តារាចម្រៀង ទេព បូព្រឹក្ស បានបញ្ចេញអារម្មណ៍ឈឺចិត្តយ៉ាងខ្លាំងនៅពេលដែលតារាម៉ូដែលហ្គាណា Nana បានយកសិទ្ធិស្នាដៃរបស់ប្រ៊េនកូនខ្មែរទៅឱ្យអ្នកច្នៃម៉ូតម្នាក់ទៀតយកទៅតម្លើងឈុតហើយចោ.ទប្រកាន់មកម្ចាស់ដើមដែលមានគំនូរព្រាងវិញ។ ទេព បូព្រឹក្ស បានប្រាប់ទៅម្ចាស់ប្រ៊េន ALmée រូបនាងមានគម្រោងស្លៀកឈុតនេះនៅពេលឡើងឆាកអន្តរជាតិលើកក្រោយ។

រយៈពេលចុងក្រោយនេះបណ្តាញសង្គមមានភាពវឹកវរយ៉ាងខ្លាំងជុំវិញការជជែកដេញដោលទៅកាន់តារាម៉ូដែល Nana Akua Addo ដែលមិនគោរពសិទ្ធិគំនូរព្រាងដើមរបស់ប្រ៊េនកូនខ្មែរដោយបដិសេធថាគឺជាកម្មសិទ្ធិបញ្ញាផ្ទាល់ខ្លួនរបស់នាងទាំងស្រុង។ ភាពចម្រូងចម្រាសនេះបានធ្វើឱ្យ Nana ខូចខាតមុខមាត់សាធារណៈរបស់ខ្លួនឯងខ្លាំងបន្ទាប់ពី បង្ហាញសំលៀកបំពាក់នេះនៅឯកម្មវិធី AMVCA ។ មិនត្រឹមតែប៉ុណ្ណោះក៏ធ្លាយនូវរូបភាពមួយចំនួនដែលតារាម៉ូដែលរូបនេះបានចម្លងការច្នៃម៉ូតរបស់អ្នកដទៃផ្សេងទៀតផងដែរមិនមែនតែ ALmée នោះទេ។

ជុំវិញភាពចម្រូងចម្រាសនេះដោយការហួសចិត្តខ្លាំងទៅកាន់តារាម៉ូដែលហ្គាណា តារាចម្រៀង ទេព បូព្រឹក្ស បានបង្ហាញចំណាប់អារម្មណ៍របស់ខ្លួនចង់ស្លៀកឈុតដែលមានឈ្មោះថា «The Royal Obsidian» ជាស្នាដៃរបស់ ALmée នៅពេលមានឱកាសច្រៀងនៅស្រុកក្រៅ។
តាមរយៈការបកស្រាយរបស់ម្ចាស់ប្រ៊េន ALmée តារាចម្រៀង ទេព បូព្រឹក្ស បានចែករំលែកដោយការហួសចិត្តជាមួយនឹងសម្តីថា «ទេចេះចឹងទៅរួច» តារាចម្រៀងរូបនេះថែមទាំងឆ្លើយតបទៅនឹងខម្មិនរបស់ម្ចាស់ប្រ៊េនជាមួយនឹងសម្តីថា «បើបងទៅច្រៀងស្រុកក្រៅពេលក្រោយសុំស្លៀកឈុតនេះហើយ»។ ការបង្ហាញគម្រោងនេះរបស់ ទេព បូព្រឹក្ស បានធ្វើឱ្យអ្នកគាំទ្រមួយចំនួនបង្ហាញការគាំទ្រផងដែរ។

គួរបញ្ជាក់ផងដែរថា ឈុតដែលច្នៃបង្ហាញពីរបាំអប្សរា ដែល ទេព បូព្រឹក្ស ស្លៀកចូលរួមកម្មវិធីនៅប្រទេសហ្វីលីពីនលើកមុនគឺជាស្នាដៃច្នៃម៉ូតដោយ ALmée ខណៈកម្មវិធីមួយចំនួនតារាចម្រៀង ទេព បូព្រឹក្ស បានជ្រើសរើសស្លៀកឈុតពីម៉ាកយីហោនេះ៕

ប្រមុខរដ្ឋស្តីទី សម្តេចតេជោ «ហ៊ុន សែន» បានស្នើឱ្យពិនិត្យដកមន្រ្តី ក.ប.ប ខេត្តបាត់ដំបង ដែលកុហករឿងទុរេននាំចូល។ ការស្នើនេះ គឺដើម្បីជាសារព្រមានមន្រ្តីទាំងអស់ កុំឲ្យពូកែកុហកថ្នាក់លើ និង ប្រជាជន។ នេះបើយោងតាមការឲ្យដឹងពីឯកឧត្តម ជា ធីរិទ្ធ អ្នកនាំពាក្យសម្តេច ហ៊ុន សែន។

ថ្លែងនៅក្នុងវេទិកាជួបក្រុមប្រឹក្សា ខេត្ត ក្រុង ឃុំ-សង្កាត់ នៅខេត្តស្វាយរៀងថ្ងៃទី ១៤ ខែឧសភា ឆ្នាំ ២០២៦ សម្ដេចតេជោ ហ៊ុន សែន បានស្នើឲ្យពិនិត្យដកមន្រ្តីកាំកុងត្រូ ដែលកុហករឿងទុរេននាំចូល ដើម្បីជាសារព្រមានមន្រ្តីទាំងអស់ កុំឲ្យពូកែកុហកថ្នាក់លើនិងប្រជាជនតទៅទៀត។ សម្ដេចបានមានប្រសាសន៍ថា «ហេតុអ្វីមន្ត្រីយើងទៅកាងជនខិលខូច ខណៈជនខិលខូចបានសារភាពថា បាននាំចូលពីប្រទេសថៃ។ […] ប្រជាពលរដ្ឋមិនទាន់អស់ចិត្តទេ ខ្ញុំក៏មិនទាន់អស់ចិត្តដែរ។ តើមន្ត្រីរូបហ្នឹងបានមានវិធានការហើយនៅ»។

បន្ថែមលើនោះ សម្ដេចបានបញ្ជាក់ថា បញ្ហានេះមិនមែនជារឿងពហិកានោះទេ តែពាក់ព័ន្ធនឹងសុខភាពរបស់ប្រជាពលរដ្ឋ។ សម្តេចតេជោ បានណែនាំដល់មន្ត្រីគ្រប់រូប មិនគួរយកគំរូតាមមន្ត្រីរូបនេះនោះឡើយ។ សម្រាប់មន្ត្រីបែបនេះ សម្តេចតេជោ ហ៊ុន សែន បានសង្កត់ធ្ងន់ថា មិនគួរចាត់វិធានការត្រឹមអនុវត្តន៍វិន័យរបស់មន្ត្រីនោះទេ គួរចាត់វិធានការផ្លូវច្បាប់ ដើម្បីព្រមានមន្ត្រីខិលខូច ដែលមិនគួរកើតមាន។

គួរជម្រាបថា ការស្នើរបស់សម្ដេចតេជោដូចខាងលើធ្វើឡើងបន្ទាប់ពីមានករណីលួចនាំចូលទុរេនពីថៃតាមខេត្តបាត់ដំបង ដែលករណីនោះ មន្ត្រី ក.ប.ប. នៅបាត់ដំបង បានចុះពិនិត្យ ប៉ុន្តែរកពុំឃើញការលួចនាំចូលឡើយ។ ផ្ទុយពីការអះអាងរបស់មន្ត្រី ក.ប.ប. ក្រោយមកសមត្ថកិច្ចនគរបាលសេដ្ឋកិច្ចខេត្តបាត់ដំបង បានស្រាវជ្រាវរកឃើញអាជីវករ ២នាក់ដែលជាប់ពាក់ព័ន្ធ និងឃាត់ខ្លួនបានរម្នាក់ឈ្មោះ អឿន សាក់ឡែន (ហៅអាឡែន) ដែលបានសារភាពថាខ្លួនពិតជាបានលួចនាំចូលទុរេនពីថៃ តាមច្រករបៀង (ច្រកកាប៊ីន ស្រុកភ្នំព្រឹក) ចំនួន ៣ លើកពិតប្រាកដមែន។

ជុំវិញបញ្ហានេះ មហាជនបានរិះគ.ន់យ៉ាងចាស់ដៃ និងបានសម្តែងការមិនពេញចិត្តយ៉ាងខ្លាំង នៅពេលដែលឃើញតុលាការចាត់វិធានការច្បាប់ និងចោទប្រកាន់តែលើភាគីអាជីវករ។ ផ្ទុយទៅវិញ មន្ត្រីជំនាញ ក.ប.ប. ដែលចុះទៅស្រាវជ្រាវបែបលំអែកាលពីដំបូង និងរកមិនឃើញកំហុស បែរជាមិនទាន់មានការទទួលខុសត្រូវ ឬទោសទណ្ឌអ្វីសោះ។

ហេតុដូចនេះ ក្រោយពេលសម្តេច ហ៊ុន សែន បញ្ជាឱ្យដកតំណែងមន្ត្រី ក.ប.ប ខេត្តបាត់ដំបង មហាជនជាច្រើនបានសម្តែងការសាទរយ៉ាងខ្លាំង ដោយចាត់ទុកថាជាសារព្រមានដ៏មានប្រសិទ្ធភាពមួយ កុំឱ្យមន្ត្រីថ្នាក់ក្រោមទម្លាប់ធ្វើរបាយការណ៍ភូតភរថ្នាក់លើ និងប្រជាជនបន្តទៀត៕

តារាចម្រៀង NPN ដែលមានឈ្មោះពិតថា នីន ផាន់នី ស្រាប់តែបង្ហាញអារម្មណ៍របស់ខ្លួនថាទទួលបានភាពកក់ក្តៅពីអ្នកគាំទ្រ មិត្តសិល្បៈ រៀមច្បងទាំងក្នុងនិងក្រៅសិល្បៈដែលតែងជួយប្រាប់កែតម្រូវចាប់តាំងពីលោកបោះជំហានចូលវិថីសិល្បៈ។ ការបង្ហាញនេះធ្វើឡើងក្រោយពី NPN បោះសម្តីថា «អ្នកសិល្បៈនៅខ្មែរកើតខុស Map»។ ការលើកឡើងរបស់ NPN ក៏ជំរុញឱ្យតារាចម្រៀង ណូលី ចេញមកបង្ហាញចំណាប់អារម្មណ៍លើវិថីសិល្បៈដែលបច្ចុប្បន្នមាននិន្នាការទៅខាងវិស័យហ៊ីបហប ស្របពេលបច្ចេក AI កាន់តែវាយលុកខ្លាំង។

បន្ទាប់ពីបង្ហាញអារម្មណ៍ខាងលើនេះម្ចាស់បទ «កូនកាត់បីសាសន៍» ស្រាប់តែបង្ហាញថាតាំងពីលោកចូលសិល្បៈមកលោកទទួលបានភាពកក់ក្តៅនិងអារម្មណ៍ល្អពីអ្នកគាំទ្រនិងអ្នកនៅក្នុងចង្កោមសិល្បៈ។ នៅល្ងាចថ្ងៃទី១៣ ខែឧសភា NPN បានបង្ហោះរូបភាពមួយសន្លឹកដោយភ្ជាប់មកជាមួយនឹងខ្លឹមសារថា «តាំងពីខ្ញុំចូលសិល្បៈមកខ្ញុំទទួលបានអារម្មណ៍ល្អ និង ទទួលបានអារម្មណ៍កក់ក្តៅខ្លាំងណាស់ ពី អ្នកគាំទ្រ និង មិត្តភក្តិនៅក្នុងសិល្បៈ ហើយនិងបងៗនៅក្រៅនិងក្នុងសិល្បៈដែលតែងជួយប្រាប់និងកែតម្រូវផ្លូវខ្ញុំ»។

តារាចម្រៀងមានដើមកំណើតមកពីខេត្តកំពង់ធំរូបនេះបានចាត់ទុកខ្លួនឯងថាមានសំណាងណាស់ព្រោះទទួលបានការផ្តល់កម្លាំងចិត្តទាំងនៅគ្រាលំបាកនិងសប្បាយ ហើយនេះគឺជាចំណែកមួយដ៏ធំដែលធ្វើឱ្យលោកមានកម្លាំងទៅមុខបន្តទៀត។

គួរឱ្យដឹងថាមុននឹងបោះជំហានចូលអាជីពសិល្បៈ NPN មិត្តភក្តិស្និទ្ធស្នាលរបស់តារាចម្រៀង ទេព ពិសិដ្ឋ ធ្លាប់ជាកម្មករចំណាកស្រុក ធ្លាប់ធ្វើជាជាងភ្លើង។ មានមនុស្សជាច្រើនរួមទាំងឪពុករបស់ NPN ផ្ទាល់មិនបានរំពឹងទុកថាលោកនឹងក្លាយជាអ្នកសិល្បៈផ្លាស់ប្តូរវាសនាខ្លួនឯងបាននោះទេ ប៉ុន្តែជោគវាសនា NPN ជាអ្នកកំណត់ខ្លួនឯងរហូតលោកអាចឈរជើងនៅលើអាជីពមួយនេះដែលកំពុងមានការប្រកួតប្រជែងខ្ពស់នៅលើទីផ្សារ៕