ឧត្តរមានជ័យ៖ ពិតជាកម្លាំងសាមគ្គីជាតិមិនធម្មតា! ត្រឹមតែមួយថ្ងៃប៉ុណ្ណោះ មានប្រជាជនខ្មែរដែលនាំគ្នាឡើងទៅលេងប្រាសាទតាមាន់ធំ និងប្រាសាទតាក្របី ក្នុងខេត្តឧត្តរមានជ័យ ចំនួន ១ម៉ឺននាក់។ កត្តានេះបានបង្ហាញពីឆន្ទៈស្នេហាជាតិដ៏ពុះកញ្ជ្រោលរបស់ប្រជាជនខ្មែរក្នុងការពារបូរណភាពទឹកដី និង កេរ្តិ៍តំណែលរបស់ដូនតា។

យោងតាម លោក ម៉េត មាសភក្ដី អភិបាលរងខេត្តឧត្ដរមានជ័យ បានឱ្យដឹងកាលពីថ្ងៃអាទិត្យ ទី២០ ខែកក្កដា ថា ប្រជាពលរដ្ឋខ្មែរកាន់តែនាំគ្នាសម្រុកទៅទស្សនាប្រាសាទតាមាន់និងប្រាសាទតាក្របី ក្នុងទឹកដីនៃខេត្តឧត្ដរមានជ័យ ប្រទេសកម្ពុជា ប្រមាណជិត១ម៉ឺននាក់។

ទន្ទឹមនឹងការកើនឡើងជាបន្តបន្ទាប់ណៃចំនួនភ្ញៀវទេសចរជាជនជាតិខ្មែរទៅទស្សនានៅតំបន់ប្រាសាទបុរាណរបស់ខ្មែរនៅក្នុងតំបន់ព្រំដែនបែបនេះ បានបង្ហាញឲ្យកាន់តែច្បាស់នូវឆន្ទៈស្នេហាជាតិ ស្រលាញ់ទឹកដី និងជាភស្តុតាងដ៏សំខាន់ប្រាប់ទៅកាន់ពិភពលោកថា «បុព្វបុរសខ្មែរគឺជាម្ចាស់នៃប្រាសាទ ហើយខ្មែរជាម្ចាស់របស់ទឹកដីនេះ»។

បន្ថែមពីនេះ វាក៏ជាការលើកទឹកចិត្តទៅដល់កងកម្លាំងវរជនដែលឈរជើងល្បាតនៅតាមព្រំដែន ជាពិសេសនៅតំបន់ប្រាសាទ ឲ្យកាន់តែមានស្មារតីមុះមត់ក្នុងការការពារដែនអធិបតេយ្យ និងបូរណភាព ប្រឆាំងទៅនឹងជនឈ្លានពានអគតិ ដែលចង់បានទឹកដីរបស់អ្នកដទៃទាំងងងើល និងមិនអៀនខ្មាស។

គួរឲ្យដឹងផងដែរថា ថៃតែងតែអះអាងដដែលៗថាទាំងទឹកដី ទាំងប្រាសាទដែលមាននៅតំបន់ខាងលើនេះ គឺជាកម្មសិទ្ធិរបស់ថៃ ដោយសំអាងទៅលើផែនទីដែលខ្លួនបានគូសជាឯកតោភាគី មិនព្រមទទួលយកផែនទីផ្សេង និងគោរពតាមការសម្រេចរបស់តុលាការយុត្តិធម៌អន្តរជាតិឡើយ។

ទោះជាយ៉ាងណា សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា កាលពីយប់ថ្ងៃចន្ទ ទី២១ខែកក្កដា បានបញ្ចេញសារមួយជាមួយនឹងការបញ្ចាក់ថា៖ តំបន់ឬទីកន្លែងដែលមានវិវាទ ឬមិនទាន់ដាច់ស្រេចថាស្ថិតក្នុងដែនអធិបតេយ្យភាពរបស់ប្រទេសណាមួយ គឺគ្មានភាគីណាមានសិទ្ធិធ្វើសកម្មភាពឬដាក់ចេញនូវវិធានការជាឯកតោភាគីនៅក្នុងតំបន់ឬទីកន្លែងនោះ។ រាល់វិធានការនានាដែលអាចអនុវត្តបាន ត្រូវមានការឯកភាពគ្នារវាងភាគីទាំងពីរជាមុនសិន។ បន្ទាត់ក្រហមនៅតែជាបន្ទាត់ក្រហម មិនមានការប្រែប្រួលទេ។ សូមកុំបំពាន។ កម្ពុជាមានសមត្ថភាពគ្រប់គ្រាន់និងបានត្រៀមខ្លួនជាស្រេចក្នុងការការពារខ្លួននិងការពារបូរណភាពទឹកដី តាមគ្រប់មធ្យោបាយទាំងអស់ប្រឆាំងនឹងការរំលោ.ភបំពាន៕

ប្រទេសថៃ ៖ កាលពីថ្ងៃទី២២ ខែកក្កដា ឆ្នាំ២០២៥ សារព័ត៌មានថៃ The Better រាយការណ៍ថា លោក រាំងស៊ីម៉ាន់ រ៉ូម សមាជិកសភាថៃ និងជាប្រធានគណៈកម្មការសន្តិសុខ កិច្ចការព្រំដែន យុទ្ធសាស្ត្រជាតិ និងកំណែទម្រង់ បានជំរុញឱ្យគណៈកម្មការសន្តិសុខប្រើប្រាស់អំណាចកោះហៅបុគ្គល៣រូប រួមមាន ៖ លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីព្យួរតំណែង, លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទី និងលោក ម៉ារីស សាងៀមផុង រដ្ឋមន្ត្រីក្រសួងការបរទេស មកបកស្រាយពីមូលហេតុដោះស្រាយជម្លោះព្រំដែនជាមួយកម្ពុជាយឺតយ៉ាវ ។

លោក រាំងស៊ីម៉ាន់ រ៉ូម សមាជិកសភាថៃមកពីគណបក្សប្រជាជនបានផ្តល់បទសម្ភាសន៍ជាមួយសារព័ត៌មានពីជម្លោះព្រំដែនកម្ពុជា-ថៃ និងករណីកងទ័ពថៃ៣នាក់ជាន់មីនដាច់ជើង និងរងរបួសពេលល្បាតនៅព្រំដែនថា នៅថ្ងៃទី២៤ ខែកក្កដា លោកនឹងជជែកពីបញ្ហាទាំងអស់ រួមទាំងស្នើទៅគណៈកម្មការសន្តិសុខប្រើប្រាស់អំណាចកោះហៅលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីព្យួរតំណែង និងជារដ្ឋមន្ត្រីក្រសួងវប្បធម៌, លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទី រួមទាំងលោក ម៉ារីស សាងៀមផុង រដ្ឋមន្ត្រីក្រសួងការបរទេស មកបកស្រាយដំណោះស្រាយព្រំដែនយឺតយ៉ាវ ។

លោកគិតថា ការដោះស្រាយជម្លោះព្រំដែនជាមួយកម្ពុជាពាក់ព័ន្ធនឹងការបែកធ្លាយកិច្ចសន្ទនារវាងលោកស្រី ផេថងថាន ជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ហើយវាពុំមែនជាបញ្ហាតូចតាចទេ ត្រូវតែព្យាយាមបញ្ចប់បញ្ហា ពុំចាំបាច់ធ្វើអ្វីបន្ត និងពុំចាំបាច់ទទួលខុសត្រូវ ។ ក្នុងនាមលោកជាប្រធានគណៈកម្មការសន្តិសុខ លោកពុំអាចទទួលយកបានទេ គឺត្រូវតែបំពេញតួនាទីរបស់ខ្លួន ពីព្រោះរឿងនេះជាការផ្លាស់ប្តូរដ៏សំខាន់សម្រាប់បញ្ហារដ្ឋាភិបាលថៃដែលពុំអាចដឹកនាំប្រទេសបន្តទៀត និងពុំអាចដោះស្រាយជម្លោះជាមួយកម្ពុជា ។

លោក រាំងស៊ីម៉ាន់ រ៉ូម បន្តថា យើងឃើញនៅប្រាសាទតាមាន់ធំតែងតែមានបញ្ហាគ្រប់ពេលវេលា វាពុំមែនជារឿងល្អទេ ហើយសូមសួរថា បើបញ្ហាជម្លោះរវាងត្រកូល ថាក់ស៊ីន ជាមួយកម្ពុជាកាន់តែរាលដាលខ្លាំង តើអ្នកណាទទួលខុសត្រូវ ។ វាមានតែធ្វើឱ្យពលរដ្ឋទាំងពីរប្រទេសសម្លាប់គ្នាទៅវិញទៅមក ហើយនេះជាការពុំទទួលខុសត្រូវរបស់លោកស្រី ផេថងថាន និងលោក ថាក់ស៊ីន ហើយធ្វើឱ្យប្រទេសថៃមានវិបត្តិនយោបាយកាន់តែខ្លាំង ។

លោកគិតថា ថៃគួរតែមានវិធីដោះស្រាយជម្លោះព្រំដែន ពុំគួរបណ្តោយឱ្យប្រទេសទាំងពីរមានជម្លោះបែបនេះបន្តទៀត ។ រដ្ឋាភិបាលថៃសង្ឃឹមថា នឹងដោះស្រាយបញ្ហាផ្សេងៗ មិនថាការចរចាជាមួយប្រទេសផ្សេង រួមទាំងការដោះស្រាយបញ្ហា Call Center បានតិចតួច ដោយថៃចោទប្រកាន់កម្ពុជាល្មើសអនុសញ្ញាអូតាវ៉ា ហើយរង់ចាំរហូតដល់ខែធ្នូ ទើបមានកិច្ចប្រជុំ វាពុំអាចទៅរួចទេ ខណៈដំណោះស្រាយរបស់ក្រសួងការបរទេសយឺតយ៉ាវ បើធៀបនឹងស្ថានការណ៍ផ្លាស់ប្តូរ ។ ដំណោះស្រាយជម្លោះយឺតយ៉ាវប៉ះពាល់ដល់ពលរដ្ឋ បើជម្លោះកាន់តែខ្លាំងនឹងឈានទៅសង្គ្រាម គឺគ្មានប្រទេសណាចំណេញទេ ខាតទាំងអស់ ។

ចុងក្រោយ សមាជិកសភារូបនេះបានផ្តាំផ្ញើទៅលោកស្រី ផេថងថាន ថា បើលោកស្រីពុំអាចដោះស្រាយបញ្ហាបាន លោកស្រីត្រូវតែប្រគល់អំណាចឱ្យពលរដ្ឋ ។ លោកស្រី ផេថងថាន នាយករដ្ឋមន្ត្រីព្យួរតំណែង និងលោក ថាក់ស៊ីន អតីតនាយករដ្ឋមន្ត្រី ពុំស្គាល់ពាក្យថា «គ្រប់គ្រាន់» ឬពុំយល់ថា ស្ថានការណ៍នេះពុំអាចដោះស្រាយ ទើបលោកចង់ឱ្យបុគ្គលទាំង២រូបសម្លឹងមើលស្ថានការណ៍ជារួម ។ ការបោះឆ្នោត គឺជាជម្រើសល្អបំផុត ពីព្រោះពេលមានការបោះឆ្នោត ស្ថានការណ៍ទាំងអស់នឹងធូរស្រាលជាងនេះ ៕

វ៉ាស៊ីនតោន៖ សហរដ្ឋអាមេរិកបាននឹងដកខ្លួនចេញពីទីភ្នាក់ងារវប្បធម៌និងអប់រំរបស់អង្គការយូណេស្កូ ដែលជាផ្នែកនៃអង្គការសហប្រជាជាតិម្ដងទៀត ក្រោមហេតុផល«អាមេរិកគ្មានផលប្រយោជន៍អ្វីនឹងបន្តនៅសហការជាមួយអង្គការអង្គការយូណេស្កូទេ» ព្រមទាំងបានចោ.ទប្រកាន់អង្គការនេះថា៖ មានគោលការណ៍ផ្ទុយពីគោលនយោបាយរបស់អាមេរិក។

យោងតាមសារព័ត៌មានបរទេសនាថ្ងៃពុធ ទី២៣ ខែកក្កដា ឆ្នាំ២០២៥ បានឲ្យដឹងថា រដ្ឋបាល Trumpបានសម្រេចកាត់ផ្តាច់ទំនាក់ទំនងជាមួយអង្គការយូណេស្កូ បន្ទាប់ពីសហរដ្ឋអាមេរិកបានដកខ្លួនចេញពីអង្គការសុខភាពពិភពលោក និងកិច្ចព្រមព្រៀងអាកាសធាតុទីក្រុងប៉ារីស ក៏ដូចជាការកាត់ថវិកាជំនួយសម្រាប់កិច្ចខិតខំប្រឹងប្រែងផ្តល់ជំនួយពីបរទេស។

នាយកដ្ឋានរដ្ឋបាននិយាយថា “របៀបវារៈសកលនិយម និងមនោគមវិជ្ជាសម្រាប់ការអភិវឌ្ឍន៍អន្តរជាតិ” របស់អង្គការយូណេស្កូគឺ “ផ្ទុយនឹងគោលនយោបាយការបរទេសដែលទុកអាមេរិកជាធំ” ។ លើសពីនេះ អ្នកនាំពាក្យក្រសួងការបរទេសសហរដ្ឋអាមេរិកនិយាយថា ប្រទេសខ្លួនគ្មានផលប្រយោជន៍អ្វីនឹងបន្តនៅសហការជាមួយអង្គការនេះទេ ហើយអង្គការយូនេស្កូបានប្រកាន់ជំហរលម្អៀងប្រឆាំងប្រទេសអុីស្រាអែលថែមទៀត ។

គួរឲ្យដឹងថា កាលពីឆ្នាំ 2018 ក្នុងអំឡុងពេលកាន់តំណែងជាប្រធានាធិបតីដំបូងរបស់គាត់ លោក Trump បានដកសហរដ្ឋអាមេរិកចេញពីអង្គការ Unesco ម្ដងរួចមកហើយ ប៉ុន្តែក្រោមការគ្រប់គ្រងរបស់លោក Joe Biden នៅឆ្នាំ 2023 ប្រទេសនេះបានចូលរួមជាមួយអង្គការយូណេស្កូវិញ រហូតមកដល់ត្រឹមថ្ងៃអង្គារ ទី22 ឆ្នាំ 2025 ក្នុងការគ្រប់គ្រងរបស់លោក Trump គាត់បានដក់ប្រទេសរបស់ខ្លួនចេញពីអង្គការនេះជាថ្មីម្ដងតៀត។

លោកស្រី Audrey Azoulay អគ្គនាយិកាអង្គការយូនេស្កូបានឲ្យដែរថា ប្រហែល ៨% នៃថវិការរបស់អង្គការយូណេស្កូ គឺទទួលបានពីសហរដ្ឋអាមេរិក។ ដូច្នេះជាមួយនឹងការចាកចេញរបស់សហរដ្ឋអាមេរិក លោកស្រី Audrey បាននិយាយថា «ទោះបីការចាកចេញនេះជារឿងមួយដែលគួរឲ្យសោ.កស្តាយ ប៉ុន្តែយើងបានត្រៀមខ្លួនជាមុនលើករណីនេះរួចហើយ» ។

បច្ចុប្បន្នអង្គការយូណេស្កូមានរដ្ឋជាសមាជិកចំនួន 194 នៅជុំវិញពិភពលោក ហើយត្រូវបានគេស្គាល់ថាល្អបំផុតសម្រាប់ការចុះបញ្ជីតំបន់បេតិកភណ្ឌពិភពលោក។ ការសម្រេចចិត្តចាកចេញរបស់សហរដ្ឋអាមេរិកនឹងចូលជាធរមានចាប់ពីខែធ្នូឆ្នាំ 2026 តទៅ។ វិធានការនេះគឺជាជំហានចុងក្រោយបង្អស់ក្នុងកិច្ចខិតខំប្រឹងប្រែងរបស់រដ្ឋបាល Trump ក្នុងការកាត់ផ្តាច់ទំនាក់ទំនងជាមួយស្ថាប័នអន្តរជាតិ៕

ប្រទេសឥណ្ឌា៖ ទឹកភ្នែកអូដ្ឋ ឥឡូវនេះកំពុងទាក់ទាញការចាប់អារម្មណ៍ពីអ្នកវិទ្យាសាស្ត្រជុំវិញពិភពលោក បន្ទាប់ពីការសិក្សាថ្មីមួយបានអះអាងថា ពួកវាអាចជួយបន្សាបពិសពស់រហូតដល់ទៅ ២៦ ប្រភេទផ្សេងៗគ្នា។ នេះបើយោងតាមការចុះផ្សាយរបស់គេហ័ទំព័ឥណ្ឌា។

សត្វអូដ្ឋដែលត្រូវបានគេស្គាល់ថាជា “កប៉ាល់នៃវាលខ្សាច់” ត្រូវបានគេទទួលស្គាល់សមត្ថភាពដ៏អស្ចារ្យរបស់ពួកវាក្នុងការរស់រានមានជីវិតក្នុងស្ថានភាពលំបាកដូចជា បរិយាកាសស្ងួតហួតហែង និងក្តៅ។ ឥឡូវនេះ សត្វដ៏អស្ចារ្យទាំងនេះក៏អាចជួយសង្គ្រោះជីវិតដោយផ្តល់នូវវិធីថ្មីដើម្បីព្យាបាលពស់ចឹក ដែលជាបញ្ហាធ្ងន់ធ្ងរនៅក្នុងប្រទេសសម្បូរពស់ច្រើន ដូចជាប្រទេសឥណ្ឌាជាដើម។

ការស្រាវជ្រាវនេះធ្វើឡើងដោយមន្ទីរពិសោធន៍ស្រាវជ្រាវពេទ្យសត្វកណ្តាលនៅទីក្រុងឌូបៃ។ យោងតាមអ្នកស្រាវជ្រាវ ទឹកភ្នែកអូដ្ឋអាចមានសមាសធាតុធម្មជាតិ ឬអង់ទីប៉ូឌីពិសេសៗដែលអាចបំបែកពិសដែលមាននៅក្នុងពស់។ ​យ៉ាងណាមិញ ប្រសិនបើការសិក្សាបន្ថែមបញ្ជាក់ពីការរកឃើញទាំងនេះ ទឹកភ្នែកអូដ្ឋអាចនាំទៅរកការបង្កើតនូវវិធីព្យាបាលពិសថ្មី ដែលមានតម្លៃទាប ជាពិសេសមានប្រយោជន៍សម្រាប់សហគមន៍ជនបទ ដែលការប្រើប្រាស់ថ្នាំបន្សាបពិសនៅមានកម្រិត ឬអ្នកជំងឺទទួលបានការព្យាបាលយឺតយ៉ាវ។

លើសពីពីនេះ មិនត្រឹមតែវាមានសក្តានុពលក្នុងការបន្សាបជាតិពិសពស់ប៉ុណ្ណោះទេ ទឹកភ្នែកអូដ្ឋក៏ត្រូវបានគេស្គាល់ថាបានផ្តល់នូវអត្ថប្រយោជន៍សុខភាពដល់ពួកវាឯងផងដែរ។ ទឹកភ្នែករបស់ពួកវាមានបរិមាណប្រូតេអ៊ីនការពារខ្ពស់ដែលជួយការពារភ្នែករបស់ពួកវាពីធូលីដី បាក់តេរី និងភ្នាក់ងារបង្ករោគដែលមាននៅក្នុងបរិយាកាសវាលខ្សាច់។

ក្រៅពីនេះ សមាសធាតុសំខាន់មួយគឺអង់ស៊ីមមួយឈ្មោះថា Lysozyme ដែលត្រូវបានគេស្គាល់ថាអាចសម្លាប់បាក់តេរី ផ្សិត និងសូម្បីតែមេរោគ។ អង់ស៊ីមនេះដើរតួនាទីដូចជាអង់ទីប៊ីយ៉ូទិកធម្មជាតិ ជួយឱ្យភ្នែកអូដ្ឋមានសុខភាពល្អក្នុងបរិយាកាសដ៏លំបាក។

ទោះជាយ៉ាងណា ទោះបីជាការរកឃើញនេះមិនទាន់ត្រូវបានបោះពុម្ពនៅក្នុងទស្សនាវដ្ដីវិទ្យាសាស្ត្រជាផ្លូវការក៏ដោយ ប៉ុន្តែការអះអាងដំបូងៗបានធ្វើឱ្យមានការចាប់អារម្មណ៍ពីអន្តរជាតិរួចទៅហើយ។ ប្រសិនបើទឹកភ្នែកអូដ្ឋពិតជាមានសារធាតុប្រឆាំងមេរោគ និងបន្សាបពិសពស់មែន នោះថ្ងៃណាមួយវាក៏អាចជួយសង្គ្រោះជីវិតមនុស្សពីសត្វអាសិរពិសរាប់ពាន់នាក់នៅទូទាំងពិភពលោក ហើយនេះអាចជាដំណើរថ្មីមួយ សម្រាប់ការព្យាបាលពិសពស់ ដោយសមាសធាតុធម្មជាតិ ពីសត្វដែលយើងគ្រប់គ្នាធ្លាប់តែមើលរំលង៕

ទីក្រុងប៉េកាំង៖ ចិន និង វៀតណាមកំពុងរងការវា.យប្រហា.រដោយព្យុះទីហ្វុង Wipha ដែលនាំមកនូវទឹកភ្លៀង និងខ្យល់បក់យ៉ាងខ្លាំង ជាហេតុធ្វើឲ្យអាកាសយានដ្ឋានមួយចំនួនសម្រេចផ្អាកការហោះហើរជាបណ្ដោះអាសន្ន និងមនុស្សម្នាជាច្រើនត្រូវបានជម្លៀសទៅរកទីទួលសុវត្ថិភាព។

យោងតាមសារព័ត៌មាន Rueters បានឲ្យដឹងថា កាលពីថ្ងៃអាទិត្យ ព្យុះទីហ្វុង Wipha បានបោកបក់កាត់ទីក្រុងហុងកុង ដោយបានធ្វើឲ្យជើងហោះហើរជាច្រើនត្រូវបានពន្យពេល មនុស្សជិត ២៨០ នាក់ត្រូវបានជម្លៀសទៅទីសុវត្ថិភាព និងផ្ដួលរំលំដើមឈើអស់ជាច្រើនដើម។ អ្នកព្យាករណ៍អាកាសធាតុចិនបាននិយាយថា ព្យុះ Wipha នឹងចុះខ្សោយទៅជាព្យុះត្រូពិចនៅពេលដីគោក ហើយវានឹងគ្របដណ្តប់ឆ្នេរសមុទ្រនៃខេត្ត Guangdong បន្ទាប់មកវានឹងបក់ឆ្ពោះទៅប្រទេសវៀតណាម។

សម្រាប់តំបន់ឆ្នេររបស់ប្រទេសចិនដីគោកនៃខេត្ត Guangdong, Guangxi, Hainan និង Fujian ត្រូវបានគេព្យាករណ៍ទុកថានឹងមានភ្លៀងធ្លាក់ខ្លាំង ដែលនឹងជំរុញឲ្យមានទឹកជំនន់ភ្លាមៗ ការរអិលបាក់ដី និងខ្យល់កន្ត្រាក់ដ៏គ្រោះថ្នាក់។

ជាមួយគ្នានេះ អាជ្ញាធរចិនបានអនុវត្តការត្រួតពិនិត្យចរាចរណ៍នៅផ្លូវល្បឿនលឿនសំខាន់ៗដែលតភ្ជាប់ទីក្រុង Shenzhen និង Zhuhai ទៅកាន់ទីក្រុងហុងកុង ព្រមទាំងនៅតាមកំពង់ផែ ដោយផ្លូវទាំងនេះត្រូវបានគេលើកឲ្យខ្ពស់កាលយប់ថ្ងៃអាទិត្យ។ ទូរទស្សន៍រដ្ឋ CCTV បានណែនាំឱ្យសាធារណជនត្រូវយរក្សាការប្រុងប្រយ័ត្នចំពោះគ្រោះមហន្តរាយនេះ អ្នកព្យាករណ៍ចិនបាននិយាយថា ព្យុះ Wipha នឹងរំកិលចូលទៅក្នុងឈូងសមុទ្រតុងកឹងនៅល្ងាចថ្ងៃចន្ទ ដែលនឹងប្រមូលផ្តុំកម្លាំងមុនពេលវា.យប្រហារឆ្នេរសមុទ្រភាគខាងជើងនៃប្រទេសវៀតណាម។

ដោយឡែក អាជ្ញាធរវៀតណាមបានដាក់បណ្ដារខេត្តនៅតាមមាត់សមុទ្ររបស់ខ្លួននៅក្នុងការប្រកាសអាសន្ន ដោយព្រមា.នអំពីទឹកជំនន់ដែលអាចមានគ្រោះថ្នាក់ និងការបាក់ដីធ្ងន់ធ្ងថាអាចនឹងកើតមានផងដែរ។

កាលពីយប់ថ្ងៃអាទិត្យ នាយករដ្ឋមន្ត្រីវៀតណាមបានជូនដំណឹងបន្ទាន់មួយទៅកាន់ពលរដ្ឋនៅតំបន់ឆ្នេរ ជាពិសេសអ្នកនេសាទ ដើម្បីហៅទូកពួកគេដែលកំពុងធ្វើដំណើរនៅលើសមុទ្រឲ្យចូលច្រាំង ជម្លៀសប្រជាជនចេញពីតំបន់ដែលងាយរងគ្រោះដោយទឹកជំនន់ រៀបចំការផ្គត់ផ្គង់ស្បៀងអាហារ និងឧបករណ៍សង្គ្រោះ និងធានាហេដ្ឋារចនាសម្ព័ន្ធនិងបណ្ដាញទំនាក់ទំនង៕

ថៃ៖ រដ្ឋមន្ត្រីស្តីទីក្រសួងការពារជាតិថៃ លោក Nattapol Nakphanit បាននិយាយថា៖ ក្ដីបារម្ភចម្បងរបស់ថៃនៅពេលនេះគឺ តុលាការអន្តរជាតិអាចនឹងទាត់ចោលសំណើរបណ្ដឹ.ង ប្រសិនបើយើងមិនរៀបចំសំណុំរឿងឲ្យបានហ្មត់ចត់និងដាក់ព័ស្តុតាងច្បាស់ៗទេនោះ។ លើសពីនេះ ប្រសិនបើសំណុំរឿងត្រូវបានទុកចោល នោះកម្ពុជាអាចនឹងវា.យបកវិញមិនខាន ហើយពេលនោះថៃនឹងបាត់បង់ភាពជឿជាក់។

យោងតាមការចុះផ្សាយរបស់សារព័ត៌មានថៃ ប៉ុស្តិ៍លេខ៧ នាថ្ងៃចន្ទ ទី២១ ខែកក្កដា បានឲ្យដឹងថា ឧត្តមសេនីយ៍ Nattapol Nakphanit អនុរដ្ឋមន្ត្រីក្រសួងការពារជាតិ បញ្ជាក់ថា នៅពេលមានភស្តុតាងគ្រប់គ្រាន់ កងទ័ពភូមិភាគទី២ នឹងធ្វើសន្និសីទសារព័ត៌មាន។ លោកថា សំណុំរឿងនេះត្រូវរៀបចំដោយមានការប្រុងប្រយ័ត្នបំផុត ដូច្នេះវាត្រូវការរយៈពេល។

ចំពោះបណ្តឹ.ងដែលចោ.ទថាកម្ពុជាបានរំលោ.ភលើអនុសញ្ញាអូតាវ៉ានោះ លោកឧត្តមសេនីយ៍ Nattapol មានលើកឡើងថា បន្ទាប់ពីកិច្ចប្រជុំ NCPO បានអនុម័ត ក្រសួងការបរទេសថៃនឹងបន្តដំណើរការសរសេរលិខិតតវ៉ា។ ក្រៅពីសរសេរលិខិតតវ៉ាទៅគណៈកម្មាធិការអូតាវ៉ា យើងក៏នឹងតវ៉ាមកកម្ពុជាដែរ។

នៅពេលត្រូវបានអ្នកកាសែតសួរថាតើមានអ្វីដែលជាចំណុចគួរព្រួយបារម្ភចំពោះដំណើរការប្ដឹ.ងនេះដែរឬទេ? លោក Nattapol បានឆ្លើយថា៖ សំណុំរឿងនេះក៏ដូចជារឿងទូទៅដែរ បើយើងមិនរៀបចំឯកសារដោយប្រុងប្រយ័ត្ន តុលាការនឹងមិនទទួលយកពាក្យបណ្ដឹ.ងយើងទេ ដូច្នេះសំណុំរឿងយើងនឹងត្រូវបានទាត់ចោល ឬកម្ពុជាអាចធ្វើការវា.យបកវិញបាន ហើយយើងនឹងក្លាយជាប្រទេសដែលគេបាត់បង់ទំនុកចិត្ត។ នេះជាអ្វីដែលយើងព្រួយបារម្ភជាងគេ។

ទោះជាយ៉ាងណា លោក Nattapol នៅតែអះអាងថា ករណីទាហានរបស់ខ្លួនដែលដើរល្បាតហើយជាន់គ្រាប់មីនផ្ទុះនៅតំបន់ចុងបូកនោះ គឺការបង្ករឡើងដោយកម្ពុជាដែលធ្វើការបង្កប់មីនថ្មីប្រឆាំងមនុស្ស រំលោ.ភអនុសញ្ញាអូតាវ៉ា និងអំពាវនាវឲ្យប្រទេសទាំងអស់នៅក្នុងអាស៊ានចូលរួមថ្កោលទោ.សកម្ពុជាជាមួយថៃផងដែរ។

ប៉ុន្តែគួរឲ្យដឹងផងដែរថា ការចោ.ទប្រកាន់ទាំងងងើលរបស់ភាគីថៃដូចខាងលើនេះ មិនត្រូវបានទទួលស្គាល់ដោយកម្ពុជាឡើយ។ ក្រសួងការបរទេសកម្ពុជាបានធ្វើការច្រានចោលយ៉ាងដាច់អហង្ការចំពោះការលើកឡើងដែលខុសពីការពិតរបស់ថៃ និងធ្វើការបញ្ជាក់ជាថ្មីថា តំបន់ដែលទាហានថៃបានដើរល្បាតនាពេលនោះ គឺជាទឹកដីរបស់កម្ពុជា ក្នុងស្រុកជាំក្សាន្ត ខេត្តព្រះវិហារ ដែលជាតំបន់មួយស្ថិតនៅក្នុងដែនដីកម្ពុជា យោងតាមផែនទីខ្នាត ១:២០០០០០ ផលិតដោយគណៈកម្មការចម្រុះបារាំង-សៀម និងមានការទទួលស្គាល់ជាអន្តរជាតិជាយូរណាស់មកហើយ៕

បង់ក្លាដែស៖ យន្តហោះហ្វឹកហ្វឺនរបស់កងទ័ពអាកាសបង់ក្លាដែសបានធ្លា.ក់ចូលទៅក្នុងបរិវេណសាលារៀនមួយក្នុងរដ្ឋធានីដាកា ភ្លាមៗបន្ទាប់ពីបានហោះឡើងលើអាកាស ដោយបានសម្លា..ប់មនុស្សយ៉ាងហោចណាស់ 19 នាក់រួមទាំងអ្នកបើកយន្តហោះ និងជាង 100 នាក់ទៀតរងរបួស។ ហេតុការណ៍នេះ បានកើតឡើងកាលពីថ្ងៃចន្ទ ទី២១ ខែកក្កដា ឆ្នាំ២០២៥។

យោងតាមសារព៍ត៌មានបរទេសបានឲ្យដឹងថា យន្តហោះ F-7 BGI ផលិតនៅប្រទេសចិន បានធ្លា.ក់ចូលទៅក្នុងបរិវេណសាលា និងមហាវិទ្យាល័យ Milestone ក្នុងសង្កាត់ Uttara នៅពេលរសៀលថ្ងៃចន្ទ ខណៈដែលសិស្សក្នុងសាលាកំពុងអង្គុយរៀននៅក្នុងថ្នាក់។ តាមសម្ដីរបស់កងទ័ពអាកាសបង់ក្លាដែសបាននិយាយថា៖ យន្តហោះនេះបានហោះចេញនៅម៉ោង ១ និង ០៦ នាទីរសៀល (ម៉ោងក្នុងស្រុក) និងបានឆេះធ្លា.ក់វិញភ្លាមៗ ដោយមិនទាន់ដឹងមូលហេតុមិនទាន់ច្បាស់លាស់។

ប្រព័ន្ធផ្សព្វផ្សាយក្នុងស្រុកបានបង្ហាញថា អ្នករងរបួសភាគច្រើនគឺជាសិស្សសាលា។ ក្រោយទទួលបានដំណឹងថាមានយន្តហោះធ្លា.ក់ចំសាលារៀន មនុស្សជាច្រើនដែលជាសាច់ញាតិរបស់អ្នកពាក់ព័ន្ធទាំអនោះនាំគ្នាភ័យស្លន់ស្លោទៅកន្លែងកើតហេតុ ខណៈក្រុមអ្នកជួយសង្គ្រោះប្រើគ្រប់មធ្យោបាយធ្វើដំណើរ មិនថាជារ៉ឺម៉កកង់បី ឬអ្វីក៏បានដែរ ដើម្បីដឹកអ្នករបួសទៅសង្រ្គោះនៅមន្ទីរពេទ្យ។

ទិដ្ឋភាពដ៏ខ្លោ.ច.ផ្សាមួយបានបង្ហាញឡើង នៅពេលដែលអ្នកស្រុកក្នុងតំបន់និងអ្នកជួយសង្រ្គោះបានដឹកសិស្សដែលរងរបួសនៅលើភ្លៅរបស់ពួកគេ ខណៈដែលឪពុកម្តាយដែលមានការព្រួយបារម្ភបានរត់មកសាលារៀនទាំងទឹកភ្នែក។

មេដឹកនាំបណ្ដោះអាសន្នរបស់ប្រទេសបង់ក្លាដែស លោក Muhammad Yunus បានសន្យាថានឹងមានការស៊ើបអង្កេតលម្អិតអំពីការធ្លាក់យន្តហោះនេះ ដោយសម្តែងការសោ.កស្ដាយយ៉ាងខ្លាំងចំពោះ “គ្រោះថ្នាក់ដ៏គួរឱ្យរន្ធត់ និង មិននឹកស្មាន” នៅសាលា និងមហាវិទ្យាល័យ Milestone៕