ចំប៉ីខ្មៅ បានចេញវីដេអូដោយក្តីឈឺចិត្តរៀបរាប់ពីរឿងគ្រួសារជាលើកទី១ប្រាប់មហាជនព្រោះតែការខិតខំប្រឹងប្រែងរបស់ខ្លួនសព្វគ្រប់បែបយ៉ាងបែរសមាជិកគ្រួសារមើលមិនឃើញ។ ចំប៉ីខ្មៅ បានលាតត្រដាងថាម្តាយរបស់ខ្លួនញៀននឹងកន្ទុយលេខនិងបានយកមាសដែលខ្លួនឱ្យយកទៅបញ្ចាំ ខណៈដែលប្អូនប្រុសបែរជាគិតតែពីជក់ថ្នាំ។

នៅថ្ងៃទី២៧ ខែកញ្ញា ចំប៉ីខ្មៅ បានបង្ហោះវីដេអូដោយរៀបរាប់ថា អ្វីដែលខ្លួនបានមកដល់ថ្ងៃនេះគឺកើតចេញពីការខិតខំដោយខ្លួនឯង ព្រោះតែម្តាយឪពុកពិបាកមិនអាចជួយខ្លួនឱ្យបានដូចថ្ងៃនេះទេ។ ចំប៉ីខ្មៅ បានបន្តទៀតថា ខ្លួនជាមនុស្សដែលធ្លាប់ជាប់គុកមិនអាចប្រលងមេធាវី ឬចៅក្រម ព្រះរាជអាជ្ញាក៏បានឡើយ ហើយអ្នកផ្ទះមិនយល់អារម្មណ៍របស់ខ្លួនឡើយ។ ចំប៉ីខ្មៅ បានបន្តទៀតថាគ្រាន់តែយកប្អូនមកឱ្យនៅភ្នំពេញរកស៊ីធ្វើការ ឱ្យជួយមើលមុខរបរ បែរជាធ្វើមិនបានគិតតែពីជក់ថ្នាំ។

ដោយក្តីអន់ចិត្តចំពោះសមាជិកគ្រួសារ ចំប៉ីខ្មៅ បានបន្ថែមទៀតថាម្តាយរបស់ខ្លួនគឺរឿងកន្ទុយលេខ ខ្លួនខិតខំផ្គត់ផ្គង់អ្នកផ្ទះគ្រប់សព្វបែបយ៉ាងឱ្យខ្លួនធ្វើល្អប៉ុណ្ណាទៀត ខ្លួនខំទិញពេជ្រ ទិញមាសឱ្យម្តាយពាក់បែរជាមិនយល់អារម្មណ៍របស់ខ្លួនយកមាសទៅបញ្ចាំ យកទៅជួយបងប្អូនផ្សេង មិនយល់អារម្មណ៍របស់ខ្លួនខំងើបមកពីគុក។ ជាមួយនឹងការលាតត្រដាងក្នុងរឿងគ្រួសារ ចំប៉ីខ្មៅ ថាខ្លួនគ្មានហេតុផលអ្វីត្រូវប្រាប់ពីអារម្មណ៍ទៅកាន់អ្នកទស្សនាឡើយប៉ុន្តែគ្រាន់តែចង់ឱ្យដឹង ឱ្យឃើញពីគំនិតមាយាទ ហើយការដែលបង្ហាញប្រាប់ទស្សនិកជនក្នុងរឿងគ្រួសារនេះដោយសារតែខ្លួនតឹងពេក។

បន្ទាប់ពីបង្ហោះប្រាប់ពីទុក្ខលំបាករបស់ខ្លួនពីសមាជិកគ្រួសារដែលមិនយល់ពីអារម្មណ៍នៃការខិតខំប្រឹងប្រែងរបស់ខ្លួន អ្នកលេងបណ្តាញសង្គមមានការផ្តល់កម្លាំងចិត្តទៅកាន់ ចំប៉ីខ្មៅ ផងដែរក្នុងនោះជំទាវ ចន ច័ន្ទលក្ខិណា ក៏បានចូលទៅខម្មិនផ្តល់កម្លាំងចិត្តដូចគ្នា។ ទោះយ៉ាងណា វីដេអូដែល ចំប៉ីខ្មៅ បានបង្ហោះក៏បានបាត់ចេញពីបណ្តាញសង្គមផងដែរខណៈមានគណនីផ្សេងបង្ហោះថា ចំប៉ីខ្មៅ សង្គ្រោះបន្ទាន់៕

តារាចម្រៀង លីម តិចម៉េង បានចូលរួមកម្មវិធីកម្សាន្តមួយដោយបានចែករំលែកពីការតស៊ូក្នុងជីវិតទម្រាំតែអាចមានឈ្មោះបោះសំឡេងមានមហាជនអាណិតស្រលាញ់ដូចបច្ចុប្បន្ន។ ម្ចាស់ពានកម្មវិធី Cambodian Idol រដូវកាលទី៤បានបង្ហាញថាការប្រកួតប្រជែងគឺមិនងាយស្រួលនោះទេ។

នៅក្នុងបទសម្ភាសន៍ 3 Fun លីម តិមម៉េង បានប្រាប់ទៅកាន់អ្នកជំនាន់ក្រោយថាការប្រលងមិនងាយស្រួលនោះទេមិនថាកម្មវិធីបវរកញ្ញាឬអ្វីក៏ដោយគឺមិនសូវមានមិត្តនោះទេ ប្រសិនជាយើងមានសមត្ថភាពជាងគេជាងឯងទៀតប្រហែលជាគ្រោះថ្នាក់ក្នុងប្រការណាមួយបើសិនជាយើងមិនប្រយ័ត្ន។ កំលោះតូច លីម តិចម៉េង បានបង្ហាញទៀតថា មានបេក្ខជនខ្លះព្យាយាមបំបាក់ទឹកចិត្តយើង ព្រោះតែខ្លួនគ្មានអ្វីហើយសូម្បីតែការហូបបាយឬគេងគេមើលលើមើលក្រោម ពេបជ្រាយមកកាន់ខ្លួន។

តារាចម្រៀងរូបនេះក៏បានចែករំលែកបទពិសោធន៍នៅក្នុងការប្រលងចម្រៀងទៀតថា ប្រសិនជាចង់ឱ្យខ្លួនឯងល្អស្អាតគឺត្រូវហ៊ានចំណាយពីមួយវគ្គទៅមួយវគ្គ ហើយកម្មវិធីមិនបង្ខំយើងនោះទេដោយគេគ្រាន់តែប្រាប់ថាសប្តាហ៍នេះមានខន់សិបអ្វីប៉ុណ្ណោះ។ រៀបរាប់ដោយអួលដើមក តិចម៉េង បានបង្ហាញប្រាប់ទស្សនិកជនថាតាំងពីប្រកួតប្រជែងវគ្គដំបូងដល់បញ្ចប់គឺខ្លួនលោកពុំមានសំលៀកបំពាក់ថ្មីនោះទេ ដោយសំលៀកបំពាក់ខ្លះគឺទិញនៅផ្សារបឹងកេងកង មានការជួយពីរៀមច្បងសិល្បករនៅហង្សមាស រួមទាំងថៅកែហាងរបស់ខ្លួនបានជួយជាសំលៀកបំពាក់ទៀតផង។ ក្នុងអំឡុងពេលនោះ តិចម៉េង ថាលោកច្រៀងដូរបាយចំនួន៦ថ្ងៃ ចំណែកឯ១ថ្ងៃទៀតគឺប្រកួតប្រជែងហើយលោកអស់ពីខ្លួនគឺត្រឹមវគ្គ Live Show សប្តាហ៍ទីពីរប្រសិនជាពេលនោះបរាជ័យគឺជីវិតចប់តែម្តង។

គួរបញ្ជាក់ផងដែរថា លីម តិចម៉េង ជាម្ចាស់ពានមួយរូបដែលទទួលបានការអាណិតស្រលាញ់ពីអ្នកគាំទ្រច្រើនបើទោះបីជាលើកពានជាច្រើនឆ្នាំប៉ុន្តែនៅពេលមានការប្រគំតន្រ្តីនានាតារាចម្រៀងរូបនេះតែងតែទទួលបានកាដូពីក្រុមអ្នកគាំទ្រ៕

ពេជ្រ វត្តីសារ៉ាវឌ្ឍី និង អ៊ិន លក្ខិណា រួមទាំង មាលា ណង នីត ហុក សារិតុលា បានបង្ហាញខ្លួនក្នុងកម្មវិធីដើរម៉ូតមួយនៅឯប្រទេសវៀតណាម។ សម្រស់របស់នារីខ្មែរនៅលើឆាកទាំងប៉ុន្មានដួងនេះគឺទទួលបានការចាប់អារម្មណ៍យ៉ាងច្រើន ខណៈ ពេជ្រ វត្តីសារ៉ាវឌ្ឍី និង អ៊ិន លក្ខិណា ដើរម៉ូតឡើងឆ្វាចតែម្តង។

អ៊ិន លក្ខិណា Miss Cosmo Cambodia 2024 គឺជាបវរកញ្ញាខ្មែរមួយរូបដែលមានឱកាសដើរម៉ូតនិងមានការងារច្រើនជាងគេនៅប្រទេសវៀតណាមបន្ទាប់ពីឆក់បានតំណែងTOP10 នៅលើឆាកអន្តរជាតិ ថែមទាំងជាកូនស្រីសំណព្វមួយរូបរបស់គ្រួសារ Cosmo ផងដែរ។ ជាក់ស្តែងកម្មវិធីធំមួយនាពេលថ្មីៗនេះដែលរៀបចំឡើងនៅឯប្រទេសវៀតណាមក៏មានការចូលរួមពី អ៊ិន លក្ខិណា ។

នៅលើឆាកដ៏ស៊ីវិល័យ អ៊ិន លក្ខិណា គឺស្ថិតក្នុងសំលៀកបំពាក់ពណ៌សទៅតាមខបសិនរបស់កម្មវិធីជាមួយនឹងការលេងស្ទាយ៍ពាក់មួក។ លក្ខិណា បានដើរម៉ូតឡើងឆ្វាចនៅលើឆាកដែលប្រមូលផ្តុំដោយតារាម៉ូដែលជាច្រើនទៀត។ សម្រស់ លក្ខិណា ក៏ទទួលបានការសរសើរពីអ្នកលេងបណ្តាញសង្គម។

មែនទែនទៅមិនត្រឹមតែមានវត្តមានរបស់ អ៊ិន លក្ខិណា ប៉ុណ្ណោះទេដែលចូលរួមកម្មវិធី fashion show នៅវៀតណាមជាមួយនឹងកម្មវិធី Tik Tok កម្មវិធីលើកនេះក៏មាន ពេជ្រ វត្តីសារ៉ាវឌ្ឍី មាលា ហុក សារិតុលា និង ណង នីត ដូចគ្នា។

ទោះបីទើបតែប្រឡូកការដើរម៉ូតនៅឯប្រទេសវៀតណាម ប៉ុន្តែវត្តមានរបស់ ពេជ្រ វត្តីសារ៉ាវឌ្ឍី គឺមានការចាប់អារម្មណ៍មិនធម្មតាដូចគ្នា។ លំដាប់រងទី២ បវរកញ្ញាចក្រវាលកម្ពុជាឆ្នាំ២០២៥ បានបញ្ចេញរាងដ៏ស្រស់ស្អាតដើរម៉ូតប្រកបដោយភាពទំនុកចិត្តដោយមានក្រសែភ្នែកជាច្រើនចាប់អារម្មណ៍មកលើ ពេជ្រ វត្តីសារ៉ាវឌ្ឍី ទោះបីជាកំឡុងពេលនាងសមឆាកក្តីក៏មានម៉ូដែលផ្សេងទៀតចោលខ្សែភ្នែកសម្លឹងដែរ។

អាចថានេះជាជំហានដ៏ល្អមួយសម្រាប់តារាម៉ូដែល បវរកញ្ញាកម្ពុជា ដែលកាន់តែមានទីផ្សារដើរម៉ូតនៅឯប្រទេសវៀតណាម៕

អ្នកបង្កើតមាតិកាល្បីឈ្មោះលោក ហេង វិសាល បានសរសេរបង្ហោះនៅលើបណ្តាញសង្គមបង្ហាញទៅកាន់មិត្តអន្តរជាតិថាប្រទេសថៃបានល្មើសបទឈប់បាញ់ហើយលោកមានការឈឺចាប់និងភ័យខ្លាចដែលមានប្រទេសជិតខាងដូចជាថៃ មិនគោរពច្បាប់អន្តរជាតិ។ មិនត្រឹមតែប៉ុណ្ណោះលោកបានស្នើសុំឱ្យអន្តរជាតិចាត់វិធានការអ្វីមួយដើម្បីដោះស្រាយរឿងនេះជៀសវាងប្រទេសដទៃយកគំរូតាម។

នៅរសៀលថ្ងៃទី២៧ ខែកញ្ញា ក្រសួងការពារជាតិបានសេចក្តីប្រកាសថានៅវេលាម៉ោងប្រមាណ ១១:៥២នាទី យោធាថៃបានចាប់ផ្តើមធ្វើការបាញ់ប្រហារមុនមកលើទីតាំងកងកម្លាំងកម្ពុជា ដោយបានបាញ់កំាភ្លើងត្បាល់និងកាំភ្លើងដៃជាច្រើន គ្រាប់មកលើមូលដ្ឋានកងទ័ពកម្ពុជានៅតំបន់អានសេះ។ ស្ថានការណ៍តានតឹងនេះបានបង្កឱ្យប្រជាជនមានការព្រួយបារម្ភជាថ្មីព្រោះតែភាគីមិនគោរពបទឈប់បាញ់បានល្មើសការព្រមព្រៀងគ្នា។

ស្របពេលដែលប្រទេសថៃបានបំពានបទឈប់បាញ់ លោក ហេង វិសាល បានបង្ហាញទៅកាន់មិត្តអន្តរជាតិថា «អត្ថបទមួយនេះគឺខ្ញុំសរសេរជូនទៅកាន់មិត្តអន្តរជាតិ នៅថ្ងៃនេះប្រទេសថៃបានល្មើសបទឈប់បាញ់ម្តងទៀតហើយ ដោយថ្ងៃនេះប្រទេសថៃបានធ្វើការបាញ់ប្រហារដោយកាំភ្លើងមកកាន់ប្រទេសកម្ពុជា ដែលនេះគឺជាការប្រឆាំងទៅលើបទឈប់បាញ់ ក៏ដូចជាមិនទុកមុខ និងមិនគោរពនៅការជួយរកសន្តិភាពរបស់ប្រធានាធិបតី Donald J. Trump និង Malaysia ដែលជាប្រធានប្តូរវេនអាស៊ានផងដែរ»។

ស្វាមី ជា ស្រីនា បានបន្តទៀតថា «ក្នុងនាមជាប្រជាពលរដ្ឋកម្ពុជាម្នាក់ ពេលនេះខ្ញុំពិតជាមានអារម្មណ៍ឈឺចាប់ និងភ័យខ្លាចដែលមានប្រទេសជិតខាងដូចជាថៃ ដែលកាចសាហ៊ាវ មិនគោរពច្បាប់និងមិនខ្លាចច្បាប់អន្តរជាតិទាល់តែសោះ ក្នុងនាមជាមនុស្សដែលរស់នៅលើផែនដីមួយនេះដូចគ្នា ខ្ញុំពិតជាស្នើរសុំ ឱ្យអន្តរជាតិចាត់វិធានការអ្វីមួយដើម្បីដោះស្រាយរឿងនេះ បើមិនដូច្នេះទេ នឹងមានប្រទេសជាច្រើនទៀតនឹងយកគំរូតាមថៃ ដោយមិនស្តាប់ និងមិនខ្លាចច្បាប់អន្តរជាតិទៀតឡើយ ពេលនោះពិភពលោកនឹងវឹកវរ សង្ឃឹមថាមិត្តបរទេសនឹងបានឃើញហើយពិចារណា អ្នកធ្វើវាមិនមែនដើម្បីកម្ពុជាទេ គឺធ្វើវាដើម្បីសន្តិភាពពិភពលោក»៕