មូលហេតុគួរឱ្យចាប់អារម្មណ៍ ដែលបារាំងប្តូរឈ្មោះ “ខេត្តសំរោងទង” មកជា “ខេត្តកំពង់ស្ពឺ”

កំពង់ស្ពឺ គឺជាខេត្តដែលសម្បូរទៅដោយរម្មនីយដ្ឋានធម្មជាតិ ជាពិសេសតំបន់ព្រៃភ្នំ និងទឹកធ្លាក់ ជាពិសេស ក៏ជាខេត្តមួយកំពុងមានសក្ដានុពល ទៅលើការវិនិយោគ និងវិស័យកសិឧស្សាហកម្ម។

ខេត្តនេះមានផ្ទៃដីសរុប ៧០១៧ គីឡូម៉ែត្រការ៉េ មានចម្ងាយ ៤៨ គីឡូម៉ែត្រ ខាងលិចរាជធានីភ្នំពេញ ដែលឆ្លងកាត់ដោយផ្លូវជាតិលេខ៤។

ខេត្តកំពង់ស្ពឺ ត្រូវបានបង្កើតឡើងក្នុងសម័យអាណាព្យាបាលបារាំង នៃរជ្ជកាល សម្តេចព្រះបាទ ស៊ីសុវត្ថិ ដោយព្រះរាជប្រកាសលេខ ៣០ ចុះថ្ងៃទី១៨ ខែមីនា ឆ្នាំ១៩២២។

មុនសម័យអាណាព្យាបាលបារាំង ខេត្តកំពង់ស្ពឺមានឈ្មោះថា “ខេត្តសំរោងទង”។ កាលនោះបារាំងយល់ឃើញថា ទីតាំងខេត្តសំរោងទងតូចចង្អៀត ដីទំនាបទឹកលិចនៅរដូវវស្សា រីឯរដូវប្រាំងខ្វះទឹកប្រើប្រាស់ ក៏ផ្លាស់ទីតាំងខេត្តទៅតាំងនៅត្រង់បន្ទាយភូមិភាគ៣សព្វថ្ងៃ ។

តាមការសន្និដ្ឋានរបស់ព្រឹទ្ធាចារ្យមួយចំនួនយល់ឃើញថា៖”មូលហេតុបានជាបារាំង ប្តូរឈ្មោះ”ខេត្តសំរោងទង” មកជា “ខេត្តកំពង់ស្ពឺ” ពីព្រោះនៅម្តុំក្បាលស្ពានដែលបារាំងកសាងគឺសម្បូរទៅដោយព្រៃដើមស្ពឺ៕