បន្ទាប់ពីក្លាយជាម្ចាស់ពាន Cambodian Idol រដូវកាលទី៥ តារាចម្រៀង គី សាវីន នៅតែទទួលបានសម្តីពីអ្នកលេងបណ្តាញសង្គមថារូបលោកមិនស័ក្តិសម។ ជាក់ស្តែងថ្មីៗនេះ សាវីន នៅតែប្រឈមនឹងពាក្យសម្តីនេះដោយលោកបានឆ្លើយតបយ៉ាងចិត្តត្រជាក់ជាទីបំផុត។ យ៉ាងណា គី សាវីន បានសារភាពថា ពាក្យខ្លះវាមិនធ្ងន់នោះទេតែក៏ប៉ះពាល់អារម្មណ៍។

កាលពីថ្ងៃទី៦ ខែតុលា គី សាវីន បានបង្ហោះវីដេអូខ្លីមួយដែលលោកបានធ្វើដំណើរទៅលេងប្រាសាទព្រះខ័ន ហើយបានជួបនឹងវង់ភ្លេងបុរាណខ្មែរលោកក៏ឈានចូលទៅច្រៀងអមជាមួយភ្លេងដែលប្រគំនោះព្រោះតែលោកចូលចិត្តភ្លេងខ្មែរខ្លាំងណាស។ វីដេអូមួយនេះរបស់ គី សាវីន ទទួលបានការចាប់អារម្មណ៍យ៉ាងខ្លាំងពីសាធារណជនដែលមានការចូលមើលជាង១លានដងត្រឹមតែរយៈពេលខ្លីប៉ុណ្ណោះដែលមានការចុច Like ជាច្រើនម៉ឺននាក់។ ទោះយ៉ាងណា ជាមួយនឹងមតិកោតសរសើរ គី សាវីន បានរងនូវពាក្យសម្តីរិះគន់ទឹកដមសំឡេងរបស់លោក។

នៅថ្ងៃទី៧ ខែតុលា ម្ចាស់ពានរូបនេះបានបង្ហោះការខម្មិនរបស់គណនីមួយដែលបានសរសេរថា «សំឡេងមិនពីរោះផង ចេះជាប់ដែរ»។ ជាការឆ្លើយតបទៅនឹងសម្តីរិះគន់នេះ គី សាវីន បានសរសេរថា «បាទលោកពូ ក្មួយជាប់ហើយ ហើយឥឡូវក្មួយក៏មិនស្ងាត់ការងារ ដែរ ខនសឺត ក៏នៅមាន ស្មូតបុណ្យ ភ្ជុំបិណ្ឌចប់ឥឡូវស្មូត បុណ្យកឋិនម្ដង កឋិនចប់ដល់ខែភ្លេងការល្មម ច្រៀងសម័យ ខ្លះដែរ»។

តារាចម្រៀងរូបនេះ លើកឡើងថា «ពាក្យខ្លះវាមិនធ្ងន់ទេតែក៏ប៉ៈពាល់អារម្មណ៍ក្មេងបន្តិចបន្តួចដែរ»។ ក្នុងនោះ គី សាវីន ក៏ថ្លែងអំណរគុណដល់ទស្សនិកជនដេលស្រលាញ់និងតែងតែផ្ដល់កាងារដល់រូបលោករហូតមក។

បច្ចុប្បន្ន គី សាវីន កំពុងមមាញឹកការងារសិល្បៈទាំងបុរាណនិងសម័យក្រោយលោកយកឈ្នះបេក្ខជនផ្សេងទៀតក្នុងការកម្មវិធីប្រលងចម្រៀងលំដាប់ថ្នាក់ពិភពលោក។ មានស្រុកកំណើតនៅខេត្តបាត់ដំបង គី សាវីន បានក្លាយជាម្ចាស់ពាន Cambodian Idol រដូវកាលទី៥ កាលពីខែវិច្ឆិកា ឆ្នាំ២០២៤។ មកទល់ពេលនេះតារាចម្រៀង គី សាវីន បានចេញបទចម្រៀងចំនួន៣បទនៅលើទីផ្សារក្នុងនាមជាតារាជាប់កុងត្រាដែលមានដូចជាបទ «កុំទាន់យកសង្សារថ្មីបានទេ»«ចូលឆ្នាំចាំទៅស្រុក» និងបទ «Private ពីរនាក់ តែឈឺម្នាក់ឯង» ៕

ទីបំផុត Mealyann Nita Saing ដែលតំណាងឱ្យប្រទេសកម្ពុជាចូលរួមប្រកួតនៅក្នុងកម្មវិធី Miss Asia Pacific International 2025 លើទឹកដីហ្វីលីពីនទទួលបានលទ្ធផល TOP30 ។ សមិទ្ធផលនេះជំរុញឱ្យកម្ពុជាចូលTOPលើកដំបូងក្នុងការប្រកួត។ យ៉ាងណាក៏មានមតិមួយចំនួនសម្តែងការសោកស្តាយដែលកម្ពុជាមិនអាចចូលទៅកាន់វគ្គកំពូល១០នាក់ចុងក្រោយ។

នៅយប់ថ្ងៃទី៨ ខែតុលា ឆ្នាំ២០២៥ កម្មវិធីប្រកួត Miss Asia Pacific International 2025 បានរកឃើញម្ចាស់មកុដហើយគឺបានទៅលើបវរកញ្ញាដែលតំណាងឱ្យប្រទេសប្រេស៊ីល Isabela Fernandez ចំណែកឯហ្វីលីពីនជាប់លំដាប់រងទី១។ ងាកមកខាងតំណាងកម្ពុជាវិញគឺអ្នកនាង Mealyann Nita Saing ក៏ទទួលបានលទ្ធផលដ៏ល្អមួយផងដែរខណៈកម្មវិធីនេះខាងកម្ពុជាទើបតែចូលរួមបានចំនួន៣ដងប៉ុណ្ណោះ។

នៅក្នុងការប្រកួត Miss Asia Pacific International 2025 អ្នកនាង Mealyann បានព្យាយាមយ៉ាងស្វិតស្វាងជាមួយនឹងបេក្ខភាពផ្សេងទៀតជម្នះនៃការវាយប្រហារពាក្យសម្តីនៅលើបណ្តាញសង្គមពីជនជាតិថៃមួយចំនួន ហើយកាលពីថ្ងៃទី៣០ ខែកញ្ញា ក៏ត្រូវភិតភ័យនឹងហេតុការណ៍គ្រោះរញ្ជួយដីនៅហ្វីលីពីនទៀត។ Mealyann បានបើកឱកាសដំបូងអាចនាំកម្ពុជាចូលទៅកាន់ TOP30 ។

ជាមួយនឹងចំណាត់ថ្នាក់នេះ Miss Asia Pacific International Cambodia 2025 ក៏ទទួលបានពានរង្វាន់ពិសេសដូចជា Miss Eventologie, Miss Cinderella Drip និងចំណាត់ថ្នាក់លេខ១២ Miss Popuar Vote។

អ្នកគាំទ្រវិស័យបវរកញ្ញាបានសម្តែងការអបអរមកកាន់ Mealyann Nita Saing ក្នុងការប្រកួតលើកនេះទោះបីជាខកចិត្តបន្តិចក្តី ប៉ុន្តែ Mealyann បានប្រឹងប្រែងអស់ពីសមត្ថភាពក្នុងការប្រកួតហើយជាមួយនឹងលទ្ធផល TOP30 នេះ៕

ថ្មីៗនេះអ្នកបង្កើតមាតិកាដ៏ល្បីឈ្មោះ Rick Kh បានចែករំលែករំលែកវីដេអូមួយនៅលើបណ្តាញសង្គមជាគោលគំនិតសំខាន់ៗដែលពលរដ្ឋកម្ពុជាអាចយកឈ្នះការមើលងាយពីប្រជាជនថៃមកលើប្រទេសកម្ពុជា។

តាមរយៈវីដេអូនេះ Rick Kh បានលើកឡើងថា សព្វថ្ងៃនេះប្រជាជនថៃបានមើលងាយខ្មែរតាមប្រព័ន្ធអនឡាញ ប្រមាថមើលងាយថ្នាក់ដឹកនាំ ធ្វើគ្រប់ទម្រង់ទាំងអស់ពីប្រទេសខ្មែរដោយមិនចង់ឱ្យបរទេសមើលមកខ្មែររីកចម្រើននោះទេ។ ក្នុងអំឡុងពេលនេះក្នុងនាមជាប្រជាជនខ្មែររស់នៅលើទឹកដីខ្មែរ Rick Kh បានផ្តល់ជាគោលគំនិតសំខាន់ៗដូចជា៖

ចំណុចទី១. ផ្អាកគាំទ្រផលិតផលថៃ៖ ក្នុងន័យនេះ Rick Kh បានពន្យល់បន្ថែមថាផលិតផលថៃនៅតែមានលក់ពីព្រោះនេះគឺជាច្បាប់របស់អន្តរជាតិមិនអាចបញ្ឈប់ផលិតផលថៃមានចូលក្នុងប្រទេសកម្ពុជានោះទេ ប៉ុន្តែយើងជាបុគ្គលអាចកាត់បន្ថយខ្លួនឯងបាន ដោយត្រឡប់មកជួយគាំទ្រផលិតផលក្នុងស្រុកវិញ។

ចំណុចទី២ Rick Kh ទាក់ទងនឹងលុយបាត៖ Rick Kh ថាសម្រាប់បងប្អូននៅជាយដែនគឺវាពិបាកប៉ុន្តែយើងអាចកាត់បន្ថយបានបន្តិចម្តងៗ ហើយវានឹងធ្វើឱ្យលុយខ្មែរយើងកំណើនប្រាក់រៀលកាន់តែឡើង ហើយឈប់បន្តគាំទ្រយកព័ត៌មានពីថៃមកដូចជាទាក់ទងនឹងថ្នាក់ដឹកនាំយកមកស៊ែរ បណ្តុះបង្អាប់ កុំចែករំលែកបន្តជាដើម។ ក្នុងពេលវេលានេះ Rick Kh បានបញ្ជាក់ថាស្ថានភាពនៅមិនទាន់បញ្ចប់នៅឡើយទេទាំងទាហាន១៨នាក់ត្រូវថៃចាប់យកទៅដោយខុសច្បាប់ ដូច្នេះយើងត្រូវរួបរួមគ្នា ស្រលាញ់ប្រទេសជាតិ តស៊ូជួយគ្នា។ អ្នកបង្កើតមាតិការូបនេះបានអះអាងថាការនិយាយរបស់ខ្លួនមិនមែនជារឿងនយោបាយនោះទេប៉ុន្តែនិយាយក្នុងនាមជាកូនខ្មែរមួយរូប។

ឆ្លងកាត់សង្គ្រាមលើកនេះ Rick Kh បានចែករំលែកថាទទួលបានបទពិសោធថាប្រទេសថៃគឺអាក្រក់ខ្លាំង មើលងាយមកកាន់ខ្មែរខ្លាំង ហើយយើងមិនអាចយកសព្វាវុធ ការជេរទៅតតាំងជាមួយគេនោះទេ ប៉ុន្តែយើងអាចប្រើប្រាជ្ញាស្មារតីនៃការចេះដឹងកាត់បន្ថយនៃការប្រើប្រាស់ទំនិញថៃដែលមិនចាំបាច់ មិនចូលរួមសកម្មភាពផ្សេងៗដូចជាការទៅលេងប្រទេសថៃ ពិនិត្យសុខភាពនៅប្រទេសថៃ ហើយងាកមកពិនិត្យសុខភាពនៅក្នុងស្រុកឬបណ្តាប្រទេសផ្សេងៗ។

Rick Kh ថាក្នុងនាមជាខ្មែរបើមិនស្រលាញ់ប្រទេសខ្មែរតើឱ្យជនជាតិណាមកស្រលាញ់ ហើយលោកចង់ឱ្យយើងជួយគ្នាបន្តិចម្តងៗ លោកចង់ឱ្យប្រទេសជាតិល្អជាងនេះ រឹងមាំជាងនេះ បន្តនូវអ្វីៗដែលល្អដោយលោកជឿថាប្រជាជនខ្មែរអាចធ្វើបានសាមគ្គីគ្នាជាធ្លុងមួយ៕

អ្នកនាង ដេននីក្វាន់ ម្តាយរបស់ ល្អហួស បានបង្ហាញថាតារាចម្រៀង ណុប បាយ៉ារិទ្ធ គឺជាអាយដលរបស់ខ្លួនខណៈបទចម្រៀងមួយចំនួនរបស់លោកប៉ុន្មានបទនេះគឺជាបទសំណព្វចិត្ត។ ជាមួយនឹងការស្រលាញ់នេះលោក ណុប បាយ៉ារិទ្ធ បានឆ្លើយតបដោយក្តីរំភើបជាមួយនឹងការជូនពរ។

ថ្មីៗនេះ អ្នកនាង ដេននី ក្វាន់ ស្រាប់តែបង្ហោះរូបលោក ណុប បាយ៉ារិទ្ធ ជាសាធារណៈតែម្តងជាមួយនឹងការបញ្ជាក់ទៅកាន់អ្នកគាំទ្ររបស់ខ្លួនថាតារាចម្រៀងប្រុសដែលជាអាយដលរបស់ខ្លួនគឺជាតារាប្រុសមិនចេះចាស់រូបនេះ។ អ្នកនាង បានរៀបរាប់យ៉ាងដូច្នេះថា «មានFanរបស់ខ្ញុំជាច្រើនសួរខ្ញុំថាតើតារាចម្រៀងប្រុសរូបណាជាIdolរបស់ខ្ញុំ? ចា៎ បងប្រុស Nop Bayyareth ជាIdol របស់ខ្ញុំ ឱ្យតែបទចំរៀងមនោសញ្ចេតនា ដឹងតែខ្ញុំស្តាប់បទគាត់ហើយ ក្នុងនោះមានបទ. 1.ឃុំចិត្ត 2. យូរយ៉ាងណាក៏ចាំ 3.ព្រួយនឹកម្ចាស់ស្នេហ៍ 4.បំណងល្អពីសង្សារអូន 5.ស្រលាញ់ស្ទើរលេប 6. បេះដូងខ្វះគ្នា 7. រាត្រីបាត់អូន 8. យើងជាអ្នកស្រែត្រូវជឿអ្នកស្រែដូចគ្នា 9. ត្រូវការកម្លាំងចិត្ត 10.សង្សារលេងៗ ហើយនៅមានបទជាច្រើនទៀត»។

ការបង្ហាញពីអាយដលក្នុងចិត្តរបស់ម្តាយល្អហួស បានជំរុញឱ្យសាម៉ីខ្លួនគឺលោក ណុប បាយ៉ារិទ្ធ បានថ្លែងអំណរគុណចំពោះការស្រលាញ់នេះ។ លោកបានចែករំលែកខ្លឹមសារការបង្ហោះខាងលើនេះជាមួយនឹងសម្តីថា «អរគុណប្អូនស្រីសម្រាប់ ការស្រលាញ់ចូលចិត្តស្តាប់នៅចម្រៀងរបស់ខ្ញុំកន្លងមក ជូនពរប្អូនមានសំណាងល្អ មានសុភមង្គល»។

ងាកទៅកាន់ទស្សនិកជនវិញក៏បានបញ្ចេញមតិក្នុងការបង្ហោះរបស់អ្នកនាង ដេននី ក្វាន់ ដែរថាបទចម្រៀងដែលនាងបានបញ្ជាក់ខាងលើនេះសុទ្ធសឹងតែជាបទដែលពួកគេចូលចិត្តស្តាប់ដូចគ្នា។

គួរបញ្ជាក់ផងដែរថា ចុងក្រោយនេះលោក ណុប បាយ៉ារិទ្ធ បានសហការជាមួយនឹងសិស្សប្អូនរបស់ខ្លួនទៅលើបទល្បីកាលពីមុនដោយមានការបញ្ជូលស្ទីលថ្មីជាក់ស្តែងដូចជាបទ «បំណងល្អពីសង្សារអូន»ជាមួយនឹងតារាចម្រៀង លីម តិចម៉េង ខណៈបង្ហើបស្នាដៃមួយទៀតអាចសហការជាមួយនឹង នាង ដាវីន៕