ភ្នាក់ងារស្រាវជ្រាវជាតិឥណ្ឌូណេស៊ី (BRIN) កាលពីដើមខែមិថុនា ឆ្នាំ២០២៦ បានបង្កើតបច្ចេកវិទ្យាថ្មីឈ្មោះ «Pyrolysis» ដែលអាចបំលែងកាកសំណល់ផ្លាស្ទិកទៅជាប្រេងឥន្ធនៈសម្រាប់ប្រើប្រាស់ក្នុងវិស័យឧស្សាហកម្ម ។ វាមានសមត្ថភាពបំលែងសំរាមរហូតដល់១.២៥តោនក្នុងមួយថ្ងៃ ហើយជំហានបន្ទាប់ សមត្ថភាពបំលែងនឹងកើនឡើងរហូតដល់៥តោនក្នុងមួយថ្ងៃ ដើម្បីដោះស្រាយវិបត្តិការបំពុលដោយកាកសំណល់ផ្លាស្ទិកដ៏ច្រើនក្នុងប្រទេស និងជួយកាត់បន្ថយបរិមាណសំរាមនៅតាមទីលានចាក់សំរាម ។

កាលពីថ្ងៃទី១ ខែមិថុនា អ្នកស្រាវជ្រាវមកពីភ្នាក់ងារ BRIN ឱ្យដឹងថា បច្ចេកវិទ្យាថ្មីនេះមានឈ្មោះជាផ្លូវការ គឺ «ប្រេងឥន្ធនៈរាវពីកាកសំណល់ផ្លាស្ទិកជាមួយបច្ចេកវិទ្យា Pyrolysis កម្រិតខ្ពស់សម្រាប់វិស័យឧស្សាហកម្ម» ។ វាធ្វើប្រតិបត្តិការជាច្រើនដំណាក់កាលបន្តបន្ទាប់គ្នា ដោយការដាក់បញ្ចូលកាកសំណល់ផ្លាស្ទិកទៅក្នុងម៉ាស៊ីនបំលែងបានភ្លាមៗ និងពុំចាំបាច់បែងចែក ឬជ្រើសរើសប្រភេទជាមុនឡើយ ។

បច្ចុប្បន្ន បច្ចេកវិទ្យានេះកំពុងត្រូវបានអភិវឌ្ឍន៍បន្ថែមទៀតដើម្បីបង្កើនសមត្ថភាពបំលែងសំរាមរហូតដល់៥តោនក្នុងមួយថ្ងៃ ខណៈបច្ចេកវិទ្យាកន្លងមករបស់ឥណ្ឌូណេស៊ី អាចបំលែងសំរាមត្រឹមតែ៤០០គីឡូក្រាមប៉ុណ្ណោះក្នុងមួយថ្ងៃ ។

ចំណែកប្រេងផលិតចេញមក ត្រូវបានគេហៅថា «Petasol» ដែលឆ្លងកាត់ការពិសោធន៍ និងមានការទទួលស្គាល់ពីគុណភាពស្តង់ដារស្មើនឹងប្រេងម៉ាស៊ូតប្រភេទ Biodiesel សម្រាប់យកទៅប្រើប្រាស់ក្នុងឧស្សាហកម្ម ម៉ាស៊ីនភ្លើង និងរោងចក្រនានា ។

អ្នកស្រាវជ្រាវភ្នាក់ងារ BRIN សង្ឃឹមថា បច្ចេកវិទ្យានេះដែរ នឹងជួយជំរុញដល់កំណើនរោងចក្រ និងមជ្ឈមណ្ឌលកែច្នៃសំរាមនៅទូទាំងប្រទេស ។ វាក៏ជួយបង្កើនតម្លៃដល់កាកសំណល់ផ្លាស្ទិក ព្រមទាំងលើកកម្ពស់ការគ្រប់គ្រងកាកសំណល់ប្រកបដោយនិរន្តរភាពក្នុងប្រទេស ។

គួរបញ្ជាក់ថា ការបង្កើតបច្ចេកវិទ្យានេះឡើងក្នុងគោលបំណងដោះស្រាយវិបត្តិការបំពុលដោយកាកសំណល់ផ្លាស្ទិកដ៏ច្រើននៅឥណ្ឌូណេស៊ី ក៏ដូចជាជួយកាត់បន្ថយបរិមាណសំរាមនៅតាមទីលានចាក់សំរាម, ទទួលបានផលប្រយោជន៍សេដ្ឋកិច្ចពីកាកសំណល់ និងជំរុញសន្តិសុខថាមពលដោយការបង្កើតប្រភពថាមពលជំនួស ៕

ចិនបានបញ្ជូននាវាផ្ទុកយន្តហោះ «Liaoning» និងកងនាវាអមដំណើរជាច្រើនគ្រឿងទៅធ្វើសមយុទ្ធយោធានៅមហាសមុទ្រប៉ាស៊ីហ្វិក ភាគខាងកើតប្រទេសហ្វីលីពីន ចាប់ពីថ្ងៃទី២៦ ដល់ថ្ងៃទី២៨ ខែឧសភា ឆ្នាំ២០២៦ ដោយមានការហោះឡើង-ចុះរបស់យន្តហោះ និងឧទ្ធម្ភាគចក្រ រហូតដល់ជាង១៧០ដង ដើម្បីពង្រឹងសមត្ថភាពប្រ.យុទ្ធរបស់កងទ័ព ។ ការធ្វើសមយុទ្ធយោធាទ្រង់ទ្រាយនេះ ត្រូវបានជប៉ុន និងតៃវ៉ាន់តាមដានយ៉ាងដិតដល់ ស្របពេលស្ថានការណ៍តានតឹងកើតឡើងក្នុងតំបន់ ។

តាមការប្រកាសរបស់ក្រសួងការពារជាតិជប៉ុនកាលពីថ្ងៃទី១ ខែមិថុនា កងកម្លាំងការពារដែនសមុទ្រជប៉ុនបានឃើញនាវាផ្ទុកយន្តហោះចិន «Liaoning» និងកងនាវាអមដំណើរជាច្រើនគ្រឿងរួមគ្នាធ្វើសមយុទ្ធយោធាយ៉ាងសកម្មនៅខាងកើតកោះ Luzon ប្រទេសហ្វីលីពីន ដោយយន្តហោះ និងឧទ្ធម្ភាគចក្រលើនាវា បានហោះឡើងចុះរហូតដល់ជាង១៧០ដង ។ លើសពីនេះ កងនាវាចិនបានបម្លាស់ទីមកកៀកនឹងភាគអាគ្នេយ៍កោះមិយ៉ាកូជិម៉ា ខេត្តអូគិណាវ៉ា ប្រទេសជប៉ុនទៀតផង ដែលមានគម្លាតពីគ្នាប្រមាណ៥៩០គីឡូម៉ែត្រ ។

ក្រសួងការពារជាតិជប៉ុនប្រកាសទៀតថា កាលពីថ្ងៃទី២៩ ខែឧសភា កន្លងមក នាវាផ្ទុកយន្តហោះរបស់ចិននេះបានបន្តបម្លាស់ទីនៅតាមបណ្តោយឆ្នេរសមុទ្រប្រទេសហ្វីលីពីន ប៉ុន្តែមិនបញ្ជាក់ច្បាស់លាស់អំពីនាវាបម្លាស់ទីទៅកាន់គោលដៅណាទេ ។

ចំណែកក្រសួងការពារជាតិរបស់តៃវ៉ាន់ ក៏បានតាមដានការធ្វើសមយុទ្ធយោធា និងការបម្លាស់ទីរបស់នាវាផ្ទុកយន្តហោះចិនយ៉ាងយកចិត្តទុកដាក់ដូចគ្នាដែរ និងបញ្ជាក់ថា កាលពីខែមេសា នាវាផ្ទុកយន្តហោះដដែលនេះបានធ្វើដំណើរឆ្លងកាត់ច្រកសមុទ្រតៃវ៉ាន់ជាលើកដំបូង បើគិតតាំងពីខែធ្នូ ឆ្នាំ២០២៥ ។

គួរបញ្ជាក់ថា ការធ្វើសមយុទ្ធយោធាជាញឹកញាប់របស់ចិននារយៈពេលចុងក្រោយនេះ ត្រូវបានគេមើលឃើញថា គឺជាការឆ្លើយតបទៅនឹងការរឹតចំណងសន្តិសុខកាន់តែស្អិតរមួតរវាងសហរដ្ឋអាមេរិក ជប៉ុន និងហ្វីលីពីន ជាពិសេស បន្ទាប់ពីការបញ្ចប់សមយុទ្ធរួមគ្នាទ្រង់ទ្រាយធំ «Balikatan 2026» កាលពីពេលថ្មីៗកន្លងទៅ ៕

នៅថ្ងៃទី៣ ខែមិថុនា ឆ្នាំ២០២៦នេះ នាយកដ្ឋានបង្ការ និងកាត់បន្ថយគ្រោះមហន្តរា.យថៃបានប្រកាសអាសន្នអំពីគ្រោះទឹកជំនន់យ៉ាងធ្ងន់ធ្ងរនឹងកើតឡើងនៅបណ្តាខេត្តភាគខាងត្បូង រួមមាន ៖ រ៉ាក់ណង ផាំងង៉ា ក្រាប៊ី ទ្រាំង សាទូន និងភូកេត ដោយសារភ្លៀងធ្លាក់ខ្លាំងជាប់ៗគ្នាបណ្តាលឱ្យទឹកហូរពីតំបន់ព្រៃភ្នំភ្លាមៗ បាក់ដី ខ្យក់កន្ត្រាក់ខ្លាំង ចាប់ពីថ្ងៃទី៣ ដល់ថ្ងៃទី៨ ខែមិថុនា ។

នាយកដ្ឋានបង្ការ និងកាត់បន្ថយគ្រោះមហន្តរាយថៃបានតាមដានស្ថានការណ៍អាកាសធាតុ និងកត្តាហានិភ័យនឹងកើតឡើងដោយសារគ្រោះធម្មជាតិយ៉ាងយកចិត្តទុកដាក់ បន្ទាប់ពីភ្នាក់ងារឧតុនិយមប្រកាសពីភ្លៀងធ្លាក់ខ្លាំង និងខ្យល់កន្ត្រាក់នៅបរិវេណសមុទ្រអាន់ដាម៉ាន់ កាលពីថ្ងៃទី២ ខែមិថុនា កន្លងមក ។

តាមការចុះផ្សាយរបស់សារព័ត៌មាន Thai PBS News និង Khaosod ខ្យល់មូសុងនិរតីមានកម្លាំងខ្លាំងបានគ្របដណ្តប់លើសមុទ្រអាន់ដាម៉ាន់ ហើយខ្យល់នឹងបោកបក់កាន់តែជាងមុន ធ្វើឱ្យទឹករលកមានកម្ពស់ពី២ ទៅជាង៣ម៉ែត្រ ។ វានឹងធ្វើឱ្យបណ្តាខេត្តនៅភាគខាងត្បូងប្រទេសថៃមានភ្លៀងធ្លាក់ខ្លាំងឡើង ហើយមានទឹកជំនន់ហូររពីតំបន់ព្រៃភ្នំភ្លាមៗ បាក់ដី និងខ្យល់កន្ត្រាក់ ចាប់ពីថ្ងៃទី៣ ដល់ថ្ងៃទី៨ ខែមិថុនា ។

នាយកដ្ឋាននេះបានប្រកាសអាសន្នទៅកាន់ពលរដ្ឋនៅបណ្តាខេត្តទាំងនេះត្រៀមខ្លួនជាមុន ព្រមទាំងតាមដានស្ថានការណ៍ទឹកជំនន់ជាប់រហូតដើម្បីបង្ការគ្រោះថ្នាក់ផ្សេងៗ ។ ក្រៅពីនេះ នឹងបញ្ជូនក្រុមការងារសង្គ្រោះ រួមទាំងឧបករណ៍ទៅកាន់តំបន់ហានិភ័យ ក៏ដូចជាត្រៀមបិទតំបន់ទេសចរណ៍មិនឱ្យភ្ញៀវទេសចរចូលកម្សាន្ត ដូចជា ៖ តំបន់ទឹកជ្រោះធម្មជាតិ និងល្អាង ។

គួរបញ្ជាក់ថា ខេត្តភាគខាងត្បូងរបស់ថៃធ្លាប់មានទឹកជំនន់កើតឡើងយ៉ាងខ្លាំងមិនធ្លាប់មានកាលពីចុងខែវិច្ឆិកា ឆ្នាំ២០២៥ ដោយសម្លាប់ជីវិតមនុស្ស និងរងរបួសយ៉ាងច្រើនសន្ធឹកសន្ធាប់ ។ ពេលនោះ ស្រុកហាតយ៉ៃ ខេត្តសុងក្លា លិចលង់ខ្លាំងបំផុតក្នុងប្រវត្តិសាស្ត្រ និងខូចខាតជាងគេក្នុងចំណោមខេត្តភាគខាងត្បូង ដោយសារភ្លៀងធ្លាក់ខ្លាំងពេកធ្វើឱ្យកម្រិតទឹកជំនន់ហក់ឡើងយ៉ាងគំហុករហូតដល់ដំបូលផ្ទះ ៕

យកល្បិចចាស់ដដែលៗមកប្រើទៀតហើយ! នៅពេលកម្ពុជាចាប់បង្ខំថៃឱ្យដោះស្រាយវិវាទដែនសមុទ្រដោយប្រើប្រាស់ច្បាប់អន្តរជាតិ (UNCLOS) កាលពីថ្ងៃទី២ ខែមិថុនា ឆ្នាំ២០២៦ ស្រាប់តែកងទ័ពថៃប្រឌិតរឿងគ្រាប់មីនភ្លែត ពិតជាមិនចោលល្បិចចាស់មែន! ដើម្បីពន្យារពេល គេចវេះ មិនចង់ដោះស្រាយបញ្ហានៅអន្តរជាតិរួមគ្នាជាមួយកម្ពុជា ។

កាលពីថ្ងៃទី២ ខែមិថុនា កងទ័ពថៃបានយកគ្រាប់មីនថ្មីមកបង្កប់នៅតំបន់មុំបី រួចហើយចោទប្រកាន់កងទ័ពកម្ពុជា ដែលល្បិចនេះកងទ័ពថៃតែងតែប្រើប្រាស់ដើម្បីទម្លាក់កំហុស និងមួលបង្កាច់រហូតមក ។ វាគ្រាន់តែជាល្បិចពន្យារពេល គេចវេះមិនចង់ដោះស្រាយបញ្ហានៅអន្តរជាតិជាមួយកម្ពុជា បន្ទាប់ពីរាជរដ្ឋាភិបាលកម្ពុជាផ្ញើលិខិតជូនដំណឹងផ្លូវការទៅកាន់រដ្ឋាភិបាលថៃ និងអគ្គលេខាធិការអង្គការសហប្រជាជាតិ (UN) ដើម្បីចាប់ផ្តើមដំណើរការយន្តការផ្សះផ្សាដោយបង្ខំ ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) ។

កងទ័ពថៃបានបន្តភូតកុហកបោកប្រាស់ពលរដ្ឋខ្លួនឯង និងអន្តរជាតិ ដោយរៀបចំឆាករកឃើញគ្រាប់មីនថ្មី ចំនួន១គ្រាប់ នៅតំបន់មុំបី កាលពីវេលាម៉ោង១២ថ្ងៃត្រង់ ថ្ងៃទី២ ខែមិថុនា ហើយថា នឹងប្តឹងកម្ពុជាទៅកាន់ក្រុមអ្នកសង្កេតការណ៍អាស៊ាន (AOT) ។ ការយកបញ្ហាគ្រាប់មីនមកចោទប្រកាន់ម្តងហើយម្តងទៀត នឹងពុំធ្វើឱ្យអន្តរជាតិជឿឡើយ ពីព្រោះវាជាល្បិចដដែលៗពេក ហើយប្រទេសណាក៏ដឹងដែរថា គ្រាន់តែជាការរៀបចំឆាកមួលបង្កាច់ប្រទេសជិតខាងប៉ុណ្ណោះ មុនពេលកងទ័ពថៃបើកការឈ្លានពានកាលពីឆ្នាំ២០២៥ ។

តាមការចុះផ្សាយរបស់សារព័ត៌មាន Khaosod បន្ទាប់ពីកងទ័ពថៃចោទប្រកាន់កម្ពុជារួចហើយ មន្ត្រីពាក់ព័ន្ធនឹងធ្វើការតវ៉ាពីរឿងមីនទៅកាន់ថ្នាក់តំបន់ ព្រមទាំងប្តឹងទៅក្រុមអ្នកសង្កេតការណ៍អាស៊ាន (AOT) ដើម្បីចាត់វិធានការ ។

កន្លងមក ក្រសួងការពារជាតិ និងអាជ្ញាធរមីនកម្ពុជា បានប្រកាសបដិសេធយ៉ាងដាច់អហង្ការរួចមកហើយ ដោយសារការចោទប្រកាន់នេះ គឺជាការប្រឌិតគ្មានភស្តុតាងច្បាស់លាស់ ។ កម្ពុជាក្នុងនាមជារដ្ឋភាគីនៃអនុសញ្ញាអូតាវ៉ា មិនដែលផលិត ឬដាក់ពង្រាយមីនថ្មីទេ ហើយកម្ពុជាធ្លាប់អំពាវនាវឱ្យមានការស៊ើបអង្កេតរួមគ្នាប្រកបដោយតម្លាភាព ជាជាងចោទប្រកាន់ធ្វើឱ្យបាត់បង់ទំនុកចិត្តរវាងប្រទេសទាំងពីរ ។

គួរបញ្ជាក់ថា កាលពីថ្ងៃទី១ ខែមិថុនា កន្លងមក កងទ័ពថៃប្រមាណពី៤០ ទៅ៥០នាក់ បានចូលមករាយរបងបន្លាលួសប្រវែងប្រហែល១៥០ម៉ែត្រនៅភាគនិរតីនៃចំណុចយុទ្ធសាស្ត្រ ជិតច្រកឆងបុក ស្រុកណាមយឿន ខេត្តឧប៊ុនរ៉ាជថានី (តំបន់មុំបី ស្រុកជាំក្សាន្ត ខេត្តព្រះវិហារ) ។ កម្ពុជាបានផ្ញើលិខិតផ្លូវការទៅកាន់ RBC ថៃ ដើម្បីតវ៉ាដាច់អហង្ការចំពោះសកម្មភាពនេះ ដោយចាត់ទុកជាការរំលោភលើកិច្ចព្រមព្រៀង និងអធិបតេយ្យភាពរបស់កម្ពុជាក្នុងតំបន់មិនទាន់មានខណ្ឌសីម៉ាព្រំដែនច្បាស់លាស់ ៕

ម៉ានីល៖ វិបត្តិថាមពលសកលដែលធ្វើឱ្យតម្លៃប្រេងឥន្ធនៈហក់ឡើងខ្ពស់មិនឈប់ឈរ បានក្លាយជាកាតាលីករដ៏សំខាន់ ជំរុញឱ្យពលរដ្ឋហ្វីលីពីនសម្រេចចិត្តផ្លាស់ប្តូរមកប្រើប្រាស់រថយន្តអគ្គិសនី (EV) យ៉ាងគំហុក។ នៅក្នុងត្រីមាសទី១ ឆ្នាំ២០២៦ នេះ ចំនួនការលក់រថយន្តអគ្គិសនីបានកើនឡើងរហូតដល់ ៣៦% បើធៀបនឹងរយៈពេលដូចគ្នាកាលពីឆ្នាំមុន ដើម្បីកាត់បន្ថយចំណាយប្រចាំថ្ងៃ និងរួមចំណែកការពារបរិស្ថាន។

យោងតាមទិន្នន័យពីឧស្សាហកម្មរថយន្ត និងក្រសួងថាមពលហ្វីលីពីន បានឱ្យដឹងថា រថយន្តអគ្គិសនីប្រមាណ ១៤,០០០ គ្រឿង ត្រូវបានលក់ដាច់នៅក្នុងរយៈពេល៣ខែដំបូងនៃឆ្នាំនេះ។ តួលេខដ៏ខ្ពស់នេះ មានទំហំស្ទើរតែស្មើនឹងពាក់កណ្តាលនៃការលក់សរុបពេញមួយឆ្នាំកាលពីឆ្នាំ២០២៥ (ដែលមានចំនួន៣២,០០០ គ្រឿង)។ កំណើនតម្រូវការយ៉ាងគំហុកភ្លាមៗនេះ ថែមទាំងបានធ្វើឱ្យក្រុមហ៊ុនចែកចាយជាច្រើនប្រឈមនឹងបញ្ហាខ្វះខាតរថយន្តនៅក្នុងស្តុកសម្រាប់ផ្គត់ផ្គង់ទីផ្សារទៀតផង។

ពលរដ្ឋហ្វីលីពីនដែលបានប្តូរមកប្រើប្រាស់រថយន្តអគ្គិសនីបានចែករំលែកថា វិធានការនេះបានជួយសម្រាលបន្ទុកហិរញ្ញវត្ថុយ៉ាងច្រើន។ កាលពីមុន ពួកគេត្រូវចំណាយលើប្រេងឥន្ធនៈរហូតដល់ ៨,០០០ ប៉េសូ (ប្រមាណ ១៣០ដុល្លារអាមេរិក) ក្នុងមួយខែ ប៉ុន្តែបច្ចុប្បន្ន ការចំណាយលើថាមពលអគ្គិសនីសម្រាប់ការសាកថ្មមានតម្លៃទាបជាងឆ្ងាយ។ លើសពីនេះ ការសាកថ្មពេញមួយលើក គឺអាចឱ្យពួកគេបើកបរបានពេញមួយថ្ងៃ ដោយនៅសល់ថាមពលថ្មពី ៤០% ទៅ ៥០% ពេលត្រឡប់មកដល់ផ្ទះវិញ។

ទោះបីជាវាផ្តល់អត្ថប្រយោជន៍ច្រើនយ៉ាងណាក្តី វិស័យរថយន្តអគ្គិសនីនៅហ្វីលីពីននៅតែជួបឧបសគ្គប្រឈមមួយចំនួន ដូចជា តម្លៃរថយន្តម៉ូដែលខ្លះនៅតែខ្ពស់ និងការខ្វះខាតហេដ្ឋារចនាសម្ព័ន្ធសាកថ្ម។ បច្ចុប្បន្ននេះ ស្ថានីយសាកថ្មសាធារណៈដែលបើកដំណើរការ មានត្រឹមតែប្រមាណ ៩០០កន្លែងប៉ុណ្ណោះនៅទូទាំងប្រទេស ហើយការសាកម្តងៗត្រូវចំណាយពេលយូរ។ ដើម្បីដោះស្រាយបញ្ហានេះ រដ្ឋាភិបាលហ្វីលីពីនបានបង្កើនគោលដៅពង្រីកស្ថានីយសាកថ្មឱ្យបានជាង ៧,០០០កន្លែង ត្រឹមឆ្នាំ២០២៨។

គួររំលឹកផងដែរថា រដ្ឋាភិបាលហ្វីលីពីនបានដាក់ចេញនូវគោលដៅមហិច្ឆតា ដោយជំរុញការប្រើប្រាស់រថយន្តអគ្គិសនីឱ្យបាន ៥០% នៃការប្រើប្រាស់សរុបត្រឹមឆ្នាំ២០៤០ តាមរយៈការផ្តល់ការលើកទឹកចិត្តជាច្រើន ដូចជា ការផ្តល់ប្រាក់កម្ចីអនុគ្រោះ និងការបន្ធូរបន្ថយពន្ធដារ។ ទោះជាយ៉ាងណាក៏ដោយ អ្នកជំនាញបានព្រមានថា ប្រសិនបើរដ្ឋាភិបាល និងវិស័យឯកជនមិនពន្លឿនការសាងសង់ស្ថានីយសាកថ្ម បង្កើនប្រសិទ្ធភាពនៃការសាក និងដោះស្រាយបញ្ហាខ្សែសង្វាក់ផ្គត់ផ្គង់រថយន្តទេនោះ ដំណើរការអន្តរកាលនេះអាចនឹងជួបភាពរអាក់រអួល។

ទោះជាយ៉ាងណា ចំណុចគួរឱ្យកត់សម្គាល់នាពេលបច្ចុប្បន្ន គឺ ទីផ្សារហ្វីលីពីនលែងជាទីផ្សារផ្តាច់មុខសម្រាប់តែរថយន្តអគ្គិសនីប្រណីតតម្លៃថ្លៃទៀតហើយ។ ការហូរចូលយ៉ាងគំហុកនៃរថយន្តអគ្គិសនីខ្នាតតូច និងមានតម្លៃសមរម្យពីប្រទេសចិន បាននិងកំពុងបើកឱកាសឱ្យក្រុមគ្រួសារដែលមានចំណូលមធ្យម អាចមានលទ្ធភាពទិញយកទៅប្រើប្រាស់កាន់តែច្រើន ដែលជាកត្តារួមចំណែកយ៉ាងធំធេងដល់ការផ្លាស់ប្តូរមុខមាត់ថ្មីនៃប្រព័ន្ធដឹកជញ្ជូននៅក្នុងប្រទេស៕