Unitree Robotics គឺជាក្រុមហ៊ុនផលិតមនុស្សយន្តដ៏ល្បីល្បាញនៅប្រទេសចិន កាលពីថ្ងៃទី១២ ខែឧសភា ឆ្នាំ២០២៦ បានបង្ហាញមនុស្សយន្តប្រភេទ «GD01» អាចបំលែងរូបរាង និងមនុស្សអង្គុយបញ្ជានៅខាងក្នុង ហើយក្រុមហ៊ុននឹងបញ្ជូនទៅធ្វើការនៅកន្លែងគ្រោះថ្នា.ក់ និងលក់ឱ្យអ្នកមានទ្រព្យសម្បត្តិស្តុកស្តម្ភ ក្នុងតម្លៃជាង៦សែនដុល្លារ ។ ការបង្ហាញមនុស្សយន្តនេះធ្វើឱ្យផ្ទុះការចាប់អារម្មណ៍យ៉ាងខ្លាំងលើពិភពលោក និងប្រៀបធៀប GD01 ជាមួយមនុស្សយន្តផ្សេងទៀតក្នុងរឿងកុនថា ការស្រមើសម្រៃរបស់វិទ្យាសាស្ត្រកំពុងក្លាយជាការពិត ប៉ុន្តែតម្លៃរបស់វាខ្ពស់ពេក ។

មនុស្សយន្ត GD01 មានកម្ពស់រហូតដល់ជាង២ម៉ែត្រ និងទម្ងន់ប្រមាណ៥០០គីឡូក្រាម (រួមទាំងអ្នកអង្គុយបញ្ជានៅខាងក្នុង) ។ វាអាចបំលែងររូបរាងពីការដើរដោយជើង២ (ឈរត្រង់) ទៅជាដើរដោយជើង៤ ដើម្បីធ្វើដំណើរនៅទីកន្លែងលំបាកៗ ដូចជា ៖ កាំជណ្តើរ និងផ្លូវជម្រាល ព្រមទាំងមានដៃយ៉ាងរឹងមាំអាចបំផ្លាញអ្វីនៅទើសមុខ (ដូចជា បំផ្លាញជញ្ជាំងស៊ីម៉ងត៍) ។

ក្នុងវីដេអូការបញ្ចេញសមត្ថភាពរបស់មនុស្សយន្ត ក្រុមហ៊ុន Unitree Robotics បានប្រកាសលក់ក្នុងតម្លៃ ៣លាន ៩សែនយាន់ (ឬជាង៦សែនដុល្លារ) និងបង្ហាញនូវទំនុកចិត្តទៅលើមនុស្សយន្តរបស់ខ្លួន ។ ប្រធានក្រុមហ៊ុន លោក វាំង ស៊ីងស៊ីង គឺជាអ្នកសាកល្បងសមត្ថភាពមនុស្សយន្តនេះដោយខ្លួនឯង ដោយការអង្គុយបញ្ជានៅខាងក្នុង ។

មហាជនបានកោតសរសើរពីសមត្ថភាពដ៏អស្ចារ្យ ប៉ុន្តែវាមានតម្លៃខ្ពស់ពេករហូតដល់ជាង៦សែនដុល្លារ ដែលក្រុមហ៊ុនអាជីវកម្មនានាមិនអាចទិញបាន ទើបក្រុមហ៊ុនបញ្ជាក់ថា នេះគ្រាន់តែជាតម្លៃប៉ាន់ស្មានលើកដំបូងប៉ុណ្ណោះ ។ ប្រសិនបើមានអតិថិជនកុម្ម៉ង់ទិញច្រើន ក្រុមហ៊ុននឹងអភិវឌ្ឍន៍សមត្ថភាព និងបញ្ចុះតម្លៃ ប៉ុន្តែសម្រាប់ពេលបច្ចុប្បន្ន ក្រុមហ៊ុននឹងបញ្ជូនវាទៅធ្វើការនៅកន្លែងគ្រោះថ្នាក់ ដូចជា ៖ កន្លែងពន្លត់ភ្លើង ព្រមទាំងបញ្ជូនទៅធ្វើការនៅសួនកម្សាន្ត និងកន្លែងថតភាពយន្ត ។

កាលពីឆ្នាំ២០២៥ ក្រុមហ៊ុន Unitree Robotics បានចូលរួមក្នុងចំណែកទីផ្សារលក់មនុស្សយន្ត Humanoid នៅទូទាំងពិភពលោក ស្មើជិត៩០% ហើយក្រុមហ៊ុននេះជាក្រុមហ៊ុនតែមួយគត់ដែលបានលក់មនុស្សយន្តរហូតដល់ជាង៥,៥០០គ្រឿងក្នុងឆ្នាំ២០២៥ ។

បើតាមអ្នកវិភាគ ការលក់មនុស្សយន្តក្នុងចំនួនច្រើននេះ ដោយសារតែសមត្ថភាពផលិតរបស់ក្រុមហ៊ុនប្រកបដោយប្រសិទ្ធភាព និងថាមពលថ្ម ព្រមទាំងមានការគាំទ្រពីរដ្ឋាភិបាលចិនផងដែរ ដែលជំរុញឱ្យក្រុមហ៊ុនផលិតមនុស្សយន្តមានលក្ខណៈស្តង់ដារ ៕

រដ្ឋាភិបាលថៃក្រោមការដឹកនាំរបស់នាយករដ្ឋមន្ត្រី លោក Anutin Charnvirakul នៅថ្ងៃទី១៤ ខែឧសភា ឆ្នាំ២០២៦ បានសុំប្រទេសជិតខាង គឺឡាវ និងមីយ៉ាន់ម៉ា ជួយដោះស្រាយបញ្ហាខ្យល់ពុល PM2.5 កើនឡើងខ្លាំងក្នុងប្រទេសរបស់ខ្លួនដោយសារការដុតព្រៃ និងកាកសំណល់កសិកម្ម ។ ថៃសុំបង្កើតបន្ទប់ត្រួតពិនិត្យ (War Room) ក្នុងប្រទេសទាំងពីរ ដើម្បីតាមដានខ្យល់ពុល, ប្រើប្រាស់ផ្កាយរណបចែករំលែកទិន្នន័យ, ប្រើប្រាស់ប្រព័ន្ធតាមដានពេលវេលាជាក់ស្តែង (Real-time) កំណត់ចំណុចក្តៅនៃភ្លើងឆេះព្រៃ និងតាមដានការដុតកសិកម្មតាមបណ្តោយព្រំដែន ដែលការសុំជំនួយនេះ បន្ទាប់ពីរដ្ឋាភិបាលថៃពុំអាចដោះស្រាយបាន និងភ្ញៀវទេសចរបរទេសលុបចោលដំណើរកម្សាន្ត ។

តាមការចុះផ្សាយរបស់សារព័ត៌មាន Thairath នៅថ្ងៃទី១៤ ខែឧសភា អ្នកនាំពាក្យរដ្ឋាភិបាលថៃ អ្នកស្រី ឡាលិដា ផឺតវិវឌ្ឍនា ឱ្យដឹងថា រដ្ឋាភិបាលថៃក្រោមការដឹកនាំរបស់លោក Anutin បានស្នើឱ្យស្ថាប័នពាក់ព័ន្ធដោះស្រាយបញ្ហាខ្យល់ពុល PM2.5 កំពុងកើនឡើងខ្លាំង និងសុំប្រទេសជិតខាងជួយដោះស្រាយផងដែរ ។ បន្ទាប់ពីផ្កាយរណបបង្ហាញរូបភាពពីចំណុចក្តៅដោយសារការដុតក្នុងប្រទេសថៃ និងប្រទេសជិតខាង នាយកដ្ឋានត្រួតពិនិត្យការបំពុល បានសហការជាមួយស្ថាប័នពាក់ព័ន្ធបង្កើតបន្ទប់ត្រួតពិនិត្យ (War Room) នៅឡាវ និងមីយ៉ាន់ម៉ា ដើម្បីតាមដានការបំពុលបរិយាកាសយ៉ាងយកចិត្តទុកដាក់ ។

កាលពីឆ្នាំ២០២៤ ថៃបានសុំបង្កើតបន្ទប់ត្រួតពិនិត្យ (War Room) នៅតំបន់បរកែវ និងតំបន់សៃយ៉ាក់ប៊ូលី ប្រទេសឡាវ ព្រមទាំងសុំបង្កើតបន្ទប់នេះនៅខេត្តថាឃិឡិក ប្រទេសមីយ៉ាន់ម៉ា ។ បន្ទាប់មក នៅឆ្នាំ២០២៥ ថៃសុំឡាវ បង្កើតបន្ទប់នេះបន្ថែមទៀតនៅតំបន់ហ្លួងណាមថា និងសុំមីយ៉ាន់ម៉ា បង្កើតបន្ទប់នេះនៅខេត្តឈៀងទុង និងទីក្រុងណៃពិដា ហើយនៅខែឧសភា ឆ្នាំ២០២៦ បង្កើតនៅខេត្តតុងជី ប្រទេសមីយ៉ាន់ម៉ា ។

បន្ទប់ត្រួតពិនិត្យ (War Room) ធ្វើឡើងក្នុងគោលបំណងត្រួតពិនិត្យប្រភពខ្យល់ពុល, ស្វែងរកចំណុចក្តៅតាមរយៈរូបភាពផ្កាយរណប និងតាមដានព័ត៌មានឧតុនិយម ដើម្បីបង្កើនការប្រុងប្រយ័ត្ន ក៏ដូចជារៀបចំគម្រោងដោះស្រាយការបំពុលបរិយាកាសក្នុងតំបន់យ៉ាងមានប្រសិទ្ធភាព ។

ការសុំជំនួយឱ្យអ្នកជិតខាងជួយប្រទេសខ្លួន នឹងធ្វើឱ្យថៃអាចដោះស្រាយបញ្ហាខ្យល់ពុល PM2.5, កាត់បន្ថយផលប៉ះពាល់សុខភាពពលរដ្ឋ និងលើកកម្ពស់វិស័យទេសចរណ៍នៅភាគខាងជើងឡើងវិញ បន្ទាប់ពីភ្ញៀវទេសចរបរទេសលុបចោលដំណើរកម្សាន្តព្រោះតែបារម្ភពីផលប៉ះពាល់សុខភាព ។ នេះបើតាមការលើកឡើងរបស់អ្នកនាំពាក្យរដ្ឋាភិបាលថៃ ។

គួរបញ្ជាក់ថា បញ្ហាខ្យល់ពុល PM 2.5 បានគ្របដណ្តប់ប្រទេសថៃបណ្តាលឱ្យពលរដ្ឋធ្លាក់ខ្លួនឈឺ ស្វែងរកការព្យាបាល និងប៉ះពាល់សេដ្ឋកិច្ចយ៉ាងធ្ងន់ធ្ងរ ។ តំបន់រងផលប៉ះពាល់ខ្លាំងជាងគេ គឺភាគខាងជើង ជាពិសេស ខេត្តឈៀងម៉ៃ តែងតែជាប់ចំណាត់ថ្នាក់លេខ១ គឺជាខេត្តរងការបំពុលខ្យល់ខ្លាំងបំផុតនៅលើពិភពលោក ដោយសារកម្រិតខ្យល់ពុលហក់ឡើងខ្ពស់ហួសពីស្តង់ដារ ដែលជាកម្រិតគ្រោះថ្នាក់បំផុត បន្ទាប់មក ទីក្រុងបាងកក និងតំបន់ជុំវិញ ដែលបង្ខំឱ្យពលរដ្ឋពាក់ម៉ាស់ កាត់បន្ថយការងារក្រោមកំដៅថ្ងៃ ។

ពលរដ្ឋថៃក្នុងតំបន់ទាំងនេះជួបប្រទះបញ្ហារលាកភ្នែក ជំងឺផ្លូវដង្ហើមធ្ងន់ធ្ងរ និងប្រឈមជំងឺមហារីកសួត ដោយសារស្រូបខ្យល់ពុលរយៈពេលវែង ។ វាក៏ប៉ះពាល់ដល់វិស័យទេសចរណ៍ដែលជាប្រភពចំណូលជាតិដ៏សំខាន់ផងដែរ ជំរុញឱ្យភ្ញៀវទេសចរបរទេសលុបចោលដំណើរកម្សាន្តទៅកាន់តំបន់រងផលប៉ះពាល់ ។ រីឯរដ្ឋាភិបាលថៃមិនអាចដោះស្រាយបញ្ហាបានឡើយ បានត្រឹមតែឱ្យពលរដ្ឋធ្វើការពីផ្ទះ (Work from Home), ចែកម៉ាស់ឱ្យពាក់ និងសុំអ្នកជិតខាងជួយដោះស្រាយ ៕

ពិភពលោកចាប់អារម្មណ៍ខ្លាំងពីប្រធានាធិបតីអាមេរិក លោក Donald Trump កាលពីថ្ងៃអង្គារ ទី១២ ខែឧសភា ឆ្នាំ២០២៦ បានបង្ហោះរូបភាព១សន្លឹកបង្ហាញពីប្រទេសវេណេស៊ុយអេឡា គឺជារដ្ឋទី៥១របស់អាមេរិក បន្ទាប់ពីលោកផ្តល់សម្ភាសន៍ជាមួយសារព័ត៌មាន Fox News ថា កំពុងពិចារណាពីផែនការដាក់បញ្ចូលវ៉េណេស៊ុយអេឡា ដែលជាប្រទេសសម្បូរប្រេងឥន្ធនៈស្មើនឹង៤០លានលានដុល្លារ ឱ្យក្លាយជារដ្ឋថ្មីរបស់អាមេរិក ខណៈប្រធានាធិបតីស្តីទីវេណេស៊ុយអេឡាបដិសេធយ៉ាងដាច់អហង្ការចំពោះគំនិតនេះ និងថា វេណេស៊ុយអេឡាជាប្រទេសឯករាជ្យ ។ បើតាមអ្នកវិភាគ ការបង្ហោះរូបភាពនេះ ស្របពេលលោកប្រធានាធិបតី Trump ទៅបំពេញទស្សនកិច្ចនៅចិន គឺដើម្បីបង្ហាញឱ្យមេដឹកនាំចិនដឹងថា អាមេរិកមានឥទ្ធិពលលើវេណេស៊ុយអេឡា ។

សារព័ត៌មាននានារបស់អាមេរិកបានចុះផ្សាយដូចៗគ្នាថា មូលហេតុដែលលោកប្រធានាធិបតី Trump ចាប់អារម្មណ៍ចង់ដាក់បញ្ចូលវេណេស៊ុយអេឡាជារដ្ឋទី៥១ ដោយសារលោកមើលឃើញប្រទេសនេះសម្បូរធនធានប្រេងឆៅច្រើនបំផុតលើពិភពលោក ដែលអាចឱ្យអាមេរិកដោះស្រាយបញ្ហាបំណុលរបស់ខ្លួន និងអាចផ្គត់ផ្គង់ប្រេងសម្រាប់ការប្រើប្រាស់របស់ពលរដ្ឋអាមេរិក ។

ជុំវិញបញ្ហានេះ អ្នកវិភាគភូមិសាស្ត្រនយោបាយយល់ថា ការបង្ហោះរូបភាពវេណេស៊ុយអេឡាជារដ្ឋទី៥១ របស់អាមេរិក ស្របពេលលោកប្រធានាធិបតី Trump ទៅបំពេញទស្សនកិច្ចនៅប្រទេសចិន គឺជាការបង្ហាញពីកម្លាំងយោធាដើម្បីឱ្យរដ្ឋាភិបាលចិនដឹងថា វេណេស៊ុយអេឡាសម្បូរប្រេងឆៅស្ថិតនៅតំបន់អាមេរិកឡាទីននេះស្ថិតនៅក្រោមការគ្រប់គ្រងរបស់រដ្ឋាភិបាលអាមេរិក ព្រមទាំងទប់ស្កាត់ឥទ្ធិពលចិន ។

កាលពីថ្ងៃទី១២ ខែឧសភា លោកប្រធានាធិបតី Trump បានបង្ហោះរូបភាពក្នុងបណ្តាញសង្គម Truth Social របស់ខ្លួន ដោយការយកទង់ជាតិអាមេរិកទៅដាក់លើរូបភាពប្រទេសវេណេស៊ុយអេឡា ហើយសរសេរប្រទេសនេះជារដ្ឋទី៥១ របស់អាមេរិក» ។ លោកថា កំពុងគិតគូរពីអនាគតរបស់វេណេស៊ុយអេឡានាថ្ងៃអនាគត និងកោតសរសើរពីប្រតិបត្តិការរបស់កងទ័ពអាមេរិកចាប់ខ្លួនអតីតមេដឹកនាំវេណេស៊ុយអេឡា និងភរិយា កាលពីថ្ងៃទី៣ ខែមករា កន្លងមក គឺជាជោគជ័យដ៏ធំធេង និងអស្ចារ្យ ហើយការដាក់បញ្ចូលវេណេស៊ុយអេឡាជារដ្ឋថ្មី អាមេរិកនឹងទទួលបានផលប្រយោជន៍ថាមពលយ៉ាងច្រើនមហាសាល ។

រូបភាពនេះធ្វើឱ្យពិភពលោកចាប់អារម្មណ៍យ៉ាងខ្លាំង និងចែកចាយក្នុងបណ្តាញសង្គមស្របពេលលោកធ្វើដំណើរបំពេញទស្សនកិច្ចនៅប្រទេសចិន ចំនួន៣ថ្ងៃ (ចាប់ពីថ្ងៃទី១៣ ដល់ថ្ងៃទី១៥ ខែឧសភា ឆ្នាំ២០២៦) តាមការអញ្ជើញរបស់ប្រធានាធិបតីចិន លោក Xi Jinping ។ មហាជនរិះគន់រូបភាពនេះ ពីព្រោះគោលជំហរនយោបាយរបស់មេដឹកនាំអាមេរិកអាចធ្វើឱ្យរង្គោះរង្គើក្នុងតំបន់អាមេរិកឡាទីន ។

ប្រធានាធិបតីស្តីទីវេណេស៊ុយអេឡា លោកស្រី Delcy Rodríguez បានបដិសេធយ៉ាងដាច់អហង្ការចំពោះគំនិតនេះ ដោយអះអាងថា វេណេស៊ុយអេឡាគឺជាប្រទេសឯករាជ្យ និងមិនយល់ព្រមក្លាយជារដ្ឋទី៥១ របស់អាមេរិកឡើយ ។

សូមរំឭកថា គោលជំហររបស់លោកប្រធានាធិបតី Trump កើតឡើងក្រោយពេលអាមេរិកចាប់ខ្លួនអតីតមេដឹកនាំវេណេស៊ុយអេឡា លោក Nicolas Maduro និងភរិយា កាលពីថ្ងៃទី៣ ខែមករា ឆ្នាំ២០២៦ ។ ទោះបីជាលោកស្រី Delcy Rodríguez បើកចំហឱ្យមានការវិនិយោគបរទេសលើវិស័យប្រេងក៏ដោយ ក៏លោកស្រីនៅតែរក្សាជំហរមិនព្រមបាត់បង់អធិបតេយ្យជាតិ ៕

នាយករដ្ឋមន្ត្រីថៃ លោក Anutin Charnvirakul បានផ្តល់សម្ភាសន៍ជាមួយសារព័ត៌មាននាថ្ងៃទី១៣ ខែឧសភា ឆ្នាំ២០២៦នេះ ដោយធ្វើការប្រៀបធៀបកូរ៉េខាងត្បូងដាក់ពលករថៃមកពី៤ខេត្តក្នុងបញ្ជីខ្មៅ (Blacklist) ហាមទៅធ្វើការរយៈពេល១ឆ្នាំពេញ គឺដូចគ្នានឹង «ត្រីស្អុយតែ១ក្បាល នាំឱ្យស្អុយ១កន្ត្រក» គឺនាំឱ្យប៉ះពាល់ដល់ភ្ញៀវទេសចរថៃទៅលេងកូរ៉េខាងត្បូងផងដែរ អាចនឹងពិបាកចូលប្រទេសនេះ លោកមិនអាចជួយអ្វីបានទេ ពីព្រោះពលករថៃបានប្រព្រឹត្តខុសច្បាប់ការងារ ។ រដ្ឋាភិបាលនឹងការពារ លុះត្រាតែពលកររងនូវការគំរា.មកំហែង ហើយក៏ផ្តាំផ្ញើឱ្យមានស្មារតីទទួលខុសត្រូវ កុំប្រព្រឹត្តកំហុស ។

លោកនាយករដ្ឋមន្ត្រី Anutin បាននិយាយពីកូរ៉េខាងត្បូងប្រកាសដាក់ពលករថៃមកពី៤ខេត្តក្នុងបញ្ជីខ្មៅហាមទៅធ្វើការរយៈពេល១ឆ្នាំ (ចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០២៦) រួមមាន ៖ ពលករខេត្តឧត្តរថានី, ខនកែន, ជ័យភូមិ និងមហាសារ៉ាខាម ដែលធ្វើការផ្នែកកសិកម្ម និងនេសាទតាមរដូវកាល ដោយសារពលករថៃមួយចំនួនធំធ្វើការក្រោមទិដ្ឋាការ E-8 (Visa E-8) លួ.ចរត់ចេញពីកន្លែងការងារ (កសិដ្ឋាន) និងបោះបង់ចោលកិច្ចសន្យាការងារជាមួយនិយោជកកូរ៉េខាងត្បូង ថា លោកពុំទទួលបានសេចក្តីរាយការណ៍ពីបញ្ហានេះទេ ប្រសិនបើពលករថៃទៅធ្វើការខុសច្បាប់ គឺកូរ៉េខាងត្បូងមានសិទ្ធិដាក់ក្នុងបញ្ជីខ្មៅ វាដូចគ្នានឹងពលករបរទេសធ្វើការខុសច្បាប់នៅថៃដែរ ហេតុនេះ កុំធ្វើអ្វីខុសច្បាប់នៅប្រទេសគេឱ្យសោះ ។

លោកថា ៖ «រដ្ឋាភិបាលថៃមិនការពារពលកររបស់ខ្លួនទេ ពីព្រោះពួកគេប្រព្រឹត្តខុសច្បាប់ដោយខ្លួនឯង ។ ប៉ុន្តែបើគោរពច្បាប់ ហើយរងនូវការគំរាមកំហែងនៅកូរ៉េខាងត្បូងនោះ រដ្ឋាភិបាលថៃនឹងជួយការពារយ៉ាងពេញទំហឹង» ។

លោកបានប្រៀបធៀបកូរ៉េខាងត្បូងដាក់ពលករថៃមកពី៤ខេត្តក្នុងបញ្ជីខ្មៅហាមទៅធ្វើការរយៈពេល១ឆ្នាំពេញ គឺដូចគ្នានឹង «ត្រីស្អុយ១ក្បាល នាំឱ្យស្អុយ១កន្ត្រក» គឺប៉ះពាល់ដល់ភ្ញៀវទេសចរថៃទៅលេងកូរ៉េខាងត្បូងផងដែរ មិនមែនប៉ះពាល់តែពលករទេ ប៉ុន្តែលោកចង់ឱ្យកូរ៉េខាងត្បូងបែងចែកឱ្យដាច់រវាងភ្ញៀវទេសចរ និងពលករ បើមិនដូច្នោះទេ នឹងខូចឈ្មោះដល់ជនជាតិថៃទាំងអស់ ។ កន្លងមក ភ្ញៀវទេសចរថៃជាច្រើនបានទៅទិញទំនិញ និងកែសម្ឆស្សនៅកូរ៉េខាងត្បូង ដែលថៃចាត់ទុកជាដៃគូពាណិជកម្មដ៏សំខាន់ ។

សូមរំឭកថា ពលករថៃដែលបានលួចរត់ នឹងត្រូវដាក់ក្នុងបញ្ជីខ្មៅ (Blacklist) មិនឱ្យចូលប្រទេសកូរ៉េខាងត្បូងជាថ្មីឡើយ រីឯអ្នកមានបំណងចង់ទៅធ្វើការពីខេត្តទាំង៤នេះ ក៏មិនអាចដាក់ពាក្យស្នើសុំទិដ្ឋាការ E-8 បានដែរក្នុងអំឡុងពេលហាមឃាត់ ។ ទោះយ៉ាងណា កូរ៉េខាងត្បូងនៅតែបន្តទទួលពលករបរទេសមកពីបណ្តាប្រទេសផ្សេងទៀត និងខេត្តផ្សេងនៃប្រទេសថៃដែលមិនរងការហាមឃាត់ ។

មន្ត្រីនាយកដ្ឋានការងារនៃក្រសួងការងារថៃដាស់តឿនថា ការរត់ចោលថៅកែ គឺជាការបំពានកិច្ចសន្យាការងារ និងខុសច្បាប់កូរ៉េខាងត្បូង ហើយពលករថៃដែលប្រព្រឹត្តខុសនឹងត្រូវកូរ៉េខាងត្បូងចាប់ខ្លួនដាក់ពន្ធនាគារ ឬបញ្ជូនត្រឡប់មកប្រទេសវិញ ដែលសកម្មភាពខុសច្បាប់ទាំងនេះនាំឱ្យប៉ះពាល់ដល់កិត្តិយសប្រទេសថៃ ជំរុញឱ្យកូរ៉េខាងត្បូងបាត់បង់ទំនុកចិត្តលើពលករថៃទាំងអស់ ។ ជាលទ្ធផល ពលករថៃគ្រប់ខេត្តនឹងបាត់បង់ឱកាសទៅធ្វើការនៅកូរ៉េខាងត្បូង មិនមែនប៉ះពាល់តែពលករ៤ខេត្តទេ ។ នាយកដ្ឋានការងារនៃក្រសួងការងារថៃបានសំណូមពរទៅកាន់ពលករ ចៀសវាងរត់ចោលថៅកែ និងអនុវត្តតាមច្បាប់ការងាររបស់កូរ៉េខាងត្បូង ៕