ជាច្រើនដងមកហើយ ម៉ៃ សុគន្ធ តែងតែបង្ហោះជីកកកាយជាមួយនិងការចោទប្រកាន់ទាក់ទងលុយមូលធិនិរបស់ ប៉ីប៉ី ឌី។ ទើបតែស្ងាត់មួយរយៈ ពេលនេះ ម៉ៃ សុគន្ធ ចាប់ផ្តើមបង្ហោះទៀតក្រោយពេល ប៉ីប៉ី ឌី បង្ហាញថាលោកត្រូវខ្មោចសង្កត់ចំនួន២ដង។

គេចាំបានថា ទ្រី សក្កដា និង ម៉ៃ សុគន្ធ បានផ្លោងពាក្យសម្តីទៅវិញទៅមកយ៉ាងក្តៅគគុកផ្តើមចេញពីការបង្ហោះរបស់ ម៉ៃ សុគន្ធ បង្ហាញចម្ងល់ទាក់ទងនឹងលុយមូលធិនិនិងមានការចោទប្រកាន់ថាទទួលបានលុយពីសប្បុរសធម៌ខ្ទង់លានដុលារ ប៉ុន្តែមិនបានបង្ហាញរបាយការណ៍ចំណាយឱ្យទស្សនិកជនឃើញឡើយ។ កន្លងមក ប៉ីប៉ី ឌី ក៏បានចេញមកព្រលះ ម៉ៃ សុគន្ធ ម្តងរួចមកហើយទាក់ទងនឹងលុយជំនួយនេះ ខណៈ ម៉ៃ សុគន្ធ នៅតែបង្ហោះផ្លែផ្កាមិនឱ្យស្ងាត់ហ្វេកប៊ុក។

ជាក់ស្តែងថ្មីៗនេះ ប៉ីប៉ី ឌី បានបង្ហោះពីការយល់សប្តិរបស់ខ្លួនដោយឃើញខ្លួនឯងទៅបុណ្យសពហើយក្រោយមកត្រូវខ្មោចសង្កត់២ដង ហើយលើកទី២ គឺបានឃើញស្រមោលខ្មៅក្រាស់អង្អែលពីស្មាសង្កត់ដល់ក្បាលរហូតភ័យដេកលែងលក់។ ប៉ីប៉ី ឌី បានបង្ហាញថាខ្លួនគេងយល់សប្តិមានមនុស្សប្រុសម្នាក់តាមសម្លាប់ ដោយមិនដឹងថានេះជាប្រផ្នូលមិនល្អ ជាគ្រោះ ឬជារឿងចៃដន្យនោះទេ។

ការបង្ហោះរបស់ ប៉ីប៉ី ឌី ជំរុញឱ្យ ម៉ៃ សុគន្ធ បានដៃបង្ហោះជីកកកាយរឿងលុយជំនួយជាបន្តទៀតទោះបីជាមិនបញ្ជាក់ចំឈ្មោះតែមនុស្សជាច្រើនជឿថាគឺចង់សម្តៅទៅកាន់ ប៉ីប៉ី ឌី។

ម៉ៃ សុគន្ធ បានបង្ហោះថា «បើដូចការយល់សប្តិរបស់អាអូនលក់កាហ្វេផ្លូវកែងមែនបាបកម្មជិតមកទាន់ហើយ វ៉ឺតៗបូកខ្ទង់ចំណាយបញ្ចេញមកសល់ឬមិនសល់បង្ហាញសាធារណៈមក។ លុយជំនួយណាមានទាំងទឹកភ្នែកការឈឺចាប់ និរាស ព្រាត់ប្រាស់និង មនុស្សស្លា-ប់ នឹងចងពៀរអ្នក …..»។ ការបង្ហោះរបស់ ម៉ៃ សុគន្ធ ក៏ទាក់ទាញប្រតិកម្មចម្រុះផងដែរ។

យ៉ាងណា ដ្បិតតែមានការជីកកាយពី ម៉ៃ សុគន្ធ ប៉ុន្តែអ្នកគាំទ្រមួយចំនួនធំបានបង្ហាញការជឿជាក់ទៅកាន់ ប៉ីប៉ី ឌី ព្រោះគេបានឃើញលោកជួយដល់កងទ័ពជួរមុខ ប្រជាជនរងគ្រោះ ជួយក្រុមគ្រួសារទាហានពលី ព្រមទាំងបានចំណាយពេលជាច្រើនចុះខេត្ត សុខចិត្តបិទហាងរកស៊ីខ្លួនឯង តាមតថភាពជាក់ស្តែង៕

សៃហ្វុន លំដាប់រងទី១បវរកញ្ញាចក្រវាលកម្ពុជាឆ្នាំ២០២៣ បានបង្ហាញថានាងជួបរឿងហួសចិត្តមួយនៅប្រទេសវៀតណាម។ ដោយសារតែព័ត៌មានអវិជ្ជមានពីប្រទេសកម្ពុជាចុងក្រោយនេះបានល្បីខ្លាំងនៅក្រៅប្រទេសធ្វើឱ្យមានការគិតជាច្រើនថាកម្ពុជាមិនសុវត្ថិភាព។ ទោះបីជាជួបរឿងហួសចិត្ត សៃហ្វុន បានឆ្លើយតបនិងពន្យល់ទៅវិញព្រមទាំងបង្ហាញអ្វី ដែលល្អៗពីប្រទេសខ្លួន។

នៅថ្ងៃទី២៤ ខែតុលា ឆ្នាំ២០២៥ លំដាប់រងទី១ Miss Universe Cambodia 2023 បានបង្ហោះវីដេអូជាមួយនឹងចំណងជើងថា «ហួសចិត្តពេលគេសួរបែបនេះ ប៉ុន្តែក្នុងនាមជាប្រជាជនខ្មែរយើងត្រូវនិយាយប្រាប់ពីអ្វីដែលល្អៗដែលមាននៅក្នុងប្រទេសយើងទៅកាន់ភ្ញៀវបរទេស»។ សៃហ្វុន បាននិយាយថា នាងទើបតែមកទិញរបស់នៅហាងមួយកន្លែងនៅប្រទេសវៀតណាម ដោយមានគេសួរសំណួរមកកាន់នាងអំពីរឿងរ៉ាវថ្មីៗនេះ។

ក្នុងនាមជាប្រជាជនខ្មែរ សៃហ្វុន បាននិយាយថាត្រូវឆ្លើយអ្វីដែលជាក់ស្តែងកុំឱ្យប្រទេសកម្ពុជាល្បីតែរឿងមិនល្អ។ សៃហ្វុន បានពន្យល់ថាស្រុកខ្មែរគឺរស់នៅបែបសុខសប្បាយ ប្រជាជនប្រកបមុខរបរសុចរិត ហើយអ្នកដែលធ្វើការងារល្អៗគឺរស់នៅសន្តិភាពខ្លាំង។ នាងបានបន្តថាចំពោះព័ត៌មានខ្លះដែលកើតឡើងលេចឮដល់អន្តរជាតិ ឬព័ត៌មានមិនល្អខ្លះ មិនមែនជាជនជាតិខ្មែរជាអ្នកធ្វើនោះទេ ប៉ុន្តែគឺជាជនជាតិផ្សេងៗដែលចូលមកប្រទេសកម្ពុជាធ្វើរឿងអាក្រក់ មានការចាប់ជម្រិតជនបរទេសមិនមែនជាជនជាតិខ្មែរធ្វើដាក់ជនបរទេសនោះទេ។

មិនត្រឹមពន្យល់បែបនេះទេ សៃហ្វុន បានរៀបរាប់ទៀតថានៅខ្មែរមានកន្លែងកម្សាន្ត ទេសចរណ៍ល្អៗ មានប្រជាជនស្មោះត្រង់រួសរាយទៅកាន់ភ្ញៀវបរទេស ហើយរាល់ពេលដែលជនបរទេសទៅខ្មែរដោយល្អ នឹងជក់អារម្មណ៍សប្បាយនិងមានសុវត្ថិភាព។

ជាមួយនឹងបទពិសោធន៍នេះ សៃហ្វុន បានផ្តាំផ្ញើដែរថាប្រសិនបើយើងទទួលបានសំណួរបែបនេះកុំភ័យស្លន់ស្លោរប៉ុន្តែត្រូវឆ្លើយតបពន្យល់គេវិញព្រោះព័ត៌មានខ្លះមិនមែនជាការពិតនោះទេ។ ត្រង់ចំណុចនេះ សៃហ្វុន ក៏បានលើកឡើងថាយើងពិបាកនឹងបន្ទោសគេណាស់ព្រោះគេមើលព័ត៌មានហើយមិនបានផ្ទៀងផ្ទាត់ធ្វើឱ្យប៉ះពាល់ដល់កេរ្តិ៍ឈ្មោះប្រទេសកម្ពុជា៕

ពេជ្រ វត្តីសារ៉ាវឌ្ឍី លំដាប់រងទី២បវរកញ្ញាចក្រវាលកម្ពុជាឆ្នាំ២០២៥ និង អ៊ិន លក្ខិណា Miss Cosmo Cambodia 2024 បានជូនពរនិងរំពឹងទៅកាន់ ហ្វីយ៉ាតា បវរកញ្ញាចក្រវាលកម្ពុជាឆ្នាំ២០២៥ នៅក្នុងការតំណាងប្រទេសកម្ពុជាប្រកួតនៅលើឆាកអន្តរជាតិលើទឹកដីប្រទេសថៃ។

កាលពីថ្ងៃទី២២ ខែតុលា បណ្តាញសង្គមហ្វេកប៊ុក និង Instagram អង្គការ Miss Universe បានបង្ហោះអបអរសាទរម្ចាស់មកុដ Miss Universe Cambodia 2025 ដែលប្រកួតកាលពីកន្លងមកនេះដែលជ័យជម្នះគឺបានទៅលើ ថៃ នារីសុជាតា ហៅ ហ្វីយ៉ាតា។ អង្គការនេះបានពណ៌នាពី ហ្វីយ៉ាតា ជាមួយនឹងការឆ្លុះបញ្ចាំងពីភាពស្រស់ស្អាត និងបេះដូងកម្ពុជាហើយបោះជំហានទៅមុខដោយទំនុកចិត្ត និងបន្តលើកទឹកចិត្តពិភពលោក។

ក្រោយពីស្ថាប័ន Miss Universe បង្ហាញពីអ្នកតំណាងកម្ពុជានៅលើគេហទំព័រផ្លូវការបានធ្វើឱ្យអ្នកគាំទ្រជាច្រើនរំភើបចិត្តដោយបានបញ្ចេញមតិល្អៗជាច្រើនបង្ហាញការអបអរចំពោះ ហ្វីយ៉ាតា។ ក្នុងនោះ ពេជ្រ វត្តីសារ៉ាវឌ្ឍី និង អ៊ិន លក្ខិណា បានចែករំលែកបន្តនិងបង្ហាញការអបអរផងដែរ។

ពេជ្រ វត្តីសារ៉ាវឌ្ឍី បានសរសេរថា «ទៅចូលថប់នៅលើទឹកដីថៃឡែនឱ្យមើលមួយ ឱ្យស្គាល់ថាបវកញ្ញាខ្មែរខ្លាំងមិច»។ ងាកមក អ៊ិន លក្ខិណា វិញបានសរសេរថា «Cambodia នារីរឹងមាំនឹងទៅកាន់ឆាកអន្ដជាតិនាពេលខាងមុខនេះ សូមអោយដំណើររបស់បងទទួលជោគជ័យ ខ្ញុំពិតជាមានមោទនភាពចំពោះបងស្រីណាស់»។

គួរបញ្ជាក់ផងដែរថា ថៃ នារីសុជាតា ហៅ ហ្វីយ៉ាតា MUC07 បានគ្រងមកុដ Miss Universe Cambodia 2025 កាលពីថ្ងៃទី១២ ខែកញ្ញា ឆ្នាំ២០២៥។ ដ្បិតថាថៃជាម្ចាស់ផ្ទះរៀបចំក្នុងឆ្នាំនេះ ហើយនៅមានអ្នកចង់បង្អាក់ដំណើរក្តី ប៉ុន្តែ ហ្វីយ៉ាតា បានបង្ហាញជំនឿចិត្តយ៉ាងមុតមាំនឹងចូលរួមប្រកួតមិនឱ្យបាត់ឈ្មោះ Cambodia នៅលើឆាកអន្តរជាតិឡើយ។ រូបនាងនឹងត្រូវចេញទៅប្រកួតនៅខែវិច្ឆិកា ឆ្នាំ២០២៥ ខាងមុខនេះ៕

តារាចម្រៀង លីម តិចម៉េង បានផ្តល់ឱកាសជាលើកទី២និងជាលើកចុងក្រោយទៅកាន់បុគ្គល គុណ ពៅណា បន្ទាប់ពីតាមយារយីឯកជនភាពរបស់ខ្លួនអស់រយៈពេលជាច្រើនខែមកហើយ។ ជុំវិញករណីផ្ទុះកក្រើកនេះ តារាចម្រៀង នាង ដាវីន ក៏បានចេញមកបញ្ជាក់ភាពស្អាតស្អំរបស់ លីម តិចម៉េង ថែមទាំងមានការអាណិតផងនិងចង់សើចផងទៅកាន់មិត្តសម្លាញ់ខ្លួន។

កាលពីល្ងាចថ្ងៃទី២៣ ខែតុលា ឆ្នាំ២០២៥ លីម តិចម៉េង បាន Live សុំជំនួយបន្ទាប់ពីបុគ្គលម្នាក់ឈ្មោះ គុណ ពៅណា តាមរំខានឯកជនភាពរបស់លោក ដែលមកដល់ផ្ទះតែម្តង ខណៈមានការរំខានលោកអស់រយៈពេលជាច្រើនខែមកហើយ។ បុគ្គលនេះថែមទាំងប្រឌិតរឿងចោទប្រកាន់ដោយអះអាងថាមានទំនាក់ទំនងស៊ីជម្រៅជាមួយ លីម តិចម៉េង ហើយចោទថាមិនទទួលខុសត្រូវ ដែលធ្វើឱ្យទស្សនិកជនស្តាប់ហើយព្រឺសម្បុរ។ ការ Live របស់ តិចម៉េង មានអ្នកទស្សនាផ្ទាល់រាប់ម៉ឺននាក់ ខណៈតារាចម្រៀងរូបនេះក៏បានទាក់ទងក្រុមការងារ មេធាវី និងសមត្ថកិច្ចមកជួយអន្តរាគមន៍។

ក្រោយមក លីម តិចម៉េង បានបង្ហាញក្រដាសស្នាមមួយសន្លឹកជាកិច្ចសន្យារបស់បុគ្គល គុណ ពៅណា ដោយបញ្ជាក់ថានេះជាលើកចុងក្រោយសម្រាប់បុគ្គលនេះនិងជាលើកទី២ ដែលលោកបានទុកឱកាសក្នុងនាមជាខ្មែរ បើមានលើកទី៣ ច្បាប់ជាអ្នកដោះស្រាយ។ គុណ ពៅណា បានធ្វើកិច្ចសន្យានៅចំពោះមុខកងរាជអាវុធហត្ថដែលមានចំនួន៣ចំណុចគឺព្រមលុបចោលរាល់វីដេអូរសំណេរផ្សេងៗដែលពាក់ព័ន្ធជាមួយ លីម តិចម៉េង ទី២ ឈប់រំខានឯកជនភាពក្នុងការរស់នៅ និងទី៣ បញ្ឈប់រាល់ការលាបពណ៌ប៉ះពាល់ដល់កិត្តិយស លីម តិចម៉េង តទៅទៀត។

ទាក់ទិនឧប្បត្តិហេតុនេះ តារាចម្រៀង នាង ដាវីន ដែលជាមិត្តសម្លាញ់របស់ លីម តិចម៉េង បានចេញវីដេអូមួយដោយអះអាងភាពស្មោះត្រង់ថា តិចម៉េង ពុំដែលស្គាល់បុគ្គល គុណ ពៅណា នោះទេ។ នាង ដាវីន បានទទួលស្គាល់ថាពួកគេជាមនុស្សរបស់មហាជន ដែលមានការស្រលាញ់ច្រើនតែករណីនេះអស់ឯកជនភាពក្លាយទៅជាសម្ពាធព្រោះមានការថតផ្ទះ តិចម៉េង និងទម្លាក់ទីតាំងហើយមិនប្រាកដថាមានគេស្រលាញ់រាប់អានទាំងអស់នោះទេ គឺគិតពីសុវត្ថិភាពខ្លួនឯងដែរ។

នាង ដាវីន ថាលោកអាសូរមិត្តសម្លាញ់យ៉ាងខ្លាំង ហើយលោកសុំអធា្រស្រ័យដែលមានការសើចបែបនេះព្រោះតែហួសចិត្តខ្លាំងពេក ព្រោះមនុស្សធម្មតាបើមករញ៉េរញៃគឺមានការនិយាយគ្នាស្តាប់បានប៉ុន្តែករណីនេះមិនដឹងថាត្រូវនិយាយយ៉ាងមិចចំពោះបុគ្គលម្នាក់ហ្នឹងឡើយ៕

បន្ទាប់ពីមានរឿងផ្ទុះកក្រើករវាងតារាចម្រៀង លីម តិចម៉េង និងបុគ្គល គុណ ពៅណា ពិធីករ តាប៊ុយ បានបង្ហោះសំណេរសួរចិត្តទស្សនិកជនព្រោះលោកចង់សម្ភាសន៍ គុណ ពៅណា ប៉ុន្តែសំណេរនោះត្រូវបានគេរិះគន់យ៉ាងច្រើនរហូតបាត់ចេញពីហ្វេកប៊ុក។ ក្រោយមក តាប៊ុយ បានបង្ហោះក្នុងន័យហាក់អន់ចិត្តព្រោះអ្នកដទៃសម្ភាសន៍បានតែលោកវិញផ្អើលឋានទាំងបី ខណៈ តាប៊ុយ ថាវីដេអូត្រឹមត្រូវគ្មានអ្នកទស្សនា។

ក្រោយពីលុបឬលាក់ការបង្ហោះទាក់ទងនឹងការចង់សម្ភាសន៍របស់ខ្លួនទៅកាន់បុគ្គល គុណ ពៅណា ពិធីករ តាប៊ុយ បានបង្ហោះសំណេរមួយទៀតថា «គេមួយប្រទេសសំភាសន៍ម្នាក់ហ្នឹងបាន តែបើខ្ញុំសម្ភាសន៍ដែរ ដឹងតែផ្អើលភពទាំង៣ ហេតុអីទៅ?»។ ភ្លាមៗសំណេរមួយនេះត្រូវបានអ្នកលេងបណ្តាញសង្គមចូលទៅបញ្ចេញមតិជាច្រើនទៅលើការបង្ហោះរបស់ តាប៊ុយ «ព្រោះលោកជាតារាសង្ហា និងមានការងារល្អផ្សេងទៀតស័ក្តិសមជាងទៅធ្វើអ្នកសម្ភាស៍មនុស្សមានបញ្ហាសតិ។, ធ្វើអ្វីដែលសមគួរធ្វើឱ្យល្អទៅណាស្តាយសមត្ថភាព។ ,ធ្វើអ្វីដឹងខ្លួនឯងហើយចាំបាច់សួរគេ»។ អ្នកខ្លះក៏និយាយថាដោយសារតែ តាប៊ុយ សម្ភាសន៍គេភ្លាវពេក។

គួរឱ្យដឹងថា តាប៊ុយ បានធ្វើឱ្យមនុស្សជាច្រើនរិះគន់បន្ទាប់ពីចង់សម្ភាសន៍និងសុំលេខទូរសព្ទរបស់បុគ្គល គុណ ពៅណា ប៉ុន្តែសំណេរនោះទស្សនិកជនមិនបានឃើញទៀតឡើយ។

ក្រោយពីបង្ហោះសំណេរហាក់ដូចជាកំពុងអាក់អន់ចិត្ត តាប៊ុយ បានបង្ហោះសំណេរមួយទៀតថា «ខុសមកពីអ្នកផលិតមាតិកាឬអ្នកមើល? វីដេអូត្រឹមត្រូវគ្មាន view តែបើបែកស្លុយដឹងតែមើល»។

គួរបញ្ជាក់ផងដែរថា កន្លងមកថ្មីៗនេះពិធីករ តាប៊ុយ ហាក់មានរាសីស្រុតចុះយ៉ាងខ្លាំងព្រោះតែរងការរិះគន់ពីមហាជនជាបន្តបន្ទាប់។ ជាក់ស្តែងកាលពីលោកសម្ភាសន៍ ពូស្ករទាញដែលល្បីក្នុងខេត្តសៀមរាបត្រូវបានមហាជនរិះគន់ចាស់ដៃ៕