រដ្ឋធានីមូស្គូ៖ រហូតមកដល់ពេលនេះ ក្រុងមូស្គូ បានចោទប្រកាន់កងទ័ពអ៊ុយក្រែន បានឆ្លងកាត់ព្រំដែន មានចម្ងាយរាប់រយគីឡូម៉ែត្រ វាយប្រហារទៅលើមូលដ្ឋានកងទ័ពអាកាសយុទ្ធសាស្រ្ដរបស់រុស្ស៊ី ចំនួន២កន្លែងផ្សេងគ្នា នៅកណ្ដាលប្រទេស ធ្វើឲ្យខូចខាតដល់យន្ដហោះទម្លាក់គ្រាប់បែក ចំនួន២គ្រឿង។

សារព័ត៌មាន Politico បានចេញផ្សាយ កាលពីព្រឹក ថ្ងៃអង្គារ ទី៦ ខែធ្នូ ថា អាកាសយានដ្ឋានរបស់រុស្ស៊ី ចំនួន២កន្លែង ដែលប្រើប្រាស់ សម្រាប់ការវាយប្រហារ នៅក្នុងសង្គ្រាមអ៊ុយក្រែន ក៏មានសេចក្ដីរាយការណ៍ អំពីការវាយប្រហារ។

លោក អេនតូ ហ្គេរ៉ាសឆែនកូ (Anton Gerashchenko) ទីប្រឹក្សា ក្រសួងមហាផ្ទៃអ៊ុយក្រែន បានបញ្ជាក់ ថា រុស្ស៊ី បានប្រើប្រាសមូលដ្ឋានទ័ពអាកាសទាំងនេះ សម្រាប់ការវាយប្រហារ ដោយមីស៊ីល ប្រឆាំងនឹងអ៊ុយក្រែន ចាប់តាំងពីការចាប់ផ្ដើមសង្គ្រាមទ្រង់ទ្រាយធំ កាលពីថ្ងៃទី២៤ ខែកុម្ភៈ រហូតមក។

ក្រុងមូស្គូ បានបញ្ជាក់ កាលពីថ្ងៃចន្ទ ថា ប្រព័ន្ធការពារដែនអាកាសរបស់រុស្ស៊ី បានស្ទាក់ចាប់យន្ដហោះគ្មានមនុស្សបើក ឬ ដ្រូន របស់អ៊ុយក្រែន នៅលើអាកាសយានដ្ឋានយោធា ចំនួន២កន្លែង ស្ថិតនៅលើទឹកដីរុស្ស៊ី ដែលមានចម្ងាយ រាប់រយគីឡូម៉ែត្រ ពីព្រំដែន រវាងប្រទេសទាំង២។

ក្រសួងការពារជាតិរុស្ស៊ី បានបញ្ជាក់ នៅក្នុងសេចក្ដីថ្លែងការណ៍មួយ ថា កម្ទេចកម្ទី នៃដ្រូន ចំនួន២គ្រឿង ដែលខូចខាតតិចតួច បានធ្លាក់មកលើដី។ ចំណែកទីភ្នាក់ងាររុស្ស៊ី ចំនួន៣ បានបាត់បង់ជីវិត និង ៤នាក់ផ្សេងទៀត បានរងរបួស នៅក្នុងឧបទ្ទវហេតុ វាយប្រហារទៅលើអាកាសយានដ្ឋានយោធា ឌីយ៉ាហ្គីឡែវ៉ូ (Dyagilevo) នៅជិតទីក្រុង Ryanzan និង អាកាសយានដ្ឋានយោធា អេនហ្គែលស៍ (Engels) នៅតំបន់សារ៉ាតូវ (Saratov) ដែលមានចម្ងាយប្រហែល ៧៥០គីឡូម៉ែត្រ ពីរដ្ឋធានីមូស្គូ។

យន្ដហោះទម្លាក់គ្រាប់បែកយុទ្ធសាស្រ្ដហោះហើរ រយៈចម្ងាយឆ្ងាយ ដូចជា ប្រភេទ Tu-160 និង Tu-95 ត្រូវគេជឿ ថា ស្ថិតក្នុងមូលដ្ឋានកងទ័ពអាកាស ឌីយ៉ាហ្គីឡែវ៉ូ (Dyagilevo) និង Engels ។ អាកាសយានដ្ឋានយោធាទាំង២នេះ ត្រូវបានគេរាយការណ៍ ថា បានផ្ទុះយ៉ាងខ្លាំង ទាំងព្រឹកព្រលឹមតែម្ដង ប៉ុន្ដែមិនមានសេចក្ដីរាយការណ៍ភ្លាមៗ អំពីការខូចខាតយន្ដហោះទម្លាក់គ្រាប់បែករបស់រុស្ស៊ី ទាំងនោះឡើយ។

ត្រឹមតែរយៈពេលប៉ុន្មានម៉ោង ក្រោយការវាយប្រហារទៅលើអាកាសយានដ្ឋានយោធា នៅក្នុងប្រទេសរុស្ស៊ី នោះមក ក្រុងមូស្គូ បានបាញ់ស្រោចគ្រាប់មីស៊ីល ទៅលើគោលដៅនានា នៅពាសពេញ ប្រទេសអ៊ុយក្រែន។ ប៉ុន្ដែប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី បានអះអាង ថា ប្រព័ន្ធការពារដែនអាកាសរបស់ក្រុងកៀវ បានបាញ់ទម្លាក់ ស្ទើរតែទាំងអស់។

ទោះជាយ៉ាងណា ក្រុមមន្រ្ដីរដ្ឋាភិបាលក្រុងកៀវ មិនបានធ្វើការអត្ថាធិប្បាយ ជាផ្លូវការណាមួយ ជុំវិញការវាយប្រហារទៅលើមូលដ្ឋានទ័ពអាកាសរបស់ក្រុងមូស្គូ ស្ថិតក្នុងប្រទេសរុស្ស៊ី ដែលមានចម្ងាយរាប់រយគីឡូម៉ែត្រ ពីព្រំដែនជាប់ជាមួយនឹងអ៊ុយក្រែន នោះឡើយ។ ប៉ុន្ដែកងទ័ពអាកាសរបស់អ៊ុយក្រែន គ្រាន់តែសរសេរ នៅលើបណ្ដាញសង្គមធ្វីធើរ ថា «តើមានអ្វីកើតឡើង?» ដោយរួមជាមួយនឹងរូប Emoji និង រូបភាពពីអ្វីដែលមើលទៅដូចជាយន្ដហោះទម្លាក់គ្រាប់បែក រងនូវការខូចខាតយ៉ាងដំណំ។

ក្រុងមូស្គូ បានចោទប្រកាន់អ៊ុយក្រែន ថា បានវាយលុកចូលទៅក្នុងទឹកដីរបស់ខ្លួន លើសពីពេលមុន។ ការវាយប្រហារនេះ បានចូលយ៉ាងជ្រៅទៅក្នុងប្រទេសរុស្ស៊ី ដោយចម្ងាយឆ្ងាយជាងការវាយប្រហារ នាពេលមុនៗ ហើយក៏ជាលើកដំបូងផងដែរ។

ដោយឡែក លោក ស្ដែវ រ៉ូសេនប៊ឺក (Steve Rosenberg) និពន្ធនាយកជាភាសារុស្ស៊ីរបស់ BBC បាននិយាយថា ការវាយប្រហាររបស់អ៊ុយក្រែន ទៅចូលជ្រៅ ទៅក្នុងប្រទេសរុស្ស៊ី នឹងធ្វើឱ្យវិមានក្រឹមឡាំង កាន់តែអាម៉ាស់ខ្លាំងឡើងបន្ថែមទៀត។

ទោះជាយ៉ាងណា លោក មីខៃឡូ ប៉ូដូលយ៉ាក់ (Mykhylo Podolyak) ទីប្រឹក្សា ប្រធានាធិបតីអ៊ុយក្រែន ហាក់ដូចជានិយាយសំដៅ ទៅលើឧបទ្ទវហេតុ ដែលបានរាយការណ៍ នៅក្នុងបណ្ដាញសង្គម Tweet ដោយសរសេរ ថា «ប្រសិនបើអ្វីមួយត្រូវបានបាញ់ចូលទៅក្នុងដែនអាកាសរបស់ប្រទេសផ្សេង មិនយូរ មិនឆាប់ វត្ថុហោះហើរដែលគេមិនស្គាល់ នឹងត្រឡប់ទៅចំណុចចេញដំណើរវិញ»។

ដោយឡែក រូបភាពពីផ្កាយរណប បានថត កាលពីថ្ងៃអាទិត្យ បង្ហាញពីកងយន្ដហោះទម្លាក់គ្រាប់បែកធុនធ្ងន់របស់រុស្ស៊ី មានចំនួនយ៉ាងច្រើន កំពុងតែស្ថិតក្នុងមូលដ្ឋានកងទ័ពអាកាស Engels តំបន់សារ៉ាតូវ ។ រូបភាពនោះ បានបង្ហាញ ពីយន្ដហោះទម្លាក់គ្រាប់បែកយុទ្ធសាស្រ្ដរបស់រុស្ស៊ី ជាច្រើនគ្រឿង រួមមាន ប្រភេទ Tu-160 និង Tu-95 មានសមត្ថភាពអាចបាញ់មីស៊ីលគ្រូស ដែលជាអាវុធប្រើប្រាស់ វាយប្រហារ នៅក្នុងប្រទេសអ៊ុយក្រែន។

មូលដ្ឋានកងទ័ពអាកាសសាគី (Saky) របស់កងទ័ពជើងទឹករុស្ស៊ី ប្រចាំសមុទ្រខ្មៅ នៅភាគខាងលិចឧបទ្វីគ្រីមៀ (Crimea) និង មូលដ្ឋានយោធាមួយកន្លែងទៀត នៅភាគខាងជើងឧបទ្វីបនេះ ដែលក្រុងមូស្គូ បានរឹបអូសពីអ៊ុយក្រែន កាលពីអំឡុងឆ្នាំ២០១៤ បានរងការបំផ្ទុះ កាលពីដើមខែសីហាកន្លងទៅ ដោយបានបំផ្លាញយន្ដហោះចម្បាំង អស់ជាច្រើនគ្រឿង និង ខូចខាតហេដ្ឋារចនាសម្ព័ន្ធអាកាសយានដ្ឋាន។

ទោះជាយ៉ាងណា ក្រោយការវាយប្រហារភា្លមៗនោះ អ៊ុយក្រែន មិនបានធ្វើដឹងឮ ឬធ្វើអត្ថាធិប្បាយអ្វីឡើយ។ លុះក្រោយមក ទើបក្រុងកៀវ បានប្រកាសទទួលស្គាល់ អំពីសកម្មភាពរបស់ខ្លួន។ ចំណែកការបំផ្ទុះ នៅក្នុងព្រលានយន្ដហោះយោធារបស់រុស្ស៊ី ចំនួន២កន្លែងផ្សេងគ្នា ចុងក្រោយនេះ នឹងធ្វើឲ្យគេនឹកស្រមៃ ថា អាចជាសកម្មភាពរបស់ក្រុងកៀវ៕

បរទេស៖ ប៉ូលិសជប៉ុនបានធ្វើការចាប់ខ្លួនគ្រូស្រីមួយក្រុមដែលធ្វើការក្នុងសាលាមត្តេយ្យមួយកន្លែងនៅក្នុងខេត្ត Shizuoka ក្នុងប្រទេសជប៉ុនដើម្បីកាត់ទោសពីបទទារុណកម្មលើកុមាររាប់សិបនាក់។

ទីភ្នាក់ងារស៊ីនហួរបានរាយការណ៍ពីទីក្រុងតូក្យូ ប្រទេសជប៉ុនកាលពីថ្ងៃទី ៤ ខែធ្នូ ឆ្នាំ២០២២ កន្លងទៅនេះ ដោយមានរយៈប្រព័ន្ធផ្សព្វផ្សាយក្នុងស្រុកជាច្រើននៅក្នុងប្រទេសជប៉ុនបានរាយការណ៍ថា ប៉ូលិសបានធ្វើការចាប់ខ្លួនគ្រូស្រីបីនាក់ដែលធ្លាប់ធ្វើការនៅសាលាមត្តេយ្យ Sakura Hoikuen ក្នុង ក្រុង Susono ខេត្ត Shizuoka ភាគកណ្តាលនៃប្រទេសជប៉ុន។

ការចាប់ខ្លួននេះធ្វើឡើងក្រោយពីមានការចោទប្រកាន់ពីបទរំលោភបំពានលើកុមារ ដែលស្ថិតនៅក្រោមការថែទាំរបស់ពួកគេ។ ដោយគេបានដឹងថា នៅចន្លោះខែមិថុនា និងខែសីហា កុមារតូចៗជាច្រើននៅអាយុត្រឹម១ឆ្នាំស្ថិតនៅក្រោមការគ្រប់គ្រោងរបស់គ្រូទាំងនោះ ហើយពួកគេបានរំលោភបំពាន់លើកុមារ ដោយការបង្ខំកុមារឱ្យដោះខោគំរាមក្មេងដោយកាំបិត និងទម្រង់នៃការធ្វើបាបជាច្រើនផ្សេងទៀត។

យ៉ាងណាមិញគ្រូបង្រៀនទាំងនោះបានទទួលស្គាល់ពីអាកប្បកិរិយាបំពានរបស់ពួកគេ ប៉ុន្តែគេបានលើកឡើងពីហេតុផលថាវាជាការព្យាយាមបង្រៀនវិន័យដល់កុមារ។

ទោះជាយ៉ាងណាក្រុមអ្នកស៊ើបអង្កេតកំពុងពិនិត្យដោយប្រុងប្រយ័ត្ននូវកំណត់ត្រាដែលទទួលបាន ព្រោះគេជឿថា ការរំលោភបំពាននៅតែបន្តនៅក្នុងសាលានេះ ដែលបង្ខំឱ្យបុគ្គលិកទាំងអស់ចុះកិច្ចសន្យានោះ នឹងមិនបង្ហាញពីអ្វីដែលបានកើតឡើងនៅក្នុងសាលានោះទេ ឬអាចដោយសារតែការភ័យខ្លាច ទើបភស្តុតាងអាចនឹងត្រូវបំផ្លាញ។

យ៉ាងណាមិញក្រុមមន្ត្រីប៉ូលិសបានធ្វើការសាកសួរលម្អិតទៅកាន់នាយកសាល ប៉ុន្តែ មកទល់ពេលនេះនៅមិនទាន់មានការឆ្លើយបកណាមួយមកកាន់ប៉ូលិសនៅឡើយទេ៕ ប្រភព៖ Dailynews

រុស្សី៖ ឧបនាយករដ្ឋមន្រ្តីរុស្សីលោក អាឡិចហ្សេនឌើ ណូវ៉េក (Alexander Novak) បាននិយាយកាលពីថ្ងៃអាទិត្យថា ប្រទេសរុស្ស៊ីនឹងមិនលក់ប្រេងក្នុងតម្លៃកំណត់តម្លៃ ៦០ដុល្លារ ក្នុងមួយបារ៉ែល ដែលព្រមព្រៀងដោយ EU និងប្រទេស G7 នោះទេ លោកចាត់ទុកថាលោកខាងលិចកំពុងតែឃោសនាព័ត៌មានក្លែងក្លាយជុំវិញនៃតម្លៃប្រេង។

ក្រុមប្រឹក្សាសហភាពអឺរ៉ុបបានប្រកាសកាលពីថ្ងៃសៅរ៍ថា សហភាពអឺរ៉ុបបានយល់ព្រមកំណត់តម្លៃប្រេងពីសមុទ្ររុស្ស៊ីនៅត្រឹម ៦០ ដុល្លារក្នុងមួយបារ៉ែល ឬយ៉ាងហោចណាស់ ៥% ក្រោមអត្រាទីផ្សារ។ រដ្ឋ G7 ដែលនៅសេសសល់ និងអូស្ត្រាលីបានធ្វើសេចក្តីប្រកាសស្រដៀងគ្នាកាលពីថ្ងៃសុក្រ ដោយបញ្ជាក់ថា ពួកគេក៏នឹងបដិសេធមិនទទួលយកប្រេងរុស្ស៊ីលើសពី៦០ ដុល្លារក្នុងមួយបារ៉ែលឡើយ។ រុស្ស៊ីបានទទូចម្តងហើយម្តងទៀតថា ខ្លួននឹងមិនផ្គត់ផ្គង់ប្រេងដល់ប្រទេសដែលមិនគោរពតម្លៃនេះទេ។

បន្ថែមពីនេះលោកបាននិយាយនៅលើប៉ុស្តិ៍ទូរទស្សន៍ រ៉ូស៊ីយ៉ា (Rossiya-24) កាលពីថ្ងៃអាទិត្យថា “យើងនឹងលក់ប្រេង និងផលិតផលប្រេងទៅឱ្យប្រទេសដែលនឹងធ្វើការជាមួយយើងក្នុងលក្ខខណ្ឌទីផ្សារ បើទោះបីជាយើងនឹងត្រូវកាត់បន្ថយការផលិតក៏ដោយ” ។

លោក Novak បានព្យាករណ៍ថាតម្លៃនឹង “ធ្វើឱ្យមានអស្ថិរភាព” ទីផ្សារពិភពលោក ហើយបានប្រកែកថាវាផ្ទុយនឹងច្បាប់របស់អង្គការពាណិជ្ជកម្មពិភពលោក។ លោកបន្តថា រុស្ស៊ីកំពុងតែធ្វើការលើយន្តការដើម្បីកាត់បន្ថយវិធានការនេះ៕

បរទេស៖ រុស្សី បានរកឃើញសាកសពសត្វផ្សោតស្លាប់ជាង ២.៥០០ ក្បាល ដែលលិចនៅលើច្រាំងសមុទ្រកាសព្យែន (Caspian)  នៃប្រទេសរុស្ស៊ី ហើយក្រុមមន្ត្រីពាក់ព័ន្ធកំពុងស៊ើបអង្កេតមូលហេតុ នៃការស្លាប់អស់ជាច្រើននេះ។

ទីភ្នាក់ងារសារព័ត៌មាន BBC បានចេញផ្សាយនាថ្ងៃទី៤ ខែធ្នូ ឆ្នាំ២០២២ នេះថា មន្ត្រីរុស្ស៊ីបានរកឃើញសាកសពសត្វផ្សោតដែលងាប់នៅឆ្នេរសមុទ្រកាសព្យែន ភាគខាងត្បូងនៃប្រទេស។ ដោយសត្វគេបានបញ្ជាក់ថាវាបានកើនឡើងដល់ជាង ២.៥០០ក្បាល បន្ទាប់ពីរបាយការណ៍មុនបាននិយាយថា មានប្រហែល ៧០០ ក្បាលប៉ុណ្ណោះដែលរកឃើញបានស្លាប់។

ជាមួយគ្នានោះក្រសួងធនធានធម្មជាតិ និងបរិស្ថាននៃសាធារណៈរដ្ឋ ដាដេតាន់ តំបន់ភាគនិរតីរបស់ រុស្ស៊ី បានប្រាប់ឱ្យដឹងថា សាកសពមួយចំនួនធំ ត្រូវបានរកឃើញនៅក្នុងមាត់ទន្លេពីរគឺ Zuluk និង Shurika ហើយអ្នកជំនាញបានយកគំរូពីគ្រោងឆ្អឹងមកវិភាគ និងត្រួតពិនិត្យ ប៉ុន្តែមូលហេតុនៃការស្លាប់នឹងត្រូវបានដឹងបន្ទាប់ពីលទ្ធផលនៃការធ្វើតេស្តមន្ទីរពិសោធន៍។

គួរបញ្ជាក់ថាផ្សោតសមុទ្រកាសព្យែន ត្រូវបានចុះក្នុងបញ្ជីជាប្រភេទសត្វជិតផុតពូជដោយអង្គការអន្តរជាតិសម្រាប់ការអភិរក្សធម្មជាតិ (IUCN) ចាប់តាំងពីឆ្នាំ ២០០៨ ជាមួយនឹងចំនួនសត្វនៅសេសសល់ ប្រហែល ៧០,០០០ក្បាល ឥឡូវនេះ ដោយសារតែពួកវាត្រូវបានគេបរបាញ់យ៉ាងខ្លាំង និងរងផលប៉ះពាល់ដោយការបំពុលឧស្សាហកម្មផងដែរ៕ ប្រភព៖ Thairath

អត្ថបទដោយ៖ យិត ម៉ានិល