តារាចម្រៀង សុខ សម្បត្តិ បានធ្វើឱ្យទស្សនិកជន រៀមច្បងក្នុងអាជីពសិល្បៈពោលសរសើរពីស្នាដៃនិងទេពកោសល្យរបស់លោកយ៉ាងខ្លាំងដែលច្នៃសំឡេងបញ្ជូលទៅក្នុងបទចម្រៀងដ៏អស្ចារ្យ។ ជាមួយភាពជោគជ័យនិងថ្ងៃគម្រប់ខួបស្នេហាតារាចម្រៀង សុខ សម្បត្តិ ស្រាប់តែបង្ហាញថាគូដណ្តឹងរបស់លោកជាអ្នកជួយលោកឱ្យងើបឡើងវិញបន្ទាប់ពីរងនូរការបាក់ទឹកចិត្តជាច្រើនដង។
នៅថ្ងៃទី២៧ ខែតុលា តារាចម្រៀង សុខ សម្បត្តិ បានបង្ហោះរូបផ្អែមល្ហែមជាមួយនឹងកញ្ញា Chan Bormey ដែលជាគូដណ្តឹងជាមួយនឹងសំណេរបញ្ជាក់ពីការដឹងគុណនិងជាមនុស្សម្នាក់ដែលជួយលោកពីក្រោយ។ ក្នុងសំណេរនោះម្ចាស់បទ «ដែនដីនៃក្តីសង្ឃឹម»បានរៀបរាប់ថា «និយាយតាមត្រង់! ខ្ញុំបាក់ទឹកចិត្តហើយចង់បោះបង់គ្រប់យ៉ាងមិនលើសពី ១០ ដងទេ!! ទាំងការរៀន, ការងារ, និងជីវិត ក៏ប៉ុន្តែនារីមួយរូបនេះតែងតែដាស់ខ្ញុំឱ្យងើបរហូត!។ មិនថាខ្ញុំលង់នឹងអ្វីទេឧទាហរណ៍ជាក់ស្តែងគឺ លង់នឹងភាពទន់ទោរទៅក្នុងអារម្មណ៍ខ្លួនឯង ធ្វើឱ្យខាតពេលខាតកម្លាំង! គាត់ឃើញដូច្នោះមិនបន្ទោសខ្ញុំបែរជារកវិធីដាស់ខ្ញុំដោយនិយាយថា (បញ្ហាមករកតែអ្នកខ្លាំងទេ ហើយគ្រប់បញ្ហាសុទ្ធតែមកជាមួយដំណោះស្រាយ) នៅមានច្រើនទៀត»។
តារាចម្រៀង សុខ សម្បត្តិ បន្តទៀតថា «ឆ្លងផុតរយៈពេលជិត ៤ឆ្នាំជាមួយគ្នាស្នេហាមួយនេះធ្វើឱ្យខ្ញុំឆ្លុះបញ្ចាំងឃើញថា តាមពិតផ្តើមស្រឡាញ់គឺងាយស្រួលណាស់! តែពេលបានជាគូហើយចេះថែរគ្នាក្នុងគ្រាលំបាកទេ? មិនចង់វែងឆ្ងាយខ្លាចយំពេលសរសេរ បងចង់ឆ្លៀតប៉ុន្មានម៉ោងក្នុងជីវិតប្រាប់អូនថា Thank you babe for allowing me to be a man in your life and happy 3year & 8 month anniversary )ចង់ឱ្យអូនតាមជេរបងរហូតដល់លែងមានយើងក្នុងផែនដីនេះ»។ មានរូបមួយសន្លឹក សុខ សម្បត្តិបានសរសេរភ្ជាប់ជាមួយនឹងគូស្នេហ៍លោកថា «ម្តាយកូនខ្ញុំ»។ ទំនងជាមិនសូវបង្ហាញអារម្មណ៍ដូចនេះហើយទើប Chan Bormey បាននិយាយថា សុខ សម្បត្តិ រៀន Surprise Post។
ការបញ្ជាក់ចិត្តស្មោះពីនារីម្នាក់នៅក្នុងបេះដូងនៃដំណើរជីវិតគូដែលមើលថែលើកទឹកចិត្តគ្នាដែល សុខ សម្បត្តិ បង្ហាញនៅលើបណ្តាញសង្គមក៏បានធ្វើឱ្យទស្សនិកជនជាច្រើនចាប់អារម្មណ៍និងកោតសរសើរចំពោះគូស្នេហ៍មួយគូនេះផងដែរ។
កាលពីមុន នៅពេលទម្លាក់បទ «ដែនដីនៃក្តីសង្ឃឹម» គូដណ្តឹង សុខ សម្បត្តិ បានបង្ហាញប្រតិកម្មចំពោះអ្នកដែលយកបទរបស់គូដណ្តឹងនាងយកទៅបង្ហោះបន្តជាបទចម្រៀងពេញដោយគ្មានការអនុញ្ញាតិនិងមិនបានសុំសិទ្ធិផងដែរ៕
