ប្រទេសថៃ ៖ នៅថ្ងៃទី១០ ខែកក្កដា ឆ្នាំ២០២៥ សារព័ត៌មានថៃរាយការណ៍ថា ស្ត្រីជ.នជាតិថៃម្នាក់កើតទុក្ខពុំសុខចិត្តពេលមកលេងប្រាសាទតាមាន់ធំ ស្រាប់តែ GPS នៅលើអេក្រង់ទូរស័ព្ទដៃបង្ហាញដោយស្វ័យប្រវត្តិថា «សូមស្វាគមន៍មកដល់ទឹកដីប្រទេសកម្ពុជា» ។ ស្ត្រីថៃរូបនេះអះអាងថា ខ្លួនស្ថិតនៅប្រាសាទតាមាន់ធំក្នុងខេត្តសុរិន្ទ ទឹកដីប្រទេសថៃ ហេតុអ្វី GPS បង្ហាញសារជាទឹកដីកម្ពុជាទៅវិញ ។

អ្នកស្រី នីថា ចំប៉ាផុង អាយុ៦០ឆ្នាំ បានធ្វើដំណើរមកពីទីក្រុងបាងកក មកលេងនៅប្រាសាទតាមាន់ធំ ប៉ុន្តែគ្រាន់តែដើរមកកាន់ប្រាសាទតាមាន់ធំបានតែ២ជំហ៊ាន ស្រាប់តែ GPS នៅលើទូរស័ព្ទដៃបញ្ជាក់ថា អ្នកស្រីកំពុងស្ថិតក្នុងទឹកដីប្រទេសកម្ពុជា ។ ស្ត្រីរូបនេះភ្ញាក់ផ្អើលយ៉ាងខ្លាំង និងថា ខ្លួនស្ថិតក្នុងទឹកដីថៃ ពុំមែននៅក្រៅប្រទេសទេ ។

ស្ត្រីថៃរូបនេះបានផ្តាំផ្ញើទៅកាន់ស្ថាប័នដែលទទួលខុសត្រូវផ្នែកនេះឱ្យជួយមើល GPS ផង បើពុំដូច្នោះទេ ប្រទេសថៃអាចនឹងចាញ់ប្រៀបកម្ពុជា ហើយអះអាងថា ប្រាសាទតាមាន់ធំស្ថិតក្នុងទឹកដីថៃ ។ បន្ទាប់មក ស្ត្រីថៃក៏កាន់ទូរស័ព្ទដៃទៅសាកសួរភ្នាក់ងារទទួលខុសត្រូវក្នុងតំបន់ប្រាសាទឱ្យបកស្រាយរឿងការបង្ហាញសាររបស់ GPS ។

ភ្នាក់ងារទទួលខុសត្រូវក្នុងតំបន់ប្រាសាទប្រាប់ថា មានតែទូរស័ព្ទដៃនេះ១គ្រឿងប៉ុណ្ណោះ ដែល GPS បង្ហាញសារថា ប្រាសាទតាមាន់ធំស្ថិតក្នុងទឹកដីប្រទេសកម្ពុជា រីឯទូរស័ព្ទដៃផ្សេងទៀត GPS ពុំបង្ហាញសារបែបនេះទេ ខណៈកងទ័ពថៃនិយាយថា GPS ពុំពាក់ព័ន្ធនឹងបន្ទាត់ព្រំដែន ។

ដោយឡែក ពលរដ្ឋថៃជាច្រើនបានសម្រុកមកលេងប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ក្រោយពីមេបញ្ជាការកងទ័ពភូមិភាគ២ លោក ប៊ុនស៊ីន ផាកក្លាង ប្រាប់ឱ្យពលរដ្ឋថៃមកលេងប្រាសាទតាមព្រំដែនឱ្យបានច្រើន ដើម្បីបង្ហាញថាថៃជាម្ចាស់ប្រាសាទ ខណៈពលរដ្ឋខ្មែរយើងក៏មកលេងប្រាសាទបុរាណជាមរតកដូនតាខ្មែរច្រើនដែរ ។

គួរបញ្ជាក់ថា ប្រាសាទតាមាន់ធំ គឺស្ថិតនៅភូមិតាមាន់សែនជ័យ ឃុំគោកមន ស្រុកបន្ទាយអម្ពិល ខេត្តឧត្តរមានជ័យ នៅជាប់ព្រំដែនប្រទេសកម្ពុជា និងថៃ ដែលមានចម្ងាយប្រមាណ ៥០គីឡូម៉ែត្រពីទីរួមខេត្តឧត្តរមានជ័យ ។ ក្នុងនាមយើងជាពលរដ្ឋខ្មែរគួរនាំគ្នាមកលេងប្រាសាទបុរាណតាមព្រំដែនកម្ពុជា-ថៃឱ្យបានច្រើនដើម្បីបញ្ជាក់ថា ខ្មែរជាម្ចាស់ប្រាសាទពិតប្រាកដ ដែលដូនតាខ្មែរបន្សល់ទុកឱ្យកូនចៅជំនាន់ក្រោយថែរក្សា និងការពារឱ្យបានល្អកុំឱ្យបរទេសឈ្លានពាន ៕

ប្រទេសថៃ ៖ មេបញ្ជាការកងទ័ពថៃភូមិភាគ២ លោក ប៊ុនស៊ីន ផាកក្លាង ឱ្យដឹងថា បច្ចុប្បន្ន ស្ថានការណ៍ព្រំដែនកម្ពុជា-ថៃមានភាពធូរស្រាល ហើយកងទ័ពទាំង២ភាគីបានណាត់ចរចាដោយគ្មានអា.វុធ ចំនួន៣ដងក្នុង១សប្តាហ៍ ។ លោកពុំចង់ឱ្យប្រទេសទាំងពីរកើតសង្គ្រា.មទេ ប៉ុន្តែកងទ័ពត្រៀមខ្លួនការពារអធិបតេយ្យបើចាំបាច់ លោកជឿជាក់ថា បញ្ហាទាំងអស់នឹងបញ្ចប់ក្នុងរយៈពេល២ខែទៀត ។ នេះបើតាមការផ្សព្វផ្សាយរបស់សារព័ត៌មានថៃ The Structure កាលពីថ្ងៃទី៩ ខែកក្កដា ឆ្នាំ២០២៥ ។

លោក ប៊ុនស៊ីន ផាកក្លាង មេបញ្ជាការកងទ័ពភូមិភាគ២ បាននិយាយពីស្ថានការណ៍ព្រំដែនកម្ពុជា-ថៃនាពេលបច្ចុប្បន្នថា លោកបានណាត់ចរចាជាមួយកងទ័ពកម្ពុជាដោយគ្មានអាវុធ ចំនួន៣ដងក្នុង១សប្តាហ៍ នៅតំបន់មុំ៣ ។ ពេលនេះ ស្ថានការណ៍ព្រំដែនគ្រប់តំបន់ទាំងអស់ល្អប្រសើរ ហើយកងទ័ពក្នុងតំបន់គ្មានការប៉ះទង្គិច ឬកើតសង្គ្រាមទេ ។ ប៉ុន្តែអាស្រ័យលើការចរចារបស់រដ្ឋាភិបាលកម្ពុជា-ថៃ និងកំណត់ថា តើត្រូវចាត់វិធានការដូចម្តេច ។

ក្រោយកិច្ចប្រជុំគណៈកម្មការព្រំដែនតំបន់ (RBC) នឹងមានការកែសម្រួលកម្លាំងកងទ័ព ឬការបើកព្រំដែនកម្ពុជា-ថៃឡើងវិញ គឺនឹងអនុវត្តតាមដំណាក់កាល ។ ហេតុនេះ ការកំណត់វិធានការទាំងអស់អនុវត្តតាមគោលនយោបាយរបស់លោក ផាណា ក្លេវផ្លតថុក មេបញ្ជាការកងទ័ពជើងគោក ។

ចំណែកការសាងសង់សាលាត្រីមុខថ្មីនៅព្រំដែនឬក៏អត់ គឺនឹងរង់ចាំឱ្យស្ថានការណ៍ល្អប្រសើរជាងនេះ កងទ័ពថៃពុំត្រូវការសង្គ្រាមទេ ប៉ុន្តែក្នុងនាមជាកងទ័ពត្រូវតែការពារអធិបតេយ្យ និងត្រៀមខ្លួនជានិច្ច ។ ប្រសិនបើចាំបាច់ យើងត្រូវតែការពារខ្លួនឯង និងទឹកដី ។

លោក ប៊ុនស៊ីន ផាកក្លាង មេបញ្ជាការកងទ័ពភូមិភាគ២ បញ្ជាក់ថា បើមានស្ថានការណ៍អ្វីកើតឡើងអាចបញ្ចប់ត្រឹមរយៈពេល៣ថ្ងៃ ឬឆាប់រហ័សជាងនេះ គឺអាស្រ័យលើកត្តាជាច្រើន និងការត្រៀមខ្លួនរបស់ស្ថាប័នពាក់ព័ន្ធ ប៉ុន្តែដោយសារពេលនេះស្ថានការណ៍ធូរស្រាល លោកពុំចង់ឱ្យមានការប៉ះទង្គិចកើតឡើង ។ លោកនិយាយយ៉ាងមានទំនុកចិត្តថា ជម្លោះព្រំដែនកម្ពុជា-ថៃនឹងបញ្ចប់ក្នុងរយៈពេល២ខែទៀត ។

ចុងក្រោយ លោក ប៊ុនស៊ីន ផាកក្លាង បានផ្តាំផ្ញើមកសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ថែទាំសុខភាព ហើយលោកចង់ឱ្យរដ្ឋាភិបាលប្រទេសទាំងពីរដោះស្រាយបញ្ហាព្រំដែនដោយជោគជ័យដើម្បីសុខសន្តិភាពរបស់បងប្អូនខ្មែរ-ថៃ ៕

ប្រទេសថៃ ៖ កាលពីថ្ងៃទី៩ ខែកក្កដា ឆ្នាំ២០២៥ សារព័ត៌មាន Thai News រាយការណ៍ថា អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ បានផ្តល់បទសម្ភាសន៍ជាមួយសារព័ត៌មានពីស្ថានការណ៍ព្រំដែនកម្ពុជា-ថៃថា ជាបញ្ហាដែលប្រទេសទាំងពីរត្រូវពិភាក្សាគ្នាតាមរយៈយន្តការ ក្រោយពីបញ្ចប់កិច្ចប្រជុំគណៈកម្មការចម្រុះព្រំដែន (JBC) នឹងមានកិច្ចប្រជុំ GBC និង RBC ដែលត្រូវចរចា ។ ថៃអាចរង់ចាំ បើកម្ពុជាពុំព្រមចរចា គ្មានបញ្ហាទេ ពីព្រោះគ្មានការប៉ះទង្គិច រីឯកម្ពុជាបបួលថៃទៅតុលាការយុត្តិធម៌អន្តរជាតិ (ICJ) គឺឱ្យកម្ពុជាទៅតែឯង ថៃពុំចូលតុលាការ ។

លោក ថាក់ស៊ីន ស៊ីណាវ៉ាត់ អតីតនាយករដ្ឋមន្ត្រីថៃ និងជាឪពុកលោកស្រី ផេថងថាន ស៊ីណាវ៉ាត់ និយាយថា បញ្ហាបច្ចុប្បន្ន ពុំពាក់ព័ន្ធនឹងប្រាសាទព្រះវិហារទេ ពីព្រោះស្ថិតក្នុងតំបន់ផ្សេងគ្នា និងជម្លោះផ្សេងគ្នា ។ កម្ពុជា និងថៃពុំអាចដោះស្រាយបញ្ហាបាន គឺគ្មានផលប៉ះពាល់ដល់ប្រធានអាស៊ាន យើងចង់ដោះស្រាយបញ្ហា ដោយភាគីទាំងពីរងាកមកជជែកគ្នា បើពុំជជែកគ្នានឹងពិបាកដោះស្រាយបញ្ហា ។

លោកបន្តថា បញ្ហាព្រំដែនបានកើតឡើងនៅប្រទេសនានាលើពិភពលោក គ្មានប្រទេសណាមួយគ្មានបញ្ហាព្រំដែនទេ ប៉ុន្តែប្រទេសនានាពុំយកបញ្ហាព្រំដែនជារឿងធំ ។ ប្រទេសនានាចាត់ទុកថា អាចរស់នៅជាមួយគ្នាបាន មិនអីទេ ពីព្រោះពលរដ្ឋនៅព្រំដែនរាប់អានគ្នាទៅវិញទៅមកដូចមិត្តភក្តិ សាច់ញាតិ គ្មានរឿងអ្វីឡើយ ប៉ុន្តែបើកម្ពុជាយកបញ្ហាព្រំដែនជារឿងធំ គឺថៃពុំអើពើ ។ កម្ពុជាអាចខឹងរឿងព្រំដែនពាក់ព័ន្ធជាមួយកាស៊ីណូដែលពលរដ្ឋថៃទៅលេង ពលរដ្ឋថៃខាតបង់ប្រាក់ ចាប់ពី២ពាន់លាន ទៅ៣ពាន់លានបាតក្នុង១ឆ្នាំៗ រួមទាំងបញ្ហាចាញ់បោក Call Center ជាច្រើន យើងត្រូវចាត់វិធានការដើម្បីពលរដ្ឋថៃ ។

រដ្ឋាភិបាលថៃត្រូវតែធ្វើឱ្យល្អបំផុត បញ្ហាទាំងអស់នឹងកន្លងផុតទៅ ពុំចាំបាច់បារម្ភឡើយ ។ រឿងក្តីផ្សេងៗពាក់ព័ន្ធនឹងកូនស្រី (គឺលោកស្រី ផេថងថាន ស៊ីណាវ៉ាត់) ក៏គ្មានបញ្ហាដែរ គឺដោះស្រាយតាមផ្លូវច្បាប់ ។ រីឯករណីកូនស្រីរបស់លោកនិយាយទូរស័ព្ទប្រាប់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ថា មេបញ្ជាការកងទ័ពភូមិភាគ២ លោក ប៊ុនស៊ីន ផាកក្លាង គឺជាភាគីផ្សេងគ្នាពីរដ្ឋាភិបាល គឺចង់មានន័យថា គំនិតនយោបាយខុសគ្នា ពុំមែនភាគីផ្សេងគ្នាទេ ។

ដោយឡែក ដីកាថៃបានចេញដីកាឱ្យសមត្ថកិច្ច Cyber ថៃចាប់ខ្លួនលោកឧកញ៉ា កុក អាន សញ្ជាតិខ្មែរ ដោយចោទប្រកាន់ថា ជាម្ចាស់ទីតាំងឧក្រិដ្ឋ.កម្មឆ្លងដែន, ពាក់ព័ន្ធជាមួយឧក្រិដ្ឋ.កម្មឆ្លងដែន និងលាងលុយក.ខ្វក់ លោក ថាក់ស៊ីន ថា ពុំស្គាល់លោកឧកញ៉ា កុក អាន ជាអ្នកណាទេ ។ លោកដឹងនៅពេលក្រោយថា លោកឧកញ៉ាជាម្ចាស់អគារកម្ពស់២៥ជាន់ និងពុំធ្លាប់ឃើញមុខ ៕

ប្រទេសថៃ ៖ លោក វីរៈ ស៊ុមខ្វាមឃិត ប្រធានក្រុមការពារសេរីភាពប្រជាជន និងប្រធានបណ្តាញប្រជាជនប្រឆាំងអំពើពុករលួយរបស់ថៃបាននិយាយក្នុងបទសម្ភាសន៍ជាមួយសារព័ត៌មានថៃ ដែលត្រូវបានយកមកផ្សព្វផ្សាយក្នុង TikTok នាដើមខែកក្កដា ឆ្នាំ២០២៥ ថា បើកម្ពុជាពុំព្រមដកថយទេ កងទ័ពថៃនឹងវាយយកប្រទេសកម្ពុជាទាំងមូល ។ កាលពីសម័យក្រុងស្រ៊ី បើបារាំងពុំដណ្តើមទឹកដីពីថៃ គឺបច្ចុប្បន្ន កម្ពុជាជាទឹកដីមួយផ្នែករបស់ថៃ ។

លោក វីរៈ ស៊ុមខ្វាមឃិត និយាយថា កម្ពុជាពុំចាំបាច់ទៅតុលាការយុត្តិធម៌អន្តរជាតិ (ICJ) ទេ បើកម្ពុជាចាប់ផ្តើមបង្កសង្គ្រាមជាមួយថៃ សូមឱ្យកងទ័ពថៃវាយយកប្រទេសកម្ពុជាទាំងមូល រួចហើយចាំចរចាគ្នា ។ កម្ពុជាធ្លាប់ស្ថិតនៅក្រោមអាណានិគមថៃតាំងពីឆ្នាំ១៧៧៥ គឺចាប់ពីសម័យអយុធ្យា រហូតដល់សម័យរជ្ជកាលទី៥ ក្រុងរតនៈកូស៊ីន ហើយលោកថា លោកនិយាយតាមប្រវត្តិសាស្ត្រ ។

ចាប់ពីឆ្នាំ១៩០៤ ពេលថៃធ្វើសន្ធិសញ្ញាព្រំដែនជាមួយបារាំង បារាំងក៏បានដាក់អាណានិគមមកលើប្រទេសកម្ពុជា ឡាវ វៀតណាម ពេលនោះ បារាំងក៏យកទឹកដីមួយផ្នែករបស់ថៃ គឺកម្ពុជា ។ កម្ពុជាគ្មានប្រទេសទេ ការពិត ព្រំដែនរវាងកម្ពុជា-ថៃពុំចាំបាច់មានក៏បានដែរ ពីព្រោះកម្ពុជាជាទឹកដីមួយផ្នែករបស់ថៃ ។ ពេលកម្ពុជាអះអាងថា ប្រាសាទថ្មទាំងអស់នៅថៃជារបស់កម្ពុជា ខ្ញុំសូមប្រាប់ថា ប្រាសាទថ្មទាំងអស់ពុំមែនជារបស់កម្ពុជាទេ គឺជារបស់ខម ហើយខមពុំមែនជាបុព្វបុរសរបស់កម្ពុជា ។ នេះជាការលើកឡើងរបស់លោក វីរៈ ស៊ុមខ្វាមឃិត ។

លោក វីរៈ ស៊ុមខ្វាមឃិត បញ្ជាក់ថា ប្រទេសកម្ពុជាទាំងមូលជាផ្នែកមួយរបស់ប្រទេសថៃ ពីព្រោះកម្ពុជាធ្លាប់ស្ថិតនៅក្រោមអាណានិគមថៃ ។ រីឯការធ្វើសន្ធិសញ្ញារវាងស្យ៉ាម និងបារាំង គឺក្រោយពីបារាំងប្រគល់ឯករាជ្យឱ្យកម្ពុជានៅឆ្នាំ១៩៥៣ ទើបកម្ពុជាទទួលបានផលប្រយោជន៍ពីសន្ធិសញ្ញាស្យ៉ាម-បារាំងផងដែរ ហើយកម្ពុជាយកសន្ធិសញ្ញានេះមកចោទប្រកាន់ថៃ ។

គួរបញ្ជាក់ថា លោក វីរៈ ស៊ុមខ្វាមឃិត គឺជាមេដឹកនាំក្រុមជ្រុលនិយមថៃ និងធ្លាប់ចូលទឹកដីកម្ពុជាដោយខុសច្បាប់ជាមួយជនជាតិថៃ ចំនួន៦នាក់ទៀត ក្នុងអំឡុងពេលលោក អាប់ភីស៊ីត វ៉េចាជីវ៉ា ធ្វើជានាយករដ្ឋមន្ត្រីថៃ ។ រីឯការលើកឡើងរបស់លោកថា កម្ពុជាជាទឹកដីមួយផ្នែករបស់ថៃ គឺខុសពីប្រវត្តិសាស្ត្រហើយ ពីព្រោះលោកពុំបានសិក្សាពីប្រវត្តិសាស្ត្រពិតប្រាកដ លោកអានតែប្រវត្តិសាស្ត្រដែលថៃប្រឌិតឡើងមក ៕

ប៉ារីសៈ គណៈប្រតិភូថៃ ដែលបានចូលរួមកិច្ចប្រជុំជាមួយគណៈកម្មាធិការបេតិកភណ្ឌពិភពលោក នៅទីក្រុងប៉ារីស កើតទុក្ខមិនសុខចិត្ត ក្រោយរងភាពអាម៉ាស នៅពេលដែលរដ្ឋមន្ត្រីក្រសួងវប្បធម៌របស់កម្ពុជាបានចោ.ទប្រកាន់ប្រទេសថៃថាបានចម្លងរចនាបថប្រាសាទអង្គរវត្ត ដោយគ្មានក្រមសីលធម៌នៅក្នុងចំណោមតំណាងប្រទេសមកពីទូទាំងពិភពលោក។

យោងតាមសារព័ត៌មាន Khaosod នារសៀល ថ្ងៃសុក្រ ទី១១ ខែកក្កដា បានឲ្យដឹងថា ប្រធានគណៈប្រតិភូថៃ លោក Seehasak Phuangketkaew បានប្រតិកម្មយ៉ាងខ្លាំងចំពោះការចោ.ទប្រកាន់នេះ ដោយហៅវាថាជាហេតុផលនយោបាយ និងមិនសមរម្យក្នុងការលើកយកមកនិយាយនៅវេទិកាបេតិកភណ្ឌពិភពលោកបែបនេះទេ។

លោក Seehasak បានច្រានចោលការលើកឡើងនេះ ដោយធ្វើការពន្យល់ថាវត្តភូម៉ាន់ហ្វា ដែលស្ថិតនៅខេត្តបុរីរម្យ ប្រទេសថៃ គឺជាស្ថាបត្យកម្មព្រះពុទ្ធសាសនា ដែលត្រូវបានបំផុសគំនិតដោយទីតាំងប្រវត្តិសាស្ត្រផ្សេងៗរបស់ថៃ មិនមែនជាការចម្លងនៃប្រាសាទដ៏ល្បីល្បាញរបស់ប្រទេសកម្ពុជានោះទេ។ លោកបានសម្តែងការភ្ញាក់ផ្អើល និងការខកចិត្តចំពោះការអះអាងរបស់ប្រទេសកម្ពុជា។

តំណាងប្រតិភូថៃរូបនេះ បានកត់សម្គាល់ថា កម្ពុជាតែងបញ្ចុះបញ្ចូលប្រទេសផ្សេងទៀតឲ្យនៅខាងខ្លួន ប៉ុន្តែមិនបានជោគជ័យឡើយ ព្រោះភាគច្រើនប្រទេសទាំងនោះបានចាត់ទុកវាជាបញ្ហាទ្វេភាគី ច្រើនជាងយល់ថាវាជាសមត្ថកិច្ចរបស់អង្គការយូណេស្កូ។ ជាមួយគ្នានេះ មេដឹកនាំប្រទេសទាំងពីរធ្លាប់បានព្រមព្រៀងគ្នាបង្កើតក្រុមការងាររួមគ្នាមួយ ដើម្បីដោះស្រាយវិវាទវប្បធម៌រវាងប្រទេសទាំងសងខាង។

លោក Seehasak បានទម្លាក់បន្ទុកមកកម្ពុជាវិញថា៖ ការស្តោះទឹកមាត់ដាក់គេបែបនេះ បានបង្កើនភាពតានតឹងបន្ថែម លើបញ្ហាដែលកំពុងកើតមាន ជាពិសេសការបំបាក់មុខថៃ នៅចំពោះមុខបណ្ដារប្រទេសដទៃទៀតលើឆាតអន្តរជាតិ បន្ទាប់ពីកម្ពុជាបានបង្ហោះការចោទប្រកាន់នេះនៅលើប្រព័ន្ធផ្សព្វផ្សាយសង្គមក្រោយកិច្ចប្រជុំ។

គួរជម្រាបថា សំណង់ស្ថាបត្យកម្មនៅវត្ត Phu Manfa ត្រូវបានថៃបដិសេធជារឿយៗថា មិនបានចម្លងគំរូតាមប្រាសាទអង្គរវត្តរបស់កម្ពុជាទេ។ គំនិតផ្ដួចផ្ដើមក្នុងការកសាងសំណង់ប្រាសាទនេះឡើង គឺបានមកពីការយល់សប្តិរបស់ព្រះចៅអធិការនៅវត្ត Phu Manfa រួមជាមួយនឹងការយកលំនាំតាមសិល្បៈនៅតាមទីតាំងប្រវត្តិសាស្រ្តផ្សេងៗទៀតរបស់ថៃផ្សុំបញ្ចូលគ្នា ទើបបង្កើតបានជាប្រាសាទ Siha Nakhon ឡើងមក៕