ហាណូយ៖ ព្យុះ Kajiki ដែលជាព្យុះទី ៥ ដែលវាយប្រហារប្រទេសវៀតណាមក្នុងឆ្នាំនេះ ត្រូវបានព្យាករណ៍ថានឹងបន្តបោកបក់តំបន់ឆ្នេរនៃខេត្ត Thanh Hoa និង Quang Tri នៅរសៀលថ្ងៃចន្ទនេះ។ វាមានកម្លាំងខ្យល់ខ្លាំងរហូតដល់ទៅ ១៦៦km/h និងភ្លៀងធ្លាក់ជាច្រើនពេញតំបន់។ នេះបើតាមសារព័ត៌មានក្នុងស្រុក VnExpess ។

យោងតាមមជ្ឈមណ្ឌលអាកាសធាតុជាតិវៀតណាម ព្យុះនេះស្ថិតនៅចម្ងាយប្រហែល ១៤៥km ភាគខាងកើតខេត្ត Ha Tinh ហើយនឹងផ្លាស់ទីទៅទិសពាយ័ព្យល្បឿនជាមធ្យម ២០km/h។ ប្រជាជនជាច្រើនគ្រួសារត្រូវបានជម្លៀសពីតំបន់ទាប។ រីឯនៅទីក្រុង Vinh និងទីក្រុង Cua Lo ក៏មានភ្លៀងធ្លាក់មធ្យម និងខ្យល់បក់ផងដែរ ដែលធ្វើឲ្យផ្លូវធំៗមួយចំនួនត្រូវបិទ មិនអាចធ្វើចរាចរណ៍បាន។

ព្យុះ Kajiki ត្រូវបានគេព្យាករណ៍ថានឹងរក្សាកម្លាំងរហូតដល់ពេលចូលដីគោគ រួចចុះខ្សោយទៅជាខ្យល់ត្រូពិច និងសម្ពាធទាបនៅប្រទេសឡាវ។ អាជ្ញាធរបានព្យាករណ៍ថានឹងមានភ្លៀងធ្លាក់ច្រើននៅទូទាំងតំបន់ទន្លេក្រហម រួមទាំងហាណូយ ដោយមានបរិមាណទឹកភ្លៀង ១០០–១៥០mm ក្នុងរយៈពេល ២ ថ្ងៃ ខណៈតំបន់ខ្លះចាប់ពីខេត្ត Thanh Hoa ដល់ Quang Tri អាចលើសពី ៧០០mm ដែលនេះនឹងបង្កហានិភ័យទឹកជំនន់ភ្លាមៗ។

ត្រឹមម៉ោង ៤ រសៀល កាលពីថ្ងៃអាទិត្យ អាជ្ញាធរបានទាក់ទងនាវាជាង ៦០,០០០ ជាមួយកម្មករជិត ២៥០,០០០ នាក់ ដើម្បីត្រៀមជៀសវាងព្យុះ និងហាមឃាត់សកម្មភាពនៅផ្ទៃសមុទ្រទាំងអស់នៅខេត្ត ៨ រួមមាន Ninh Binh, Thanh Hoa, Nghe An, Ha Tinh, Quang Tri, Hue, Da Nang និង Quang Ngai។ ក្រៅពីនេះ ផែនការជម្លៀសពលរដ្ឋជាង ៣២៥,០០០ នាក់ ក៏កំពុងអនុវត្តផងដែរ ជាពិសេសនៅខេត្ត Thanh Hoa, Quang Tri និងខេត្ត Hue៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod នៅថ្ងៃទី២៥ ខែសីហា ឆ្នាំ២០២៥ ឱ្យដឹងថា លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃបាននិយាយពីការចរចាព្រំដែនជាមួយកម្ពុជាពុំបញ្ចប់ដោយងាយទេ និងចោទប្រកាន់កម្ពុជានិយាយផ្សេងខុសពីលទ្ធផលចរចា ។ ថៃចង់បានសុខសន្តិភាពជាប្រទេសជិតខាងល្អ ប៉ុន្តែលោកតានតឹងផ្លូវចិត្ត ពីព្រោះពេលភាគីទាំងពីរចរចាអ្វី កម្ពុជាយកទៅនិយាយផ្សេង ហើយលោកថា ប្រទេសខ្លះចរចាព្រំដែនរហូតដល់រាប់រយឆ្នាំ ខណៈកម្ពុជា-ថៃទើបចាប់ផ្តើមចរចាជាថ្មី ។

នាវេលាម៉ោង៩និង១០នាទី ថ្ងៃទី២៥ ខែសីហា នៅវិមានរដ្ឋាភិបាល លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីបានផ្តល់សម្ភាសន៍ជាមួយសារព័ត៌មានពីកិច្ចប្រជុំវិសាមញ្ញ របស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នៅថ្ងៃទី២៥ ខែសីហា រវាងយោធភូមិភាគទី៥របស់កម្ពុជា និងបញ្ជាការដ្ឋានការពារព្រំដែនខេត្តចាន់បុរី និងខេត្តត្រាតរបស់ថៃ ដោយកម្ពុជាធ្វើជាម្ចាស់ផ្ទះ ថា គ្មានអ្វីផ្លាស់ប្តូរទេ ពីព្រោះកិច្ចប្រជុំនេះបន្តពីកិច្ចប្រជុំគណៈកម្មាធិការកិច្ចការព្រំដែនទូទៅ (GBC) កន្លងមក ។

កិច្ចប្រជុំអាចពិភាក្សាខុសគ្នាខ្លះអាស្រ័យលើទីកន្លែង និងបញ្ហា ប៉ុន្តែការពិភាក្សាផ្អែកលើខ្លឹមសារបន្តពីកិច្ចប្រជុំគណៈកម្មាធិការកិច្ចការព្រំដែនទូទៅ (GBC) លើកមុន ។ វាជាជជែកគ្នារវាងមេបញ្ជាការកងទ័ព ហើយការជជែកភាគច្រើនស្តីពីបញ្ហាព្រំដែន និងធ្វើដូចម្តេចដើម្បីទទួលបានលទ្ធផលសរុបដូចគ្នាបំផុត ។ ភាគីថៃពុំបានជជែករឿងបន្លាលួសជាមួយកម្ពុជាទេ ហើយបញ្ហាដែលថៃតានតានផ្លូវចិត្ត គឺពេលថៃចរចាអ្វីជាមួយកម្ពុជា ខាងកម្ពុជាយកទៅនិយាយផ្សេងខុសពីលទ្ធផលចរចា ។

លោក ភូមិថាំ បន្តថា ពេលនេះ រដ្ឋមន្ត្រីក្រសួងការបរទេសថៃបានធ្វើដំណើរទៅទីក្រុងហ្សឺណែវ ប្រទេសស្វីស ជួបជាមួយគណៈកម្មការពាក់ព័ន្ធនឹងអនុសញ្ញាអូតាវ៉ាដើម្បីបង្ហាញភស្តុតាងទាំងអស់ ។ ថៃចង់បានសន្តិភាពជាប្រទេសជិតខាងល្អ ប៉ុន្តែថៃពុំឱ្យអ្នកណាល្មើសអធិបតេយ្យ ខណៈកម្ពុជានិយាយអ្វីស្រេចតែកម្ពុជា ពីព្រោះការពិតនៅតែជាការពិត អន្តរជាតិបានឃើញរួចហើយ ។

បច្ចុប្បន្ន កម្ពុជា និងថៃកំពុងដំណើរការចរចា បើមើលពីប្រវត្តិសាស្ត្រពិភពលោក គឺការចរចារឿងព្រំដែនពុំមែនបញ្ចប់ងាយៗទេ ប្រទេសខ្លះចរចារាប់សិបឆ្នាំ ប្រទេសខ្លះទៀតចរចារហូតដល់រាប់រយឆ្នាំ ខណៈកម្ពុជា-ថៃទើបចាប់ផ្តើមចរចាជាថ្មី ។ ថៃមានបញ្ហាព្រំដែនជាមួយកម្ពុជារហូតមក ប៉ុន្តែបញ្ចប់ជាដំណាក់កាល អាស្រ័យលើស្ថានការណ៍នីមួយៗដូចម្តេច ។ នេះបើតាមការលើកឡើងរបស់នាយករដ្ឋមន្ត្រីស្តីទីថៃ ។

គួរបញ្ជាក់ថា នៅថ្ងៃទី២៥ ខែសីហា ឆ្នាំ២០២៥នេះ កម្ពុជាបានធ្វើជាម្ចាស់ផ្ទះកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥របស់កម្ពុជា និងបញ្ជាការដ្ឋានការពារព្រំដែនខេត្តចាន់បុរី និងខេត្តត្រាតរបស់ថៃ ។ កិច្ចប្រជុំវិសាមញ្ញនេះ ភាគីកម្ពុជា និងថៃ បានឯកភាពគ្នារក្សាទំនាក់ទំនងជាប្រចាំរវាងបណ្តាយោធភូមិភាគ និងតំបន់យោធា ព្រមទាំងបណ្តាអង្គភាពនៅតាមបណ្តោយព្រំដែនកម្ពុជា-ថៃ និងខិតខំដោះស្រាយរាល់បញ្ហាដោយសន្តិវិធី និងជៀសវាងការប៉ះទង្គិច ។

ភាគីទាំងពីរក៏បានបញ្ជាក់ពីសារៈសំខាន់នៃការពង្រឹងទំនាក់ទំនងបន្ថែមទៀតនៅគ្រប់កម្រិត ដើម្បីកសាងជំនឿទុកចិត្ត និងលើកកម្ពស់ភាពជាអ្នកជិតខាងល្អ ។ តាមរយៈ ការប្រាស្រ័យទាក់ទងគ្នានេះ ភាគីទាំងពីរបានសង្កត់ធ្ងន់ពីការវិវឌ្ឍជាវិជ្ជមាន និងវឌ្ឍនភាពដែលសម្រេចបានកន្លងមក សំដៅជំរុញកិច្ចសហប្រតិបត្តិការលើគ្រប់វិស័យ និងការវិលត្រឡប់ទៅរកប្រក្រតីភាពឡើងវិញ ៕

ខេត្តស្រះកែវ៖ កាលពីថ្មីៗនេះ ប្រជាជនថៃបាននាំគ្នាខឹ.ងសម្បារនឹងអភិបាលខេត្តស្រះកែវជាខ្លាំង បន្ទាប់ពីលោកបានធ្លោយមាត់ទទួលស្គាល់ថាភូមិណងចាន់ ដែលទាហានថៃកំពុងព័ទ្ធបន្លាលួសឈ្លានពាននោះជាដីទំនាស់ដែលស្ថិតក្នុងអធិបតេយ្យរបស់កម្ពុជា។ ក្រោយទទួលបានមតិរិះគ.ន់ខ្លាំងពេក អភិបាលខេត្តរូបនេះបានចេញមកស្រាយ និងសូមអភ័យទោសពលរដ្ឋជាសាធារៈ។នេះបើតាមសារព័ត៌មាន The Nation។

កាលពីថ្ងៃសៅរិ៍ ទី23 ខែសីហា ឆ្នាំ2025 លោក Parinya Phothisat អភិបាលខេត្តស្រះកែវ បានចេញមុខសុំទោសជាសាធារណៈ បន្ទាប់ពីលោកបានលើកឡើងអំពីដីមានជម្លោះនៅក្នុងភូមិណងចាន់ ដែលថៃកំពុងព័ទ្ធលួសនោះថាជា ដីទំនាស់គ្មានឯកសារកម្មសិទ្ធិតច្បាស់លាស់ បង្កឲ្យមានការរិះគន់ពីប្រជាសំណាក់ពលរដ្ឋថៃដាក់ចំៗមកកាន់លោកដូចទឹកបាក់ទំបន់។

ដោយឃើញពលរដ្ឋប្រតិកម្មនឹងការលើកឡើងរបស់លោកច្រើនពេក លោក Parinya បានក្រឡាស់ពាក្យសំដីដើម្បីកែស្ថានការណ៍យ៉ាងដូច្នេះថា៖ “ខ្ញុំសូមអភ័យទោសដោយស្មោះចំពោះប្រជាពលរដ្ឋទាំងអស់ ដែលខ្ញុំយល់ខុសទាក់ទងនឹងដីនៅភូមិណងចាន់។ ខ្ញុំសូមបញ្ជាក់ម្តងទៀតថាតំបន់នេះស្ថិតនៅក្នុងស្រុកខកស៊ុង ខេត្តស្រះកែវនៃព្រះរាជាណាចក្រថៃ”។

ជាមួយនឹងការបកស្រាយនេះ អាជ្ញាធរថៃបានធ្វើការបញ្ជាក់ជាថ្មីថា ដើមឡើយ តំបន់ណងចាន់ ត្រូវបានប្រើជាជម្រកបណ្ដោះអាសន្នសម្រាប់ជនភៀសខ្លួនកម្ពុជាដែលភៀសខ្លួនពីសង្រ្គា.មប៉ុណ្ណោះ។ ប៉ុន្តែក្រោយសង្គ្រាមបានបញ្ចប់ ប្រជាជនកម្ពុជាមួយចំនួនមិនបានត្រឡប់មកស្រុកវិញទេ ហើយថែមទាំងបង្កើតសហគមន៍របស់ពួកគេនៅទីនេះជាបន្តបន្ទាប់ ដោយពួកគេបានអះអាងថា តំបន់នេះគឺជាកម្មសិទ្ធិរបស់កម្ពុជាទៀតផង។

ជុំវិញបញ្ហាព័ទ្ធបន្លាលួសនេះដែរ អ្នកនាំពាក្យក្រសួងការបរទេសកម្ពុជា ចាត់ទុកវាថាជាសកម្មភាព ដែលធ្វើឲ្យប៉ះពាល់ធ្ងន់ធ្ងរដល់ការកសាងទំនុកចិត្តរវាងគ្នា។ ហើយកម្ពុជាបានអំពាវនាវឲ្យថៃគោរពឲ្យបានពេញលេញចំពោះកិច្ចព្រមព្រៀងទ្វេភាគី និងកាតព្វកិច្ចអន្តរជាតិ ។ លើសពីនេះ គណៈកម្មការព្រំដែន JBC របស់កម្ពុជា បានដាក់លិខិតជំទាស់ផ្លូវការរួចហើយ ចំពោះសកម្មភាពរាយលួសបន្លា បំពាក់សំណាញ់ខ្មៅ និងដាក់កង់ឡានដោយយោធាថៃមកលើទឹកដីកម្ពុជា៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Matichon នៅថ្ងៃទី២៥ ខែសីហា ឆ្នាំ២០២៥ ឱ្យដឹងថា ប្រធានសភាពាណិជ្ជកម្មថៃបានជំរុញឱ្យរដ្ឋាភិបាលដោះស្រាយបញ្ហាខ្វះខាតពលករជាបន្ទាន់ ពីព្រោះបារម្ភពីផលប៉ះពាល់ដល់កំណើនសេដ្ឋកិច្ច ។ ការជំរុញរដ្ឋាភិបាលនេះ គឺក្រោយពីប្រទេសថៃខ្វះខាតពលករធ្វើការយ៉ាងខ្លាំង ជាពិសេស ផ្នែកកសិកម្ម អចលនទ្រព្យ ការផលិត និងសេវាកម្ម ដោយសារការចាកចេញរបស់ពលករខ្មែរ ។

លោក ផុត អារ៉ាមវឌ្ឍនាណុន ប្រធានសភាពាណិជ្ជកម្មថៃបាននិយាយនៅថ្ងៃទី២៥ ខែសីហា ថា ការខ្វះខាតពលករធ្វើការនៅប្រទេសថៃ គឺជាបញ្ហាចម្បងដែលរដ្ឋាភិបាលត្រូវតែដោះស្រាយជាបន្ទាន់ ដើម្បីកុំឱ្យប៉ះពាល់ដល់ការស្តារ និងជំរុញកំណើនសេដ្ឋកិច្ចថៃ ជាពិសេស ផ្នែកកសិកម្ម អចលនទ្រព្យ ការផលិត និងសេវាកម្ម ។

កាលពីសប្តាហ៍ទី៣ ខែសីហា សភាពាណិជ្ជកម្មថៃបានដាក់សំណើទៅលោក ភិឆ័យ ឈុនហាវ៉ាឈិរ៉ាក ឧបនាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុ ដើម្បីឱ្យជ្រាបពីក្តីបារម្ភ និងការកំណត់គោលនយោបាយរបស់បណ្តាញសភាពាណិជ្ជកម្មខេត្ត សមាគមពាណិជ្ជកម្ម និងសភាពាណិជ្ជកម្មអន្តរជាតិ ។ សំណើនេះមានខ្លឹមសារថា បច្ចុប្បន្ន ពលករខ្មែរយ៉ាងច្រើនបានត្រឡប់ទៅប្រទេសវិញ ដែលធ្វើឱ្យផ្នែកជាច្រើនប្រឈមនឹងការខ្វះខាតពលករធ្វើការយ៉ាងខ្លាំង ។

សភាពាណិជ្ជកម្មសំណូមពឱ្យរដ្ឋាភិបាល ជាពិសេស ក្រសួងការងារ ពន្លឿនការនាំចូលពលករបរទេសបន្ថែមតាមកិច្ចព្រមព្រៀង MOU ស្របច្បាប់ដើម្បីឱ្យពលករបរទេសអាចធ្វើការនៅថៃជាប្រព័ន្ធ មានលិខិតអនុញ្ញាតធ្វើការ និងស្របច្បាប់ថៃ ដូចជា ៖ នាំចូលពលករបង់ក្លាដែស នេប៉ាល់ ស្រីលង្កា និងឥណ្ឌូណេស៊ី ។ ក្រសួងការងារគួរប្រញាប់បញ្ជូនឯកសារនាំចូលពលករទៅគណៈរដ្ឋមន្ត្រីក្នុងសប្តាហ៍នេះ ដើម្បីឱ្យពលករទាំងនេះធ្វើការជំនួសពលករខ្មែរ និងបំពេញតម្រូវការខ្វះពលករសម្រាប់អាជីវកម្មទាន់ពេលវេលា ។

ពលករជាកម្លាំងពលកម្មដ៏សំខាន់សម្រាប់ជំរុញសេដ្ឋកិច្ចថៃ បើពុំដោះស្រាយបញ្ហាខ្វះខាតពលករឱ្យទាន់ពេលវេលាទេនោះ នឹងអាចប៉ះពាល់ផ្នែកកសិកម្ម ការផលិត សេវាកម្ម និងការងារជាច្រើនទៀតនៅប្រទេសថៃ ។ ហេតុនេះ យើងគាំទ្រឱ្យរដ្ឋាភិបាលផ្តល់ភាពសំខាន់ និងដោះស្រាយការខ្វះខាតពលករជាបន្ទាន់ដើម្បីទ្រទ្រង់សេដ្ឋកិច្ច និងអាជីវកម្មរងផលប៉ះពាល់ ។ នេះបើតាមការលើកឡើងរបស់ប្រធានសភាពាណិជ្ជកម្មថៃ ។

ចំណែកលោក អាត់ ភិសាលវ៉ានិច អ្នកជំនាញសេដ្ឋកិច្ចអាស៊ាន និងអន្តរជាតិ បានវិភាគពីពលករខ្មែរសម្រុកចាកចេញពីប្រទេសថៃ គឺធ្វើឱ្យប៉ះពាល់សេដ្ឋកិច្ចថៃយ៉ាងខ្លាំង ។ ចំនួនពលរខ្មែរដែលធ្វើការស្របច្បាប់ និងខុសច្បាប់នៅថៃកាលពីឆ្នាំ២០២៤ ស្មើ១លាន២សែន៥ម៉ឺននាក់ ធ្វើការផ្នែកសំណង់ កសិកម្ម និងសេវាកម្ម ហើយពលករខ្មែរធ្វើការនៅថៃ ស្មើ២០.៨% នៃចំនួនពលករថៃ និងស្មើ១៥.៧% នៃចំនួនពលករមកពីប្រទេស CLMV ដែលធ្វើការនៅថៃ (គឺកម្ពុជា ឡាវ មីយ៉ាន់ម៉ា និងវៀតណាម) ៕

ប្រទេសថៃ ៖ កាលពីថ្ងៃទី២៤ ខែសីហា ឆ្នាំ២០២៥ នាយករដ្ឋមន្ត្រីស្តីទីថៃ លោក ភូមិថាំ វីឆាយ៉ាឆៃ បានបញ្ជាឱ្យអភិបាលខេត្តទូទាំងប្រទេសតាមដានស្ថានការណ៍ខ្យល់ព្យុះកាជិគិយ៉ាងដិតដល់ ។ បើការវាយតម្លៃស្ថានការណ៍បង្ហាញថា ខ្យល់ព្យុះកាន់តែអាក្រក់ខ្លាំងក្នុងតំបន់ណាមួយ អភិបាលខេត្តត្រូវបញ្ជាទៅអភិបាលស្រុក និងអាជ្ញាធរមូលដ្ឋានអនុវត្តតាមផែនការជម្លៀសពលរដ្ឋទៅកន្លែងសុវត្ថិភាព និងផ្តល់ស្បៀងអាហារដល់ពលរដ្ឋ ។

លោក ភូមិថាំ វីឆាយ៉ាឆៃ នាយករដ្ឋមន្ត្រីស្តីទីថៃ និងជាប្រធានការពារ និងកាត់បន្ថយគ្រោះមហន្តរាយ បាននិយាយកាលពីថ្ងៃទី២៤ ខែសីហា ថា ពេលនេះ ខ្យល់ព្យុះកាជិគិ (Kajiki) នៅតំបន់សមុទ្រចិនខាងត្បូង ដែលស្ថិតនៅឆ្ងាយពីទីក្រុងដងណយ ប្រទេសវៀតណាម ប្រមាណ៥៧០គីឡូម៉ែត្រ កំពុងផ្លាស់ទីទៅភាគខាងលិចក្នុងល្បឿន២០គីឡូម៉ែត្រក្នុង១ម៉ោង ។

ខ្យល់ព្យុះអាចផ្លាស់ទីក្នុងល្បឿនលឿនជាងនេះពេលវាមកដល់ឈូងសមុទ្រតុងកឹង និងខ្សោយកម្លាំងជាបន្តបន្ទាប់ក្រោយពីមកដល់ឆ្នេរសមុទ្រខាងជើងប្រទេសវៀតណាម ចាប់ពីថ្ងៃទី២៥ ដល់ថ្ងៃទី២៦ ខែសីហា ។ ដូច្នេះ ប្រទេសថៃមានភ្លៀងធ្លាក់ខ្លាំងជាច្រើនតំបន់ដោយសារឥទ្ធិពលខ្យល់ព្យុះកាជិគិ ព្រមទាំងមានខ្យល់កន្ត្រាក់នៅខេត្តភាគឦសាន ខាងជើង ខាងត្បូង កណ្តាល ខាងកើត ខាងលិច រួមទាំងទីក្រុងបាងកក ក៏ដូចជាតំបន់ជុំវិញ ចាប់ពីថ្ងៃទី២៤ ដល់ថ្ងៃទី២៧ ខែសីហា ។

លោក ភូមិថាំ បានបញ្ជាទៅអភិបាលខេត្តចំនួន៧៦ រួមទាំងទីក្រុងបាងកក ឱ្យតាមដានស្ថានការណ៍ខ្យល់ព្យុះដោយសហការជាមួយនាយកដ្ឋានបង្ការ និងកាត់បន្ថយគ្រោះមហន្តរាយយ៉ាងដិតដល់ដើម្បីវាយតម្លៃស្ថានការណ៍អាកាសធាតុ ។ បើការវាយតម្លៃស្ថានការណ៍បង្ហាញថា ខ្យល់ព្យុះកាន់តែអាក្រក់ខ្លាំងក្នុងតំបន់ណាមួយ គឺអភិបាលខេត្តត្រូវបញ្ជាទៅអភិបាលស្រុក និងអាជ្ញាធរមូលដ្ឋានអនុវត្តតាមផែនការជម្លៀសពលរដ្ឋទៅកន្លែងសុវត្ថិភាព និងផ្តល់ស្បៀងដល់ពលរដ្ឋ ។

តំបន់ដែលរងគ្រោះដោយទឹកជំនន់ញឹកញាប់ត្រូវជីកប្រឡាយ និងកាយកាកសំណល់ដែលធ្វើឱ្យស្ទះផ្លូវទឹក ។ ក្រៅពីនេះ ត្រូវត្រួតពិនិត្យស្លាកសញ្ញាធំៗ ឬស្លាកមានកម្ពស់ខ្ពស់នៅតាមផ្លូវឱ្យមានភាពរឹងមាំ បើស្លាកសញ្ញាធំៗងាយនឹងបាក់រលំបង្កគ្រោះថ្នាក់ដល់ពលរដ្ឋត្រូវរុះរើចេញជាបន្ទាន់ ។ អាជ្ញាធរមូលដ្ឋានគួរជូនដំណឹងទៅពលរដ្ឋពីភ្លៀងធ្លាក់ខ្លាំងធ្វើឱ្យមានទឹកជំនន់ភ្លាមៗ និងទឹកហូរពីតំបន់ព្រៃភ្នំដើម្បីឱ្យពលរដ្ឋត្រៀមខ្លួន និងអនុវត្តតាមការណែនាំរបស់រដ្ឋាភិបាល ។

ចំណែកខេត្តនៅជាប់សមុទ្រអាន់ដាម៉ាន់ និងឈូងសមុទ្រថៃ ត្រូវតាមដានស្ថានការណ៍យ៉ាងដិតដល់ បើទឹករលកសមុទ្រមានកម្ពស់ខ្ពស់ត្រូវអនុវត្តផែនការការពារគ្រោះមហន្តរាយ ព្រមទាំងដាក់ទង់និមិត្តសញ្ញាហាមភ្ញៀវទេសចរ និងពលរដ្ឋចុះលេងទឹកសមុទ្រ ជិះទូក និងនេសាទ ។ ក្រសួងមហាផ្ទៃបានសហការជាមួយស្ថាប័នពាក់ព័ន្ធក្នុងតំបន់ថែទាំពលរដ្ឋរយៈពេល២៤ម៉ោង ៕

ថៃ៖ តាមរយៈការស្ទង់មតិរបស់ NIDA កាលពីពេលថ្មីៗនេះបង្ហាញថា ប្រជាជនថៃភាគច្រើនពេញចិត្តនឹងការផ្តាច់ទំនាក់ទំនងជាមួយប្រទេសកម្ពុជាទាំងស្រុង ក្រោមហេតុផលជម្លោះព្រំដែន និងយល់ឃើញថាកម្ពុជា គឺជាអ្នកជិតខាងអា.ក្រក់ ដែលមិនគួរឲ្យទុកចិត្តតែងរំលោ.ភបំពានលើអធិបតេយ្យថៃ។ នេះបើយោងតាមការចុះផ្សាយរបស់សារព័ត៌មាន The Nation កាលពីថ្ងៃទី24 ខែសីហា ឆ្នាំ2025។

តាមរបាយការណ៍របស់ NIDA ដែលបានមកពីការស្ទង់មតិលើប្រជាជនថៃ ជុំវិញក្ដីព្រួយបារម្ភរបស់ពួកគេចំពោះទំនាស់ព្រំដែនរវាងកម្ពុជា-ថៃ និងការយល់ឃើញរបស់ពួកគេមកលើកម្ពុជា បានឲ្យដឹងថា៖ 54% នៃមនុស្សទាំងនោះបានហៅកម្ពុជាថាជា “អ្នកជិតខាងដ៏អាក្រ.ក់ដែលថៃមិនគួរយកធ្វើជាមិត្ត” ។ ខណៈ 29% ទៀតបាននិយាយថា ទំនាក់ទំនងជាមួយកម្ពុជាអាចរក្សាទុកបាន ប៉ុន្តែមិនគួរទុកចិត្តទៀតទេ។ ដោយឡែក មានមនុស្សចំនួន 14% បានចាត់ទុកកម្ពុជាថាជា «សត្រូវលេខ1របស់ថៃ»។ និងមានត្រឹម 2% ប៉ុណ្ណោះដែលយល់ឃើញថា កម្ពុជានៅតែអាចធ្វើជាមិត្តរបស់ថៃបាន។

ក្រៅពីការលើកឡើងពីកម្ពុជា ចំពោះជម្លោះព្រំដែននេះផ្ទាល់ ប្រជាជនថៃជាង 65% បានយល់ឃើញថា បច្ចុប្បន្នប្រទេសមហាអំណាចបាននិងកំពុងជ្រៀតជ្រែកចូលក្នុងទំនាស់រវាងកម្ពុជា-ថៃ ដើម្បីផលប្រយោជន៍ផ្ទាល់ខ្លួនរបស់ពួកគេ។ ពលរដ្ឋថៃទាំងនោះ លើកជាគំនិតថា រដ្ឋាភិបាលថៃមិនគួរអនុញ្ញាតឲ្យមានភាគីផ្សេងចូលមកលូកដៃក្នុងបញ្ហានេះនោះទេ។

ក្រុមមនុស្សទាំងនោះបាននិយាយថា៖ ប្រទេសថៃគួរតែបដិសេធការជ្រៀតជ្រែកបែបនេះ ហើយពង្រឹងតែការដោះស្រាយតាមរយៈយន្តការទ្វេភាគីជាមួយកម្ពុជាទៅបានហើយ។

លទ្ធផលនេះបានបង្ហាញពីការឡើងកម្ដៅនៃមតិសាធារណៈរបស់ថៃចំពោះប្រទេសកម្ពុជា ដោយមតិភាគច្រើនបានទទូចឲ្យមានការកាត់ផ្ដាច់ទំនាក់ទំនងជាមួយកម្ពុជា។ ការមិនទុកចិត្តគ្នាមិនត្រឹមតែកំណត់គោលដៅកម្ពុជាប៉ុណ្ណោះទេ ថែមទាំងពង្រីកដល់តួអង្គអន្តរជាតិ ដែលប្រជាជនថៃភាគច្រើនជឿថាកំពុងស្វែងរកផលប្រយោជន៍ផ្ទាល់ខ្លួនជាជាងសន្តិភាព។

ដោយឡែកបើងាកមកខាងកម្ពុជា ប្រជាជនកម្ពុជាជាច្រើនក៏យល់ឃើញលើអត្តចរិតរបស់ថៃស្រដៀងគ្នា នឹងការណ៍ដែលថៃយល់ឃើញចំពោះកម្ពុជាផងដែរ ប៉ុន្តែខុសគ្នាត្រង់ថា កម្ពុជាមិនទាមទារឲ្យមានការកាត់ផ្ដាច់ទំនាក់ទំនងជាមួយថៃនោះទេ ពោលគឺគ្រាន់តែពហិការឈប់ប្រើប្រាស់ និងទិញទំនិញថៃបន្តទៀត ដើម្បីដាក់សម្ពាធលើផ្នែកសេដ្ឋកិច្ច មិនដល់ថ្នាក់កាត់ផ្ដាច់ការទូតទាំងស្រុងឡើយ៕

គិតត្រឹមត្រីមាសទី២ ឆ្នាំ២០២៥ ការនាំចេញគ្រឿងសមុទ្រពីថៃទៅកាន់សហរដ្ឋអាមេរិក ត្រូវបានគេប៉ាន់ប្រមាណថាខាតបង់ទឹកប្រាក់អស់ចំនួន ៤,៨ពាន់លានបាត (ប្រមាណជិត ១៥០លានដុល្លារ)។ ការធ្លាក់ចុះនេះ គឺដោយសារតែពន្ធបដិការថ្មីរបស់សហរដ្ឋអាមេរិក ដែលជំរុញឲ្យតម្លៃផលិតនាំចេញរបស់ថៃកើនឡើងខ្ពស់ជាងមុន។ នេះបើយោងតាមសារព័ត៌មាន The Nation ។

ប្រភពខាងលើនេះបានឲ្យដឹងថា តម្លៃនាំចេញគ្រឿសមុទ្រពីប្រទេសថៃទៅកាន់សហរដ្ឋអាមេរិកមានចំនួន ៤៦,៤១ពាន់លានបាតក្នុងមួយឆ្នាំ ធ្វើឲ្យប្រទេសមហាអំណាចមួយនេះ ក្លាយជាអតិថិជនដ៏ធំបំផុតរបស់ថៃ។ ប៉ុន្តែក្រោយការកំណត់ពន្ធថ្មី ១៩% ដែលខ្ពស់ជាងពេលមុនៗ បានធ្វើឲ្យគ្រឿងសមុទ្រទាំងនោះមានតម្លៃថ្លៃសម្រាប់អ្នកទិញនៅអាមេរិក។ កត្តានេះបានធ្វើឲ្យទីផ្សារគ្រឿងសមុទ្រថៃមានភាពថយចុះ ខណៈតម្រូវការសរុបរបស់អ្នកទិញត្រូវបានកាត់បន្ថយ។

ជាមួយនឹងការកាត់បន្ថយនៃតម្រូវការសរុបនេះ ការនាំចេញរបស់ថៃទៅកាន់សហរដ្ឋអាមេរិកត្រូវបានគេរំពឹងថា អាចនឹងមានអត្រាស្រុតចុះពី ៥ ទៅ ១០% ទាំងបរិមាណ និង តម្លៃ គិតត្រឹមបំណាច់ឆ្នាំ២០២៥។ លើសពីនេះ អាជ្ញាធរថៃក៏កំពុងតែពិចារណារកដំណោះស្រាយលើបញ្ហាមួយទៀត នោះគឺកាតព្វកិច្ចប្រឆាំងការលក់បង្គាដែលកំពុងបន្តលើបង្គាថៃ ដែលបន្ថែមថ្លៃសេវា ០,៨១% ពីលើពន្ធថ្មី។

ដោយឡែក សម្រាប់ការនាំចូលទំនិញពីអាមេរិកមកថៃវិញ ត្រូវបានគេព្យាករណ៍ថាទំនងជាមិនមានការកើនឡើងនោះទេ នេះគឺបណ្ដាលមកពីអត្រាពន្ធទាប ឬស្មើសូន្យ ចំពោះពន្ធនាំចូលរបស់ថៃដែលកំណត់លើអាមេរិក។ គួរឲ្យដឹងថា ទំនិញអាមេរិកជាប្រភេទអាហារសមុទ្រដែលនាំចូលប្រទេសថៃកន្លងមករួមមាន ត្រីសាលម៉ុន និងត្រីធូណាជាដើម៕