ថៃ៖ បុរសម្នាក់ដែលគេជឿថាជាទាហានខ្មែរមកពីអង្គភាពពិសេស BHQ របស់កម្ពុជា និងត្រូវជាអង្គរក្សរបស់សម្ដេចតេជោ ហ៊ុន សែន ត្រូវបានចាប់ខ្លួននៅគេហដ្ឋានក្នុងប្រទេសថៃ។ អាជ្ញាធរថៃសង្ស័យថាបុរសម្នាក់នេះបានបង្កប់ខ្លួនដើម្បីបញ្ជូនចារកម្មអំពីចលនាយោធាថៃមកខាងកម្ពុជា។ នេះបើយោងតាមសារព័ត៌មាន Khaosod របស់ថៃ។

នៅថ្ងៃពុធ ទី6 ខែសីហា ឆ្នាំ2025 ប៉ុស្តិ៍នគរបាល ឡាំដួន ស្រុកក្រសាំង ខេត្ត ប៊ូរីរ៉ាំ បានបង្ហោះសារនៅលើហ្វេសប៊ុកថា “គាត់ (សំដៅលើបុរសដែលគេបានចាប់ខ្លួន) មិនបានទៅណាទេ ឆ្មាំ BHQ របស់លោក ហ៊ុន សែន ត្រូវបានក្រុមប៉ូលីស F4 នៃអង្គភាព Col. Atsadanai Pongkan របស់ស្នងការនគរបាល ឡាំដួន ។ ប៉ូលីសថៃបានអះអាងថា៖ បុរសម្នាក់នេះ មានបំណងបង្កប់ខ្លួន និងបញ្ជូនព័ត៌មាននៃការចល័តយោធាថៃទៅឲ្យខាងកម្ពុជា”។

ការបង្ហោះព័ត៌មានពីការចាប់ខ្លួនបាននោះ គឺរួមមានទាំងរូបថតបុរសម្នាក់ និងឯកសណ្ឋានយោធា អាវក្រោះ និងមួកមានផ្លាកសញ្ញា BHQ ដែលជាកម្មសិទ្ធិរបស់ទាហានខ្មែរម្នាក់មកពីអង្គភាពអង្គរក្សពិសេសរបស់សម្ដេច ហ៊ុន សែន។ មន្ត្រីប៉ូលិសថៃ បានបញ្ជាក់ប្រាបអ្នកសារព័ត៌មានថា៖ បុរសដែលគេបានចាប់ខ្លួននេះ គឺជាជនជាតិខ្មែរ ប៉ុន្តែមានប្រពន្ធជាជនជាតិថៃ ហើយគាត់ត្រូវបានចាប់ខ្លួននៅផ្ទះរបស់គាត់នៅប្រទេសថៃ។

ទោះជាយ៉ាងណា ប៉ូលីសថៃជឿជាក់ថា បុរសម្នាក់នេះគឺជាភ្នាក់ងារចារកម្មដែលកម្ពុជាបញ្ជូនមកយ៉ាងពិតប្រាកដ ដោយពួកគេបានបញ្ជាក់ថា៖ បើតាមការស៊ើបអង្កេត និងភស្តុតាងជាឯកសណ្ឋានដែលប្រមូលបាន គឺបុរសម្នាក់នេះជាកងអង្គរក្សពិសេសរបស់លោក ហ៊ុន សែន។ ពួកគេបានបង្ហាញពីក្ដីបារម្ភថា ការប្រើប្រាស់ជនបង្កប់បែបនេះ នឹងប៉ះពាល់ដល់សន្តិសុខជាតិរបស់ថៃជាខ្លាំង។

គួរជម្រាបថា ទាំងនេះគឺជាការអះអាងរបស់ក្រុមប៉ូលីសថៃ និងសារព័ត៌មានថៃតែម្ខាងប៉ុណ្ណោះ ពុំមានការបកស្រាយណាមួយចេញពីខាងកម្ពុជាឡើយ។

លើសពីនេះ បើផ្អែកតាមលក្ខខណ្ឌកំណត់ក្នុងការចូលបំពេញការងារជាមន្រ្តីរាជការ ឬជាកងកម្លាំងមិនថាក្នុងអង្គភាពណានោះទេ គឺមិនអនុញ្ញាតឲ្យបេក្ខជនដែលមានសាក់ចូលក្នុងក្របខណ្ឌឡើយ ដោយការសាក់ដែលគឺត្រូវបានកំណត់យ៉ាងតឹងរឹង និងលើកលែងតែករណីមួយចំនួនដូចជាសាក់យ័ន្តប៉ុណ្ណោះ។

ដោយឡែក បើងាកទៅមើលសភាពបុរសដែលថៃចាប់ខ្លួនបានខាងលើ គឺមិនមានលក្ខណៈសមស្របក្នុងការបម្រើតួនាទីជាកងកម្លាំងពិសេស BHQ ទាល់តែសោះ។ ម្យ៉ាងវិញទៀត ចំពោះចំណុចដែលគួរឲ្យពិចារណាគឺថា តើអ្នកណាទៅធ្វើជាជនបង្កប់ខ្លួន ដោយយកឯកសណ្ឋានទៅប្រើប្រាស់បែបនេះ? ដូច្នេះការប្រកាសខាងលើរបស់មន្រ្តីប៉ូលីសថៃ ទំនងជាមានចេតនាចង់លាបពណ៌កម្ពុជាសារជាថ្មី ព្រោះទាំងនេះជាអ្វីដែលថៃតែងតែធ្វើកន្លងមកស្រាប់ហើយ៕

ប្រទេសថៃ ៖ នៅថ្ងៃទី៦ ខែសីហា ឆ្នាំ២០២៥ សារព័ត៌មានថៃ Khaosod ផ្សព្វផ្សាយថា ពលករខ្មែរចំនួន៣ម៉ឺននាក់ ពុំអាចរស់នៅប្រទេសថៃបន្តទៀត ហើយជិះរថយន្តឈ្នួលមកកាន់ច្រកព្រំដែនអចិន្ត្រៃយ៍បានឡែម ដើម្បីត្រឡប់មកកម្ពុជាវិញរហូតស្ទះចរាចរណ៍ ។ សារព័ត៌មាន Khaosod ផ្សាយបំភ្លៃថា ពលករខ្មែរចាកចេញពីថៃ ដោយសារសាច់ញាតិទូរស័ព្ទមកប្រាប់បើពលករពុំត្រឡប់មកកម្ពុជាទេ អាចត្រូវរឹបអូសដីធ្លី និងដកសញ្ជាតិ ហើយសារព័ត៌មានថៃថា នេះជាការដាក់សម្ពាធលើពលករខ្មែរ ។

សារព័ត៌មាន Khaosod រាយការណ៍ថា ពលករខ្មែរចំនួន៣ម៉ឺននាក់ បានធ្វើដំណើរត្រឡប់មកប្រទេសកម្ពុជាវិញតាមច្រកព្រំដែនអចិន្ត្រៃយ៍បានឡែម នៅឃុំថេពនិមិត ស្រុកប៉ូងណាមរ៉ន ខេត្តចាន់បុរី (ទល់មុខច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបង) ដោយពលករខ្មែរទាំងនេះបានមករង់ចាំការបើកព្រំដែនតាំងពីម៉ោង៦ព្រឹក រហូតធ្វើឱ្យស្ទះចរាចរណ៍នៅតាមផ្លូវនានាក្នុងប្រទេសថៃ ។

ការស្ទះចរាចរណ៍ដោយសាររថយន្តឈ្នួលដឹកពលករខ្មែរធ្វើដំណើរត្រឡប់មកកម្ពុជា ហើយធ្វើឱ្យអាជ្ញាធរថៃធ្វើចរាចរណ៍ដើម្បីកុំឱ្យរថយន្តកកស្ទះ ខណៈរថយន្តពេទ្យដឹកអ្នកជំងឺសង្គ្រោះបន្ទាន់បានបើកតាមផ្លូវវាង ។ រយៈពេល២-៣ថ្ងៃមកនេះ ពលរដ្ឋខ្មែរជាច្រើនម៉ឺននាក់បានដឹកជញ្ជូនសម្ភារៈមករង់ចាំពេញបរិវេណច្រកព្រំដែនអចិន្ត្រៃយ៍បានឡែម ហើយមន្ត្រីច្រកព្រំដែនថៃបានបើកទ្វារតូច និងទ្វារធំដើម្បីឱ្យពលករខ្មែរឆ្លងដែន ខណៈខាងកម្ពុជាបើកទ្វារធំទាំង២ ឱ្យពលរដ្ឋខ្លួនឆ្លងដែន ។

ថៃសង្កេតឃើញថា នៅថ្ងៃទី៦ ខែសីហា មានរថយន្តជាច្រើនដឹកពលករខ្មែរមកកាន់ច្រកព្រំដែនខុសធម្មតា ដែលខុសគ្នាពីប៉ុន្មានថ្ងៃមុន ។ សារព័ត៌មាន Khaosod ផ្សាយបំភ្លៃថា ពលករខ្មែរសម្រុកឆ្លងដែនមកកម្ពុជាវិញ ដោយសាររដ្ឋាភិបាលកម្ពុជាចាត់វិធានការធ្ងន់ធ្ងរមកលើពលករណាដែលពុំព្រមចាកចេញពីថៃ ដូចជា ៖ រឹបអូសដីធ្លី និងដកសញ្ជាតិ ។

សារព័ត៌មាន Khaosod ចោទប្រកាន់ថា មានការដាក់សម្ពាធឱ្យគ្រួសារពលករដែលរស់នៅកម្ពុជាព្យាយាមទំនាក់ទំនងមកសាច់ញាតិនៅថៃ ឱ្យប្រញាប់ត្រឡប់មកកម្ពុជា ទើបធ្វើឱ្យពលករខ្មែរជ្រួលច្របល់ ។ នាវេលាម៉ោង១១និង៤០នាទី ថ្ងៃទី៦ ខែសីហា មានពលករខ្មែរឆ្លងដែនមកកម្ពុជា ប្រមាណ៣ម៉ឺននាក់ តាមច្រកព្រំដែនអចិន្ត្រៃយ៍បានឡែម ហើយដោយសារមានរថយន្តដឹកពលករខ្មែរបើកមកច្រកព្រំដែនជាបន្តបន្ទាប់ទៀត គឺធ្វើឱ្យចំនួនពលករខ្មែរដែលត្រឡប់មកកម្ពុជាកើនឡើងដល់៥ម៉ឺននាក់ នៅថ្ងៃដដែល ។

គួរបញ្ជាក់ថា ការត្រឡប់មកវិញរបស់ពលករខ្មែរ ពុំមែនបណ្តាលមកពីរដ្ឋាភិបាលរឹបអូសដីធ្លី និងដកសញ្ជាតិទេ រដ្ឋាភិបាលកម្ពុជាគ្មានវិធានការបែបនេះជាមួយពលរដ្ឋខ្លួនឡើយ ។ ការត្រឡប់មកកម្ពុជា គឺជាការស្ម័គ្រចិត្តរបស់ពលករដោយសារពិបាករស់នៅថៃបន្តទៀត ហើយពលករខ្មែរយល់ថា គ្មានកន្លែងណាកក់ក្តៅជាងផ្ទះរបស់ខ្លួនឡើយ ៕

តារាចម្រៀង លីម តិចម៉េង មិនត្រឹមតែមានសកម្មភាពជួយទៅដល់ជនភៀសសឹកដែលរងការឈ្លានពានពីប្រទេសថៃប៉ុណ្ណោះទេ ប៉ុន្តែជារឿយៗលោកតែងតែបង្ហាញក្តីកង្វល់របស់ខ្លួនចង់ឃើញប្រទេសជាតិក្សេមក្សាន្តឡើងវិញ។ យ៉ាងណាមិញតារាចម្រៀងរូបនេះថាលោកពុំមែនជាមនុស្សដែលចេះស្រ្តេសអ្វីទេគឺស្ទើរតែរាល់បញ្ហាអាចដោះស្រាយបានប៉ុន្តែការឈ្លានពានរបស់ថៃហើយប្រទេសកម្ពុជាជួបរឿងបែបនេះគឺពិតជាធ្វើឱ្យលោកចេះស្រ្តេស។

នៅយប់ថ្ងៃទី៤ សីហា ម្ចាស់ពាន Cambodian Idol រដូវកាលទី៤ បានបង្ហោះសំណេរមួយថា «ហេតុអ្វីពេលនេះខ្ញុំចេះស្ត្រេស ? ធ្លាប់តែអាចដោះស្រាយបានស្ទើរតែរាល់បញ្ហាខ្លួនឯង តែពេលនេះម៉េចក៏ពិបាកក្នុងខ្លួនម្លេះ ទ្រាំៗៗ មានតែពាក្យថាទ្រាំ អត់ធ្មត់ តស៊ូ រាល់ការប្រមាថ ឈ្លានពានទាំងនេះ សង្ឃឹមថាពួកយើងអាចឆ្លងផុតនឹងសុខសាន្តឆាប់ៗនេះវិញ»។

តារាចម្រៀងរូបនេះបន្តការបង្ហោះសំណេរទៀតថា «ភ្លឺឡើងគិតច្រើន យប់ឡើងបារម្ភច្រើន ពេលភ្លឺមិនចង់ឱ្យយប់ ពេលយប់មិនចង់ឱ្យភ្លឺ ចង់និយាយមិនអាចនិយាយ ដឹងមិនអាចដឹង យល់មិនអាចយល់ គ្រប់យ៉ាងត្រូវការពេលវេលា ត្រូវចេះរៀនរស់ដោយល្អ ចេះទ្រាំជាមួយការប្រមាថ មនុស្សគ្រាន់តែត្រូវគេប្រមាថគឺមិនដួលទេ កងទ័ពជួរមុខ ថ្នាក់ដឹកនាំ កំពុងតស៊ូរកសន្តិភាពមកវិញហើយ ក្នុងនាមជាប្រជាជន ជាកូនប្រុស មានអ្វីត្រូវទ្រាំមិនបាន មានអ្វីត្រូវឈឺចាប់ មានអ្វីត្រូវខ្លាចទៅ»។

នៅថ្ងៃទី៥ សីហា លីម តិចម៉េង បានលើកឡើងទៀតថា «ពួកយើង កងទ័ពជួរមុខយើង មិនបានសម្រាកទេព្រោះតែមិនអាចប្រហែសបានចំពោះការឈ្លានពានម្តងទៀត ភ្នែកមិនហ៊ានបិទ ដៃមិនហ៊ានចោលអាវុធ បងប្អូននៅខាងក្រោយបារម្ភពីសុខសុវត្ថិភាពទាំងយប់ទាំងថ្ងៃ នេះហើយស្ថានការណ៍ពួកយើង។ តែចោរឈ្លានពានយើងវិញ មានពេលសម្រាក មានពេលរៀបចំល្បិច មានពេលប្រមាថតាមចិត្តមកកាន់ប្រទេសយើង ព្រោះពួកគេដឹងថាពួកយើង ប្រទេសយើងមិនឈ្លានពានពួកគេនោះទេ បងប្អូនយើងទ្រាំណាពេលនេះ បងប្អូនប្រជាជន ថ្នាក់ដឹកនាំ ប្រទេសយើងនេះទាំងមូលត្រូវគេប្រមាថយ៉ាងធ្ងន់ធ្ងរហើយ»៕

សារព័ត៌មានថៃ Khaosod រាយការណ៍នៅថ្ងៃទី៦ ខែសីហា ឆ្នាំ២០២៥ ថា ស្ថានទូតចិននៅប្រទេសថៃបានបដិសេធព័ត៌មានដែលផ្សព្វផ្សាយថា ចិនផ្តល់ដ្រូនឱ្យកម្ពុជាប្រើប្រាស់នៅព្រំដែន ដោយស្ថានទូតចិនបានបញ្ជាក់ពីគោលជំហររបស់ចិនគាំទ្រអាស៊ានឱ្យកាត់បន្ថយស្ថានការណ៍តានតឹងរវាងកម្ពុជា-ថៃ ។ រូបភាពដ្រូនដែលសារព័ត៌មាននានារបស់ថៃផ្សព្វផ្សាយ គឺជារូបភាពចាស់តាំងពីខែមករា ឆ្នាំ២០២៤ ក្នុងពេលបង្ហាញការហោះហើររៀបចំដោយក្រុមហ៊ុន China National Aero-Technology Import & Export Corporation (CATIC) នៅកម្ពុជា និងពុំពាក់ព័ន្ធជាមួយស្ថានការណ៍បច្ចុប្បន្ន ។

នៅថ្ងៃទី៦ ខែសីហា ហ្វេសប៊ុកផេករបស់ស្ថានទូតចិនប្រចាំប្រទេសថៃ ឈ្មោះ «Chinese Embassy Bangkok สถานเอกอัครราชทูตสาธารณรัฐประชาชนจีนประจำประเทศไทย» បានសរសេរថា មានសារព័ត៌មានថៃមួយចំនួនផ្សព្វផ្សាយថា ៖ «នាពេលថ្មីៗនេះ ចិនបានផ្តល់ដ្រូនឱ្យកម្ពុជាដើម្បីឱ្យកម្ពុជាយកមកប្រើប្រាស់នៅព្រំដែនកម្ពុជា-ថៃ» ។

ក្រោយពីការត្រួតពិនិត្យឃើញថា នេះជាព័ត៌មានក្លែងក្លាយ ពីព្រោះរូបភាពដ្រូនដែលសារព័ត៌មាននានារបស់ថៃយកមកផ្សព្វផ្សាយ គឺជារូបភាពចាស់តាំងពីខែមករា ឆ្នាំ២០២៤ ក្នុងពេលបង្ហាញការហោះហើររៀបចំដោយក្រុមហ៊ុន China National Aero-Technology Import & Export Corporation (CATIC) នៅកម្ពុជា និងពុំពាក់ព័ន្ធជាមួយស្ថានការណ៍បច្ចុប្បន្ន ។

ស្ថានទូតចិនសូមបញ្ជាក់ថា តាំងពីមានជម្លោះនៅតាមបណ្តោយព្រំដែនកម្ពុជា-ថៃ ក្នុងឋានៈជាប្រទេសមិត្តជិតខាង គឺចិនបានជំរុញឱ្យប្រទេសទាំងពីរកាត់បន្ថយភាពតានតឹងតាមវិធីរបស់ខ្លួន ។ ចិនពុំបានស្វែងរកផលប្រយោជន៍ផ្សេងៗពីជម្លោះនេះទេ ចិនបានគាំទ្រអាស៊ានឱ្យកាត់បន្ថយជម្លោះនយោបាយរបស់កម្ពុជា-ថៃ តាមរយៈគោលការណ៍អាស៊ាន ។

ចិនបានត្រៀមខ្លួនជាស្រេចក្នុងការរក្សាទំនាក់ទំនងជិតស្និទ្ធបន្តទៀតជាមួយប្រទេសក្នុងតំបន់ ដូចជា ៖ កម្ពុជា ថៃ និងម៉ាឡេស៊ី ដើម្បីឱ្យចិនចូលរួមចំណែកឱ្យកម្ពុជា-ថៃអនុវត្តបទឈប់បាញ់ ព្រមទាំងស្វែងរកសន្តិភាព និងស្ថិរភាពរវាងប្រទេសទាំងពីរយ៉ាងឆាប់រហ័ស ។

គួរបញ្ជាក់ថា ថ្មីៗនេះ សារព័ត៌មាននានារបស់ថៃផ្សព្វផ្សាយថា ចិនបានផ្តល់ដ្រូនជាច្រើនគ្រឿងឱ្យកម្ពុជាដើម្បីយកមកប្រើប្រាស់នៅព្រំដែនកម្ពុជា-ថៃ ហើយការផ្សព្វផ្សាយព័ត៌មាននេះធ្វើឱ្យពលរដ្ឋថៃពុំពេញចិត្តជាមួយចិនដែលគាំទ្រកម្ពុជា រហូតដល់ស្ថានទូតចិនប្រចាំប្រទេសថៃច្រានចោលព័ត៌មានក្លែងក្លាយ ៕

ប្រទេសថៃ ៖ តាំងពីកម្ពុជា និងថៃអនុវត្តកិច្ចព្រមព្រៀងបទឈប់បា.ញ់នៅយប់ថ្ងៃទី២៨ ខែកក្កដា ឆ្នាំ២០២៥ រដ្ឋាភិបាល និងកងទ័ពថៃបានចោទប្រកាន់កម្ពុជាពុំប្រមូលសាកសពកងទ័ពនៅសមរភូមិ និងចោទទៀតថា កម្ពុជាគ្មានមនុស្សធម៌ ពុំទទួលខុសត្រូវសាកសពកងទ័ពដែលបានព.លីជីវិតដើម្បីការពារជាតិ ។ រយៈពេលជាច្រើនថ្ងៃមកនេះ មានសត្វត្មាតជាច្រើនក្បាលប្រមូលផ្តុំនៅព្រំដែនកម្ពុជា-ថៃ ហើយពលរដ្ឋថៃ និងខ្មែរសុរិន្ទសំណូមពរឱ្យរដ្ឋាភិបាលថៃមកប្រមូលសាកសពទៅធ្វើបុណ្យ បើបណ្តោយបែបនេះនឹងមានជំងឺឆ្លងរាតត្បាត ។

ប៉ុន្តែរដ្ឋាភិបាល និងកងទ័ពថៃប្រាប់ទៅពលរដ្ឋរបស់ខ្លួនថា នេះពុំមែនជាសាកសពកងទ័ពថៃទេ គឺជាសាកសពកងទ័ពកម្ពុជាដែលគ្មានការប្រមូល ។ កងទ័ពថៃថែមទាំងនិយាយថា ប្រសិនបើនេះជាសាកសពកងទ័ពថៃមែន ថៃនឹងប្រមូលយកទៅធ្វើបុណ្យតាមប្រពៃណី និងផ្តល់ប្រាក់ឧបត្ថម្ភដល់ក្រុមគ្រួសារកងទ័ពមិនខាន ។ បើទោះជាកងទ័ពថៃព្យាយាមកុហកបែបនេះក្តី ប៉ុន្តែខ្មែរសុរិន្ទមួយចំនួនពុំជឿទេ និងស្តីបន្ទោសរដ្ឋាភិបាលថៃខ្លាំងៗ ។

បុរសខ្មែរសុរិន្ទម្នាក់បានបង្ហោះវីដេអូស្តីបន្ទោសរដ្ឋាភិបាលថៃក្នុង TikTok ដោយសារទ្រាំលែងបានដែលរដ្ឋាភិបាលថៃបញ្ជូនកងទ័ពមកឈ្លានពានកម្ពុជា ហើយរដ្ឋាភិបាលថៃពុំទទួលខុសត្រូវប្រមូលសាកសពកងទ័ពរបស់ខ្លួនក្នុងសមរភូមិ ទុកឱ្យសត្វក្អែក និងត្មាតហែកស៊ីសាកសពជាអាហារ ហើយរដ្ឋាភិបាលថៃប្រាប់ពលរដ្ឋថា នេះជាសាកសពកងទ័ពកម្ពុជា ។ វីដេអូរបស់បុរសខ្មែរសុរិន្ទត្រូវបានពលរដ្ឋថៃចាប់អារម្មណ៍ និងចែកចាយយ៉ាងច្រើនកាលពីថ្ងៃទី៥ ខែសីហា ឆ្នាំ២០២៥ ។

បុរសខ្មែរសុរិន្ទនិយាយថា រដ្ឋាភិបាលថៃបានធ្វើសង្គ្រាមវាយប្រហារមុនមកលើកម្ពុជា ប៉ុន្តែពុំហ៊ានប្រមូលសាកសពកងទ័ពថៃយកទៅធ្វើបុណ្យ ហើយបណ្តោយឱ្យសត្វក្អែក និងត្មាតហែកស៊ីសាកសពជាអាហារ ។ រដ្ឋាភិបាលថៃមានប្រាក់ទិញអាវុធធ្វើសង្គ្រាមឈ្លានពានកម្ពុជា ប៉ុន្តែរដ្ឋាភិបាលថៃពុំទទួលខុសត្រូវក្នុងការទិញថ្នាំពេទ្យមកព្យាបាលកងទ័ពរបស់ខ្លួនដែលរងរបួស ។

រដ្ឋាភិបាលថៃពុំទទួលខុសត្រូវសាកសពកងទ័ព ហើយប្រាប់ឱ្យកម្ពុជាទទួលខុសត្រូវជំនួសវិញ ។ បើកម្ពុជាពុំព្រមទទួលខុសត្រូវសាកសពកងទ័ពថៃដែលស្លាប់នៅព្រំដែនទេ រដ្ឋាភិបាលថៃចោទប្រកាន់ថា កម្ពុជាគ្មានមនុស្សធម៌ ។ ហេតុនេះ ខ្ញុំសូមប្រាប់ទៅបងប្អូនខ្មែរសុរិន្ទបើកចិត្តឱ្យទូលាយថា តើប្រទេសណាដែលគ្មានមនុស្សធម៌? និងឆ្លើយប្រាប់ខ្ញុំត្រង់ៗ សូមបើកភ្នែកមើលផង តើប្រទេសណាគ្មានមនុស្សធម៌ក្នុងការប្រមូលសាកសពនៅសមរភូមិ? នេះបើតាមការលើកឡើងរបស់បុរសខ្មែរសុរិន្ទ ។

គួរបញ្ជាក់ថា រដ្ឋាភិបាល និងកងទ័ពថៃពុំទទួលស្គាល់សាកសពកងទ័ពរបស់ខ្លួននៅសមរភូមិទេ ហើយចោទប្រកាន់ថា គឺជាសាកសពកងទ័ពកម្ពុជា ។ រដ្ឋាភិបាលថៃ និងកងទ័ពថៃនិយាយដដែលៗថា កម្ពុជាពុំទទួលខុសត្រូវប្រមូលសាកសពកងទ័ពដែលពលីជីវិតក្នុងសមរភូមិ និងចោទប្រកាន់ថា ជាទង្វើគ្មានមនុស្សធម៌ ដែលបង្កផលវិបាកដល់កងទ័ពថៃល្បាតនៅព្រំដែន ៕