បាងកក៖ ថ្ងៃទី 8 ខែកញ្ញា ឆ្នាំ 2025 – កងទ័ពភូមិន្ទថៃ (RTA) បានប្រកាសថានឹងបន្តឃុំខ្លួនទាហានកម្ពុជាចំនួន 18 នាក់ ដោយចោ.ទប្រកាន់ថាទាហានទាំងនោះបានរំលោភបទឈប់បា.ញ់ និងការប្រកាន់ខ្ជាប់នូវច្បាប់អន្តរជាតិជាហេតុផលគ្រប់គ្រាន់សម្រាប់ការឃុំខ្លួនរបស់ពួកគេ។ នេះបើយោងតាមសេចក្តីថ្លែងការណ៍របស់លោក វីនថៃ ស៊ូវ៉ារី អ្នកនាំពាក្យកងទ័ពភូមិន្ទថៃ។

កងយោធពលភូមិន្ទថៃ( RTA ) បានលើកពីហេតុផលដែលបន្តឃុំខ្លួនទាហានកម្ពុជាចំនួន18នាក់ ដោយនិយាយថា ទាហានខ្មែរត្រូវបានចាប់ខ្លួន អំឡុងពេលការប្រយុទ្ធគ្នានៅតែបន្ត ហើយសង្កត់ធ្ងន់ថា ជម្លោះប្រដាប់អាវុធតាមបណ្តោយព្រំដែន មិនទាន់បញ្ចប់ទាំងស្រុងនៅឡើយទេ។

ឆ្លើយតបនឹងការចោ.ទប្រកាន់របស់ក្រសួងការពារជាតិកម្ពុជា ជុំវិញការចាប់ទាហានខ្មែរដោយខុសច្បាប់អស់រយៈពេល40ថ្ងៃ លោក Winthai Suvaree បានអះអាងថា ពេលនោះប្រតិបត្តិការប្រយុទ្ធនៅតែបន្តរហូតដល់ព្រឹកថ្ងៃទី 29 ខែកក្កដា ទោះបីជាមានបទឈប់បាញ់ក៏ដោយ ហើយទាហានកម្ពុជាត្រូវបានចាប់ខ្លួននៅលើទឹកដីថៃ ចំពេលមានអរិភាពទាំងនេះ។ លោកបានបន្តថា ចំណុចទាំងនេះបានបង្ហាញយ៉ាងច្បាស់ពីភាពត្រឹមត្រូវនៃការឃុំខ្លួនពួកគេស្របតាមបទដ្ឋានអន្តរជាតិ។

បន្ថែមពីនេះលោក Winthai បានសង្កត់ធ្ងន់ថា ទាំងប្រទេសថៃ និងកម្ពុជា គឺជាប្រទេសហត្ថលេខីនៃអនុសញ្ញាទីក្រុងហ្សឺណែវទីបី ដែលគ្រប់គ្រងការព្យាបាលអ្នកទោសសង្គ្រាម និងអនុញ្ញាតឱ្យបន្តការឃុំខ្លួនរបស់ពួកគេរហូតដល់ការបញ្ចប់ជម្លោះប្រដាប់អាវុធទាំងស្រុង។

ដោយឡែក ទាក់ទងនឹងសុខុមាលភាពរបស់អ្នកជាប់ឃុំ កងទ័ពភូមិន្ទថៃបានធានាថាទាហានទាំង 18 នាក់ត្រូវបានប្រព្រឹត្តដោយមនុស្សធម៌ និងស្របតាមស្តង់ដារអន្តរជាតិ។ លក្ខខណ្ឌរបស់ពួកគេត្រូវបានផ្ទៀងផ្ទាត់ពីរដងតាមរយៈការធ្វើទស្សនកិច្ចដោយគណៈកម្មាធិការអន្តរជាតិនៃកាកបាទក្រហម (ICRC) ហើយ RTA បានបញ្ជាក់ពីឆន្ទៈរបស់ខ្លួនក្នុងការអនុញ្ញាតឱ្យចូលដំណើរការសម្រាប់អង្គការអន្តរជាតិផ្សេងទៀតតាមតម្រូវការ។

ទោះជាយ៉ាងណា កម្ពុជានៅតែទាមទារឱ្យកងទ័ពថៃ ដោះលែងទាហានកម្ពុជាត្រលប់មកវិញ។ រាជរដ្ឋាភិបាលបានខិតខំគ្រប់មធ្យោបាយ ដើម្បីធានាឱ្យមានការដោះលែងនិងការធ្វើមាតុភូមិនិវត្តន៍កងទ័ពកម្ពុជាទាំង18រូប ដែលកងកម្លាំងថៃបានឃុំខ្លួនបន្ទាប់ពីបទឈប់បាញ់។ ក្នុងចំណោមកិច្ចខិតខំប្រឹងប្រែងទាំងនោះ កម្ពុជាបានទាក់ទងជាមួយគណៈកម្មាធិការកាកបាទក្រហមអន្តរជាតិដោយភាពស្មោះត្រង់ ដើម្បីស្វែងរកការគាំពារផ្នែកមនុស្សធម៌ មិនមែនការប្រឈមផ្នែកនយោបាយនោះទេ។ អាទិភាពបន្ទាន់របស់កម្ពុជា គឺច្បាស់លាស់ ដោយអ្នកទោសសង្គ្រាម ត្រូវផ្តល់សិទ្ធិក្នុងការចូលជួប ត្រួតពិនិត្យ និងធ្វើមាតុភូមិនិវត្តន៍។

ជាមួយគ្នានេះ គណៈកម្មាធិការកាកបាទក្រហមអន្តរជាតិ បានបញ្ជាក់ឡើងវិញនូវការទទួលស្គាល់របស់ខ្លួន ចំពោះកងទ័ពទាំង18បនោះ ថាជាអ្នកទោសសង្គ្រាម ព្រមទាំងបានអះអាងថា នឹងធ្វើដំណើរទស្សនកិច្ចតាមដាននៅដើមខែកញ្ញា ដើម្បីផ្ទៀងផ្ទាត់លក្ខខណ្ឌ និងធានានូវការទាក់ទងជាមួយក្រុមគ្រួសារ៕

ប្រទេសចិន ៖ សម្រកទម្ងន់អាចធ្វើទៅបានអាស្រ័យលើការព្យាយាមជារៀងរាល់ថ្ងៃ ដោយយកចិត្តទុកដាក់លើការបរិភោគចំណីអាហារ ផ្លែឈើ និងហាត់ប្រាណជាប្រចាំ ។ មនុស្សមួយចំនួនតែងតែបោះបង់គោលដៅពាក់កណ្តាលទី ដោយសារពុំទទួលបានលទ្ធផលដូចការរំពឹងទុក ហេតុនេះ ក្រុមហ៊ុនបច្ចេកវិទ្យាមួយនៅប្រទេសចិនបានបង្កើតគម្រោងចែកប្រាក់ជំរុញឱ្យបុគ្គលិកសម្រកទម្ងន់ ហើយបុគ្គលិកនឹងទទួលប្រាក់តិច ឬច្រើន គឺគិតតាមចំនួនគីឡូដែលបានសម្រក ។

ក្រុមហ៊ុននេះបានល្បីល្បាញពេញបណ្តាញសង្គមក្រោយពីបង្កើតគម្រោងសម្រកទម្ងន់ដើម្បីជំរុញឱ្យបុគ្គលិកទាំងអស់ថែទាំសុខភាព គឺបុគ្គលិកមានរូបរាងធាត់ ឬលើសទម្ងន់នឹងទទួលបានប្រាក់កាន់តែច្រើន បើអាចសម្រកទម្ងន់បានច្រើនគីឡូ ប៉ុន្តែក្រុមហ៊ុននឹងផាកពិន័យសម្រាប់បុគ្គលិកពុំស្រកគីឡូ ។ នេះបើតាមការផ្សព្វផ្សាយរបស់សារព័ត៌មានបរទេស នៅថ្ងៃទី៩ ខែកញ្ញា ឆ្នាំ២០២៥ ។

កាលពីថ្ងៃទី១២ ខែសីហា ក្រុមហ៊ុនបច្ចេកវិទ្យាមួយរបស់ចិនឈ្មោះ Arashi Vision Inc. ឬ Insta360 នៅទីក្រុងស៊ិនជិន បានបង្កើតគម្រោងប្រចាំឆ្នាំឈ្មោះ «Million Yuan Weight Loss Challenge» ដែលមានគោលបំណងជំរុញឱ្យបុគ្គលិកយកចិត្តទុកដាក់លើការថែទាំសុខភាពដោយការហាត់ប្រាណ រក្សាទម្ងន់ និងបរិភោគអាហារគិតពីសុខភាព ។

ចំណែកលក្ខខណ្ឌទទួលបានប្រាក់លើកទឹកចិត្តមិនពិបាកទេ គឺបុគ្គលិកគ្រប់រូបអាចចូលរួមក្នុងគម្រោង និងរាយការណ៍មកក្រុមហ៊ុនពីចំនួនគីឡូដែលបានសម្រកដើម្បីបើកប្រាក់ពីក្រុមហ៊ុន ។ បុគ្គលិកម្នាក់ឈ្មោះ សៀ យ៉ាឈី អាចសម្រកទម្ងន់រហូតដល់ជាង២០គីឡូក្រាម ដោយចំណាយពេលត្រឹមតែ៩០ថ្ងៃប៉ុណ្ណោះ ដូច្នេះ ក្រុមហ៊ុនក៏បានចែកប្រាក់ឱ្យចំនួន២ម៉ឺនយាន់ (ឬប្រមាណ២,៧៨១ដុល្លារ) ព្រមទាំងទទួលបានពានរង្វាន់សម្រកទម្ងន់ ។

អ្នកនាង សៀ យ៉ាឈី ជឿថា នេះជាពេលវេលាដ៏ល្អបំផុតក្នុងជីវិតរបស់នាងដែលអាចសម្រកទម្ងន់តាមគោលដៅកែប្រែរូបរាងខ្លួនឯង ។ ការសម្រកទម្ងន់នេះមិនមែនដើម្បីតែរូបរាងខាងក្រៅទេ ប៉ុន្តែវាជាការថែទាំសុខភាព ។

នាងបានចែកចាយរូបភាពសម្រកទម្ងន់របស់ខ្លួនក្នុងក្រុមជជែកអនឡាញដើម្បីលើកទឹកចិត្តដល់មិត្តរួមការងារ ព្រមទាំងប្រាប់ពីវិធីសម្រកទម្ងន់តាមតារាសម្តែង ដែលអាចសម្រកទម្ងន់បាន១០គីឡូក្រាម ក្នុងរយៈពេល១៥ថ្ងៃ ។ វិធីសម្រកទម្ងន់នេះ គឺផឹកទឹកសណ្តែកនៅថ្ងៃទី១ បរិភោគពោតនៅថ្ងៃទី២ បរិភោគផ្លែឈើនៅថ្ងៃទី៣ ព្រមទាំងបរិភោគអាហារមានប្រូតេអ៊ីន និងបន្លែ នាថ្ងៃបន្ទាប់ ។

ក្រុមហ៊ុនបានរៀបចំគម្រោងប្រចាំឆ្នាំឈ្មោះ «Million Yuan Weight Loss Challenge» ចំនួន៧លើករួចហើយ ដោយបានចែកប្រាក់ដល់បុគ្គលិកសរុបចំនួន២៨ម៉ឺនដុល្លារអាមេរិក ។ កាលពីឆ្នាំ២០២៤ មានបុគ្គលិកចំនួន៩៩នាក់ បានចូលរួមក្នុងគម្រោងរបស់ក្រុមហ៊ុន ហើយពួកគេអាចសម្រកទម្ងន់សរុបចំនួន៩៥០គីឡូក្រាម ។

ក្រុមហ៊ុនក៏ផាកពិន័យផងដែរ បើបុគ្គលិកណាបានចូលរួមក្នុងគម្រោងសម្រកទម្ងន់ បែរជាពុំអាចសម្រកបាន ឬឡើងទម្ងន់ខ្លាំងជាងមុន គឺបុគ្គលិកត្រូវបង់ប្រាក់ពិន័យឱ្យក្រុមហ៊ុន ប្រមាណ១០៩ដុល្លារ សម្រាប់ការឡើងទម្ងន់ ០.៥គីឡូក្រាម ។ ប៉ុន្តែតាំងពីបង្កើតគម្រោងរហូតមកដល់ពេលនេះ ពុំទាន់មានបុគ្គលិកណាម្នាក់ត្រូវក្រុមហ៊ុនផាកពិន័យទេ ៕

ប្រទេសថៃ ៖ នាយករដ្ឋមន្ត្រីម៉ាឡេស៊ី លោក Anwar Ibrahim បានបង្ហាញក្តីរីករាយចំពោះការកាន់តំណែងជានាយករដ្ឋមន្ត្រីថៃថ្មីរបស់លោក អនុថីន ឆាន់វីរៈគូន ព្រមទាំងអញ្ជើញនាយករដ្ឋមន្ត្រីថៃបំពេញទស្សនកិច្ចជាផ្លូវការនៅប្រទេសម៉ាឡេស៊ី ដើម្បីជជែកពីស្ថានការណ៍ព្រំដែនកម្ពុជា-ថៃ និងកិច្ចសហការទ្វេភាគីរវាងម៉ាឡេស៊ី-ថៃ ។ នេះបើតាមការផ្សព្វផ្សាយរបស់សារព័ត៌មាន Thairath នៅថ្ងៃទី៨ ខែកញ្ញា ឆ្នាំ២០២៥ ។

លោក Anwar Ibrahim នាយករដ្ឋមន្ត្រីម៉ាឡេស៊ីបានបង្ហោះសារក្នុងបណ្តាញសង្គមរបស់ខ្លួន នៅថ្ងៃទី៨ ខែកញ្ញា ថា លោកបានទំនាក់ទំនងទៅលោក អនុថីន ឆាន់វីរៈគូន ដើម្បីបង្ហាញក្តីរីករាយក្រោយពីឡើងកាន់តំណែងជានាយករដ្ឋមន្ត្រីថៃថ្មី ។

លោក អនុថីន គឺជាមិត្តភក្តិចាស់ធ្លាប់រួមសុខទុក្ខជាមួយគ្នារហូតមក ហើយលោក Anwar Ibrahim ក៏បានអញ្ជើញលោក អនុថីន បំពេញទស្សនកិច្ចជាផ្លូវការនៅប្រទេសម៉ាឡេស៊ីឆាប់ៗនេះ ដើម្បីពិភាក្សាពីប្រធានបទសំខាន់ៗ រួមមាន ៖ ការពង្រឹងទំនាក់ទំនងទ្វេភាគី, ស្ថានការណ៍ព្រំដែនកម្ពុជា-ថៃ និងជំរុញកិច្ចសហការក្នុងក្របខ័ណ្ឌអាស៊ាន ។

ចំណែកលោក អនុថីន នាយករដ្ឋមន្ត្រីថៃថ្មីបានយល់ព្រមជួបពិភាក្សាជាមួយនាយករដ្ឋមន្ត្រីម៉ាឡេស៊ី លោក Anwar Ibrahim នាពេលឆាប់ៗនេះ ដើម្បីពង្រឹងទំនាក់ទំនងរវាងប្រទេសជិតខាងទាំងពីរឱ្យកាន់តែជិតស្និទ្ធបន្ថែមទៀត ។

កាលពីថ្ងៃទី២៤ ខែកក្កដា ឆ្នាំ២០២៥ នាយករដ្ឋមន្ត្រីម៉ាឡេស៊ី លោក Anwar Ibrahim បានចរចាឱ្យប្រទេសថៃបញ្ឈប់ការវាយប្រហារដោយអាវុធមកលើកម្ពុជា និងធ្វើជាម្ចាស់ផ្ទះកិច្ចប្រជុំរវាងកម្ពុជា-ថៃ ដើម្បីសម្រេចកិច្ចព្រមព្រៀងឈប់បាញ់បន្ទាន់ដោយឥតលក្ខខណ្ឌ ។ បន្ទាប់មក លោកបង្កើតអនុព័ន្ធយោធាសង្កេតការណ៍ភ្លាមៗ, ស្នើដាក់ផ្កាយរណបលើមេឃតាមដានស្ថានការណ៍ព្រំដែនកម្ពុជា-ថៃ និងជំរុញឱ្យថៃគោរពបទឈប់បាញ់ ។

រហូតមកដល់ថ្ងៃទី៨ ខែកញ្ញា លោក Anwar Ibrahim នៅតែយកចិត្តទុកដាក់ពីការបញ្ចប់ជម្លោះព្រំដែនកម្ពុជា-ថៃ ដោយស្នើឱ្យនាយករដ្ឋមន្ត្រីថៃថ្មី លោក អនុថីន បំពេញទស្សនកិច្ចនៅម៉ាឡេស៊ី ដើម្បីជជែកពីស្ថានការណ៍ព្រំដែនកម្ពុជា-ថៃ ។ នាយករដ្ឋមន្ត្រីម៉ាឡេស៊ីបានជួយខ្នះខ្នែងឱ្យកម្ពុជា និងថៃបញ្ចប់សង្គ្រាម និងឈានទៅរកសន្តិភាពឆាប់ៗ ពីព្រោះប្រទេសទាំងពីរស្ថិតក្នុងតំបន់អាស៊ាន ៕