វៀតណាម៖ អាកាសយានដ្ឋានធំៗចំនួន២ របស់វៀតណាមត្រូវបានប្រកាសថានឹងត្រូវបិទជាបណ្ដោះអាសន្នភ្លាមៗ បន្ទាប់ពីមានការវា.យប្រ.ហារខ្លាំងក្លាដោយព្យុះទីហ្វុង Wipha នៅភាគខាងជើងប្រទេសក្នុងកំឡុងពេលប៉ុន្មានថ្ងៃចុងក្រោយនេះ។

យោងតាមសារព័ត៌មាន VN Express នាថ្ងៃពុធ ទី២២ កក្កដា បានឲ្យដឹងថា ដើម្បីឆ្លើយតបនឹងព្យុះទីហ្វុង Wipha ដែលបានបោកបក់មកសមុទ្រខាងកើតជាលើកទី៣ក្នុងឆ្នាំនេះ អាជ្ញាធរអាកាសចរណ៍ស៊ីវិលវៀតណាម (CAAV) បានសម្រេចផ្អាកការទទួល និងប្រតិបត្តិការយន្តហោះជាបណ្ដោះអាសន្ននៅអាកាសយានដ្ឋានចំនួន២ ដែលស្ថិតនៅក្នុងតំបន់រងគ្រោះនៅថ្ងៃទី ២១ និង ២២ ខែកក្កដា។

តាមប្រភពដដែលបានឲ្យដឹងទៀតថា អាកាសយានដ្ឋានទាំងពីរដែលនឹងត្រូវបិទជាបណ្ដោះអាសន្ននោះរួមមាន អាកាសយានដ្ឋានអន្តរជាតិ Van Don នៅខេត្ត Quang Ninh ភាគខាងជើង និងអាកាសយានដ្ឋានអន្តរជាតិ Cat Bi ក្នុងទីក្រុង Hai Phong ដែលនឹងបិទចាប់ពីម៉ោង ១១ យប់ ថ្ងៃទី 21 ខែកក្កដាដល់ថ្ងៃត្រង់ថ្ងៃទី 22 ខែកក្កដា។

ទន្ទឹមនឹងនេះ អាជ្ញាធរអាកាសចរណ៍ស៊ីវិលវៀតណាម បានស្នើសុំអាកាសយានដ្ឋានអន្តរជាតិ Noi Bai នៅទីក្រុងហាណូយ និងអាកាសយានដ្ឋាន Tho Xuan ក្នុងខេត្ត Thanh Hoa បន្តតាមដានព្រឹត្តិបត្រឧតុនិយម និងស្នើការកែសម្រួលសមស្របទៅនឹងកាលវិភាគប្រតិបត្តិការរបស់ពួកគេប្រសិនបើចាំបាច់។

ក្រៅពីនេះ ក្រុមហ៊ុនអាកាសចរណ៍ទាំងអស់ ត្រូវជូនដំណឹងយ៉ាងសកម្មដល់អ្នកដំណើរអំពីការផ្លាស់ប្តូរនៃកាលវិភាគហោះហើរ ដូច្នេះអ្នកដំណើរអាចរៀបចំការធ្វើដំណើររបស់ពួកគេឲ្យបានសមស្រប។

អាជ្ញាធរអាកាសចរណ៍ស៊ីវិលវៀតណាម ក៏បានព្រមានដែរថា ភ្លៀងធ្លាក់ខ្លាំងដែលត្រូវបាននាំមកដោយព្យុះនេះ អាចនឹងបង្កឱ្យមានទឹកជំនន់នៅព្រលានយន្តហោះមួយចំនួនដែលស្ថិតនៅតំបន់រងផលប៉ះពាល់ដោយផ្ទាល់ផងដែរ។

ស្របពេលជាមួយគ្នានោះ អាជ្ញាធរបានកត់សម្គាល់ថា បន្ទាប់ពីព្យុះនេះរលាយបាត់ អង្គភាពពាក់ព័ន្ធទាំងអស់ត្រូវផ្តោតការយកចិត្តទុកដាក់លើធនធានរបស់ពួកគេ ដើម្បីស្តារប្រតិបត្តិការហោះហើរធម្មតាឡើងវិញភ្លាមៗ៕

ប្រទេសថៃ ៖ នៅថ្ងៃទី២២ ខែកក្កដា ឆ្នាំ២០២៥ សារព័ត៌មានថៃ Khaosod រាយការណ៍ថា កងទ័ព និងពលរដ្ឋថៃបានប្តឹងសមត្ថកិច្ចឱ្យចា.ប់ខ្លួនស្ត្រីខ្មែរឈ្មោះ ម៉ូនីកា ដែលប៉ះពាក្យសម្តីជាមួយកងទ័ពថៃនៅប្រាសាទតាមាន់ធំ ដោយចោទប្រកាន់ថា អ្នកស្រីចង្អុលមុខជេរប្រមា.ថ និងមើលងា.យកងទ័ពថៃពេលកំពុងបំពេញភារកិច្ច ។ ក្រសួងការបរទេសថៃនឹងកោះហៅអ្នកស្រីឱ្យធ្វើដំណើរមកប្រទេសថៃ ដើម្បីឱ្យសមត្ថកិច្ចខេត្តសុរិន្ទសាកសួរដោយផ្ទាល់មាត់ ។

តាមការចុះផ្សាយរបស់សារព័ត៌មាន Khaosod គឺថៃបានចោទប្រកាន់អ្នកស្រី ម៉ូនីកា បង្កបញ្ហានៅប្រាសាទតាមាន់ធំ នៅភូមិតាមាន់សែនជ័យ ឃុំគោកមន ស្រុកបន្ទាយអម្ពិល ខេត្តឧត្តរមានជ័យ (ជាប់ខេត្តសុរិន្ទ) ហើយថា អ្នកស្រីចង្អុលមុខកងទ័ពថៃពេលកំពុងបំពេញភារកិច្ច កាលពីថ្ងៃទី១៥ ខែកក្កដា កន្លងមក ។ ក្រោយការផ្សព្វផ្សាយព័ត៌មានក្នុងបណ្តាញសង្គមធ្វើឱ្យពលរដ្ឋថៃពុំពេញចិត្តអ្នកស្រីយ៉ាងខ្លាំង ហើយកងទ័ព និងពលរដ្ឋថៃក៏បានប្តឹងអ្នកស្រីមកកាន់សមត្ថកិច្ចខេត្តសុរិន្ទ ពីបទបង្កការរំខាន និងមើលងាយកងទ័ពថៃពេលបំពេញភារកិច្ច រួមទាំងចោទប្រកាន់ពីបទញុះញង់ក្នុងប្រព័ន្ធកុំព្យូទ័រ ។

ការប៉ះពាក្យសម្តីរបស់អ្នកស្រី ម៉ូនីកា ជាមួយកងទ័ពថៃ គឺដោយសារកងទ័ពថៃពុំអនុញ្ញាតឱ្យអ្នកស្រីឡើងលើប្រាសាទតាមាន់ធំដែលជាប្រាសាទរបស់ខ្មែរ ត្រូវបានពលរដ្ឋថៃចាប់អារម្មណ៍យ៉ាងខ្លាំង និងជជែកពេញបណ្តាញសង្គម ។ ក្រោយពីទទួលពាក្យបណ្តឹង សមត្ថកិច្ចខេត្តសុរិន្ទក៏រាយការណ៍ទៅមេបញ្ជាការខេត្តសុរិន្ទ ដើម្បីបង្កើតក្រុមការងារស៊ើបអង្កេតករណីនេះ ។

ជំហ៊ានដំបូង មេបញ្ជាការខេត្តសុរិន្ទ បានចុះហត្ថលេខាបង្កើតក្រុមការងារស៊ើបអង្កេតចាត់វិធានការករណីនេះ ដើម្បីប្រមូលភស្តុតាង សាក្សី និងប្រមូលវីដេអូក្នុងបណ្តាញសង្គមពាក់ព័ន្ធនឹងហេតុការណ៍កើតឡើងនៅប្រាសាទតាមាន់ធំ ។ បន្ទាប់មក នឹងចេញលិខិតកោះហៅអ្នកស្រី ម៉ូនីកា ឱ្យធ្វើដំណើរមកខេត្តសុរិន្ទ ដើម្បីឆ្លើយតបជាមួយសមត្ថកិច្ចស៊ើបអង្កេតតាមរយៈក្រសួងការបរទេស ។

គួរបញ្ជាក់ថា កាលពីថ្ងៃទី១៥ ខែកក្កដា អ្នកស្រី ម៉ូនីកា ត្រូវបានកងទ័ពថៃចោទប្រកាន់ថា អ្នកស្រីចង្អុលមុខ និងជេរកងទ័ពថៃរឿងល្មើសចូលក្នុងទឹកដីកម្ពុជា រួចហើយក៏មានការឈ្លោះប្រកែកគ្នាខ្លាំងៗជាមួយកងទ័ពថៃ រហូតដល់កងទ័ពខ្មែរប្រឈមមុខជាមួយកងទ័ពថៃនៅប្រាសាទតាមាន់ធំ ។

ដោយឡែក នាយករដ្ឋមន្ត្រីថៃស្តីទី លោក ភូមិថាំ វីឆាយ៉ាឆៃ ចោទថា ហេតុការណ៍ចលាចលកើតឡើងនៅប្រាសាទតាមាន់ធំកាលពីថ្ងៃទី១៥ ខែកក្កដា គឺជាការញុះញង់របស់កម្ពុជាចង់ឱ្យមានការប៉ះទង្គិច ហើយប្រាប់ឱ្យកងទ័ព និងពលរដ្ឋខ្លួនអត់ធ្មត់ ។ ការពិត ហេតុការណ៍នេះកើតឡើងដោយសារកងទ័ពថៃហាមឃាត់អ្នកស្រី ម៉ូនីកា មិនឱ្យឡើងប្រាសាទតាមាន់ធំដែលជាសម្បត្តិរបស់ខ្មែរ ប៉ុន្តែអ្នកស្រីតវ៉ាថា នេះជាប្រាសាទរបស់ខ្មែរ ទើបកងទ័ពថៃខឹងសម្បារ និងប្រមូលផ្តុំគ្នាឡើងប្រាសាទបណ្តេញអ្នកស្រី ៕

ឧត្តរមានជ័យ៖ ពិតជាកម្លាំងសាមគ្គីជាតិមិនធម្មតា! ត្រឹមតែមួយថ្ងៃប៉ុណ្ណោះ មានប្រជាជនខ្មែរដែលនាំគ្នាឡើងទៅលេងប្រាសាទតាមាន់ធំ និងប្រាសាទតាក្របី ក្នុងខេត្តឧត្តរមានជ័យ ចំនួន ១ម៉ឺននាក់។ កត្តានេះបានបង្ហាញពីឆន្ទៈស្នេហាជាតិដ៏ពុះកញ្ជ្រោលរបស់ប្រជាជនខ្មែរក្នុងការពារបូរណភាពទឹកដី និង កេរ្តិ៍តំណែលរបស់ដូនតា។

យោងតាម លោក ម៉េត មាសភក្ដី អភិបាលរងខេត្តឧត្ដរមានជ័យ បានឱ្យដឹងកាលពីថ្ងៃអាទិត្យ ទី២០ ខែកក្កដា ថា ប្រជាពលរដ្ឋខ្មែរកាន់តែនាំគ្នាសម្រុកទៅទស្សនាប្រាសាទតាមាន់និងប្រាសាទតាក្របី ក្នុងទឹកដីនៃខេត្តឧត្ដរមានជ័យ ប្រទេសកម្ពុជា ប្រមាណជិត១ម៉ឺននាក់។

ទន្ទឹមនឹងការកើនឡើងជាបន្តបន្ទាប់ណៃចំនួនភ្ញៀវទេសចរជាជនជាតិខ្មែរទៅទស្សនានៅតំបន់ប្រាសាទបុរាណរបស់ខ្មែរនៅក្នុងតំបន់ព្រំដែនបែបនេះ បានបង្ហាញឲ្យកាន់តែច្បាស់នូវឆន្ទៈស្នេហាជាតិ ស្រលាញ់ទឹកដី និងជាភស្តុតាងដ៏សំខាន់ប្រាប់ទៅកាន់ពិភពលោកថា «បុព្វបុរសខ្មែរគឺជាម្ចាស់នៃប្រាសាទ ហើយខ្មែរជាម្ចាស់របស់ទឹកដីនេះ»។

បន្ថែមពីនេះ វាក៏ជាការលើកទឹកចិត្តទៅដល់កងកម្លាំងវរជនដែលឈរជើងល្បាតនៅតាមព្រំដែន ជាពិសេសនៅតំបន់ប្រាសាទ ឲ្យកាន់តែមានស្មារតីមុះមត់ក្នុងការការពារដែនអធិបតេយ្យ និងបូរណភាព ប្រឆាំងទៅនឹងជនឈ្លានពានអគតិ ដែលចង់បានទឹកដីរបស់អ្នកដទៃទាំងងងើល និងមិនអៀនខ្មាស។

គួរឲ្យដឹងផងដែរថា ថៃតែងតែអះអាងដដែលៗថាទាំងទឹកដី ទាំងប្រាសាទដែលមាននៅតំបន់ខាងលើនេះ គឺជាកម្មសិទ្ធិរបស់ថៃ ដោយសំអាងទៅលើផែនទីដែលខ្លួនបានគូសជាឯកតោភាគី មិនព្រមទទួលយកផែនទីផ្សេង និងគោរពតាមការសម្រេចរបស់តុលាការយុត្តិធម៌អន្តរជាតិឡើយ។

ទោះជាយ៉ាងណា សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា កាលពីយប់ថ្ងៃចន្ទ ទី២១ខែកក្កដា បានបញ្ចេញសារមួយជាមួយនឹងការបញ្ចាក់ថា៖ តំបន់ឬទីកន្លែងដែលមានវិវាទ ឬមិនទាន់ដាច់ស្រេចថាស្ថិតក្នុងដែនអធិបតេយ្យភាពរបស់ប្រទេសណាមួយ គឺគ្មានភាគីណាមានសិទ្ធិធ្វើសកម្មភាពឬដាក់ចេញនូវវិធានការជាឯកតោភាគីនៅក្នុងតំបន់ឬទីកន្លែងនោះ។ រាល់វិធានការនានាដែលអាចអនុវត្តបាន ត្រូវមានការឯកភាពគ្នារវាងភាគីទាំងពីរជាមុនសិន។ បន្ទាត់ក្រហមនៅតែជាបន្ទាត់ក្រហម មិនមានការប្រែប្រួលទេ។ សូមកុំបំពាន។ កម្ពុជាមានសមត្ថភាពគ្រប់គ្រាន់និងបានត្រៀមខ្លួនជាស្រេចក្នុងការការពារខ្លួននិងការពារបូរណភាពទឹកដី តាមគ្រប់មធ្យោបាយទាំងអស់ប្រឆាំងនឹងការរំលោ.ភបំពាន៕

ប្រទេសថៃ ៖ កាលពីថ្ងៃទី២២ ខែកក្កដា ឆ្នាំ២០២៥ សារព័ត៌មានថៃ The Better រាយការណ៍ថា លោក រាំងស៊ីម៉ាន់ រ៉ូម សមាជិកសភាថៃ និងជាប្រធានគណៈកម្មការសន្តិសុខ កិច្ចការព្រំដែន យុទ្ធសាស្ត្រជាតិ និងកំណែទម្រង់ បានជំរុញឱ្យគណៈកម្មការសន្តិសុខប្រើប្រាស់អំណាចកោះហៅបុគ្គល៣រូប រួមមាន ៖ លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីព្យួរតំណែង, លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទី និងលោក ម៉ារីស សាងៀមផុង រដ្ឋមន្ត្រីក្រសួងការបរទេស មកបកស្រាយពីមូលហេតុដោះស្រាយជម្លោះព្រំដែនជាមួយកម្ពុជាយឺតយ៉ាវ ។

លោក រាំងស៊ីម៉ាន់ រ៉ូម សមាជិកសភាថៃមកពីគណបក្សប្រជាជនបានផ្តល់បទសម្ភាសន៍ជាមួយសារព័ត៌មានពីជម្លោះព្រំដែនកម្ពុជា-ថៃ និងករណីកងទ័ពថៃ៣នាក់ជាន់មីនដាច់ជើង និងរងរបួសពេលល្បាតនៅព្រំដែនថា នៅថ្ងៃទី២៤ ខែកក្កដា លោកនឹងជជែកពីបញ្ហាទាំងអស់ រួមទាំងស្នើទៅគណៈកម្មការសន្តិសុខប្រើប្រាស់អំណាចកោះហៅលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីព្យួរតំណែង និងជារដ្ឋមន្ត្រីក្រសួងវប្បធម៌, លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទី រួមទាំងលោក ម៉ារីស សាងៀមផុង រដ្ឋមន្ត្រីក្រសួងការបរទេស មកបកស្រាយដំណោះស្រាយព្រំដែនយឺតយ៉ាវ ។

លោកគិតថា ការដោះស្រាយជម្លោះព្រំដែនជាមួយកម្ពុជាពាក់ព័ន្ធនឹងការបែកធ្លាយកិច្ចសន្ទនារវាងលោកស្រី ផេថងថាន ជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ហើយវាពុំមែនជាបញ្ហាតូចតាចទេ ត្រូវតែព្យាយាមបញ្ចប់បញ្ហា ពុំចាំបាច់ធ្វើអ្វីបន្ត និងពុំចាំបាច់ទទួលខុសត្រូវ ។ ក្នុងនាមលោកជាប្រធានគណៈកម្មការសន្តិសុខ លោកពុំអាចទទួលយកបានទេ គឺត្រូវតែបំពេញតួនាទីរបស់ខ្លួន ពីព្រោះរឿងនេះជាការផ្លាស់ប្តូរដ៏សំខាន់សម្រាប់បញ្ហារដ្ឋាភិបាលថៃដែលពុំអាចដឹកនាំប្រទេសបន្តទៀត និងពុំអាចដោះស្រាយជម្លោះជាមួយកម្ពុជា ។

លោក រាំងស៊ីម៉ាន់ រ៉ូម បន្តថា យើងឃើញនៅប្រាសាទតាមាន់ធំតែងតែមានបញ្ហាគ្រប់ពេលវេលា វាពុំមែនជារឿងល្អទេ ហើយសូមសួរថា បើបញ្ហាជម្លោះរវាងត្រកូល ថាក់ស៊ីន ជាមួយកម្ពុជាកាន់តែរាលដាលខ្លាំង តើអ្នកណាទទួលខុសត្រូវ ។ វាមានតែធ្វើឱ្យពលរដ្ឋទាំងពីរប្រទេសសម្លាប់គ្នាទៅវិញទៅមក ហើយនេះជាការពុំទទួលខុសត្រូវរបស់លោកស្រី ផេថងថាន និងលោក ថាក់ស៊ីន ហើយធ្វើឱ្យប្រទេសថៃមានវិបត្តិនយោបាយកាន់តែខ្លាំង ។

លោកគិតថា ថៃគួរតែមានវិធីដោះស្រាយជម្លោះព្រំដែន ពុំគួរបណ្តោយឱ្យប្រទេសទាំងពីរមានជម្លោះបែបនេះបន្តទៀត ។ រដ្ឋាភិបាលថៃសង្ឃឹមថា នឹងដោះស្រាយបញ្ហាផ្សេងៗ មិនថាការចរចាជាមួយប្រទេសផ្សេង រួមទាំងការដោះស្រាយបញ្ហា Call Center បានតិចតួច ដោយថៃចោទប្រកាន់កម្ពុជាល្មើសអនុសញ្ញាអូតាវ៉ា ហើយរង់ចាំរហូតដល់ខែធ្នូ ទើបមានកិច្ចប្រជុំ វាពុំអាចទៅរួចទេ ខណៈដំណោះស្រាយរបស់ក្រសួងការបរទេសយឺតយ៉ាវ បើធៀបនឹងស្ថានការណ៍ផ្លាស់ប្តូរ ។ ដំណោះស្រាយជម្លោះយឺតយ៉ាវប៉ះពាល់ដល់ពលរដ្ឋ បើជម្លោះកាន់តែខ្លាំងនឹងឈានទៅសង្គ្រាម គឺគ្មានប្រទេសណាចំណេញទេ ខាតទាំងអស់ ។

ចុងក្រោយ សមាជិកសភារូបនេះបានផ្តាំផ្ញើទៅលោកស្រី ផេថងថាន ថា បើលោកស្រីពុំអាចដោះស្រាយបញ្ហាបាន លោកស្រីត្រូវតែប្រគល់អំណាចឱ្យពលរដ្ឋ ។ លោកស្រី ផេថងថាន នាយករដ្ឋមន្ត្រីព្យួរតំណែង និងលោក ថាក់ស៊ីន អតីតនាយករដ្ឋមន្ត្រី ពុំស្គាល់ពាក្យថា «គ្រប់គ្រាន់» ឬពុំយល់ថា ស្ថានការណ៍នេះពុំអាចដោះស្រាយ ទើបលោកចង់ឱ្យបុគ្គលទាំង២រូបសម្លឹងមើលស្ថានការណ៍ជារួម ។ ការបោះឆ្នោត គឺជាជម្រើសល្អបំផុត ពីព្រោះពេលមានការបោះឆ្នោត ស្ថានការណ៍ទាំងអស់នឹងធូរស្រាលជាងនេះ ៕

វ៉ាស៊ីនតោន៖ សហរដ្ឋអាមេរិកបាននឹងដកខ្លួនចេញពីទីភ្នាក់ងារវប្បធម៌និងអប់រំរបស់អង្គការយូណេស្កូ ដែលជាផ្នែកនៃអង្គការសហប្រជាជាតិម្ដងទៀត ក្រោមហេតុផល«អាមេរិកគ្មានផលប្រយោជន៍អ្វីនឹងបន្តនៅសហការជាមួយអង្គការអង្គការយូណេស្កូទេ» ព្រមទាំងបានចោ.ទប្រកាន់អង្គការនេះថា៖ មានគោលការណ៍ផ្ទុយពីគោលនយោបាយរបស់អាមេរិក។

យោងតាមសារព័ត៌មានបរទេសនាថ្ងៃពុធ ទី២៣ ខែកក្កដា ឆ្នាំ២០២៥ បានឲ្យដឹងថា រដ្ឋបាល Trumpបានសម្រេចកាត់ផ្តាច់ទំនាក់ទំនងជាមួយអង្គការយូណេស្កូ បន្ទាប់ពីសហរដ្ឋអាមេរិកបានដកខ្លួនចេញពីអង្គការសុខភាពពិភពលោក និងកិច្ចព្រមព្រៀងអាកាសធាតុទីក្រុងប៉ារីស ក៏ដូចជាការកាត់ថវិកាជំនួយសម្រាប់កិច្ចខិតខំប្រឹងប្រែងផ្តល់ជំនួយពីបរទេស។

នាយកដ្ឋានរដ្ឋបាននិយាយថា “របៀបវារៈសកលនិយម និងមនោគមវិជ្ជាសម្រាប់ការអភិវឌ្ឍន៍អន្តរជាតិ” របស់អង្គការយូណេស្កូគឺ “ផ្ទុយនឹងគោលនយោបាយការបរទេសដែលទុកអាមេរិកជាធំ” ។ លើសពីនេះ អ្នកនាំពាក្យក្រសួងការបរទេសសហរដ្ឋអាមេរិកនិយាយថា ប្រទេសខ្លួនគ្មានផលប្រយោជន៍អ្វីនឹងបន្តនៅសហការជាមួយអង្គការនេះទេ ហើយអង្គការយូនេស្កូបានប្រកាន់ជំហរលម្អៀងប្រឆាំងប្រទេសអុីស្រាអែលថែមទៀត ។

គួរឲ្យដឹងថា កាលពីឆ្នាំ 2018 ក្នុងអំឡុងពេលកាន់តំណែងជាប្រធានាធិបតីដំបូងរបស់គាត់ លោក Trump បានដកសហរដ្ឋអាមេរិកចេញពីអង្គការ Unesco ម្ដងរួចមកហើយ ប៉ុន្តែក្រោមការគ្រប់គ្រងរបស់លោក Joe Biden នៅឆ្នាំ 2023 ប្រទេសនេះបានចូលរួមជាមួយអង្គការយូណេស្កូវិញ រហូតមកដល់ត្រឹមថ្ងៃអង្គារ ទី22 ឆ្នាំ 2025 ក្នុងការគ្រប់គ្រងរបស់លោក Trump គាត់បានដក់ប្រទេសរបស់ខ្លួនចេញពីអង្គការនេះជាថ្មីម្ដងតៀត។

លោកស្រី Audrey Azoulay អគ្គនាយិកាអង្គការយូនេស្កូបានឲ្យដែរថា ប្រហែល ៨% នៃថវិការរបស់អង្គការយូណេស្កូ គឺទទួលបានពីសហរដ្ឋអាមេរិក។ ដូច្នេះជាមួយនឹងការចាកចេញរបស់សហរដ្ឋអាមេរិក លោកស្រី Audrey បាននិយាយថា «ទោះបីការចាកចេញនេះជារឿងមួយដែលគួរឲ្យសោ.កស្តាយ ប៉ុន្តែយើងបានត្រៀមខ្លួនជាមុនលើករណីនេះរួចហើយ» ។

បច្ចុប្បន្នអង្គការយូណេស្កូមានរដ្ឋជាសមាជិកចំនួន 194 នៅជុំវិញពិភពលោក ហើយត្រូវបានគេស្គាល់ថាល្អបំផុតសម្រាប់ការចុះបញ្ជីតំបន់បេតិកភណ្ឌពិភពលោក។ ការសម្រេចចិត្តចាកចេញរបស់សហរដ្ឋអាមេរិកនឹងចូលជាធរមានចាប់ពីខែធ្នូឆ្នាំ 2026 តទៅ។ វិធានការនេះគឺជាជំហានចុងក្រោយបង្អស់ក្នុងកិច្ចខិតខំប្រឹងប្រែងរបស់រដ្ឋបាល Trump ក្នុងការកាត់ផ្តាច់ទំនាក់ទំនងជាមួយស្ថាប័នអន្តរជាតិ៕

ប្រទេសឥណ្ឌា៖ ទឹកភ្នែកអូដ្ឋ ឥឡូវនេះកំពុងទាក់ទាញការចាប់អារម្មណ៍ពីអ្នកវិទ្យាសាស្ត្រជុំវិញពិភពលោក បន្ទាប់ពីការសិក្សាថ្មីមួយបានអះអាងថា ពួកវាអាចជួយបន្សាបពិសពស់រហូតដល់ទៅ ២៦ ប្រភេទផ្សេងៗគ្នា។ នេះបើយោងតាមការចុះផ្សាយរបស់គេហ័ទំព័ឥណ្ឌា។

សត្វអូដ្ឋដែលត្រូវបានគេស្គាល់ថាជា “កប៉ាល់នៃវាលខ្សាច់” ត្រូវបានគេទទួលស្គាល់សមត្ថភាពដ៏អស្ចារ្យរបស់ពួកវាក្នុងការរស់រានមានជីវិតក្នុងស្ថានភាពលំបាកដូចជា បរិយាកាសស្ងួតហួតហែង និងក្តៅ។ ឥឡូវនេះ សត្វដ៏អស្ចារ្យទាំងនេះក៏អាចជួយសង្គ្រោះជីវិតដោយផ្តល់នូវវិធីថ្មីដើម្បីព្យាបាលពស់ចឹក ដែលជាបញ្ហាធ្ងន់ធ្ងរនៅក្នុងប្រទេសសម្បូរពស់ច្រើន ដូចជាប្រទេសឥណ្ឌាជាដើម។

ការស្រាវជ្រាវនេះធ្វើឡើងដោយមន្ទីរពិសោធន៍ស្រាវជ្រាវពេទ្យសត្វកណ្តាលនៅទីក្រុងឌូបៃ។ យោងតាមអ្នកស្រាវជ្រាវ ទឹកភ្នែកអូដ្ឋអាចមានសមាសធាតុធម្មជាតិ ឬអង់ទីប៉ូឌីពិសេសៗដែលអាចបំបែកពិសដែលមាននៅក្នុងពស់។ ​យ៉ាងណាមិញ ប្រសិនបើការសិក្សាបន្ថែមបញ្ជាក់ពីការរកឃើញទាំងនេះ ទឹកភ្នែកអូដ្ឋអាចនាំទៅរកការបង្កើតនូវវិធីព្យាបាលពិសថ្មី ដែលមានតម្លៃទាប ជាពិសេសមានប្រយោជន៍សម្រាប់សហគមន៍ជនបទ ដែលការប្រើប្រាស់ថ្នាំបន្សាបពិសនៅមានកម្រិត ឬអ្នកជំងឺទទួលបានការព្យាបាលយឺតយ៉ាវ។

លើសពីពីនេះ មិនត្រឹមតែវាមានសក្តានុពលក្នុងការបន្សាបជាតិពិសពស់ប៉ុណ្ណោះទេ ទឹកភ្នែកអូដ្ឋក៏ត្រូវបានគេស្គាល់ថាបានផ្តល់នូវអត្ថប្រយោជន៍សុខភាពដល់ពួកវាឯងផងដែរ។ ទឹកភ្នែករបស់ពួកវាមានបរិមាណប្រូតេអ៊ីនការពារខ្ពស់ដែលជួយការពារភ្នែករបស់ពួកវាពីធូលីដី បាក់តេរី និងភ្នាក់ងារបង្ករោគដែលមាននៅក្នុងបរិយាកាសវាលខ្សាច់។

ក្រៅពីនេះ សមាសធាតុសំខាន់មួយគឺអង់ស៊ីមមួយឈ្មោះថា Lysozyme ដែលត្រូវបានគេស្គាល់ថាអាចសម្លាប់បាក់តេរី ផ្សិត និងសូម្បីតែមេរោគ។ អង់ស៊ីមនេះដើរតួនាទីដូចជាអង់ទីប៊ីយ៉ូទិកធម្មជាតិ ជួយឱ្យភ្នែកអូដ្ឋមានសុខភាពល្អក្នុងបរិយាកាសដ៏លំបាក។

ទោះជាយ៉ាងណា ទោះបីជាការរកឃើញនេះមិនទាន់ត្រូវបានបោះពុម្ពនៅក្នុងទស្សនាវដ្ដីវិទ្យាសាស្ត្រជាផ្លូវការក៏ដោយ ប៉ុន្តែការអះអាងដំបូងៗបានធ្វើឱ្យមានការចាប់អារម្មណ៍ពីអន្តរជាតិរួចទៅហើយ។ ប្រសិនបើទឹកភ្នែកអូដ្ឋពិតជាមានសារធាតុប្រឆាំងមេរោគ និងបន្សាបពិសពស់មែន នោះថ្ងៃណាមួយវាក៏អាចជួយសង្គ្រោះជីវិតមនុស្សពីសត្វអាសិរពិសរាប់ពាន់នាក់នៅទូទាំងពិភពលោក ហើយនេះអាចជាដំណើរថ្មីមួយ សម្រាប់ការព្យាបាលពិសពស់ ដោយសមាសធាតុធម្មជាតិ ពីសត្វដែលយើងគ្រប់គ្នាធ្លាប់តែមើលរំលង៕

ទីក្រុងប៉េកាំង៖ ចិន និង វៀតណាមកំពុងរងការវា.យប្រហា.រដោយព្យុះទីហ្វុង Wipha ដែលនាំមកនូវទឹកភ្លៀង និងខ្យល់បក់យ៉ាងខ្លាំង ជាហេតុធ្វើឲ្យអាកាសយានដ្ឋានមួយចំនួនសម្រេចផ្អាកការហោះហើរជាបណ្ដោះអាសន្ន និងមនុស្សម្នាជាច្រើនត្រូវបានជម្លៀសទៅរកទីទួលសុវត្ថិភាព។

យោងតាមសារព័ត៌មាន Rueters បានឲ្យដឹងថា កាលពីថ្ងៃអាទិត្យ ព្យុះទីហ្វុង Wipha បានបោកបក់កាត់ទីក្រុងហុងកុង ដោយបានធ្វើឲ្យជើងហោះហើរជាច្រើនត្រូវបានពន្យពេល មនុស្សជិត ២៨០ នាក់ត្រូវបានជម្លៀសទៅទីសុវត្ថិភាព និងផ្ដួលរំលំដើមឈើអស់ជាច្រើនដើម។ អ្នកព្យាករណ៍អាកាសធាតុចិនបាននិយាយថា ព្យុះ Wipha នឹងចុះខ្សោយទៅជាព្យុះត្រូពិចនៅពេលដីគោក ហើយវានឹងគ្របដណ្តប់ឆ្នេរសមុទ្រនៃខេត្ត Guangdong បន្ទាប់មកវានឹងបក់ឆ្ពោះទៅប្រទេសវៀតណាម។

សម្រាប់តំបន់ឆ្នេររបស់ប្រទេសចិនដីគោកនៃខេត្ត Guangdong, Guangxi, Hainan និង Fujian ត្រូវបានគេព្យាករណ៍ទុកថានឹងមានភ្លៀងធ្លាក់ខ្លាំង ដែលនឹងជំរុញឲ្យមានទឹកជំនន់ភ្លាមៗ ការរអិលបាក់ដី និងខ្យល់កន្ត្រាក់ដ៏គ្រោះថ្នាក់។

ជាមួយគ្នានេះ អាជ្ញាធរចិនបានអនុវត្តការត្រួតពិនិត្យចរាចរណ៍នៅផ្លូវល្បឿនលឿនសំខាន់ៗដែលតភ្ជាប់ទីក្រុង Shenzhen និង Zhuhai ទៅកាន់ទីក្រុងហុងកុង ព្រមទាំងនៅតាមកំពង់ផែ ដោយផ្លូវទាំងនេះត្រូវបានគេលើកឲ្យខ្ពស់កាលយប់ថ្ងៃអាទិត្យ។ ទូរទស្សន៍រដ្ឋ CCTV បានណែនាំឱ្យសាធារណជនត្រូវយរក្សាការប្រុងប្រយ័ត្នចំពោះគ្រោះមហន្តរាយនេះ អ្នកព្យាករណ៍ចិនបាននិយាយថា ព្យុះ Wipha នឹងរំកិលចូលទៅក្នុងឈូងសមុទ្រតុងកឹងនៅល្ងាចថ្ងៃចន្ទ ដែលនឹងប្រមូលផ្តុំកម្លាំងមុនពេលវា.យប្រហារឆ្នេរសមុទ្រភាគខាងជើងនៃប្រទេសវៀតណាម។

ដោយឡែក អាជ្ញាធរវៀតណាមបានដាក់បណ្ដារខេត្តនៅតាមមាត់សមុទ្ររបស់ខ្លួននៅក្នុងការប្រកាសអាសន្ន ដោយព្រមា.នអំពីទឹកជំនន់ដែលអាចមានគ្រោះថ្នាក់ និងការបាក់ដីធ្ងន់ធ្ងថាអាចនឹងកើតមានផងដែរ។

កាលពីយប់ថ្ងៃអាទិត្យ នាយករដ្ឋមន្ត្រីវៀតណាមបានជូនដំណឹងបន្ទាន់មួយទៅកាន់ពលរដ្ឋនៅតំបន់ឆ្នេរ ជាពិសេសអ្នកនេសាទ ដើម្បីហៅទូកពួកគេដែលកំពុងធ្វើដំណើរនៅលើសមុទ្រឲ្យចូលច្រាំង ជម្លៀសប្រជាជនចេញពីតំបន់ដែលងាយរងគ្រោះដោយទឹកជំនន់ រៀបចំការផ្គត់ផ្គង់ស្បៀងអាហារ និងឧបករណ៍សង្គ្រោះ និងធានាហេដ្ឋារចនាសម្ព័ន្ធនិងបណ្ដាញទំនាក់ទំនង៕