ប្រទេសវៀតណាម ៖ វៀតណាមបានបង្ហាញគម្រោងសាងសង់ស្ពានឆ្លងសមុទ្រប្រវែង១៨គីឡូម៉ែត្រ និងជាស្ពានវែងលំដាប់ទី៣ ក្នុងតំបន់អាស៊ាន បន្ទាប់ពីស្ពាននៅព្រុយណេ ប្រវែង៣០គីឡូម៉ែត្រ និងស្ពាននៅម៉ាឡេស៊ី ប្រវែង២៤គីឡូម៉ែត្រ ដើម្បីតភ្ជាប់ខេត្ត Ca Mau ជាមួយកោះ Hon Khoai ដែលជាទីតាំងរបស់កងទ័ពវៀតណាមនៅភាគខាងត្បូងប្រទេស ។ នេះបើតាមការផ្សព្វផ្សាយរបស់សារព័ត៌មានបរទេស កាលពីថ្ងៃទី៨ ខែកញ្ញា ឆ្នាំ២០២៥ ។

គម្រោងសាងសង់ស្ពានឆ្លងសមុទ្រនឹងធ្វើឡើងតាមលក្ខណៈស្តង់ដារស្ពានសមុទ្រអន្តរជាតិដែលមានផ្លូវ៤គន្លង ហើយរថយន្តអាចបើកបរលើស្ពាននេះក្នុងល្បឿន៨០គីឡូម៉ែត្រក្នុង១ម៉ោង ។ វៀតណាមរំពឹងថា ការចំណាយថវិកាសាងសង់ស្ពាន គឺស្មើប្រមាណ១ពាន់លានដុល្លារ ដោយស្ពាននឹងត្រូវសាងសង់បន្តពីផ្លូវល្បឿនលឿន Ca Mau-Dat Mui និងឆ្លងសមុទ្រទៅកាន់កោះ Hon Khoai ខណៈការសាងសង់នឹងរួចរាល់នៅឆ្នាំ២០២៨ ។

កងទ័ពវៀតណាមស្ថិតនៅក្រោមក្រសួងការពារជាតិនឹងទទួលខុសត្រូវការសាងសង់ស្ពាន ដែលវានឹងក្លាយជាស្ពានឆ្លងសមុទ្រវែងបំផុត និងទំនើបបំផុតរបស់វៀតណាម ។ ស្ពានថ្មីនេះនឹងជំនួសស្ពាន Tan Vu-Lach Huyen នៅទីក្រុងហៃហ្វង និងស្ពាន Thi Nai នៅទីក្រុងកាវីយីន ។

ក្រៅពីនេះ ស្ពានឆ្លងសមុទ្រជាស្ពានវែងលំដាប់ទី៣ ក្នុងតំបន់អាស៊ាន បន្ទាប់ពីស្ពាន Sultan Haji Omar Ali Saifuddien នៅប្រទេសព្រុយណេ ប្រវែង៣០គីឡូម៉ែត្រ និងស្ពាន Sultan Abdul Halim Muadzam Shah នៅម៉ាឡេស៊ី ប្រវែង២៤គីឡូម៉ែត្រ ។

លោក Pham Thanh Ngai ប្រធានគណៈកម្មការប្រជាជនខេត្ត Ca Mau ឱ្យដឹងថា Ca Mau គឺជាខេត្តតែមួយគត់ដែលមានតំបន់ជាប់សមុទ្ររហូតដល់៣ជ្រុង ជាពិសេស កោះ Hon Khoai គឺជាផ្លូវដឹកជញ្ជូនអន្តរជាតិដ៏សំខាន់ ។ ទីតាំងយុទ្ធសាស្ត្ររបស់ខេត្តនេះ គឺស្ថិតនៅផ្លូវដឹកជញ្ជូនតាមកប៉ាល់ក្នុងតំបន់អាស៊ាន ទើបស័ក្តិសមសម្រាប់សាងសង់កំពង់ផែទឹកជ្រៅ និងជាផ្លូវថ្មីទៅកាន់ភាគខាងត្បូងប្រទេសវៀតណាម ។

ក្រៅពីការសាងសង់ស្ពានឆ្លងសមុទ្រ វៀតណាមក៏មានគម្រោងសាងសង់កំពង់ផែទឹកជ្រៅទំហំធំនៅលើកោះ និងផ្លូវល្បឿនលឿន Ca Mau-Dat Mui ប្រវែង៨០គីឡូម៉ែត្រផងដែរ សម្រាប់តភ្ជាប់ពីភាគខាងជើងទៅភាគខាងត្បូងប្រទេស ។ វាមិនត្រឹមតែជំរុញកំណើនសេដ្ឋកិច្ចតាមរយៈពាណិជ្ជកម្ម និងវិស័យទេសចរណ៍ប៉ុណ្ណោះទេ ប៉ុន្តែនឹងពង្រឹងដល់ការការពារប្រទេស និងសន្តិសុខក្នុងតំបន់របស់វៀតណាមដោយសារនៅជាប់ផ្លូវដឹកជញ្ជូនអន្តរជាតិ ៕

ប្រទេសថៃ ៖ កាលពីថ្ងៃទី៨ ខែកញ្ញា ឆ្នាំ២០២៥ សារព័ត៌មានថៃ Khaosod រាយការណ៍ថា រយៈពេលជាង៤០ថ្ងៃហើយដែលកងទ័ពថៃបានចា.ប់ខ្លួនកងទ័ពខ្មែរដោយខុសច្បាប់ចំនួន១៨នាក់ ថៃនឹងដោះលែងកងទ័ពខ្មែរត្រឡប់មកប្រទេសវិញពេលប្រទេសទាំងពីរបញ្ចប់ជម្លោះទាំងស្រុង ។ មូលហេតុពុំទាន់ដោះលែងកងទ័ពខ្មែរ គឺថៃចោទប្រកាន់ខ្មែរបំពានបទឈប់បា.ញ់ ហើយថាខ្លួនថែទាំកងទ័ពខ្មែរតាមអនុសញ្ញាទីក្រុងហ្សឺណែវ ។
ក្រោយក្រសួងការពារជាតិកម្ពុជាប្រកាសពីរយៈពេលដែលកងទ័ពថៃចាប់ខ្លួនកងទ័ពខ្មែរខុសច្បាប់ លោកឧត្តមសេនីយ៍ វិនឆ័យ ស៊ុវ៉ារី អ្នកនាំពាក្យកងទ័ពជើងគោកថៃចោទប្រកាន់ថា កម្ពុជាបំពានបទឈប់បាញ់ បើទោះជាប្រទេសទាំងពីរបានធ្វើកិច្ចព្រមព្រៀងបទឈប់បាញ់ចាប់ពីដើមថ្ងៃទី២៨ ខែកក្កដា ឆ្នាំ២០២៥ ក្តី ។ លោកថែមទាំងចោទប្រកាន់កងទ័ពខ្មែរប្រើប្រាស់អាវុធវាយប្រហារកងទ័ពថៃជាបន្តបន្ទាប់ ទើបថៃត្រូវការពារអធិបតេយ្យរបស់ខ្លួនពេញមួយយប់ថ្ងៃទី២៨ ខែកក្កដា រហូតដល់ព្រឹកថ្ងៃទី២៩ ខែកក្កដា ។

អ្នកនាំពាក្យកងទ័ពជើងគោកថៃបន្តថា ថៃបានចាប់ខ្លួនកងទ័ពខ្មែរទាំង១៨នាក់ គឺក្នុងពេលកងទ័ពប្រទេសទាំងពីរពុំទាន់ទម្លាក់អាវុធចុះ និងចោទកម្ពុជាពុំគោរពបទឈប់បាញ់ ទើបថៃនៅតែបន្តឃុំខ្លួនកងទ័ពខ្មែរ ។ ថៃនឹងដោះលែងកងទ័ពខ្មែរវិញពេលប្រទេសទាំងពីរបញ្ចប់ជម្លោះទាំងស្រុង ដែលថៃអនុវត្តតាមអនុសញ្ញាទីក្រុងហ្សឺណែវ ខណៈប្រទេសទាំងពីរជារដ្ឋនៃអនុសញ្ញានេះ ។

បច្ចុប្បន្ន កងទ័ពថៃទទួលបានសេចក្តីរាយការណ៍ពីក្នុងតំបន់ និងចោទប្រកាន់កងទ័ពខ្មែរបំពានបទឈប់បាញ់ដោយបង្ហោះដ្រូនក្នុងតំបន់ព្រំដែន និងគាំទ្រឱ្យពលរដ្ឋខ្មែរបង្ហាញអាកប្បកិរិយាមិនសមរម្យជាមួយកងទ័ពថៃ ។ កងទ័ពថៃថែមទាំងចោទប្រកាន់កងទ័ពខ្មែរល្មើសអធិបតេយ្យ រុះរើបន្លាលួស និងបង្កប់មីន PMN-2 ប្រឆាំងមនុស្ស និងចង់ឱ្យថៃខាតបង់ ទើបថៃចាត់ទុកថា ស្ថានការណ៍ជម្លោះដោយអាវុធក្នុងតំបន់ពុំទាន់បញ្ចប់ បើទោះជាស្ថានការណ៍ទូទៅល្អប្រសើរក្តី ។

ចំណែកការថែទាំកងទ័ពខ្មែរទាំង១៨រូបដែលថៃចាប់ខ្លួនខុសច្បាប់ គឺថៃថាខ្លួនអនុវត្តតាមអនុសញ្ញាទីក្រុងហ្សឺណែវ ។ កន្លងមក ថៃអនុញ្ញាតឱ្យគណៈកម្មការកាកបាទក្រហមអន្តរជាតិ (ICRC) មកត្រួតពិនិត្យកន្លែងឃុំខ្លួនកងទ័ពខ្មែរ និងជជែកជាមួយកងទ័ពខ្មែរ ចំនួន២លើក ។ បើភ្នាក់ងារ ឬអង្គការនានាមានបំណងចង់មកពិនិត្យមើលកន្លែងឃុំខ្លួនកងទ័ពខ្មែរ គឺតម្រូវឱ្យស្នើតាមរយៈយន្តការអន្តរជាតិ ឬស្នើសុំកងទ័ពថៃ ។ នេះបើតាមការលើកឡើងរបស់អ្នកនាំពាក្យកងទ័ពជើងគោកថៃ ។

ថៃចោទប្រកាន់កម្ពុជាបំពានបទឈប់បាញ់ ប៉ុន្តែតើថៃខ្លួនឯងអាចគោរពបទឈប់បាញ់ហើយឬនៅ? ពិភពលោកទទួលស្គាល់ថា ថៃបានបំពានបទឈប់បាញ់ជាបន្តបន្ទាប់ និងព្យាយាមញុះញង់ឱ្យកងទ័ពខ្មែរផ្ទុះអាវុធ ដូចជា ៖ កងទ័ពថៃបានចាប់ខ្លួនវីរៈកងទ័ពខ្មែរដោយខុសច្បាប់ក្រោយបទឈប់បាញ់ចូលជាធរមានភ្លាមៗ, បាញ់ជំពាមកៅស៊ូចូលទឹកដីកម្ពុជា, យកបន្លាលួសមកព័ទ្ធយកដីភូមិ ដីផ្លូវ និងចម្ការរបស់ពលរដ្ឋខ្មែរនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ រួមទាំងចល័តទ័ពខុសទីតាំងល្បាត ។

យោងតាមក្រសួងការពារជាតិកម្ពុជាឱ្យដឹងថា កងទ័ពថៃបានចាប់ខ្លួនកងទ័ពខ្មែរដោយខុសច្បាប់ក្រោយពីបទឈប់បាញ់ចូលជាធរមានភ្លាមៗកាលពីព្រឹកថ្ងៃទី២៩ ខែកក្កដា ឆ្នាំ២០២៥ ។ រហូតមកដល់ពេលនេះ គិតត្រឹមថ្ងៃទី៩ ខែកញ្ញា ឆ្នាំ២០២៥ គឺមានរយៈពេល៤២ថ្ងៃហើយ ដែលកងទ័ពខ្មែរត្រូវបានកងទ័ពថៃចាប់ខ្លួនដោយខុសច្បាប់ មិនទាន់ដោះលែង ៕

ប្រទេសថៃ ៖ ទឹកជំនន់បានវាយប្រ.ហារខេត្តនានារបស់ថៃដោយសាររងឥទ្ធិពលខ្យល់ព្យុះមួយហើយមួយទៀត ក្នុងនោះខេត្តរ៉ាក់យ៉ងក៏លិចទឹកដែរ ក្រោយពីភ្លៀងធ្លាក់ខ្លាំងទាំងយប់ទាំងថ្ងៃ និងមានទឹកហូរពីតំបន់ព្រៃភ្នំ រហូតធ្វើឱ្យស្រុកជាច្រើនក្នុងខេត្តជន់លិចកាន់តែខ្លាំង ។ កាលពីល្ងាចថ្ងៃទី៧ ខែកញ្ញា ឆ្នាំ២០២៥ ឃុំកាឆេត ខេត្តរ៉ាក់យ៉ង មានទឹកហូរពីព្រៃភ្នំយ៉ាងច្រើនធ្វើឱ្យកម្ពស់ទឹកឡើងខ្ពស់ ខណៈនៅឃុំម៉ាខាមឃូ មានក្រពើធំ១ក្បាលប្រវែងជាង២ម៉ែត្របង្ហាញខ្លួនតាមផ្លូវបង្កការភ័យខ្លាចដល់ពលរដ្ឋ ។

នៅថ្ងៃទី៨ ខែកញ្ញា រថយន្តតូចៗពុំអាចបើកបរបានទេនៅតាមផ្លូវមួយចំនួនក្នុងឃុំកាឆេត ខណៈនៅផ្សារកាឆេត មានទឹកលិចខ្លាំងធ្វើឱ្យភ្នាក់ងារសង្គ្រោះ និងក្រុមស្ម័គ្រចិត្តជួយគ្នាលើកអីវ៉ាន់ទាំងអស់ចេញពីតូបអាជីវករទៅដាក់នៅទីខ្ពស់ ។ រីឯស្រុកបាយខាយ ទឹកបានលិចភូមិក្នុងឃុំបាងបុត និងផ្លូវ ដែលទឹកមានកម្ពស់ជាង១ម៉ែត្រ ធ្វើឱ្យអ្នកបើកបររថយន្តបង្កើនការប្រុងប្រយ័ត្ន ពីព្រោះអាចកើតគ្រោះថ្នាក់ ។

ចំណែកនៅឃុំម៉ាខាមឃូ ស្រុកនិឃមផាត់តាណា ពលរដ្ឋភ័យខ្លាចគ្រប់គ្នាក្រោយឃើញក្រពើធំ១ក្បាលប្រវែងជាង២ម៉ែត្របង្ហាញខ្លួនតាមផ្លូវពេលយប់ ហើយគ្មានអ្នកណាដឹងថា ក្រពើនេះចេញពីកន្លែងណាទេ ឬក៏វាមកស៊ីចំណីតាមទឹក ។ ប៉ុន្តែដោយសារពេលយប់ ថែមទាំងមានភ្លៀងធ្លាក់ផង ទើបគ្មានភ្នាក់ងារណាមកពិនិត្យមើល ឬចាប់ក្រពើ ហើយអាជ្ញាធរប្រាប់ឱ្យពលរដ្ឋប្រុងប្រយ័ត្នដើម្បីសុវត្ថិភាព ។

នាពេលបន្ទាប់ ភ្នាក់ងារសង្គ្រោះរបស់មូលនិធិនៅស្រុកនិឃមផាត់តាណា ក៏បានជូនដំណឹងទៅកាន់ពលរដ្ឋឱ្យបង្កើនការប្រុងប្រយ័ត្ន និងហាមរកត្រីនៅបរិវេណនេះ ដោយសារមានក្រពើរួចពីទ្រុងហែលចូលក្នុងស្រះ និងបង្ហាញខ្លួនតាមផ្លូវ ។

ដោយឡែក នៅខេត្តអយុធ្យាវិញ ទឹកជំនន់បានលិចសាលារៀនមានកម្ពស់ជិត២ម៉ែត្រ គ្រូបង្រៀនត្រូវអុំទូកទៅទទួលសិស្សចូលថ្នាក់ ។ តាមសេចក្តីរាយការណ៍ គឺស្ថានការណ៍ទឹកជំនន់នៅស្រុកសេណា ខេត្តអយុធ្យា គួរឱ្យបារម្ភ ក្រោយពីទឹកក្នុងទំនប់ចៅប្រាយ៉ាកើនឡើងខ្លាំង ។ ហេតុនេះ ធ្វើឱ្យទឹកលិចសាលារៀនមួយកន្លែងក្នុងឃុំហួវៀង ដែលមានកម្ពស់ទឹកជិត២ម៉ែត្រ ។

អ្នកស្រី ក្រងថង វីឆាកាំ ជាគ្រូបង្រៀននិយាយថា កាលពីថ្ងៃទី៥ ខែកញ្ញា កូនសិស្សបានដើរកាត់ទឹកមករៀន ហើយតាំងពីថ្ងៃនោះមក កម្ពស់ទឹកបានកើនឡើងយ៉ាងឆាប់រហ័ស ទើបគ្រូអុំទូកទៅទទួលសិស្ស ។ បើទឹកនៅតែលិចខ្លាំងបែបនេះ នាយកសាលាអាចបិទសាលារៀនបណ្តោះអាសន្ន និងផ្លាស់ប្តូរពេលវេលាបង្រៀនសិស្ស ៕

ថៃ៖ តុលាការកំពូលថៃ បានចេញសាលក្រមផ្តន្ទាទោសអតីតនាយករដ្ឋមន្ត្រីថៃ លោក Thaksin Shinawatra ដាក់ពន្ធនាគាររយៈពេលមួយឆ្នាំភ្លាមៗ ក្នុងសំណុំរឿងពាក់ព័ន្ធនឹងការបន្លំធ្វើឈឺ ហើយសម្រាកព្យាបាលនៅមន្ទីរពេទ្យជំនួសឱ្យការជាប់ពន្ធនាគារ ក្រោយរូបលោកត្រឡប់ចូលស្រុកវិញកាលពីឆ្នាំ២០២៣។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅលើប្រព័ន្ធផ្សព្វផ្សាយរបស់ថៃនាព្រឹកថ្ងៃអង្គារ ទី៩ ខែកញ្ញា តុលាការកំពូលបានបញ្ជាឱ្យអនុវត្តការកាត់ទោសរយៈពេលមួយឆ្នាំលើអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា ដែលនឹងត្រូវចាប់ផ្តើមអនុវត្តទោសពីថ្ងៃនេះតទៅ ដោយចោ.ទប្រកាន់ពីបទប្រើប្រាស់នីតិវិធីព្យាបាល និងផ្ទេរប្រាក់មិនស្របតាមបទប្បញ្ញត្តិរបស់នាយកដ្ឋានកែតម្រូវ។

គួរជម្រាបថា លោក Thaksin បានធ្វើមាតុភូមិនិវត្តន៍ចូលប្រទេសថៃវិញកាលពីឆ្នាំ២០២៣ ក្រោយរស់នៅនិរទេសខ្លួននៅបរទេសអស់រយៈពេល១៥ឆ្នាំ។ ពេលត្រឡប់មកដល់ថៃ លោកត្រូវបាន តុលាការផ្តន្ទាទោសឱ្យជាប់ពន្ធគារ៨ឆ្នាំពីបទជម្លោះផលប្រយោជន៍ និងរំលោភអំណាច ហើយទោសនេះត្រូវបានព្រះមហាក្សត្របន្ធូរបន្ថយមនៅត្រឹម១ឆ្នាំ។ ប៉ុន្តែលោកបានចូលក្នុង ពន្ធនាគារតែប៉ុន្មានម៉ោងប៉ុណ្ណោះ ដោយលោកត្រូវបានបញ្ជូនទៅមន្ទីរពេទ្យលំដាប់ VIP មួយក្នុងទីក្រុងបាងកកក្រោមហេតុផលមានបញ្ហាសុខភាពធ្ងន់ធ្ងរ។ លោក Thaksin បានដេកសម្រាកព្យាបាលដល់ទៅ៦ខែ មុននឹងត្រូវបានដោះលែងឱ្យនៅក្រៅឃុំ។

បន្ទាប់ពីតុលាការកំពូលបានបញ្ចប់ការសាកសួរសាក្សីទាំងអស់ តុលាការបានកំណត់ពេលបើកសវនាការលើការកាត់ទោសលោក ថាក់ស៊ីន ក្នុងសំណុំរឿងនោះ ហើយតុលាការបានចេញដីកាកោះហៅលោក ម៉ាណុប ជុំជឿ អគ្គនាយកពន្ធនាគារពិសេសបច្ចុប្បន្ន និងលោក ថាក់ស៊ីន ផ្ទាល់។ លោកក៏បានមកដល់ដើម្បីស្តាប់បញ្ជានៅថ្ងៃនេះ (៩ កញ្ញា)។

សេចក្ដីសម្រេចចុងក្រោយនៅថ្ងៃទី 9 ខែកញ្ញានេះ តុលាការកំពូលបានកាត់ទោសលោក ថាក់ស៊ីន ស៊ីណាវ៉ាត្រា ឲ្យជាប់ពន្ធនាគាររយៈពេល ១ឆ្នាំ ចូលជាធរមាននៅថ្ងៃនេះតែម្ដង ដោយសារការព្យាបាល របស់លោក Thaksin ក្នុងមន្ទីរពេទ្យមិនត្រូវបានរាប់បញ្ចូលជាការអនុវត្តទោសជាប់ពន្ធនាគារត្រឹមត្រូវតាមផ្លូវច្បាប់នោះទេ។ ក្នុងសាលក្រមរបស់ខ្លួន តុលាការកំពូលថៃបានសម្រេចដូច្នេះថា «ការបញ្ជូនរូបលោក (លោក Thaksin) ទៅកាន់មន្ទីរពេទ្យមិនត្រឹមត្រូវតាមផ្លូវច្បាប់ ហើយជនជាប់ចោទ បានដឹងយ៉ាងច្បាស់ថាសុខភាពខ្លួនឯងមិនមែនជាបញ្ហាបន្ទាន់នោះទេ ដូច្នេះការសម្រាកព្យាបាលនៅមន្ទីរពេទ្យមិនត្រូវបានរាប់បញ្ចូលជាការអនុវត្តទោសជាប់ពន្ធនាគារឡើយ»៕

កាតាម៉ាន់ឌូ៖ នៅថ្ងៃទី ៩ ខែកញ្ញា ឆ្នាំ ២០២៥ នេះ រដ្ឋាភិបាលនៃប្រទេសនេប៉ាល់បានលុបចោលការហាមឃាត់ប្រព័ន្ធផ្សព្វផ្សាយសង្គមយ៉ាង បន្ទាប់ពីមានការតវ៉ាដ៏ហិង្សាជាច្រើនថ្ងៃបានបណ្តាលឲ្យមនុស្សយ៉ាងហោចណាស់ ១៩ នាក់ស្លាប់ និងជាងមួយរយនាក់ផ្សេងទៀតរងរបួស។ នៅបើតាមប្រភពសារព័ត៌មាន BBC។

បម្រាមដែលបានដាក់នៅថ្ងៃទី ៤ ខែកញ្ញា បានដាក់កម្រិតការចូលប្រើប្រាស់វេទិកាធំៗចំនួន ២៦ រួមមាន Facebook, YouTube, X, Instagram និង WhatsApp ជាដើម។ អាជ្ញាធរបានអះអាងថា វិធានការនេះជាការចាំបាច់ ដើម្បីទប់ស្កាត់គណនីក្លែងក្លាយ ការនិយាយលាបពណ៌ និងព័ត៌មានមិនពិត។ ប៉ុន្តែការសម្រេចចិត្តនេះ បានបញ្ឆេះឲ្យមានបាតុកម្មភ្លាមៗ ដែលដឹកនាំដោយនិស្សិត និងសកម្មជនវ័យក្មេង ដែលភាគច្រើនបានចោទប្រកាន់រដ្ឋាភិបាលថាបានបិទសិទ្ធិសេរីភាពក្នុងការបញ្ចេញមតិ និងបំបិទមាត់អ្នកប្រឆាំង។

ការតវ៉ាបានកើនឡើងយ៉ាងខ្លាំងនៅទូទាំងប្រទេស ជាពិសេសនៅទីក្រុង Kathmandu និងទីក្រុងធំៗផ្សេងទៀត ដោយក្រុមបាតុករព្យាយាមសម្រុកចូលសភា។ កងកម្លាំងសន្តិសុខបានឆ្លើយតបដោយកាណុងបាញ់ទឹក ឧស្ម័នបង្ហូរទឹកភ្នែក គ្រាប់កាំភ្លើងជ័រ និងក្នុងករណីខ្លះមានគ្រាប់រំសេវ។ ការប៉ះទង្គិចគ្នានេះបានធ្វើឱ្យមនុស្ស ១៩ នាក់ស្លាប់ និងរាប់រយនាក់រងរបួស ហើយផ្នែកខ្លះនៃរដ្ឋធានីស្ថិតក្រោមបម្រាមគោចរ។

ចំពេលមានកំហឹងកាន់តែខ្លាំង រដ្ឋមន្ត្រីក្រសួងមហាផ្ទៃ Ramesh Lekhak បានលាលែងពីតំណែងដោយទទួលខុសត្រូវខាងសីលធម៌ចំពោះការបង្ហូរឈា.មនេះ។ នាយករដ្ឋមន្ត្រី K.P. Sharma Oli បានសម្តែងការសោកស្តាយយ៉ាងខ្លាំង ចំពោះអំពើហិង្សានេះ ខណៈពេលដែលបានចោទប្រកាន់ “កងកម្លាំងខាងក្រៅ” ដែលមិនបញ្ចេញឈ្មោះពីការព្យាយាមកេងប្រវ័ញ្ចភាពចលាចលនេះ។

កាលពីថ្ងៃអង្គារ រដ្ឋាភិបាលបានដកការហាមប្រាមរបស់ខ្លួនជាផ្លូវការ ដោយស្ដារការចូលទៅកាន់ប្រព័ន្ធផ្សព្វផ្សាយសង្គមដែលបានបិទទាំងអស់ឡើងវិញ។ មន្ត្រីក៏បានសន្យាផ្តល់សំណងដល់គ្រួសារជនរងគ្រោះ ការថែទាំព្យាបាលដោយឥតគិតថ្លៃសម្រាប់អ្នករបួស និងការបង្កើតក្រុមស៊ើបអង្កេតក្នុងរយៈពេល ១៥ ថ្ងៃ ដើម្បីពិនិត្យមើលមូលហេតុនៃចលាចលនេះ និងស្នើឱ្យមានការការពារដើម្បីការពារសោកនាដកម្មស្រដៀងគ្នានេះ។

ការតវ៉ាដែលត្រូវបានគេដាក់ឈ្មោះយ៉ាងទូលំទូលាយថា “ចលនា Gen Z” បានកត់សម្គាល់ការបះបោរដែលដឹកនាំដោយយុវជនដ៏ធំបំផុតមួយនៅក្នុងប្រវត្តិសាស្ត្រនាពេលថ្មីៗនេះរបស់ប្រទេសនេប៉ាល់ ដោយបង្ហាញពីតួនាទីកណ្តាលនៃវេទិកាឌីជីថលនៅក្នុងជីវិតនយោបាយ និងហានិភ័យដែលរដ្ឋាភិបាលប្រឈមមុខនៅពេលព្យាយាមគ្រប់គ្រងការនិយាយតាមអ៊ីនធឺណិត។
សម្រាប់ប្រជាជននេប៉ាល់ជាច្រើន ការដកបម្រាមនេះនាំមកនូវការធូរស្រាល ប៉ុន្តែកំហឹងចំពោះការបាត់បង់ជីវិតនៅតែបន្តជំរុញឱ្យមានការអំពាវនាវឱ្យមានការទទួលខុសត្រូវ និងកំណែទម្រង់ជាថ្មី៕