រដ្ឋាភិបាលថៃគ្រោងកាត់បន្ថយរយៈពេលស្នាក់នៅដោយគ្មានទិដ្ឋាការ (Visa-Free) សម្រាប់ទេសចរ ចាប់ពី៦០ថ្ងៃ មកត្រឹម៣០ថ្ងៃវិញ ដើម្បីបង្ក្រាបបទល្មើ.សឧក្រិដ្ឋក.ម្ម បន្ទាប់ពីអាជ្ញាធរថៃកត់សម្គាល់ឃើញថា ជ.នបរទេសមួយចំនួនបានប្រើប្រាស់រយៈពេលស្នាក់នៅដ៏វែងនេះ (៦០ថ្ងៃ) ប្រព្រឹត្តអំពើខុសច្បាប់ ដូចជា ៖ បើកអាជីវកម្មគ្មានច្បាប់អនុញ្ញាត, លួ.ចធ្វើការងារ និងបណ្តាញឆបោកតាមអនឡាញ ។ ការកាត់បន្ថយរយៈពេលស្នាក់នៅដោយគ្មានទិដ្ឋាការសម្រាប់ទេសចរ គឺក្នុងគោលបំណងពង្រឹងសន្តិសុខជាតិ និងរក្សាតុល្យភាពរវាងការលើកកម្ពស់ទេសចរណ៍ឱ្យស្របតាមតម្រូវការជាក់ស្តែង ។

តាមការចុះផ្សាយរបស់សារព័ត៌មាន Thairath នៅព្រឹកថ្ងៃទី១២ ខែឧសភា លោក Sihasak Phuangketkeow រដ្ឋមន្ត្រីក្រសួងការបរទេស បាននិយាយពីរដ្ឋាភិបាលថៃគ្រោងកាត់បន្ថយរយៈពេលស្នាក់នៅដោយគ្មានទិដ្ឋាការ (Visa-Free) សម្រាប់ភ្ញៀវទេសចរ ចាប់ពី៦០ថ្ងៃ មកនៅត្រឹម៣០ថ្ងៃវិញ ដើម្បីកាត់បន្ថយឧក្រិដ្ឋកម្មនៅប្រទេសថៃ ប៉ុន្តែពុំទាន់បានកំណត់ជាក់លាក់ថា តើនឹងអនុវត្តចំពោះទេសចរមកពីប្រទេសណាខ្លះទេ គ្រាន់តែជំហ៊ានដំបូង នឹងពិនិត្យមើលអាក្បកិរិយាប៉ះពាល់សន្តិសុខជាតិ ។

នាវេលាម៉ោង៨ និង៣០នាទីព្រឹក ថ្ងៃទី១២ ខែឧសភា នៅវិមានរដ្ឋាភិបាល លោក Sihasak បាននិយាយពីក្រសួងការបរទេសមើលឃើញរយៈពេលស្នាក់នៅដោយគ្មានទិដ្ឋាការ (Visa-Free) សម្រាប់ទេសចរ ចំនួន៦០ថ្ងៃ គឺច្រើនពេក ដែលធ្វើឱ្យជនបរទេសខ្លះចូលមកប្រទេសថៃក្នុងគោលបំណងផ្សេងខុសពីដំណើរកម្សាន្ត ទើបមានការស្នើឱ្យកាត់បន្ថយរយៈពេលស្នាក់នៅមកត្រឹម៣០ថ្ងៃ ដើម្បីបង្កើនការប្រុងប្រយ័ត្ន ។

លោកបន្តថា បច្ចុប្បន្ន ក្រសួងការបរទេសកំពុងជំរុញឱ្យរដ្ឋាភិបាលកាត់បន្ថយរយៈពេលស្នាក់នៅដោយគ្មានទិដ្ឋាការសម្រាប់ទេសចរ ប៉ុន្តែរង់ចាំគណៈរដ្ឋមន្ត្រីសាកសួរទៅស្ថាប័នពាក់ព័ន្ធ ហើយក្រសួងការបរទេសសង្ឃឹមថា ស្ថាប័នពាក់ព័ន្ធនឹងមិនជំទាស់ ។ ទោះយ៉ាងណា នៅពុំទាន់កំណត់ជាក់លាក់ តើនឹងអនុវត្តចំពោះទេសចរមកពីប្រទេសណាខ្លះទេ ប៉ុន្តែនឹងត្រួតពិនិត្យមើលទេសចរដែលចូលមកប្រទេសថៃ តើធ្វើសកម្មភាពត្រឹមត្រូវតាមទិដ្ឋាការដែលស្នើសុំដែរឬទេ ឬក៏មកប្រព្រឹត្តឧក្រិដ្ឋកម្ម ។

យោងតាមក្រសួងទេសចរណ៍ថៃ គឺភ្ញៀវទេសចរបរទេសភាគច្រើន (ប្រមាណ៩០%) ស្នាក់នៅប្រទេសថៃជាមធ្យមត្រឹមតែពី៩ ទៅ២១ថ្ងៃប៉ុណ្ណោះ ។ ដូច្នេះ រយៈពេល៣០ថ្ងៃ គឺគ្រប់គ្រាន់ហើយសម្រាប់ទេសចរទូទៅ ហើយគណៈរដ្ឋមន្ត្រីថៃបានបង្កើតក្រុមការងារមួយនៅថ្ងៃទី១២ ខែឧសភានេះ ដើម្បីពិនិត្យឡើងវិញលើគ្រប់ប្រភេទទិដ្ឋាការ ។

គួរបញ្ជាក់ថា បើទោះមានការកាត់បន្ថយរយៈពេលស្នាក់នៅដោយគ្មានទិដ្ឋាការ ប៉ុន្តែភ្ញៀវទេសចរនៅតែអាចដាក់ពាក្យស្នើសុំពន្យារពេលស្នាក់នៅ (Extension) ចំនួន៣០ថ្ងៃបន្ថែមទៀតបាននៅការិយាល័យអន្តោប្រវេសន៍ ប្រសិនបើមានបំណងស្នាក់នៅយូរជាងនេះ ៕

យោងតាមការប្រកាសជាផ្លូវការរបស់ក្រសួងការងារថៃនាថ្ងៃទី១២ ខែឧសភា ឆ្នាំ២០២៦ កូរ៉េខាងត្បូងបានសម្រេចផ្អាកការនាំចូលកម្លាំងពលកម្ម និងដាក់ក្នុងបញ្ជីខ្មៅ (Blacklist) ចំពោះពលករថៃមកពី៤ខេត្ត រួមមាន ៖ ខេត្តឧត្តរថានី, ខនកែន, ជ័យភូមិ និងមហាសារ៉ាខាម ដែលធ្វើការផ្នែកកសិកម្ម និងនេសាទតាមរដូវ រយៈពេល១ឆ្នាំពេញ (ចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០២៦) ដោយសារពលករថៃមួយចំនួនធំដែលធ្វើការក្រោមទិដ្ឋាការ E-8 (Visa E-8) លួ.ចរត់ចេញពីកន្លែងការងារ និងបោះបង់ចោលកិច្ចសន្យាការងារជាមួយនិយោជកកូរ៉េខាងត្បូង ។

ពលករថៃដែលបានលួចរត់ នឹងត្រូវដាក់ក្នុងបញ្ជីខ្មៅ (Blacklist) មិនឱ្យចូលប្រទេសកូរ៉េខាងត្បូងជាថ្មីឡើយ រីឯអ្នកមានបំណងចង់ទៅធ្វើការពីខេត្តទាំង៤នេះ ក៏មិនអាចដាក់ពាក្យស្នើសុំទិដ្ឋាការ E-8 បានដែរក្នុងអំឡុងពេលហាមឃាត់ ។ ទោះយ៉ាងណា កូរ៉េខាងត្បូងនៅតែបន្តទទួលពលករបរទេសមកពីបណ្តាប្រទេសផ្សេងទៀត និងខេត្តផ្សេងនៃប្រទេសថៃដែលមិនរងការហាមឃាត់ ។

តាមការចុះផ្សាយរបស់សារព័ត៌មានថៃ Amarin News និង MGR Online នៅថ្ងៃទី១២ ខែឧសភា កូរ៉េខាងត្បូងបានដាក់ពលករថៃមកពី៤ខេត្ត ក្នុងបញ្ជីខ្មៅរយៈពេល១ឆ្នាំពេញ (ឆ្នាំ២០២៦) ដោយសារពលករថៃធ្វើការនៅកូរ៉េខាងត្បូងក្រោមទិដ្ឋាការ E-8 រត់ចូលការងារជាច្រើននាក់ ហើយការដាក់ក្នុងបញ្ជីខ្មៅប៉ះពាល់យ៉ាងខ្លាំងដល់ពលករថៃទាំងអស់ និងបាត់បង់ទំនុកចិត្តពីកូរ៉េខាងត្បូង ។

ក្រោយផ្ទុះការចាប់អារម្មណ៍ខ្លាំងពីកូរ៉េខាងត្បូងដាក់ពលករថៃក្នុងបញ្ជីខ្មៅ តើជាព័ត៌មានក្លែងក្លាយ ឬពិត? នាថ្ងៃទី១២ ខែឧសភា មជ្ឈមណ្ឌលប្រឆាំងព័ត៌មានក្លែងក្លាយនៅប្រទេសថៃ (Anti-Fake News Center Thailand) បញ្ជាក់ថា នេះជាព័ត៌មានពិតប្រាកដ ដោយមជ្ឈមណ្ឌលនេះថា បើតាមនាយកដ្ឋានការងារនៃក្រសួងការងារថៃ គឺកូរ៉េខាងត្បូងបានដាក់ពលករថៃមកពី៤ខេត្តក្នុងបញ្ជីខ្មៅហាមធ្វើការរយៈពេល១ឆ្នាំពេញ សម្រាប់ពលករកាន់ទិដ្ឋាការ E-8 ធ្វើការផ្នែកកសិកម្ម និងនេសាទតាមរដូវកាល ដោយសារពួកគេរត់ចោលថៅកែ ។

មន្ត្រីនាយកដ្ឋានការងារនៃក្រសួងការងារថៃបានដាស់តឿនថា ការរត់ចោលថៅកែ គឺជាការបំពានកិច្ចសន្យាការងារ និងខុសច្បាប់កូរ៉េខាងត្បូង ហើយពលករថៃដែលប្រព្រឹត្តខុសនឹងត្រូវកូរ៉េខាងត្បូងចាប់ខ្លួនដាក់ពន្ធនាគារ ឬបញ្ជូនត្រឡប់មកប្រទេសវិញ ។ សកម្មភាពខុសច្បាប់ទាំងនេះធ្វើឱ្យប៉ះពាល់ដល់កិត្តិយសប្រទេសថៃ និងកូរ៉េខាងត្បូងបាត់បង់ទំនុកចិត្តលើពលករថៃទាំងអស់ ។

ជាលទ្ធផល ពលករថៃនៅទូទាំងប្រទេសនឹងបាត់បង់ឱកាសទៅធ្វើការនៅកូរ៉េខាងត្បូង មិនមែនប៉ះពាល់តែពលករមកពីខេត្តទាំង៤ ទេ ។ នាយកដ្ឋានការងារនៃក្រសួងការងារថៃបានសំណូមពរទៅកាន់ពលកររបស់ខ្លួន ចៀសវាងរត់ចោលថៅកែ និងអនុវត្តតាមលក្ខខណ្ឌការងាររបស់កូរ៉េខាងត្បូង ៕

ប៉េកាំង៖ យោងតាមការបញ្ជាក់ពីក្រសួងការបរទេសចិន ប្រធានាធិបតីអាមេរិក លោក Donald Trump នឹងបំពេញទស្សនកិច្ចផ្លូវរដ្ឋនៅប្រទេសចិនរយៈពេល ៣ថ្ងៃ ចាប់ពីថ្ងៃទី ១៣ ដល់ថ្ងៃទី ១៥ ខែឧសភា ឆ្នាំ២០២៦ ខាងមុខនេះ ។ ទស្សនកិច្ចនេះធ្វើឡើងតបតាមការអញ្ជើញរបស់ប្រធានាធិបតីចិន លោក Xi Jinping ដើម្បីជួបពិភាក្សាលើប្រធានបទសំខាន់ៗដែលកំពុងមានភាពតានតឹងនាពេលបច្ចុប្បន្ន ។

រដ្ឋាភិបាលចិនបានប្រកាសកាលពីថ្ងៃទី ១១ ខែឧសភា ថា នៅក្នុងជំនួបកំពូលនេះ មេដឹកនាំនៃប្រទេសមហាអំណាចទាំងពីរនឹងពិភាក្សាលើរបៀបវារៈសំខាន់ៗ រួមមាន ៖ ជម្លោះពាណិជ្ជកម្ម, ស្ថានភាពសង្គ្រាមនៅអ៊ីរ៉ង់, បញ្ហាតៃវ៉ាន់, កិច្ចព្រមព្រៀងរ៉ែកម្រ, បច្ចេកវិទ្យាបញ្ញាសិប្បនិម្មិត (AI) និងការគ្រប់គ្រងអាវុធនុយក្លេអ៊ែរ ។ គួររំលឹកថា តាមគម្រោងដើម លោក Trump គ្រោងនឹងទៅទស្សនកិច្ចនៅចិនតាំងពីចុងខែមីនា ឬដើមខែមេសាម្ល៉េះ ប៉ុន្តែត្រូវបានពន្យារពេលវិញដោយសារបញ្ហាសង្គ្រាមនៅអ៊ីរ៉ង់ ។

អ្នកនាំពាក្យក្រសួងការបរទេសចិនបានឱ្យដឹងថា លោកប្រធានាធិបតី Trump នឹងធ្វើដំណើរទៅដល់ទីក្រុងប៉េកាំងនៅថ្ងៃទី ១៣ ខែឧសភា ហើយកម្មវិធីជួបពិភាក្សាផ្លូវការជាមួយលោក Xi Jinping នឹងប្រព្រឹត្តទៅនៅថ្ងៃទី ១៤ និង ១៥ ខែឧសភា ។ នេះគឺជាការវិលត្រឡប់មកបំពេញទស្សនកិច្ចនៅប្រទេសចិនជាថ្មីម្តងទៀតរបស់លោក Trump បន្ទាប់ពីទស្សនកិច្ចចុងក្រោយកាលពីឆ្នាំ ២០១៧ ។
តាមរយៈជំនួបនេះ ភាគីទាំងពីររំពឹងថា នឹងឈានដល់ការព្រមព្រៀងគ្នាលើការផ្តល់ភាពងាយស្រួលដល់ពាណិជ្ជកម្ម និងការវិនិយោគទ្វេភាគី ​ ក្នុងនោះដែរ ចិនអាចនឹងប្រកាសពីការបញ្ជាទិញយន្តហោះ Boeing, ផលិតផលកសិកម្ម និងថាមពលពីសហរដ្ឋអាមេរិក ។

បន្ថែមពីនេះ ភាគីទាំងពីរអាចនឹងប្រកាសបង្កើតគណៈកម្មការពាណិជ្ជកម្ម និងវិនិយោគរួមគ្នាជាផ្លូវការ ព្រមទាំងពិភាក្សាអំពីការកំណត់ពេលវេលាផ្អាកជម្លោះពាណិជ្ជកម្ម ដើម្បីបើកផ្លូវឱ្យអាមេរិកអាចនាំចូលរ៉ែកម្រពីចិនបន្តទៀត ។

សូមបញ្ជាក់ថា នេះគឺជាការជួបពិភាក្សាគ្នាដោយផ្ទាល់ជាលើកដំបូងរវាងមេដឹកនាំនៃប្រទេសមហាអំណាចសេដ្ឋកិច្ចទាំងពីរ បន្ទាប់ពីកិច្ចប្រជុំកំពូល APEC កាលពីខែតុលា ឆ្នាំ២០២៥ កន្លងទៅ ៕

រដ្ឋាភិបាលយោធាមីយ៉ាន់ម៉ាបានរិះគន់សមាគមន៍អាស៊ានដោយបើកចំហថាមានការរើសអើង និងចោទប្រកាន់សមាជិកទាំងអស់របស់អាស៊ានថាបក្ខពួកនិយម បន្ទាប់ពីមេដឹកនាំរបស់ខ្លួនត្រូវបានអាស៊ានហាមប្រាមមិនឲ្យចូលរួមពីកិច្ចប្រជុំកម្រិតខ្ពស់ក្នុងអំឡុងពេលកិច្ចប្រជុំកំពូលអាស៊ាននៅទីក្រុងសេប៊ូ បើទោះមីយ៉ាន់ម៉ាមានការបោះឆ្នោត និងជ្រើសរើសរដ្ឋាភិបាលស៊ីវិលថ្មីហើយក៏ដោយ។

យោងសេចក្ដីរាយការណ៍របស់ទីភ្នាក់ងារសារព័ត៌មាន AFP នៅថ្ងៃចន្ទ ទី១១ ខែឧសភា ឆ្នាំ២០២៦ បានឲ្យដឹងថា មីយ៉ាន់ម៉ាបានអះអាងពីការទទួលរងនូវចំណាត់ការរើសអើងពីសំណាក់ប្លុកអាស៊ាន បន្ទាប់ពីកិច្ចប្រជុំកំពូលកាលពីសប្តាហ៍មុនបានបង្ហាញឲ្យឃើញថា អាស៊ាននៅបន្តរក្សាទុកប្រទេសមីយ៉ាន់ម៉ាក្នុងបញ្ជីខ្មៅដដែល ទោះការដឹកនាំនៃរបបយោធាត្រូវបានកន្លងផុតក៏ដោយ។

សូមជម្រាបថា អាស៊ានបានដាក់បម្រាមមិនឱ្យមីយ៉ាន់ម៉ាចូលរួមកិច្ចប្រជុំកំពូល ចាប់តាំងតែពីយោធាបានធ្វើរដ្ឋប្រហារកាលពីឆ្នាំ២០២១ ផ្តួលរំលំរដ្ឋាភិបាលស៉ីវិលជាប់ឆ្នោតស្របច្បាប់ របស់លោកស្រី អោងសាន ស៊ូជី ហើយចាប់ឃុំខ្លួនលោកស្រី និងបង្កឱ្យផ្ទុះជាសង្រ្គាមស៉ីវិល មកទល់សព្វថ្ងៃ។
ក្រោយអនុវត្តច្បាប់អាជ្ញាសឹកអស់រយៈពេល៥ឆ្នាំ របបសឹកបានរៀបចំការបោះឆ្នោតសកល ដែលត្រូវបានរឹតត្បិតជាខ្លាំង ហើយជាលទ្ធផលគណបក្សគាំទ្រដោយយោធា ទទួលបានជ័យជម្នះយ៉ាងភ្លូកទឹកភ្លូកដីកាលពីដើមឆ្នាំនេះ និងកាលពីខែមុន អតីតប្រមុខរដ្ឋាភិបាលយោធា លោក Min Aung Hlaing បានឡើងកាន់តំណែងជាប្រធានាធិបតីស៉ីវិល។

នៅឯកិច្ចប្រជុំរវាងមេដឹកនាំអាស៊ានក្នុងប្រទេសហ្វីលីពីន កាលពីសប្តាហ៍កន្លងទៅនេះ ប្រធានាធិបតីហ្វីលីពីន លោក Ferdinand Marcos បានលើកឡើងថា វាហាក់ដូចជាគ្នាវឌ្ឍនភាពអ្វីទាល់តែសោះនៅមីយ៉ាន់ម៉ា។ ជាការឆ្លើយតប ក្រសួងការបរទេសមីយ៉ាន់ម៉ា នាពេលនេះ បានចេញសេចក្តីថ្លែងការណ៍ថា វាមិនដូច្នោះទេ ផ្ទុយទៅវិញការវិវត្តវិជ្ជមានបាននិងកំពុងកើតមានឡើងនៅមីយ៉ាន់ម៉ា ហើយត្រូវបានទទួលស្គាល់ដោយរដ្ឋជាសមាជិកអាស៊ានភាគច្រើន។

យ៉ាងណាមិញ មីយ៉ាន់ម៉ាបានបន្ថែមថា «ទោះបែបនេះក្តី មានការសង្កេតឃើញថា រដ្ឋជាសមាជិកមួយចំនួនតូច បន្តរក្សាការរឹតត្បិត ចំណាត់ការរើសអើង និងការហាមរដ្ឋាភិបាលមីយ៉ាន់ម៉ា ចេញពីការចូលរួមតំណាងដោយស្មើភាព»។ ក្នុងកិច្ចប្រជុំនៅហ្វីលីពីន រដ្ឋមន្រ្តីការបរទេសម៉ាឡេស៉ី លោក Mohamad Hasan បាននិយាយថា មីយ៉ាន់ម៉ាមិនទាន់ត្រៀមខ្លួនរួចរាល់ ដើម្បីអាចត្រឡប់មកអង្គុយនៅតុប្រជុំវិញទេ ដោយសារតែការប្រព្រឹត្តអំពើឃោរឃៅ ចំពោះពលរដ្ឋខ្លួនឯង នៅតែកំពុងបន្តកើតមាន។ ប្រទេសដូចជាឥណ្ឌូណេស៉ី ព្រមទាំងសិង្ហបុរី ដែលនឹងក្លាយជាប្រធានប្តូរវេនរបស់អាស៊ាននៅឆ្នាំក្រោយ ត្រូវបានជឿថា ប្រកាន់ជំហរដូចម៉ាឡេស៉ី។

ក្រសួងការបរទេសមីយ៉ាន់ម៉ា បានលើកឡើងដូច្នេះថា «ការធ្វើប្រាស្រ័យទាក់ទងមិនមានលក្ខណៈស្ថាបនា ជាមួយរដ្ឋាភិបាលថ្មីរបស់មីយ៉ាន់ម៉ា នឹងជាការពង្រើយកន្តើយចំពោះឆន្ទៈស្មោះត្រង់របស់ប្រជាជនមីយ៉ាន់ម៉ា ដែលបានអនុវត្តសិទ្ធិប្រជាធិបតេយ្យរបស់ពួកគេ។ រយៈពេល៥ឆ្នាំមកនេះ ទោះប្រឈមទង្វើមិនស្មើភាពចេញមកពីគោលជំហររបស់រដ្ឋសមាជិកអាស៊ានមួយចំនួនក៏ដោយ មីយ៉ាន់ម៉ាបានព្យាយាមអត់ធ្មត់។ គួរបញ្ជាក់ថា ដោយមិនបានលើកឡើងឈ្មោះប្រទេសណាមួយចំៗ មីយ៉ាន់ម៉ាក៏បានចោទប្រកាន់ប្រទេសមួយចំនួន អំពីទង្វើលូកលាន់កិច្ចការផ្ទៃក្នុងរបស់ខ្លួន តាមរយៈការរិះគន់និងការដាក់សម្ពាធផងដែរ៕

អ្នកវិទ្យាសាស្រ្តបានព្រ.មានថា ជីវិតរបស់សត្វត្រីបាឡែនដែលរស់នៅក្នុងសមុទ្រអាហ្វ្រិកខាងត្បូងកំពុងប្រឈមនឹងការគំរា.មកំ.ហែង ហើយអាចឈានដល់ការផុតពូជឆាប់រហ័សជាងការរំពឹងទុក ដោយសារសង្រ្គាមនៅមជ្ឈិមបូព៌ា។ ការគំរា.មកំ.ហែងទាំងនោះត្រូវបានគេរកឃើញថា មានចាប់តាំងពីរំខានដោយសម្លេងខ្លាំងៗ រហូតដល់ការប៉ះទង្គិចដោយផ្ទាល់រវាងត្រីបាឡែន និងកប៉ាល់, គ្រាប់បែក ឬមីនក្រោមទឹក ដែលនឹងធ្វើឲ្យពួកវាងា.ប់ ឬរបួស ហើយចាកចេញទៅរស់នៅតំបន់ផ្សេង។

យោងតាមការចុះផ្សាយរបស់ BBC នៅថ្ងៃអង្គារ ទី១២ ខែឧសភា ការប៉ះទង្គិចគ្នារវាងត្រីបាឡែន និងកប៉ាល់នៅឆ្នេរសមុទ្រភាគនិរតីនៃប្រទេសអាហ្វ្រិកខាងត្បូងកំពុងកើនឡើងជាបន្តបន្ទាប់ ដែលការណ៍នេះបណ្តាលមកពីការផ្លាស់ប្តូរផ្លូវដឹកជញ្ជូនដោយសារតែជម្លោះនៅមជ្ឈិមបូព៌ា។ ក្រៅពីកប៉ាល់ផ្លាស់ផ្ដូរទិសដៅ សម្លេងបំផ្ទុះខ្លាំងដែលលាន់លឺដល់ក្រោមទឹក និងសកម្មភាពកងទ័ពជើងទឹកកើនឡើង ក៏កំពុងផ្លាស់ប្តូរលក្ខខណ្ឌនៅក្នុងតំបន់ខ្លះនៃមហាសមុទ្រឥណ្ឌា និងអាត្លង់ទិក ជាកន្លែងដែលត្រីបាឡែនជាធម្មតាធ្វើដំណើរឆ្លងកាត់ រកចំណី និងធ្វើទំនាក់ទំនង។

អ្នកជំនាញខាងជីវិតនៅក្នុងសមុទ្របានពន្យល់ថា ត្រីបាឡែនពឹងផ្អែកយ៉ាងខ្លាំងទៅលើសំឡេងដើម្បីរុករក ស្វែងរកអាហារ និងរក្សាទំនាក់ទំនងជាមួយគ្នីគ្នារបស់ពួកគេ ដូចន្នេះប្រសិនបើមានសំឡេងខ្លាំងៗពីកប៉ាល់ និងការផ្ទុះក្រោមទឹកញឹកញាប់ពេក អាចធ្វើឱ្យត្រីបាឡែនតានតឹង ឬថប់បារម្ភ ដែលជួនកាលបណ្តាលឱ្យពួកវាវង្វេងស្មារតី ចាកចេញពីតំបន់ និងថែមប៉ះពាល់ដល់ការបង្កាត់ពូជផងដែរ។

សូមជម្រាបថា តំបន់មជ្ឈិមបូព៌ាដែលរួមមានសមុទ្រអារ៉ាប់ សមុទ្រក្រហម និងឈូងសមុទ្រពែក្ស គឺជាជម្រកនៃរបស់សត្វបាឡែនជាច្រើនប្រភេទ។ វាជាផ្ទះដែលធ្លាប់តែមានសុវត្ថិភាពរបស់សត្វបាឡែនខ្នងគមអារ៉ាប់ ជាប្រភេទបាឡែនដ៏កម្របំផុតនៅលើពិភពលោក (សេសសល់តិចជាង ១០០ ក្បាល)។ ក្រៅពីនេះវាក៏មាននៅវត្តមានរបស់ត្រីបាឡែនខៀវ ដែលមានទំហំធំបំផុតនៅលើលោក, ត្រីបាឡែន Bryde, ត្រីបាឡែន Omura និងត្រីបាឡែន Sperm Whale ដែលប្រមាញ់មឹកយក្សជាអាហារផងដែរ។

បច្ចុប្បន្នបើទោះជាការងាប់របស់ត្រីបាឡែនទាំងនេះមិនទាន់ត្រូវបានរាយការណ៍ថាមានច្រើនខ្លាំងក៏ពិតមែន ប៉ុន្តែការប៉ះទង្គិចបន្តិចម្ដងៗ ស្របពេលដែលជម្លោះចេះតែអូសបន្លាយទៅមុខក្នុងពេលកាន់តែយូរ នោះចំនួននៃការបាត់បង់នឹងកាន់តែកើនឡើង។ ទាំងនេះបានបង្ហាញថា សង្រ្គាមមិនត្រឹមតែប៉ះពាល់ដល់ការរស់នៅរបស់មនុស្សតែមួយមុខនោះទេ សូម្បីតែជីវិតសត្វដែលមិនដឹងអ្វីក៏ត្រូវទទួលរងការគំរាមកំហែងផងដែរ៕