ទីក្រុងបាងកក៖ លោក ប៊ុនស៊ីន ផាត់ក្លាង អតីតមេទ័ពភូមិភាគ២ បាននិយាយលាងខ្លួន និងបង្វែរសាច់រឿងឡើងវិញ ក្រោយពីគណៈកម្មាធិការកិច្ចការយោធា និងសន្តិសុខរដ្ឋនៃព្រឹទ្ធសភាថៃបានកោះហៅឲ្យចូលខ្លួនមកបំភ្លឺអំពីការលើកឡើងរបស់ខ្លួន ទាក់ទងនឹងបទបញ្ជាអាថ៌កំបាំងពីថ្នាក់លើឲ្យលោកបញ្ឈប់ការប្រយុទ្ធជាមួយកម្ពុជា ដែលឥឡូវនេះកំពុងធ្វើឲ្យពលរដ្ឋថៃខឹ.ងសម្បារជាខ្លាំង។

យោងតាមសារព័ត៌មាន The Nation នៅថ្ងៃទី១០ ខែវិច្ឆកា បានឲ្យដឹងថា លោក Somjate Boonthanom ប្រធានគណៈកម្មាធិការកិច្ចការយោធា និងសន្តិសុខរដ្ឋនៃព្រឹទ្ធសភាថៃបាននិយាយថា លោក ប៊ុនស៊ីន ផាត់ក្លាង នឹងត្រូវចូលរួមក្នុងកិច្ចប្រជុំសង្ខេបមួយ ដើម្បីបកស្រាយពីអ្វីដែលខ្លួនបានលើកឡើងជាសាធារណៈកាលពីថ្ងៃសៅរិ៍ ជុំវិញអ្វីដែលលោកហៅថា «បទបញ្ជាឈប់បា.ញ់សម្ងាត់» ពីថ្នាក់លើអាថ៌កំបាំងម្នាក់ ដែលបញ្ជាឱ្យលោកឈប់ប្រយុទ្ធត្រឹមតែប្រាំមួយម៉ោងបន្ទាប់ពីការប៉ះទង្គិចគ្នាលើកដំបូងកាលពីថ្ងៃទី 24 ខែកក្កដា។

ការហៅលោក ប៊ុនសុីន មកបំភ្លឺដូច្នេះ គឺដើម្បីបកស្រាយបញ្ជាក់ថាតើវាជាការពិតឬយ៉ាងណា ព្រោះឥឡូវនេះមហាជនថៃជាច្រើនកំពុងមានការខឹ.ងសម្បារនឹងបុគ្គលរូបនោះយ៉ាងខ្លាំង ដោយពួកគេចង់ដឹងច្បាស់ថា តើថ្នាក់លើដែលបញ្ជាឲ្យលោក ប៊ុនសុីន ឈប់ប្រយុទ្ធជាមួយកម្ពុជានោះគឺជាអ្នកណា? ហេតុអ្វីចង់បញ្ឈប់វិរៈបុរសរបស់ពួកគេពីការការពារអធិបតេយ្យជាតិបែបនេះ?

លោក Somjate បានបញ្ជាក់ថាគោលដៅរបស់គណៈកម្មាធិការដែលកោះហៅលោក ប៊ុនសុីន មកបំភ្លឺ គឺដើម្បីធានាបាននូវតម្លាភាព លាតត្រដាងការពិត និងការពារការភាន់ច្រឡំក្នុងចំណោមសាធារណជន ខណៈការអះអាងណាមួយដែលទាក់ទងនឹងបញ្ជាការយោធាក្នុងអំឡុងពេលប្រតិបត្តិការសកម្មគឺមានភាពរសើបខ្លាំង ហើយអាចប៉ះពាល់ដល់សន្តិសុខជាតិ។

ក្រោយត្រូវបានសួរនាំដេញដោល អតីតមេភូមិភាគ២បែរជាក្រឡាស់សម្ដីថា ខ្លួនមិនទទួលបញ្ជាពីនរណាឡើយ ហើយប្រាប់ទៅពលរដ្ឋថៃឲ្យបំភ្លេចអតីតកាល រួមទាំងអ្វីដែលលោកបាននិយាយចោលទៅ ដោយផ្តោតលើតែបច្ចុប្បន្ន និងអនាគត ជាជាងការគិតអំពីព្រឹត្តិការណ៍ការប៉ះទង្គិចគ្នាតាមព្រំដែនកាលពីខែកក្កដាកន្លងទៅអី នាំតែស្មុគស្មាញនិងមិនសប្បាយចិត្ត។

ការនិយាយបាតដៃ ខ្នងដៃរបស់ ប៊ុនសុីន ផាត់ក្លាង បង្ហាញថាអតីតមេទ័ពល្មោ.ភសង្រ្គា.មរូបនេះ ហាក់កំពុងព្យាយាមទាញយកប្រជាប្រិយភាពពីប្រជាពលរដ្ឋថៃ ឲ្យចាត់ទុកខ្លួនគឺជាកំពូលមេទ័ពដ៏ខ្លាំងក្លាមួយរូប ខណៈទម្លាក់កំហុសទាំងស្រុងទៅលើរដ្ឋាភិបាលខ្លួនតាមរយៈការប្រកាសដោយគ្មានមូលដ្ឋានច្បាស់លាស់៕

ប្រទេសថៃ ៖ ក្រោយពីថៃប្រឌិតរឿងកងទ័ពជាន់មីនបណ្តាលឱ្យរងរបួសពេលដើរល្បាតនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត កាលពីថ្ងៃទី១០ ខែវិច្ឆិកា ឆ្នាំ២០២៥ និងចោទប្រកាន់កម្ពុជាបង្កប់មីនថ្មី នាយករដ្ឋមន្ត្រីថៃ លោក Anutin Charnvirakul ប្រកាសថា ថៃនឹងមិនបន្តសុពលភាពប័ណ្ណការងារឱ្យពលករខ្មែរជិត១សែននាក់ទេ ពីព្រោះបារម្ភពីអសន្តិសុខ និងឧក្រិដ្ឋ.កម្មឆ្លងដែន ។ ជាមួយគ្នានេះ រដ្ឋមន្ត្រីក្រសួងការងារថៃត្រៀមបន្តសុពលភាពប័ណ្ណការងារឱ្យពលករមកពី៣ប្រទេសធ្វើការនៅថៃបន្ត មុនពេលបណ្តេញពលករខ្មែរ ។

រដ្ឋមន្ត្រីក្រសួងការងារថៃ អ្នកស្រី Trinuch Thienthong នឹងដាក់លិខិតទៅគណៈរដ្ឋមន្ត្រីដើម្បីបន្តសុពលភាពប័ណ្ណការងារពលករមកពីប្រទេសវៀតណាម មីយ៉ាន់ម៉ា និងឡាវ ដើម្បីឱ្យធ្វើការនៅថៃដោយស្របច្បាប់ រីឯពលករខ្មែរដែលមានប័ណ្ណការងារផុតសុពលភាព ក្រសួងការងារថៃនឹងពិភាក្សាជាមួយស្ថាប័នសន្តិសុខ មុនពេលបណ្តេញចេញពីប្រទេសថៃ ។ នេះបើតាមការចុះផ្សាយរបស់សារព័ត៌មាន The Reporters នៅថ្ងៃទី១១ ខែវិច្ឆិកា ឆ្នាំ២០២៥ ។

នាថ្ងៃទី១១ ខែវិច្ឆិកា នៅវិមានរដ្ឋាភិបាល រដ្ឋមន្ត្រីក្រសួងការងារ អ្នកស្រី Trinuch បានផ្តល់សម្ភាសន៍ជាមួយសារព័ត៌មានពីចំណាត់ការលើពលករខ្មែរនៅថៃ ក្រោយពីថៃប្រឌិតរឿងកងទ័ពជាន់មីនដាច់ជើងនិងរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ថា ហេតុការណ៍កងទ័ពថៃជាន់មីនបានប៉ះពាល់ដល់ពលករខ្មែរ ជាពិសេស ពលករខ្មែរធ្វើការផ្នែកកសិកម្ម ។ យើងនឹងស្វែងរកពលករវៀតណាម មីយ៉ាន់ម៉ា និងឡាវ មកធ្វើការជំនួសពលករខ្មែរនៅកន្លែងខ្វះខាត ដោយមានកិច្ចប្រជុំគណៈរដ្ឋមន្ត្រីនៅថ្ងៃទី១១នេះ ។

អ្នកស្រីបន្តថា ការបណ្តេញពលករខ្មែរចេញពីប្រទេសថៃ គឺពាក់ព័ន្ធនឹងការសម្រេចចិត្តរបស់ស្ថាប័នជាច្រើន ជាពិសេស ស្ថាប័នសន្តិសុខ ដែលត្រូវពិភាក្សាក្នុងកិច្ចប្រជុំគណៈរដ្ឋមន្ត្រី ។ ពេលនេះ យើងត្រៀមបន្តសុពលភាពប័ណ្ណការងារពលករវៀតណាម មីយ៉ាន់ម៉ា និងឡាវ ដើម្បីធ្វើការនៅថៃបន្ត ខណៈការងារផ្នែកកសិកម្មនឹងរងផលប៉ះពាល់ ជាពិសេស ការងារកាត់ដើមអំពៅ ដោយសារពលករខ្មែរភាគច្រើនធ្វើការក្នុងផ្នែកនេះ រីឯការងារនេសាទមិនប៉ះពាល់ទេ ។

បច្ចុប្បន្ន ពលករខ្មែរធ្វើការនៅថៃស្មើជិត១សែននាក់ ក្នុងនោះពលករខ្មែរប្រមាណ៩ម៉ឺននាក់ធ្វើការស្របច្បាប់ ប៉ុន្តែប័ណ្ណការងារផុតសុពលភាពដោយសារបិទច្រកព្រំដែន ទើបធ្វើឱ្យពួកគេមិនអាចធ្វើដំណើរទៅប្រទេសវិញ ក្រសួងការងារថៃនឹងពិភាក្សាជាមួយស្ថាប័នពាក់ព័ន្ធ រួមទាំងស្ថាប័នសន្តិសុខ មុនពេលបណ្តេញពលករខ្មែរដែលមានប័ណ្ណការងារផុតសុពលភាព ។ លោកនាយករដ្ឋមន្ត្រី Anutin គាំទ្រចំណាត់ការរបស់ក្រសួងការងារក្នុងការស្វែងរកពលករមកពីប្រទេសផ្សេងៗ ព្រមទាំងយកជនភៀសសឹកមីយ៉ាន់ម៉ាជាង៤ម៉ឺននាក់មកធ្វើការជំនួសពលករខ្មែរ ។

គួរបញ្ជាក់ថា ថៃបានប្រឌិតរឿងកងទ័ពជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ដើម្បីធ្វើលេសផ្អាកអនុវត្តកិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងកូឡាឡាំពួរ ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ហើយថៃក៏យកហេតុការណ៍ជាន់មីនជាមូលហេតុមិនដោះលែងវីរកងទ័ពកម្ពុជាទាំង១៨រូប និងរាលដាលដល់ពលករខ្មែរ ។ ការប្រកាសមិនអនុវត្តកិច្ចព្រមព្រៀងសន្តិភាព គឺបង្ហាញពីចរិតរបស់ថៃ ដែលតែងតែមិនស្មោះត្រង់ ក្រឡាស់ពាក្យសម្តី ចោទប្រកាន់ អស់ពីលេសមួយ ចូលលេសមួយទៀតរាប់មិនអស់ ៕

ប្រទេសថៃ ៖ វាបានក្លាយជាទម្លាប់ឱ្យតែស្រុកទេសមានសន្តិភាពឡើងវិញ ស្ថានការណ៍នៅព្រំដែនស្ងប់ស្ងាត់ ស្រាប់តែមានព័ត៌មានពីខាងថៃថាកងទ័ពខ្លួនជាន់មីនភ្លាម ដែលនេះជាចេតនារបស់ថៃប្រឌិតរឿងជាន់មីនធ្វើឱ្យស្ថានការណ៍តានតឹង និងទម្លាក់កំហុសលើកម្ពុជាម្តងហើយម្តងទៀត ។ ហេតុការណ៍កងទ័ពថៃជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ក៏ជាការប្រឌិតដែរ ដើម្បីថៃមានលេសមិនដោះលែងវីរកងទ័ពកម្ពុជាទាំង១៨រូប និងផ្អាកអនុវត្តកិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងកូឡាឡាំពួរ ក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim ។

ក្រោយថៃប្រឌិតរឿងកងទ័ពខ្លួន២នាក់ជាន់មីនដាច់ជើងស្តាំ និងរងរបួស នៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត កាលពីថ្ងៃទី១០ ខែវិច្ឆិកា ឆ្នាំ២០២៥ ប្រធានគណបក្សថៃសាងថៃ អ្នកស្រី Sudarat Keyuraphan បានណែនាំឱ្យរដ្ឋាភិបាលថៃចាត់វិធានការយ៉ាងម៉ឺងម៉ាត់ ដោយអ្នកស្រីថា ថៃពុំទាន់ទទួលបានអធិបតេយ្យភាព តំបន់ព្រំដែនពោរពេញដោយហានិភ័យ ការចរចាសន្តិភាពគ្មានប្រយោជន៍ ហើយជនជាតិថៃប្រឈមនឹងគ្រោះថ្នាក់រហូតមក ។

កាលពីថ្ងៃទី១០ ខែវិច្ឆិកា ប្រធានគណបក្សថៃសាងថៃ អ្នកស្រី Sudarat បាននិយាយពីកងទ័ពថៃជាន់មីននៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ថា ការចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរ ប្រទេសម៉ាឡេស៊ី កន្លងមក គឺគ្មានប្រយោជន៍សម្រាប់ថៃ ជាពិសេស ថៃមិនទទួលបានទឹកដីរបស់កម្ពុជា ។ ពលរដ្ឋថៃសួរថា តើរដ្ឋាភិបាលអាចដណ្តើមយកតំបន់នៅប្រាសាទតាក្របី ច្រកអានសេះ និងតំបន់ផ្សេងៗរបស់កម្ពុជាដែរឬទេ?

ប្រធានគណបក្សថៃសាងថៃបន្តថា ការបញ្ជាឱ្យឈប់បាញ់ពេលសង្គ្រាមកន្លងមក ធ្វើឱ្យកងទ័ពថៃបាត់បង់ឱកាសដណ្តើមយកទឹកដីកម្ពុជា និងថៃចាញ់ប្រៀបផ្នែកកងទ័ពនាថ្ងៃអនាគត ខណៈពលរដ្ឋនៅព្រំដែនរស់នៅប្រឈមនឹងគ្រោះថ្នាក់ ។ ការឈប់បាញ់មិនបានជួយការពារអធិបតេយ្យទេ ប៉ុន្តែវាឆ្លុះបញ្ចាំងពីរដ្ឋាភិបាលថៃខ្វះសមត្ថភាពក្នុងការចរចាទ្វេភាគី ថែមទាំងបាត់បង់ប្រយោជន៍ ។

ការចុះហត្ថលេខាលើសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពកម្ពុជា-ថៃ មិនទាន់មានលទ្ធផលនៅឡើយ ពីព្រោះកងទ័ពថៃនៅតែមានគ្រោះថ្នាក់ដោយសារជាន់មីនជាបន្តបន្ទាប់ វាធ្វើឱ្យពលរដ្ឋបារម្ភពីរដ្ឋាភិបាលមានចំណាត់ការដូចម្តេចនៅតំបន់ព្រំដែន ។ ហេតុនេះ រដ្ឋាភិបាលគួរបង្ហាញផែនការសកម្មភាពក្នុងកិច្ចព្រមព្រៀងសន្តិភាពឱ្យបានច្បាស់លាស់ ដោយកំណត់តំបន់គោលដៅ ពេលវេលា ថវិកា និងយន្តការតាមដានលទ្ធផលជាមួយអាជ្ញាធរមូលដ្ឋាន ដើម្បីធានាថា ការចុះកិច្ចព្រមព្រៀងសន្តិភាពមិនមែនជាការទូត ប៉ុន្តែទទួលបានលទ្ធផលជាក់ស្តែង និងកាត់បន្ថយហានិភ័យ ។

លោកនាយករដ្ឋមន្ត្រី Anutin Charnvirakul និងរដ្ឋាភិបាលថៃ ត្រូវតែចាត់វិធានការយ៉ាងម៉ឺងម៉ាត់ជាមួយរឿងមីន មិនអាចព្រងើយកន្តើយ ឬចាត់ទុកជាគ្រោះថ្នាក់ ។ រដ្ឋាភិបាលត្រូវប្រញាប់ចាត់វិធានការជាបន្ទាន់ដើម្បីការពារអធិបតេយ្យ ផ្តល់សុវត្ថិភាពដល់ពលរដ្ឋនៅព្រំដែន ។ នេះបើតាមការលើកឡើងរបស់ប្រធានគណបក្សនយោបាយថៃ ។

គួរបញ្ជាក់ថា ក្រោយថៃប្រឌិតរឿងកងទ័ពខ្លួនជាន់មីននៅខេត្តស៊ីសាកេត នាយករដ្ឋមន្ត្រីថៃបានប្រកាសផ្អាកអនុវត្តកិច្ចព្រមព្រៀងសន្តិភាពជាមួយកម្ពុជា និងមិនដោះលែងវីរកងទ័ពកម្ពុជាទាំង១៨រូប ។ រាជរដ្ឋាភិបាលកម្ពុជាបារម្ភយ៉ាងខ្លាំងក្រោយពីប្រព័ន្ធផ្សព្វផ្សាយជាច្រើនដកស្រង់សម្តីរបស់ថ្នាក់ដឹកនាំថៃ ដែលបង្ហាញថាថៃផ្អាកការអនុវត្តនូវសេចក្តីថ្លែងការណ៍រួមដែលនាយករដ្ឋមន្ត្រីកម្ពុជា-ថៃបានចុះហត្ថលេខាក្រោមវត្តមានប្រធានាធិបតីអាមេរិក លោក Donald Trump និងនាយករដ្ឋមន្ត្រីម៉ាឡេស៊ី លោក Anwar Ibrahim នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ។

ក្រសួងការពារជាតិកម្ពុជាបានបញ្ជាក់យ៉ាងមុតមាំថា តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាតែងតែប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីដែលគំរាមកំហែងដល់សន្តិសុខ និងសុវត្ថិភាពរបស់មនុស្សជាតិឡើយ ។ ក្រសួងការពារជាតិកម្ពុជាបន្តប្តេជ្ញាចិត្តធ្វើការឱ្យបានជិតស្និទ្ធជាមួយភាគីថៃ ក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេស ធានាសន្តិសុខ និងសុវត្ថិភាពរបស់ពលដ្ឋ ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជា-ថៃ ៕

ប្រទេសថៃ៖ កងទ័ពអាកាសថៃ បានប្រកាសថាខ្លួននឹងបញ្ចប់ការអនុវត្តកិច្ចព្រមព្រៀងសន្តិភាពទាំងអស់រវាងប្រទេសថៃ និងកម្ពុជា រហូតដល់សកម្មភាពអរិភាពណាមួយរបស់កម្ពុជាត្រូវបានបញ្ឈប់។ ការប្រកាសនេះ គឺជាការសម្រេចចិត្តដោយឯកតោភាគីរបស់ភាគីថៃ។ នេះបើតាមការចុះផ្សាយរបស់សារព័ត៌មាន Khaosod។

នៅម៉ោង ៤រសៀល ថ្ងៃទី១០ ខែវិច្ឆិកា ឆ្នាំ២០២៥ បន្ទាប់ពីកើតមានហេតុការណ៍ទាហានថៃបានដើរជាន់មីនផ្ទុះរងរបួសចំនួនពីរនាក់បន្ថែមទៀត ទំព័រហ្វេសប៊ុកផ្លូវការរបស់កងទ័ពអាកាសថៃបានចេញសេចក្ដីជូនដំណឹងមួយដើម្បីបញ្ជាក់ថា “កងទ័ពអាកាសភូមិន្ទថៃ នឹងបញ្ចប់ការអនុវត្តកិច្ចព្រមព្រៀងគ្រប់បែបយ៉ាងរវាងប្រទេសថៃ និងកម្ពុជា រហូតដល់សកម្មភាពគំរាមកំហែ.ងរបស់កម្ពុជាត្រូវបានបញ្ឈប់។

សេចក្ដីជូនដំណឹងនេះបានបញ្ជាក់ថា “កងទ័ពអាកាសថៃ នឹងអនុវត្តកាតព្វកិច្ចរបស់ខ្លួនដោយកិត្តិយស សេចក្តីថ្លៃថ្នូរ និងដោយចាត់ទុកផលប្រយោជន៍ល្អបំផុតរបស់ប្រទេសជាតិជាអាទិភាព”។

ជាមួយគ្នានេះដែរ បើតាមសេចក្តីប្រកាសព័ត៌មានរបស់កងទ័ពភូមិន្ទថៃ (RTA) ស្ដីពីលទ្ធផលនៃការចុះពិនិត្យទីតាំង ការផ្ទុះនៅតំបន់ Huai Tamaria គ្រាប់មីនដែលផ្ទុះកាលពីម្សិលមិញនេះបានអះអាងថា គឺជាគ្រាប់មីនទើបដាក់ដាំថ្មីៗ ដែលនេះជាការបំពានលើសេចក្តីប្រកាសរួម និងជាអំពើបង្កអរិភាព ដែលនាំឱ្យមានភាពជៀសមិនផុតពីការបញ្ចប់កិច្ចព្រមព្រៀងសន្តិភាពរវាងគ្នាទៅវិញទៅមក។

ឆ្លើយតបនឹងការចោ.ទប្រកាន់ដោយគ្មានមូលដ្ឋានច្បាស់លាស់ និងផ្អែកលើការសម្រេចចិត្តដោយឯកតោភាគីបែបនេះ រាជរដ្ឋាភិបាលកម្ពុជា តាមរយៈសេចក្ដីថ្លែងការណ៍របស់ក្រសួងការបរទេស បានគូសបញ្ជាក់យ៉ាងច្បាស់ថា កម្ពុជាសូមបដិសេធយ៉ាងដាច់អហង្ការចំពោះរាល់ការចោទប្រកាន់របស់ប្រទេសថៃ ថាកម្ពុជាបានដាក់មីនថ្មីនៅតាមព្រំដែនជាមួយប្រទេសថៃ។

រាជរដ្ឋាភិបាលកម្ពុជា ក៏សូមបញ្ជាក់ជាថ្មីដែរថា កម្ពុជានៅតែប្តេជ្ញាអនុវត្តសេចក្តីថ្លែងការណ៍រួម ដែលត្រូវ បានចុះហត្ថលេខាជាមួយនិងការសាទរយ៉ាងខ្លាំងក្លាពីសហគមន៍អន្តរជាតិ។ ក្នុងនាមជាប្រទេសដែលបាន គាំទ្រយ៉ាងមុតមាំ និងជារដ្ឋភាគីនៃអនុសញ្ញាហាមឃាត់មីនប្រឆាំងមនុស្ស កម្ពុជាមិនដែលបានប្រើប្រាស់ ហើយក៏នឹងមិនប្រើប្រាស់មីនថ្មីឡើយ។

ជាមួយគ្នានេះ រាជរដ្ឋាភិបាលកម្ពុជា ក៏បានបង្ហាញការព្រួយបារម្ភយ៉ាងខ្លាំងផងដែរចំពោះ ការសម្រេចចិត្តដោយឯកតោភាគីរបស់ភាគីថៃ ក្នុងការផ្អាកការអនុវត្តសេចក្តីថ្លែងការណ៍រួម ទាំងដែលសេចក្តីថ្លែងការណ៍រួម ក៏ដូចជាកិច្ចព្រមព្រៀងនានាដែលចុះហត្ថលេខានៅប្រទេសម៉ាឡេសុី ត្រូវបានចូលរួមធ្វើជាសាក្សី និងមានការសម្របសម្រួលដោយសហរដ្ឋអាមេរិក និងម៉ាឡេសុី ក៏ដោយ៕

រាជធានីភ្នំពេញ៖ រាជរដ្ឋាភិបាលកម្ពុជាបង្ហាញការព្រួយបារម្ភយ៉ាងខ្លាំងចំពោះសារព័ត៌មានថៃជាច្រើន ដែលបានដកស្រង់សម្តីពីថ្នាក់ដឹកនាំថៃថា ប្រទេសថៃផ្អាកការអនុវត្តសេចក្តីថ្លែងការណ៍រួម រវាងកម្ពុជា និងថៃ ដែលចុះហត្ថលេខានៅប្រទេសម៉ាឡេសុី បន្ទាប់ពីទាហានថៃដើរជាន់មីនផ្ទុះរងរបួសធ្ងន់នៅថ្ងៃទី១០ ខែវិច្ឆិកា នេះ។

រាជរដ្ឋាភិបាលកម្ពុជា តាមរយៈសេចក្ដីថ្លែងការណ៍របស់ក្រសួងការបរទេសបានបញ្ជាក់ថា កម្ពុជាមានការព្រួយបារម្ភយ៉ាងខ្លាំងចំពោះសេចក្តីរាយការណ៍តាមប្រព័ន្ធផ្សព្វផ្សាយ ជាច្រើន ដកស្រង់សំដីរបស់ថ្នាក់ដឹកនាំថៃ ដែលបង្ហាញថាប្រទេសថៃបានផ្អាកការអនុវត្តនូវសេចក្តីថ្លែង ការណ៍រួមរវាងនាយករដ្ឋមន្ត្រីកម្ពុជា និងថៃ ដែលត្រូវបានចុះហត្ថលេខា ដោយមានវត្តមានរបស់ឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក និង ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និង ជាប្រធានអាស៊ាន ធ្វើជាសាក្សី នៅទីក្រុងគូឡាឡាំពួ ប្រទេសម៉ាឡេស៊ី នាថ្ងៃទី២៦ ខែតុលា ឆ្នាំ២០២៥។

សេចក្តីរាយការណ៍ព័ត៌មានទាំងនេះក៏បានឱ្យដឹងដែរថា ព្រឹត្តិការណ៍ផ្ទុះមីននៅថ្ងៃទី១០ ខែវិច្ឆិកា ឆ្នាំ២០២៥ ដែលបានធ្វើឱ្យទាហានថៃពីរនាក់រងរបួសនៅព្រំដែនកម្ពុជា-ថៃ ត្រង់តំបន់ភ្នំទ្រព្យ ស្ថិតជិត ប្រាសាទព្រះវិហាររបស់កម្ពុជា ត្រូវបានលើកឡើងថាជាមូលហេតុនៃការផ្អាកអនុវត្តសេចក្តីថ្លែងការណ៍រួម ខាងលើនេះ រួមទាំងការលុបចោលគម្រោងដោះលែងយោធិនខ្មែរ ១៨រូប ពីការឃុំឃាំងនៅប្រទេសថៃ ដែលភាគីថៃបានប្រកាសថានឹងអនុវត្តនៅថ្ងៃទី១២ ខែវិច្ឆិកា ឆ្នាំ២០២៥។

រាជរដ្ឋាភិបាលកម្ពុជាសូមបដិសេធយ៉ាងដាច់អហង្ការចំពោះរាល់ការចោទប្រកាន់របស់ប្រទេសថៃ ថាកម្ពុជាបានដាក់មីនថ្មីនៅតាមព្រំដែនជាមួយប្រទេសថៃ។ វាជាការសំខាន់ដែលត្រូវកត់សម្គាល់ពីការដឹងឮ យ៉ាងសុះសាយនូវការពិតថា ចម្ការមីនភាគច្រើនតាមបណ្តោយព្រំដែនកម្ពុជា-ថៃ ដែលបន្សល់ទុកពីជំនាន់ សង្គ្រាមស៊ីវិលកម្ពុជារយៈជិត៣០ឆ្នាំ ក្នុងទសវត្សរ៍ ១៩៧០ និង១៩៨០ មិនទាន់ត្រូវបានបោសសម្អាតនៅ ឡើយទេ ដោយសារតែភូមិសាស្ត្រលំបាក និងស្ថានភាពមិនទាន់មានការកំណត់ខណ្ឌសីមាព្រំដែន។

រាជរដ្ឋាភិបាលកម្ពុជាសូមបញ្ជាក់ជាថ្មីថា កម្ពុជានៅតែប្តេជ្ញាអនុវត្តសេចក្តីថ្លែងការណ៍រួម ដែលត្រូវ បានចុះហត្ថលេខាជាមួយនិងការសាទរយ៉ាងខ្លាំងក្លាពីសហគមន៍អន្តរជាតិ។ ក្នុងនាមជាប្រទេសដែលបាន គាំទ្រយ៉ាងមុតមាំ និងជារដ្ឋភាគីនៃអនុសញ្ញាហាមឃាត់មីនប្រឆាំងមនុស្ស កម្ពុជាមិនដែលបានប្រើប្រាស់ ហើយក៏នឹងមិនប្រើប្រាស់មីនថ្មីឡើយ៕