សហរដ្ឋអាមេរិក ៖ កាលពីថ្ងៃទី៣០ ខែកក្កដា ឆ្នាំ២០២៥ សារព័ត៌មាននានារបស់បរទេសរាយការណ៍ថា លោក Sean K. O’Neill ដែលត្រូវបានប្រធានាធិបតីអាមេរិក លោក Donald Trump បញ្ជូនមកធ្វើជាឯកអគ្គរដ្ឋទូតអាមេរិកថ្មីប្រចាំប្រទេសថៃ ព្រមានថា ថៃធ្វើសង្គ្រាមឈ្លានពានប្រទេសជិតខាង គឺកម្ពុជា នឹងធ្វើឱ្យរង្គោះរង្គើ ឬប៉ះពាល់ដល់ទំនាក់ទំនងការទូតរវាងអាមេរិក និងថៃ ។

ពេលមានការចោទសួរនៅសមាជិកព្រឹទ្ធសភាអំពីថៃធ្វើសង្គ្រាមឈ្លានពានកម្ពុជាដែលអូសបន្លាយពេលរហូតដល់៥ថ្ងៃ លោក O’Neill និយាយថា លោកនឹងជូនដំណឹងទៅទីក្រុងបាងកកឱ្យដឹងច្បាស់ថា ការធ្វើសង្គ្រាមនៅតំបន់ព្រំដែនកម្ពុជា-ថៃនាពេលថ្មីៗនេះ បានប៉ះពាល់ពលរដ្ឋថៃខ្លួនឯង និងប៉ះពាល់ដល់ទំនាក់ទំនងការទូតរវាងអាមេរិក និងថៃ ។

បន្ទាប់មក ក៏មានសំណួរថា តើលោកនឹងមានវិធានការដូចម្តេចដើម្បីផ្លាស់ប្តូរពីការឈប់បាញ់គ្នារវាងប្រទេសទាំងពីរទៅជាសន្តិភាពយូរអង្វែង? លោក O’Neill ឆ្លើយថា កិច្ចការដំបូងដែលលោកត្រូវធ្វើ គឺលោកនឹងប្រាប់ទៅប្រទេសថៃដែលជាមិត្តតាមសន្ធិសញ្ញាជាមួយអាមេរិកនៅតំបន់អាស៊ីថា ការធ្វើសង្គ្រាមបែបនេះ ជម្លោះបែបនេះ ពុំបានជួយពលរដ្ឋថៃឡើយ ថៃពុំបានធ្វើអ្វីដើម្បីជំរុញមិត្តភាពជាមួយអាមេរិក ហើយថៃពុំដោះស្រាយបញ្ហាកំពុងប្រឈមជាមួយអាមេរិក ។ ថៃបែរជាធ្វើឱ្យកងទ័ព និងពលរដ្ឋបាត់បង់ជីវិត រួមទាំងខូចខាតទ្រព្យសម្បត្តិ ។

លោក O’Neill ឯកអគ្គរដ្ឋទូតអាមេរិកថ្មីប្រចាំប្រទេសថៃ និងធ្លាប់ធ្វើជាមន្ត្រីទូតនៅថៃចំនួន២លើក បាននិយាយពីគោលជំហរច្បាស់លាស់របស់អាមេរិក និងព្រមានរដ្ឋាភិបាលថៃបែបនេះ ក្រោយពីមេដឹកនាំកម្ពុជា-ថៃបានទៅប្រទេសម៉ាឡេស៊ី កាលពីថ្ងៃទី២៨ ខែកក្កដា ដើម្បីចរចាកិច្ចព្រមព្រៀងឈប់បាញ់បន្ទាន់ដោយឥតលក្ខខណ្ឌ ដែលចូលជាធរមានចាប់ពីដើមថ្ងៃទី២៩ ខែកក្កដា ក្រោមការសម្របសម្រួលរបស់ប្រធានអាស៊ាន និងការអង្កេតការណ៍របស់មហាអំណាចអាមេរិក និងមហាអំណាចចិន ។

ជំនួបចរចាកិច្ចព្រមព្រៀងឈប់បាញ់រវាងកម្ពុជា-ថៃនៅម៉ាឡេស៊ី កើតឡើងក្រោយពីប្រធានាធិបតីអាមេរិក លោក Donald Trump ថ្លែងមកកាន់មេដឹកនាំកម្ពុជា-ថៃថា អាមេរិកនឹងពុំចរចាពាណិជកម្មជាមួយប្រទេសទាំងពីរទេ ប្រសិនបើប្រទេសទាំងពីរនៅតែបន្តសង្គ្រាម ។

គួរបញ្ជាក់ថា បើទោះជារដ្ឋាភិបាល កងទ័ព និងពលរដ្ឋថៃព្យាយាមលាបពណ៌ចោទប្រកាន់កម្ពុជា និងប្រាប់ពិភពលោកថា កម្ពុជាបំពានកិច្ចព្រមព្រៀងបទឈប់បាញ់ក្តី ប៉ុន្តែពិភពលោកដឹងការពិតអស់ហើយ គឺថៃខ្លួនឯងទេដែលបំពានកិច្ចព្រមព្រៀងឈប់បាញ់ជាបន្តបន្ទាប់ ។

អ្នកសារព័ត៌មានសិង្ហបុរី Channel News Asia ដែលបានមកកម្ពុជាផ្ទាល់ និងធ្វើសេចក្តីរាយការណ៍ព័ត៌មានពីតំបន់ព្រំដែនកាលពីថ្ងៃទី៣០ ខែកក្កដា បញ្ជាក់ថា ៖ «កម្ពុជាពុំបានល្មើសបទឈប់បាញ់ដែលកម្ពុជា-ថៃព្រមព្រៀងគ្នានៅម៉ាឡេស៊ីកាលពីថ្ងៃទី២៨ កក្កដា ដូចការចោទប្រកាន់របស់រដ្ឋាភិបាលថៃទេ» ៕

ប្រទេសថៃ ៖ ក្រោយពីសារព័ត៌មាន និងអ្នកលេងបណ្តាញសង្គមថៃចោទប្រកាន់ថា រុស្ស៊ីបញ្ជូនកងទ័ពមកជួយកម្ពុជាក្នុងជម្លោះព្រំដែនជាមួយថៃ ហើយកងទ័ពរុស្ស៊ីស្លៀកពាក់ឈុតកងទ័ពកម្ពុជា លោក ណាតថាផុន ណាតផានីត អនុរដ្ឋមន្ត្រីក្រសួងការពារជាតិថៃបានប្រាប់ទៅសារព័ត៌មានថៃថា លោកបានត្រួតពិនិត្យរួចហើយ គឺពុំមែនជាកងទ័ពរុស្ស៊ីទេ ។ នេះបើតាមការផ្សព្វផ្សាយរបស់សារព័ត៌មានថៃ Top News កាលពីថ្ងៃទី៣០ ខែកក្កដា ឆ្នាំ២០២៥ ។

លោក ណាតថាផុន ណាតផានីត អនុរដ្ឋមន្ត្រីក្រសួងការពារជាតិថៃនិយាយនៅថ្ងៃទី៣០ ខែកក្កដា នៅក្រសួងការពារជាតិថា កងទ័ពក្នុងរូបភាពដែលបណ្តាញសង្គមថៃចែកចាយនេះ គឺជាកងទ័ពកម្ពុជាមានរូបរាងខ្ពស់សង្ហា ជាកីឡាករបាល់ទះ និងគ្មានទំនាក់ទំនងជាភាសារុស្ស៊ី ។ លោកទទួលបានការបញ្ជាក់ថា កងទ័ពរូបនេះពុំមែនជាកងទ័ពបរទេសមកស៊ីឈ្នួលវាយថៃទេ គេជាកីឡាករបាល់ទះមានរូបរាងខ្ពស់ មុខមាត់ស្អាតបាត ទើបធ្វើឱ្យអ្នកលេងបណ្តាញសង្គមថៃចាប់អារម្មណ៍ និងយល់ខុសច្រឡំជាជនបរទេស ។

ចំណែកសំឡេងសន្ទនាតាមវិទ្យុជាភាសារុស្ស៊ី លោក ណាតថាផុន និយាយថា លោកពុំទាន់អាចបញ្ជាក់បានទេ ពីព្រោះតាំងព្រឹកមក (ព្រឹកថ្ងៃទី៣០ ខែកក្កដា) លោករវល់ប្រជុំ និងតាមដានព័ត៌មានពីប្រព័ន្ធផ្សព្វផ្សាយ ។ ពលរដ្ឋថៃជាច្រើនសង្ស័យថា កម្ពុជាជួលកងទ័ពរុស្ស៊ីមកធ្វើសង្គ្រាម ហើយបានសួរលោកតាំងពីយប់ថ្ងៃទី២៩ ខែកក្កដា ទើបលោកព្យាយាមឆ្លើយតប និងទទួលបានព័ត៌មានពុំមែនជាកងទ័ពរុស្ស៊ី ។

អ្នកសារព័ត៌មានថៃបានប្រាប់ទៅលោក ណាតថាផុន ថា ប៉ុន្តែកងទ័ពនេះមានរូបរាងស្រដៀងជនជាតិរុស្ស៊ី អ៊ុយក្រែន អ៊ូសបេគីស្ថាន និងកាហ្សាក់ស្ថាន លោកឆ្លើយថា យើងពុំអាចចោទប្រកាន់អ្វីមួយដោយគ្មានភស្តុតាងឡើយ ។ ប្រសិនបើលោកជាពលរដ្ឋសាមញ្ញ លោកនឹងគិតដូចគ្នាជាមួយអ្នកលេងបណ្តាញសង្គមដែរ ប៉ុន្តែលោកជាអនុរដ្ឋមន្ត្រីក្រសួងការពារជាតិពុំអាចនិយាយអ្វីបានទេ គឺដូចគ្នានឹងករណីកងទ័ពថៃដើរជាន់មីន ពុំដឹងថាជាមីនថ្មី ឬចាស់ ។

វាអាចទៅរួចដែលកម្ពុជាចំណាយប្រាក់ជួលកងទ័ពបរទេសមកជួយប្រយុទ្ធជាមួយថៃ ដូចលោក សុឆាតិ បាំរុងសុខ អ្នកវិភាគសន្តិសុខបានដាស់តឿនឱ្យពលរដ្ឋថៃប្រុងប្រយ័ត្នជាមួយជនជាតិរុស្ស៊ី ។ លោក សុឆាតិ អាចនិយាយតាមព័ត៌មានដែលខ្លួនមាន និងអ្វីដែលបានស្តាប់ឮ ។ នេះបើតាមការលើកឡើងរបស់លោក ណាតថាផុន ៕

ថៃ៖ ផ្អើ.លទាំងកណ្ដាលថ្ងៃត្រង់! ហេតុការណ៍ដ៏រន្ធត់មួយទៀតហើយ បានកើតឡើងនៅក្នុងប្រទេសថៃ ករណីផ្ទុះរោងចក្រផលិតកាំជ្រួចមួយកន្លែង បានបណ្ដាលឲ្យមនុស្សយ៉ាងហោចណាស់9នាក់ត្រូវបានគេរកឃើញថាស្លា.ប់ភ្លាមៗ និងច្រើននាក់ផ្សេងទៀតរងរបួសធ្ងន់ និងស្រាល ត្រូវបានដឹកជញ្ជូនទៅសង្រ្គោះបន្ទាន់។

យោងតាមសារព័ត៌មាន Khaosod នាវេលាម៉ោង 11:00 ព្រឹកថ្ងៃពុធ ទី30 ខែកក្កដា ឆ្នាំ2025 មានសេចក្ដីរាយការណ៍មួយត្រូវបានគេបញ្ជូនមកកាន់ប៉ុស្តិ៍អាជ្ញាធរមូលដ្ឋានជុំវិញហេតុការណ៍ផ្ទុះរោងចក្រផលិតកាំជ្រួច នៅក្បែរវត្តភូថាសៃ ភូមិលេខ១ ឃុំបានផូ ស្រុកមឿង ខេត្តស៊ូផានបុរី ។ បើតាមសេចក្ដីរាយការណ៍បឋមបានឲ្យដឹងថា មានអ្នកស្លា.ប់ និងរបួសច្រើននាក់នៅក្នុងការផ្ទុះនេះ។

ក្រោយទទួលបានដំណឹងនេះភ្លាម សមត្ថកិច្ច និងក្រុមអ្នកជួយសង្គ្រោះបានប្រញាប់ប្រញាល់ទៅកាន់ទីតាំងកើតហេតុខាងលើ និងរកឃើញមានសា.ក.ស.ពមនុស្សចំនួន 9 នាក់ ដោយជនរងគ្រោះខ្លះត្រូវបានរកឃើញនៅក្នុងផ្ទះដែលផ្ទុះ និងខ្លះទៀតបានខ្ទាតទៅរាយប៉ាយពាសពេញវាលស្រែដែលនៅក្បែរនោះ។

ការផ្ទុះនេះមិនបណ្ដាលឲ្យមានអគ្គីភ័យឆាបឆេះនោះទេ ប៉ុន្តែផ្ទះពីរខ្នងបានរងការខូចខាតទាំងស្រុង នៅសល់តែគ្រោងដែកបន្តិចបន្តួចប៉ុណ្ណោះពីការបំផ្ទុះនេះ។ បន្ថែមពីលើនេះ មនុស្សពីរនាក់ដែលនៅរស់រានមានជីវិត បានរងរបួសធ្ងន់និងកំពុងទទួលការសង្គ្រោះបន្ទាន់។ ប៉ុន្តែជាអកុសល ម្នាក់ក្នុងចំណោមពួកគេមិនអាចជួយសង្រ្គោះបានទេក្រោយទៅដល់មន្ទីរពេទ្យ។

គួរជម្រាបថា ករណីបែបនេះ តែងកើតឡើងជារៀងរាល់ឆ្នាំនៅខេត្ត Suphan Buri ដែលអាចមានចំនួនពី ពីរ ទៅបីដងក្នុងមួយឆ្នាំ។ បច្ចុប្បន្ន អាជ្ញាធរថៃបានបញ្ជូនមន្រ្តីជំនាញបើកការស៊ើបអង្កេតស្វែងរកមូលហេតុនៃការផ្ទុះនេះ ហើយអាជ្ញាធរថៃអះអាងថាចំនួនអ្នកស្លា.ប់ និងរបួសអាចនិងកើនឡើងច្រើនជាងនេះ៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath នៅថ្ងៃទី៣០ ខែកក្កដា ឆ្នាំ២០២៥ ឱ្យដឹងថា សភាព្រឹទ្ធសភាថៃម្នាក់បានចោទប្រកាន់កម្ពុជាបំពានកិច្ចព្រមព្រៀងបទឈប់បា.ញ់ និងណែនាំឱ្យរដ្ឋាភិបាលថៃកាត់ផ្តាច់ទំនាក់ទំនងការទូតជាមួយកម្ពុជា ដោយការបិទច្រកព្រំដែនទាំងអស់ រួមទាំងកាត់ផ្តាច់ទឹក ភ្លើង បណ្តាញអ៊ីនធើរណេត និងទូរស័ព្ទ ដើម្បីកម្ចា.ត់ក្រុមឆបោកអនឡាញ Call Center ប្រសិនបើកម្ពុជានៅតែបំពានបទឈប់បា.ញ់ ។

សមាជិកព្រឹទ្ធសភា លោក អាឡុងគុត វ៉ារៈគី បាននិយាយនៅថ្ងៃទី៣០ ខែកក្កដា ថា កម្ពុជាបំពានកិច្ចព្រមព្រៀងបទឈប់បាញ់ ហើយបើកម្ពុជានៅតែពុំអនុវត្តតាមកិច្ចព្រមព្រៀងនេះ គឺរដ្ឋាភិបាលថៃពុំគួរចរចាអ្វីទាំងអស់ជាមួយកម្ពុជា ។ ស្ថានការណ៍បច្ចុប្បន្ន កងទ័ពថៃបានបំពេញតួនាទីរបស់ខ្លួន ប៉ុន្តែរដ្ឋាភិបាល និងក្រសួងការបរទេសគួរធ្វើអ្វីដើម្បីការពារ និងរក្សាភាពថ្លៃថ្នូររបស់ពលរដ្ឋ ។

អ្វីដែលរដ្ឋាភិបាលថៃគួរតែធ្វើជាបន្ទាន់ រួមមាន ៖

១-បិទព្រំដែនកម្ពុជា-ថៃទាំងអស់ដើម្បីទប់ស្កាត់ក្រុមឆបោកអនឡាញ Call Center និងឧក្រិដ្ឋកម្មឆ្លងដែន
២-កាត់ផ្តាច់ទឹក ភ្លើង បណ្តាញអ៊ីនធើរណេត និងទូរស័ព្ទ ដែលតភ្ជាប់ជាមួយកម្ពុជា
៣-កាត់ផ្តាច់ទំនាក់ទំនងការទូត ដោយគ្មានឯកអគ្គរាជទូតថៃនៅរាជធានីភ្នំពេញ ដើម្បីឱ្យការធ្វើកិច្ចព្រមព្រៀង MOU ផ្សេងៗរវាងប្រទេសទាំងពីរត្រូវលុបចោល និង
៤-ពលរដ្ឋកម្ពុជាដែលមកធ្វើការនៅថៃត្រូវតែមកបង្ហាញខ្លួននៅស្ថាប័នរដ្ឋាភិបាល ពីព្រោះពុំដឹងថា តើពួកគេជាចារកម្មឬក៏អត់ ។

ការចាប់ផ្តើមចរចាជាមួយកម្ពុជាបាន លុះត្រាតែកម្ពុជាសងការខូចខាតទាំងអស់ឱ្យថៃ ដូចជា ៖ អាយុជីវិតកងទ័ព និងពលរដ្ឋថៃ រួមទាំងសងថ្លៃខូចខាតទ្រព្យសម្បត្តិផ្សេងៗដែលរដ្ឋាភិបាលថៃបានចំណាយប្រាក់អស់ប៉ុន្មាន គឺកម្ពុជាត្រូវតែសងទាំងអស់ ទើបអាចចរចាគ្នាបាន ។

ក្រៅពីនេះ សូមរដ្ឋាភិបាលថៃកុំយកករណីពន្ធទំនិញរបស់ប្រធានាធិបតីអាមេរិក លោក Donald Trump មកធ្វើជាលក្ខខណ្ឌសម្រាប់ការចរចាជម្លោះជាមួយកម្ពុជា បើទោះជាអាមេរិកនឹងទម្លាក់ពន្ធទំនិញថៃក្តី ។ ការទម្លាក់ពន្ធទំនិញថៃនាំចូលអាមេរិកពុំអាចប្តូរនឹងការបាត់បង់អធិបតេយ្យទេ លោកជឿថា ពលរដ្ឋថៃនឹងពុំព្រម ៕

ប្រទេសថៃ ៖ តាមការផ្សព្វផ្សាយរបស់សារព័ត៌មាន Khaosod នៅថ្ងៃទី៣០ ខែកក្កដា ឆ្នាំ២០២៥ ថា កងទ័ពថៃបានចេញសេចក្តីថ្លែងការណ៍ថ្កោលទោសកម្ពុជា និងចោទប្រកាន់កងទ័ពកម្ពុជាប្រើប្រាស់កាំភ្លើ.ងតូច និងឧបករណ៍បា.ញ់គ្រា.ប់បែកដៃ ។ កងទ័ពថៃថា ខ្លួនប្រកាន់យកនូវគោលការណ៍សន្តិភាព និងមនុស្សធម៌ រួមទាំងប្រឆាំងតបតរវិញ ដោយសារកម្ពុជាបំពានកិច្ចព្រមព្រៀងលើបទឈប់បា.ញ់យ៉ាងធ្ងន់ធ្ងរ ។

ស្របពេលកម្ពុជា និងថៃកំពុងស្ថិតក្នុងដំណាក់កាលនៃការចាប់ផ្តើមអនុវត្តបទឈប់បាញ់ ដែលចូលជាធរមានចាប់ពីដើមថ្ងៃទី២៩ ខែកក្កដា ក្រោមការសម្របសម្រួលរបស់ប្រធានអាស៊ាន និងការអង្កេតការណ៍របស់មហាអំណាចអាមេរិក និងមហាអំណាចចិន ឃើញថា រដ្ឋាភិបាលថៃ និងកងទ័ពថៃបានចោទប្រកាន់កម្ពុជាជាបន្តបន្ទាប់ ។

កងទ័ពថៃថា ខ្លួនអនុវត្តតាមកិច្ចព្រមព្រៀងឈប់បាញ់យ៉ាងម៉ឺងម៉ាត់រហូតមក ដោយផ្អាកការប្រើប្រាស់កម្លាំងកងទ័ពទាំងអស់ និងកាត់បន្ថយសកម្មភាពកងទ័ពក្នុងតំបន់ដើម្បីសន្តិភាព ប៉ុន្តែកងទ័ពថៃបានទទួលសេចក្តីរាយការណ៍ពីក្នុងតំបន់ព្រំដែនថា ចាប់ពីថ្ងៃទី២៩ ដល់ថ្ងៃទី៣០ ខែកក្កដា កងទ័ពកម្ពុជាបានបំពានកិច្ចព្រមព្រៀងបទឈប់បាញ់ម្តងទៀត ។

កងទ័ពថៃបានចោទប្រកាន់មកលើកងទ័ពកម្ពុជាជាច្រើនចំណុចដូចខាងក្រោម ៖

១-កងទ័ពថៃចោទថា កាលពីថ្ងៃទី២៩ ខែកក្កដា កងទ័ពកម្ពុជាបានប្រើប្រាស់កាំភ្លើងតូចបាញ់កងទ័ពថៃនៅតំបន់អានម៉ា ខេត្តឧប៊ុនរ៉ាជថានី ដែលធ្វើឱ្យកងទ័ពថៃតបតរវិញរហូតប៉ះទង្គិចគ្នា ។

២-កងទ័ពថៃចោទថា នៅថ្ងៃដដែល (ថ្ងៃទី២៩ ខែកក្កដា) កងទ័ពកម្ពុជាប្រើប្រាស់កាំភ្លើងតូចជាបន្តបន្ទាប់ រួមទាំងប្រើប្រាស់ឧបករណ៍បា.ញ់គ្រា.ប់បែកដៃនៅតំបន់ប្រាសាទព្រះវិហារ បរិវេណភ្នំទ្រព្យ និងតំបន់ហួយតាម៉ារៀ ខេត្តស៊ីសាកេត ។ ហេតុនេះ កងទ័ពថៃក៏តបតរវិញដើម្បីការពារខ្លួន ហើយកងទ័ពថៃចោទទៀតថា ការបាញ់ពីកម្ពុជាបានកើតឡើងជាបន្តបន្ទាប់ រហូតដល់ព្រឹកថ្ងៃទី៣០ ខែកក្កដា ។

៣-កងទ័ពថៃចោទថា នាវេលាម៉ោង៥និង១៧នាទីព្រឹក ថ្ងៃទី៣០ ខែកក្កដា ពួកគេបានឃើញគ្រាប់បែកដៃបាញ់ចេញពីកម្ពុជាចូលតំបន់ហ្វាម៉អ៊ីឌែង ខេត្តស៊ីសាកេត ។

កងទ័ពថៃចាត់ទុកថា ទង្វើរបស់កងទ័ពកម្ពុជា គឺបំពាននឹងកិច្ចព្រមព្រៀងបទឈប់បាញ់យ៉ាងធ្ងន់ធ្ងរ ហើយនេះជាការបំពានលើកទី២ ក្រោយពីបទឈប់បាញ់បន្ទាន់ដោយឥតលក្ខខណ្ឌរវាងកម្ពុជា និងថៃចូលជាធរមាន ។ វាបង្ហាញពីអាកប្បកិរិយាពុំគោរពកាតព្វកិច្ចអន្តរជាតិ និងបំផ្លាញការព្យាយាមធ្វើឱ្យស្ថានការណ៍ស្ងប់ស្ងាត់ ហើយថែមទាំងប៉ះពាល់ស្ថិរភាព និងទំនុកចិត្តរវាងប្រទេសទាំងពីរ ។

កងទ័ពថៃសូមថ្កោលទោសយ៉ាងដាច់អលង្ការចំពោះទង្វើគ្មានការទទួលខុសត្រូវរបស់កងទ័ពកម្ពុជា ហើយបើមានការបំពានទៀត កងទ័ពថៃនឹងអនុវត្តតាមដំណាក់កាល និងភាពចាំបាច់ដើម្បីការពារអធិបតេយ្យ រួមសុវត្ថិភាពពលរដ្ឋដោយមិនធ្វេសប្រហែស ។

ជាការឆ្លើយតប ក្រសួងការបរទេស និងសហប្រតិបត្តិការអន្តរជាតិកម្ពុជាបានចេញសេចក្តីថ្លែងការណ៍បដិសេធការចោទប្រកាន់របស់ថៃអំពីការរំលោភបទឈប់បាញ់ ។ កម្ពុជាប្តេជ្ញាចិត្តក្នុងការរក្សាបទឈប់បាញ់នេះយ៉ាងម៉ឺងម៉ាត់ និងខ្ជាប់ខ្ជួន កងកម្លាំងប្រដាប់អាវុធកម្ពុជាពុំបានធ្វើសកម្មភាពណាមួយទាល់តែសោះដែលអាចចាត់ទុកជាការរំលោភលើបទឈប់បាញ់ដែលបានព្រមព្រៀងគ្នា វាផ្ទុយស្រឡះពីពាក្យចោទប្រកាន់មានលក្ខណៈប្រឌិតរបស់ថៃ ៕

ប្រទេសថៃ ៖ នៅថ្ងៃទី៣០ ខែកក្កដា ឆ្នាំ២០២៥ ប្រធានសភាពាណិជ្ជកម្មថៃ លោក ផតអារ៉ាម វឌ្ឍនាណុន និយាយថា បើទោះជាពុំទាន់មានទំនុកចិត្ត ខណៈភាគីថៃចោទប្រកាន់កម្ពុជាបំពានកិច្ចព្រមព្រៀងបទឈប់បា.ញ់ ប៉ុន្តែវិស័យឯកជនថៃសូមគាំទ្រឱ្យភាគីកម្ពុជា-ថៃអត់ធ្មត់ ព្រមទាំងដោះស្រាយជម្លោះដោយសន្តិវិធី ។ ការដោះស្រាយជម្លោះត្រូវតែអនុវត្តតាមយន្តការសហប្រតិបត្តិការរបស់អាស៊ានដើម្បីចៀសវាងការប៉ះទង្គិចម្តងទៀត និងការខាតបង់ ។

ប្រធានសភាពាណិជ្ជកម្មថៃ លោក ផតអារ៉ាម វឌ្ឍនាណុន ជឿជាក់ថា ការបញ្ចប់សង្គ្រាមរវាងកម្ពុជា-ថៃតាមគោលការណ៍អន្តរជាតិ ប្រកាន់គោលការណ៍មនុស្សធម៌ និងគោរពសិទ្ធិមនុស្សយ៉ាងស្មោះត្រង់របស់ប្រទេសថៃនឹងបង្ហាញទៅកាន់អន្តរជាតិ ។ ជាមួយគ្នានេះ លោកសូមអំពាវនាវឱ្យភាគីកម្ពុជាគោរពតាមកិច្ចព្រមព្រៀងបទឈប់បាញ់តាមអ្វីដែលបានថ្លែងរួមគ្នា ។

ក្រៅពីនេះ លោកសង្ឃឹមយ៉ាងខ្លាំងថា ការពិភាក្សាក្នុងកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កម្ពុជា-ថៃ ដែលនឹងប្រព្រឹត្តទៅនៅថ្ងៃទី៤ ខែសីហា នៅកម្ពុជា នឹងអាចបញ្ចប់ជម្លោះរវាងប្រទេសទាំងពីរ ព្រមទាំងឈានទៅរកវិធីដោះស្រាយបញ្ហាពាណិជ្ជកម្មប្រកបដោយនិរន្តរភាព ។

ចំណែកការចរចាពន្ធទំនិញថៃជាមួយសហរដ្ឋអាមេរិកវិញ ប្រសិនបើថៃពុំអាចសម្រេចការចរចាតាមការកំណត់នៅថ្ងៃទី១ ខែសីហា ទេ វានឹងប៉ះពាល់ដល់ក្រុមហ៊ុនអាជីវកម្មនានា បើទោះជាជម្លោះព្រំដែនកម្ពុជា-ថៃទើបតែបញ្ចប់ក្តី ។ ប៉ុន្តែវិស័យឯកជនសូមសំណូមពរឱ្យរដ្ឋាភិបាលថៃប្រញាប់ចរចាពន្ធទំនិញជាមួយអាមេរិកតាមថ្ងៃកំណត់ ពីព្រោះវិស័យឯកជនជឿជាក់ថា ឯកសារពន្ធលើកចុងក្រោយដែលថៃបានផ្ញើទៅអាមេរិកនឹងទទួលបានការឆ្លើយតបវិជ្ជមានពីអាមេរិក ។

គួរបញ្ជាក់ថា វិស័យឯកជនថៃបានជួបការលំបាកតាំងពីរដ្ឋាភិបាលរបស់ខ្លួនបណ្តោយឱ្យកងទ័ពបិទព្រំដែនជាមួយកម្ពុជាជាឯកតោភាគី ហើយពេលកើតសង្គ្រាមនៅតំបន់ព្រំដែនកាន់តែធ្វើឱ្យវិស័យឯកជនថៃរងផលប៉ះពាល់ខ្លាំងឡើង ។ ពេលនេះ កម្ពុជា និងថៃបានព្រមព្រៀងអនុវត្តបទឈប់បាញ់នៅព្រំដែនដែលចូលជាធរមានចាប់ពីដើមថ្ងៃទី២៩ ខែកក្កដា ក្រោមការសម្របសម្រួលរបស់ប្រធានអាស៊ាន និងការអង្កេតការណ៍របស់មហាអំណាចអាមេរិក និងមហាអំណាចចិន ៕