តើ 0.07% ដែលមិនគាំទ្រនោះគឺជាអ្នកណា? យោងតាមប្រព័ន្ធផ្សព្វផ្សាយរដ្ឋកូរ៉េខាងជើង គណបក្សរបស់លោកគីម ជុងអ៊ុន ទទួលបានជ័យជម្នះយ៉ាងលើសលប់នៅក្នុងការបោះឆ្នោតសភា ដោយឈ្នះសំឡេងឆ្នោត 99.93% និងទទួលបានអាសនៈទាំងអស់នៅក្នុងសភា។ លទ្ធផលនេះបង្ហាញពីការក្ដោបក្តាប់អំណាចដាច់ខាតរបស់លោក នៅក្នុងប្រព័ន្ធនយោបាយមួយដែលស្ទើរតែគ្មានការប្រឆាំង។

តាមការផ្សាយរបស់ទីភ្នាក់ងារ KCNA នៅថ្ងៃពុធទី18 ខែមីនា ការបោះឆ្នោតសភាប្រជាជនកំពូលលើកទី15 នៅឆ្នាំ 2026 ណនេះ ទទួលបានលទ្ធផលជោគជ័យ ដូចកាលពីឆ្នាំ 2019 ដែរ ដោយនៅកាលនោះ គណបក្សតែមួយគត់របស់លោកក៏ទទួលបានសម្លេងឆ្នោតគាំទ្រស្ទើតែ 100% ផងដែរ។

ក្រោយការប្រកាសពីលទ្ធផលដូចខាងលើ សភាដែលទើបជាប់ឆ្នោតថ្មីនេះត្រូវបានគេរំពឹងថានឹងលេចរូបរាងឡើងក្នុងពេលឆាប់ៗសម្រាប់សម័យប្រជុំលើកដំបូងរបស់ខ្លួន ដែលវានឹងធ្វើការសម្រេចចិត្តសំខាន់ៗលើការតែងតាំងថ្នាក់ដឹកនាំ និងការធ្វើវិសោធនកម្មដែលអាចកើតមានចំពោះរដ្ឋធម្មនុញ្ញរបស់ប្រទេស។

លទ្ធផលជោគជ័យដ៏ច្រើនលើសលប់នេះត្រូវបានសភាទាំងមូលទទួលយកដោយគ្មានការសង្ស័យណាមួយឡើយ ដែលនេះឆ្លុះបញ្ចាំងពីប្រព័ន្ធនយោបាយដែលគ្រប់គ្រងយ៉ាងតឹងរ៉ឹងនៅក្នុងប្រទេស។ ទោះជាយ៉ាងណាក៏ដោយ អ្នកសង្កេតការណ៍ក្រៅរដ្ឋាភិបាលបានកត់សម្គាល់ថា ការបោះឆ្នោតរបស់កូរ៉េខាងជើងជាធម្មតាមានបេក្ខជនដែលត្រូវបានអនុម័តតែម្នាក់គត់ក្នុងមួយអាសនៈ ដែលធ្វើឱ្យអ្នកបោះឆ្នោតគ្មានជម្រើសសម្រាប់ជ្រើសរើសពិតប្រាកដឡើយ។

ការបោះឆ្នោតនេះត្រូវបានគ្រប់គ្រងដោយលោកគីម ដែលជាអ្នកមានសិទ្ធិគ្រប់បែបយ៉ាងលើប្រព័ន្ធកាន់អំណាច ជាពិសេសគណបក្សពលករកូរ៉េ ដែលគ្របដណ្ដប់លើគ្រប់ទិដ្ឋភាពនៃជីវិតនយោបាយ។ អ្នកវិភាគនិយាយថា លទ្ធផលបែបនេះគឺជារឿងធម្មតានៅក្នុងប្រទេសកូរ៉េខាងជើង ហើយត្រូវបានប្រើដើម្បីព្យាករណ៍ពីស្ថិរភាព និងកម្លាំងប្រឆាំងទាំងនៅក្នុងស្រុក និងអន្តរជាតិ។

គួរជម្រាបផងដែរថា ការបោះឆ្នោតនេះកើតឡើងនៅពេលដែលមានភាពតានតឹងសកលកើនឡើង ខណៈដែលកូរ៉េខាងជើងបន្តជំរុញសមត្ថភាពយោធារបស់ខ្លួន ចំពេលដែលប្រទេសផ្ដាច់ការមួយនេះព្យាយាមរក្សាការគ្រប់គ្រងផ្ទៃក្នុងយ៉ាងតឹងរ៉ឹងលើចំនួនប្រជាជនរបស់ខ្លួន៕

ប្រព័ន្ធសុខាភិបាលថៃបច្ចុប្បន្នកំពុងប្រឈមមុខនឹងវិបត្តិយ៉ាងធ្ងន់ធ្ងរដោយសារគ្មានថវិកាទ្រទ្រង់ បន្ទាប់ពីការបិទព្រំដែនកម្ពុជា-ថៃបណ្តាលឱ្យពលរដ្ឋខ្មែរធ្វើពហិការឈប់ទៅព្យាបាលនៅប្រទេសថៃដូចមុន ។ ទោះជាមេដឹកនាំថៃ និងស្ថាប័ននានាព្យាយាមលាក់បាំងព័ត៌មានមិនហ៊ាននិយាយការពិតពីប្រព័ន្ធសុខាភិបាលស្ថិតនៅមាត់ជ្រោះ ប៉ុន្តែការពហិការរបស់ពលរដ្ឋខ្មែរធ្វើឱ្យមន្ទីរពេទ្យថៃទាំងឯកជន និងរដ្ឋបាត់បង់ចំណូលយ៉ាងខ្លាំង ខណៈមុនពេលថៃឈ្លានពា.នកម្ពុជា មន្ទីរពេទ្យថៃនៅតាមបណ្តាខេត្តធ្លាប់អួតអាងពីការទទួលបានចំណូលច្រើន ។

តាមការចុះផ្សាយរបស់សារព័ត៌មាន The Nation Thailand កាលពីថ្ងៃទី១៤ ខែមីនា ឆ្នាំ២០២៦ ប្រព័ន្ធសុខាភិបាលប្រទេសថៃកំពុងប្រឈមមុខនឹងវិបត្តិយ៉ាងធ្ងន់ធ្ងរដោយសារការខាតបង់ចំណូលរបស់មន្ទីរពេទ្យ កង្វះគ្រូពេទ្យ និងខ្វះខាតថវិកា ដែលប៉ះពាល់ដល់ការព្យាបាលអ្នកជំងឺ ស្តង់ដារសេវាកម្ម និងគ្រែអ្នកជំងឺ ។ ការប្រឈមមុខនឹងវិបត្តិធ្ងន់ធ្ងររបស់ប្រព័ន្ធសុខាភិបាលថៃ គឺបណ្តាលមកពីកត្តាធំៗជាច្រើន ទើបធ្វើឱ្យបច្ចុប្បន្ន មន្ទីរពេទ្យថៃជាច្រើនសម្រេចកាត់បន្ថយចំនួនគ្រែអ្នកជំងឺ ។

មន្ទីរពេទ្យថៃនៅតាមបណ្តាខេត្តជួបបញ្ហាខ្វះខាតថវិកា ដែលបង្ខំឱ្យមន្ទីរពេទ្យទាំងនេះសម្រេចកាត់បន្ថយការចំណាយភាគច្រើន រួមមាន ៖ កាត់បន្ថយចំនួនគ្រូពេទ្យ និងកំណត់ចំនួនគ្រែអ្នកជំងឺឱ្យតិចជាងមុន ។ លើសពីនេះ គ្រូពេទ្យត្រូវទទួលបន្ទុកបំពេញការងារកាន់តែច្រើន ដែលនាំឱ្យមានការព្រួយបារម្ភពីស្តង់ដារព្យាបាល និងសុវត្ថិភាពអ្នកជំងឺ ខណៈអ្នកជំងឺពិបាកទទួលបានការព្យាបាល ។

លោកវេជ្ជបណ្ឌិត Somsak Tiamkao អ្នកជំនាញផ្នែកសរសៃប្រសាទនៃសាកលវិទ្យាល័យខនកែន ព្រមានចំៗថា ប្រព័ន្ធសុខាភិបាលថៃបានឈានដល់ចំណុចគ្រោះថ្នាក់ ហើយគ្រូពេទ្យទទួលបន្ទុកការងារកាន់តែធ្ងន់ឡើង ។ លោកសំណូមពរឱ្យមានការជួយស្រោចស្រង់ប្រព័ន្ធសុខាភិបាលថៃនៅតាមបណ្តាខេត្ត ដើម្បីកុំឱ្យមន្ទីរពេទ្យជាច្រើនធ្លាក់ក្នុងវិបត្តិកាន់តែជ្រៅដោយសារគ្មានថវិកា និងខាតបង់ ។

ស្របពេលចំនួនអ្នកជំងឺកើនឡើង ប៉ុន្តែមន្ទីរពេទ្យបែរជាព្យាយាមកាត់បន្ថយការចំណាយ លោកវេជ្ជបណ្ឌិត Somsak និយាយថា ការកាត់បន្ថយការចំណាយរបស់មន្ទីរពេទ្យនឹងប៉ះពាល់ដោយផ្ទាល់ដល់ការទទួលសេវាព្យាបាលរបស់អ្នកជំងឺ ។ លោកវេជ្ជបណ្ឌិតជំរុញឱ្យគ្រប់ស្ថាប័នពាក់ព័ន្ធស្វែងរកដំណោះស្រាយដើម្បីធានានូវនិរន្តរភាពរយៈពេលយូរអង្វែងសម្រាប់ប្រព័ន្ធសុខាភិបាលប្រទេសថៃ និងការពារមន្ទីរពេទ្យកុំឱ្យលិចលង់ក្នុងការខាតបង់ ដោយលោកសង្កត់ធ្ងន់ថា ការថែទាំសុខភាពមានសារៈសំខាន់សម្រាប់មនុស្សគ្រប់គ្នា ។

គួរបញ្ជាក់ថា មុនពេលស្ថានការណ៍តានតឹងនៅតាមបណ្តោយព្រំដែនកម្ពុជា-ថៃ មានពលរដ្ឋខ្មែររាប់ម៉ឺននាក់ក្នុង១ឆ្នាំៗបានសម្រុកទៅព្យាបាលជំងឺនៅមន្ទីរពេទ្យថៃ ហើយការទៅព្យាបាលនេះមិនត្រឹមតែផ្តល់ចំណូលយ៉ាងច្រើនដល់មន្ទីរពេទ្យប៉ុណ្ណោះទេ គឺថែមទាំងផ្តល់ចំណូលដល់ការដឹកជញ្ជូន សណ្ឋាគារ ការទិញទំនិញ និងចំណីអាហារហូបចុកផងដែរ ។ ការបាត់បង់អ្នកជំងឺខ្មែរដែលមានសម្បូរធនធាននោះ បានជំរុញឱ្យមន្ទីរពេទ្យឯកជន និងមន្ទីរពេទ្យរដ្ឋថៃកាន់តែដុនដាបខ្លាំងឡើង ស្របពេលពួកគេកំពុងជួបវិបត្តិស្រាប់ហើយ ៕

មិនញញើតនឹងការគំរា.ម មិនចុះញមតាមការសន្លុត! រដ្ឋមន្រ្តីការបរទេសអ៊ីរ៉ង់បានប្រកាសប្រាប់ពិភពលោកដោយបញ្ជាក់ច្បាស់ៗថា ប្រទេសអ៊ីរ៉ង់នឹងបន្តប្រយុទ្ធរហូតដល់ប្រធានាធិបតីអាមេរិក លោក Donald Trump ដឹងថាសង្គ្រាមដែលសហរដ្ឋអាមេរិកបានវា.យប្រហា.រមកលើខ្លួនគឺជារឿងដែល “ខុស”។

យោងតាមសំណេរដែលបានបង្ហោះនៅបណ្ដាញសង្គម X នៅដើមសប្ដាហ៍នេះ លោក Abbas Araghchi រដ្ឋមន្ត្រីការបរទេសនៃសាធារណរដ្ឋអ៊ីស្លាម បានព្រ.មានទៅកាន់សហរដ្ឋអាមេរិក និងសម្ព័ន្ធមិត្តរបស់ពួកគេថា “កងកម្លាំងប្រដាប់អាវុធដ៏មានឥទ្ធិពលរបស់យើងនឹងបន្តតតាំងហូតដល់ប្រធានាធិបតីអាមេរិកដឹងថា សង្គ្រាមខុសច្បាប់ដែលគាត់កំពុងទម្លាក់លើទាំងជនជាតិអាមេរិក និងអ៊ីរ៉ង់គឺជារឿងដ៏ខុស ហើយមិនត្រូវធ្វើម្តងទៀតឡើយ” ហើយលោក Araghchi បានសង្កត់ធ្ងន់ថា ៖ ជនរងគ្រោះក៏ត្រូវតែទទួលបានសំណងឲ្យស័ក្តិសមផងដែរ។

តាមមន្រ្តីអ៊ីរ៉ង់ ឥឡូវនេះពួកគេបានត្រៀមខ្លួនរួចជាស្រេចដើម្បីបន្តបាញ់មីស៊ីល និងយន្តហោះគ្មានមនុស្សបើក “ដរាបណាវានៅតែចាំបាច់” ដោយបដិសេធការអះអាងរបស់សហរដ្ឋអាមេរិកថា សង្គ្រាមអាចនឹងបញ្ចប់ក្នុងពេលឆាប់ៗនេះ។

មិនតែប៉ុណ្ណោះ ថ្នាក់ដឹកនាំអ៊ីរ៉ង់ក៏បានបដិសេធលទ្ធភាពនៃការចរចាជាមួយទីក្រុងវ៉ាស៊ីនតោនផងដែរ ដោយអះអាងថា ការចរចាកន្លងមកបានបរាជ័យ និងមិនអាចយកជាការបាន ហើយបានសង្កត់ធ្ងន់ថា ទីក្រុងតេអេរ៉ង់ មិនមែនទីក្រុងវ៉ាស៊ីនតោន ដែលចេះតែហាមាត់ប្រកាសថាពេលណាសង្គ្រាមនឹងបញ្ចប់នោះទេ។

គួរជម្រាបថា សេចក្តីថ្លែងការណ៍នេះកើតឡើងចំពេលមានសារផ្ទុយគ្នាពីលោក Trump ដែលបានលើកឡើងថា សង្គ្រាមនៅមជ្ឈិមបូព៌ាជិតចប់ហើយ ខណៈពេលដែលសន្យាថានឹងបន្តប្រតិបត្តិការយោធារហូតដល់គោលបំណងរបស់សហរដ្ឋអាមេរិកត្រូវបានសម្រេច។ ជុំវិញបញ្ហានេះអ្នកវិភាគបាននិយាយថា ជំហរផ្ទុយគ្នាទាំងនេះបង្ហាញពីគម្លាតយ៉ាងជ្រៅរវាងភាគីទាំងពីរ ដែលធ្វើឱ្យជម្លោះកាន់តែមិនងាយក្នុងការដោះស្រាយ៕

រដ្ឋាភិបាលកូរ៉េខាងត្បូងមានគម្រោងផ្តល់ទិដ្ឋាការទេសចរណ៍ (Tourist Visa) រយៈពេលវែងរហូតដល់១០ឆ្នាំសម្រាប់ពលរដ្ឋវៀតណាម ដើម្បីសម្រេចគោលដៅទាក់ទាញភ្ញៀវទេសចរវៀតណាមមកលេងប្រទេសកូរ៉េខាងត្បូងឱ្យបានចំនួន៦សែននាក់ នៅឆ្នាំ២០២៦ ។ ការផ្តល់ទិដ្ឋាការនេះផ្តោតលើពលរដ្ឋវៀតណាមដែលរស់នៅទីក្រុងហាណូយ ហូជីមិញ និងដាណាង មានសិទ្ធិធ្វើដំណើរចេញ-ចូលកូរ៉េខាងត្បូងជាច្រើនលើក ។

តាមការចុះផ្សាយរបស់សារព័ត៌មានវៀតណាម Saigon Times កាលពីថ្ងៃទី១៧ ខែមីនា ឆ្នាំ២០២៦ រដ្ឋាភិបាលកូរ៉េខាងត្បូងបានប្រកាសពីយុទ្ធសាស្ត្រ «ការផ្លាស់ប្តូរដ៏សំខាន់ក្នុងវិស័យទេសចរណ៍អន្តរជាតិ» ដោយកំណត់គោលដៅទាក់ទាញភ្ញៀវទេសចរបរទេសរហូតដល់៣០លាននាក់ ក្នុងនោះផ្តោតសំខាន់លើការបន្ធូរបន្ថយលក្ខខណ្ឌទិដ្ឋាការសម្រាប់ពលរដ្ឋវៀតណាម រួមទាំងកំណត់វិធានការគាំទ្រវិស័យទេសចរណ៍ក្នុងស្រុក ។

ក្រសួងវប្បធម៌ កីឡា និងទេសចរណ៍កូរ៉េខាងត្បូងកំពុងតែពិចារណាពីការផ្តល់ទិដ្ឋាការទេសចរណ៍ដល់ពលរដ្ឋវៀតណាមអាចធ្វើដំណើរចេញ-ចូលកូរ៉េខាងត្បូងបានច្រើនលើក និងរយៈពេល១០ឆ្នាំ ទើបទិដ្ឋាការផុតសុពលភាព ជាពិសេស ការផ្តល់ទិដ្ឋាការផ្តោតលើពលរដ្ឋវៀតណាមរស់នៅទីក្រុងធំៗ ដូចជា ៖ ទីក្រុងហាណូយ ហូជីមិញ និងដាណាង ។

នេះជាការបន្ថែមរយៈពេលលើទិដ្ឋាការចាស់ដែលមានរយៈពេលត្រឹមតែ៥ឆ្នាំ ដើម្បីផ្តល់ភាពងាយស្រួលដល់ក្រុមភ្ញៀវទេសចរវៀតណាមដែលមានជីវភាពធូរធា, ក្រុមអ្នកជំនាញ និងអ្នកធ្វើដំណើរទៅសួរសុខទុក្ខសាច់ញាតិរយៈពេលយូរ ។ វាជាយុទ្ធសាស្ត្រសំខាន់សម្រាប់ការបង្កើនទំនាក់រវាងកូរ៉េខាងត្បូងនិងវៀតណាម ក៏ដូចជាជំរុញឱ្យភ្ញៀវទេសចរវៀតណាមមកកូរ៉េខាងត្បូងម្តងហើយម្តងទៀត ។

កាលពីឆ្នាំ២០២៥ កូរ៉េខាងត្បូងទទួលបានភ្ញៀវទេសចរវៀតណាមស្មើជិត៥សែន ៥ម៉ឺននាក់ កើនឡើង៩% បើធៀបនឹងឆ្នាំ២០២៤ ។ នៅឆ្នាំ២០២៦ រដ្ឋាភិបាលកូរ៉េខាងត្បូងកំណត់គោលដៅទទួលភ្ញៀវទេសចរវៀតណាមរហូតដល់៦សែននាក់ ដែលចំនួននេះខ្ពស់ជាងចំនួនភ្ញៀវទេសចរវៀតណាមមកលេងកូរ៉េខាងត្បូងកាលពីឆ្នាំ២០១៩ ឬខ្ពស់ជាងចំនួនភ្ញៀវទេសចរវៀតណាមមុនពេលជំងឺកូវីដ-១៩ ឆ្លងរាងត្បាត ។ រីឯភ្ញៀវទេសចរបរទេសសរុបដែលកូរ៉េខាងត្បូងទទួលបានកាលពីឆ្នាំ២០២៥ ស្មើជាង១៨លាននាក់ កើនឡើង១៥% បើធៀបនឹងឆ្នាំ២០២៤ ។

ក្រៅពីនេះ កូរ៉េខាងត្បូងក៏បានពន្យារពេលការលើកលែងថ្លៃទិដ្ឋាការសម្រាប់ភ្ញៀវទេសចរវៀតណាម រួមទាំងភ្ញៀវទសចរមកពី៥ប្រទេសទៀតក្នុងតំបន់អាស៊ាន រហូតដល់ខែមិថុនា ឆ្នាំ២០២៦ ដើម្បីជំរុញការងើបឡើងវិញនៃវិស័យទេសចរណ៍ពីតំបន់អាស៊ាន ៕