ប្រទេសថៃ ៖ កាលពីថ្ងៃទី២៤ ខែកក្កដា ឆ្នាំ២០២៥ សារព័ត៌មាន Thairath រាយការណ៍ថា ភ្នាក់ងារសង្គ្រោះខេត្តចាន់បុរី បានទទួលសេចក្តីរាយការណ៍មានជនរងគ្រោះត្រូវក្រុមស្ទាវវាយធ្វើបាបរាងកាយក្នុងបន្ទប់ជួល នៅផ្លូវស៊ុសាន ឃុំចាន់និមិត្ត ស្រុកមឿងចាន់បុរី ក៏បញ្ជូនក្រុមស្ម័គ្រចិត្តទៅកន្លែងកើតហេតុជាបន្ទាន់ ។ ជនរងគ្រោះជាយុវជនខ្មែរស្នាក់នៅបន្ទប់ជួល មានស្នាមរបួសលើចិញ្ចើម ក្បាល ក្បាលជង្គង់ និងស្នាមជាំពេញខ្លួន គ្រាន់តែប្រាប់ទៅក្រុមស្ទាវថា ជាជ.នជាតិខ្មែរ ។

យុវជនខ្មែរ អាយុ២៤ឆ្នាំ ដែលត្រូវក្រុមស្ទាវថៃវាយនិយាយថា ខ្លួនទើបតែចេញពីធ្វើការក្នុងរោងចក្រសាច់ជ្រូក ហើយកំពុងតែដើរចូលបន្ទប់ជួល ។ ពេលនោះ ក៏មានរថយន្តតូចពណ៌ខ្មៅ១គ្រឿង បើកមកចតនៅមុខបន្ទប់ជួល ហើយមានក្រុមស្ទាវថៃ២នាក់ចុះពីរថយន្តមកសួរខ្លួនថា ៖ «តើជាជនជាតិខ្មែរមែនទេ?» ខ្លួនឆ្លើយតបថា ៖ «ពិតមែន ខ្ញុំជាជនជាតិខ្មែរ» ស្រាប់តែស្ទាវថៃទាំង២នាក់ស្ទុះមកទាត់ធាក់តែម្តង យុវជនខ្មែរពុំអាចតដៃការពារខ្លួន រួចហើយក្រុមស្ទាវបានឡើងជិះរថយន្តគេចភ្លាមៗ ។

យុវជនខ្មែររូបនេះបានណាត់ជាមួយមិត្តភក្តិខ្មែរទៅលេងសមុទ្រនៅថ្ងៃទី២៧ ខែកក្កដា ហើយវាជាថ្ងៃដែលក្រុមស្ទាវថៃណាត់គ្នាធ្វើដំណើរទៅប្រាសាទតាមាន់ធំ នៅព្រំដែនកម្ពុជា-ថៃ ទើបធ្វើឱ្យក្រុមស្ទាវនៅខេត្តចាន់បុរី យល់ខុសថា យុវជនខ្មែរមានបំណងសើចចំអក ឬប្រឆាំងនឹងស្ទាវថៃក្នុងបណ្តាញសង្គម ។ យុវជនខ្មែរគ្មានរឿងឈ្លោះប្រកែកជាមួយជនជាតិថៃទេ ពីព្រោះខ្លួនបានមកធ្វើការស្របច្បាប់នៅថៃ ពុំធ្លាប់បង្កបញ្ហាជាមួយអ្នកណាឡើយ ។

យុវជនខ្មែររូបនិយាយទាំងសោកស្តាយថា បន្ទាប់ពីត្រូវក្រុមស្ទាវថៃព្រួតគ្នាវាយធ្វើបាប ខ្លួនសម្រេចចិត្តធ្វើដំណើរត្រឡប់មកប្រទេសកម្ពុជាវិញនៅថ្ងៃទី២៥ ខែកក្កដា ដោយសាររស់នៅថៃគ្មានសុវត្ថិភាព ហ៊ានធ្វើការនៅថៃបន្តទេ ។ ទោះយ៉ាងណា យុវជនខ្មែរពុំប្តឹងក្រុមជនល្មើស ដោយសារខ្លាចមានគ្រោះថ្នាក់ខ្លាំងជាងនេះ ។

ចំណែកម្ចាស់បន្ទប់ជួលដែលយុវជនខ្មែរស្នាក់នៅរៀបរាប់ថា បានដឹងរឿងរ៉ាវពីអ្នកមករកជួលបន្ទប់ប្រាប់ថា មានជនរងគ្រោះដួលនៅមុខបន្ទប់ជួល ។ ពេលម្ចាស់បន្ទប់ជួលដើរមកដល់ ស្រាប់តែឃើញយុវជនខ្មែរមានស្នាមឈាមពេញខ្លួន និងទទួលបានការជួយសង្គ្រោះពីភ្នាក់ងារសង្គ្រោះ ។

គួរបញ្ជាក់ថា នៅមានក្រុមស្ទាវថៃជាច្រើនក្រុមទៀតដើរវាយពលរដ្ឋខ្មែរស្លូតត្រង់ និងគ្មានទំនាស់អ្វីសោះ គ្រាន់តែឆ្លើយថាជាជនជាតិខ្មែរ ។ ករណីមួយទៀត ថ្មីៗនេះ ក្រុមស្ទាវថៃក៏បានវាយយុវជនមីយ៉ាន់ម៉ាផងដែរ ពីព្រោះច្រឡំជាជនជាតិខ្មែរ ៕

ប្រទេសថៃ ៖ កាលពីថ្ងៃទី២៤ ខែកក្កដា ឆ្នាំ២០២៥ សារព័ត៌មានថៃ Matichon រាយការណ៍ថា សមាជិកសភាមកពីគណបក្សភឿថៃបានស្នើឱ្យតុលាការធម្មនុញ្ញដកតំណែងលោកស្រី ផេថងថាន ស៊ីណាវ៉ាត់ ដែលត្រូវតុលាការព្យួរតំណែងនាយករដ្ឋមន្ត្រីជាបន្ទាន់ ពីព្រោះពេលនេះ ស្ថានការណ៍ជម្លោះធ្ងន់ធ្ងរ ប្រទេសថៃត្រូវតែមាននាយករដ្ឋមន្ត្រីថ្មីដើម្បីដោះស្រាយបញ្ហា ។

លោក ករកែវ ផិគុនថង សមាជិកសភាគណបក្សភឿថៃបានសរសេរក្នុងហ្វេសប៊ុក កាលពីថ្ងៃទី២៤ ខែកក្កដា ថា ពេលស្ថានការណ៍ធ្ងន់ធ្ងរបែបនេះ គ្រប់ស្ថាប័នពាក់ព័ន្ធទាំងអស់គួរតែសហការគ្នាធ្វើឱ្យស្ថានការណ៍ធូរស្រាលវិញ ដើម្បីឱ្យប្រទេសជាតិឆ្លងផុតពីវិបត្តិនាពេលនេះ ។ តុលាការធម្មនុញ្ញគួរពិចារណាដកតំណែងលោកស្រី ផេថងថាន ពីព្រោះពេលប្រទេសកំពុងជួបសង្គ្រាម ថៃត្រូវតែមានមេដឹកនាំថ្មី ។

លោកទទួលបានដំណឹងថា លោក ចាក់តុផន ព្រំផាន់ ណាត់ពលរដ្ឋប្រមូលផ្តុំគ្នាធ្វើបាតុកម្មនៅថ្ងៃទី២៧ ខែកក្កដា នេះ ប៉ុន្តែលោកយល់ថា ពុំគួរតវ៉ាពេលនេះទេ ដោយសារថៃកំពុងមានជាម្លោះជាមួយប្រទេសជិតខាង ដែលថៃត្រូវប្រើប្រាស់អាវុធ និងឈានទៅសង្គ្រាម ។ ហេតុនេះ ពលរដ្ឋថៃត្រូវសាមគ្គីគ្នាជាធ្លុងមួយ ពុំមែនតវ៉ានាំឱ្យបាក់បែកសាមគ្គី ។

ដោយឡែក លោក ជីរ៉ាយុ ហួងសាប់ អ្នកនាំពាក្យរដ្ឋាភិបាលថៃបានស្នើទៅលោក ចាក់តុផន ព្រំផាន់ មេដឹកនាំបាតុករឱ្យផ្អាកធ្វើបាតុកម្មសិន ដើម្បីកុំឱ្យជម្លោះផ្ទៃក្នុងប្រទេសថៃលាយឡំជាមួយជម្លោះខាងក្រៅ ។ លោកជឿជាក់ថា ទោះជាថៃមាននាយករដ្ឋមន្ត្រីថ្មី ក៏ពុំអាចដោះស្រាយបញ្ហាជម្លោះជាមួយកម្ពុជាទេ ។

នៅថ្ងៃទី២៥ ខែកក្កដា លោក ជីរ៉ាយុ ហួងសាប់ អ្នកនាំពាក្យរដ្ឋាភិបាលថៃបានអង្វរទៅក្រុមបាតុករដែលមានគម្រោងធ្វើបាតុកម្មនៅថ្ងៃទី២៧ ខែកក្កដា ឱ្យផ្អាកសកម្មភាពពីព្រោះវានឹងធ្វើឱ្យថៃពិបាកបញ្ចប់ជម្លោះជាមួយកម្ពុជា ។ លោកសំណូមពរឱ្យពលរដ្ឋសាមគ្គីគ្នាដើម្បីជាតិ ដោយសារថៃកំពុងមានជម្លោះខ្លាំងជាមួយកម្ពុជា និងកុំធ្វើបាតុកម្មនាំឱ្យកម្ពុជាសើចចំអក ពលរដ្ឋថៃត្រូវផ្អាកធ្វើបាតុកម្ម និងងាកមកតទល់ជាមួយកម្ពុជា ។

គួរបញ្ជាក់ថា កងទ័ពថៃបានបំពានមកលើបូរណភាពទឹកដីកម្ពុជា ដោយបាញ់ប្រហារមុនមកលើកងទ័ពកម្ពុជាដែលកំពុងឈរជើងការពារដែនអធិបតេយ្យ និងបូរណភាពទឹកដី ខណៈកម្ពុជាបានប្រើប្រាស់សិទ្ធិការពារខ្លួនក្នុងដែនអធិបតេយ្យរបស់ខ្លួនប្រឆាំងការឈ្លានពានរបស់កងទ័ពថៃ ។ នៅថ្ងៃទី២៥ ខែកក្កដា នេះ កងទ័ពឈ្លានពានថៃបានបាញ់គ្រាប់បែកចង្កោមមកលើទឹកដីកម្ពុជា ដែលជាការបំពានច្បាប់អន្តរជាតិ និងអនុសញ្ញាស្តីពីគ្រាប់បែកចង្កោម ហើយនេះជាឧក្រិដ្ឋកម្មប្រឆាំងមនុស្សជាតិ ៕

នៅថ្ងៃទី២៤ ខែកក្កដា ឆ្នាំ២០២៥ រដ្ឋាភិបាលសិង្ហបុរីបានបង្ហាញក្តីបារម្ភយ៉ាងខ្លាំងចំពោះការបា.ញ់ប្រ.ហារគ្នានៅតំបន់ព្រំដែនកម្ពុជា-ថៃ ព្រមទាំងអំពាវនាវឱ្យប្រទេសទាំងពីរដែលមានព្រំដែនជាប់គ្នាអត់ធ្មត់ និងចរចាតាមរយៈការទូតដើម្បីកាត់បន្ថយស្ថានការណ៍តានតឹងនាពេលបច្ចុប្បន្ន ។ ក្រៅពីនេះ សិង្ហបុរីបានជូនដំណឹងឱ្យពលរដ្ឋរបស់ខ្លួនចៀសវាងការធ្វើដំណើរទៅកាន់តំបន់ជម្លោះរវាងកម្ពុជា-ថៃ ។

សារព័ត៌មានសិង្ហបុរីបានផ្សព្វផ្សាយពីសេចក្តីថ្លែងការណ៍របស់ក្រសួងការបរទេសសិង្ហបុរី កាលពីថ្ងៃទី២៤ ខែកក្កដា ក្រោយពីកងទ័ពថៃបានបាញ់ប្រហារមុនមកលើកងទ័ពកម្ពុជា ហើយកងទ័ពកម្ពុជាបានប្រើប្រាស់សិទ្ធិការពារអធិបតេយ្យ និងបូរណភាពទឹកដីតាមតំបន់ព្រំដែនកម្ពុជា-ថៃ ដោយក្នុងសេចក្តីថ្លែងការណ៍របស់សិង្ហបុរីបញ្ជាក់ថា កម្ពុជា-ថៃ គឺជាសមាជិកសមាគមប្រជាជាតិអាស៊ីអាគ្នេយ៍ (Asean) ។

សេចក្តីថ្លែងការណ៍របស់សិង្ហបុរីបានអំពាវនាវឱ្យកម្ពុជា និងថៃបញ្ឈប់ការបាញ់ប្រហារគ្នានៅតាមតំបន់ព្រំដែន ព្រមទាំងជូនដំណឹងឱ្យពលរដ្ឋសិង្ហបុរីដែលរស់នៅកម្ពុជា និងថៃ សូមតាមដានស្ថានការណ៍យ៉ាងដិតដល់ ក៏ដូចជាអនុវត្តតាមការណែនាំជាផ្លូវការ ។

ពលរដ្ឋសិង្ហបុរីរស់នៅកម្ពុជា និងថៃ ឬមានគម្រោងធ្វើដំណើរមកកាន់ប្រទេសទាំងពីរពេលនេះ សូមចុះឈ្មោះនៅក្រសួងការបរទេសសិង្ហបុរី និងប្រុងប្រយ័ត្នការពារខ្លួនឱ្យមានសុវត្ថិភាព ។ ក្រៅពីនេះ ពលរដ្ឋសិង្ហបុរីត្រូវទំនាក់ទំនងទៅស្ថានទូតសិង្ហបុរីនៅរាជធានីភ្នំពេញ និងទីក្រុងបាងកក ប្រសិនបើត្រូវការជំនួយ ។

នៅថ្ងៃទី២៤ ខែកក្កដានេះ រដ្ឋាភិបាលឡាវបានបង្ហាញក្តីបារម្ភយ៉ាងខ្លាំងពីការប៉ះទង្គិចគ្នារវាងកម្ពុជា-ថៃ ពីព្រោះឡាវជាប្រទេសជិតខាងដែលមានទំនាក់ទំនងល្អជាមួយកម្ពុជា រួមទាំងថៃ ។ រដ្ឋាភិបាលឡាវសូមសំណូមពរឱ្យមេដឹកនាំកម្ពុជា-ថៃដោះស្រាយជម្លោះដោយសន្តិវិធី ។

គួរបញ្ជាក់ថា មានប្រទេសជាច្រើនបសំណូមពរឱ្យកម្ពុជា និងថៃបញ្ឈប់ការបាញ់ប្រហារនៅព្រំដែន និងងាកមកចរចាគ្នាដោយសន្តិវិធី ដូចជា ៖ ចិន ម៉ាឡេស៊ី សហរដ្ឋអាមេរិក សហភាពអឺរ៉ុប សិង្ហបុរី និងឡាវ ។ ប៉ុន្តែកងទ័ពថៃបានបាញ់ប្រហារមុនមកលើកងទ័ពកម្ពុជាចាប់ពីថ្ងៃទី២៤ ខែកក្កដា ដោយប្រើប្រាស់អាវុធធុនស្រាល ធុនធ្ងន់ រហូតដល់ប្រើប្រាស់យន្តហោះចម្បាំងទម្លាក់គ្រាប់បែកលើទឹកដីកម្ពុជា ៕