តារាចម្រៀង ជី ដេវីត ទេព បូព្រឹក្ស រួមទាំងអ្នកជិតស្និទ្ធ បានទៅទស្សនាការប្រគំតន្រ្តីរបស់ G-Dragon នៅឯប្រទេសវៀតណាមបន្ទាប់ពីកម្មវិធីរបស់តារា Kpop រូបនេះលុបចោលនៅឯប្រទេសថៃ។ អ្វីដែលកាន់តែចាប់អារម្មណ៍ ជី ដេវីត និង ទេព បូព្រឹក្ស ត្រូវបានជនបរទេសសុំថតជាមួយផងដែរដែលបញ្ជាក់ថាអ្នកទាំងពីរមានការស្រលាញ់ចូលចិត្តច្រើន។
អ្នកតាមដានវិស័យសិល្បៈជាពិសេសអ្នកគាំទ្រជ្រាបមកហើយថា តារារ៉េប ជី ដេវីត គឺជាអ្នកគាំទ្រធំម្នាក់របស់តារាចម្រៀង G-Dragon មេក្រុមរបស់ BIGBANG រហូតលោកសាក់រូប តុបតែងខ្លួន លេងម៉ូតសក់ ឬសំលៀកបំពាក់ គឺមានការបំផុសគំនិតពីអាយដលរបស់ខ្លួន។ ទន្ទឹមនឹងការវិលត្រឡប់មកវិញរបស់ G-Dragon ដែលមានការរៀបចំប្រគំតន្រ្តីតាមប្រទេសនានាទាំងអឺរ៉ុបនិងអាស៊ី ជី ដេវីត បានដឹកដៃ ទេព បូព្រឹក្ស ទៅទស្សនាការប្រគំតន្រ្តីរបស់តារា Kpop រូបនេះនៅឯទីក្រុងហាណូយ ប្រទេសវៀតណាមផងដែរ។
ទោះបីជាស្ថិតនៅប្រទេសវៀតណាមក្តីអ្វីដែលគាំទ្រចាប់អារម្មណ៍គឺតារារ៉េប ជី ដេវីត និងទេព បូព្រឹក្ស មានការស្រលាញ់ពីជនបរទេស។ នៅថ្ងៃទី៨ ខែវិច្ឆិកា ឆ្នាំ២០២៥ នេះតាមការចែករំលែកវីដេអូពី ចែតាបារាំង បានបង្ហាញវីដេអូដ៏គួរឱ្យរំភើបមានជនបរទេសប៉ុន្មាននាក់មកសុំថតរូបជាមួយនឹងអ្នកទាំងពីរផងដែរ។ ជាមួយនឹងការចែករំលែកនេះ ចែតាបារាំង បានចំអន់តារាទាំងពីរដួងដែរថាកុំច្រឡំថាជា G-Dragon ឬ CL ការពិតគឺជា ជី ដេវីត និង ទេព បូព្រឹក្ស របស់ស្រុកខ្មែរទេ។
គួរឱ្យដឹងថា ទន្ទឹមនឹងវត្តមានរបស់ G-Dragon ប្រគំតន្រ្តីនៅឯប្រទេសវៀតណាម អ្នកគាំទ្រកម្ពុជាក៏រំពឹងដែរថានឹងមានថ្ងៃណាមួយតារាចម្រៀងល្បីឈ្មោះរូបនេះនឹងមកប្រគំតន្រ្តីនៅកម្ពុជាម្តង ខណៈកន្លងមកទាំង CL និងក្រុម2NE1 និងតារា Kpop មួយចំនួនទៀតបានមកសម្តែងរួចហើយដែរ៕
