វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃទី ២២ ធ្នូ បានប្រកាសចំៗនៅចំពោះមុខសារព័ត៌មានអន្តរជាតិ ដោយចាត់ទុកប្រទេសថៃ គឺជាប្រទេសចាប់ផ្តើមជម្លោះព្រំដែនជាមួយកម្ពុជាជាថ្មី។ ការថ្លែងរបស់លោកដូណាល់ត្រាំ ធ្វើឡើងក្នុងពិធីប្រកាស ការផលិតនាវាចម្បាំងខ្នាតយក្សថ្មីជាមួយរដ្ឋមន្ត្រីក្រសួងសង្គ្រាម និង រដ្ឋមន្ត្រីកងទ័ពជើងទឹក។

ថ្លែងនៅក្នុងក្នុងអំឡុងពេលប្រកាសអំពីនាវាចម្បាំង Golden Fleet ថ្មីមួយគ្រឿង កាលពីយប់មិញ លោក ដូណាល់ ត្រាំ បាននិយាយថា ប្រទេសថៃកំពុងដើរលើទិសដៅល្អប្រសើរឡើងវិញ ដោយលោកបានលើកឡើងថា៖ «អ្នកដឹងហើយថា ភាគីថៃជាអ្នកចាប់ផ្តើមជម្លោះជាមួយប្រទេសកម្ពុជា ហើយបន្ទាប់មកក៏បានចាប់ផ្តើមបង្កភាពតានតឹងឡើងវិញម្តងទៀត»។

ឆ្លើយតបទៅនឹងសំណួរបស់ អ្នកសារព័ត៌មាន លោក ត្រាំ បានគូសបញ្ជាក់ដូច្នេះថា៖ «ខ្ញុំបានដោះស្រាយបញ្ចប់សង្រ្គាមចំនួន៨។ សកម្មភាពរបស់ថៃបានបង្ហាញឡើងយ៉ាងច្បាស់។ ពួកគេ (ថៃ និងកម្ពុជា) បានចាប់ផ្ដើមសង្រ្គាមជាថ្មី។ ប៉ុន្តែខ្ញុំគិតថាលោក Marco យើងត្រៀមខ្លួនជាស្រេចដើម្បីបញ្ចប់សង្រ្គាមរវាងថៃ និងកម្ពុជា។

គួរបញ្ជាក់ថា ការថ្លែងរបស់លោកដូណាល់ត្រាំដូចខាងលើនេះ ធ្វើឡើងក្រោយពេលដែលលោកទើបតែបានលើកឡើងអំពីបញ្ហាជាន់មីនរបស់ទាហានថៃ ថាជាឧបទ្ទវហេតុ ដែលធ្វើឲ្យប្រទេសថៃមានការខឹងសម្បារយ៉ាងខ្លាំង ចំពោះសេចក្ដីថ្លែងការណ៍របស់លោក។

យ៉ាងណាក៏ដោយ ចំពោះការអះអាងបន្ថែមរបស់លោកនៅពេលនេះ ដោយចាត់ទុកប្រទេសថៃថាបានចាប់ផ្ដើមវា.យប្រហារលើកម្ពុជាមុន កាន់តែឆ្លុះបញ្ចាំងយ៉ាងច្បាស់អំពីការយល់ឃើញរបស់អាមេរិកមកលើជម្លោះរវាងកម្ពុជានិងថៃ ដោយមិនត្រឹមតែអាមេរិកបានដឹងថាថៃជាអ្នកបង្ករសង្រ្គាមប៉ុណ្ណោះទេ តែក៏បានបើកបង្ហាញការពិតឲ្យពិភពលោកបានដឹងផងដែរ៕

សហរដ្ឋអាមេរិក ៖ នៅឆ្នាំ២០២៥ ពលរដ្ឋអាមេរិកដែលធ្វើការក្នុងវិស័យនានាបានបាត់បង់ការងាររហូតដល់ជាង៥ម៉ឺននាក់ ជាពិសេស អ្នកធ្វើការក្នុងវិស័យបច្ចេកវិទ្យាបាត់បង់ការងារច្រើនបំផុត ដោយសារក្រុមហ៊ុនជ្រើសរើសបច្ចេកវិទ្យា AI មកធ្វើការជំនួសមនុស្ស ។ ក្រុមហ៊ុនអាមេរិកជាច្រើនថា បច្ចេកវិទ្យា AI គឺជាកត្តាចម្បងធ្វើឱ្យក្រុមហ៊ុនសម្រេចចិត្តកាត់បន្ថយចំនួនបុគ្គលិក និងរចនាសម្ព័ន្ធក្រុមហ៊ុនដើម្បីបង្កើនប្រសិទ្ធភាពការងារ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី២២ ខែធ្នូ ឆ្នាំ២០២៥ ។

យោងតាមទិន្នន័យរបស់ក្រុមហ៊ុន Challenger, Gray & Christmas បង្ហាញថា នៅឆ្នាំ២០២៥ ពលរដ្ឋអាមេរិករហូតដល់ជាង៥ម៉ឺននាក់ដែលធ្វើការក្នុងក្រុមហ៊ុននានាបាត់បង់ការងារដោយសារក្រុមហ៊ុនប្រើប្រាស់បច្ចេកវិទ្យា AI និងបច្ចេកវិទ្យាផ្សេងៗជំនួសមនុស្ស ទើបធ្វើឱ្យតួនាទីមួយចំនួនមិនត្រូវការប្រើប្រាស់មនុស្សទៀតឡើយ ។

ជាក់ស្តែង រយៈពេលប៉ុន្មានឆ្នាំចុងក្រោយនេះ ក្រុមហ៊ុនធំៗនៅអាមេរិកបានប្រកាសកាត់បន្ថយបុគ្គលិកជាច្រើន រួមមាន ៖

-Amazon ៖ ប្រកាសកាត់បន្ថយបុគ្គលិកប្រមាណ ១ម៉ឺន៤ពាន់នាក់ និងកាត់បន្ថយបុគ្គលិកបន្ថែមទៀត ស្មើជាង៣ម៉ឺននាក់ ដែលធ្វើការនៅអាមេរិកនិងអឺរ៉ុប ដោយក្រុមហ៊ុនបញ្ជាក់ថា ការប្រើប្រាស់បច្ចេកវិទ្យា AI និងការកែសម្រួលរចនាសម្ព័ន្ធក្រុមហ៊ុន គឺជាកត្តាចម្បងជំរុញឱ្យកាត់បន្ថយបុគ្គលិក ។

-Microsoft ៖ បានកាត់បន្ថយបុគ្គលិកជាច្រើនលើកនៅឆ្នាំ២០២៥ គឺចាប់ពី៩ពាន់នាក់ ទៅ១ម៉ឺន៥ពាន់នាក់ ដោយសារក្រុមហ៊ុនផ្លាស់ប្តូរទម្រង់ការងារផ្តោតទៅលើសេវាកម្ម Cloud និងបច្ចេកវិទ្យា AI ។

-Intel ៖ ជាក្រុមហ៊ុនយក្សក្នុងឧស្សាហកម្មបន្ទះឈីប បានកាត់បន្ថយបុគ្គលិក ចាប់ពី២ម៉ឺន៤ពាន់នាក់ ទៅ២ម៉ឺន៥ពាន់នាក់ ឬចាប់ពី១៥% ទៅ២៥% នៃចំនួនបុគ្គលិកសរុបនៅឆ្នាំ២០២៥ ដើម្បីកែសម្រួលហេដ្ឋារចនាសម្ព័ន្ធក្រុមហ៊ុនផ្តោតទៅវិនិយោគលើបច្ចេកវិទ្យា AI និងការផលិតថ្មីៗ ។

-Salesforce ៖ បានកាត់បន្ថយបុគ្គលិក ចាប់ពី១ពាន់នាក់ ទៅ៤ពាន់នាក់ ជាពិសេស កាត់បន្ថយបុគ្គលិកផ្នែកសេវាអតិថិជន ដោយជំនួសមកវិញនូវការងារប្រើប្រាស់បច្ចេកវិទ្យាស្វ័យប្រវត្តិ ។

-IBM ៖ កាត់បន្ថយបុគ្គលិកប្រមាណ ៨ពាន់នាក់ ដើម្បីផ្តោតសំខាន់លើការងារពាក់ព័ន្ធនឹងបច្ចេកវិទ្យា AI និងប្រព័ន្ធ Cloud ទោះជាការងារផ្នែកនេះស្មើត្រឹមតែ១% នៃការងារសរុបក្តី ។

ទោះជាក្រុមហ៊ុនជាច្រើនបញ្ជាក់ថា បច្ចេកវិទ្យា AI គឺជាមូលហេតុចម្បងដែលធ្វើឱ្យមានការកាត់បន្ថយបុគ្គលិក ប៉ុន្តែអ្នកជំនាញ និងនាយកក្រុមហ៊ុនយល់ឃើញដូចគ្នាថា នៅមានកត្តាជាច្រើនទៀតដែលគាំទ្រការកាត់បន្ថយបុគ្គលិក រួមមាន ៖ កាត់បន្ថយដើមទុន, ការជួលបុគ្គលិកច្រើនក្នុងពេលជំងឺកូវីដ-១៩ ឆ្លងរាតត្បាត និងប្រាក់ចំណូលក្រុមហ៊ុនមិនច្បាស់លាស់នាថ្ងៃអនាគត ។

ទោះយ៉ាងណា នាយកក្រុមហ៊ុន IBM ឈ្មោះ Arvind Krishna និយាយថា ក្រុមហ៊ុនជាច្រើនបានកាត់បន្ថយបុគ្គលិករបស់ខ្លួននៅឆ្នាំ២០២៥ មិនមែនដោយសារបច្ចេកវិទ្យា AI ទាំងអស់ទេ គឺបណ្តាលមកពីក្រុមហ៊ុននានាជួលបុគ្គលិកច្រើនក្នុងពេលជំងឺកូវីដ-១៩ ឆ្លងរាតត្បាត ។ នេះជាការចាប់ផ្តើមផ្លាស់ប្តូរទៅកាន់ទីផ្សារការងារក្នុងសម័យទំនើប ៕

អ្នកនាំពាក្យក្រសួងការបរទេសចិនបានបង្ហាញការគាំទ្រចំពោះកិច្ចខិតខំប្រឹងប្រែងរបស់អាស៊ាន ដែលបានរៀបចំកិច្ចប្រជុំពិសេសរដ្ឋមន្ត្រីការបរទេសអាស៊ាន ស្តីពីស្ថានការណ៍បច្ចុប្បន្នរវាងកម្ពុជា-ថៃ នៅទីក្រុងគូឡាឡាំពួរ ប្រទេសមាឡេស៊ី កាលពីថ្ងៃទី២២ ខែធ្នូ ឆ្នាំ២០២៥ ដើម្បីជំរុញការបញ្ចប់សង្គ្រា.មរវាងកម្ពុជានិងថៃ ដោយអ្នកនាំពាក្យក្រសួងការបរទេសចិនស្នើឱ្យប្រទេសទាំងពីរគិតដល់ផលប្រយោជន៍របស់ពលរដ្ឋទាំងសងខាង ដោយចិនគាំទ្រការចរចាសន្តិភាព និងដើរតួនាទីស្ថាបនាក្នុងការកាត់បន្ថយភាពតានតឹង ។

ប្រធានអាស៊ានបានចេញសេចក្តីប្រកាស១ច្បាប់ បង្ហាញការបារម្ភខ្លាំងចំពោះការបន្តអូសបន្លាយភាពតានតឹង និងអរិភាពបណ្តាលឱ្យមានការបាត់បង់ជីវិ.តមនុស្ស និងរងរបួសយ៉ាងច្រើន ព្រមទាំងបំផ្លិចបំផ្លាញហេដ្ឋារចនាសម្ព័ន្ធស៊ីវិល និងការជម្លៀសជនស៊ីវិល ។ ប៉ុន្តែកិច្ចប្រជុំនេះមិនទាន់កំណត់ពេលឈប់បា.ញ់នៅឡើយទេ គឺនឹងជជែកពិភាក្សាក្នុងកិច្ចប្រជុំ GBC លំដាប់រដ្ឋមន្ត្រីក្រសួងការពារជាតិកម្ពុជា-ថៃ នាថ្ងៃទី២៤ ខែធ្នូ ។

ក្នុងអំឡុងពេលរាយការណ៍ព័ត៌មានកាលពីថ្ងៃទី២២ ខែធ្នូ អ្នកនាំពាក្យក្រសួងការបរទេសចិន លោក Guo Jiakun និយាយថា កម្ពុជា និងថៃ គឺជាសមាជិកសំខាន់របស់អាស៊ាន ចិនសរសើរនិងគាំទ្រការព្យាយាមរបស់អាស៊ាន ជាពិសេស ម៉ាឡេស៊ីដែលបានអំពាវនាវឱ្យបញ្ចប់សង្គ្រាមរវាងកម្ពុជា-ថៃ ឈានទៅស្តារសន្តិភាពឡើងវិញដោយគិតពីផលប្រយោជន៍មូលដ្ឋានក្នុងការរក្សាសន្តិភាព និងស្ថិរភាពនៅតាមបណ្តោយព្រំដែនដើម្បីផលប្រយោជន៍ពលរដ្ឋទាំងសងខាង ។

តាំងពីផ្ទុះសង្គ្រាមខ្លាំងរវាងកម្ពុជា-ថៃជាថ្មី ចិនបានព្យាយាមជួយសម្របសម្រួលឱ្យបញ្ចប់សង្គ្រាម ដោយលោក Wang Yi រដ្ឋមន្ត្រីក្រសួងការបរទេសចិនបានពិភាក្សាជាមួយរដ្ឋមន្ត្រីក្រសួងការបរទេសកម្ពុជា-ថៃ ហើយមន្ត្រីក្រសួងការបរទេសចិនក៏បានទំនាក់ទំនងមកកម្ពុជា-ថៃ និងបណ្តាប្រទេសសមាជិកអាស៊ានជាបន្តបន្ទាប់ ។

លើសពីនេះ ប្រេសិតពិសេសចិនទទួលបន្ទុកកិច្ចការអាស៊ី លោក Deng Xijun បានធ្វើដំណើរមកកម្ពុជា-ថៃ ដើម្បីពិភាក្សាពីការបន្ធូរបន្ថយកំដៅជម្លោះរវាងប្រទេសទាំងពីរ ។ ចិននឹងផ្សព្វផ្សាយព័ត៌មានពីការសម្របសម្រួលរបស់ប្រេសិតពិសេសចិនក្នុងឱកាសសមស្រប ដោយចិនគាំទ្រការចរចាសន្តិភាព និងដើរតួនាទីស្ថាបនាក្នុងការកាត់បន្ថយភាពតានតឹង ។ នេះបើតាមការលើកឡើងរបស់លោក Guo Jiakun ។

គួរបញ្ជាក់ថា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា បានចូលរួមក្នុងកិច្ចប្រជុំពិសេសរដ្ឋមន្ត្រីការបរទេសអាស៊ាន ស្តីពីស្ថានភាពបច្ចុប្បន្នរវាងកម្ពុជា និងថៃ នៅទីក្រុងគូឡាឡាំពួរ ប្រទេសម៉ាឡេស៊ី នាថ្ងៃទី២២ ខែធ្នូ រីឯខាងថៃ គឺលោក Sihasak Phuangketkeow រដ្ឋមន្ត្រីក្រសួងការបរទេស ។ ក្នុងឱកាសនេះ ឯកឧត្តម ប្រាក់ សុខុន ស្នើឱ្យមានឈប់បាញ់ត្រឹមម៉ោង១២យប់ ថ្ងៃទី២២ ខែធ្នូ ប៉ុន្តែថៃតម្រូវឱ្យកម្ពុជាធ្វើលិខិតស្នើសុំជាផ្លូវការ ។

លោក Sihasak រដ្ឋមន្ត្រីក្រសួងការបរទេសថៃថា ការកំណត់ពេលវេលាឈប់បា.ញ់ គឺរង់ចាំការពិភាក្សាលម្អិតក្នុងកិច្ចប្រជុំ GBC លំដាប់រដ្ឋមន្ត្រីក្រសួងការពារជាតិកម្ពុជា-ថៃ នាថ្ងៃទី២៤ ខែធ្នូ នៅខេត្តចន្ទបុរី និងរង់ចាំកម្ពុជាបង្ហាញភាពស្មោះត្រង់ជាមុន ថៃទាមទារឱ្យកម្ពុជាធ្វើលិខិតជាលាយលក្ខណ៍អក្សរដើម្បីសុំឈប់បាញ់ជាផ្លូវការ ។ ថៃនៅតែប្រកាន់គោលជំហរបញ្ចប់សង្គ្រាមត្រឹមទ្វេភាគី ដោយមិនស្វាគមន៍ការសម្របសម្រួលពីមហាអំណាចនានា ឬប្រទេសណាទាំងអស់ ។

កងទ័ពថៃបានបើកការវាយប្រហារកម្ពុជាម្តងទៀតយ៉ាងធ្ងន់ធ្ងរតាំងពីថ្ងៃទី៧ ខែធ្នូ ឆ្នាំ២០២៥ ដោយប្រើប្រាស់សព្វាវុធធុនធ្ងន់គ្រប់ប្រភេទ រួមទាំងយន្តហោះចម្បាំង F-16 ទម្លាក់គ្រាប់បែកក្នុងទឹកដីកម្ពុជារាល់ថ្ងៃ ។ ប៉ុន្តែអាស៊ានបរាជ័យក្នុងការស្វែងរកដំណោះស្រាយជម្លោះរវាងកម្ពុជា-ថៃ បើទោះជាអាស៊ាន និងមហាអំណាចនានាមើលឃើញថា ថៃបង្កសង្គ្រាមឈ្លានពានកម្ពុជា ជាពិសេស ទម្លាក់គ្រាប់បែកបំផ្លាញហេដ្ឋារចនាសម្ព័ន្ធកម្ពុជាដោយយន្តហោះចម្បាំង F-16 មិនឈប់ឈរ ប៉ុន្តែអាស៊ាន និងមហាអំណាចនានាគ្មានចំណាត់ការអ្វី ក្រៅពីយល់ព្រមតាមសំណើរបស់ថៃចរចាត្រឹមទ្វេភាគី ៕

ប្រធានាធិបតីរុស្សុី លោក Vladimir Putin បានសម្រេចដាក់ឱ្យប្រើប្រាស់មីសុីលប្រភេទថ្មីជំនាន់ចុងក្រោយគេបង្អស់ ដែលជាប្រភេទមីសុីលមានល្បឿនលឿនជាងសំលេង។

មីសុីលនេះ មានឈ្មោះថា “Oreshnik” ដែលគេរំពឹងថានឹងដាក់ចូលសមរភូមិប្រយុទ្ធជាផ្លូវការនៅចុងឆ្នាំ២០២៥ ។

លោកពូទីនបានអះអាងមីសុីលនេះ ទំនើបជាងមីសុីល Hypersonic ផ្សេងទៀតទាំងអស់ក្នុងលោក ព្រោះវាអាចទម្លុះខែលការពារដែនអាកាសគ្រប់ប្រភេទ។

Oreshnik មានល្បឿនលឿនជាងសំលេងដល់ទៅ១០ដង ពោលអាចហោះបានក្នុងល្បឿន១២៣០០គីឡូម៉ែត្រឯណោះ។

មីសុីលនេះ អាចផ្ទុកក្បាលគ្រាប់នុយក្លេអ៊ែរ៦គ្រាប់ និងអាចបាញ់ចេញបានចម្ងាយ៥០០០ ទៅ៦០០០គីឡូម៉ែត្រ។

គួរបញ្ជាក់ថា រុស្ស៊ី ធ្លាប់បានបាញ់សាកល្បងមីស៊ីលនេះម្តង ទៅលើអ៊ុយក្រែន កាលពីខែវិច្ឆិកាឆ្នាំ២០២៤ ដោយបំពាក់ក្បាលគ្រាប់ធម្មតា មិនដាក់ក្បាលគ្រាប់នុយក្លេអ៊ែរនោះទេ៕

ប្រទេសវៀតណាម បានបើកសម្ពោធជាផ្លូវការនូវគម្រោង Olympic Sports City ដែលជាអគារពហុកីឡដ្ឋាន និងទីក្រុងដ៏ធំសម្បើមមួយនៅលើពិភពលោក។

គម្រោងនេះ គ្រោងនឹងចំណាយថវិកាវិនិយោគប្រមាណ ៣៨ ពាន់លានដុល្លារអាមេរិក គ្របដណ្តប់លើផ្ទៃដី ៩១៧១ ហិកតា ដែលមានទាំងមន្ទីពេទ្យ និងមជ្ឈមណ្ឌលស្រាវជ្រាវថែមទៀតផងដែរ។

ចំណុចសំខាន់នៃគម្រោងOlympic Sports City គឺពហុកីឡដ្ឋាន Trong Dong ដែលលាតសន្ធឹងលើផ្ទៃដី៧៣ ហិកតា និងអាចផ្ទុកអ្នកទស្សនាបានប្រមាណ១៣៥ ០០០នាក់។

បច្ចុបន្នកីឡដ្ឋាន ធំជាងគេរបស់វៀតណាគឺ ពហុកីឡដ្ឋានជាតិ Dinh ដែលអាចផ្ទុកអ្នកទស្សនាបានប្រមាណជា៤មុឺននាក់តែប៉ុណ្ណោះ។

ក្រោយសាងសង់រួច ពហុកីឡដ្ឋាន Trong Dong នឹងក្លាយជា ពហុកីឡដ្ឋានធំជាងគេបំផុតទី២លើពិភពលោក បន្ទាប់ពីពហុកីឡដ្ឋាន Rungrado របស់ប្រទសកូរ៉េខាងជើង ដែលផ្ទុកអ្នកទស្សនាបាន១៥មុឺននាក់៕