សម្លេងផ្ទុះដ៏ខ្លាំងស្ទើរហែកមេឃ អណ្ដាតភ្លើងដ៏សន្ធោសន្ធៅ និងផ្សែងខ្មៅក្រាស់ខ្មឹកគួចទៅលើអាកាស បានត្រូវបានគេរាយការណ៍ថា កើតចេញពីទីតាំងរោងចក្រចម្រាញ់ប្រេងដែលធំជាងគេបង្អស់នៅក្នុងទីក្រុង Port Arthur នៃរដ្ឋ Texas សហរដ្ឋអាមេរិក បានបង្កឲ្យមានការភិតភ័យ និងសង្ស័យថានេះអាចជាសកម្មភាពប៉ុនប៉ងបំផ្ទុះដោយចេតនាពីសំណាក់បុគ្គលឬក្រុមប្រឆាំងណាមួយមិនខាន។

យោងតាមការចុះផ្សាយរបស់សារព័ត៌មានធំៗរបស់សហរដ្ឋអាមេរិក នៅថ្ងៃទី២៣ ខែមីនា ឆ្នាំ២០២៦ បានឲ្យដឹងថា ការផ្ទុះនេះបានកើតឡើងនៅក្នុងបរិវេណរោងចក្រចម្រាញ់ប្រេងដែលដំណើរការដោយក្រុមហ៊ុន Valero Energy Corporation ប៉ុន្តែសម្រាប់មូលហេតុពិតប្រាកដនៃការផ្ទុះមិនទាន់ត្រូវបានគេរកឃើញនៅឡើយ។

តាមរបាយការណ៍របស់អាជ្ញាធរនៅក្នុងតំបន់ កម្មករជាច្រើននាក់ដែលនៅក្នុងរោងចក្រ ត្រូវបានគេសន្និដ្ឋានថាអាចរងរបួស ប៉ុន្តែមន្ត្រីមិនទាន់បានបញ្ជាក់ពីចំនួន ឬភាពធ្ងន់ធ្ងរនៃអ្នកស្លា.ប់ និងរបួសឲ្យជាក់ច្បាស់នោះទេ។ ជាមួយគ្នានេះ ខាងក្រុមហ៊ុនបាននិយាយថា បុគ្គលិកទាំងអស់កំពុងត្រូវបានរាប់បញ្ចូល ខណៈពេលដែលក្រុមសុវត្ថិភាពបន្តវាយតម្លៃស្ថានភាព។

គួរជម្រាបថា រោងចក្រ Valero គឺជារោងចក្រចម្រាញ់ប្រេងឯករាជ្យធំជាងគេបំផុតនៅលើពិភពលោក ដែលជាទីតាំងចម្រាញ់ប្រេងឆៅ ទៅជាប្រេងឥន្ធនៈ ប្រេងម៉ាស៊ូត និងប្រេងយន្តហោះ ហើយមានសមត្ថភាពផលិតប្រេងបានប្រមាណ 435,000 បារ៉ែលក្នុងមួយថ្ងៃ។ ដូច្នេះការរំខានណាមួយចំពោះប្រតិបត្តិការរបស់វា អាចមានផលប៉ះពាល់កាន់តែទូលំទូលាយចំពោះការចែកចាយប្រេងឥន្ធនៈ និងតម្លៃ ជាពិសេសប្រសិនបើការជួសជុលត្រូវការចំណាយយូរ។

ឧប្បត្តិហេតុនេះបន្ថែមទៅលើការព្រួយបារម្ភជាបន្តបន្ទាប់អំពីសុវត្ថិភាពឧស្សាហកម្មនៅក្នុងរោងចក្រថាមពលធំៗ ដែលប្រឈមនឹងគ្រោះថ្នាក់ចំពេលស្ថានការណ៍របស់ពិភពលោកកំពុងមានភាពតានតឹង ហើយវាអាចបង្ករឲ្យមានផលវិបាកយ៉ាងធ្ងន់ធ្ងរដល់កម្មករ សហគមន៍ និងបរិស្ថាន៕

នាយករដ្ឋមន្ត្រីវៀតណាម លោក Pham Minh Chinh បានធ្វើដំណើរបំពេញទស្សនកិច្ចជាផ្លូវការនៅប្រទេសរុស្ស៊ីកាលពីថ្ងៃទី២២ ខែមីនា ឆ្នាំ២០២៦ ដើម្បីជួបពិភាក្សាជាមួយនាយករដ្ឋមន្ត្រីរុស្ស៊ី លោក Mikhail Mishustin ក្នុងគោលបំណងពង្រឹងទំនាក់ទំនងទ្វេភាគី និងកិច្ចសហការវិស័យថាមពល ស្របពេលតម្លៃប្រេងឥន្ធនៈកើនឡើងខ្ពស់លើពិភពលោក រួមទាំងតម្លៃប្រេងនៅវៀតណាមកើនឡើងផងដែរ រហូតដល់៥០% ទៅ៧០% ។

តាមការចុះផ្សាយរបស់សារព័ត៌មាន AFP ដែលដកស្រង់ប្រភពពីមន្ត្រីនៅទីក្រុងហាណូយ គឺនាយករដ្ឋមន្ត្រីវៀតណាម លោក Pham Minh Chinh បានធ្វើដំណើរបំពេញទស្សនកិច្ចទៅប្រទេសរុស្ស៊ីជាផ្លូវការកាលពីថ្ងៃទី២២ ខែមីនា ហើយប្រទេសទាំងពីរនឹងចុះហត្ថលេខាលើកិច្ចព្រមព្រៀងជាច្រើនច្បាប់ រួមទាំងពង្រឹងកិច្ចសហការវិស័យថាមពល និងឧស្ម័ន ។ ដំណើរទស្សនកិច្ចរបស់នាយករដ្ឋមន្ត្រីវៀតណាមទៅកាន់ប្រទេសផលិតប្រេងឥន្ធនៈ ស្របពេលវៀតណាមព្យាយាមបម្រុងប្រេងសម្រាប់ប្រើប្រាស់ក្នុងប្រទេស បន្ទាប់ពីការផ្គត់ផ្គង់ប្រេងលើពិភពលោកផ្អាកដំណើរការភ្លាមៗដោយសារសង្គ្រាមមជ្ឈិមបូព៌ា ។

យោងតាមការបញ្ជាក់របស់រដ្ឋាភិបាលវៀតណាមក្នុងសេចក្តីថ្លែងការណ៍ វៀតណាមនឹងផ្តោតលើការពង្រឹងទំនាក់ទំនងជាមួយរុស្ស៊ី និងបង្កើនកិច្ចសហការពាណិជ្ជកម្ម វិនិយោគ និងថាមពល ។ ក្នុងអំឡុងពេលការបំពេញទស្សនកិច្ចនេះ នឹងមានការចុះហត្ថលេខាលើកិច្ចព្រមព្រៀងសំខាន់ជាច្រើនច្បាប់ពាក់ព័ន្ធនឹងគម្រោងរោងចក្រថាមពលនុយក្លេអ៊ែរ កិច្ចសហការផ្នែកថាមពល ប្រេងឥន្ធនៈ និងឧស្ម័ន ដោយពង្រឹងគ្រប់ផ្នែកនៃពាណិជ្ជកម្ម ការរុករក និងបណ្តុះបណ្តាលធនធានមនុស្ស ។

តាំងពីផ្ទុះសង្គ្រាមរវាងអ៊ីរ៉ង់ជាមួយអាមេរិក និងអ៊ីស្រាអែលកាលពីចុងខែកុម្ភៈ ឆ្នាំ២០២៦ ធ្វើឱ្យតម្លៃប្រេងកើនឡើងខ្ពស់បង្កការបារម្ភពីកង្វះខាតប្រេងលើពិភពលោក ។ តម្លៃប្រេងនៅវៀតណាមក៏កើនឡើងដែរ ក្នុងនោះតម្លៃប្រេងសាំងស៊ុបពែរនៅវៀតណាមកើនឡើងរហូតដល់៥០% និងប្រេងម៉ាស៊ូតកើនឡើង៧០% ។

ហេតុនេះ នាយករដ្ឋមន្ត្រីវៀតណាមក៏ពិភាក្សាតាមទូរស័ព្ទជាមួយប្រទេសជាច្រើនដើម្បីស្នើសុំជំនួយប្រេង រួមមាន ៖ ប្រទេសកាតា គុយវ៉ែត អាល់ហ្សេរី និងជប៉ុន ។ នាយករដ្ឋមន្ត្រីវៀតណាមគ្រោងជួបពិភាក្សាជាមួយនាយករដ្ឋមន្ត្រីរុស្ស៊ី លោក Mikhail Mishustin នៅថ្ងៃទី២៣ ខែមីនា ហើយភាគីទាំងពីរនឹងពិភាក្សាគ្នាពីពាណិជ្ជកម្មរវាងរុស្ស៊ី និងវៀតណាម ដោយផ្តោតលើគម្រោងសហការវិស័យថាមពល និងវិស័យផ្សេងៗ ។

គួរបញ្ជាក់ថា នាយករដ្ឋមន្ត្រីរុស្ស៊ី លោក Mikhail Mishustin ធ្លាប់បំពេញទស្សនកិច្ចនៅទីក្រុងហាណូយកាលពីខែមករា ឆ្នាំ២០២៥ និងចេញសេចក្តីថ្លែងការណ៍រួមបញ្ជាក់ថា រុស្ស៊ីនឹងចូលរួមបង្កើតឧស្សាហកម្មថាមពលនុយក្លេអ៊ែរនៅវៀតណាម ហើយប្រទេសទាំងពីរនឹងធ្វើការរួមគ្នាលើគម្រោងប្រេង និងឧស្ម័ន ។ ពេលនោះ ប្រទេសទាំងពីរបានចុះហត្ថលេខាលើកិច្ចព្រមព្រៀងថាមពលនុយក្លេអ៊ែរ ដោយវៀតណាមកំណត់គោលដៅសាងសង់រោងចក្រថាមពលនុយក្លេអ៊ែរក្នុងរយៈពេល៥ឆ្នាំ ៕

សង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែលដែលអូសបន្លាយពេលជាច្រើនសប្តាហ៍ បានបង្កផលប៉ះពាល់ដល់ពលរដ្ឋនៅជុំវិញពិភពលោក ដោយសារស្ថានការណ៍អសន្តិសុខ កង្វះខាតប្រេងឥន្ធនៈ ឧស្ម័ន និងទំនិញឡើងថ្លៃ ។ ចាប់ពីថ្ងៃទី២១ ដល់ថ្ងៃទី២២ ខែមីនា ឆ្នាំ២០២៦ ពលរដ្ឋប្រទេសជាច្រើន រួមមាន ៖ ពលរដ្ឋអ៊ីស្រាអែល អង់គ្លេស អាល្លឺម៉ង់ អេស្ប៉ាញ និងឥណ្ឌា បានជួបជុំគ្នាធ្វើបាតុកម្មប្រឆាំងសង្គ្រា.មដែលនាំឱ្យបាត់បង់ជីវិ.តមនុស្ស ។

តាមការចុះផ្សាយរបស់សារព័ត៌មានបរទេសកាលពីថ្ងៃទី២២ ខែមីនា ពលរដ្ឋនៅប្រទេសនានាបានប្រមូលផ្តុំគ្នាធ្វើបាតុកម្មប្រឆាំងសង្គ្រាមនៅតំបន់មជ្ឈិមបូព៌ាបង្កឡើងដោយអាមេរិក និងអ៊ីស្រាអែល ដែលរហូតមកដល់ពេលនេះ បានអូសបន្លាយរហូតដល់ជាង៣សប្តាហ៍ ។ សង្គ្រាមបង្កឱ្យមានវិបត្តិថាមពលលើពិភពលោក លើសពីនេះ នឹងរាលដាលកាន់តែខ្លាំងក្លាយជាវិបត្តិសេដ្ឋកិច្ចពិភពលោក នាថ្ងៃអនាគត ។

ពលរដ្ឋអ៊ីស្រាអែលជាច្រើននាក់បានធ្វើបាតុកម្មដោយដើរជាក្បួននៅទីក្រុង Tel Aviv ដើម្បីប្រឆាំងការធ្វើសង្គ្រាម ក្នុងនោះក្រុមបាតុករខ្លះបានលាបពណ៌ក្រហមលើបាតដៃរបស់ពួកគេ ខណៈបាតុករខ្លះទៀតលើកស្លាកសរសេរអក្សរថា «បញ្ឈប់សង្គ្រាម» ឬ «បញ្ឈប់ការបញ្ជូនអាវុធឥឡូវនេះ» ។

នៅទីក្រុងឡុងដ៍ ប្រទេសអង់គ្លេស ពលរដ្ឋបានប្រមូលគ្នាធ្វើបាតុកម្មនៅតាមផ្លូវកាលពីថ្ងៃទី២១ ខែមីនា ព្រមទាំងលើកស្លាកសរសេរអក្សរថា «បញ្ឈប់សង្គ្រាមរបស់លោកប្រធានាធិបតី Trump» និង «បញ្ឈប់ការទម្លាក់គ្រាប់បែកនៅអ៊ីរ៉ង់» ខណៈក្រុមបាតុករខ្លះទៀតជួបជុំគ្នានៅអគារលេខ១០ ផ្លូវដាវនីង គឺជាកន្លែងស្នាក់នៅរបស់នាយករដ្ឋមន្ត្រីអង់គ្លេស ។

រីឯមូលដ្ឋានកងទ័ពអាកាស Fairford តំបន់ Gloucestershire ប្រទេសអង់គ្លេស ដែលកងទ័ពអាកាសអាមេរិក (USAF) មានវត្តមាននៅទីនេះ ក៏បានធ្វើបាតុកម្មប្រឆាំងសង្គ្រាមដែរ ដោយការកាន់បដាសរសេរអក្សរថា «ឈប់វាយប្រហារអ៊ីរ៉ង់» និង «ឈប់ធ្វើឱ្យមនុស្សស្លាប់» ។

ដូចគ្នានេះ ពលរដ្ឋអាល្លឺម៉ង់ជាច្រើននាក់បានធ្វើបាតុកម្មនៅទីក្រុងប៊ែរឡាំងកាលពីថ្ងៃទី២២ ខែមីនា ដើម្បីរំឭកពីកូនសិស្សស្លាប់ក្នុងការវាយប្រហារសាលាបឋមសិក្សានៅប្រទេសអ៊ីរ៉ង់ពេលសង្គ្រាមចាប់ផ្តើម ។ ពលរដ្ឋអាល្លឺម៉ង់លើកស្លាកថា «សិស្សស្រីតូចៗចំនួន១៦៨នាក់ បានស្លាប់ដោយសារអាមេរិក និងអ៊ីស្រាអែល» ។ ពលរដ្ឋអាល្លឺម៉ង់ថា ការបង្កសង្គ្រាមនេះ គឺជាការល្មើសច្បាប់អន្តរជាតិ ហើយវាដូចសង្គ្រាមនៅអ៊ីរ៉ាក់ ។

ចំណែកពលរដ្ឋអេស្ប៉ាញបានជួបជុំគ្នាធ្វើបាតុកម្មនៅទីក្រុងម៉ាឌ្រីដ ដោយកាន់ស្លាកសរសេរថា «ប្រឆាំងសង្គ្រាម» និង «សូមសន្តិភាព» ដោយពលរដ្ឋអេស្ប៉ាញជាច្រើនបានគ្រវីទង់ជាតិប៉ាឡេស្ទីនផងដែរ ។

ប្រទេសឥណ្ឌាវិញ ក្រុមមូស្លីមបានមកចូលរួមធ្វើបាតុកម្មតាមផ្លូវនៅតំបន់កាស្មៀដែលគ្រប់គ្រងដោយឥណ្ឌា ព្រមទាំងបង្ហាញរូបភាពរបស់អតីតមេដឹកនាំកំពូលអ៊ីរ៉ង់ដែលបានស្លាប់ គឺលោក Ayatollah Ali Khamenei ដោយក្រុមមូស្លីមបានស្លៀកពាក់ឈុតពណ៌ខ្មៅដើម្បីកាន់ទុក្ខអតីតមេដឹកនាំកំពូលអ៊ីរ៉ង់ ៕