។

កាលពីវេលាម៉ោង១២ និង៣៥នាទីថ្ងៃត្រង់ ថ្ងៃទី១០ ខែមីនា អ្នកនាំពាក្យរងរដ្ឋាភិបាលថៃ អ្នកស្រី ឡាលិដា ប្រឺតវិវឌ្ឍនា បានប្រកាសព័ត៌មានបន្ទាន់ថា ស្ថានការណ៍សង្គ្រាមរវាងអ៊ីរ៉ង់ជាមួយអាមេរិក និងអ៊ីស្រាអែល បានឡើងកំដៅខ្លាំងនៅមជ្ឈិមបូព៌ាធ្វើឱ្យប៉ះពាល់ដោយផ្ទាល់មកលើស្ថិរភាពថាមពល និងតម្លៃប្រេងឥន្ធនៈនៅប្រទេសថៃ ។ លោកនាយករដ្ឋមន្ត្រី Anutin មើលឃើញពីផលប៉ះពាល់នេះ ទើបសម្រេចឱ្យមន្ត្រីរាជការទាំងអស់ធ្វើការពីផ្ទះចាប់ពីថ្ងៃប្រកាស ។

ការធ្វើការពីផ្ទះនេះ គឺសម្រាប់ការងារដែលមិនផ្តល់សេវាកម្មដល់ពលរដ្ឋ ដើម្បីកាត់បន្ថយការធ្វើដំណើរ និងកាត់បន្ថយការប្រើប្រាស់ប្រេងក្នុងអគាររដ្ឋ ហើយលោកនាយករដ្ឋមន្ត្រី Anutin ក៏បានកំណត់ឱ្យគ្រប់ស្ថាប័នរដ្ឋផ្អាកធ្វើដំណើរទៅក្រៅប្រទេស និងផ្អាករៀបចំកម្មវិធីបណ្តុះបណ្តាលនៅក្រៅប្រទេស ដោយប្តូរមករៀបចំកម្មវិធីនៅប្រទេសថៃជំនួសវិញ ដើម្បីសន្សំសំចៃថវិកាលើការទិញប្រេង ។

នាយករដ្ឋមន្ត្រីថៃបានជំរុញឱ្យគ្រប់ស្ថាប័នរដ្ឋតាមដានស្ថានការណ៍សេដ្ឋកិច្ច និងថាមពល ដើម្បីឱ្យប្រទេសថៃអាចផ្លាស់ប្តូរវិធានការភ្លាមៗ ព្រមទាំងសំណូមពរឱ្យស្ថាប័នរដ្ឋទាំងអស់សហការគ្នាសន្សំសំចៃការចំណាយប្រេងក្នុងពេលសង្គ្រាមនៅមជ្ឈិមបូព៌ាមិនទាន់បញ្ចប់ ។ ក្រៅពីនេះ ក៏សំណូមពរឱ្យពលរដ្ឋចូលរួមសហការកាត់បន្ថយការប្រើប្រាស់ថាមពល, កាត់បន្ថយសីតុណ្ហភាពម៉ាស៊ីនត្រជាក់, បិទភ្លើងមិនចាំបាច់ ខណៈនៅទូទាំងប្រទេសថៃបានប្រើប្រាស់ប្រេងជាមធ្យមចំនួន១២៤លានលីត្រក្នុង១ថ្ងៃ ហើយថៃមានប្រេងស្តុកទុកត្រឹមតែ៨,០៥៥លានលីត្រប៉ុណ្ណោះ ។

នេះជាការអនុវត្តវិធានការរបស់រដ្ឋាភិបាលថៃក្នុងការដោះស្រាយបញ្ហាតម្លៃប្រេងកំពុងតែកើនឡើងខ្ពស់លើពិភពលោក ដើម្បីកុំឱ្យប៉ះពាល់សេដ្ឋកិច្ច និងកាត់បន្ថយការចំណាយថវិកាលើការទិញប្រេង ដោយរដ្ឋាភិបាលជំរុញឱ្យស្ថាប័នរដ្ឋទាំងអស់ចូលរួមអនុវត្តតាមវិធានការនេះ ប៉ុន្តែមិនឱ្យធ្លាក់ចុះប្រសិទ្ធភាពការងារ ។

គួរបញ្ជាក់ថា ក្រៅពីប្រទេសថៃដែលបានអនុញ្ញាតឱ្យមន្ត្រីរាជការធ្វើការពីផ្ទះដើម្បីសន្សំសំចៃការចំណាយលើប្រេងឥន្ធនៈពេលស្ថានការណ៍សង្គ្រាមនៅមជ្ឈិមបូព៌ាឡើងកំដៅ ប្រទេសវៀតណាមក៏ជំរុញឱ្យពលរដ្ឋធ្វើការពីផ្ទះដែរដើម្បីសន្សំសំចៃប្រេង ខណៈប្រទេសហ្វីលីពីនសម្រេចឱ្យមន្ត្រីរាជការធ្វើការត្រឹមតែ៤ថ្ងៃប៉ុណ្ណោះក្នុង១សប្តាហ៍ ៕

នៅថ្ងៃទី១០ ខែមីនា ឆ្នាំ២០២៦នេះ កងទ័ពថៃបានសម្រេចកាត់បន្ថយកម្លាំងកងទ័ពឈរជើងនៅតាមបណ្តោយព្រំដែនកម្ពុជា-ថៃ ដោយសារគ្មានសញ្ញាជម្លោះណាមួយគួរឱ្យព្រួយបារម្ភដូចការលើកឡើងរបស់ពលរដ្ឋថៃមួយចំនួននោះទេ ។ កងទ័ពថៃថា ខ្លួនប្រកាន់គោលជំហរដោះស្រាយបញ្ហាតាមរយៈយន្តការទ្វេភាគីដែលមានស្រាប់ ដូចជា ៖ កិច្ចប្រជុំ JBC រវាងកម្ពុជា-ថៃ និងអនុវត្តតាមគោលការណ៍ដែលចែងក្នុងកិច្ចប្រជុំ GBC កន្លងមក ។

តាមការចុះផ្សាយរបស់សារព័ត៌មាន Matichon Online នៅថ្ងៃទី១០ ខែមីនា អ្នកនាំពាក្យកងទ័ពជើងគោកថៃបានជូនដំណឹងពីការសម្រេចចិត្តកែសម្រួលកម្លាំងកងទ័ពថៃនៅតាមបណ្តោយព្រំដែនជាប់ប្រទេសកម្ពុជា ដោយអ្នកនាំពាក្យរូបនេះសង្កត់ធ្ងន់ថា ការកែសម្រួលកម្លាំងកងទ័ពធ្វើឡើងស្របតាមស្ថានការណ៍បច្ចុប្បន្ន ដោយសារគ្មានសញ្ញាជម្លោះកើតឡើង ។ ស្ថានការណ៍ព្រំដែនកម្ពុជា-ថៃពេលនេះមិនគួរឱ្យបារម្ភឡើយ ប៉ុន្តែកងទ័ពថៃនៅតែតាមដានស្ថានការណ៍ជានិច្ច ។

អ្នកនាំពាក្យកងទ័ពជើងគោកថៃ លោក វីនឆ័យ សុវ៉ារី បាននិយាយពីពលរដ្ឋថៃមួយចំនួនបង្ហាញក្តីបារម្ភអំពីស្ថានការណ៍ព្រំដែនកម្ពុជា-ថៃថា គ្មានអ្វីកើតឡើងខុសប្រក្រតីទេ កងទ័ពជើងគោកថៃបានតាមដានស្ថានការណ៍យ៉ាងដិតដល់ បើតាមការវាយតម្លៃស្ថានការណ៍បច្ចុប្បន្ន គឺគ្មានសញ្ញាជម្លោះកើតឡើង ។

ចំណែកពលរដ្ឋមួយចំនួនបារម្ភថា កម្ពុជានឹងទាមទារទឹកដីរបស់ខ្លួនត្រឡប់ទៅវិញនោះ លោក វីនឆ័យ និយាយថា ប្រសិនបើកម្ពុជាទាមទារទឹកដីត្រឡប់ទៅវិញមែន គឺកម្ពុជានឹងប្រើប្រាស់វិធីការទូត ឬប្រើប្រាស់យន្តការទ្វេភាគី ។ រីឯការធ្វើសកម្មភាពរបស់កងទ័ពកម្ពុជានៅតំបន់ព្រំដែនគ្មានទេ ខណៈថៃប្រកាន់គោលជំហរដោះស្រាយបញ្ហាតាមរយៈយន្តការទ្វេភាគីដែលមានស្រាប់ ដូចជា ៖ កិច្ចប្រជុំ JBC រវាងកម្ពុជា-ថៃ និងអនុវត្តតាមគោលការណ៍ដែលចែងក្នុងកិច្ចប្រជុំ GBC កន្លងមក រហូតដល់ប្រទេសទាំងពីរពិភាក្សាគ្នាពីយន្តការពាក់ព័ន្ធនាថ្ងៃអនាគត ។

ការកាត់បន្ថយកម្លាំងកងទ័ពថៃនៅតាមបណ្តោយព្រំដែនជាប់កម្ពុជា គឺជាការកែសម្រួលកម្លាំងស្របតាមស្ថានការណ៍ជាក់ស្តែង និងជាប្រតិបត្តិការរបស់អង្គភាពកងទ័ព ដើម្បីឱ្យកងទ័ពមួយចំនួនអាចវិលត្រឡប់ទៅបំពេញភារកិច្ចធម្មតារបស់ខ្លួន ។ រីឯនៅព្រំដែនកម្ពុជា-ថៃ នៅតែមានការពង្រាយកម្លាំងកងទ័ពថៃដើម្បីត្រួតពិនិត្យស្ថានការណ៍ជាបន្តបន្ទាប់ ។

យោងតាមប្រភពព័ត៌មាន គឺគ្មានការបង្កសកម្មភាពណាមួយរបស់កងទ័ពកម្ពុជានៅតំបន់ព្រំដែនឈានទៅដល់ការប៉ះទង្គិចគ្នាជាលើកទី៣ ដូចពលរដ្ឋថៃមួយចំនួនប៉ាន់ស្មានទេ ។ ស្ថានការណ៍ព្រំដែនប្រទេសទាំងពីរនាពេលនេះមិនគួរឱ្យបារម្ភឡើយ ទោះយ៉ាងណា មេបញ្ជាការកងទ័ពថៃបានបញ្ជាឱ្យកងទ័ពគ្រប់អង្គភាពកុំឱ្យប្រមាថ ៕