ប្រទេសថៃ ៖ កាលពីថ្ងៃទី៩ ខែកញ្ញា ឆ្នាំ២០២៥ លោក ជីរ៉ាត់ ថងសុវណ្ណ សមាជិកសភាគណបក្សប្រជាជនបានទៅពិនិត្យមើលព្រំដែននៅភូមិណងចាន់ ឃុំណូនម៉ាកមូន ស្រុកខូកស៊ូង ខេត្តស្រះកែវ ទល់មុខភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ រួមដំណើរដោយសមាជិកសភាគណបក្សប្រជាជនផ្សេងទៀត ។ ក្រុមសមាជិកសភាគណបក្សប្រជាជនអំពាវនាវឱ្យពលរដ្ឋដាក់សម្ពាធរដ្ឋាភិបាលថ្មីផ្តល់ប្រាក់សំណងឱ្យច្រើនដល់ពលរដ្ឋរងផលប៉ះពាល់នៅព្រំដែន ព្រមទាំងស្នើរដ្ឋាភិបាល និងកងទ័ពថៃបើកព្រំដែនកម្ពុជា-ថៃជាបន្ទាន់ដោយសារថៃប៉ះពាល់សេដ្ឋកិច្ចខ្លាំង ប៉ុន្តែត្រូវបានពលរដ្ឋថៃខឹងសម្បារខ្លាំងក្នុងបណ្តាញសង្គម ។

សមាជិកសភាគណបក្សប្រជាជន លោក ជីរ៉ាត់ ថងសុវណ្ណ បានសំណូមពរមានការបើកព្រំដែនកម្ពុជា-ថៃយ៉ាងឆាប់រហ័សបំផុត ពីព្រោះការបិទព្រំដែនធ្វើឱ្យថៃរងផលប៉ះពាល់សេដ្ឋកិច្ចខ្លាំងជាងកម្ពុជា ដោយលោកបានប្រៀបធៀបប្រាក់ចំណូលពីការនាំចេញ នាំចូលទំនិញរវាងប្រទេសទាំងពីរ ។ ហេតុនេះ លោកស្នើឱ្យរដ្ឋាភិបាលថៃបើកព្រំដែនដែលមានទីតាំងនៅឆ្ងាយពីកន្លែងប៉ះទង្គិចគ្នា ហើយអ្វីដែលសំខាន់ជាងទឹកដី គឺជីវភាពពលរដ្ឋនៅព្រំដែន ប៉ុន្តែបែរជាធ្វើឱ្យពលរដ្ឋថៃខឹងសម្បារយ៉ាងខ្លាំង ពួកគេសំណូមពរឱ្យរដ្ឋាភិបាលបិទព្រំដែនបន្តទៀត ។

លោក ជីរ៉ាត់ ថងសុវណ្ណ បាននិយាយមកកាន់សារព័ត៌មានក្រោយពីការពិនិត្យមើលស្ថានការណ៍នៅភូមិណងចាន់ ជាមួយសមាជិកសភាគណបក្សប្រជាជនផ្សេងទៀតថា ៖ «ចង់ឱ្យពលរដ្ឋដាក់សម្ពាធរដ្ឋាភិបាលថ្មីផ្តល់ប្រាក់សំណងដល់ពលរដ្ឋនៅព្រំដែនដែលរងផលប៉ះពាល់ដោយសារសង្គ្រាមជាមួយកម្ពុជា ។ បញ្ហាមួយទៀត ត្រូវបើកព្រំដែនកម្ពុជា-ថៃជាបន្ទាន់ ពីព្រោះការបិទព្រំដែនប៉ះពាល់ថៃខ្លាំងជាង ថៃនាំចូលទំនិញពីកម្ពុជាក្នុងបរិមាណតិច ប៉ុន្តែថៃលក់ទំនិញឱ្យកម្ពុជាយ៉ាងច្រើន ។ ដូច្នេះ គួរបើកព្រំដែនដែលមានទីតាំងនៅឆ្ងាយពីកន្លែងប៉ះទង្គិច» ។

ចំណែកសមាជិកសភាគណបក្សប្រជាជនម្នាក់ទៀតបានស្នើឱ្យរដ្ឋាភិបាលថៃថ្មីផ្លាស់ប្តូរតំបន់ព្រំដែនពីសមភូមិទៅជាតំបន់ពាណិជ្ជកម្មមានការលក់ដូររវាងប្រទេសទាំងពីរ ខណៈប្រទេសនានាលើពិភពលោក ពុំសូវផ្តោតសំខាន់លើបញ្ហាព្រំដែនទេ ។ ជាក់ស្តែង នៅសហភាពអឺរ៉ុបគ្មានការបិទព្រំដែន និងគ្មានទិដ្ឋាការ ពលរដ្ឋសហភាពអឺរ៉ុបអាចធ្វើដំណើរឆ្លងដែនទៅប្រទេសនេះ ប្រទេសនោះបាន ហើយពួកគេអាចនិយាយច្រើនភាសាដោយសារព្រំដែនបើកចំហ ប៉ុន្តែថៃស្ថិតក្នុងតំបន់អាស៊ាន បែរជាបិទព្រំដែនជាមួយកម្ពុជា ។

ប៉ុន្តែការលើកឡើងរបស់ក្រុមសមាជិកសភាគណបក្សប្រជាជនពុំទទួលបានការគាំទ្រពីពលរដ្ឋថៃទេ ពលរដ្ឋថៃចង់ឱ្យរដ្ឋាភិបាលថ្មីបិទព្រំដែនជាមួយកម្ពុជាបន្តទៀត និងស្នើឱ្យកាត់ផ្តាច់ទំនាក់ទំនងការទូតទាំងអស់ ដោយសារពួកគេពុំទទួលយកការពិតរឿងសេដ្ឋកិច្ចថៃធ្លាក់ចុះ ។ វីដេអូសមាជិកសភាគណបក្សប្រជាជនដែលផ្តល់សម្ភាសន៍ជាមួយសារព័ត៌មាននៅភូមិណងចាន់ ត្រូវបានពលរដ្ឋថៃបង្ហោះចែកចាយរិះគន់ពេញបណ្តាញសង្គមកាលពីថ្ងៃទី៩ ខែកញ្ញា ។

ពលរដ្ឋថៃមានគំនិតជ្រុលនិយមបានរិះគន់ក្រុមសមាជិកសភាគណបក្សប្រជាជន (ឬគណបក្សប្រឆាំង) ដែលស្នើឱ្យរដ្ឋាភិបាលថ្មីបើកព្រំដែនកម្ពុជា-ថៃជាបន្ទាន់ ដោយពលរដ្ឋថៃទាំងនេះពុំគាំទ្រឱ្យរដ្ឋាភិបាលរបស់នាយករដ្ឋមន្ត្រីថ្មី លោក អនុថីន ឆាន់វីរៈគូន បើកព្រំដែនទេ ហើយថែមទាំងចោទប្រកាន់សមាជិកសភាគណបក្សប្រជាជនមានគំនិតលម្អៀងទៅខាងកម្ពុជា ៕

ប្រទេសនេប៉ាល់ ៖ តាំងពីថ្ងៃទី៨ ខែកញ្ញា ឆ្នាំ២០២៥ យុវជននេប៉ាល់រាប់ម៉ឺននាក់បានប្រមូលផ្តុំគ្នាធ្វើបាតុ.កម្មប្រឆាំងការសម្រេចចិត្តរបស់នាយករដ្ឋមន្ត្រីនេប៉ាល់ លោក KP Sharma Oli ដែលបញ្ជាបិទបណ្តាញសង្គមមិនឱ្យពលរដ្ឋប្រើប្រាស់ រួមមាន ៖ Facebook, YouTube, បណ្តាញសង្គម X និងមានអំពើពុករលួ.យ ។ ក្រុមបាតុករខឹងសម្បារខ្លាំងឡើងរហូតដល់ដុតកំទេ.ចសភានេប៉ាល់ចោល និងវាយបំផ្លា.ញទ្រព្យសម្បត្តិសាធារណៈតាមផ្លូវក្នុងទីក្រុង Kathmandu ក្រោយសមត្ថកិច្ចជ្រុលដៃសម្លា.ប់បាតុករចំនួន១៩នាក់ និងរងរបួសជាង១០០នាក់ ។

ក្រោយពីស្ថានការណ៍វឹកវរនៅប្រទេសនេប៉ាល់កាន់តែធ្ងន់ធ្ងរ កាលពីយប់ថ្ងៃទី៩ ខែកញ្ញា កងទ័ពនេប៉ាល់បានប្រកាសចាត់វិធានការបង្ក្រាប​ក្រុមបាតុករ ហើយកងទ័ពបានចោទប្រកាន់ក្រុមបាតុករឆ្លៀតឱកាសកេងចំណេញពីវិបត្តិដែលកើតឡើងដើម្បីបំផ្លិចបំផ្លាញជាតិ, លួចអីវ៉ាន់ពីហាងលក់ទំនិញ ព្រមទាំងដុតទ្រព្យសម្បត្តិសាធារណៈ និងទ្រព្យសម្បត្តិឯកជន ។

ខ្លឹមសារសេចក្តីប្រកាសរបស់កងទ័ពបញ្ជាក់ថា បើក្រុមបាតុករនៅតែបន្តការតវ៉ា ស្ថាប័នសន្តិសុខទាំងអស់ និងកងទ័ពនេប៉ាល់នឹងគ្រប់គ្រងស្ថានការណ៍វឹកវរ ប៉ុន្តែកងទ័ពពុំបានបញ្ជាក់លម្អិតថា តើនឹងចាត់វិធានការបែបណាខ្លះទេ ។ កងទ័ពបានអំពាវនាវឱ្យពលរដ្ឋគ្រប់រូបគាំទ្រកងទ័ព ហើយកងទ័ពនឹងផ្សព្វផ្សាយព័ត៌មានបន្ថែមក្រោយការវាយតម្លៃស្ថានការណ៍ ។

ការប្រឆាំងតវ៉ាដោយអំពើហិង្សាកាលពីថ្ងៃទី៩ ខែកញ្ញា នៅតែខ្លាំងក្លា គឺក្រុមបាតុករបានសម្រុលចូលអគារសភាជាតិនៅទីក្រុង Kathmandu និងដុតអគារនេះបណ្តាលឱ្យហុយផ្សែងគួរឱ្យតក់ស្លុត ។ យុវជននេប៉ាល់បានប្រមូលគ្នាតវ៉ានៅទូទាំងប្រទេសដោយសារពុំពេញចិត្តរដ្ឋាភិបាលហាមប្រើប្រាស់បណ្តាញសង្គម ទោះជាការហាមឃាត់នេះបានលុបចោល ហើយនាយករដ្ឋមន្ត្រីនេប៉ាល់ លោក KP Sharma Oli ចុះចេញពីតំណែងដើម្បីទទួលខុសត្រូវក្តី ។ កុ្រមយុវជននៅតែខឹងសម្បាររដ្ឋាភិបាលដោយសារបង្ក្រាបពួកគេយ៉ាងធ្ងន់ធ្ងរកាលពីថ្ងៃទី៨ ខែកញ្ញា បណ្តាលឱ្យយុវជនស្លាប់រហូតដល់១៩នាក់ ។

ការធ្វើបាតុកម្មកាលពីថ្ងៃទី៩ ខែកញ្ញា បណ្តាលឱ្យយុវជននេប៉ាល់ស្លាប់ថែមទៀត៣នាក់ សរុបស្លាប់រហូតដល់២២នាក់ និងរងរបួសកើនឡើងដល់២០៩នាក់ត្រូវបានបញ្ជូនទៅមន្ទីរពេទ្យនៅថ្ងៃដដែល ក្នុងនោះយុវជនរងរបួស១៨៦នាក់ ត្រូវបានគ្រូពេទ្យអនុញ្ញាតឱ្យត្រឡប់ទៅផ្ទះវិញ ៕

ក្រុមហ៊ុម Apple បានបញ្ចេញត្រកូល iPhone 17 series ជាផ្លូវការហើយ ខណៈតម្លៃ iPhone 17 Pro Max បានក្លាយជា iPhone ដែលមានតម្លៃជាងគេបំផុតក្នុងប្រវត្តិសាស្ត្រ Apple។

Apple បានបញ្ចេញ iPhone 17 series ចំនួន៤ ក្នុងនោះរួមមាន៖
iPhone 17 តម្លៃចាប់ពី៧៩៩ដុល្លារ
iPhone Air តម្លៃចាប់ពី៩៩៩ដុល្លារ
iPhone 17 Pro តម្លៃចាប់ពី១០៩៩ដុល្លារ
iPhone 17 Pro Max តម្លៃចាប់ពី១១៩៩ដុល្លារ រហូតដល់១៩៩៩ដុល្លារ

សម្រាប់17 Pro Max ត្រូវបានបំពាក់មកជាមួយបន្ទះឈីបជំនាន់ថ្មី គឺ A19 Pro ដែលផលិតឡើងតាមខ្នាតស្តង់ដារ 3nm ថ្មីចុងក្រោយរបស់ TSMC។

អ្វីដែលសំខាន់នោះ 17 Pro Max ក៏ជាត្រកូលiPhone ដំបូងគេដែលមានសមត្ថភាពផ្ទុករហូតដល់2TB ផងដែរ។

គួរបញ្ជាក់ថា ទាំងនេះជាតម្លៃចេញពីក្រុមហ៊ុន Apple ពេលមកដល់កម្ពុជាយើង តម្លៃអាចនឹងលេីសនេះបន្តិចបន្តួច៕

នេប៉ាល់៖ នាយករដ្ឋមន្ត្រីនេប៉ាល់ លោក KP Sharma Oli ត្រូវបានបង្ខំឱ្យចុះចេញពីដំណែងជាបន្ទាន់ បន្ទាប់ពីរលកនៃការតវ៉ារបស់ក្រុមមនុស្សវ័យក្មេងធ្វើការប្រឆាំងនឹងអំពើពុករលួយរបស់រដ្ឋាភិបាល បានបណ្តាលឲ្យមនុស្សចំនួន ១៩ នាក់ស្លាប់. និងជាង ១០០ នាក់រងរបួស។ នេះបើយោងតាមទីភ្នាក់ងារសារព័ត៌មាន Al Jazeera។

នៅថ្ងៃអង្គា ទី៩ ខែកញ្ញា ម្សិលមិញ លោក Oli បានសរសេរនៅក្នុងលិខិតផ្លូវការមួយច្បាប់ទៅកាន់ប្រធានាធិបតី Ramchandra Paudel ថា “ដោយមើលឃើញពីស្ថានភាពដ៏អាក្រក់នៅក្នុងប្រទេស ខ្ញុំសម្រេចចិត្តលាលែងពីដំណែងចាប់ពីថ្ងៃនេះទៅ ដើម្បីជួយសម្រួលដល់បញ្ហា និងដើម្បីជួយដោះស្រាយវាដោយនយោបាយស្របតាមរដ្ឋធម្មនុញ្ញ”។

ការសម្រេចចិត្តចុះចេញពីតំណែងភ្លាមៗបែបនេះត្រួវបានធ្វើឡើង បន្ទាប់ពីចលនាតវ៉ាដ៏ធំសម្បើមរបស់ក្រុមមនុស្សវ័យក្មេង ឬហៅថា GenZ រាប់ម៉ឺននាក់ នាំគ្នាចេញតវ៉ាប្រឆាំងជាមួយនឹងការសម្រេចចិត្តរបស់លោក ក្នុងការបិទបណ្ដាញទំនាក់ទំនងសង្គមនានា មិនឲ្យពលរដ្ឋប្រើប្រាស់រួមមាន Facebook, Youtube, បណ្តាញសង្គម X និងការមិនសប្បាយចិត្តចំពោះអំពើពុករលួយនយោបាយ និងបក្ខពួកនិយមរបស់លោក។

អ្វីដែលកាន់តែធ្វើឲ្យការតវ៉ានេះឡើងកម្ដៅកាន់តែខ្លាំង គឺនៅពេលដែលប៉ូលីសនេប៉ាល់បានជ្រុលដៃសម្លាប់បាតុករដល់ទៅ ១៩ នាក់ដែលជំរុញឲ្យកំហឹងពលរដ្ឋកាន់តែពុះកញ្ជ្រោល រហូតដល់ក្រុមបាតុករនាំគ្នាដុតកម្ទេចសភានេប៉ាល់ចោលទាំងស្រុង ព្រមទាំងគប់រថយន្ត និងវា.យបំផ្លាញទ្រព្យសម្បត្តិសាធារណៈនៅតាមដងផ្លូវនៃទីក្រុង Kathmandu។

គួរបញ្ជាក់ថា លោក Oli ដែលមានអាយុ 73 ឆ្នាំបានកាន់តំណែងសម្រាប់អាណត្តិទី 4 របស់គាត់ចាប់តាំងពីខែកក្កដាឆ្នាំមុនដោយបានក្លាយជានាយករដ្ឋមន្ត្រីទី 14 ក្នុងសម័យក្រោយរាជាធិបតេយ្យរបស់ប្រទេសនេប៉ាល់។

ចាប់តាំងពីលោកឡើងកាន់តំណែង ប្រជាជននេប៉ាល់ជាច្រើនអះអាងថាប្រទេសរបស់ខ្លួនហាក់មិនមានភាពល្អប្រសើរឡើយ ដោយអត្រាអ្នកគ្មានការងារធ្វើបានកើនឡើងប្រហែល ២០% កាលពីឆ្នាំមុន ជាមួយនឹងការប៉ាន់ស្មានថាមានយុវជននេប៉ាល់ជាង 2,000 នាក់ បានចាកចេញពីប្រទេសជារៀងរាល់ថ្ងៃដើម្បីស្វែងរកការងារនៅមជ្ឈិមបូព៌ា ឬអាស៊ីអាគ្នេយ៍៕