តារាចម្រៀង លឹម សេរីហាន់នីកា ម្ចាស់ពាន The Voice Cambodia រដូវកាលទី៣ បានបង្ហាញថាមនុស្សបច្ចុប្បន្នសម្លឹងមើលតែសម្ភារៈនិយម។ ការដែល នីកា ចេញមកនិយាយបែបនេះគឺដោយសារតែនាងជិះម៉ូតូទៅច្រៀងហើយត្រូវបានគេមើលរំលងហាក់មិនឱ្យតម្លៃនាង។
កាលពីពេលថ្មីៗនេះតារាចម្រៀង ឈិន ម៉ានិច្ច ម្ចាស់ពាន Cambodian Idol រដូវកាលទី២ បានបង្ហាញពីមនុស្សមួយចំនួនខ្វាយខ្វល់នឹងជីវិតឯកជនរបស់នាងណាស់នៅពេលជិះឡានថ្លៃក៏សួរ នៅពេលជិះឡានអគ្គីសនីក៏សួរ។ សំណេររបស់តារាចម្រៀងរូបនេះបានជំរុញចិត្តឱ្យតារាចម្រៀង លឹម សេរីហាន់នីកា ចែករំលែកបន្តនិងបង្ហាញបទពិសោធន៍ពីអ្វីដែលនាងបានជួបប្រទះ។
ម្ចាស់ពាន The Voice Cambodia រដូវកាលទី៣ បានសរសេរនៅថ្ងៃទី១២ ឧសភា ថា «ខ្ញុំជិះម៉ូតូទៅច្រៀងគេរាងមើលរំលងធ្វើអីរំលងក្បាលតិច សម័យនេះគេឱ្យតម្លៃលើសម្ភារៈនិយមជាងការខំប្រឹង»។ បន្ទាប់ពី ហាន់នីកា ទម្លាយនូវហេតុការណ៍ដែលត្រូវគេមើលងាយមិនឱ្យតម្លៃដោយសារសម្ភារៈនិមអ្នកគាំទ្រនិងតារាចម្រៀង នាង ដាវីន បានលើកទឹកចិត្តតារាចម្រៀងវ័យក្មេងរូបនេះ។ នាង ដាវីន បានបញ្ចេញមតិថា «ខំប្រឹងឱ្យខ្លាំងប្អូន ពេលខ្លាំងមានតម្លៃ»។ ក្នុងអាជីពជាម្ចាស់ពានក្នុងរយៈពេល៣ឆ្នាំមកនេះ លឹម សេរីហាន់នីកា ធ្លាប់បានបង្ហាញថានាងត្រូវបានអ្នកមួយចំនួនមើលងាយពណ៌សម្បុរនាងផងដែរ។
នីកា គឺជាបេក្ខនារីដំបូងគេដែលក្លាយជាម្ចាស់ពាន The Voice Cambodia រដូវកាលទី៣ ដែលទទួលបានត្រឹមមួយកៅអីពីគ្រូបង្វឹក ពេជ្រ សោភា ហើយអាចលើកពានក្នុងវ័យត្រឹម១៦ឆ្នាំក្នុងឆ្នាំ២០២៣។
បន្ទាប់ពីក្លាយជាម្ចាស់ពាន លឹម សេរីហាន់នីកា មានឱកាសចេញបទចម្រៀងជាច្រើនបទដែលបទមួយចំនួនមានការស្តាប់ជាច្រើនលានដងដូចជា «ឯណាពាក្យស្មោះ» «សុំបែកចង់ឱ្យបងលួង»។ ទោះយ៉ាងណារយៈពេលចុងក្រោយនេះប្រជាប្រិយភាពរបស់ លឹម សេរីហាន់នីកា ហាក់នៅនឹងថ្កល់ទោះបីជាមានបទចម្រៀងថ្មីក៏ដោយ៕
